ᐱᓪᓗᒍ: ᐃᑦᓯᕙᐅᑕᒧᑦ ᐱᒋᐊᖅᑎᑕᐅᓯᒪᔪᖅ ᐊᑲᐅᖏᓕᐅᕈᑎ ᐊᒻᒪ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᔪᒪᔪᒥᑦ ᖃᐅᔨᓴᕐᓂᖅ ᐱᓕᕆᔾᔪᓯᒥᓂᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᐱᓕᕆᐊᖃᖅᑎᓪᓗᒋᑦ ᑭᖕᖓᕐᓂ, ᓄᓇᕗᑦ ᔪᓂ 1-ᖑᑎᓪᓗᒍ, 2020

ᒪᓕᑦᑐᒋᑦ ᑎᑎᕋᕐᓯᒪᕕᒻᒦᑦᑐᑦ 45.76(1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᒪᓕᒐᕐᒥ

ᐊᑲᐅᖏᓕᐅᕈᑎᓕᒃ:
ᐃᑦᓯᕙᐅᑕᖓᑦ ᓄᓇᓕᕐᒥᐅᑕᒥᑦ ᕿᒥᕐᕈᔩᑦ ᐊᒻᒪ ᐊᑲᐅᖏᓕᐅᕈᑎᐅᔪᓂᑦ ᖃᐅᔨᓴᖅᑏᑦ ᐅᑯᓄᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP)

ᓄᓇᕗᑦ ᒐᕙᒪᒃᑯᑦ ᑭᐅᔾᔪᑎᖓ ᑭᖑᓪᓕᖅᐹᖅᓯᐅᑎᒧᑦ ᐅᓂᒃᑳᓕᐊᒧᑦ (Government of Nunavut Response to the Final Report) [PDF]

PDF Format

Related Links

• CRCC Final Report
  February 28, 2023
• CRCC Interim Report
  June 22, 2022
• RCMP Commissioner's Response
  December 15, 2022
• ᖃᐅᔨᓴᖅᑏᑦ ᑭᖑᓪᓕᖅᐹᖓᑦ ᐅᓂᒃᑳᓕᐊᖏᓐᓂᑦ
  ᕕᕝᕗᐊᕆ 28, 2023
• ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑕ ᑭᐅᔾᔪᑎᖓ
  ᑏᓰᐱᕆ 15, 2022

ᓇᓗᓇᐃᔭᐃᔾᔪᑎ

[1] ᔪᓂ 2020, ᖃᐅᔨᓴᖅᑏᑦ ᕿᒥᕐᕈᐊᓚᐅᖅᑐᑦ ᐊᐅᓚᔫᒥᑦ ᐊᔾᔨᓕᐅᖅᑕᐅᔪᕕᓂᕐᒥᒃ ᑕᑯᑦᓴᐅᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓄᓇᒃᑰᔫᖓᑦ ᑐᕌᖅᑎᓪᓗᒍ ᐊᖑᑎᒧᑦ. ᐊᐅᓚᔫᖅ ᐊᔾᔨᓕᐅᖅᑕᐅᓯᒪᔪᒥ ᑕᑯᑦᓴᐅᔪᖃᓕᖅᑐᓂ ᐊᖁᑎᐅᑉ ᒪᑐᐊ ᒪᑐᐃᖅᑕᐅᑎᓪᓗᒍ, ᐊᑦᑐᐃᓗᓂ ᐊᖑᑎᒥᑦ ᐊᒻᒪ ᐅᕐᕈᑎᑕᐅᓗᓂ ᐊᖑᑎ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᐊᖁᓚᐅᖅᑐᖅ ᓄᓇᒃᑰᔫᒥᑦ, ᐊᒻᒪ ᐊᓯᖏᑦ ᐃᓚᒋᔭᐅᔪᑦ, ᓱᒡᒑᓪᓗᑎᒃ ᑎᒍᓯᓕᖅᑐᑎᒃ ᐊᖑᑎᒥᑦ.

[2] ᖃᐅᔨᓴᖅᑏᑦ ᐊᓯᖏᓐᓂᑦ ᑐᑭᓯᒋᐊᕈᑎᓂᑦ ᑐᓴᖅᑎᑕᐅᓚᐅᖅᑐᑦ, ᐊᖑᑎᐅᔪᖅ ᑎᒍᔭᐅᓯᒪᕕᒻᒨᖅᑕᐅᓯᒪᓕᕐᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᕆᕝᕕᖓᓂ, ᐊᓯᐊᓄᑦ ᑎᒍᔭᐅᓯᒪᔪᒧᑦᑕᐅᖅ ᐱᒋᐊᖅᑕᐅᓂᕋᖅᑐᒥᓂᖅ. ᐊᖑᑎᐅᔪᖅ ᓂᐊᖁᖓᒍᑦ ᐋᓐᓂᕐᓯᒪᓚᐅᖅᑐᖅ ᐊᒻᒪ ᖃᖓᑕᓲᒃᑯᑦ ᐃᖃᓗᓐᓅᕈᔾᔭᐅᓕᖅᑐᒥᓂᖅ ᖃᐅᔨᓴᖅᑕᐅᓂᐊᕐᒪᑦ.

[3] ᐋᒐᓯ 18, 2020, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᑦᓯᕙᐅᑕᖓᑦ ᓄᓇᓕᕐᒥᐅᑕᒥᑦ ᕿᒥᕐᕈᔩᑦ ᐊᒻᒪ ᐊᑲᐅᖏᓕᐅᕈᑎᐅᔪᓂᑦ ᖃᐅᔨᓴᖅᑏᑦ ᐅᑯᓄᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ("ᖃᐅᔨᓴᖅᑏᑦ") ᓴᖅᑮᓚᐅᖅᑐᑦ ᐃᑦᓯᕙᐅᑕᕐᒧᑦ-ᐱᒋᐊᖅᑎᑕᒥᑦ ᐊᑲᐅᖏᓕᐅᕈᑎᒥᑦ ᐱᓕᕆᔾᔪᓯᒥᓂᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᓚᒋᔭᐅᓚᐅᖅᑐᑦ ᖃᓄᐃᒍᑎᐅᔪᒧᑦ, ᐊᑐᖅᑕᐅᓚᐅᖅᑐᒥᑦ ᑭᖕᖓᕐᓂ (ᖃᐅᔨᒪᔭᐅᓚᐅᖅᑐᖅ ᑲᐃᑉ ᑐᐊᕐᓴᑦ), ᓄᓇᕘᒥ, ᐅᓐᓄᖓᓂ ᔪᓂ 1, 2020. ᖃᐅᔨᓴᖅᑏᑦ ᐊᐅᓚᑦᑎᓚᐅᖅᑐᑦ ᖃᐅᔨᓴᕐᓂᕐᒥᑦ ᐃᑦᓯᕙᐅᑕᐅᑉ ᐊᑲᐅᖏᓕᐅᕈᑎᖓᓂᑦ ᒪᓕᑦᑐᒋᑦ ᑎᑎᕋᕐᓯᒪᕕᒻᒦᑦᑐᑦ 45.66(1) ᐅᕙᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ ᒪᓕᒐᖓᑦ (RCMP ᒪᓕᒐᖅ).

[4] ᖃᐅᔨᓴᓚᐅᖅᑎᓪᓗᒋᑦ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᔾᔪᑎᖃᖅᑐᑎᒃ ᑎᒍᓯᓚᐅᖅᑐᑦ ᐊᖑᑎᒥᑦ ᐊᒻᒪ ᐊᑦᓱᕈᕐᓂᕆᓚᐅᖅᑕᖓᑦ ᑎᒍᓯᓇᓱᐊᖅᑐᑎᒃ ᓈᒻᒪᓚᐅᖅᑐᖅ. ᑭᓯᐊᓂᓕ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐊᑦᑕᓇᖅᑐᒥᓂᐅᓂᖓᓂᑦ ᐊᒻᒪ ᓈᒻᒪᒐᓂ ᐊᖁᑕᐅᓂᖓ ᐸᓖᓯᒃᑯᑦ ᓄᓇᒃᑰᔫᖓᑦ ᖃᓂᒋᔭᖃᓗᐊᖅᑐᓂ ᐊᖑᑎᒥᑦ, ᓇᓗᓇᐃᔭᐃᑎᐅᔪᑦ ᑕᑯᑦᓴᐅᑎᑦᓯᒐᓗᐊᖅᑎᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᐳᕐᓯᒐᓱᓐᓂᖏᒃᑲᓗᐊᕐᒪᑕ ᐊᖑᑎᒥᑦ ᒪᑐᒧᑦ.

[5] ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ ᖃᓄᐃᒍᑎᐅᓚᐅᖅᑐᓂᑦ ᑎᒍᔭᐅᒪᕕᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ, ᐱᖃᓯᐅᔾᔭᐅᓗᓂ ᐃᓂᖃᑦᓯᐊᖏᓐᓂᖏᓐᓂᑦ ᑎᒍᔭᐅᒪᕙᑦᑐᑦ, ᑕᕝᕘᓇ ᐊᑦᑕᓇᖅᑐᓂᑦ ᓴᖅᑮᓯᒪᓕᖅᑐᑎᒃ, ᐊᖑᑎᐅᑉ ᐋᓐᓂᑎᖅᑕᐅᓚᕿᓕᖅᑐᒥᓂᐅᓗᓂ ᑎᒍᔭᐅᒪᕕᒻᒦᑎᓪᓗᒋᑦ. ᖃᐅᔨᓴᖅᑏᑦ ᓇᓗᓇᐃᔭᐃᓚᐅᕐᒥᔪᑦ ᓱᕋᐃᔾᔪᑎᒥᓂᕐᓂᒃ ᐱᔾᔪᑎᒋᓪᓗᒍ ᐃᓗᐊ ᑭᖕᖓᐃᑦ ᐸᓖᓯᒃᑯᖏᑕ, ᓴᖅᑮᓯᒪᔾᔪᑎᐅᓚᐅᖅᑐᓂᑦ ᐃᓗᓯᒃᑯᑦ ᐊᒻᒪ ᐊᑦᑕᓇᔾᔭᐃᕐᓯᒪᓂᒃᑯᑦ ᐅᓗᕆᐊᓇᖅᑐᓂᑦ ᑎᒍᔭᐅᒪᔪᓄᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᖅᑲᓇᐃᔭᖅᑎᖏᓐᓄᑦ.

[6] ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ ᓇᓗᓇᓚᐅᖏᑐᒻᒪᕆᐅᔪᓂᑦ ᐃᑲᔫᑎᖃᑦᓯᐊᖏᓐᓂᖏᓐᓂ ᐱᔨᑦᓯᕋᐅᑎᐅᔪᑦ ᑕᑯᔭᐅᓚᐅᖅᑐᑦ ᐱᓕᕆᐊᖑᑎᓪᓗᒍ. ᐱᖃᓯᐅᔾᔭᐅᓗᑎᒃ ᐃᖅᑲᓇᐃᔭᖅᑎᖃᑦᓯᐊᖏᓐᓂᖅ, ᐱᔭᕆᐊᑐᑦᓴᐸᓐᓂᖅ ᐱᓇᓱᐊᕐᓂᒃᑯᑦ ᕿᓚᒥᐅᔫᒥᔪᖅ ᐋᓐᓂᐊᔪᓕᕆᔨᓂᑦ ᐃᑲᔪᖅᑕᐅᓇᓱᐊᕈᑎᓂᑦ, ᓈᒻᒪᖏᑦᑐᓂᑦ ᐱᓕᕆᕝᕕᖃᕐᓂᖏᑦ ᐊᒻᒪ ᓱᓇᒃᑯᑖᑦᓴᓂᑦ ᐱᓕᕆᔾᔪᑎᑦᓴᓂᑦ, ᐊᒻᒪ ᐱᓕᒻᒪᓴᖅᑕᐅᓯᒪᑦᑎᐊᖏᑦᑐᓂᑦ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᑕᒪᓐᓇ ᐃᑲᔪᖅᑎᖃᑦᓯᐊᖏᓐᓂᖅ ᐱᓕᕆᔾᔪᑎᑦᓴᓂᑦ ᐱᔾᔪᑎᐅᓚᐅᕆᐊᖓ ᓇᓗᓇᐃᔭᐃᓂᒃᑯᑦ ᐃᓚᖏᓐᓂᑦ ᐊᑐᖅᑕᐅᓚᐅᖅᑐᓂᑦ ᐊᖑᑎᒧᑦ ᖃᓄᐃᒍᑎᖃᖅᑎᓪᓗᒋᑦ. ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ ᐃᑲᔪᖅᑎᖃᑦᓯᐊᖏᓐᓂᖅ ᐱᓕᕆᔾᔪᑎᑦᓴᓂᑦ ᐊᑐᖅᑕᐅᓕᖅᐸᒻᒪᑕ ᐃᓱᒫᓘᑎᐅᔪᓐᓇᖅᑐᓂᑦ ᐱᔾᔪᑎᒋᓪᓗᒋᑦ ᐱᓕᕆᔾᔪᑎᒍᑦ ᐃᓚᐃᓐᓈᖅᑕᐅᕙᓐᓂᕐᒥᑦ ᓇᐅᒃᑯᑦ. ᕿᓯᐊᓂᓕ, ᖃᐅᔨᓴᖅᑏᑦ ᖃᐅᔨᓚᐅᖏᑦᑐᑦ ᓇᓗᓇᐃᔭᐃᑎᑦᓴᓂᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐃᓚᒋᔭᐅᓚᐅᖅᑐᑦ ᐱᓕᕆᐊᒥ ᐱᓕᕆᔪᒥᓂᐅᓂᖏᓐᓂᑦ ᐱᑦᑎᐊᕋᑎᒃ ᖃᓄᑐᐃᓐᓇᖅ.

[7] ᖃᐅᔨᓴᖅᑏᑦ ᐊᑐᓕᖁᔨᔾᔪᑎᓕᐅᓕᓚᐅᖅᑐᑦ ᐱᔾᔪᑎᒋᓪᓗᒋᑦ ᐱᔾᔪᑎᐅᓚᐅᖅᑐᑦ ᓇᓗᓇᐃᔭᖅᑕᐅᔪᑦ, ᐱᖃᓯᐅᔾᔭᐅᓗᑎᒃ ᐊᐅᓚᑦᑎᔾᔪᑎᒍᑦ ᐱᓕᒻᒪᑦᓴᐃᕙᓐᓂᖅ ᑕᐃᒃᑯᓂᖓ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓂᑦ ᐱᖃᑕᐅᓚᐅᖅᑐᓂᑦ ᐊᒻᒪ ᐊᔾᔨᒌᖏᑦᑐᓂᑦ ᐱᓕᕆᔾᔪᑎᐅᔪᓂᑦ ᐱᔾᔪᑎᐅᓗᑎᒃ ᖃᓄᐃᓕᖓᓂᖓ ᐃᓗᐊᑕ ᐸᓖᓯᒃᑯᑦ ᐱᓕᕆᕝᕕᖓᑕ ᐊᒻᒪ ᐱᓕᕆᔾᔪᑎᒍᑦ ᐱᔾᔪᑎᐅᔪᑦ ᓇᓗᓇᐃᔭᖅᑕᐅᓚᐅᖅᑐᑦ.

ᐱᓕᕆᐊᖑᓂᖏᑦ

ᐊᓯᖏᑦ ᖃᐅᔨᓴᕐᓂᐅᔪᑦ

[8] ᐊᑕᐅᓯᐊᕋᑎᒃ ᖃᐅᔨᓴᖅᑕᐅᓯᒪᓕᖅᑐᖅ ᐱᔾᔪᑎᐅᓗᓂ ᑕᒪᓐᓇ ᐱᔾᔪᑎᐅᔪᖅ. ᐊᑐᓂ ᐊᔾᔨᒌᖏᑦᑐᓂᑦ ᐱᓕᕆᔾᔪᑎᖃᖅᑐᑎᒃ ᐱᔪᑦ ᐊᒻᒪ ᑐᕌᒐᖃᖅᐸᑦᑐᑎᒃ ᐊᔾᔨᒌᖏᓐᓂᖏᓐᓂᑦ ᐃᓗᓕᖏᓐᓂᑦ ᖃᓄᐃᒍᑎᐅᓯᒪᔪᑦ.  

[9] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᕙᓂ "V" ᐱᓕᕆᕝᕕᒻᒥ (ᓄᓇᕗᑦ) ᐊᒻᒪ ᒐᕙᒪᒃᑯᑦ ᓄᓇᕘᒧᑦ ᑎᑎᖅᑲᒃᑯᑦ ᑐᑭᓯᒋᐊᕈᑎᖃᕐᒪᑕ^{Footnote 1} ᐃᓚᒋᓪᓗᒋᑦ ᐋᑐᕚ ᐸᓖᓯᒃᑯᑦ (OPS) ᑖᒃᑯᐊ ᓯᓚᑖᓃᖔᕐᓯᒪᓪᓗᑎᒃ ᖃᐅᔨᓴᕆᐊᖃᖅᐸᑦᑐᑎᒃ ᐱᒻᒪᕆᐅᔪᓂᑦ ᐸᓖᓯᒃᑯᑦ ᐃᓚᒋᔭᐅᓗᑎᒃ ᖃᓄᐃᒍᑎᐅᓯᒪᔪᓂᑦ ᐱᖃᑕᐅᓯᒪᓪᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ. ᔪᓂ 3-ᒥ, 2020, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᒃᑲᐃᓚᐅᖅᑐᑦ ᐋᑐᕚ ᐸᓖᓯᒃᑯᖏᓐᓂᑦ (OPS),^{Footnote 2} ᐊᒻᒪ ᐋᑐᕚ ᐸᓖᓯᒃᑯᖏᑦ (OPS) ᓇᓗᓇᐃᕐᓯᓚᐅᖅᑐᑦ ᐊᐅᓚᑦᑎᒍᓐᓇᕐᓂᕐᒥᓂᒃ "ᓯᓚᑖᓂᑦ ᐱᓯᒪᔪᑦ ᖃᐅᔨᓴᕐᓂᒃᑯᑦ ᕿᒥᕐᕈᐊᖅᑎᐅᓗᑎᒃ" ᔪᓂ 1-ᒥ, 2020, ᖃᓄᐃᒍᑎᐅᓚᐅᖅᑐᒥᑦ ᑭᖕᖓᕐᓂ. ᔪᓂ 4-ᒥ, 2020, ᒪᕐᕈᓐᓂᒃ ᐋᑐᕚ ᐸᓖᓯᒃᑯᖏᑦ (OPS) ᑎᓕᔭᐅᔪᖃᓕᓚᐅᖅᑐᖅ ᖃᐅᔨᓴᖅᑎᐅᓂᕐᒧᑦ.

[10] ᐱᓕᕆᐊᕆᔭᕆᐊᓕᖏᓐᓂ ᐋᑐᕚ ᐸᓖᓯᒃᑯᖏᑕ ᖃᐅᔨᓵᖏᓐᓂ ᓇᓗᓇᐃᔭᐃᓂᐅᔪᖅ ᓇᓪᓕᐊ ᐱᕋᔭᓐᓂᕐᒪᖔᖅ ᐅᕝᕙᓘᓐᓃᑦ ᐊᓯᖏᓐᓂᑦ ᐃᖅᑲᖅᑐᕋᑦᓴᕈᖅᑎᑕᐅᒋᐊᖃᕐᒪᖔᖅ ᑳᓐᔅᑕᐳᓪ ᒪᐃᑯᓪ (ᑖᓐ) ᑭᐅᓕᖕ (ᐊᖁᑎᐅᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᖁᑎᖓᓐᓂᑦ ᐊᐳᕐᓯᓚᐅᖅᑐᒥᑦ ᐊᖑᑎᒥᑦ) ᐊᒻᒪ/ᐅᕝᕙᓘᓐᓃᑦ ᐊᓯᖏᓐᓂᑦ ᐸᓖᓯᓂᑦ ᐃᓚᒋᔭᐅᓚᐅᖅᑐᓄᑦ ᖃᓄᐃᓕᒍᑎᐅᓚᐅᖅᑐᒥ. ᐃᓗᓕᖏᑦ ᖃᐅᔨᓴᖅᑕᐅᒋᐊᓖᑦ ᐊᑦᑐᐊᔪᑦ ᖃᓄᐃᓕᒍᑎᐅᓚᐅᖅᑐᒥᑦ ᐱᖃᓯᐅᔾᔨᔪᑦ ᐸᓖᓯᒃᑯᑦ ᓄᓇᒃᑰᔫᖁᑎᖓᑕ ᒪᑐᐊᓂᑦ, ᐊᒻᒪᑦᑕᐅᖅ ᑎᒍᓯᓂᐅᓚᐅᖅᑐᖅ ᐊᒻᒪ ᓇᒧᖕᖓᐅᔾᔭᐅᑎᓪᓗᒍ ᐊᖑᑎ ᐃᓯᖅᑕᐅᓚᐅᖏᓐᓂᖓᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐱᓕᕆᕝᕕᖏᓐᓂ ᑎᒍᔭᐅᔪᓄᑦ ᐃᓪᓗᕈᓯᕐᒧᑦ.

[11] ᔪᓚᐃ 20-ᒥ, 2020, ᐋᑐᕚ ᐸᓖᓯᒃᑯᖏᑕ ᖃᐅᔨᓴᖅᑎᖏᑦ ᑐᓂᓯᓚᐅᖅᑐᑦ ᐅᓂᒃᑳᓕᐊᒥᓂᕐᒥᓂᒃ ᐅᖃᖅᑐᑎᒃ ᐱᕋᔭᐃᔪᖃᓚᐅᖏᒻᒪᑦ ᐅᕝᕙᓘᓐᓃᑦ ᐊᓯᖏᓐᓂᑦ ᐃᖅᑲᖅᑐᕋᑦᓴᕈᖅᑎᑦᓯᔾᔪᑎᑦᓴᓂᑦ ᐱᑕᖃᖏᒻᒪᑦ ᐱᓪᓗᒍ ᑳᓐᔅᑕᐳᓪ ᑭᐅᓕᖕ ᐅᕝᕙᓘᓐᓃᑦ ᐊᓯᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ. ᐸᓯᔭᑦᓴᓯᐅᖅᑎᐅᑉ ᐊᓪᓚᕝᕕᖓ ᐅᐊᑦᕼᐅᐊᕐᔅᒥ ᕿᒥᕐᕈᐊᓚᐅᖅᑐᑦ ᐱᓕᕆᐊᒥᑦ ᐊᒻᒪ, ᑕᐃᒫᑦᑕᐅᖅ, ᐃᓱᒪᓚᐅᖅᑐᑦ ᐃᖅᑲᖅᑐᕋᑦᓴᕈᖅᑎᑕᐅᒋᐊᖃᖏᒻᒪᑕ.

[12] ᐊᑕᐅᑦᑎᒃᑯᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᒋᐊᖅᑎᑦᓯᓚᐅᖅᑐᑦ ᐱᓕᕆᑦᓯᐊᖅᑐᖃᕐᓂᕋᓗᐊᕐᒪᖔᖅ ᖃᐅᔨᓴᓕᖅᑐᑎᒃ ᖃᓄᐃᓕᐅᕈᑎᒥᓂᖏᓐᓂᑦ ᑳᓐᔅᑕᐳᓪ ᑭᐅᓕᖕ. ᑕᒪᓐᓇ ᖃᐅᔨᓴᕐᓂᐅᔪᖅ ᐊᐅᓚᑕᐅᓚᐅᖅᑐᖅ ᐊᑐᖅᑕᐅᓗᑎᒃ ᒪᓕᒐᐃᑦ ᐊᒻᒪ ᒪᓕᒋᐊᓖᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᖅᑲᓇᐃᔭᕐᕕᖏᓐᓂ ᐃᓂᖅᑎᕆᔾᔪᑎᒥᑦ ᐱᓕᕆᔾᔪᑎᓂᑦ. ᐸᓯᔭᐅᔾᔪᑎᐅᔪᖅ ᖃᐅᔨᓴᖅᑕᐅᔪᖅ ᑳᓐᔅᑕᐳᓪ ᑭᐅᓕᖕ ᓱᕋᐃᔪᕕᓂᐅᓂᕋᖅᑕᐅᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖓᓐᓂᑦ ᐱᓕᕆᑦᑎᐊᕆᐊᖃᕐᓂᕐᒥᑦ, ᐊᑐᕐᓂᕋᖅᑕᐅᓯᒪᓗᓂ ᐊᑦᓱᕈᓗᐊᖅᑐᒥᓂᐅᓂᖓᓄᑦ ᐅᖓᑖᓄᓗᐊᖅ ᓈᒻᒪᒋᔭᐅᔪᐃᑦ ᐃᓱᒪᒋᓪᓗᒍ ᖃᓄᐃᒍᑎᐅᔪᕕᓃᑦ ᐊᐳᖅᑕᐅᓗᓂ ᐊᖑᑎ ᐸᓖᓯᒃᑯᑦ ᓄᓇᒃᑰᔫᖓᓐᓄᑦ.

[13] ᖃᐅᔨᓴᖅᑎᓄᑦ ᐅᓂᒃᑳᓕᐊᒥᓂᖅ ᐅᓪᓗᕐᓯᐅᑎᓕᒃ ᒫᑦᓯ 1, 2021, ᑐᓂᔭᐅᓚᐅᖅᑐᖅ ᐊᖏᔪᖅᑳᖓᑦ ᖃᐅᔨᓴᖅᑏᑦ ᐃᖅᑲᓇᐃᔭᖅᑎᓂᑦ ᐊᒫᓐᑕ ᔫᓐᔅ, ᐊᖏᔪᖅᑳᖑᔪᖅ ᑲᒪᔨᓂᑦ ᐅᕙᓂ "V" ᐱᓕᕆᕝᕕᒻᒥ. ᕿᒥᕐᕈᐊᓚᐅᖅᑐᓂᒋᑦ ᐅᓂᒃᑳᓕᐊᖑᓯᒪᔪᑦ, ᐊᖏᔪᖅᑳᖓᑦ ᖃᐅᔨᓴᖅᑏᑦ ᐃᖅᑲᓇᐃᔭᖅᑎᓂᑦ ᔫᓐᔅ ᐊᓯᔾᔩᓕᓚᐅᖅᑐᖅ ᐸᓯᔭᑦᓴᐅᔾᔪᑎᐅᓂᕋᖅᑕᒥᑦ ᑳᓐᔅᑕᐳᓪ ᑭᐅᓕᖕᒥᑦ. ᓄᑖᖅ ᐸᓯᔭᑦᓴᐅᔾᔪᑎᒋᓕᖅᑕᖓ ᑳᓐᔅᑕᐳᓪ ᑭᐅᓕᖕ ᓱᕋᐃᓯᒪᓂᖓᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᑲᓇᑕᐅᑉ ᐸᓖᓯᒃᑯᖏᑕ ᐊᑐᐊᒐᖓᓐᓂᑦ ᐱᓕᕆᑦᑎᐊᕆᐊᖃᕐᓂᕐᒨᖓᔪᓂᑦ ᐊᐅᓚᑦᑎᓐᓂᕋᒥ ᐸᓖᓯᒃᑯᑦ ᓄᓇᒃᑰᔫᖁᑎᖓᓐᓂᑦ ᐱᑦᑎᐊᕋᓂ.

[14] ᐊᑐᐊᒐᖓᓐᓂᑦ ᐱᓕᕆᑦᑎᐊᕆᐊᖃᕐᓂᕐᒥᑦ ᐱᔾᔪᑎᓕᒻᒥᑦ ᑲᑎᒪᔾᔪᑎᖃᓚᐅᖅᑐᑦ (ᐱᓕᕆᔾᔪᑎᒥᑦ) ᐃᐳᕈ 16, 2021. ᐃᓱᐊᓂ ᑲᑎᒪᓂᐅᑉ, ᖃᐅᔨᓴᖅᑏᑦ ᐃᖅᑲᓇᐃᔭᖅᑎᓂᑦ ᔫᓐᔅ ᐅᖃᓚᐅᖅᑐᖅ ᐸᓯᔭᑦᓴᐅᔾᔪᑎᐅᓂᕋᖅᑕᖅ ᑳᓐᔅᑕᐳᓪ ᑭᐅᓕᖕᒥᑦ ᓇᓗᓇᐃᖅᑕᐅᓚᐅᖏᒻᒪᑦ, ᐊᒻᒪ ᑕᐃᒪᐃᓐᓂᖓᓄᑦ, ᐃᓂᖅᑎᕆᔾᔪᑎᓕᕆᔪᓂᑦ ᐱᓕᕆᐊᖃᔾᔮᖏᒻᒪᑕ. ᑭᓯᐊᓂᓕ, ᖃᐅᔨᓴᖅᑏᑦ ᐃᖅᑲᓇᐃᔭᖅᑎᓂᑦ ᔫᓐᔅ ᐱᐅᖏᑦᑐᓂᑦ ᐅᖃᐅᓯᖃᓚᐅᖅᑐᖅ ᐃᓚᖏᓐᓂᑦ ᑳᓐᔅᑕᐳᓪ ᑭᐅᓕᖕ ᖃᓄᐃᓕᐅᕈᑎᒥᓂᖏᓐᓂᑦ, ᐊᒻᒪ ᑎᓕᓯᓚᐅᖅᑐᖅ ᐱᓕᕆᔾᔪᑎᒍᑦ ᐱᐅᓯᑎᒋᐊᕈᑎᓂᑦ ᐊᑐᖅᑕᐅᖁᔨᓕᓚᐅᖅᑐᖅ.

[15] ᐊᒻᒪᑦᑕᐅᖅ, ᔪᓂ 15-ᒥ, 2020, ᐃᖅᑲᓇᐃᔭᖅᑎᓂᑦ ᖃᐅᔨᓴᖅᑎ ᐲᑕ ᑰᕐᔅᐴᕐᔪᕐ, ᑲᒪᔨᐅᓚᐅᖅᑐᖅ ᐊᐅᓚᑦᓯᔨᐅᓗᓂ ᐱᕋᔭᓕᕆᓂᕐᒥᑦ ᐊᐅᓚᑦᓯᔾᔪᑎᓂᑦ "V" ᐱᓕᕆᕝᕕᒻᒥ, ᑎᓕᓯᓚᐅᖅᑐᖅ ᐃᖕᒥᓂᕐᓱᖅᑐᒥᑦ ᑲᒪᔨᒧᑦ ᖃᐅᔨᓴᖁᔨᓪᓗᓂ ᐃᓚᖏᓐᓂᑦ ᐱᔾᔪᑎᐅᔪᓂᑦ ᐊᑦᑐᐊᔪᓂᑦ ᑲᐃᑉ ᑐᐊᕐᓴᑦ (ᑭᖕᖓᐃᑦ) ᐸᓖᓯᒃᑯᑦ ᑎᒍᔭᐅᒪᕕᖏᓐᓂᑦ. ᐱᓗᐊᖅᑐᒥ, ᕿᒥᕐᕈᓂᒃᑯᑦ ᖃᐅᔨᓴᖅᑕᐅᒐᔭᖅᑐᑦ ᐊᐅᓚᑦᓯᔾᔪᑎᒥᓂᐅᔪᑦ ᑎᒍᔭᐅᒪᔪᓂᑦ ᑭᖕᖓᐃᑦ ᐸᓖᓯᒃᑯᖏᑕ ᑎᒍᔭᐅᒪᕕᖏᓐᓂ. ᐊᒻᒪᑦᑕᐅᖅ, ᕿᒥᕐᕈᓂᒃᑯᑦ ᑲᑎᑎᕆᓂᐊᓚᐅᖅᑐᑦ ᐃᓘᓐᓇᖏᓐᓂᑦ ᐱᔾᔪᑎᖃᖅᑐᓂᑦ ᐊᑦᑐᐊᔪᓂᑦ ᐱᓕᕆᔾᔪᑎᐅᔪᓄᑦ ᐊᒻᒪ ᑲᒪᒋᔭᐅᔾᔪᑎᒥᓂᐅᔪᓂᑦ ᑎᒍᔭᐅᒪᔪᓂᑦ ᐅᓐᓄᖓᓂ ᔪᓂ 1, 2020, ᔪᓂ 2-ᒧᑦ, 2020. ᕿᒥᕐᕈᓂᒃᑯᑦ ᓴᖅᑮᒋᐊᖃᓚᐅᖅᑐᑦ ᐊᑐᖁᔭᐅᔪᓂᑦ ᐱᖃᓯᐅᔾᔭᐅᓗᑎᒃ, ᑭᓯᐊᓂ ᐊᓯᖃᕈᓐᓇᓯᐊᖅᑐᑎᒃ, ᐊᑐᐊᒐᕐᒥ, ᐱᓕᕆᔾᔪᑎᓂᑦ, ᐱᓕᒻᒪᑦᓴᐅᑎᓂᑦ, ᑲᒪᔩᑦ ᐊᑦᑕᓇᔾᔭᐃᒃᑯᑎᖏᓐᓂᑦ, ᓱᓇᒃᑯᑖᓂᑦ, ᐱᓕᕆᔾᔪᑎᒍᑦ ᐃᑲᔫᑎᓂᑦ, ᐊᒻᒪ ᒪᑭᒪᑎᑦᓯᔾᔪᑎᓂᑦ ᐱᓕᕆᔾᔪᑎᓂᑦ.

[16] ᑲᒪᔨᒻᒪᕆᖓᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᑲᒪᔨ ᐱᓯᒪᔪᖅ "G" ᐱᓕᕆᕝᕕᒻᒥᑦ (ᓄᓇᑦᓯᐊᕐᒥ) ᐊᐅᓚᑦᑎᓚᐅᖅᑐᑦ ᐃᖕᒥᓂᕐᓱᖅᑐᒥᑦ ᑲᒪᔨᒧᑦ ᕿᒥᕐᕈᓂᕐᒥᑦ. ᓯᕗᓪᓕᐹᕐᓯᐅᑎ ᐅᓂᒃᑳᓕᐊᖅ ᐱᔭᕇᖅᑕᐅᓚᐅᖅᑐᖅ ᔪᓚᐃ 15, 2020, ᐊᒻᒪ ᐃᓱᐊᓂᑦ ᐅᓂᒃᑳᓕᐊᖅ ᓴᖅᑭᑕᐅᓗᓂ ᐋᑦᑑᐸ 16, 2020. ᐊᒥᓱᑲᓪᓚᓐᓂᑦ ᓇᓂᓯᓚᐅᖅᑐᑦ ᐊᒻᒪ ᐊᑐᓕᖁᔨᔾᔪᑎᓕᐅᕈᑎᐅᓗᑎᒃ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᕋᔭᓕᕆᓂᕐᒥᑦ ᐊᐅᓚᑦᓯᔨᖏᑦ ᐅᕙᓂ "V" ᐱᓕᕆᕝᕕᒻᒥ ᓴᖅᑮᓕᓚᐅᖅᑐᑦ ᑭᐅᔾᔪᑎᒥᓂᒃ ᐊᑐᖁᔭᐅᓯᒪᔪᑦ ᐱᓪᓗᒋᑦ.

[17] ᐃᓚᖓᑦ ᐊᑐᖁᔭᐅᓚᐅᖅᑐᖅ ᐃᓱᖏᓐᓂᑦ ᐅᓂᒃᑳᓕᐊᓂ ᐊᑐᖁᔭᐅᕙᑦᑐᑎᒃ ᐊᑦᓱᕈᕐᓂᕐᒥᑦ ᐱᔾᔪᑎᓕᓐᓂᑦ ᖃᐅᔨᒪᔨᑕᒥᑦ ᕿᒥᕐᕈᐊᖅᑎᑕᐅᓗᓂ ᒪᕐᕉᓐᓂᒃ ᒪᑐᓯᒪᔪᓂᑦ ᐊᔾᔨᓕᐅᕈᑎᒧᑦ ᐊᐅᓚᔫᒧᑦ ᐊᔾᔨᓕᐅᖅᑕᐅᓯᒪᔫᓐᓂᒃ ᑭᖕᖓᐃᑦ ᐸᓖᓯᒃᑯᑦ ᐱᓕᕆᕝᕕᖏᑕ ᑎᒍᔭᐅᒪᕕᖏᓐᓂᑦ. ᓯᕗᓪᓕᖅ ᐱᖃᑕᐅᑎᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑎᒍᒥᐊᖅᑎᓪᓗᒋᑦ ᐊᖑᑎᒥᑦ ᐃᓚᒋᔭᐅᓚᐅᖅᑐᒥᑦ ᖃᓄᐃᒍᑎᐅᔪᒧᑦ ᐱᖃᑕᐅᑎᓪᓗᒍ ᐸᓖᓯᒃᑯᑦ ᓄᓇᒃᑰᔫᖓᑦ ᑎᒍᔭᐅᕕᒻᒨᖅᑕᐅᑎᓪᓗᒍ ᐊᒻᒪ ᕿᓂᕐᕕᐅᓕᖅᑐᓂ. ᑐᓪᓕᐊ ᐱᖃᑕᐅᑎᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓅᑦᓯᑎᓪᓗᒋᑦ ᐊᓯᐊᓂᑦ ᐊᖑᑎᒥᑦ ᑎᒍᔭᐅᒪᕕᒻᒥᑦ ᐊᒻᒪ ᐊᑦᓱᖓᐅᑎᓕᒻᒧᑦ ᐃᑦᓯᕙᐅᑕᒨᖅᑕᐅᓗᓂ.^{Footnote 3}

[18] ᐊᑦᓱᕈᕐᓂᕐᒥᑦ ᐱᔾᔪᑎᓕᓐᓂᑦ ᖃᐅᔨᒪᔨᑕᐅᔪᖅ ᕿᒥᕐᕈᐊᓚᐅᖅᑐᖅ ᐊᔾᔨᓕᐅᖅᑕᐅᓯᒪᔪᓂᑦ ᐊᒻᒪ ᐅᓂᒃᑳᓕᐅᓕᓚᐅᖅᑐᑦ ᐅᓪᓗᕐᓯᐅᑎᓕᓐᓂᑦ ᑏᓰᐱᕆ 7, 2021. ᓇᓂᓯᓚᐅᖏᑦᑐᖅ ᐸᓯᔭᑦᓴᐅᔪᓂᑦ ᖃᓄᑐᐃᓐᓇᖅ ᐊᑐᖅᑐᓂᑦ ᐊᑦᓱᕉᑎᓂᑦ ᑕᑯᓐᓇᖅᑕᐅᓚᐅᖅᑐᓂᑦ ᐊᔾᔨᓕᐅᕐᓯᒪᔪᓂᑦ.

ᐱᓕᕆᔾᔪᓯᒥᑦ ᖃᐅᔨᓴᖅᑏᑦ ᐃᑦᓯᕙᐅᑕᖓᑕ ᐱᒋᐊᖅᑎᓯᒪᔭᖓᓐᓂᑦ ᐊᑲᐅᖏᓕᐅᕈᑎᒥᑦ ᐊᒻᒪ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᒍᒪᔪᒥᑦ ᖃᐅᔨᓴᕐᓂᕐᒥᑦ

[19] ᖃᐅᔨᓴᖅᑏᑦ ᐃᖕᒥᓂᕐᓱᖅᑎᐅᔪᑦ ᐱᓕᕆᕝᕕᐅᓗᑎᒃ ᐊᑦᑐᐊᓂᖃᕋᑎᒃ ᕿᒥᕐᕈᔨᐅᓗᑎᒃ ᐊᑲᐅᖏᓕᐅᕈᑎᓂᑦ ᓴᖅᑭᑕᐅᕙᑦᑐᓂᑦ ᑭᒃᑯᑐᐃᓐᓇᕐᓄᑦ ᐱᔾᔪᑎᐅᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᕆᔾᔪᓯᖏᑦ. ᐃᓚᒋᔭᐅᖏᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ.

[20] ᒪᓕᑦᑐᒋᑦ ᑎᑎᕋᕐᓯᒪᕕᒻᒦᑦᑐᑦ 45.59(1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᒪᓕᒐᖓᑦ, ᐃᑦᓯᕙᐅᑕᐅᔪᖅ ᐃᓱᒪᒋᔭᖃᖅᑐᖅ ᐱᔾᔪᑎᖃᖅᑐᓂᑦ ᐱᑕᖃᕐᒪᑦ ᖃᐅᔨᓴᖅᑕᐅᒋᐊᖃᓕᖅᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᕆᔾᔪᓯᖓᑦ, ᐅᕝᕙᓘᓐᓃᑦ ᐊᓯᖏᓐᓂᑦ ᑭᒃᑯᓐᓂᑦ ᑎᒃᑯᐊᖅᑕᐅᓯᒪᔪᓂᑦ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᑕᐅᔪᓂᑦ ᒪᓕᑦᑕᐅᓗᑎᒃ ᐃᓚᖏᑦ I ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ ᒪᓕᒐᖓᑦ (RCMP Act), ᐱᖃᑕᐅᓚᐅᖅᑐᓂᑦ ᐅᕙᓂ ᖃᓄᐃᒍᑎᐅᓚᐅᖅᑐᒧᑦ.

[21] ᑕᒪᓐᓇ ᐱᔾᔪᑎᒋᓪᓗᒍ, ᖃᐅᔨᓴᖅᑏᑦ ᐃᑦᓯᕙᐅᑕᖓᑦ ᐱᒋᐊᖅᑎᑦᓯᓕᓚᐅᖅᑐᖅ ᑲᒪᒋᔭᐅᔪᒥᑦ ᐊᑲᐅᖏᓕᐅᕈᑎᒥᑦ ᐊᒻᒪ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᒍᒪᔪᒥᑦ ᖃᐅᔨᓴᕐᓂᐅᔪᒥᑦ ᐋᒐᓯ 18-ᒥ, 2020. ᑕᐃᒎᓯᖏᑦ ᓇᓗᓇᐃᔭᐃᑏᑦ ᖃᐅᔨᓴᕐᓂᕐᒧᑦ ᐱᓪᓗᐊᑕᖃᖅᑐᑦ ᐅᑯᓂᖓ ᖃᐅᔨᓴᖅᑎᐅᔪᑦ ᖃᐅᔨᓴᕋᔭᕐᓂᖏᓐᓂᑦ ᐱᔾᔪᑎᐅᔪᓂᑦ:

• - ᖃᓄᐃᓕᖓᒍᑎᐅᓚᐅᖅᑐᑦ ᓯᕗᒧᐊᑉᐸᓪᓕᐊᑎᓪᓗᒋᑦ ᖃᓄᐃᒍᑎᐅᓚᐅᖅᑐᒧᑦ;
• - ᐱᓕᕆᔾᔪᑎᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᑉ ᐊᖁᑎᐅᓚᐅᖅᑑᑉ ᓄᓇᒃᑰᔫᒥᑦ ᓈᒻᒪᓐᓂᕋᓗᐊᕐᒪᖔᖅ ᐱᔾᔪᑎᒋᓪᓗᒋᑦ ᖃᓄᐃᓕᖓᒍᑎᐅᔪᑦ;
• - ᖃᓄᖅ ᑎᒍᔭᐅᔾᔪᑎᒥᓂᖓ ᐊᖑᑎᐅᑉ ᓈᒻᒪᓐᓂᕋᓗᐊᕐᒪᖔᖅ ᐱᔾᔪᑎᒋᓪᓗᒋᑦ ᖃᓄᐃᓕᖓᒍᑎᐅᔪᑦ;
• - ᐊᑐᕐᓂᒥᓂᖏᑦ ᐊᑦᓱᕈᖅᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᖑᑎ ᑎᒍᔭᐅᑎᓪᓗᒍ ᓈᒻᒪᑦᑐᒥᓃᑦ ᐱᔾᔪᑎᒋᓪᓗᒋᑦ ᖃᓄᐃᓕᖓᒍᑎᐅᔪᑦ;
• - ᐊᖑᑎ ᐱᔭᕆᐊᖃᕐᓂᕐᒪᖔᖅ ᐊᒻᒪ ᐱᑎᑕᐅᓐᓂᕐᒪᖔᖅ ᓈᒻᒪᑦᑐᓂᑦ ᐋᓐᓂᐊᔪᓕᕆᔨᓂᑦ ᑭᖑᓂᐊᓂ ᖃᓄᐃᒍᑎᐅᒋᐊᖓᓚᐅᖅᑑᑉ;
• - ᖃᓄᐃᓕᖓᒍᑎᐅᔪᑦ ᐱᔾᔪᑎᒋᓪᓗᒍ ᐊᖑᑎᐅᑉ ᐋᓐᓂᖅᑎᕆᔪᕕᓂᐅᓂᕋᖅᑕᐅᓗᓂ ᑎᒍᔭᐅᖅᑲᑎᓪᓗᒍ, ᓈᒻᒪᑦᑐᓂᑦ ᐱᓕᕆᔾᔪᑎᐅᓐᓂᕋᓗᐊᕐᒪᖔᖅ ᐊᑦᑕᓇᖅᑐᒦᖁᓇᒍ, ᐊᒻᒪ ᖃᓄᐃᓕᖓᓂᐅᔪᑦ ᑎᒍᔭᐅᖅᑲᕕᐅᑉ ᓈᒻᒪᓂᕐᒪᖔᑕ;
• - ᐊᖑᑎᐅᔪᖅ ᓈᒻᒪᑦᑐᓄᑦ ᐋᓐᓂᐊᔪᓕᕆᔭᐅᓐᓂᕋᓗᐊᕐᒪᖔᖅ ᑭᖑᓂᐊᓂ ᖃᓄᐃᒍᑎᐅᓚᐅᖅᑑᑉ ᑎᒍᔭᐅᒪᕕᒻᒥ;
• - ᖃᓄᐃᓕᐅᕈᑎᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᑭᐅᔾᔪᑎᒃᑯᑦ ᑕᒪᓐᓇ ᐱᓪᓗᒍ;
• - ᐅᕕᓂᖃᑎᒋᖏᑕᒥᓂᒃ ᓈᒻᒪᓴᖏᓂᕐᒥᑦ ᐊᒻᒪ/ᐅᕝᕙᓘᓐᓃᑦ ᐃᓚᐃᓐᓈᓂᕐᒥᑦ ᐊᑐᖅᑐᖃᕐᓂᕐᒪᖔᖅ ᐊᖑᑎ ᑎᒍᔭᐅᑎᓪᓗᒍ ᐊᒻᒪ ᑭᖑᓂᐊᒍᑦ ᑲᒪᒋᔭᐅᑎᓪᓗᒍ.

[22] ᐅᑯᐊ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓇᓗᓇᐃᕐᓯᕕᐅᓚᐅᖅᑐᑦ ᐱᔾᔪᑎᐅᒻᒪᑕ ᐊᑲᐅᖏᓕᐅᕈᑎᒧᑦ ᐊᒻᒪ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᒍᒪᔪᒥᑦ ᖃᐅᔨᓴᐅᑎᒥᑦ:

• - ᑳᓐᔅᑕᐳᓪ ᒪᐃᑯᓪ (ᑖᓐ) ᑭᐅᓕᖕ
• - ᑳᓐᔅᑕᐳᓪ ᕕᓕᑉ ᓲᓚᑦ
• - ᑳᓐᔅᑕᐳᓪ ᑳᒧᕋᓐ ᓯᒥᖦ
• - ᑳᓐᔅᑕᐳᓪ ᑯᕆᔅᑎ ᓯᑑᕐᔾ
• - ᑳᓐᔅᑕᐳᓪ ᑎᐅᕈᓪ ᒋᐅᓪ

[23] ᑳᓐᔅᑕᐳᓪ ᒫᑎᐅ ᕘᕐᒍᕐᓴᓐ ᑭᖑᓂᐊᒍᑦ ᓇᓗᓇᐃᖅᑕᐅᓚᐅᖅᑐᖅ ᑕᑯᓐᓇᖅᑐᒥᓂᐅᓂᖓᓄᑦ ᐃᓚᒋᔭᐅᔪᖅ.

[24] ᖃᐅᔨᓴᖅᑏᑦ ᐊᒥᓱᓂᑦ ᑐᑦᓯᕋᓕᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐊᑑᑎᖃᖅᑐᓂᑦ ᓱᓇᑐᐃᓐᓇᕐᓂᑦ. ᑖᒃᑯᐊᓕ ᓱᓇᑐᐃᓐᓇᐃᑦ ᕿᒥᕐᕈᐊᖅᑕᐅᓚᐅᖅᑐᑦ ᐊᒻᒪ ᖃᐅᔨᓴᖅᑕᐅᓗᑎᒃ ᒪᓕᑦᑐᒋᑦ ᖃᐃᑕᐅᓯᒪᓂᖏᑦ ᖃᓄᖅ, ᐊᒻᒪ ᐊᓯᖏᓐᓂᑦ ᑐᑦᓯᕋᕐᕕᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᓴᖅᐸᓪᓕᐊᑎᓪᓗᒋᑦ ᓱᓕ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑭᐅᓕᓚᐅᖅᑐᑦ ᖃᐅᔨᓴᖅᑏᑦ ᑐᑦᓯᕌᖏᓐᓂᑦ ᐅᖃᐅᓯᐅᓯᒪᔪᓂᑦ ᕿᓚᒥᐅᔫᒥᔪᖅ ᐊᒻᒪ ᓈᒪᓗᑎᒃ.

[25] ᖃᐅᔨᓴᖅᑏᑦ ᖃᐅᔨᒋᐊᓚᐅᕐᒥᔪᑦ 22 ᐊᕐᕌᒍᓕᒻᒥᑦ ᐊᖑᑎᒥᑦ ᐱᖃᑕᐅᓚᐅᖅᑐᒥᑦ ᖃᓄᐃᒍᑎᒧᑦ ᐅᖃᐅᓯᐅᔪᒧᑦ. ᐃᖕᒥᒨᖓᓂᕐᒥᑦ ᐱᔾᔪᑎᖃᕐᓗᑎᒃ, ᐊᖑᑎᐅᔪᖅ ᐅᖃᐅᓯᐅᕙᓐᓂᐊᖅᑐᖅ ᐅᕙᓂ ᐅᓂᒃᑳᓕᐊᓂ ᐊᑎᕐᓄᑦ ᐱᒋᐊᕈᑎᐅᔪᓂᑦ ᐊᑐᕐᓗᑎᒃ "A.B." ᑐᓴᐅᒪᖃᑕᐅᕙᓚᐅᖅᑐᖅ A.B. ᒪᓕᒐᓕᕆᔨᑎᒍᑦ, ᑖᒃᑯᐊᓕ ᐱᓕᕆᔾᔪᑎᖃᓚᐅᖅᑐᑦ ᐊᖑᑎᒥᑦ ᑭᒡᒐᖅᑐᐃᓗᑎᒃ.

[26] ᖃᐅᔨᓴᖅᑏᑦ ᓇᓗᓇᐃᔭᐃᓇᓱᓚᐅᕐᒥᔪᑦ ᐊᒻᒪ ᖃᐅᔨᒋᐊᕋᓱᑦᑐᑎᒃ ᑕᑯᓐᓇᖅᑐᒥᓂᐅᑐᐃᓐᓇᕆᐊᓕᓐᓂᑦ, ᐊᒻᒪᑦᑕᐅᖅ ᕿᓂᖅᑐᑎᒃ ᐊᒻᒪ ᐱᓇᓱᐊᖅᑐᑎᒃ ᐊᑑᑎᖃᕐᓂᖏᓐᓂᑦ ᑐᑭᓯᒋᐊᕈᑎᓂᑦ ᐊᔾᔨᒌᖏᑦᑐᓂᑦ ᑐᑭᓯᕕᑦᓴᓂᑦ. ᖃᐅᔨᓴᖅᑎᐅᑉ ᐃᖅᑲᓇᐃᔭᖅᑎᖏᑦ ᖃᐅᔨᓴᓚᐅᖅᑐᑦ ᐊᒥᓱᑲᓪᓚᓐᓂᒃ ᑎᑎᖅᑲᓂᑦ, ᐊᔾᔨᓕᐅᕐᓯᒪᔪᓂᑦ, ᐊᒻᒪ ᐊᐅᓚᔫᒃᑯᑦ ᐊᔾᔨᓕᐅᕐᓯᒪᔪᓂᑦ ᐊᒻᒪ ᓂᐱᓕᐅᕐᓯᒪᔪᓂᑦ. ᐊᑑᑎᖃᖅᑐᑦ ᓱᓇᑐᐃᓐᓇᐃᑦ ᐱᔭᐅᓯᒪᔪᑦ ᐅᑯᓇᖕᖓᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ, ᑲᑎᑕᐅᓗᑎᒃ ᓇᓗᓇᐃᔭᐃᑎᓄᑦ ᓄᐊᑕᐅᓯᒪᔪᓄᑦ ᖃᐅᔨᓴᖅᑎᒧᑦ, ᐃᒪᓐᓇᐅᓕᓚᐅᖅᑐᑦ 146 ᒋᒐᐸᐃᑦᔅ ᖃᕋᑕᐅᔭᓕᕆᔾᔪᑎᒍᑦ ᐱᓕᕆᔾᔪᑎᓂᑦ (8,850 ᑲᑎᒪᖏᑦᑐᑦ ᖃᕋᑕᐅᔭᒃᑯᑦ ᐱᓕᕆᔾᔪᑎᐅᔪᑦ).

[27] ᑰᕕᑦ-19 ᐊᒥᓱᓄᑦ ᖃᓂᒪᓐᓇᐅᓚᐅᖅᑐᖅ, ᐊᒻᒪ ᐱᓗᐊᖅᑐᒥ ᓄᓇᓕᓐᓄᑦ ᓂᐅᕐᕈᓂᐅᔪᖅ ᐱᑐᐃᓐᓇᐅᖏᔾᔪᑎᖃᖅᐸᓚᐅᕐᓂᖏᓐᓄᑦ ᓄᓇᕘᒥ, ᐊᑦᑐᐃᓚᐅᖅᑐᖅ ᐃᓚᖏᓐᓂᑦ ᖃᐅᔨᓴᕆᐊᓕᓐᓂᑦ; ᓲᕐᓗ, ᐊᐱᕐᓱᕆᐊᖃᖅᐸᓕᓚᐅᕐᒪᑕ ᑭᓯᐊᓂ ᐊᔾᔨᓕᐅᕈᑎᒃᑯᑦ ᑲᑎᒪᓗᑎᒃ.

[28] ᑎᑎᕋᕐᓯᒪᕕᒻᒦᑦᑐᑦ 45.39(1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᒪᓕᒐᖓᓐᓂ ᐃᒫᒃ ᐅᖃᕐᓯᒪᔪᑦ:

ᒪᓕᑦᑐᒋᑦ ᑎᑎᕋᕐᓯᒪᕕᒻᒦᑦᑐᑦ 45.4 ᐊᒻᒪ 45.42, ᖃᐅᔨᓴᖅᑏᑦ ᐱᑎᑕᐅᔭᕆᐊᖃᖅᐸᑦᑐᑦ ᑐᑭᓯᒋᐊᕈᑎᑦᓴᓂᑦ ᐊᐅᓚᑕᐅᔪᓂᑦ, ᐅᕝᕙᓘᓐᓃᑦ ᐱᓯᒪᔭᐅᔪᓂᑦ, ᐱᓕᕆᔨᓄᑦ ᖃᐅᔨᓴᖅᑎᐅᑉ ᐃᓱᒪᒋᔭᖏᓐᓂᑦ ᐊᑑᑎᖃᕐᓂᖏᓐᓂᑦ ᐱᔪᓐᓇᐅᑎᓂ ᐊᑐᖅᑐᓂᐅᕐ, ᐅᕝᕙᓘᓐᓃᑦ ᐱᓕᕆᔾᔪᑎᖏᓐᓂᑦ ᐊᑐᖅᑐᓂ ᐱᓕᕆᐊᑦᓴᖏᑎᒍᑦ ᐊᒻᒪ ᐊᐅᓚᔾᔪᓯᖏᒍᑦ ᐱᓕᕆᐊᖏᑕ, ᑎᑎᕋᕐᓯᒪᔪᑦ ᐅᑯᓇᓂ VI ᐊᒻᒪ VII.

[29] ᒪᓕᑦᑐᒋᑦ ᐅᖃᐅᓯᐅᓯᒪᔪᑦ ᖁᓪᓕᕐᓂ, ᐋᑐᕚ ᐸᓖᓯᒃᑯᑦ (OPS) ᐱᔭᕇᓚᐅᖅᑐᑦ ᐱᕋᔭᓐᓂᒃᑯᑦ ᖃᐅᔨᓴᐅᑎᒥᑦ ᐊᒻᒪ ᐅᓂᒃᑳᓕᐊᒥᓂᒃ ᑐᓂᓯᓪᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ. ᖃᐅᔨᓴᖅᑏᑦ ᑐᑦᓯᕋᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐅᖃᐅᓯᖃᖁᓪᓗᒋᑦ ᐆᕕᖓ ᐅᓂᒃᑳᓕᐊᖑᓯᒪᔪᒥᑦ ᑲᐅᔨᓴᖅᑎᓄᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓇᓗᓇᐃᕐᓯᓚᐅᖅᑐᑦ ᑐᑦᓯᕋᐅᑎ ᐅᓂᒃᑳᓕᐊᒥᓂᕐᒥᒃ ᐊᒻᒪ ᖃᐅᔨᓴᐅᑎᓄᑦ ᐱᓕᕆᐊᖑᔪᖅ ᑐᑦᓯᕌᖑᒋᐊᖃᕐᒪᑕ ᐋᑐᕚ ᐸᓖᓯᒃᑯᖏᓐᓂᑦ (OPS) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᐅᖏᑦᑐᖅ. ᑖᓐᓇ ᑐᓴᖅᑕᐅᓚᐅᖏᑦᑐᖅ ᖃᓄᐃᓕᖓᒍᑎᐅᔪᕕᓂᖅ ᐱᔭᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓯᒪᑦᓯᓚᐅᕋᓗᐊᕐᒪᑕ ᐅᓂᒃᑳᓕᐊᖑᔪᒥᑦ, ᐊᒻᒪ ᐅᓂᒃᑳᓕᐊᖑᓯᒪᔪᖅ ᐊᑑᑎᖃᖅᑐᒥᓂᐅᓗᓂ ᐱᓕᕆᔾᔪᓯᖏᓐᓄᑦ ᖃᐅᔨᓴᖅᑏᑦ ᐱᓕᕆᐊᑦᓴᖏᓐᓅᖓᔪᓄᑦ.

[30] ᑭᖑᕙᖁᔭᐅᒐᓂ ᖃᐅᔨᓴᕐᓂᐅᔪᖅ, ᖃᐅᔨᓴᖅᑏᑦ ᖃᐅᔨᒋᐊᓕᓚᐅᖅᑐᑦ ᐋᑐᕚ ᐸᓖᓯᒃᑯᖏᓐᓂᑦ (OPS) ᐊᒻᒪ ᐱᔪᓐᓇᐅᑎᒥᑦ ᓴᖅᑮᓕᓚᐅᖅᑐᑦ ᐊᑐᖅᑕᐅᓗᑎᒃ ᑎᑎᕋᕐᓯᒪᕕᒻᒦᑦᑐᑦ 45.65(1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᒪᓕᒐᖓᑦ ᐱᔪᒪᓪᓗᑎᒃ ᐋᑐᕚ ᐸᓖᓯᒃᑯᖏᓐᓂᑦ (OPS) ᖃᐅᔨᓴᕐᓂᕐᒧᑦ ᐅᓂᒃᑳᓕᐊᖏᓐᓂᑦ ᐊᒻᒪ ᓈᒪᔪᒥᑦ ᖃᐅᔨᓴᐅᑎᒧᑦ ᐱᓕᕆᔾᔪᑎᒥᑦ. ᐋᑐᕚ ᐸᓖᓯᒃᑯᖏᓐᓂᑦ (OPS) ᑲᑐᔾᔨᖃᑕᐅᓗᑎᒃ ᐱᓕᕆᖃᑕᐅᓚᐅᖅᑐᑦ ᐊᒻᒪ ᑐᑦᓯᕌᓂᑦ ᐱᑎᑦᓯᑦᓴᐅᑎᒋᓪᓗᑎᒃ.

[31] ᖃᐅᔨᓴᖅᑏᑦ ᖃᐅᔨᓴᖅᑎᖏᑦ ᐊᐅᓚᑦᑎᓚᐅᖅᑐᑦ ᐊᐱᕐᓱᖅᑕᐅᔪᓂᑦ ᐊᔾᔨᒌᖏᑦᑐᓂᑦ, ᐱᖃᓯᐅᔾᔭᐅᓗᓂ A.B., ᐅᐊᑦᓯᐅᓚᐅᖅᑐᖅ ᐱᓕᕆᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᕆᕝᕕᖓᓂ ᐅᓐᓄᖓᓂ ᐊᐱᖅᑯᑎᐅᔪᒥ, ᐊᒻᒪ ᐱᖓᓱᐃᑦ (3) ᐋᓐᓂᐊᓯᐅᖅᑎᐅᓚᐅᖅᑐᑦ ᐱᖃᑕᐅᓚᐅᖅᑐᑦ ᖃᐅᔨᓴᖅᑕᐅᑎᓪᓗᒍ A.B. ᐃᓗᓯᖓ. ᑕᐃᓐᓇ ᐊᐅᓚᔪᒥᑦ ᐊᔾᔨᓕᐅᕆᓚᐅᖅᑐᖅ A.B. ᑎᒍᔭᐅᑎᓪᓗᒍ ᐊᐱᕐᓱᖅᑕᐅᒍᒪᓚᐅᖏᑦᑐᖅ ᐊᐱᕐᓱᖅᑕᐅᒍᒪᒐᓗᐊᕐᒪᑦ ᑲᐅᔨᓴᖅᑏᑦ ᖃᐅᔨᓴᖅᑎᖏᓐᓄᑦ.  

[32] ᔪᓂ 2021, ᖃᐅᔨᓴᖅᑏᑦ ᐊᐱᕐᓱᖁᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓂᑦ ᐅᖃᐅᓯᐅᓯᒪᔪᓂᑦ. ᑳᓐᔅᑕᐳᓪ ᑭᐅᓕᖕ ᖃᐅᔨᓴᖅᑎᓄᑦ ᑐᓂᓯᓕᓚᐅᖅᑐᖅ ᑎᑎᕋᕐᓯᒪᔭᕐᒥᓂᒃ ᐅᖃᐅᑎᑦᓴᒥᓂᒃ ᑎᑎᕋᖅᑕᒥᓂᕐᒥᓂᒃ ᔪᓂ 17, 2020, ᐋᑐᕚ ᐸᓖᓯᒃᑯᖏᑦ (OPS) ᖃᐅᔨᓴᖅᑎᓪᓗᒋᑦ. ᐊᐱᕐᓱᖅᑕᐅᒍᒪᓚᐅᖏᑦᑐᖅ, ᑭᓯᐊᓂ ᐅᖃᓚᐅᖅᑐᖅ ᑭᖑᓂᐊᒍᑦ ᐊᐱᕐᓱᖅᑕᐅᒍᒪᓐᓂᕈᓂ ᐊᐱᕐᓱᖅᑕᐅᔪᓐᓇᕋᒥ ᖃᐅᔨᓴᖅᑎᓂᑦ ᐊᐱᖅᑯᑎᖃᕐᓂᖅᐸᑕ ᕿᒥᕐᕈᐊᓚᐅᖅᑎᓪᓗᒋᑦ ᑎᑎᕋᕐᓯᒪᔭᖏᓐᓂᑦ. ᖃᐅᔨᓴᖅᑎᓄᑦ ᐱᑎᑕᐅᓚᐅᖅᑐᖅ ᐊᐱᖅᑯᑎᓂᑦ ᐊᒻᒪ ᑳᓐᔅᑕᐳᓪ ᑭᐅᓕᖕ ᒪᓕᒐᓕᕆᔨᖏᑦ ᑭᐅᓚᐅᖅᑐᑦ ᑎᑎᕋᖅᑐᑎᒃ ᑭᒡᒐᖅᑐᐃᓗᑎᒃ ᑖᑦᓱᒥᖓ.

[33] ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓯᑑᕐᔾ, ᐊᒻᒪ ᓵᔨᓐ ᒋᐅᓪ ᐅᖃᕆᐊᖓᓚᐅᖅᑐᑦ ᐊᐱᕐᓱᖅᑕᐅᒍᓐᓇᕐᓂᕋᖅᑐᑎᒃ. ᖃᐅᔨᓴᖅᑏᑦ ᖃᐅᔨᓴᖅᑎᒻᒪᕆᖓᑦ ᑐᓴᐅᒪᖃᑎᖃᓚᐅᖅᑐᖅ ᑖᒃᑯᓂᖓ ᐱᔾᔪᑎᖃᖅᑐᓂ ᐊᑐᐃᓐᓇᐅᒐᔭᕐᓂᖏᓐᓂᑦ ᐅᓪᓗᕐᓯᐅᑎᓕᐅᕈᓂ ᐊᐱᕐᓱᕐᓂᐅᓂᐊᖅᑐᓂᑦ. ᖃᐅᔨᓴᖅᑏᑦ ᑐᓴᖅᑎᑕᐅᓕᓚᐅᖅᑐᑦ ᔪᓂ 9, 2021, ᐅᕙᖕᖓᑦ ᑎᒻ ᐱᑎᑦ, ᑲᓇᑕᐅᑉ ᐸᓖᓯᒃᑯᖏᑕ ᑐᖕᖓᕕᖓᓐᓂᑦ ᐱᓯᒪᔪᖅ (NPF)^{Footnote 4} ᑭᒡᒐᖅᑐᐃᔨᐅᔪᖅ ᐃᑲᔪᖅᑎᒋᓚᐅᖅᑕᖓ ᑳᓐᔅᑕᐳᓪ ᓯᒥᖦ. ᒥᔅᑕ ᐱᑎᑦ ᐅᖃᓚᐅᖅᑐᖅ, ᐊᐱᕐᓱᖅᑕᐅᒍᒪᒐᓂ, ᑳᓐᔅᑕᐳᓪ ᓯᒥᖦ ᑎᑎᕋᖔᕐᓂᐊᕋᒥ ᑭᐅᔾᔪᑎᒥᓂᒃ ᐊᐱᖅᑯᑎᖏᓐᓄᑦ ᖃᐅᔨᓴᖅᑏᑦ. ᔪᓂ 10, 2021, ᓵᔨᓐ ᒋᐅᓪ ᑐᓴᖅᑎᑦᓯᓚᐅᖅᑐᖅ ᖃᐅᔨᓴᖅᑎᓂᑦ ᐊᐱᕐᓱᖅᑕᐅᒍᒪᖏᓐᓇᒥ ᑭᓯᐊᓂ ᑎᑎᕋᕐᓂᐊᑐᐃᓐᓇᕋᒥ ᐅᖃᐅᑎᑦᓴᓂ. ᑕᐃᑲᓂᑦᓴᐃᓐᓇᖅ ᐅᓪᓗᕐᒥ, ᑳᓐᔅᑕᐳᓪ ᓯᑑᕐᔾ ᑎᑎᕋᓚᐅᖅᑐᖅ ᖃᐅᔨᒪᖁᓪᓗᓂᒋᑦ ᖃᐅᔨᓴᖅᑏᑦ ᖃᐅᔨᒋᐊᕐᓯᒪᒐᒥ ᑭᒡᒐᖅᑐᐃᔨᒥᑦ ᑲᓇᑕᐅᑉ ᐸᓖᓯᒃᑯᖏᑕ ᑐᖕᖓᕕᖓᓐᓂᑦ ᐊᒻᒪ "ᐅᑕᖅᑭᒐᒥ [sic] ᐊᓯᖏᓐᓂᑦ ᖃᓄᐃᓕᐅᕈᑎᑦᓴᓂᑦ, ᐊᓯᖏᓐᓂᓪᓗ ᐅᐸᓗᖓᐃᔭᐅᑎᒨᖓᔪᓂᑦ." ᑕᐃᑲᓂ ᐅᓪᓗᖓᓂ, ᑳᓐᔅᑕᐳᓪ ᓱᓚᑦ ᐅᖃᓚᐅᕐᒥᔪᖅ ᑐᑭᓯᒋᐊᕈᒪᓂᕋᖅᑐᓂ ᑲᓇᑕᐅᑉ ᐸᓖᓯᒃᑯᖏᑕ ᑐᖕᖓᕕᖓᓐᓂᑦ ᑭᒡᒐᖅᑐᐃᔨᒥᓂᒃ ᐋᖅᑮᓚᐅᖏᓂᕐᒥᓂ ᐅᓪᓗᕐᓯᐅᑎᒍᑦ ᐊᐱᕐᓱᖅᑕᐅᕕᑦᓴᒥᓂᒃ. ᐅᓪᓗᐃᑦ ᑎᓴᒪᑦ ᐊᓂᒍᓚᐅᖅᑎᓪᓗᒋᑦ, ᑳᓐᔅᑕᐳᓪ ᓱᓚᑦ ᑐᓴᖅᑎᑦᓯᓚᐅᖅᑐᖅ ᖃᐅᔨᓴᖅᑎᓂᑦ ᑎᑎᕋᕐᓂᐊᕋᒥ ᐅᖃᐅᑎᑦᓴᖏᓐᓂᑦ, ᐊᐱᕐᓱᑕᐅᖏᓪᓗᓂ.

[34] ᖃᐅᔨᓴᖅᑏᑦ ᐃᓱᒪᑦᓴᕐᓯᐅᕈᑎᖃᓚᐅᖅᑐᑦ ᑐᑦᓯᕌᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᒻᒪ ᑲᓇᑕᐅᑉ ᐸᓖᓯᒃᑯᖏᑕ ᑐᖕᖓᕕᖓᑕ ᑭᒡᒐᖅᑐᐃᔨᖓᑕ ᐊᒻᒪ ᓇᓗᓇᐃᓚᐅᖅᑐᑦ, ᐱᓪᓗᐊᑕᐅᔪᓂᑦ ᖃᓄᐃᓕᖓᒍᑎᐅᔪᓂᑦ ᐱᓕᕆᐊᑦᓴᖅ ᐱᓪᓗᒍ, ᑎᑎᖅᑲᑎᒍᑦ ᐅᖃᐅᑎᑦᓴᖏᓐᓂᑦ ᐱᑎᑦᓯᓂᐊᕈᑎᒃ ᓈᒻᒪᓂᐊᕐᒪᑕ ᐊᐱᖅᑯᑎᓄᑦ ᓇᓗᓇᐃᕐᓯᒪᖁᓪᓗᒋᑦ ᖃᐅᔨᓴᖅᑏᑦ ᐱᓯᒪᓂᖏᓐᓂᑦ ᑐᑭᓯᒋᐊᕈᑎᓂᑦ ᐊᑐᖅᑕᐅᒋᐊᓕᓐᓂᑦ ᖃᐅᔨᓴᖅᑕᖓᓐᓄᑦ. ᐋᑦᑑᐸ 28, 2021, ᖃᐅᔨᓴᖅᑏᑦ ᐊᐱᕆᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᑐᐃᓐᓇᕈᐃᖁᓪᓗᒋᑦ ᐃᓘᓐᓇᖏᓐᓂᑦ ᐊᑑᑎᓕᓐᓂᑦ ᑐᑭᓯᒋᐊᕈᑎᓂᑦ ᐱᔾᔪᑎᒋᓪᓗᒋᑦ ᖃᓄᐃᓕᐅᕈᑎᒋᓚᐅᖅᑕᖏᑦ ᐊᒻᒪ ᑕᑯᓐᓇᓚᐅᖅᑕᖏᑦ ᐱᔾᔪᑎᖃᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᑦ ᐃᓚᒋᔭᐅᓂᕆᓚᐅᖅᑕᖓᑦ ᖃᓄᖅ ᐱᓪᓗᒍ A.B. ᐊᑐᖅᑎᓪᓗᒍ ᐊᐱᖅᑯᑎᐅᔪᒥᑦ. ᐱᖃᓯᐅᔾᔭᐅᒐᔭᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᓐᓂᑦ ᐊᒻᒪ ᑕᑯᓐᓇᓚᐅᖅᑕᖏᓐᓂᑦ, ᐊᑐᕆᐊᖃᕐᓂᕈᑎᒃ, ᐅᑯᐊ ᐱᓪᓗᒋᑦ:

1. A.B. ᑎᒍᔭᐅᓂᐊᓕᖅᑎᓪᓗᒍ
2. ᑎᒍᓯᓂᐅᓚᐅᖅᑐᖅ ᖃᓄᐃᓚᐅᕐᓂᖓ ᐊᑐᖅᑕᐅᑎᓪᓗᒍ, ᐱᖃᓯᐅᔾᔭᐅᓗᑎᒃ (ᐊᑐᕆᐊᖃᕈᑎᒃ) ᓇᓗᓇᐃᔭᐃᓗᑎᒃ ᑎᒍᓯᔾᔪᑎᐅᔪᕕᓂᕐᒥᒃ ᐊᒻᒪ ᖃᓄᑎᒋ ᐊᑦᓱᕈᓚᐅᕐᓂᖏᓐᓂᑦ
3. A.B. ᑎᒍᔭᐅᓚᐅᖅᑎᓪᓗᒍ ᐸᐃᑉᐹᓕᕆᔾᔪᑎᐅᓂᖓ ᐊᒻᒪ ᑎᒍᔭᐅᓂᖓ ᐸᓖᓯᒃᑯᓐᓂ, ᐱᖃᓯᐅᔾᔭᐅᓗᓂ ᖃᓄᐃᖃᑎᒋᓐᓂᓚᐅᖅᑕᖓ ᐊᓯᐊᓂᑦ ᑎᒍᔭᐅᒪᔪᒥᑦᑕᐅᖅ ᐋᓐᓂᖅᑐᒥᓂᐅᑎᓪᓗᒍ A.B., ᐊᒻᒪ ᑭᖑᓂᐊ ᖃᓄᐃᓕᐅᕈᑎᔪᕕᒥᓂᐅᑉ, ᐱᖃᓯᐅᔾᔭᐅᓗᑎᒃ ᑲᒪᒋᔭᐅᔪᒪᒻᒪᖔᖅ ᐋᓐᓂᐊᔪᓕᕆᔨᒧᑦ ᐅᕝᕙᓘᓐᓃᑦ ᐋᓐᓂᐊᔪᓕᕆᔾᔪᑎᒥᓂᐅᔪᑦ, ᐊᒻᒪ
4. A.B. ᐊᓂᑎᑕᐅᓂᖓ ᑎᒍᔭᐅᒪᕕᒻᒥᑦ

[35] ᖃᐅᔨᓴᖅᑏᑦ ᐊᐱᕆᓕᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐱᑎᑦᑎᖁᓪᓗᒋᑦ ᑎᑎᕋᕐᓯᒪᔪᓂᑦ ᐅᖃᐅᑎᑦᓴᖏᓐᓂᑦ ᓅᕖᐱᕆ 15, 2021 ᓯᕗᓂᐊᒍᑦ.

[36] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑭᐅᓚᐅᖏᑦᑐᑦ. ᖃᐅᔨᓴᖅᑏᑦ ᑐᑦᓯᕋᖅᑎᓪᓗᒋᑦ ᑎᑎᕋᕐᓯᒪᔪᓂᑦ ᐅᖃᐅᑎᑦᓴᓂᑦ ᐊᖏᖅᑕᐅᓯᒪᓪᓗᑎᒃ ᐊᐱᕐᓱᖅᑕᐅᒍᒪᖏᑦᑐᓄᑦ, ᐊᒻᒪ ᐱᖓᓱᐃᑦ (3) ^{Footnote 5} ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓇᓗᓇᐃᕐᓯᓚᐅᕋᓗᐊᕋᒥᑦ ᐱᑎᑦᓯᓂᐊᕐᓂᕋᖅᑐᑎᒃ ᑎᑎᕋᕐᓯᒪᔪᓂᑦ, ᖃᐅᔨᓴᖅᑏᑦ ᐱᑎᑕᐅᓚᐅᖏᑦᑐᑦ ᑎᑎᕋᕐᓯᒪᔪᓂᑦ ᐅᖃᐅᑎᑦᓴᓂᑦ, ᐊᒻᒪ ᓇᓗᓇᐃᕐᓯᔪᖃᕋᓂ ᖃᓄᐃᒻᒪᑦ ᐱᑎᑕᐅᓂᖏᒻᒪᖔᑕ.

[37] ᖃᐅᔨᓴᖅᑏᑦ ᐃᓱᒪᑦᓴᕐᓯᐅᕈᑎᖃᓚᐅᖅᑐᑦ ᑕᒪᑦᓱᒥᖓ ᐊᒻᒪ ᓇᓗᓇᐃᕐᓯᓪᓗᑎᒃ, ᐊᐱᕐᓱᖅᑕᐅᓚᐅᖏᒃᑲᓗᐊᕋᒥᒃ ᐅᕝᕙᓘᓐᓃᑦ ᑎᑎᕋᕐᓯᒪᔪᓂᑦ ᐅᖃᐅᑎᑦᓴᓂᑦ ᐱᑎᑦᓯᒐᑎᒃ ᐃᓚᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᓱᒪᒋᔭᐅᔪᑦ, ᐊᒥᓱᑲᓪᓚᓐᓂᒃ ᓇᓗᓇᐃᔭᐃᑎᓂᑦ ᐱᓯᒪᑦᑎᓚᐅᖅᑐᑦ ᒪᓕᒍᑎᒋᔪᓐᓇᖅᑕᒥᓂᒃ ᖃᐅᔨᔭᐅᔪᓂᑦ ᐊᒻᒪ ᐊᑐᖁᔭᐅᔪᓂᑦ. ᐱᖃᓯᐅᔾᔭᐅᓚᐅᖅᑐᑦ ᑐᑭᓯᒋᐊᕈᑎᐅᔪᑦ ᐱᔭᐅᓯᒪᔪᑦ ᓇᖕᒥᓂᖅ ᖃᐅᔨᓴᐅᑎᖏᓐᓂᑦ; ᑐᑭᓯᒋᐊᕈᑎᐅᔪᑦ ᐅᐅᖃᓯᐅᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᒃ; ᐊᒻᒪ ᑐᑭᓯᒋᐊᕈᑎᐅᔪᑦ ᑐᑭᓯᔭᐅᓚᐅᖅᑐᑦ ᐊᓯᖏᓐᓂᑦ ᐱᓕᕆᔾᔪᑎᓂᑦ. ᐊᑐᐃᓐᓇᐃᑦ ᓇᓗᓇᐃᔭᐅᑎᐅᔪᑦ ᐱᖃᓯᐅᔾᔨᓚᐅᖅᑐᑦ ᐊᑐᖅᑎᓪᓗᒋᑦ ᖃᓄᐃᒍᑎᐅᔪᒥᑦ ᑎᑎᖅᑲᓂᑦ ᐊᒻᒪ ᐅᓂᒃᑳᓕᐊᖑᓯᒪᔪᓂᑦ ᑎᑎᕋᖅᑕᐅᓯᒪᔪᓂᑦ ᐅᖃᐅᓯᐅᔪᓄᑦ ᐸᓖᓯᓄᑦ, ᐊᒻᒪᑦᑕᐅᖅ ᐊᓯᖏᓐᓂᑦ ᑎᑎᖅᑲᓂᑦ ᐅᖃᐅᓯᐅᔪᕕᓂᕐᓂᒃ ᐊᑐᐃᓐᓇᐅᑎᑕᐅᓯᒪᔪᓂᑦ ᐊᓯᖏᓐᓂ ᖃᐅᔨᓴᐅᑎᓂ ᐊᒻᒪ ᐱᓕᕆᔾᔪᓯᕐᓂ. ᑕᒪᓐᓇ ᐱᓪᓗᒍ, ᖃᐅᔨᓴᖅᑏᑦ ᑭᖑᕙᕆᐊᕆᔪᒪᔪᓐᓃᖅᑐᒥᓃᑦ ᖃᐅᔨᓴᐅᑎᖏᓐᓂᑦ ᐊᒻᒪ ᐆᕕᖓ ᐅᓂᒃᑳᒥᑦ ᓴᖅᑮᓇᓵᕋᔭᕐᓂᖏᓐᓂᑦ ᐊᓯᖏᓐᓂᑦ ᐱᓕᕆᐊᖃᕋᓱᓕᕋᓗᐊᕈᑎᒃ ᐱᓇᓱᐊᕐᓗᑎᒃ ᐅᖃᐅᑎᑦᓴᖏᓐᓂᑦ ᐅᖃᐅᓯᐅᔪᑦ ᐃᓚᒋᔭᐅᔪᑦ.

[38] ᖃᐅᔨᓴᖅᑏᑦ ᖃᐅᔨᒪᖁᔨᔫᒐᓗᐊᑦ, ᐱᓕᕆᖃᑕᐅᒍᒪᖏᓐᓂᒥᓂᖏᑦ ᐱᓪᓗᒋᑦ ᖃᐅᔨᓴᖅᑎᐅᑉ ᖃᐅᔨᓴᐅᑎᖓᓄᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐅᖃᐅᓯᐅᔪᑦ ᐃᖕᒥᓂᒃ ᐊᑐᕈᓐᓃᑎᑦᑐᒥᓂᐅᔪᑦ ᓇᓗᓇᐃᔭᕐᓯᒪᑦᑎᐊᖅᑐᓂᑦ ᓇᓗᓇᐃᔭᐃᔭᕆᐊᑦᓴᖅ ᐱᓕᕆᔾᔪᓯᒥᓂᖏᓐᓂᑦ ᐊᒻᒪ ᐊᓯᖏᓐᓂᑦ ᐊᑑᑎᖃᕈᓐᓇᖅᑐᓂᑦ ᖃᓄᐃᒍᑎᐅᔪᕕᓂᕐᓂᒃ ᐃᑲᔫᑎᖃᑐᐃᓐᓇᕆᐊᓕᓐᓂᑦ ᖃᓄᐃᒻᒪᑦ ᑕᐃᒫᒃ ᐱᓕᕆᔾᔪᓯᖃᕐᓂᒥᓂᖏᓐᓂᑦ. ᐃᓚᖏᓐᓂ ᐱᓕᕆᐊᖑᕙᑦᑐᓂ, ᑕᐃᒪᐃᑦᑐᑦ ᓇᓗᓇᐃᔭᐃᑎᐅᔪᑦ ᐊᔾᔨᒋᖏᑕᖏᒍᑦ ᓴᖅᑮᓲᖑᒻᒪᑕ ᖃᐅᔨᓴᖅᑕᐅᔾᔪᑎᒥᓂᖏᓐᓂᑦ ᑕᐃᒃᑯᐊ ᐅᖃᐅᓯᐅᔪᑦ ᐱᓕᕆᔾᔪᓯᒥᓂᖏᓐᓂᑦ. ᐅᖃᐅᓯᐅᔪᑦ ᓇᓗᓇᐃᔭᐃᒍᒪᓚᐅᖏᒻᒪᑕ ᑕᒪᒃᑲᓂᖓ, ᖃᐅᔨᓴᖅᑏᑦ ᖃᐅᔨᓴᕐᓯᒪᓕᖅᑐᑦ ᐱᓕᕆᔾᔪᓯᖏᓐᓂᑦ ᒪᓕᑦᑐᒋᑦ ᓇᓗᓇᐃᔭᐃᑎᐅᔪᑦ ᐊᑐᐃᓐᓇᐃᑦ.

[39] ᖃᐅᔨᓴᖅᑏᑦ ᐱᓕᕆᖃᑎᖃᕈᒪᑐᐃᓐᓇᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ, ᐃᓚᒋᔭᐅᔪᓂᑦ, ᐊᒻᒪ ᑲᓇᑕᐅᑉ ᐸᓖᓯᒃᑯᖏᑕ ᑐᖕᖓᕕᖓᓐᓂᑦ ᑕᑎᒌᖃᑦᑕᐅᑎᑦᑎᐊᕐᓗᑎᒃ ᑎᑭᓐᓇᓱᓐᓂᒃᑯᑦ ᑐᕌᒐᕆᔭᐅᔪᓂᑦ ᑲᑐᔾᔭᐅᔪᓂᑦ ᐱᓕᕆᔾᔪᑎᐅᑉ ᐃᓗᓕᖏᓐᓂᑦ ᑭᐅᔪᓐᓇᓂᒃᑯᑦ ᐊᒻᒪ ᐱᐅᓯᑎᑦᑎᒋᐊᕐᓂᒃᑯᑦ ᐸᓖᓯᓕᕆᔾᔪᑎᓂᑦ.

ᐊᑐᖅᑕᐅᓯᒪᔪᑦ

[40] ᑭᖕᖓᐃᑦ, ᓄᓇᕗᑦ, ᓄᓇᓕᐅᔪᖅ ᐃᓄᖃᖅᑐᓂ 1,400-ᓗᐊᓂᑦ^{Footnote 6} ᐃᓂᖃᖅᑐᓂ ᑐᐊᕐᓴᑦ ᕿᑭᖅᑕᒥ, ᓂᒋᐊᓃᑦᑐᒥᑦ ᕿᑭᖅᑖᓘᑉ. 400 ᑭᓛᒥᑕᓂᑦ ᐅᖓᓯᓐᓂᖃᖅᑐᖅ ᐅᐊᓐᓇᖅᐸᓯᐊᓂ ᐃᖃᓗᐃᑦ ᖃᖓᑕᓲᒃᑯᑦ. ᓄᓇᓕᐅᔪᖅ ᖃᐅᔨᒪᔭᐅᓚᐅᖅᑑᒐᓗᐊᖅ ᑲᐃᑉ ᑐᐊᕐᓴᑦᒥᑦ. 93%-ᐳᓴᓪᓗᐊᖏᑦ ᑭᖕᖓᕐᒥᐅᑦ ᐃᓄᐃᑦ.^{Footnote 7}

[41] ᐸᓖᓯᓕᕆᔾᔪᑎᐅᔪᑦ ᓄᓇᕘᒥ ᐱᓕᕆᐊᖑᕙᑦᑐᑦ ᐅᑯᓇᖕᖓᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ, 25-ᖑᓪᓗᑎᒃ ᐱᓕᕆᕝᕕᐅᔪᑦ ᓄᓇᕘᒥ, ᐱᖃᓯᐅᔾᔭᐅᓗᓂ ᑭᖕᖓᕐᓃᑦᑐᖅ. ᖃᓄᐃᒍᑎᖃᖅᑐᖃᖅᑎᓪᓗᒍ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᕆᕝᕕᖓᑦ ᑭᖕᖓᕐᓂ ᐃᖅᑲᓇᐃᔭᖅᑎᖃᐃᓐᓇᓚᐅᖅᑐᖅ ᓵᔨᓐᖃᖅᑐᓂ (ᐊᐅᓚᑦᓯᔨᐅᔪᖅ) ᐊᒻᒪ ᒪᕐᕉᓪᓗᑎᒃ ᑳᓐᔅᑕᐳᓪᖑᔫᒃ. ᐃᓚᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᐃᓚᒋᔭᐅᔪᑦ ᐱᓕᕆᔨᐅᔪᐃᑦ ᐱᓕᕆᕝᕕᐊᓂ ᑭᖕᖓᕐᓂ "ᑭᖑᕝᕕᖅᑎᐅᓚᐅᖅᑐᑦ": ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᓯᖏᓐᓂᑦ ᐃᓂᖃᖅᑐᑦ ᐱᓕᕆᕙᑦᑐᑦ ᑭᖕᖓᕐᓂ ᓇᓪᓕᑭᑕᐅᑎᕙᑦᑐᑎᒃ.

[42] ᔪᓂ 1-ᒥ, 2020, ᐱᖓᓲᔪᖅᑐᑦ (6) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᐃᓚᒋᔭᐅᔪᑦ ᓄᓇᓕᓐᓃᓚᐅᖅᑐᑦ; ᓵᔨᓐᖑᔪᖅ ᐊᒻᒪ ᒪᕐᕉᒃ (2) ᑳᓐᔅᑕᐴᓪᔫᒃ ᑎᓕᔭᐅᓯᒪᓪᓗᑎᒃ ᑭᖕᖓᕐᓄᑦ, ᐊᒻᒪ ᐱᖓᓱᑦ (3) ᑳᓐᔅᑕᐴᓪᔪᑦ ᑭᖑᕝᕕᖅᑎᐅᓚᐅᖅᑐᑦ. ᐱᖓᓱᑦ (3) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑎᓕᔭᐅᓯᒪᓚᐅᖅᑐᑦ ᐅᓐᓄᐊᕐᓯᐅᑎᐅᖁᔭᐅᓗᑎᒃ.

[43] ᔪᓂ 1-2, 2020, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᕝᕕᖓᑦ ᑭᖕᖓᕐᓂ ᐊᒥᓱᑲᓪᓚᓐᓄᑦ ᑕᐃᒪᐃᓗᐊᖅᐸᒐᑎᒃ ᐅᖄᓚᕕᐅᕙᓚᐅᖅᑐᑦ ᐱᔨᑦᓯᕋᖁᔭᐅᓗᑎᒃ. 37-ᖑᓚᐅᖅᑐᑦ ᐅᖄᓚᔪᑦ, ᐱᖃᓯᐅᔾᔭᐅᓗᑎᒃ 27-ᖑᓂᖏᑦ ᐅᖄᓚᔾᔪᑎᐅᕙᓚᐅᖅᑐᑦ ᐊᑯᓐᓂᖏᓐᓂ ᓯᕿᖕᖑᔭᐅᑉ 4:30 ᐅᓐᓄᓴᒃᑯᑦ ᔪᓂ 1, 2020, ᐊᒻᒪ 3:56 ᐅᓪᓛᒃᑯᑦ ᔪᓂ 2-ᒧᑦ, 2020. ᑕᒪᓐᓇ ᐱᔭᑦᓴᖃᕐᓂᕐᒪᕆᐅᓚᐅᖅᑐᖅ, ᐊᒻᒪᑦᑕᐅᖅ ᐱᒻᒪᕆᐅᓂᖏᑦ ᐃᓚᖏᑕ ᐅᖄᓚᔾᔪᑎᐅᕙᑦᑐᑦ, ᐃᓚᖏᓐᓂᑦ ᐅᓪᓗᕐᓯᐅᑎᓂᑦ ᐃᖅᑲᓇᐃᔭᖅᑎᓂᑦ ᐅᖄᓚᕕᐅᔪᖃᕆᐊᖃᓕᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᖅᑲᓇᐃᔭᕆᐊᖁᔭᐅᓗᑎᒃ ᐃᑲᔪᕐᓂᐊᕐᒪᑕ. ᐊᒥᓱᑲᓪᓚᐅᓚᐅᖅᑐᑦ ᐊᖏᕐᕋᓂ ᐱᑦᑎᐊᖏᑦᑐᑦ ᐅᖄᓚᔾᔪᑎᐅᕙᑦᑐᑦ, ᒪᕐᕉᒃ (2) ᖁᑭᐅᓯᔭᕐᓂᕋᐃᔪᑦ, ᐊᒥᓱᑲᓪᓚᐃᑦ ᐃᓱᒪᓕᕆᔾᔪᑎ ᒪᓕᒐᖅ ᐱᔾᔪᑎᐅᓗᓂ ᐅᖄᓚᕙᓚᐅᖅᑐᑦ, ᐊᒻᒪ ᑐᖁᖓᔪᓕᕆᓂᕐᒥᑦ ᒪᓕᒐᖅ ᐃᓅᔪᓐᓃᖅᑐᖃᑲᓪᓚᓐᓂᖓᓄᑦ ᖃᐅᔨᓴᕆᐊᓕᓐᓂᑦ. ᐃᒥᐊᓗᒻᒥᑦ ᐱᔾᔪᑎᖃᖅᑐᓂᑦ ᐅᖄᓚᔾᔪᑎᖃᖅᐸᓚᐅᖅᑐᑦ ᐱᖃᓯᐅᔾᔭᐅᓗᑎᒃ ᐅᓂᒃᑳᖑᔪᑦ ᓴᐃᓕᖓᓂᕐᒥᑦ ᐸᕝᕕᓴᑦᑐᑦ, ᐱᑦᑎᐊᖏᑦᑐᑦ, ᐊᒻᒪ ᐃᒥᕐᓯᒪᓪᓗᑎᒃ ᐊᖁᑉᐸᑦᑐᑦ.

[44] ᑕᐃᑲᓂ ᐅᓐᓄᒥ, 15-ᖑᔪᑦ ᑎᒍᔭᐅᓯᒪᓚᐅᖅᑐᑦ ᑎᓴᒪᓂ (4) ᑎᒍᔭᐅᒪᕕᓐᓂ ᑭᖕᖓᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᖏᓐᓂ. ᐊᑕᐅᓯᖅ (1) ᑎᒍᔭᐅᒪᕕᒃ ᐊᑐᖅᑕᐅᓚᐅᖅᑐᑦ ᐊᕐᓇᓄᑦ ᑎᒍᔭᐅᔪᓄᑦ, ᐊᓯᖏᑦ ᐱᖓᓱᑦ (3) ᑎᒍᔭᐅᒪᕖᑦ ᐊᑐᖅᑕᐅᓗᑎᒃ 9-ᓄᑦ ᐊᖑᑎᓄᑦ ᑎᒍᔭᐅᒪᔪᓄᑦ. ᐸᓖᓯᒃᑯᑦ ᑎᒍᔭᐅᒪᖃᕐᕕᖓᑦ ᐊᑕᐅᓯᕐᒥᑦ (1) ᐃᖅᑲᓇᐃᔭᖅᑎᖃᖅᑐᑦ ᐅᐊᑦᓯᔨᒥᑦ, ᑖᓐᓇᓕ ᐃᓚᒋᔭᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ.

[45] ᐊᒥᓱᑲᓪᓚᐃᑦ ᑭᒃᑯᑐᐃᓐᓇᐃᑦ ᐅᖃᐅᑎᑦᓴᖃᓚᐅᖅᑐᑦ ᖃᐅᔨᓴᖅᑎᓄᑦ ᐊᒻᒪ ᐊᔾᔨᒌᖏᑦᑐᓂ ᐊᓯᖏᓐᓂ ᐱᓕᕆᔾᔪᑎᓂᑦ ᓇᓗᓇᐃᔭᐃᓚᐅᖅᑐᑦ ᐊᒥᓱᑲᓪᓚᐅᓚᐅᖅᑐᓂᑦ ᖃᓄᐃᒍᑎᐅᓚᐅᖅᑐᓂᑦ ᓄᓇᓕᓐᓂ ᑕᐃᑲᓂ ᐅᓐᓄᕐᒥ.

ᖃᐅᔨᓴᐅᑏᑦ

ᖃᓄᐃᓕᖓᒍᑎᐅᔪᑦ ᐊᑐᖅᑕᐅᕙᓪᓕᐊᓕᖅᑎᓪᓗᒍ ᖃᓄᐃᒍᑎᐅᓚᐅᖅᑐᖅ

A.B. ᖃᓄᐃᓕᐅᕈᑎᒋᓚᐅᖅᑕᖏᑦ ᓯᕗᓂᐊᒍᑦ ᑲᑎᓯᓚᐅᕋᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ

[46] ᐊᔾᔨᒌᖏᑦᑐᓂ ᐊᐱᕐᓱᕐᓂᐅᔪᓂ, ᐊᖑᑎ (A.B.) ᐊᐳᖅᑕᐅᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ ᐊᒻᒪ ᑭᖑᓂᐊᒍᑦ ᐱᒋᐊᖅᑐᖅᑕᐅᓕᕐᓂᖅᑐᓂ ᑎᒍᔭᐅᒪᕕᓐᓂ ᐊᓯᐊᓄᑦ ᑎᒍᔭᐅᓯᒪᔪᒧᑦᑕᐅᖅ ᓇᓗᓇᐃᔭᐃᓚᐅᖅᑐᖅ, ᐅᓐᓄᖓᓂ ᔪᓂ 1, 2020, ᐊᑖᑕᒃᑯᖏᓐᓃᓚᐅᖅᑐᖅ ᐃᓪᓗᒥ (ᐃᓪᓗ A^{Footnote 8}). ᐃᒥᕐᓂᓚᐅᖅᑐᖅ ᐊᖏᔪᑲᓪᓚᒻᒥᑦ ᐃᒥᐊᓗᒻᒥᑦ ᐊᒻᒪ ᐱᓐᓂᖅᑐᓂ ᓵᑐᒥᑦ (ᓴᖏᔪᑲᓪᓚᐅᔪᖅ ᐱᕈᖅᑐᒥᓂᕐᒥᒃ ᓱᕐᕋᓇᖅᑐᒥᑦ ᐃᑦᑎᐅᔪᖅ).^{Footnote 9} ᐊᑖᑕᖓᑕ ᐊᓂᑎᓕᕐᓂᖅᑐᓂᐅᒃ ᐃᓪᓗᒥᑦ, ᐊᒻᒪ ᐅᑎᓕᓚᐅᖅᑐᖅ ᐃᓪᓗᒥᓄᑦ (ᐃᓪᓗ B). A.B. ᐊᑖᑕᖓ ᓇᓗᓇᐃᔭᐃᓕᓚᐅᖅᑐᖅ ᑕᒪᒃᑯᓂᖓ ᖃᓄᐃᒍᑎᐅᔪᕕᓂᕐᓂᒃ.

[47] ᐊᑖᑕᖓ ᐃᓪᓗᓕᐅᑉ ᖃᓂᒋᔭᖓᓂ, ᐃᓪᓗᖃᖅᑐᖅ ᐃᓪᓗᓯ C, ᐅᖃᐅᓯᖃᓚᐅᖅᑐᖅ ᐃᖅᑲᐅᒪᔭᒥᓂᒃ ᐊᑖᑕᒋᔭᖅ ᐊᒻᒪ A.B. ᐸᕝᕕᓴᓚᐅᕐᒪᑎᒃ ᐊᒻᒪ ᐊᑖᑕᒋᔭᖅ ᐋᓐᓂᖅᑎᕆᓚᐅᖅᑐᖅ A.B.-ᒥᑦ ᐊᒻᒪ ᐊᓂᑎᑦᑐᓂᐅᒃ ᐃᓪᓗᒥᑦ. ᐃᓪᓗᓕᒃ ᖃᓂᒋᔭᖓᓂ ᑕᑯᓐᓇᓚᐅᖅᑐᖅ ᐊᑖᑕᒋᔭᖅ ᑐᑭᖅᓯᑎᓪᓗᒍ A.B.-ᒥᑦ ᑐᓄᐊᒍᑦ. ᐃᓪᓗᓕᒃ ᖃᓂᒋᔭᖓᓂ ᕿᑐᕐᖓᖏᑦ ᑲᑉᐱᐊᓱᐊᓚᐅᖅᑐᑦ ᐱᔾᔪᑎᖃᖅᑐᑎᒃ ᐸᕝᕕᓴᐃᓂᐅᔪᒥᑦ, ᐃᓪᓗᓕᒃ ᖃᓂᒋᔭᖓᓂ ᐅᖄᓚᓕᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐅᖃᐅᓯᕆᓪᓗᓂᐅᒃ. ᐃᓪᓗᓕᒃ ᖃᓂᒋᔭᖓᓂ ᐸᓖᓯᒃᑯᓐᓂᒃ "ᖃᐃᓚᐅᕆᑦᓯ ᐊᒻᒪ ᐊᐃᔭᐅᓗᓂ ᐊᑖᑕᒋᔭᖅ," ᑭᓯᐊᓂ ᐃᓪᓗᓕᒃ ᖃᓂᒋᔭᖓᓂ ᐅᖃᓕᓚᐅᖅᑐᖅ ᖃᐅᔨᓴᖅᑎᓄᑦ ᐱᖏᒋᓂᕋᖅᑐᓂᐅᒃ A.B. "ᖃᓄᐃᓕᐅᕆᓇᓱᐊᕐᓂᐊᕆᐊᖓ ᑭᒃᑯᑐᐃᓐᓇᕐᓂᑦ – ᐋᖓᔮᖅᑐᕈᓘᓚᐅᕐᒪᑦ ᐊᑦᓱᑲᓪᓚᒃ . . . ᐅᓪᓛᖃᓚᐅᖅᑐᖅ ᒥᑭᔪᒥᑦ ᕼᐋᓐᑕᒥᑦ, ᐅᓪᓛᖃᒻᒪᕆᓚᐅᖅᑐᖅ ᒥᑭᔪᒥᑦ ᐱᓲᑎᑲᓪᓚᒻᒥᑦ, ᑎᓴᒪᓂᑦ (4) ᐊᑦᓴᓗᐊᓕᒻᒥᑦ." ᓇᓗᓇᖅᑐᖅ ᐃᓪᓗᓕᒃ ᖃᓂᒋᔭᖓᓂ ᐅᖃᐅᓯᖃᕐᓂᕐᒪᖔᖅ ᑖᒃᑯᓂᖓ ᐃᓱᒫᓘᑎᒋᔭᖏᓐᓂᑦ ᐸᓖᓯᒃᑯᑦ ᑭᐅᔨᖓᓐᓄᑦ ᑕᐃᑲᓂ ᐅᓐᓄᕐᒥ. ᐃᓪᓗᓕᒃ ᖃᓂᒋᔭᖓᓂ ᐅᖃᓚᐅᖅᑐᖅ ᑕᑯᓐᓇᖅᑐᒥᓂᐅᓂᕋᖅᑐᓂ ᐊᖑᑎᒥᑦ (A.B.) ᑕᐃᓐᓇᓴᐃᓐᓇᐅᓂᕋᖅᑐᓂᐅᒃ ᐊᐳᖅᑕᐅᓯᓐᓂᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᖓᓐᓄᑦ.

[48] A.B. ᐅᖃᓚᐅᖅᑐᖅ ᖃᐅᔨᓴᖅᑎᓄᑦ, ᑕᖅᑮᑦ ᒪᕐᕉᒃ (2) ᓯᕗᓂᐊᓂ, ᐃᓚᖓᑦ ᐱᖃᑎᖏᑕ ᑎᒍᓯᓚᐅᕐᓯᒪᓐᓂᕐᒪᑦ ᐃᒥᐊᓘᑎᕋᓛᒥᑦ ᑲᑕᐃᔭᒥᓂᕐᒥᓂᒃ, ᐊᒻᒪ ᐃᒥᓐᓂᖅᑐᓂᐅᒃ. ᑕᒪᓐᓇᒎᖅ "ᓂᖕᖓᒍᑎᒋᒐᓚᓚᐅᖅᑕᖓ." A.B. ᐃᓱᒪᒋᔭᖃᖅᑐᖅ, ᔪᓂ 1-ᖑᑎᓪᓗᒍ, 2020, ᐊᖑᔮᖃᓚᐅᕋᒥ ᐱᖃᑎᒥᓂᒃ, ᑖᓐᓇᓕ ᐊᖁᓚᐅᖅᑐᖅ ᑐᖑᔪᖅᑐᒥᑦ ᕼᐋᓐᑕᒥᑦ (ᓇᒧᑐᐃᓐᓈᕈᓐᓇᖅᑐᖅ ᓄᓇᒃᑰᔫᖅ), ᐱᔾᔪᑎᖃᖅᑐᓂ ᓯᕗᓂᐊᒍᑦ ᖃᓄᐃᒍᑎᖃᑎᒌᓐᓂᕐᒪᑎᒃ. A.B. ᐅᖃᕆᐊᓚᐅᖅᑐᖅ, ᐊᖕᖑᑎᓐᓂᕈᓂᐅᒃ ᐱᖃᑎᓂ, ᑎᓪᓗᓐᓂᐊᕐᓂᕋᒥᐅᒃ.

[49] ᖃᐅᔨᓴᖅᑎᓄᑦ ᐊᐱᕐᓱᖅᑕᐅᓚᐅᖅᑐᖅ ᐱᖃᑎᒋᔭᖅ. ᐅᖃᕆᐊᓚᐅᖅᑐᖅ A.B. ᐱᖃᑎᐊᓗᒋᒐᒥᐅᒃ ᐊᒻᒪ ᐱᖃᓐᓂᕇᑉᐸᒻᒪᑎᒃ. ᐱᖃᑎᒋᔭᖅ ᐅᖃᓚᐅᖅᑐᖅ ᐱᓲᑎᑲᓪᓚᖁᑎᖃᕋᒥ ᑐᖑᔪᖅᑐᒥᑦ ᕼᐋᓐᑕᒥᑦ; ᑕᐃᑲᓂ ᐅᓐᓄᖓᓂ ᐊᐱᖅᑯᑎᐅᔪᒥ, ᐊᓯᐊᓄᑦ ᐊᖑᑎᒧᑦ ᐊᑐᖅᑕᐅᓚᐅᖅᑐᖅ. ᐱᖃᑎᖓ ᑕᑯᓐᓇᓚᐅᖅᑐᖅ ᐊᐅᓚᔫᒥᑦ ᐊᔾᔨᓕᐅᖅᑕᐅᓯᒪᔪᒥᑦ ᖃᓄᐃᒍᑎᒥᓂᐅᔪᒥᑦ ᐃᓚᒋᔭᐅᑎᓪᓗᒍ A.B., ᐊᒻᒪ ᐱᖃᑎᖓᑕ ᓇᓗᓇᐃᓚᐅᖅᑕᖓ ᐱᓲᑎᑲᓪᓚᓐᓂ ᐅᖓᑖᓃᓐᓂᕋᖅᑐᓂᐅᒃ ᐊᔾᔨᐅᓕᐅᖅᑕᐅᓯᒪᔫᑉ.  

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᑦ ᓯᕗᓂᐊᓂ ᑲᑎᔭᐅᓚᐅᕋᓂ A.B.

[50] ᐅᓐᓄᒃᑯᑦ 10:46-ᑎᓪᓗᒍ ᔪᓂ 1, 2020, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᖄᓚᕕᐅᓚᐅᖅᑐᑦ ᐋᖓᔮᖅᑐᖃᕐᓂᕋᐃᓗᓂ ᐊᖑᑎᒥᑦ ᑐᕌᖅᑎᑦᓯᕙᑦᑐᓂ ᖁᑭᐅᒻᒥᑦ ᐃᒐᓛᒃᑯᑦ ᐃᓪᓗᒧᑦ D. ᐃᖅᑲᓇᐃᔭᓚᐅᖅᑐᖅ ᐅᓐᓄᓯᐅᖅᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑳᓐᔅᑕᐳᓪ ᕕᓕᑉ ᓱᓚᑦ, ᑳᓐᔅᑕᐳᓪ ᑳᒧᕋᓐ ᓯᒥᖦ, ᐊᒻᒪ ᑳᓐᔅᑕᐳᓪ ᑯᕆᔅᑎ ᓯᑐᕐᔾ. ᓄᐃᖅᑲᓇᐃᔭᓚᐅᖏᒃᑲᓗᐊᕋᒥ ᑕᐃᑦᓱᒪᓂ, ᓵᔨᓐ ᑎᐅᕈᓪ ᒋᐅᓪ ᐊᒻᒪ ᑳᓐᔅᑕᐳᓪ ᒪᐃᑯᓪ (ᑖᓐ) ᑭᐅᓕᖕ ᐅᖄᓚᕕᐅᓚᐅᖅᑑᒃ ᐃᑲᔪᕆᐊᖁᔭᐅᓗᑎᒃ ᐅᐸᑦᑐᓄᑦ ᖁᑭᐅᓯᔭᖅᑐᒥᑦ ᐱᔾᔪᑎᓕᒻᒥᑦ.

[51] ᑕᓪᓕᒪᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐅᐸᓚᐅᖅᑐᑦ ᐃᓪᓗᒧᑦ D ᐊᒻᒪ ᑐᓴᖅᑐᑎᒃ ᐊᖑᑎ ᑐᕌᖅᑎᑦᓯᔪᕕᓂᐅᓂᖓᓄᑦ ᖁᑭᐅᑎᒧᑦ ᐊᓂᓐᓂᕐᒪᑦ ᐃᓪᓗᒥᑦ ᐸᓖᓯᒃᑯᑦ ᑎᑭᓚᐅᖅᑎᓐᓇᒋᑦ. ᐅᖃᐅᓯᐅᔪᕕᓂᖅ ᖁᑭᐅᒻᒥᑦ ᑎᒍᒥᐊᖅᑐᒥᓂᐅᓂᖓᓄᑦ ᐊᐅᓚᑎᒃᑯᓂᐅᒃ ᐊᒻᒪ ᐃᒻᒪᖄ ᑐᕌᖅᑎᑦᓯᔪᕕᓂᐅᓗᓂ ᐃᓪᓘᑉ ᐃᓗᐊᓃᑦᑐᓄᑦ. ᐃᓚᒋᔭᐅᔪᓄᑦ ᐅᖃᓕᒪᕕᐅᓯᔪᕕᓂᖅ ᐊᒻᒪ ᖁᑭᐅᒻᒥᑦ ᐊᕐᓵᑕᐅᓗᓂ ᑐᕌᖅᑎᑎᓪᓗᓂᐅᒃ ᐃᒐᓛᒧᑦ. ᖃᒧᑕᐅᔭᓯᔪᕕᓂᖅ ᐊᒻᒪ ᓇᓗᓇᐃᖅᑕᐅᓂᖅᑐᓂ ᐊᑦᓱᑲᓪᓚᒃ ᐋᖓᔮᖅᑐᒥᐅᓂᖓᓄᑦ. ᓵᔨᓐ ᒋᐅᓪ ᑎᒍᓚᐅᖅᑕᖓ ᓯᖃᓕᕐᓯᐅᑦ ᐃᓪᓗᒥᑦ ᐊᒻᒪ ᐸᓖᓯᒃᑯᑦ ᓄᓇᒃᑰᔫᕐᓂᖅᑐᓂᐅᒃ ᐱᔭᐅᔾᔭᐃᖅᑐᒍ.

[52] ᐃᓪᓗᒦᑦᑎᓪᓗᒋᑦ D ᖃᓄᐃᓕᐅᕐᕕᐅᔪᒥ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᓂᒃᑳᕐᕕᐅᓚᐅᖅᑐᑦ ᐱᒋᐊᕐᓯᔪᖃᖃᑦᑕᕐᓂᖓᓄᑦ ᐃᓪᓗᒥ E. ᐱᓗᐊᖅᑐᒥ, ᐅᖄᓚᔪᖅ ᐅᖃᖅᑐᒥᓂᖅ ᐊᑖᑕᒋᔭᒥᑦ "ᐋᓐᓂᖅᑎᕆᔪᖃᕐᒪᑦ" ᐃᕐᓂᓛᕐᒥᓂᒃ. ᑖᒃᑯᐊ ᐃᓪᓘᒃ ᖃᓂᒌᑦᑑᒃ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᐸᓚᐅᖅᑐᑦ ᐃᓪᓗᒧᑦ E. ᓇᓂᓯᓚᐅᖅᑐᑦ ᐊᖑᑎᒥ ᑕᐃᑲᓂ ᐃᓪᓗᒥ ᐋᖓᔮᓚᐅᖏᑦᑐᖅ ᐊᒻᒪ ᑕᑯᑦᓴᐅᔪᖃᕋᓂ ᐱᑦᑎᐊᖏᑦᑐᒥᑦ ᐅᕝᕙᓘᓐᓃᑦ ᐋᓐᓂᖅᑎᕆᔪᒥᑦ. ᓇᓗᓇᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑖᑦᓱᒥᖓᐅᖏᑦᑐᖅ ᑐᕌᕈᑎᒥᑦ ᐅᖃᐅᔾᔭᐃᓂᕐᒪᑕ ᐅᕝᕙᓘᓐᓃᑦ ᑕᐃᓐᓇ ᐅᖃᐅᓯᐅᓯᒪᔪᖅ ᕿᒫᓐᓂᕐᒪᑦ.

[53] ᖃᐅᔨᓴᖅᑕᐅᒻᒪᑦ 911-ᒧᑦ ᐅᖄᓚᐅᑎᒥᓂᖅ ᐃᓪᓗᒥᑦ ᖃᓂᒋᔭᖓᓂᑦ ᓇᓗᓇᐃᕐᓯᒪᔪᑦ ᐃᓪᓗᓕᒃ ᖃᓂᒋᔭᖓᓂ ᐅᖃᖅᑐᒥᓂᐅᓂᖓᓄᑦ ᖃᓄᐃᓕᐅᖅᑐᖃᕐᒪᑦ ᐃᓪᓗᒥ E, ᑭᓯᐊᓂ ᐃᓪᓗᒦᓐᓂᓚᐅᖅᑐᑦ A-ᒥ. ᑕᐃᒪᐃᓐᓂᖏᓐᓄᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᒪᒐᑎᒃ ᑕᒻᒪᓕᖅᑐᒥᓃᑦ ᐃᓪᓗᒨᖅᑐᑎᒃ ᐊᓯᐊᓄᑦ.

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑕᑯᓐᓇᓚᐅᖅᑐᑦ A.B.-ᒥᑦ.

[54] ᒪᓕᑦᑐᒋᑦ ᑳᓐᔅᑕᐳᓪ ᑭᐅᓕᖕ ᑎᑎᕋᕐᓯᒪᔭᖏᑦ ᐅᖃᐅᓯᖏᑦ, ᐅᐸᑉᐸᓪᓕᐊᓕᖅᑎᓪᓗᒍ ᐊᕙᑎᐊᓄᑦ ᐃᓪᓗᐊᑕ ᑭᖕᖓᕐᓂ, ᑳᓐᔅᑕᐳᓪ ᓯᒥᖦ ᐅᖃᐅᑎᓚᐅᖅᑕᖓ ᖁᑭᐅᓯᔭᕐᓂᕋᖅᑕᐅᓯᒪᔪᖅ ᕿᒪᐃᓚᐅᕐᓂᖓᓂᑦ ᐊᕙᑎᒥᑦ ᖃᒧᑕᐅᔭᖅᑐᓂ. ᑳᓐᔅᑕᐳᓪ ᓯᒥᖦ ᐅᖃᓚᐅᕐᒥᔪᖅ ᑕᑯᓐᓇᖅᑐᒥᓂᐅᓂᕋᖅᑐᓂ ᖃᒧᑕᐅᔭᒥᑦ ᐊᒡᒋᑎᓪᓗᒍ ᐊᒻᒪ ᐊᓯᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ (ᐃᓪᓗᒦᓚᐅᖅᑐᑦ D-ᒥ) ᒪᓕᒃ ᕿᑭᖅᑕᒥᑦ ᐱᓯᒪᔪᑦ, ᐊᑭᐊᓃᑦᑐᒥᑦ ᑐᐊᕐᓴᑦ ᕿᑭᖅᑕᐅᑉ (ᓄᓇᓕᖓᑦ ᑭᖕᖓᐃᑦ ᐃᓂᖓᓂᑦ). ᑳᓐᔅᑕᐳᓪ ᑭᐅᓕᖕ ᑕᑯᔪᓐᓇᕐᓂᕋᓚᐅᕐᒥᔪᖅ ᖃᐅᒪᓂᑦ ᖃᒧᑕᐅᔭᒧᑦ ᐃᑳᖅᑐᒥᑦ ᓯᑯᒃᑯᑦ ᒥᑦᓵᓅᖅᑐᓂ ᓯᔾᔭᐅᑉ ᐃᓪᓗᐃᑦ ᓈᓴᐅᑎᖃᕐᕕᖏᓐᓂ 1,000.

[55] ᑳᓐᔅᑕᐳᓪ ᑭᐅᓕᖕ ᓄᖅᑲᖅᑎᓚᐅᖅᑕᖓ ᓄᓇᒃᑰᔫᓂ ᐊᒻᒪ ᐊᑐᐃᓐᓇᕈᐃᓕᖅᑐᓂ ᖁᑭᐅᑎᒥᓂᒃ. ᓇᓗᓇᐃᕐᓯᔪᓐᓇᓕᓚᐅᖅᑐᖅ ᑕᑯᓚᐅᖅᑐᓂ ᐊᖁᑎᖓ ᖃᒧᑕᐅᔭᐅᑉ ᖁᑭᐅᑎᓕᕆᔪᕕᓂᐅᓂᕐᒥᑦ ᐊᑲᐅᖏᓕᐅᕈᑎᐅᓯᒪᖏᒻᒪᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᑎᓚᐅᖅᑐᑦ ᐃᓪᓗᒥ D ᐊᒻᒪ ᐊᖏᖃᑎᒌᑦᑐᑎᒃ ᕿᓂᒃᑲᓐᓂᕐᓂᐊᕋᒥᒃ ᖃᓄᐃᓕᐅᕆᔪᒥᑦ. ᐅᐸᖁᔭᐅᓕᓚᐅᖅᑐᑦ ᐅᖃᐅᓯᐅᓯᒪᔪᒧᑦ ᐸᕝᕕᓴᕝᕕᐅᔪᒧᑦ ᐃᓪᓗᒧᑦ E.

ᑕᑯᓂᐊᓚᐅᖅᑐᖅ ᐊᒻᒪ ᑕᑯᓪᓗᓂ ᐊᖑᑎᒥᑦ ᐅᕐᕈᔮᔪᒥᑦ ᐊᒻᒪ ᖃᐃᒐᓪᓛᔪᒥᑦ ᑭᓇᒧᒃᑭᐊᖅ ᐊᑐᕆᐊᒦᑦᑐᒧᑦ. ᒪᓕᑦᑐᒋᑦ ᐅᖃᐅᓯᖏᑦ ᑳᓐᔅᑕᐳᓪ ᑭᐅᓕᖕ, ᐊᖑᑎᐅᑉ ᕿᖓᖓ ᐊᐅᖏᓐᓇᐅᓚᐅᖅᑐᖅ, ᐊᒻᒪ ᓱᕈᓯᓛᓂᑦ ᐊᕙᑎᒦᑦᑐᖃᖅᑐᓂ ᐸᓖᓯᒃᑯᓐᓂᑦ ᖃᐅᔨᒃᑲᕐᓵᖃᕋᓱᑦᑐᓂᑦ. ᓱᕈᓯᓛᑦ ᐅᖃᓚᐅᖅᑐᑦ, ᐊᑕᐅᓯᐅᕋᑎᒃ ᐅᖃᖅᐸᑦᑐᑎᒃ, "ᓂᖕᖓᐅᑎᔪᖅ ᑭᒃᑯᑐᐃᓐᓇᕐᓂᑦ!" ᐊᒻᒪ ᑎᒃᑯᐊᖅᑐᖅᐸᑦᑐᑎᒃ ᐊᖑᑎᒧᑦ. ᑳᓐᔅᑕᐳᓪ ᑭᐅᓕᖕ ᑕᑯᓚᐅᖅᑐᖅ ᐊᖑᑎᐅᔪᖅ ᐊᑦᓱᑲᓪᓚᒃ ᐋᖓᔮᖅᑎᓪᓗᒍ. ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ ᐃᖏᕐᕋᖃᑕᐅᓚᐅᖅᑐᖅ ᑕᕝᕙᓂᑦᓴᐃᓐᓇᖅ ᐸᓖᓯᒃᑯᑦ ᓄᓇᒃᑰᔫᖓᓐᓂ ᐊᒻᒪ ᐃᖏᕐᕋᓚᐅᖅᑑᒃ ᒥᑦᓵᓄᑦ ᐊᖑᑎᐅᑉ. ᑳᓐᔅᑕᐳᓪ ᑭᐅᓕᖕ ᐃᓱᒪᓚᐅᖅᑐᖅ ᐊᖑᑎᐅᔪᖅ ᐃᓚᒋᔭᐅᓚᐅᕐᓂᖓᓄᑦ ᖃᓄᐃᓕᐅᖅᑐᖃᕐᓂᖓᓂᑦ ᐊᑲᐅᖏᓕᐅᕈᑎᐅᔪᒧᑦ, ᐱᔾᔪᑎᒋᓪᓗᓂᐅᒃ ᐅᖓᑖᓂᑦ ᓴᖅᑭᓚᐅᕐᒪᑦ ᓇᔪᒐᐃᑦ ᐃᓪᓘᑉ E ᐃᓚᖏᓐᓂᑦ.

[57] 11:27 ᐅᓐᓄᒃᑯᑦ, ᑳᓐᔅᑕᐳᓪ ᑭᐅᓕᖕ ᐊᖁᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᐊᑐᕆᐊᕐᒧᑦ ᐊᒻᒪ ᑕᑯᓐᓇᖅᑐᓂ ᐊᖑᑎᒥᑦ ᐱᓱᑦᑐᒥᑦ ᐃᖏᕐᕋᔪᒧᑦ ᒥᑭᔪᒥᑦ ᑐᖑᔪᖅᑐᒥᑦ ᐱᓲᑎᑲᓪᓚᒻᒥᑦ. ᐱᓲᑎᑲᓪᓚᐅᔪᖅ ᕿᒪᐃᔫᔮᓚᐅᖅᑐᖅ ᐊᖑᑎᒥᑦ, ᑖᓐᓇᓕ "ᑎᒃᑯᐊᑐᖅᑐᒻᒪᕆᐅᓚᐅᖅᑐᖅ" ᒥᑦᓵᓄᑦ ᐊᖁᑎᖓᑕ ᐱᓲᑎᑲᓪᓚᐅᑉ. ᑳᓐᔅᑕᐳᓪ ᑭᐅᓕᖕ ᐃᖏᕐᕋᓕᓚᐅᖅᑐᖅ ᒥᑦᓵᓄᑦ ᐊᖑᑎᐅᑉ, ᐱᓱᓚᐅᖅᑐᒧᑦ ᐊᑯᓐᓂᖏᒍᑦ ᒪᕐᕉᒃ ᐃᓪᓘᒃ, ᒥᑦᓵᓄᑦ ᐊᓇᐅᕕᐅᑉ. ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ ᐊᓯᖏᓐᓄᑦ ᐸᓖᓯᐅᖃᑎᒥᓄᑦ ᓈᓚᐅᑎᕋᓛᒃᑯᑦ ᐊᖑᑎ ᖃᓂᒋᔮᓃᒻᒪᑦ ᐊᓇᐅᕕᐅᑉ; ᐃᑭᓕᕐᓂᓚᐅᖅᑕᖏᑦ ᓄᓇᒃᑰᔫᑉ ᑐᐊᕕᕐᓇᖅᑐᓄᑦ ᖃᐅᒪᖏᓐᓂᑦ ᑕᑯᑎᓇᓱᐊᖅᑐᓂᒋᑦ ᐊᓯᖏᑦ ᐸᓖᓯᐅᖃᑎᖏᑦ ᓇᒦᒻᒪᖔᕐᒥ, ᐊᒻᒪ ᐊᖑᑎᒥᑦ ᖃᐅᔨᒃᑲᕐᓵᕆᓇᓱᐊᕐᓯᓈᖅᑐᓂ.

[58] ᐅᖃᐅᓯᐅᒋᐊᕐᓯᒪᓂᐊᖅᑐᑦ ᓇᓗᓇᐃᕐᓯᒪᓂᕐᓴᐅᓗᑎᒃ ᐅᓂᒃᑳᓕᐊᑉ ᐃᓚᖓᓂ, ᑳᓐᔅᑕᐳᑉ ᑭᐅᓕᖕ ᓴᓂᐊᓅᕆᐊᓕᓚᐅᖅᑐᖅ ᐊᖑᑎᐅᑉ ᓄᓇᒃᑰᔫᖅᑐᓂ; ᒪᑐᐊ ᓄᓇᒃᑰᔫᑉ ᐊᑦᑐᐃᓗᓂ ᐊᖑᑎᒥᑦ, ᐅᕐᕈᑎᑦᑐᓂᐅᒃ ᐊᖑᑎ. ᐃᑲᔪᖅᑕᐅᓗᓂ ᐸᓖᓯᐅᖃᑎᖏᓐᓄᑦ, ᑳᓐᔅᑕᐳᓪ ᑭᐅᓕᖕ ᑎᒍᓯᓕᓚᐅᖅᑐᖅ ᐊᖑᑎᒥᑦ ᐸᕝᕕᓴᐃᓂᖓᓂᑦ.

[59] ᑎᑎᕋᕐᓯᒪᔭᖏᓐᓂ ᐅᖃᐅᓯᕆᓯᒪᔭᖏᓐᓂ, ᑳᓐᔅᑕᐳᓪ ᑭᐅᓕᖕ ᐱᓪᓗᐊᑕᖏᓐᓂᑦ ᐅᖃᐅᓯᖃᕐᓯᒪᔪᖅ ᐃᓱᒪᒋᔭᖏᓐᓂᑦ ᑎᒍᓯᔾᔪᑎᒋᔪᓐᓇᖅᑕᒥᓂᒃ ᐊᖑᑎᒥᑦ:

ᑎᒍᓚᐅᖅᑕᕋ [ᐊᖑᑎ] ᐸᕝᕕᓴᐃᓚᐅᕐᓂᖓᓄᑦ ᒪᓕᑦᑐᒋᑦ ᑕᑯᓐᓇᓚᐅᖅᑕᒃᑲ ᐋᖓᔮᖅᑐᒻᒪᕆᐅᑎᓪᓗᒍ, ᑲᖐᓱᓚᐅᕋᒪ ᐃᓚᒋᔭᐅᔪᕕᓂᐅᓂᖓᓄᑦ ᖃᓄᐃᓕᐅᕈᑎᒥ [ᐃᓪᓗᒥ E], ᐃᓕᕋᓇᕋᓱᓐᓂᕆᓚᐅᖅᑕᖓ ᐊᐅᓚᑦᑎᔪᒥᑦ ᑐᖑᔪᖅᑐᒥᑦ ᐱᓲᑎᑲᓪᓚᒻᒥᑦ, ᐅᖃᐅᓯᐅᓕᖅᑭᑦᑖᖑᕙᓚᐅᖅᑐᑦ ᓱᕈᓯᕐᓄᑦ ᓂᖕᖓᐅᑎᓂᕋᖅᑕᐅᓗᓂ ᑭᒃᑯᑐᐃᓐᓇᕐᓂᑦ, ᐊᒻᒪ ᑕᑯᓚᐅᕋᒃᑯ ᕿᖓᖓ ᐊᐅᖏᓐᓇᐅᑎᓪᓗᒍ.

[60] ᑳᓐᔅᑕᐳᓪ ᓲᓚᑦ ᐃᑲᔪᕐᓱᐃᑎᖏᓐᓂᑦ ᖃᓄᐃᓕᐅᕈᑎᒥᓂᕐᒥᒃ ᐅᓂᒃᑳᖏᓐᓂ, ᑎᑎᕋᕐᓯᒪᓚᐅᖅᑐᖅ ᐃᑭᒪᓚᐅᕋᒥ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᓂ ᐊᖁᑕᐅᓚᐅᖅᑐᒥᑦ ᑳᓐᔅᑕᐳᓪ ᑭᐅᓕᖕᒧᑦ. ᖃᐅᔨᓴᓚᐅᖅᑐᑦ ᐊᕙᑎᒥᑦ. ᑳᓐᔅᑕᐳᓪ ᓲᓚᑦ ᖃᐅᔨᒪᖁᔨᓚᐅᖅᑐᖅ ᐊᖑᑎᐅᔪᖅ ᑐᕌᖅᑎᓯᓯᒪᓐᓂᓚᐅᖅᑐᖅ ᖁᑭᐅᒻᒥᑦ ᕿᒪᐃᓯᒪᓕᕐᒪᑦ ᐊᒻᒪ ᖃᐅᔨᒪᔭᐅᒐᓂ ᓱᑯᑦᓯᐊᓃᒻᒪᖔᖅ, ᐊᒻᒪ ᑕᐃᓐᓇ (ᒃᑯᐊ) ᐋᓐᓂᕐᓯᓂᒃᑯᑦ (ᐸᕝᕕᓴᐃᓯᒪᔪᑦ) ᐊᑲᐅᖏᓕᐅᕈᑎᓕᒃ ᓱᓕ ᓇᓂᔭᐅᓚᐅᖏᒻᒪᑦ.

[61] ᑳᓐᔅᑕᐳᓪ ᓲᓚᑦ ᑕᑯᓐᓇᕐᓂᕋᓚᐅᖅᑐᖅ ᐊᖑᑎᒥᑦ ᐊᓐᓄᕌᕐᓯᒪᔪᒥᑦ ᕿᓂᖅᑕᓂᑦ ᐊᓐᓄᕌᓂᑦ, ᒪᕐᕋᐃᓐᓇᐅᓗᓂ, ᐅᕐᕈᔮᓪᓗᓂ ᓯᓚᑖᓂ ᐃᓪᓘᑉ F. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᑎᑎᕋᓚᐅᖅᑐᖅ:

ᒫᓐᓇᐅᔪᕐᓕ ᓇᓗᓇᓚᐅᖅᑐᖅ ᖃᓄᖅ [ᐊᖑᑎ] ᐱᖃᑕᐅᓚᐅᕐᒪᖔᖅ ᓇᓪᓕᐊᓐᓂ ᐱᓕᕆᔾᔪᑎᒥ ᐊᒻᒪ ᓱᓕ ᐸᓯᔭᑦᓴᐅᔪᓂᑦ ᑕᒫᓂᖅᑭᔪᖃᓚᐅᕐᒪᑦ, ᐃᓚᖓᑦ ᑐᕌᖅᑎᓯᓯᒪᔪᕕᓂᐅᓗᓂ ᓯᕗᓂᐊᒍᑦ. [ᐊᖑᑎᐅᔪᖅ] ᐋᖓᔮᖅᑐᒻᒪᕆᐅᔮᓚᐅᖅᑐᖅ ᑎᒍᔭᐅᒐᔭᖅᑐᓂ ᐸᕝᕕᓴᐃᓯᒪᓂᖓᓄᑦ ᐊᒻᒪ ᓇᓗᓇᐃᖅᑕᐅᓗᓂ ᖃᓄᖅ ᐱᖃᑕᐅᓐᓂᕐᒪᖔᖅ, ᐱᖃᑕᐅᓐᓂᕈᓂ, ᐊᓯᖏᓐᓂ ᐱᓕᕆᐊᖑᕙᓪᓕᐊᔪᓂ.

[62] ᐋᑐᕚ ᐸᓖᓯᒃᑯᑦ (OPS) ᖃᐅᔨᓴᖅᑎᖏᑦ ᐊᐱᕐᓱᓚᐅᖅᑐᑦ ᐊᖑᑎᒥᑦ ᐊᐅᓚᔫᒃᑯᑦ ᐊᔾᔨᓕᐅᕆᔪᕕᓂᕐᒥᒃ ᐃᓚᖏᓐᓂᑦ ᖃᓄᐃᒍᑎᐅᔪᕕᓂᕐᒥᒃ ᐊᐱᖅᑯᑎᐅᔪᒥᑦ. ᐊᖑᑎ ᐃᓐᓄᖃᖅᑐᖅ ᐃᓪᓗᒥ F. ᐅᖃᓚᐅᖅᑐᖅ ᐃᕿᐊᖑᓐᓂᕋᖅᑐᓂ ᐊᒻᒪ ᓱᔭᑦᓴᖃᖏᓐᓇᒥ, ᐊᔾᔨᓕᐅᕆᔪᒪᓯᔪᕕᓂᖅ ᐊᐅᓚᔫᒧᑦ "ᐋᖓᔮᖅᑐᓂᑦ." ᐊᖑᑎ ᑕᑯᓚᐅᖅᑐᖅ "ᓱᕈᓯᕐᒥᑦ" (ᑭᖑᓂᐊᒍᑦ ᓇᓗᓇᐃᖅᑕᐅᓚᐅᖅᑐᖅ ᐅᓇᐅᒋᐊᖓ A.B.) ᓇᓚᑎᓪᓗᒍ ᓄᓇᒥ. ᐊᖑᑎ ᑕᑯᓚᐅᖅᑐᖅ A.B. "ᐅᓪᓛᖃᖅᑎᓪᓗᒍ ᓱᕈᓯᕐᓂᑦ ᐊᒻᒪ ᕼᐋᓐᑕᒥᑦ." ᑭᖑᓂᐊᒍᑦ, ᖃᓄᐃᒍᑎᐅᓚᐅᖅᑐᖅ ᐊᑐᖅᑕᐅᓗᓂ ᐸᓖᓯᒃᑯᑦ ᓄᓇᒃᑰᔫᖓᑦ ᐊᑐᖅᑕᐅᓚᐅᖅᑐᖅ ᐊᒻᒪ A.B. ᑎᒍᔭᐅᓕᕐᓂᖅᑐᓂ.

[63] ᐅᖃᐅᓯᐅᖅᑲᐅᒻᒪᑦ, A.B. ᐅᖃᓚᐅᖅᑐᖅ ᖃᐅᔨᓴᖅᑎᓄᑦ ᓂᖕᖓᐅᒪᔪᒥᓂᐅᓂᕋᖅᑐᓂ ᐱᖃᑎᒥᓄᑦ ᐃᒥᐊᓗᖏᓐᓂᑦ ᐱᔪᕕᓂᐅᓂᖓᓄᑦ. ᐃᖅᑲᐅᒪᒍᓐᓇᖅᑕᖏᓐᓂ, ᑕᐃᑲᓂ ᐅᓐᓄᖓᓂ ᐅᖃᐅᓯᐅᔪᒥ ᐊᖑᔮᖃᓚᐅᖅᑐᖅ ᐱᖃᑎᒥᓂᒃ ᐱᓲᑎᑲᓪᓚᓚᐅᖅᑐᒥᑦ, ᐊᒻᒪ ᐊᖕᖑᑎᓐᓂᕈᓂ ᐱᓲᑎᑲᓪᓚᒻᒧᑦ, ᑎᓪᓗᓐᓂᐊᓚᐅᖅᑕᖓ ᐱᖃᑎᖓ.

[64] ᐱᓲᑎᑲᓪᓚᑦᑐᖅ ᐅᖃᖃᑎᖃᕈᒪᓚᐅᖏᑦᑐᖅ ᖃᐅᔨᓴᖅᑎᓂᑦ, ᑭᓯᐊᓂ ᓄᑲᖓ/ᐊᖏᔪᐊ ᐅᖃᐅᑎᑦᓴᖃᓚᐅᖅᑐᖅ ᐋᑐᕚ ᐸᓖᓯᒃᑯᑦ (OPS) ᖃᐅᔨᓴᖅᑎᖓᓐᓄᑦ ᐅᖃᖅᑐᒥᓂᐅᓗᓂ ᐱᓲᑎᑲᓪᓚᖃᑎᒋᓚᐅᕋᒥᐅᒃ ᓄᑲᓂ/ᐊᖏᔪᓂ ᑕᐃᑲᓂ ᐅᓐᓄᖓᓂ. ᑕᑯᓂᕋᓚᐅᖅᑐᖅ A.B. ᐱᓱᕋᔭᑦᑎᓪᓗᒍ ᐋᖓᔮᖅᑐᒻᒪᕆᐅᓗᓂ ᓇᖏᕈᓐᓇᑦᓯᐊᕋᓂᓘᓐᓃᑦ. A.B. ᐱᒋᐊᕋᓱᓕᕐᓂᖅᑐᓂᐅᒃ ᓄᑲᓂ ᐊᒻᒪ ᕿᑎᖅᑎᒥᓄᑦ ᑎᒃᑯᐊᖅᑐᓂᐅᒃ.

[65] ᖃᐅᔨᒪᔭᐅᔭᕆᐊᓕᒃ ᑖᒃᑯᐊ ᑕᑯᓐᓇᖅᑐᒥᓃᑦ ᐅᖃᐅᓯᕆᓯᒪᔭᖏᑦ ᐊᑐᐃᓐᓇᐅᓚᐅᖏᒻᒪᑕ ᑳᓐᔅᑕᐳᓪ ᑭᐅᓕᖕᒧᑦ ᑎᒍᓂᐊᓕᕋᒥᐅᒃ A.B.; ᑭᓯᐊᓂᓕ, ᐅᖃᐅᓯᐅᓯᒪᔪᑦ ᐱᓯᒪᔪᑦ ᐊᑕᐅᓰᓄᑦ ᑕᑯᓐᓇᖅᑕᒥᓂᕐᓄᑦ ᐅᖃᐅᓯᐅᓯᒪᔪᓂᑦ ᖃᓄᐃᓕᐅᕈᑎᒥᓂᖏᓐᓂᑦ A.B. ᓯᕗᓂᐊᓂ ᐸᓖᓯᒃᑯᓐᓂᑦ ᑲᑎᓯᓚᐅᕋᓂ.

[66] ᖃᐅᔨᓴᖅᑏᑦ ᕿᒥᕐᕈᐊᓚᐅᖅᑐᑦ ᐊᐅᓚᔪᓂᑦ ᐊᔾᔨᓕᐅᖅᑕᐅᓯᒪᔪᓂᑦ ᐊᖑᑎᒧᑦ ᐃᓪᓗᒦᑦᑐᒧᑦ F. ᐊᑕᐅᓯᖅ (1) ᐊᔾᔨᓕᐅᕐᓯᒪᔪᖅ ᑕᑭᓂᓕᒃ 7 ᓴᑲᓐᓯᑲᓪᓚᓐᓂᒃ, ᐊᐃᑉᐸᖓ 2 ᒪᓇᑦᓯᐅᓗᓂ ᐊᒻᒪ 23 ᓴᑲᓐᔅ ᑕᑭᓂᖓ.

[67] ᓯᕗᓪᓕᕐᒥ ᓂᐱᓕᐅᕐᓯᒪᔪᒥ, A.B. ᑕᑯᓐᓇᖅᑕᐅᔪᖅ ᐱᐅᖏᑦᑐᓂᑦ ᐆᑦᑐᕋᖅᑎᓪᓗᒍ ("ᕿᑎᖅᑎᒥᓄᑦ ᑎᒃᑯᐊᖅᑐᓂ") ᑕᒪᒃᑮᓐᓄᑦ ᐊᒡᒐᖏᓐᓄᑦ. ᓇᓗᓇᖅᑐᖅ ᑭᓇᒧᑦ ᐆᑦᑐᕋᐃᒻᒪᖔᖅ. ᐅᓪᓚᑦᓯᓪᓗᓂ ᐊᑯᓐᓂᖏᒍᑦ ᒪᕐᕉᒃ (2) ᐃᓪᓘᒃ (ᐃᓪᓗ G ᐊᒻᒪ ᐃᓪᓗ F) ᐊᒻᒪ ᑕᑯᑦᓴᐅᔪᓐᓃᑕᖅᐳᖅ ᐊᔾᔨᓕᐅᕐᓯᒪᔪᒥᑦ. ᐊᑕᐅᓯᕐᒥᑦ (1) ᐃᓯᒐᐅᔭᕐᓯᒪᔪᖅ.

[68] ᐊᐃᑉᐸᖓᓂ ᐊᔾᔨᓕᐅᕐᓯᒪᔪᒥ, A.B. ᑕᑯᑦᓴᐅᓕᖅᑐᓂ ᓄᓇᒥ ᐊᑦᓴᑳᑎᓪᓗᒍ ᖃᓂᒋᔭᖓᓂ ᐱᓲᑎᑲᓪᓚᑦᑕᖃᖅᑎᓪᓗᒍ ᐃᖏᕐᕋᔪᒥᑦ. ᐊᖁᑎᖓ ᐱᓲᑎᑲᓪᓚᐅᑉ ᓄᖅᑲᖅᑐᓂ ᐊᒻᒪ ᑕᑯᓴᖅᑐᖅ A.B.-ᒧᑦ, ᑖᓐᓇᓕ ᓯᖅᑯᑐᖅᑐᖅ ᐹᕐᖑᖅᑐᓂ. A.B. ᓇᖏᕐᓯᔪᖅ ᐊᒻᒪ ᐱᓱᓕᖅᑐᓂ ᐊᑐᕆᐊᕐᒧᑦ. ᐱᓲᑎᑲᓪᓚᒃ ᓱᒃᑲᐃᑦᑐᑯᓘᓪᓗᓂ ᓯᕗᒧᑦ ᐃᖏᕐᕋᔪᖅ. A.B. ᐱᓱᓕᖅᑐᓂ ᒥᑦᓵᓄᑦ ᐱᓲᑎᑲᓪᓚᐅᑉ, ᐅᕐᕈᔮᓪᓗᓂ ᐊᒻᒪ ᑕᓕᖏᓐᓂᑦ ᐃᓵᑦᓯᕙᑦᑐᓂ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᓄᓇᒃᑰᔫᒥᑦ ᑕᑯᑦᓴᐅᔪᖃᓕᖅᑐᖅ ᐃᖏᕐᕋᔪᒥᑦ ᒥᑦᓵᓄᑦ A.B., ᑖᑦᓱᒪ ᑕᑯᓴᖅᑐᓂᐅᒃ. ᐱᓲᑎᑲᓪᓚᒃ ᕿᒪᐃᕙᓪᓕᐊᓚᐅᖅᑐᖅ ᓱᒃᑲᐃᑦᑐᓂ.

ᓈᒻᒪᔾᔪᑎᖏᑦ A.B. ᑎᒍᔭᐅᔾᔪᑎᖏᑕ

ᖃᐅᔨᔭᐅᔪᖅ #1: ᓈᒻᒪᑦᑐᖃᓚᐅᖅᑐᖅ ᐃᓱᒪᒋᔭᐅᔪᓂᑦ A.B. ᓱᕋᐃᔪᕕᓂᐅᓂᖓᓄᑦ ᒪᓕᒐᕐᒥᑦ ᐸᕝᕕᓴᐃᓗᓂ, ᐊᒻᒪ ᓈᒻᒪᓚᐅᕐᒪᑦ ᑳᓐᔅᑕᐳᓪ ᑭᐅᓕᖕ ᑎᒍᓪᓗᓂᐅᒃ ᑕᐃᑦᓱᒧᖓ ᓱᕋᐃᓯᒪᓂᖓᓄᑦ ᒪᓕᒐᕐᒥᑦ.

[69] ᐸᓖᓯᐅᔪᑦ ᓇᓗᓇᐃᕆᐊᖃᖅᐸᒻᒪᑕ ᓈᒻᒪᑦᑐᓂᑦ ᐃᓱᒪᒋᔭᖃᕐᒪᑕ ᐃᓱᒪᓪᓗᑎᒃ ᑭᓇᑐᐃᓐᓇᖅ ᓱᕋᐃᓯᒪᓂᖓᓂᑦ ᒪᓕᒐᕐᒥᑦ ᓯᕗᓂᐊᒍᑦ ᑎᒍᓯᓚᐅᖏᓂᕐᒥᓂ ᐅᕝᕙᓘᓐᓃᑦ ᐃᖅᑲᖅᑐᕋᑦᓴᐅᑎᑦᓯᓂᐊᕐᓂᕐᒥᓂᒃ ᑕᐃᑦᓱᒥᖓ ᑭᓇᒥᑦ. ᑲᖐᒋᔭᐅᑐᐃᓐᓇᖅᑐᑦ ᖃᓄᐃᒍᑎᐅᔪᑦ ᓈᒻᒪᔾᔮᖏᒻᒪᑕ ᑎᒍᓯᔪᖃᕐᓂᐊᕈᓂ. ᑭᓯᐊᓂᑦᑕᐅᖅ, ᐱᔾᔪᑎᐅᔪᑦ ᓇᓗᓇᐃᕐᓯᒪᑦᑎᐊᕆᐊᖃᖅᐸᑦᑐᑦ ᐊᑭᕋᖅᑐᓂᒃᑯᑦ ᑕᑯᓐᓇᖅᑕᐅᓂᒃᑯᑦ; ᓈᒻᒪᒋᔭᐅᔪᖅ ᑭᓇ ᑲᒪᔨᐅᑎᑕᐅᔪᖅ ᐃᓱᒪᓕᕈᓐᓇᕆᐊᖃᕐᒪᑦ ᐱᑕᖃᖅᑐᒥᓂᐅᓂᖓᓄᑦ ᓈᒻᒪᑦᑐᓂᑦ ᑎᒍᓯᔾᔪᑎᐅᓂᐊᖅᑎᓪᓗᒋᑦ.

[70] ᖃᐅᔨᓴᖅᑕᐅᑎᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐃᓱᒪᑦᓴᕐᓯᐅᕈᑎᐅᕙᑦᑐᑦ ᑎᒍᓯᓂᐊᕐᒪᖔᕐᒥ ᐅᕝᕙᓘᓐᓃᑦ ᐃᖅᑲᖅᑐᕋᑦᓴᕈᑦᑎᑦᓯᓗᓂ, ᐱᒻᒪᕆᐅᔪᖅ ᐳᐃᒍᑦᑕᐃᓕᒋᐊᑦᓴᖅ ᐊᑑᑎᖓᑦ ᐸᓖᓰᑦ ᓇᓗᓇᐃᔭᐃᓂᐅᖏᒻᒪᑦ ᐸᓯᔭᐅᔪᖅ ᐸᓯᔭᑦᓴᐅᒻᒪᖔᕐᓘᓐᓃᑦ ᐸᓯᔭᑦᓴᐅᖏᒻᒪᖔᕐᓘᓐᓃᑦ – ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᖅᑲᖅᑐᐃᔨᐅᔪᓐᓇᖏᒻᒪᑕ ᐊᒻᒪ ᓈᓚᑦᑎᐅᓗᑎᒃ. ᐸᓯᔭᐅᔪᖅ ᑎᒍᔭᐅᔪᕕᓂᐅᓂᖓ ᐱᓪᓗᒍ ᑭᓯᐊᓂ ᐃᖅᑲᖅᑐᕋᑦᓴᐅᑎᑕᐅᒐᓂ, ᐅᕝᕙᓘᓐᓃᑦ ᐃᖅᑲᖅᑐᕋᑦᓴᐅᔾᔪᑎᖏᑦ ᑲᔪᓯᔭᐅᓐᓂᖏᒻᒪᑕ, ᓇᓗᓇᐃᔭᐃᑎᐅᖏᑦᑐᑦ ᖃᓄᖅ ᓈᒻᒪᑦᑐᒥᓂᐅᓂᖓᓂᑦ ᑎᒍᓯᓂᐅᔫᑉ. ᖃᐅᔨᓴᖅᑕᐅᔪᑦ ᐃᖅᑲᖅᑐᐃᑎᓪᓗᒋᑦ "ᓇᓗᓇᐃᑦᓯᐊᖅᑐᖅ," ᐊᒻᒪ ᑲᔪᓯᔭᐅᑎᓪᓗᒋᑦ ᐃᖅᑲᖅᑐᖅᑕᐅᔾᔪᑎᐅᓯᒪᔪᑦ ᓄᓇᕘᒥ, ᐃᒪᐃᑦᑑᔪᖅ "ᓇᓗᓇᐃᑦᓯᐊᖅᑐᑦ ᖃᓄᐃᓕᔭᐅᔪᓐᓇᕐᓂᖓᓄᑦ," ᑕᒪᒃᑮᒃ ᐊᖏᓂᕐᓴᓂᑦ ᓴᖅᑮᔾᔪᐅᒐᒥᒃ ᓈᒻᒪᑦᑐᑦ ᖃᓄᐃᓕᔭᐅᔾᔪᑎᒋᔪᓐᓇᖅᑕᖏᓐᓂᑦ ᐱᓯᒪᔪᓂᑦ.

[71] ᑳᓐᔅᑕᐳᓪ ᑭᐅᓕᖕ ᑎᒍᓯᓚᐅᖅᑐᖅ A.B.-ᒥᑦ ᐸᕝᕕᓴᐃᓚᐅᕐᓂᖓᓂᑦ. ᑎᑎᕋᕐᓯᒪᕕᒻᒦᑦᑐᑦ 175 ᐱᕋᔭᐅᑎᓄᑦ ᐊᑐᐊᒐᑦ ᑐᑭᓕᐅᕆᓯᒪᔪᖅ ᓱᕋᐃᓂᕐᒥᑦ ᒪᓕᒐᕐᒥᑦ ᐃᒪᐃᓕᖓᓪᓗᑎᒃ:

175 (1) ᑭᓇᑐᐃᓐᓇᑦᑎᐊᖅ ᐃᒪᐃᑦᑐᖅ

(ᐃ) ᐃᓗᐊᓃᖏᑦᑐᖅ ᓇᔪᒐᐅᑉ-ᐃᓪᓘᑉ, ᐸᕝᕕᓴᐃᔪᑦ ᐅᕙᓂ ᐅᕝᕙᓘᓐᓃᑦ ᖃᓂᒋᔭᖓᓂ ᑭᒃᑯᑐᐃᓐᓇᕐᓄᑦ ᐃᓂᒋᔭᐅᔪᒥ,

1. (i) ᓂᖕᖓᐅᑎᓗᓂ, ᐊᑦᓱᐊᓗᒃ ᖃᐃᒐᓛᓗᓂ, ᖃᐃᒐᓛᓗᓂ, ᐅᖃᐅᓯᑲᒻᒪᓐᓂᒃ ᐅᖃᐅᓯᖃᖅᐸᒃᑯᓂ, ᐃᖕᖏᖃᑦᑖᕈᓂ ᐅᕝᕙᓘᓐᓃᑦ ᐊᑐᕈᓂ ᖁᕕᐊᓇᖕᖏᑦᑐᓂᑦ ᐅᕝᕙᓘᓐᓃᑦ ᐅᖃᐅᓯᑲᒻᒪᓐᓂᒃ ᐅᖃᐅᓯᖃᖅᐸᓪᓗᓂ,
2. (ii) ᐋᖓᔮᕐᓗᓂ, ᐅᕝᕙᓘᓐᓃᑦ
3. (iii) ᐊᕝᕕᐊᕐᓗᓂ ᐅᕝᕙᓘᓐᓃᑦ ᐱᑦᑎᐊᖏᒃᑯᓂ ᐊᓯᒥᓂᒃ,

. . .

ᐸᓯᔭᑦᓴᐅᕗᖅ ᓱᕋᐃᓂᕐᒥᑦ ᒪᓕᒐᕐᒥᑦ ᖃᓄᐃᓕᔭᐅᔾᔪᑎᒋᔪᓐᓇᖅᑕᒥᓂᒃ ᐱᓗᐊᖏᑦᑐᓄᑦ ᖃᓄᐃᓕᔭᐅᔾᔪᑎᒧᑦ.

• (2) ᐱᑕᖃᖅᑎᓐᓇᒍ ᐊᓯᖏᓐᓂᑦ ᓇᓗᓇᐃᔭᐃᑎᑦᓴᓂᑦ, ᐅᕝᕙᓘᓐᓃᑦ ᐊᓯᖏᓐᓄᑦ ᓇᓗᓇᐃᔭᐃᑎᓄᑦ ᖃᐅᔨᔭᐅᒍᑎᒃ, ᐱᓗᐊᖏᑦᑐᓄᑦ ᖃᓄᐃᓕᔭᐅᔾᔪᑎᖃᕈᓐᓇᕐᒪᑕ ᐊᑐᖅᑕᐅᓗᑎᒃ ᓇᓗᓇᐃᔭᐃᑎᐅᔪᑦ ᐱᓯᒪᔪᑦ ᓴᐃᓕᖓᓂᕐᒥᑦ ᑲᒪᔨᒧᑦ ᐊᑦᑐᐊᔪᒥᑦ ᐱᓕᕆᔾᔪᓯᖏᓐᓄᑦ ᑭᓇᐅᑉ ᐅᕝᕙᓘᓐᓃᑦ ᑭᒃᑯᓐᓄᑦ, ᓇᓗᓇᐃᖅᑕᐅᒐᓗᐊᕈᓂ ᓇᓗᓇᐃᖅᑕᐅᖏᒃᑲᓗᐊᕈᓂ, ᐸᕝᕕᓴᐃᔪᖃᖅᑐᒥᓂᐅᓂᖓᓄᑦ ᒪᓕᑦᑐᒋᑦ ᓇᓗᓇᐃᖅᑕᐅᓯᒪᔪᑦ ᑎᑎᖅᑲᖃᕐᕕᒻᒥ (1) (ᐃ) ᐅᕝᕙᓘᓐᓃᑦ (ᑭ) ᐅᕝᕙᓘᓐᓃᑦ ᐊᕝᕕᐊᖅᑐᖃᖅᓂᖅᐸᑦ ᒪᓕᑦᑐᒋᑦ ᓇᓗᓇᐃᔭᖅᑕᐅᓯᒪᔪᑦ ᑎᑎᖅᑲᖃᕐᕕᒻᒥ (1) (ᑎ) ᐱᔮᕆᔭᐅᓚᐅᕐᒪᖔᖅ ᐅᕝᕙᓘᓐᓃᑦ ᐊᑐᖅᑕᐅᓚᐅᕐᒪᖔᖅ.

[72] ᑎᑎᖅᑲᖃᕐᕕᒻᒥ 495 ᐱᕋᔭᐅᑎᓄᑦ ᐊᑐᐊᒐᑦ ᐊᑐᕈᓐᓇᑎᑦᓯᔪᑦ ᐸᓖᓯᒥᑦ ᑎᒍᓯᔪᖃᕈᓐᓇᕐᒪᑦ ᑭᓇᑐᐃᓐᓇᕐᒥᑦ ᑎᒍᓯᔾᔪᑎᖃᖏᒃᑲᓗᐊᕈᓂ ᖃᐅᔨᔭᐅᒍᓂ ᑕᐃᓐᓇ ᑭᓇ ᐱᕋᔭᐅᑎᒥᑦ ᓱᕋᐃᒋᐊᖓ ᒪᓕᒐᕐᒥᑦ ᐊᒻᒪ ᐸᓖᓯᐅᔪᖅ ᐃᓱᒪᒍᓂ ᓈᒻᒪᑦᑐᖅᑕᖃᕆᐊᖓ ᑎᒍᔭᐅᔪᖃᕆᐊᖃᕐᓂᖓᓄᑦ ᑲᔪᓯᖁᓇᒍ ᐅᕝᕙᓘᓐᓃᑦ ᐊᔾᔨᖏᓐᓂᑦ ᐊᑐᖁᔭᐅᒐᓂ ᓱᕋᐃᓂᕐᒥᑦ ᒪᓕᒐᕐᒥᑦ, ᐊᒻᒪ/ᐅᕝᕙᓘᓐᓃᑦ ᓇᓗᓇᐃᖅᑕᐅᓗᓂ ᑕᐃᓐᓇ ᑭᓇᑭᐊᖅ.

[73] ᐱᔾᔪᑎᒋᓪᓗᒍ ᓱᕋᐃᓯᒪᓂᖅ ᒪᓕᒐᕐᒥᑦ ᐸᕝᕕᓴᐃᔪᕕᓂᐅᓗᓂ, ᑕᑯᑦᓴᐅᑎᑕᐅᒋᐊᓕᒃ ᐸᓯᔭᐅᔪᖅ ᐊᑐᖅᑐᒥᓂᐅᓂᖓᓄᑦ ᐃᓚᖓᓂᑦ ᑎᑎᕋᕐᓯᒪᔪᒥᑦ ᒪᓕᒐᕐᒥᑦ, ᐸᓯᔭᐅᔪᖅ ᓇᔪᒐᕐᒦᓚᐅᖏᓐᓂᖓᓂᑦ ᐃᓪᓗᒥ, ᐊᒻᒪ ᐸᓯᔭᐅᔫᑉ ᖃᓄᐃᓕᐅᕈᑎᖏᑦ ᐸᕝᕕᓴᐃᓚᐅᕐᒪᑕ.

[74] ᐃᖅᑲᖅᑐᐃᕕᒻᒪᕆᒃᑯᑦ ᑲᓇᑕᒧᑦ ᐊᑐᕐᓯᒪᔪᑦ, ᐊᑐᖅᑕᐅᖁᓪᓗᒍ ᑐᑭᓕᐅᕈᑎᐅᔪᖅ ᐸᕝᕕᓴᐃᓂᕐᒧᑦ, ᓇᓗᓇᐃᕈᑎᖃᕆᐊᓕᒃ "ᓯᓚᑖᓂᑦ ᐱᓯᒪᔪᒥᑦ ᐸᕝᕕᓴᐃᓂᖅ ᑭᒃᑯᑐᐃᓐᓇᕐᓄᑦ ᓴᐃᓕᖓᕕᒻᒥᑦ." ᑕᒪᐅᓇ ᑐᑭᖃᖅᑐᖅ ᐸᕝᕕᓴᐃᓂᐅᔪᖅ ᐊᕝᕕᐊᖅᑐᒥᓂᐅᒋᐊᓕᒃ, ᖃᓄᑐᐃᓐᓇᖅ, ᑭᒃᑯᑐᐃᓐᓇᕐᓄᑦ ᐊᑐᖅᑕᐅᕙᓐᓂᖓᓂᑦ ᖃᓄᖅ ᐊᕙᑎᐅᔪᖅ. ᐱᒻᒪᕆᐅᒋᐊᑐᒐᓂᓗ ᐸᕝᕕᓴᐅᑎᐅᔪᖅ, ᐱᑕᖃᓚᐅᑐᐊᕐᓂᖅᐸᑦ. ᐊᒻᒪᑦᑕᐅᖅ, ᑭᓇᑐᐃᓐᓇᖅ ᐊᑐᕋᓱᐊᖅᑐᒥᓂᐅᒋᐊᓕᒃ ᐅᖃᐅᓯᐅᔪᒥᑦ ᖃᓄᐃᓕᐅᕈᑎᒥᑦ ᐸᕝᕕᓴᐃᓂᕐᒥᑦ, ᐊᒻᒪ ᐸᕝᕕᓴᐃᓂᐅᔪᖅ ᓈᒻᒪᑐᒃᑯᑦ ᐃᓱᒪᒋᔭᐅᒐᔭᖅᑐᒥᓂᐅᓗᓂ ᐊᑐᖅᑕᐅᓚᖓᓂᖓᓄᑦ ᐱᔾᔪᑎᒋᓪᓗᒋᑦ ᖃᓄᐃᒍᑎᐅᓚᐅᖅᑐᑦ.^{Footnote 10} ᓇᓗᓇᐃᕐᓯᔾᔪᑎᖓ ᐸᕝᕕᓴᐃᓂᐅᑉ ᐱᑕᖃᕆᐊᓕᒃ ᑭᓇᑐᐃᓐᓇᖅ ᐊᑦᑐᖅᑕᐅᓯᒪᓂᒥᓂᖓᓄᑦ ᐅᕝᕙᓘᓐᓃᑦ ᐸᕝᕕᓴᑦᑕᐅᓯᒪᓂᖓᒍᑦ ᖃᓄᐃᓕᐅᕈᑎᐅᔪᒧᑦ.

[75] ᖃᐅᔨᓴᖅᑏᑦ ᖃᐅᔨᔪᑦ ᓈᒻᒪᓚᐅᕐᒪᑕ ᐃᓱᒪᒋᔭᐅᔪᑦ A.B. ᓱᕋᐃᓚᐅᕐᓂᖓᓄᑦ ᒪᓕᒐᕐᒥᑦ ᐸᕝᕕᓴᐃᓗᓂ, ᐊᒻᒪ ᓈᒻᒪᓚᐅᕐᒪᑦ ᑳᓐᔅᑕᐳᓪ ᑭᐅᓕᖕ ᑎᒍᒐᒥᐅᒃ ᑕᐃᑦᓱᒧᖓ ᓱᕋᐃᓂᕐᒥᑦ ᒪᓕᒐᕐᒥᑦ. ᑳᓐᔅᑕᐳᓪ ᑭᐅᓕᖕ ᑐᓴᖅᑐᒥᓂᖅ ᐊᖑᑎᕐᕙᓗᒻᒥᑦ ᖃᐃᒐᓛᕙᓗᑦᑐᒥᑦ ᐊᒻᒪ ᑕᑯᓐᓇᓕᖅᑐᒥᓂᐅᓗᓂ ᐊᖑᒻᒥᑦ, ᓇᓗᓇᐃᖅᑕᐅᓕᖅᑐᒥᓂᕐᒥᒃ A.B.-ᖑᓂᖓᓂᑦ, ᐅᕐᕈᔮᔪᖅ ᐊᒻᒪ ᖃᐃᒐᓛᕙᓗᑦᑐᓂ ᑭᓇᒧᒃᑭᐊᖅ ᐊᑐᕆᐊᕐᒦᑦᑐᒧᑦ. ᓱᕈᓯᖅᑕᖃᓚᐅᕐᒪᑦ ᐊᕙᑎᐊᓂ ᐅᖃᐃᓐᓇᑦᑎᐊᓚᐅᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒧᑦ A.B. "ᓂᖕᖓᐅᑎᕙᒻᒪᑦ ᑭᒃᑯᑐᐃᓐᓇᕐᓂᑦ." ᑳᓐᔅᑕᐳᓪ ᑭᐅᓕᖕ ᑕᑯᓐᓇᓕᖅᑐᒥᓂᖅ A.B. ᐱᓱᑦᑎᓪᓗᒍ ᒥᑦᓵᓄᑦ, ᐊᒻᒪ "ᑎᒃᑯᐊᑐᖅᑎᓪᓗᒍ ᐃᓕᕋᓇᕋᓱᑦᑐᓂ," ᐃᓄᒻᒥᑦ ᐊᖁᑦᑐᒥᑦ ᐱᓲᑎᑲᓪᓚᒻᒥᑦ. A.B. ᐊᑦᓱᐊᓗᒃ ᐋᖓᔮᕐᕙᓗᑦᑐᒥᓂᖅ.    

[76] ᒪᓕᑦᑐᒋᑦ ᓇᓗᓇᐃᔭᖅᑕᐅᓯᒪᔪᑦ, ᑕᑯᓐᓇᖅᑐᒥᓂᕐᒥᒃ ᓇᓗᓇᐃᕐᓯᔪᖃᓚᐅᖅᑐᖅ ᑕᑯᓐᓇᕐᓂᕋᒥᐅᒃ A.B. "ᐅᓛᖃᖅᑎᓪᓗᒍ ᓱᕈᓯᕐᓂᑦ ᐊᒻᒪ ᕼᐋᓐᑕᒥᑦ," ᐊᒻᒪ ᐊᓯᖏᓂᑦ ᑕᑯᓐᓇᖅᑐᒥᓂᕐᒥᒃ ᐅᖃᖅᑐᖃᓚᐅᖅᑐᖅ A.B. "ᐱᒋᐊᕐᓯᒐᓱᓚᐅᕐᒪᑦ [ᐱᓲᑎᑲᓪᓚᒻᒥᑦ ᐊᖁᑎᒥᑦ] ᐊᒻᒪ ᐃᓄᒐᖕᖑᐊᒥᓄᑦ ᕿᑎᖅᑎᐊᓄᑦ ᑎᒃᑯᐊᖅᑐᓂᐅᒃ." A.B. ᓇᓗᓇᐃᕐᓯᓚᐅᖅᑐᖅ ᐊᖑᔮᖃᕐᓂᕋᒥ ᐱᓲᑎᑲᓪᓚᑦᑐᒥᑦ ᐊᒻᒪ ᐱᒋᐊᓚᖓᓐᓂᕋᒥᐅᒃ ᐱᒋᐊᕈᓐᓇᕐᓂᕈᓂᐅᒃ. ᑳᓐᔅᑕᐳᓪ ᑭᐅᓕᖕ ᖃᐅᔨᒪᓚᐅᖏᒃᑲᓗᐊᕋᒥ ᑕᒪᒃᑯᓂᖓ ᐅᖃᐅᓯᐅᓯᒪᔪᓂᑦ ᓇᓗᓇᐃᕋᒥ A.B. ᑎᒍᔭᐅᔭᕆᐊᖃᕐᓂᖓᓂᑦ, ᐅᖃᐅᓯᐅᓯᒪᔪᑦ ᓇᓗᓇᐃᕐᓯᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᑉ ᑎᑎᕋᕐᓯᒪᔭᖏᓐᓂᑦ ᑕᑯᓐᓇᖅᑕᒥᓂᕐᒥᓂᒃ ᐱᔾᔪᑎᖃᖅᑐᓂ. ᐊᒻᒪᑦᑕᐅᖅ, ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᑦ ᕿᒥᕐᕈᐊᖅᑕᐅᓚᐅᖅᑐᑦ ᖃᐅᔨᓴᖅᑎᓄᑦ ᓇᓗᓇᐃᕐᓯᓯᒪᔪᑦ A.B. ᐋᖓᔮᖅᑐᒻᒪᕆᒥᓂᐅᓂᖓᓄᑦ ᐊᒻᒪ ᐱᐅᖏᑦᑐᓂᑦ ᓄᓗᕋᖅᐸᑦᑐᓂᑦ ᖃᓂᒋᔭᖃᖅᑐᓂ ᐱᓲᑎᑲᓪᓚᑦᑐᒥᑦ.

[77] ᓈᒻᒪᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐃᓱᒪᓂᖓ A.B. ᓱᕋᐃᓚᐅᕐᓂᖓᓂᑦ ᒪᓕᒐᕐᒥᑦ ᐸᕝᕕᓴᐃᓗᓂ. ᓈᒻᒪᓚᐅᕐᒥᔪᖅ ᑳᓐᔅᑕᐳᓪ ᑭᐅᓕᖕ ᐃᓱᒪᓂᖓ ᑎᒍᔭᐅᔭᕆᐊᖃᕐᓂᖓᓄᑦ A.B. ᓄᖅᑲᖅᑎᒍᒪᓪᓗᓂᐅᒃ ᐱᕋᔭᐃᓂᕐᒥᑦ ᐅᕝᕙᓘᓐᓃᑦ ᑕᐃᒫᑦᓴᐃᓐᓇᖅ ᓱᕋᐃᓂᐊᕐᓂᖓᓂᑦ ᐅᕝᕙᓘᓐᓃᑦ ᐊᑐᒃᑲᓐᓂᕐᓗᓂ ᓱᕋᐃᓂᕐᒥᑦ ᒪᓕᒐᕐᒥᑦ. ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ ᓈᒻᒪᓚᐅᕐᓂᖓᓂᑦ ᑳᓐᔅᑕᐳᓪ ᑭᐅᓕᖕ ᑎᒍᓯᒐᒥ A.B.-ᒥᑦ ᐸᕝᕕᓴᐃᓚᐅᕐᓂᖓᓄᑦ.

[78] ᑎᒍᔭᐅᓚᐅᖏᒃᑲᓗᐊᕋᒥ ᑕᒪᓐᓇ ᐱᔾᔪᑎᐅᓗᓂ, ᑕᑯᑦᓴᐅᓚᐅᕐᒥᔪᖅ A.B. ᐱᕋᔭᓐᓂᐅᖏᑦᑐᒃᑯᑦ ᓱᕋᐃᓚᐅᕐᓂᖓᓂᑦ ᒪᓕᒐᕐᒥᑦ ᐋᖓᔮᖅᑐᓂ ᑭᒃᑯᑐᐃᓐᓇᕐᓄᑦ ᐅᐸᒐᕐᒥ, ᒪᓕᑦᑐᒋᑦ ᓇᓗᓇᐃᖅᑕᐅᓯᒪᔪᑦ ᑎᑎᕋᕐᓯᒪᕕᒻᒦᑦᑐᑦ 80 ᓄᓇᕘᒥ ᐃᒥᐊᓗᓕᕆᔪᖅ ᒪᓕᒐᖅ:

80(1) ᑭᓇᑐᐃᓐᓇᖅ ᐃᒥᐊᓗᒻᒧᑦ ᐋᖓᔮᕐᓂᐊᖏᓚᖅ ᑭᒃᑯᑐᐃᓐᓇᕐᓄᑦ ᐅᐸᒐᕐᒥ.

[79] ᑎᑎᕋᕐᓯᒪᕕᒻᒦᑦᑐᑦ 81 ᐃᒥᐊᓗᓕᕆᔪᖅ ᒪᓕᒐᖅ ᐱᔪᓐᓇᐅᑎᐅᔪᖅ ᐸᓖᓯᒥᑦ ᑎᒍᓯᒍᓐᓇᑎᑦᓯᓪᓗᓂ ᐃᒥᐊᓗᒻᒧᑦ ᐋᖓᔮᖅᑐᒥᑦ ᑭᓇᑐᐃᓐᓇᕐᒥᑦ ᑭᒃᑯᑐᐃᓐᓇᕐᓄᑦ ᐅᐸᒐᕐᒦᑦᑐᒥᑦ ᐊᒻᒪ, ᐃᓱᒪᒋᒍᓂᐅᒃ ᓴᐃᓕᖓᑎᑦᓯᓂᕐᒥᑦ ᑲᒪᔨᐅᑉ, ᑕᐃᓐᓇ ᑭᓇ ᐋᓐᓂᑐᐃᓐᓇᕆᐊᖃᕐᒪᑦ ᐃᖕᒥᓂᒃ ᐅᕝᕙᓘᓐᓃᑦ ᐅᓗᕆᐊᓇᕐᓗᓂ, ᐸᕝᕕᓇᕐᓗᓂ, ᐅᕝᕙᓘᓐᓃᑦ ᐸᕝᕕᓴᐃᓗᓂ ᐊᓯᒥᓄᑦ.

ᖃᓄᑎᒋ ᓈᒻᒪᑦᑐᒥᓂᐅᓂᖓ ᐱᓕᕆᔾᔪᓯᖓᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᑉ ᓄᓇᒃᑰᔫᖅᑑᑉ

ᖃᐅᔨᔭᐅᔪᖅ #2: ᓈᒻᒪᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐊᒻᒪ ᐊᓯᖏᓐᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᑎᒍᓯᔪᕕᓂᐅᓂᖏᓐᓂᑦ A.B.-ᒥᑦ ᕿᓚᒥᐅᔫᒥᔪᖅ.

ᖃᐅᔨᔭᐅᔪᖅ #3: ᓇᓗᓇᐃᔭᐃᑏᑦ ᓇᓗᓇᐃᕐᓯᓯᒪᖏᑦᑐᑦ ᑳᓐᔅᑕᐳᓪ ᑭᐅᓕᖕ ᐊᐳᕐᓯᓇᓱᐊᖅᑐᒥᓂᐅᓂᖓᓄᑦ A.B.-ᒥᑦ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ. ᑭᓯᐊᓂ, ᐊᑐᐃᓐᓇᐅᔪᑦ ᑐᑭᓯᒋᐊᕈᑎᐅᔪᑦ ᓇᓗᓇᐃᔭᐃᓯᒪᔪᑦ ᑕᒪᓐᓇ ᐱᕐᕈᓗᐊᕿᔾᔪᑎᐅᓐᓂᕐᒪᑦ ᐊᑐᖅᑕᐅᔪᕕᓂᐅᓗᓂ ᐱᔾᔪᑎᒋᓪᓗᒍ ᐸᓖᓯᒃᑯᑦ ᓄᓇᒃᑰᔫᖓᑦ ᓯᕗᒧᑦ ᐃᖏᕐᕋᓯᑲᓪᓚᓂᕐᒪᑦ ᐱᔾᔪᑎᒋᓪᓗᒍ ᐊᑐᕆᐊᑉ ᐱᐅᓗᐊᓚᐅᖏᓐᓂᖓ ᓄᖅᑲᕋᓱᑦᑐᒥᓂᐅᑎᓪᓗᒋᑦ ᖃᓂᒋᔮᓄᑦ A.B.

ᖃᐅᔨᔭᐅᔪᖅ #4: ᐊᑕᓇᓚᐅᕐᒪᑦ ᐊᒻᒪ ᓈᒻᒪᒐᓂ ᑳᓐᔅᑕᐳᓪ ᑭᐅᓕᖕ ᐊᖁᓐᓂᐊᕐᓂᕈᓂ ᖃᓂᒋᓗᐊᕐᓗᓂᐅᒃ A.B. ᐊᑐᕆᐊᑦᑕᖓ ᖁᐊᓴᐅᑎᓪᓗᒍ ᐱᐅᓗᐊᕋᓂ. ᑳᓐᔅᑕᐳᓪ ᑭᐅᓕᖕ ᐅᓗᕆᐊᓇᑐᐃᓐᓇᕆᐊᓕᓐᓂᑦ ᖃᐅᔨᓴᑦᓯᐊᕆᐊᖃᖅᑐᒥᓂᐅᒐᓗᐊᖅ ᐃᓱᒪᒋᓪᓗᒍ ᖃᓄᐃᑦᑑᓂᖓ ᐊᑐᕆᐊᑉ ᐊᒻᒪ ᐊᓯᖏᑦ ᐊᑑᑎᖃᐅᖅᑐᑦ ᐱᔾᔪᑎᐅᓯᒪᔪᑦ.

ᖃᐅᔨᔭᐅᔪᖅ #5: ᖃᐅᔨᓴᖅᑏᑦ ᓈᒻᒪᓴᖅᑐᑦ ᓈᒻᒪᑦᑐᓂᑦ ᐋᖅᑭᒋᐊᕈᑎᑦᓴᓂᑦ ᐱᓕᕆᐊᖃᓚᐅᕐᒪᑕ ᐱᔾᔪᑎᒋᓪᓗᒍ ᑳᓐᔅᑕᐳᓪ ᑭᐅᓕᖕ ᐊᖁᓐᓂᕆᓚᐅᖅᑕᖓ ᐊᒻᒪ ᐊᓯᐊᒍᑦ ᖃᓄᐃᓕᐅᕈᑎᐅᒋᐊᖃᕈᓐᓃᕐᒪᑦ.

ᐊᑐᖁᔭᖅ #1: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓴᓇᒋᐊᓖᑦ ᐊᒻᒪ ᐱᒋᐊᖅᑎᑦᓯᓗᑎᒃ ᐊᑐᐊᒐᕐᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᖃᖅᑐᓂᑦ ᐊᑐᖅᑕᐅᕙᓐᓂᖏᓐᓂᑦ ᖃᓄᖅ ᐸᓖᓯᒃᑯᓐᓄᑦ ᓄᓇᒃᑰᔫᑦ ᐊᖑᔮᖃᖅᑎᓪᓗᒋᑦ ᐸᓯᐅᕋᖅᑕᐅᔪᓂᑦ ᐱᓱᑦᑐᓂᑦ.

ᐊᑐᖁᔭᖅ #2: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᕆᐊᓕᐅᔪᑦ ᓴᓇᓂᕐᒥᑦ ᐊᒻᒪ ᐱᒋᐊᖅᑎᑦᑎᓂᕐᒥᑦ ᐱᓪᓗᐊᑕᓂᑦ ᐊᑐᐊᒐᕐᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᒋᓪᓗᒋᑦ ᓄᓇᒃᑰᔫᖅᐸᓐᓂᖅ ᐊᑐᕆᐊᓂ ᐃᓱᒪᒋᓪᓗᒋᑦ ᖃᓄᐃᑉᐸᓐᓂᖏᑦ ᐊᑐᖅᑕᐅᒐᔪᑉᐸᑦᑐᑦ ᐅᑭᐅᖅᑕᖅᑐᒥ ᓄᓇᓕᖃᕐᕕᓐᓂ.

[80] ᐊᐱᕐᓱᖅᑕᐅᑎᓪᓗᒍ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓄᑦ, A.B. ᐃᖅᑲᐅᒪᔭᖏᑦ ᖃᓄᐃᓕᐅᕈᑎᐅᔪᕕᓃᑦ ᐅᓐᓄᖓᓂ ᐊᐱᖅᑯᑎᐅᔫᑉ ᑭᓪᓕᖃᓚᐅᖅᑐᑦ. ᑭᐅᖏᓐᓇᓚᐅᖅᑐᖅ ᖃᐅᔨᒪᖏᓐᓂᕋᖅᑐᓂ ᐅᕝᕙᓘᓐᓃᑦ ᐃᓚᖏᓐᓂᑦ ᐃᖅᑲᐅᒪᖏᓐᓂᕋᖅᑐᓂ.

[81] A.B. ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᑦ (OPS) ᖃᐅᔨᓴᖅᑎᖏᓐᓄᑦ ᐋᖓᔮᓕᕐᓂᕋᒥ ᐊᒻᒪ ᐸᓖᓯᒃᑯᓐᓄᑦ ᐊᐳᖅᑕᐅᓐᓂᕋᒥ ᓄᓇᒃᑰᔫᒧᑦ, ᐊᒻᒪ ᑭᖑᓂᐊᒍᑦ ᓱᓇᒥᑦ ᐃᖅᑲᐅᒪᖏᓯᐊᖅᑐᖅ. ᐃᖅᑲᐅᒪᓂᕋᖅᑐᖅ ᐱᓱᑦᑐᓂ ᐊᒻᒪ ᐸᓖᓯᒃᑯᑦ ᓄᓇᒃᑰᔫᖓᓐᓄᑦ ᐅᐸᑦᑕᐅᓗᓂ ᒪᑐᐊ ᒪᑐᐃᖓᑦᑕᐅᑎᒋᑎᓪᓗᒍ; ᓴᐅᒥᐊᓃᑦᑐᒧᑦ ᒪᑐᒧᑦ ᐊᑦᑐᑕᐅᓗᓂ ᑮᓇᒃᑯᑦ ᐊᒻᒪ ᖃᐅᔨᒪᒍᓐᓃᓂᖅᑐᓂ. A.B. ᐅᖃᓚᐅᖅᑐᖅ "ᐸᓖᓯᓄᑦ ᐊᕙᑦᑎᑕᐅᓂᒥᓂᕐᒥᓂᒃ" ᐊᒻᒪ ᖃᐅᔨᓕᖅᑐᒥᓂᐅᓗᓂ ᑎᒍᔭᐅᒪᕕᒻᒦᑦᑐᓂ ᐋᖓᔮᕈᓐᓃᐸᓪᓕᐊᓗᓂ.

[82] ᐅᖃᐅᔾᔭᐅᔪᕕᓂᖅ ᐋᓐᓂᑎᖅᑕᐅᔪᕕᓂᐅᒋᐊᖓ ᑎᒍᔭᐅᒪᑎᓪᓗᒍ; ᖃᐅᔨᒪᓚᐅᖏᑦᑐᖅ ᐋᓐᓂᖅᑐᒥᓂᐅᓐᓂᕐᒪᖔᖅ ᐊᐳᖅᑕᐅᒐᒥ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ ᐅᕝᕙᓘᓐᓃᑦ ᑎᒍᔭᐅᒪᕕᒻᒥ ᐋᓐᓂᑎᖅᑕᐅᓂᕐᒪᖔᖅ. A.B. ᐋᑐᕚ ᐸᓖᓯᒃᑯᖏᑦ (OPS) ᖃᐅᔨᓴᖅᑎᖏᓐᓂᑦ ᑕᑯᔪᒥᓂᐅᓂᕋᖅᑐᓂ ᐊᐅᓚᔫᒥᑦ ᐊᔾᔨᓕᐅᖅᑕᐅᓯᒪᔪᒥᑦ ᐸᓖᓯᒃᑯᑦ ᓄᓇᒃᑰᔫᖓᑦ ᖃᓄᐃᒍᑎᐅᑎᓪᓗᒍ, ᐊᒻᒪ ᐃᓱᒪᔪᖅ ᐊᔾᔨᓕᐅᕐᓯᒪᔪᒃᑯᑦ ᐅᖃᐅᔾᔭᐅᓯᒪᒋᐊᑦᓴᖅ ᖃᓄᐃᑦᑐᖃᕐᓂᕐᒪᖔᖅ (ᑕᐃᒫᖑᒐᓂ ᐃᓱᒪᒋᓚᐅᖅᑕᖓᒍᑦ ᐃᖅᑲᐅᒪᔭᖏᑦ ᐱᓪᓗᒋᑦ). ᐅᖃᓚᐅᖅᑐᖅ ᒪᓕᒐᓕᕆᔨᖓᑕ ᑕᑯᑎᓚᐅᕐᒪᒍ ᐊᐅᓚᔪᓂᑦ ᐊᔾᔨᓕᐅᖅᑕᐅᓯᒪᔪᒥᑦ. ᐅᖃᓚᐅᖅᑐᖅ ᐃᖅᑲᖅᑐᕋᑦᓴᐅᑎᒍᒪᓪᓗᓂᒋᑦ ᐸᓖᓰᑦ, ᐊᒻᒪ ᐊᐱᕆᓚᐅᖅᑕᖏᑦ ᐋᑐᕚ ᐸᓖᓯᒃᑯᖏᑦ (OPS) ᖃᐅᔨᓴᖅᑎᖏᑦ ᐃᖅᑲᖅᑐᕋᑦᓴᐅᑎᒋᐊᖃᕐᓂᐊᕐᒪᖔᒋᑦ ᐸᓖᓯᒃᑯᑦ ᐱᓕᕆᔾᔪᓯᖏᑦ ᐱᓪᓗᒍ. ᐅᖃᓚᐅᖅᑐᖅ ᓄᒫᓱᓐᓂᕋᖅᑐᓂ ᐊᒻᒪ ᓂᖕᖓᐅᒪᓂᕋᖅᑐᓂ, ᐊᒻᒪ ᒪᓕᒐᓕᕆᔨᖓᑕ ᐅᖃᐅᑎᓐᓂᖅᑐᓂᐅᒃ ᐸᓖᓯᒃᑯᑦ ᖃᓄᐃᓕᔭᐅᖏᕝᕕᖃᔾᔮᖏᒻᒪᑕ ᑕᒪᓐᓇ ᐱᓪᓗᒍ.^{Footnote 11} ᐅᖃᕆᐊᓚᐅᖅᑐᖅ ᐊᑎᖓ ᐅᖃᐅᓯᐅᖁᓇᓂᐅᒃ ᐅᑎᓚᐅᖏᓐᓂᖓᓂ ᐊᖏᕐᕋᖓᑕ ᓄᓇᓕᖓᓄᑦ. ᐊᐱᕆᔭᐅᒐᒥ ᖃᓄᐃᓕᐅᖁᔨᓂᐊᕐᒪᖔᖅ ᑕᑯᔪᒪᔭᖓᓂᑦ ᐱᔾᔪᑎᒋᓪᓗᒍ ᖃᓄᐃᒍᑎᐅᔪᖅ, A.B. ᐅᖃᓚᐅᖅᑐᖅ ᐱᔭᕆᐊᑐᓂᕋᖅᑐᓂᐅᒃ ᓇᓗᓇᐃᔭᐃᒋᐊᖓ ᑭᓯᐊᓂ ᑕᑯᔪᒪᓂᕋᓚᐅᖅᑐᖅ ᓈᒻᒪᔭᖏᔾᔪᑎᓕᓐᓂᑦ ᖃᓄᐃᓕᐅᕈᑎᒋᓚᐅᖅᑕᖏᓐᓂᑦ ᐸᓖᓯᒃᑯᑦ.

[83] ᑎᑎᕋᕐᓯᒪᔭᖏᓐᓂ ᑎᑎᖅᑲᓂ, ᑳᓐᔅᑕᐳᓪ ᑭᐅᓕᖕ ᓇᓗᓇᐃᔭᐃᓯᒪᔪᖅ, ᑕᑯᓐᓇᓚᐅᖅᑐᓂᐅᒃ ᐊᖑᑎ ᓇᓗᓇᐃᖅᑕᐅᓕᓚᐅᖅᑐᖅ ᐅᓇᐅᓂᖓᓂᑦ A.B. ᑎᒃᑯᐊᖓᑎᓪᓗᒍ ᐃᓕᕋᓇᕋᓱᑦᑐᓂ ᐱᓲᑎᑲᓪᓚᒻᒥᑦ ᐊᖁᑎᒧᑦ, ᐃᓪᓘᑉ ᐅᖓᑖᒎᓕᓚᐅᖅᑐᖅ ᑎᑭᖅᑯᐊᓂ ᐊᒻᒪ ᐊᑐᖅᑐᓂ ᐊᑐᕆᐊᕐᒥᑦ ᐅᐸᕝᕕᑦᓴᐅᔪᒥᑦ ᑭᓪᓕᖓᒎᖓᔪᒃᑯᑦ ᐊᓇᐅᕕᐅᑉ, A.B. ᐱᓱᑦᑎᓪᓗᒍ ᒥᑦᓵᓄᑦ ᐊᓇᐅᕕᐅᑉ. ᑳᓐᔅᑕᐳᓪ ᑭᐅᓕᖕ ᐃᑭᑦᓯᓕᓚᐅᖅᑐᖅ ᑐᐊᕕᕐᓇᖅᑐᑕᖃᖅᑎᓪᓗᒍ ᖃᐅᒪᖏᓐᓂᑦ ᓄᓇᒃᑰᔫᑉ ᐊᖑᑎ ᑕᑯᓴᖅᑎᒐᓱᐊᖅᑐᓂᐅᒃ ᐊᒻᒪ ᑕᑯᑎᓇᓱᐊᖅᑐᒋᑦ ᐊᓯᖏᑦ ᐸᓖᓯᐅᖃᑎᓂ ᓇᒦᒻᒪᖔᖅ.

[84] ᑳᓐᔅᑕᐳᓪ ᑭᐅᓕᖕ ᑕᑯᓐᓇᑲᓐᓂᓕᓚᐅᖅᑐᖅ A.B.-ᒥᑦ, ᐅᑎᖅᐸᓪᓕᐊᔫᔮᓚᐅᖅᑐᓂ ᐊᕙᑎᐊᓄᑦ ᑕᑯᔭᐅᕕᒋᒋᐊᖓᓚᐅᖅᑕᒥᓄᑦ. ᑳᓐᔅᑕᐳᓪ ᑭᐅᓕᖕ ᓇᓗᓇᐃᔭᐃᓚᐅᖅᑐᖅ ᖃᓄᐃᓕᐅᕈᑎᐅᓚᐅᖅᑐᓂᑦ ᐅᑯᐊ ᐅᖃᐅᓯᕆᓪᓗᒋᑦ:

ᐅᐸᓚᐅᖅᑕᕋ ᐸᓖᓯᒃᑯᑦ ᓄᓇᒃᑰᔫᖓᑦ ᐊᑐᓚᐅᖅᑕᕋ ᐊᒻᒪ ᒪᑐᒐ ᒪᑐᐃᖓᑎᑦᑐᒍ ᓂᐅᓂᐊᕈᒪᓗᖓ ᑐᐊᕕᕐᓗᖓ ᓄᓇᒃᑰᔫᒥᑦ ᖃᐅᔨᒪᓚᐅᖏᓐᓇᒪ ᐊᖑᑎ ᕿᒫᒐᓱᓐᓂᐊᕐᒪᖔᖅ ᐅᕝᕙᓘᓐᓃᑦ ᐅᑎᕐᓗᓂ ᐅᐸᒋᐊᖃᓚᐅᖅᑕᑎᓐᓄᑦ.

ᐅᐸᑉᐸᓪᓕᐊᓪᓗᒍ ᐊᖑᑎᐅᑉ ᐱᓱᕝᕕᖓ, ᑕᓕᖏᓐᓂᑦ ᐊᐅᓚᑎᑦᓯᔪᒻᒪᕆᐅᓚᐅᖅᑐᖅ ᐊᒻᒪ ᐊᕗᖓᑲᓪᓚᒃ ᐊᓪᓗᐸᑦᑐᓂ. ᐃᖏᕐᕋᓚᐅᖅᑐᖓ ᓴᓂᐊᒍᑦ ᐊᖑᑎᐅᑉ ᐊᒻᒪ ᓄᖅᑲᕋᓱᓚᐅᖅᑐᖓ ᓴᓂᐊᓄᑦ ᑕᓪᓕᖅᐱᐊᑕ. ᓄᖅᑲᓕᖅᑎᓪᓗᒍ, ᐸᓖᓯᒃᑯᑦ ᓄᓇᒃᑰᔫᖓᑦ ᖁᐊᔭᕿᓚᐅᖅᑐᖅ ᓂᓚᑲᓪᓚᒻᒧᑦ ᐊᒻᒪ ᐅᕙᖓ [ᐅᖃᐅᓯᖅ] ᓄᓇᒃᑰᔫᖅ ᖁᐊᔭᕿᑦᑐᑕ ᓄᖅᑲᓚᐅᖅᑐᒍᑦ. ᓄᓇᒃᑰᔫᑉ ᓯᕗᕌ ᐊᖁᑎᐅᑉ ᒥᑦᓵᓃᑦᑐᖅ ᓴᓂᕌᓂ ᐊᑦᓴᓗᐊᖓ ᐃᒪᑲᓪᓚᒻᒨᓚᐅᖅᑐᖅ ᓂᓚᖓ ᐊᐅᑉᐸᓪᓕᐊᓂᖓᓂᑦ ᐊᒻᒪ ᓄᓇᒃᑰᔫᒥᑦ ᓯᕗᒧᑦ ᐃᖏᕐᕋᑎᑕᐅᓚᐅᖅᑐᖅ ᑕᒪᓐᓇ ᐱᓪᓗᒍ ᐊᒻᒪ ᓴᐅᒥᒻᒨᖅᑐᓂ ᐊᖑᑎᐅᑉ ᒥᑦᓵᓄᑦ. ᓄᓇᒃᑰᔫᑉ ᓯᕗᕌ ᐊᖁᑎᐅᑉ ᒥᑦᓵᓃᑦᑐᖅ ᓴᓂᕌᓂ ᒪᑐᐊ ᑎᒍᒥᐊᓚᐅᖅᑕᕋ ᒪᑐᐃᓚᐅᖅᑐᖅ ᓯᕗᒧᑦ ᐃᖏᕐᕋᖃᑕᐅᓗᓂ ᓄᓇᒃᑰᔫᒧᑦ ᐊᒻᒪ ᐊᑦᑐᐃᓗᓂ ᐊᖑᑎᒥᑦ, ᐅᕐᕈᑎᑕᐅᓗᓂ ᓄᓇᒧᑦ. ᐊᑐᕋᓱᓚᐅᖏᑕᕋ ᒪᑐᒐ ᐱᒋᐊᕈᒪᓪᓗᒍ ᐊᖑᑎ. ᓴᓂᐊᓄᒋᐊᖅ ᓄᖅᑲᕈᒪᑐᐃᓐᓇᓚᐅᕋᓗᐊᖅᑐᖓ ᐊᒻᒪ ᓂᐅᓗᖓ ᓄᓇᒃᑰᔫᓐᓂᒃ ᕿᓚᒥᐅᔫᒥᔪᖅ ᑎᒍᓂᐊᕋᒃᑯ.

[85] ᑳᓐᔅᑕᐳᓪ ᑭᐅᓕᖕ ᓂᐅᓕᓚᐅᖅᑐᖅ ᐸᓖᓯᓄᑦ ᓄᓇᒃᑰᔫᖓᓂᑦ ᐊᒻᒪ ᐅᖃᐅᑎᓕᖅᑐᓂᐅᒃ A.B. ᑎᒍᔭᐅᓂᖓᓂᑦ ᐸᕝᕕᓴᐃᓚᐅᕐᓂᖓᓄᑦ.

[86] ᑭᐅᓪᓗᑎᒃ ᑲᐅᔨᓴᖅᑏᑦ ᑎᑎᖅᑲᖏᓐᓂᑦ ᐊᐱᖅᑯᑎᒃᑲᓂᕐᓄᑦ, ᒪᓕᒐᓕᕆᔨᐅᔪᑦ ᑭᒡᒐᖅᑐᐃᔪᑦ ᑳᓐᔅᑕᐳᓪ ᑭᐅᓕᖕᒥᑦ ᓇᓗᓇᐃᔭᐃᓚᐅᖅᑐᑦ A.B. ᐃᒫᒃ "ᕿᒫᔪᖅ ᐸᓯᔭᐅᔪᖅ ᐅᖃᐅᓯᐅᒐᓂ ᐱᓱᑐᐃᓐᓇᕐᓂᖓᓄᑦ ᐊᕙᑎᒃᑯᑦ." ᒪᓕᒐᓕᕆᔩᑦ ᐅᖃᕆᐊᓚᐅᖅᑐᑦ "[ᑳᓐᔅᑕᐳᓪ ᑭᐅᓕᖕ] ᑐᐊᕕᐊᖃᖅᑎᓪᓗᒍ ᑎᒍᓯᓂᐊᕐᓂᕐᒥᓂᒃ [A.B.-ᒥᑦ] ᖃᐅᔨᒪᑦᑎᐊᓚᐅᖅᑐᖅ ᐊᑐᕆᐊᑦ ᖃᓄᐃᓕᖓᓂᖏᓐᓂᑦ ᐊᒻᒪ ᑭᒃᑯᑐᐃᓐᓇᐃᑦ ᐊᕙᑎᒦᓚᐅᖅᑐᑦ." ᐊᒻᒪᑦᑕᐅᖅ, ᒪᓕᒐᓕᕆᔩᑦ ᐅᖃᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᑉ ᐊᑐᕋᓱᓚᐅᖅᑕᖓ ᓄᖅᑲᖅᑎᒍᒪᓪᓗᓂᐅᒃ A.B. ᐱᕕᑐᓂᕐᒨᓚᐅᖏᓐᓂᖓᓂ; ᐃᓱᒫᓗᑎᒋᔭᐅᓚᐅᕐᒪᑦ A.B. ᐱᒋᐊᕐᓂᐊᕆᐊᑦᓴᖓᓂᑦ ᐱᓲᑎᑲᓪᓚᒻᒥᑦ ᐊᖁᑦᑎᒥᑦ, ᐅᕝᕙᓘᓐᓃᑦ ᐅᑎᕐᓗᓂ ᐃᓪᓗᒧᑦ ᐸᕝᕕᓴᕝᕕᒋᖃᐅᔭᒥᓂᒃ. ᒪᓕᒐᓕᕆᔩᑦ ᐋᔩᓚᐅᕐᒥᔪᑦ ᑳᓐᔅᑕᐳᓪ ᑭᐅᓕᖕ ᐃᖅᑲᖅᑐᕋᑦᓴᕈᖅᑎᑕᐅᑲᓴᓐᓂᖓᓄᑦ ᐊᑦᓲᓂᕐᓴᖅ ᑐᐊᕕᕐᓗᓂ ᐊᕝᕕᐊᕆᐊᓚᐅᖏᒃᑯᓂ ᐊᒻᒪ A.B. ᓱᖏᐅᑎᖃᕐᓂᕈᓂ ᐊᒻᒪ ᖁᑭᕐᓯᓕᕐᓗᓂ ᐱᓲᑎᑲᓪᓚᒻᒥᑦ ᐊᖁᑎᒥᑦ.

[87] ᑳᓐᔅᑕᐳᓪ ᓱᓚᑦ ᐃᑭᒪᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᖓᓂ. ᐊᑐᖅᑕᐅᓯᒪᔪᒥᑦ ᐅᓂᒃᑳᓕᐊᖏᓐᓂ, ᑎᑎᕋᕐᓯᒪᔪᖅ:

ᐃᓚᒋᔭᐅᔪᑦ ᐸᓖᓯᓄᑦ ᐅᐸᓚᐅᖅᑐᑦ ᐊᖑᑎᒥᑦ [A.B.] ᐊᒻᒪ ᑳᓐᔅᑕᐳᓪ ᓱᓚᑦ ᐅᐸᓗᖓᐃᔭᓕᖅᑎᓪᓗᒍ ᓂᐅᓂᐊᕐᓂᕐᒥᓂᒃ ᓄᓇᒃᑰᔫᒥᑦ ᕿᓚᒥᐅᔫᒥᔪᖅ ᐊᔪᕐᓇᖏᓐᓂᖓᒍᑦ ᐃᓚᒋᔭᐅᔪᑦ ᓱᓕ ᖃᐅᔨᒪᓚᐅᖏᒻᒪᑕ ᑭᓇᐅᓂᖓᓂᑦ ᐊᖑᑎᐅᑉ ᐊᒻᒪ ᖃᓄᖅ ᐃᓱᒪᒋᔭᖃᕐᓂᖓᓂᑦ.

ᓄᓇᒃᑰᔫᖅ ᖃᓪᓕᓕᖅᑎᓪᓗᒍ [A.B.], ᑕᒪᒃᑮᒃ ᐃᓚᒋᔭᐅᔫᒃ (ᑳᓐᔅᑕᐳᓪ ᓱᓚᑦ ᐊᒻᒪ ᑭᐅᓕᖕ) ᓂᐅᕙᓪᓕᐊᓕᓚᐅᖅᑑᒃ ᓄᓇᒃᑰᔫᒥᑦ. ᓄᓇᒃᑰᔫᖅ ᓄᖅᑲᐸᓪᓕᐊᓕᖅᑎᓪᓗᒍ, ᓯᕗᕌ ᓴᐅᒥᐊᒍᑦ ᓄᓇᒃᑰᔫᑉ ᐊᑐᕆᐊᕐᒥ [ᐃᒪᐃᑦᑐᒧᑦ] ᐃᓯᕐᓴᒨᓚᐅᖅᑐᖅ ᐅᕝᕙᓘᓐᓃᑦ ᐃᒪᑲᓪᓚᒻᒧᑦ. ᑳᓐᔅᑕᐳᓪ ᓱᓚᑦ ᑐᓴᓚᐅᖅᑐᖅ ᓄᓇᒃᑰᔫᑉ ᒪᑐᐊ ᐊᒻᒪ [A.B.] ᐊᐳᖅᐸᓗᑦᑎᓪᓗᒋᒃ ᑭᓯᐊᓂ ᑕᑯᓐᓇᓚᐅᖏᑦᑐᖅ.

[88] ᐊᐱᕐᓱᖅᑕᐅᓗᓂ ᐋᑐᕚ ᐸᓖᓯᒃᑯᖏᓐᓄᑦ (OPS) ᖃᐅᔨᓴᖅᑎᓄᑦ, ᑳᓐᔅᑕᐳᓪ ᓲᓚᑦ ᐅᖃᐅᓯᖃᓚᐅᖅᑐᖅ ᖃᓄᐃᒍᑎᐅᓚᐅᖅᑐᒥᑦ ᐅᑯᐊ ᐅᖃᐅᓯᕆᓪᓗᒋᑦ:

ᐊᒡᒋᐸᓪᓕᐊᓪᓗᒍ, ᓱᓖᓛᒃ ᐃᓱᒪᓚᐅᖅᑐᖓ, ᐃᒫ, ᖃᐅᔨᒪᖏᑕᕋ ᑖᓐᓇ ᐊᖑᑎ ᑭᓇᐅᒻᒪᖔᖅ, ᓱᓕ ᕿᓂᕋᑦᑕ ᐊᒥᓱᑲᓪᓚᓐᓂᒃ ᑲᖐᒋᔭᐅᔪᓂᑦ, ᐋᓐᓂᕐᓯᕋᑖᖅᑐᒥᓂᐅᒍᓂ ᑭᓇᒥᑦ, ᐃᒻᒪᖄ ᓱᖏᐅᑎᖃᖅᑐᓂ, ᓱᓇᑐᐃᓐᓇᕐᒥᑦ, ᑎᒍᓵᕈᒪᓚᐅᕋᑦᑎᒍ ᐊᓂᕙᓪᓕᐊᓕᓚᐅᖅᑐᖓ ᓄᓇᒃᑰᔫᒥᑦ.

ᐊᓱᐃᓪᓛᒃ ᐊᒡᒐᒐ ᒪᑑᑉ ᑎᒍᓪᓕᕕᖓᓅᓚᐅᖅᑐᖅ ᓄᓇᒃᑰᔫᖅ ᓄᖅᑲᑐᐊᕐᒪᑦ ᐊᓂᒍᓐᓇᕈᒪᒧᑦ.

ᑳᓐᔅᑕᐳᓪ ᑭᐅᓕᖕ ᐊᒻᒪᑦᑕᐅᖅ – ᑕᐃᒫᐸᓗᑦᑕᐅᖅ ᐊᑐᓚᐅᕐᒥᔪᖅ. ᒪᑐ, ᖃᐅᔨᒪᔪᑎᑦ, ᒪᑐᐃᐸᓗᓚᐅᖅᑐᖅ, ᑕᐃᒫᑦᑕᐅᖅ, ᓄᓇᒃᑰᔫᖅ ᓄᖅᑲᖅᑲᑦ ᓂᐅᓵᕈᓐᓇᕐᓂᐊᕋᑦᑕ ᕿᓚᒥᐅᔫᒥᔪᖅ.

ᐅᐸᓕᖅᑐᒍ – ᓄᓇᑦᑕᖓ ᒪᓃᑦᑐᕈᓘᒻᒪᑦ ᑕᐅᕙᓂ, ᐊᐅᑉᐸᓪᓕᐊᓪᓗᓂ ᐊᐳᑦ, ᐊᑐᕆᐊᑦ ᐃᓯᕐᓴᖃᐅᖅᑐᑎᒃ, ᓱᓇᑐᐃᓐᓇᑦᑎᐊᑦ – ᓄᖅᑲᑲᓪᓚᓚᐅᕋᑦᑕ ᐊᒻᒪ ᓯᕗᕌᓃᑦᑐᖅ ᓴᐅᒥᐊᓂ ᓄᓇᒃᑰᔫᑉ ᐅᕕᒐᓚᓚᐅᖅᑐᖅ ᐊᒻᒧᑦ. ᐃᒫᒐᓚᒃ – ᖃᐅᔨᒪᖏᑦᑐᖓ ᐃᓯᕐᓴᐅᓂᕐᒪᖔᖅ ᐊᑐᕆᐊᕐᒥ ᐅᕝᕙᓘᓐᓃᑦ ᓱᓇᐅᒻᒪᖔᖅ ᑭᓯᐊᓂ ᐊᒻᒧᐊᓗᐊᑲᓪᓚᓚᐅᖅᑐᖅ. ᓯᕗᒧᑦ ᐃᖏᕐᕋᑲᐃᓐᓇᒻᒪᕆᓕᓚᐅᖅᑐᒍᑦ. ᐊᒻᒪ ᑕᑯᓪᓚᑦᑖᓚᐅᖏᒃᑲᓗᐊᖅᑐᖓ ᐊᐳᖅᑐᒥᑦ ᑭᓯᐊᓂ ᑐᓴᓚᐅᖅᑐᖓ ᐊᐳᕐᓯᕙᓗᑦᑐᒥᑦ – ᐊᒻᒪᐃᓛᒃ ᑕᑯᓚᐅᔾᔭᖏᑦᑐᖓ ᑭᓯᐊᓂ ᐃᓱᒪᒋᔭᕋ ᒪᑐᒥᓂᐅᒋᐊᖓ. ᐊᓱᐃᓪᓛᒃ ᑐᓴᓚᐅᖅᑕᕋ ᐊᐳᕐᓯᕙᓗᒃ.

[89] ᐊᐱᕆᔭᐅᒐᒥ ᖃᓄᑎᒋ ᓱᑲᓐᓂᖃᓚᐅᕐᒪᖔᖅ ᓄᓇᒃᑰᔫᖅ ᐃᖏᕐᕋᓪᓗᓂ, ᑳᓐᔅᑕᐳᓪ ᓲᓚᑦ ᐅᖃᖅᑐᖅ:

ᐃᓛᒃ, ᐃᒪᐃᓚᐅᖅᑐᖅ – ᖃᓄᐃᑦᑑᔮᓚᐅᖏᑦᑐᖅ. ᐃᓛᒃ, ᖃᓄᑭᐊᖅ, ᐃᒫ, ᓇᓗᓇᐃᕈᓐᓇᖅᑕᕋ. ᐃᒫ ᐅᐸᓵᕈᒪᓚᐅᖅᑕᕗᑦ ᑭᓯᐊᓂ ᐃᒪᐃᓚᐅᖏᑦᑐᖅ – ᐱᓗᐊᖅᑑᔮᓚᐅᖏᑦᑐᖅ ᖃᖓᑐᐃᓐᓇᒃᑯᑦ ᐅᕝᕙᓘᓐᓃᑦ ᖃᓄᑐᐃᓐᓇᖅ. ᐊᒻᒪ ᓴᖑᓪᓗᓂ ᑎᑭᖅᑯᐊᒍᑦ ᒪᐅᓇ, ᐃᓛᒃ ᓱᒃᑲᐃᓪᓕᒋᐊᖃᓚᐅᕋᑦᑕ, ᓄᓇᑦᑕᖓ ᐱᐅᓗᐊᕋᓂ. . . . ᐱᑕᖃᖅᑑᔮᓚᐅᖏᑦᑐᖅ [ᐃᒫ] ᐊᑐᖅᑕᐅᒋᐊᖃᖏᑦᑐᒥᑦ.

[90] ᑳᓐᔅᑕᐳᓪ ᓯᒥᖦ ᐊᖁᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᓄᓇᒃᑰᔫᖓᓐᓂᒃ ᑭᖑᓂᐊᓃᑦᑐᓂ ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᖓᑕ. ᐊᑐᖅᑕᐅᓯᒪᔪᒥᑦ ᐅᓂᒃᑳᓕᐊᖏᓐᓂ, ᑳᓐᔅᑕᐳᓪ ᓯᒥᖦ ᑎᑎᕋᕐᓯᒪᔪᖅ ᑕᑯᓐᓇᖅᑐᒥᓂᐅᓂᕋᖅᑐᓂ ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᖓᓂᑦ "ᓴᖑᖓᑎᓪᓗᒍ ᐊᖅᑯᑎᖓᓂ" A.B. ᑳᓐᔅᑕᐳᓪ ᓯᒥᖦ ᐅᑯᓂᖓ ᐃᖅᑲᐅᒪᔪᖅ:

ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᖓᑕ ᐊᑦᓴᓗᐊᖓ (ᐊᖁᑎᐅᑉ ᒥᑦᓵᓂ ᓯᕗᕌᓃ) ᐅᕕᖅᑐᓂ ᐊᖏᔪᑲᓪᓚᒻᒧᑦ ᐃᓯᕐᓴᒧᑦ ᐊᑐᕆᐊᕐᒥ, ᓄᓇᒃᑰᔫᒥᑦ ᐊᑦᓯᓪᓕᒋᐊᕆᓕᖅᑐᓂ ᓴᐅᒥᐊᓄᑦ. ᐊᑕᐅᑦᑎᒃᑯᑦ, ᓄᓇᒃᑰᔫᖅ ᓄᖅᑲᖅᑐᓂ [ᐅᖃᐅᓯᖅ] ᐊᑦᓱᑲᓪᓚᒃ ᐊᒻᒪ ᐊᖁᑎ[ᐅᑉ] ᒪᑐᐊ ᒪᑐᐃᖅᑐᓂ. ᑕᑯᑦᓴᐅᔮᖅᑐᖅ ᓄᓇᒃᑰᔫᖅ ᓄᖅᑲᕋᒥ ᒪᑐᐊ ᓄᖅᑲᖃᓯᐅᑎᓐᓂᕋᓂ ᒪᑐᐃᕆᐊᒃᑲᓐᓂᑐᐃᓐᓇᖅᑐᓂ, ᐊᐳᓕᖅᑐᓂᐅᒃ ᐊᖑᑎᐅᔪᖅ, ᖃᓪᓕᒋᐊᒃᑲᓐᓂᖅᑐᒥᓂᐅᓗᓂ.

[91] ᑳᓐᔅᑕᐳᓪ ᓯᒥᖦ ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᓐᓄᑦ (OPS) ᖃᐅᔨᓴᖅᑎᓄᑦ, ᑭᖕᖓᕐᓂ, "ᐊᑐᕆᐊᑦ ᐃᓯᕐᓴᖃᕐᕕᒋᒻᒪᒍ ᓇᒥᑐᐃᓐᓈᖅᑐᑎᒃ." ᐊᐱᕆᔭᐅᒐᒥ ᖃᓄᑎᒋ ᓱᒃᑲᓂᖃᖅᑐᒥᓂᐅᓂᖓᓂᑦ ᓄᓇᒃᑰᔫᖅ ᐊᑐᓚᐅᖅᑕᖓ ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓯᒥᖦ ᐅᖃᓚᐅᖅᑐᖅ ᐊᑐᖅᑕᐅᓚᐅᖅᑐᖅ ᕿᓚᒥᐊᓘᓚᐅᕐᒪᑦ ᑭᓯᐊᓂ ᓄᓇᒃᑰᔫᖅ ᓱᒃᑲᓕᓗᐊᓚᐅᖏᒻᒪᑦ, "ᐊᑐᖅᑕᐅᒋᐊᓕᓐᓂᑦ ᓱᒃᑲᓐᓂᖃᓚᐅᖅᑐᖅ." ᑳᓐᔅᑕᐳᓪ ᓯᒥᖦ ᐅᖃᓚᐅᕐᒥᔪᖅ "ᐃᓚᖓᑦ ᐱᒻᒪᕆᐅᖃᑕᐅᒻᒥᔪᖅ ᓄᓇᓯᐅᕋᔭᑦᑐᓂ ᒫᓂ . . . ᓱᕈᓯᐅᔪᑦ ᐃᑉᐱᒍᓲᑎᖃᖏᓯᐊᖅᑐᑦ ᐊᑐᕆᐊᓕᕆᔪᓂᑦ. ᓇᒥᑐᐃᓐᓈᖅᑐᑦ. . . . ᐊᒻᒪ ᐃᑉᐱᒍᓱᑦᓯᐊᕆᐊᖃᖅᐸᑦᑐᑎᑦ. ᑕᐃᒪᐃᓐᓂᖓᓄᑦ ᓱᒃᑲᓕᓗᑎᑦ ᓄᓇᒃᑰᔫᕆᐊᖃᖅᐸᖏᑦᑐᑎᑦ ᑕᐃᒫᒃ ᓱᒃᑲᓕᒋᐊᖃᕋᓗᐊᕈᕕᑦ" ᐅᖄᓚᓯᒪᔪᖃᖅᑎᓪᓗᒍ ᑐᐊᕕᐊᕆᒋᐊᓕᓐᓂᑦ "ᓂᒋᕐᒥ ᑕᐃᒪᐃᑉᐸᒻᒪᑕ." ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᖃᑕᐅᔪᖅ ᖃᐅᔨᒪᖁᔨᓚᐅᖅᑐᖅ ᓱᕈᓯᖅᑕᖃᓚᐅᕐᓂᖓᓄᑦ ᒥᓪᓗᖅᑐᓂᑦ ᐅᔭᖅᑲᓄᑦ ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᐅᑎᖅᐸᓪᓕᐊᓕᖅᑎᓪᓗᒍ ᐱᓕᕆᕝᕕᒻᒥᓄᑦ A.B. ᑎᒍᔭᐅᓚᐅᖅᑎᓪᓗᒍ. ᐅᖃᕆᐊᓚᐅᖅᑐᖅ ᐊᒥᓲᓚᐅᕐᒪᑕ ᐊᑐᕆᐊᓂ ᐃᓯᕐᓴᑲᓪᓚᐃᑦ ᐊᑦᑐᐃᓂᖃᓚᐅᕐᒥᒻᒪᑕ ᓱᒃᑲᐃᓪᓕᒋᐊᕈᓐᓇᕐᓂᖓᓂᑦ ᐊᑦᑐᐃᓂᖃᓚᐅᕐᒥᒻᒪᑦ ᓄᓇᒃᑰᔫᑦ ᐊᑐᖅᑕᐅᒋᐊᖃᖅᐸᑦᑐᓂᑦ. ᑳᓐᔅᑕᐳᓪ ᓯᒥᖦ ᐅᖃᐅᓯᖏᑦ ᐃᓱᓕᓚᐅᖅᑐᑦ ᐅᖃᖅᑐᓂ ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᖓ ᓱᒃᑲᓂᖃᓚᐅᕆᐊᖓ ᑕᐃᒫᓪᓗᐊᖅ ᓄᓇᒃᑰᔫᖓᑎᑐᑦ: ᐃᒻᒪᖄ ᓱᒃᑲᓂᖃᖅᑐᑎᒃ 40 ᐅᕝᕙᓘᓐᓃᑦ 50 ᑭᓛᒥᑕᓂᑦ ᐃᑲᕐᕋᑎᒍᑦ.

[92] ᓵᔨᓐ ᒋᐅᓪ, ᐱᓕᕆᕝᕕᒻᒥ ᐊᖏᔪᖅᑳᖑᓚᐅᖅᑐᖅ, ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᓐᓄᑦ (OPS) ᖃᐅᔨᓴᖅᑎᓄᑦ ᑳᓐᔅᑕᐳᓪ ᑭᐅᓕᖕ ᐱᓕᕆᔨᑦᓯᐊᕙᐅᓂᖅᐹᕆᕙᓪᓚᐃᒻᒪᒍ, ᐊᒻᒪ ᓯᓚᑦᑑᓗᓂ, ᐱᓕᕆᒃᑲᐅᓗᓂ, ᐊᒻᒪ ᐱᓕᕆᐊᖃᑦᑕᐅᑎᒋᔭᖅᑐᓂ. ᓵᔨᓐ ᒋᐅᓪ ᑕᑎᒋᔭᖃᒐᔪᓕᓚᐅᖅᑐᖅ ᑳᓐᔅᑕᐳᓪ ᑭᐅᓕᖕᒥᑦ ᓵᔨᓐᖑᑲᐃᓐᓇᑎᑉᐸᑦᑐᓂᐅᒃ ᐱᓕᕆᕝᕕᒻᒥ ᐊᖏᔪᖅᑳᖑᑲᐃᓐᓇᐸᑦᑐᓂ ᐊᐅᓐᓚᕐᓯᒪᓂᖓᓂ. ᓵᔨᓐ ᒋᐅᓪ ᐅᖃᓚᐅᖅᑐᖅ ᖃᐅᔨᒪᓂᕋᖅᑐᓂᐅᒃ ᑳᓐᔅᑕᐳᓪ ᑭᐅᓕᖕ ᐱᔮᖅᑯᒥᑦ ᐊᐳᕐᓯᒐᔭᖏᓐᓇᒥ ᑭᓇᑐᐃᓐᓇᕐᒥ ᓄᓇᒃᑰᔫᒧᑦ. ᐱᔾᔪᑎᒋᓪᓗᒍ ᖃᓄᐃᒍᑎᐅᓚᐅᖅᑐᖅ, ᓵᔨᓐ ᒋᐅᓪ ᐅᖃᖅᑐᖅ, "ᑖᓐᓇ [ᑳᓐᔅᑕᐳᓪ ᑭᐅᓕᖕ] ᑕᐃᒫᕌᓗᒃ ᖃᓂᑦᓴᕆᐊᖃᓚᐅᕐᒪᑦ? ᐋᒡᒐᖃᐃ," ᑭᓯᐊᓂ ᐱᓗᐊᖏᔾᔪᑎᖃᕐᒥᔪᖅ ᖃᓄᐃᓕᖓᒍᑎᐅᔪᒃᑯᑦ ᐊᒻᒪ ᐃᒻᒪᖄ ᑳᓐᔅᑕᐳᓪ ᑭᐅᓕᖕ ᓄᖅᑲᑎᑦᓯᒐᓱᑐᐃᓐᓇᖅᑐᒥᓂᖅ A.B.-ᒥᑦ ᐅᐸᑦᑕᐃᓕᒪᑎᒐᓱᑦᑐᓂᐅᒃ ᐱᓲᑎᑲᓪᓚᒻᒥᑦ ᐊᖁᑦᑐᒥᑦ.

[93] ᐃᓚᖓᑦ ᐋᓐᓂᐊᓯᐅᖅᑎᐅᑉ ᐃᓚᒋᔭᐅᓚᐅᖅᑑᑉ A.B. ᑲᒪᒋᔭᐅᑎᓪᓗᒍ ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᓐᓄᑦ (OPS) ᖃᐅᔨᓴᖅᑎᓄᑦ ᑳᓐᔅᑕᐳᓪ ᑭᐅᓕᖕ ᐃᓚᒋᔭᐅᒻᒪᑦ ᐱᑦᑎᐊᒃᑲᐅᓂᖅᐹᓄᑦ ᖃᐅᔨᒪᔭᖏᓐᓂᑦ, ᐊᒻᒪ ᑕᑯᐃᓐᓇᐸᒃᑲᒥᐅᒃ ᑭᒃᑯᑐᐃᓐᓇᕐᓂᑦ ᐱᓕᕆᔾᔪᑎᖃᖅᑎᓪᓗᒍ ᐃᑉᐱᒋᑦᑎᐊᐸᑦᑐᒋᑦ. ᓲᕐᓗ, ᑕᑯᓐᓇᕐᓯᒪᓂᕋᖅᑕᖓ ᑭᒃᑯᑐᐃᓐᓇᕐᓂᑦ ᐋᓐᓂᐊᕕᓕᐊᕈᔾᔨᑎᓪᓗᒍ ᓱᖏᐅᓯᔭᖅᑐᓂᑦ ᓵᖕᖓᖃᑎᖃᖅᑐᖃᓚᐅᖅᑎᓪᓗᒍ, ᐊᒻᒪ ᖃᓄᑐᐃᓐᓇᖅ ᐱᐅᒋᖏᓐᓇᒥᒋᑦ ᑕᑯᑦᓴᐅᑎᑦᓯᓚᐅᕐᓯᒪᒐᓂ ᑎᒍᓯᒪᔭᕐᒥᓂᒃ ᐊᒻᒪ ᐅᖃᐅᔾᔪᑦᓯᐊᑐᐃᓐᓇᐸᑦᑐᓂᒋᑦ ᐅᐃᒪᔮᕋᓂ ᐃᑲᔪᖅᑕᐅᓂᐊᕐᓂᖏᓐᓂᑦ ᑭᖕᖒᒪᔭᕐᒥᖏᓐᓂᑦ. ᐃᓱᒪᓕᕆᔨᒥᑦ ᐋᓐᓂᐊᓯᐅᖅᑎᒥᑦ ᐅᖃᖅᑐᖃᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᓇᓪᓕᓐᓂᖃᕐᒪᑦ ᐊᒻᒪ ᑐᖕᖓᓇᖅᐸᑦᑐᓂ, ᐊᒻᒪ ᐃᑉᐱᒍᓱᑦᓯᐊᖏᓐᓇᐸᑦᑐᓂ ᐃᓱᒪᓕᕆᔪᓂᑦ ᐋᓐᓂᐊᔪᓂᑦ.

[94] ᖃᐅᔨᓴᖅᑎᓄᑦ ᕿᒥᕐᕈᐊᖅᑕᐅᓚᐅᖅᑐᖅ ᐊᐅᓚᔪᖅ ᐊᔾᔨᓕᐅᖅᑕᐅᓯᒪᔪᖅ ᖃᓄᐃᒍᑎᐅᔪᖅ ᐊᑐᖅᑕᐅᑎᓪᓗᒍ ᐊᒻᒪ ᑕᑯᓐᓇᖅᑕᐅᓚᐅᖅᑐᑦ ᐅᑯᐊ:

• - ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑦ ᓴᖅᑭᖅᑐᖅ ᐅᖓᑖᓂᑦ ᐊᖑᑎᐅᑉ (A.B.) ᐊᒻᒪ ᐃᖏᕐᕋᔪᖅ ᑐᕌᖅᑐᓂᐅᒃ. A.B. ᕿᕕᐊᖅᑐᖅ ᐊᒻᒪ ᑕᑯᔪᔮᖅᑐᖅ ᓄᓇᒃᑰᔫᒥᑦ. ᐅᖓᑖᓂ, ᐱᓲᑎᑲᓪᓚᒻᒥᑦ ᕿᒪᐃᕙᓪᓕᐊᔪᖃᖅᑐᖅ ᓱᒃᑲᐃᑦᑐᓂ.
• - ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑦ ᐃᒻᒪᖄ ᐱᖓᓱᓂᑦ (3) ᑎᓴᒪᓂᓪᓘᓐᓃᑦ (4) ᕖᑦᓂᑦ ᐅᖓᓯᓐᓂᓕᒃ A.B.-ᒥᑦ. ᑐᐊᕕᕐᓇᖅᑐᑕᖃᖅᑎᓪᓗᒍ ᖃᐅᒪᐃᑦ ᐃᑭᑕᐅᔪᑦ.
• - ᓯᕗᕌᓃᑦᑐᖅ ᐊᖁᑎᐅᑉ ᒪᑐᐊ ᒪᑐᐃᖓᔮᖅᑐᖅ ᐊᒻᒪ ᑎᒍᒥᐊᖅᑕᐅᔮᖅᑐᓂ ᐊᖁᑎᒧᑦ (ᑳᓐᔅᑕᐳᓪ ᑭᐅᓕᖕ).
• - ᑕᕝᕙᓂ, ᑕᒪᒃᑮᒃ A.B. ᐊᒻᒪ ᓄᓇᒃᑰᔫᖅ ᐅᐸᑦᑑᒃ ᖁᑦᓯᓂᕐᓴᒧᑦ ᐊᑐᕆᐊᒥ, ᐱᔾᔪᑎᒋᓪᓗᒍ ᐊᐳᑦ/ᓂᓚᒃ ᓄᓇᑦᑕᖓᓂᑦ ᓴᐅᓯᓯᒪᔪᖅ. ᓄᓇᒃᑰᔫᖅ ᐅᖓᓯᓐᓂᖃᓕᖅᑑᔮᖅᑐᖅ ᐃᒻᒪᖄ ᐊᑕᐅᓯᕐᒥᑦ (1) ᒪᕐᕉᓂᓘᓐᓃᑦ (2) ᕖᑦᓂᑦ A.B.-ᒥ.
• - ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑦ ᖄᖓᒎᓕᖅᑐᓂ ᖁᑦᓯᓐᓂᖓᑕ ᐊᑐᕆᐊᑉ, ᑭᓯᐊᓂ ᓴᐅᒥᐊᓂ ᐊᑦᓴᓗᐊᖓ ᐊᐳᑎᖃᖏᓐᓂᖓᓅᖅᑐᓂ ᐊᒻᒪ ᓄᓇᒃᑰᔫᖅ ᑲᑕᐸᓗᑦᑐᓂ ᓴᐅᒥᒻᒧᑦ, ᐃᖏᕐᕋᓪᓗᓂ ᒥᑦᓵᓄᑦ A.B., ᐅᖃᐅᓯᐅᔪᓐᓇᖅᑐᒧᑦ ᐊᖏᔫᖏᑦᑐᖅ ᐃᓯᕐᓴᑲᓪᓚᒃ.
• - ᓄᓇᒃᑰᔫᖅ ᓴᖑᕙᓪᓕᐊᓗᓂ ᓴᐅᒥᐊᓄᑦ, ᐊᖁᑎᐅᑉ ᒪᑐᐊ ᒪᑐᐃᕆᐊᒃᑲᓐᓂᖅᑐᖅ; ᐊᔾᔨᓕᐅᕐᓯᒪᔪᓂᑦ ᓇᓗᓇᖅᑐᖅ ᑳᓐᔅᑕᐳᓪ ᑭᐅᓕᖕ ᓱᓕ ᒪᑐᒥᑦ ᑎᒍᒥᐊᓐᓂᕐᒪᖔᖅ ᐅᕝᕙᓘᓐᓃᑦ ᓯᕝᕗᐃᓂᕐᒪᖔᖅ
• - ᒪᑐᐊᓄᑦ ᐊᑦᑐᖅᑕᐅᔪᖅ A.B. ᑐᓄᐊᒍᑦ ᐊᒻᒪ ᓂᐅᖏᒍᑦ; ᑕᓕᖏᒃ ᖁᒻᒧᐊᑦᑐᑎᒃ ᐊᐳᖅᑕᐅᒐᒥ, ᐊᒻᒪ ᐅᕐᕈᓪᓗᓂ ᓯᖅᑯᖅᑐᓕᖅᑐᓂ ᐊᒻᒪ ᐊᔅᒐᖏᒃ ᐃᓵᑦᑐᑎᒃ ᓄᓇᒧᑦ.
• - A.B. ᐅᕐᕈᓯᒪᓕᖅᑐᖅ ᓯᕗᕌᑕ ᓴᐅᒥᐊᓂ ᐊᑦᓴᓗᐊᖓᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑕ; ᐸᓖᓯᒃᑯᑦ ᓄᓇᒃᑰᔫᖓᑦ ᓄᖅᑲᖅᑐᓂ ᐊᒻᒪ ᐊᐅᓚᒐᓚᑦᑐᓂ.
• - A.B. ᕿᒪᐃᓗᓂ ᐹᕐᖑᓕᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᓐᓂᑦ, ᐊᒻᒪ ᑳᓐᔅᑕᐳᓪ ᑭᐅᓕᖕ ᓂᐅᓗᓂ ᓄᓇᒃᑰᔫᒥᑦ.

[95] ᐱᔾᔪᑎᒋᓪᓗᒍ ᖃᓄᐃᒍᑎᐅᓚᐅᖅᑐᖅ, ᑳᓐᔅᑕᐳᓪ ᑭᐅᓕᖕ ᐱᓕᕆᔾᔪᑎᐅᓚᐅᖅᑐᖅ ᐊᑐᐊᒐᖓᓂᑦ ᐱᓕᕆᑦᑎᐊᕆᐊᖃᕐᓂᕐᒥᑦ (ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐃᓗᐊᓂ ᐃᓂᖅᑎᕆᓂᒃᑯᑦ ᐱᓕᕆᔾᔪᑎᐅᔪᖅ). ᐸᓯᔭᑦᓴᐅᔾᔪᑎᖓ ᓯᕗᓪᓕᐅᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐅᖃᕐᓯᒪᓚᐅᖅᑐᖅ ᐊᑐᖅᑐᒥᓂᐅᓂᖓᓂᑦ ᐊᑦᓱᕈᓗᐊᖅᑐᓂ ᐅᖓᑖᓅᕈᔾᔨᓯᒪᓪᓗᓂ ᓈᒻᒪᒋᔭᐅᔫᑉ ᐱᔾᔪᑎᒋᓪᓗᒋᑦ ᖃᓄᐃᓕᖓᒍᑎᐅᓚᐅᖅᑐᑦ ᐱᔾᔪᑎᐅᓗᓂ A.B. ᐊᐳᖅᑕᐅᑎᓪᓗᒍ ᓄᓇᒃᑰᔫᒧᑦ.

[96] ᕿᒥᕐᕈᐊᖅᑕᐅᓚᐅᖅᑐᓂ ᐊᑐᐊᒐᖅ ᐱᓕᕆᑦᑎᐊᕆᐊᖃᕐᓂᕐᒥᑦ ᐅᓂᒃᑳᓕᐊᖑᓯᒪᔪᑦ, ᐊᖏᔪᖅᑳᖓᑦ ᖃᐅᔨᓴᖅᑏᑦ ᐃᖅᑲᓇᐃᔭᖅᑎᓂᑦ ᐊᒫᓐᑕ ᔫᓐᔅ, ᐊᑐᖅᑐᓂᐅᒃ ᐱᓕᕆᔾᔪᑎᓂ ᐱᓕᕆᔾᔪᑎᓂᑦ ᐊᖏᔪᖅᑳᖑᓂᕐᒥᑦ (ᐋᖅᑭᑦᓱᐃᔨᐅᔪᖅ ᐊᑐᐊᒐᖓᓂᑦ ᐱᓕᕆᑦᑎᐊᕆᐊᖃᕐᓂᕐᒥᑦ ᐱᓕᕆᔾᔪᑎᓂᑦ), "ᐊᓯᐊᓂᑦ ᐅᖃᐅᓯᖅᑖᖅᑐᖅ" ᐸᓯᔭᑦᓴᐅᔾᔪᑎᐅᔪᖅ ᐊᒻᒪ ᓇᓗᓇᐃᓚᐅᖅᑐᓂ ᐃᒪᐃᑦᑐᒥᑦ ᑕᑯᒋᐊᖓᓂᒃᑯᑦ (prima facie) ᐊᑐᕐᓯᒪᔪᒥᑦ ᓇᓂᔭᐅᔪᖃᕐᓂᖓᓂᑦ ᑳᓐᔅᑕᐳᓪ ᑭᐅᓕᖕ ᓱᕋᐃᓯᒪᓂᖓᓂᑦ ᑎᑎᕋᕐᓯᒪᕕᒻᒦᑦᑐᓂᑦ 4.6 ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐊᑐᐊᒐᖓᓂᑦ ᐱᓕᕆᑦᑎᐊᕆᐊᖃᕐᓂᕐᒥᑦ: ᐊᑐᑲᒻᒪᓂᖅ ᖃᓄᑎᒋ ᐊᑦᓱᕉᑎᐅᒋᐊᓕᒻᒥᑦ ᐊᑐᖅᑕᐅᑎᓪᓗᒋᑦ (ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP)) ᓄᓇᒃᑰᔫᖁᑎᖏᑦ. ᐱᓗᐊᖅᑐᒥ, ᐸᓯᔭᐅᔾᔪᑎᐅᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐊᐅᓚᑦᑎᓚᐅᕐᓂᖓᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᓄᓇᒃᑰᔫᖁᑎᖓᓐᓂᑦ ᐃᑉᐱᒍᓱᑦᓯᐊᕋᓂ.

[97] ᑳᓐᔅᑕᐳᓪ ᑭᐅᓕᖕ ᑭᒡᒐᖅᑐᖅᑕᐅᓚᐅᖅᑐᖅ ᒪᓕᒐᓕᕆᔨᓄᑦ, ᑐᓂᓯᓚᐅᖅᑐᓂᑦ ᑎᑎᕋᕐᓯᒪᔪᓂᑦ ᐊᒻᒪ ᐅᖃᐅᓯᒃᑯᑦ ᐋᔩᕈᑎᓂᑦ ᐋᔩᕈᑎᐅᓗᓂᓗ. ᑐᓂᓯᓚᐅᕐᒥᔪᖅ ᑐᓪᓕᐊᓂᑦ ᑎᑎᕋᕐᓯᒪᔪᓂᑦ ᐅᖃᐅᓯᐅᓯᒪᔪᓂᑦ,^{Footnote 12} ᓇᓗᓇᐃᔭᐃᓯᒪᔪᓂᑦ ᐱᐅᖏᑐᒃᑯᑦ ᐊᑦᑐᐃᔾᔪᑎᐅᓯᒪᔪᒥᑦ ᖃᓄᐃᒍᑎᐅᓯᒪᔪᖅ ᐊᒻᒪ ᑭᖑᓂᐊᓂ ᐊᑐᖅᑕᐅᓯᒪᔪᑦ ᖃᓄᐃᒍᑎᖃᕐᓯᒪᒻᒪᖔᑕ ᐃᖕᒥᓄᑦ. ᑕᐃᒫᑦᑕᐅᖅ, ᑳᓐᔅᑕᐳᓪ ᑭᐅᓕᖕ ᐊᐃᑉᐸᖓ ᑐᓂᓯᓚᐅᕐᒥᔪᖅ ᑎᑎᖅᑲᒥᑦ^{Footnote 13} ᓇᓗᓇᐃᔭᐃᓯᒪᔪᒥᑦ ᖃᓄᑎᒋ ᐱᔭᕆᐊᑦᑐᓕᕐᓯᒪᒻᒪᖔᖅ ᖃᓄᐃᓕᖓᒍᑎᐅᔪᖅ ᑕᒪᒃᑮᓐᓂᑦ. ᐋᓐᓂᐊᓯᐅᖅᑎᐅᓯᒪᓕᖅᑐᖅ ᑭᖕᖓᕐᓂ ᐊᒻᒪ ᐊᐅᓪᓚᕆᐊᖃᓕᓚᐅᖅᑐᖅ ᓄᓇᓕᓐᓂᑦ ᐅᓪᓗᖓᓂ ᖃᓄᐃᒍᑎᐅᔫᑉ ᑳᓐᔅᑕᐳᓪ ᑭᐅᓕᖕ ᑎᓕᔭᐅᑎᓪᓗᒍ ᐃᖃᓗᓐᓂ ᐱᓕᕆᔨᐅᖁᐅᓗᓂ. ᑕᒪᒃᑮᒃ ᑳᓐᔅᑕᐳᓪ ᑭᐅᓕᖕ ᐊᒻᒪ ᐊᐃᑉᐸᖓ ᓇᓗᓇᐃᓚᐅᖅᑑᒃ ᖃᓄᑎᒋ ᐅᒡᒍᐊᕐᓂᖃᕐᒪᖔᑎᒃ ᖃᓄᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᐊᖃᓚᐅᕐᒪᖔᑕ ᐱᔾᔪᑎᒥᑦ.

[98] ᑳᓐᔅᑕᐳᓪ ᑭᐅᓕᖕ ᒪᓕᒐᓕᕆᔨᖓ ᐋᔩᓚᐅᖅᑐᖅ, ᐊᓯᖏᓐᓂᓪᓗ, ᑳᓐᔅᑕᐳᓪ ᑭᐅᓕᖕ ᐊᖁᑦᑎᓪᓗᒍ ᑕᐃᒫᒃ ᐊᖁᓚᐅᕋᒥ ᑕᐃᒫᖑᓚᐅᕐᒪᑦ ᑭᓯᐊᓂ ᐊᒻᒪ ᐱᓕᕆᔾᔪᓯᖓ ᐊᑐᓚᐅᕋᒥᐅᒃ "ᖃᓄᐃᒍᑎᐅᔪᖅ ᐊᑐᖅᑕᐅᑎᓪᓗᒍ ᐱᓪᓗᒍ" ᐊᑐᐊᒐᕐᒥᑦ ᐱᓕᕆᑦᓯᐊᕆᐊᖃᕐᓂᕐᒥᑦ ᓱᕋᐃᓚᐅᖏᒻᒪᑦ. ᐋᔩᓚᐅᖅᑐᖅ, ᐃᓱᒫᓘᑎᑕᖃᓚᐅᕈᓂ ᐱᓪᓗᒍ ᑳᓐᔅᑕᐳᓪ ᑭᐅᓕᖕ ᐊᖁᒍᓯᖓ, ᐊᑐᖅᑕᐅᓚᐅᖅᑐᑦ ᐊᒻᒪ ᖃᓄᐃᓕᖓᒍᑎᐅᓚᐅᖅᑐᑦ ᐊᖁᑦᑎᓪᓗᒍ ᐊᒻᒪ ᐱᓪᓗᒍ ᓄᓇᓕᐅᑉ ᐊᓯᐊᓅᖅᑕᐅᑦᓴᐅᑎᒋᓚᐅᕐᓂᖓ ᐊᒻᒪ ᐸᐃᑉᐹᓕᕆᔨᐅᑎᑕᐅᓂᒥᓂᖓ ᖁᓪᓕᑦ (10) ᑕᖅᑭᓂᑦ ᑭᖑᓂᐊᒍᑦ ᖃᓄᐃᒍᑎᖃᓚᐅᖅᑎᓪᓗᒋᑦ ᑕᐃᒪᐃᑦᑑᓂᖏᓐᓄᑦ ᐱᔾᔪᑎᐅᔪᖅ ᐱᓕᕆᔾᔪᑎᐅᒋᐊᖃᖅᑑᔮᖅᑐᖅ ᐱᓕᕆᔾᔪᑎᒍᑦ ᐱᔾᔪᑎᐅᓗᓂ, ᐊᑐᐊᒐᕐᒥᑦ ᐱᓕᕆᑦᓯᐊᕆᐊᖃᕐᓂᕐᒥᑦ ᓱᕋᐃᔾᔪᑎᐅᖏᓪᓗᓂ.^{Footnote 14}

[99] ᑭᖑᓪᓕᖅᐹᒥ, ᐱᓕᕆᔾᔪᓯᕐᓂᒃ ᐱᓕᕆᔨᒻᒪᕆᐅᔪᑦ, ᐊᖏᔪᖅᑳᖓᖅ ᖃᐅᔨᓴᖅᑏᑦ ᔫᓐᔅ, ᖃᐅᔨᓚᐅᖅᑐᑦ ᐊᑐᐊᒐᕐᒥᑦ ᐱᓕᕆᔾᔪᓯᓕᕆᓂᕐᒥᑦ ᐸᓯᐅᕆᔾᔪᑎᐅᓯᒪᔪᖅ ᑳᓐᔅᑕᐳᓪ ᑭᐅᓕᖕᒥᑦ ᓱᓕᓚᐅᖏᒻᒪᑦ; ᑭᓯᐊᓂᓕ, ᐅᖃᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐊᖁᓐᓂᕆᓚᐅᖅᑕᖓ ᖃᓄᖅ ᑐᖔᓃᓚᐅᕐᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᔾᔪᓯᖏᒍᑦ ᓈᒻᒪᑦᑐᓂᑦ ᐊᒻᒪ ᐱᓕᕆᐊᖃᖁᓪᓗᒋᑦ ᐱᐅᓯᑎᒋᐊᕈᑎᑦᓴᖏᓐᓂᑦ ᐱᓕᕆᔾᔪᓯᖏᑕ.

[100] ᕿᒥᕐᕈᐊᖅᑕᐅᑦᓯᐊᓚᐅᖅᑎᓪᓗᒋᑦ ᓇᓗᓇᐃᔭᐃᑎᐅᔪᑦ, ᖃᐅᔨᓴᖅᑏᑦ ᖃᐅᔨᔪᑦ ᓈᒻᒪᓚᐅᖏᓐᓂᖓᓂᑦ ᑳᓐᔅᑕᐳᓪ ᑭᐅᓕᖕ ᐊᖁᑦᑐᒥᓂᐅᓂᖓᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᖃᓂᑦᓴᓗᐊᕐᓗᓂ A.B.-ᒥᑦ, ᐊᐳᖅᑕᐅᓚᕿᓕᕐᓂᖅᑐᓂᑦ A.B. ᓄᓇᒃᑯᔫᑉ ᒪᑐᐊᓄᑦ. ᑭᓯᐊᓂᑦᑕᐅᖅ, ᖃᐅᔨᓴᖅᑏᑦ ᖃᐅᔨᔪᑦ ᓇᓗᓇᐃᔭᐃᑎᑕᖃᖏᒻᒪᑦ ᐃᓱᒪᓕᐅᕆᔾᔪᑎᑦᓴᒥᑦ ᑳᓐᔅᑕᐳᓪ ᑭᐅᓕᖕ ᐱᔮᕆᓪᓗᓂ ᐊᐳᕐᓯᔪᕕᓂᐅᒋᐊᖓ A.B.-ᒥᑦ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ; ᑭᓯᐊᓂᓕ, ᐊᑦᑐᖅᑕᐅᓂᒥᓂᖓ A.B. ᐱᔾᔪᑎᖃᕐᓂᕐᒪᑦ ᓯᕗᒧᑲᓪᓚᑦᑐᒥᓂᐅᓂᖓᓄᑦ ᐸᓖᓯᒃᑯᑦ ᓄᓇᒃᑰᔫᖓ ᓴᖑᑲᓪᓚᒃᑲᒥ ᒪᓃᑦᑐᒃᑯᑦ ᐊᑐᕆᐊᒃᑯᑦ.  

[101] ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᖅ – ᕙᐃᔅᐳᒃᒧᑦ (Facebook) ᐃᓪᓗᓕᒻᒧᑦ ᖃᓂᒋᔭᖓᓂ ᐊᔾᔨᓕᐅᕆᔪᕕᓂᕐᒧᑦ ᐊᒻᒪ ᓴᖅᑭᑎᑦᑐᓂᐅᒃ ᓇᒧᑐᐃᓐᓇᑦᑎᐊᖅ ᑕᑯᔭᐅᔪᓐᓇᓕᖅᑐᓂ – ᖁᐊᕐᓵᕐᓇᓚᐅᖅᑐᖅ, ᐱᓗᐊᖅᑐᒥ ᐊᓯᖏᓐᓂᑦ ᑕᑯᓐᓇᕋᑦᓴᖅᑕᖃᖅᑎᓐᓇᒍ. ᐊᐱᖅᑯᑎᐅᒋᐊᖓᕆᐊᖃᓯᔪᖅ ᖃᓄᐃᒻᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᐊᖃᑦᑕᓐᓂᕐᒪᖔᑕ A.B.-ᒥᑦ ᑐᐊᕕᐊᖃᖅᑐᑎᒃ. ᑕᒪᓐᓇ ᐱᔾᔪᑎᐅᔪᖅ ᐊᑑᑎᖃᕐᒥᔪᖅ ᑭᖑᓂᒋᐊᖓᓂ ᐆᒪ ᐅᓂᒃᑳᓕᐊᖑᓯᒪᔫᑉ ᐅᖃᐅᓯᖃᖅᑐᒃᑯᑦ ᐊᑐᖅᑐᒥᓂᐅᓂᖏᓐᓂᑦ ᐊᑦᓱᕈᕐᓂᕐᒥᑦ ᖃᓄᑎᒋ A.B.-ᒥᑦ ᑎᒍᔭᐅᓇᓱᐊᖅᑎᓪᓗᒍ.

[102] ᐊᑐᐃᓐᓇᐃᑦ ᑐᑭᓯᒋᐊᕈᑎᐅᔪᑦ ᓇᓗᓇᐃᕐᓯᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ "ᕿᓂᓚᐅᕐᒪᑕ" ᒪᕐᕉᓐᓂᒃ (2) ᐊᖑᑏᓐᓂᒃ ᐅᖄᓚᔾᔪᑎᐅᓯᒪᔫᓐᓂᒃ ᑕᐃᑲᓂ ᐅᓪᓗᖓᓂ. ᓯᕗᓪᓕᖅ ᐋᖓᔮᕐᓂᕋᐃᓯᒪᔪᑦ ᐊᖑᑎᒥᑦ ᖁᑭᐅᓯᔭᕐᓂᕋᖅᑕᐅᓯᒪᔪᒥᑦ; ᐊᐃᑉᐸᖓ ᐋᖓᔮᖅᑐᒥᑦ ᐊᖑᑎᒥᑦ ᐱᔾᔪᑎᓕᒃ ᐸᕝᕕᓴᐃᕙᓪᓚᐅᔪᕕᓂᕐᒥᒃ ᐊᒻᒪ ᐃᒻᒪᖄ ᐋᓐᓂᕐᓯᓯᒪᓪᓗᓂ. ᐅᖄᓚᔾᔪᑎᐅᕙᓚᐅᖅᑐᑦ ᓯᕗᓂᑦᓯᐊᖓᓂ ᐸᓖᓯᒃᑯᑦ ᑲᑎᑦᓯᓚᖓᓕᖅᑎᓪᓗᒋᑦ A.B.-ᒥᑦ, ᐊᒻᒪ ᑕᐃᑦᓱᒪᓂᐅᔪᖅ, ᓇᓪᓕᐊᑐᐃᓐᓇᖅ ᐊᖑᑏᒃ ᓇᓂᔭᐅᓯᒪᓚᐅᖏᑦᑑᒃ ᓱᓕ.

[103] ᖁᑭᐅᒻᒥᑦ^{Footnote 15} ᓇᓂᓯᓯᒪᔪᖃᓕᕋᓗᐊᖅᑎᓪᓗᒍ ᐊᒻᒪ ᑎᒍᔭᐅᔪᕕᓂᐅᓗᓂ ᓯᕗᓪᓕᕐᒥ ᐅᖄᓚᓯᒪᓚᐅᖅᑐᓂᑦ, ᐱᔾᔪᑎᐅᓗᓂ ᐅᖄᓚᔾᔪᑎᒥᓂᐅᔪᖅ ᓱᖏᐅᓯᔭᕐᓂᕐᒪᑦ ᐊᒻᒪ ᐃᓕᕋᓇᕐᓵᖅᑐᓂ ᐊᒻᒪ ᓇᓗᒋᔭᐅᓗᓂ ᖃᓄᐃᓕᐅᕐᓂᐊᕐᒪᖓᖅ ᑐᑭᓯᓇᖅᑐᓂ ᐅᓗᕆᐊᓇᖅᑐᒦᑎᑦᓯᔪᓐᓇᕐᓂᖏᑦ ᐃᓱᒪᒋᔭᐅᓕᕐᓂᕋᒥᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ. ᐱᒻᒪᕆᐅᓂᕐᓴᐅᔪᖅ, ᑳᓐᔅᑕᐳᓪ ᓯᒥᖦ ᐅᖃᖅᑐᒥᓂᖅ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ, ᐅᐸᑦᓯᒪᑎᓪᓗᒍ ᖁᑭᐅᓯᔭᕐᓂᕋᐃᔪᓂᑦ ᐅᐸᑦᓯᒪᑎᓪᓗᒍ, ᑕᑯᓐᓇᖅᑐᒥᓂᐅᔪᑦ ᐅᖃᖅᑐᒥᓃᑦ ᐊᖑᑎᒥᑦ ᖁᑭᐅᓯᔭᕐᓂᕋᖅᑕᐅᔪᒥᑦ ᓄᓇᒨᑦᑐᖃᕐᓂᕐᒪᑦ ᐊᒻᒪ ᑕᑯᓐᓇᖅᑐᒥᓂᐅᔪᑦ "ᓇᓗᓚᐅᖅᑐᑦ" ᖁᑭᐅᓯᔭᕐᒪᖔᖅ ᖁᑭᐅᓯᔭᖕᖏᒻᒪᖔᓪᓘᓐᓃᑦ. ᑳᓐᔅᑕᐳᓪ ᓯᒥᖦ ᐅᖃᓚᐅᖅᑐᖅ ᐃᓱᒪᓂᕋᖅᑐᓂ ᐊᖑᑎ ᐋᖓᔮᕐᓂᕆᐊᖓ ᐊᒻᒪ ᐱᓱᕋᔭᒋᐊᖓ ᖁᑭᐅᓯᔭᖅᑐᓂ. ᖃᐅᔨᔭᐅᓚᐅᕐᒥᔪᖅ ᐸᕝᕕᓴᐃᔪᖃᕐᓂᖓᓂᑦ ᐅᖄᓚᔾᔪᑎᒥᓂᖅ ᐱᔾᔪᑎᖃᓚᐅᕐᒪᑦ ᐊᖑᑎᒥᑦ "ᐋᓐᓂᖅᑎᕆᔪᒥᑦ" ᐊᓯᐊᓂᑦ ᐊᖑᑎᐅᖃᑎᒥᓂᒃ.

[104] ᐊᒻᒪᑦᑕᐅᖅ, ᒪᓕᑦᑐᒋᑦ ᓇᓗᓇᐃᔭᖅᑕᐅᓯᒪᔪᑦ ᖁᓪᓕᕐᓂ, ᑳᓐᔅᑕᐳᓪ ᑭᐅᓕᖕ ᑐᓵᔪᕕᓂᐅᓂᖓᓂᑦ ᓱᕈᓯᕐᓂᑦ ᐅᖃᖅᐸᑦᑐᓂᑦ A.B. ᓂᖕᖓᐅᑎᓂᖓᓂᑦ ᑭᒃᑯᓐᓂᑦ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᑕᑯᓐᓇᖅᑐᒥᓂᐅᒐᒥ A.B.-ᒥᑦ ᑎᒃᑯᐊᕋᖅᑎᓪᓗᒍ ᐃᓕᕋᓇᕋᓱᑦᑐᓂ ᐱᓲᑎᑲᓪᓚᑦᑐᒥᑦ, ᑕᐃᓐᓇᓕ ᖃᓂᒋᔭᒻᒪᕆᐅᓚᐅᖅᑐᖅ. ᐱᔾᔪᑎᒋᓪᓗᒍ ᐅᕐᕈᔮᕐᓂᖓ ᐱᓱᑦᑐᓂ, ᓇᓗᓇᓚᐅᖏᑦᑐᖅ A.B. ᐊᑦᓱᑲᓪᓚᒃ ᐋᖓᔮᓚᐅᕐᓂᖓᓂᑦ.

[105] ᐃᓱᒪᒋᓪᓗᒋᑦ ᑕᒪᒃᑯᐊ ᐃᓘᓐᓇᑎᒃ ᐊᑐᖅᑕᐅᓚᐅᖅᑐᑦ, ᓈᒻᒪᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐊᒻᒪ ᐊᓯᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᓯᔭᕆᐊᑦᓴᖅ A.B.-ᒥᑦ ᕿᓚᒥᐅᔫᒥᔪᖅ.

[106] ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ "ᓄᖅᑲᕈᒪᓚᐅᕋᓗᐊᕋᒥ ᓴᓂᕌᓄᑦ [A.B.] ᐊᒻᒪ ᓂᐅᑦᑕᐅᑎᒋᔪᒪᓪᓗᓂ ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᕿᓚᒥᐅᔫᒥᔪᖅ ᑎᒍᒍᒪᓪᓗᓂᐅᒃ." ᑳᓐᔅᑕᐳᓪ ᓱᓚᑦ ᐅᖃᓚᐅᖅᑐᖅ, ᐱᔾᔪᑎᒋᓪᓗᒋᑦ ᓇᓗᓇᕐᓂᕆᓚᐅᖅᑕᖏᑦ ᐱᔾᔪᑎᒋᓪᓗᒍ ᐊᖑᑎᐅᔪᖅ ᐅᐸᑉᐸᓪᓕᐊᔭᖓᑦ, "ᑎᒍᓯᒍᒪᓚᐅᕋᒥ [A.B.-ᒥᑦ] ᕿᓚᒥᐅᔫᒥᔪᖅ, [ᐸᓖᓯ] ᐊᑐᐃᓐᓇᕈᕋᓱᓚᐅᖅᑐᖅ ᓂᐅᑦᑕᐅᑎᒋᒍᒪᓪᓗᓂ ᓄᓇᒃᑰᔫᒥᑦ. . . . [ᑳᓐᔅᑕᐳᓪ ᓱᓚᑦ] [ᐸᓖᓯ] ᐊᒡᒐᒻᒥᓂᒃ ᒪᑑᑉ ᑎᒍᓪᓕᕕᖓᓃᑎᑦᓯᓚᐅᖅᑐᖅ ᓄᓇᒃᑰᔫᖅ ᓄᖅᑲᑐᐊᕐᒪᑦ [ᐸᓖᓯ] ᒥᓯᓐᓂᐊᕋᒥ ᓂᐅᓗᓂ."

[107] ᕿᒥᕐᕈᐊᖅᑕᐅᒐᒥ ᐊᐅᓚᔫᖅ ᐊᔾᔨᓕᐅᕐᓯᒪᔪᖅ ᐃᑲᔪᕐᓱᐃᔪᖅ ᐃᓱᒪᒋᔭᐅᓂᖓᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑦ ᖁᐊᔭᕿᓐᓂᕐᒪᑦ ᖁᐊᓴᐅᓂᖓᒍᑦ ᐊᑐᕆᐊᑉ ᐊᒻᒪ ᓯᕗᒧᑦ ᐃᖏᕐᕋᓯᑲᓪᓚᓂᕐᒪᑦ ᓴᐅᒥᐊᓂ ᐊᑦᓴᓗᐊᑦ ᐊᖏᓗᐊᖏᑦᑐᒧᑦ ᐃᓯᕐᓴᒨᑲᓪᓚᓂᕐᒪᑦ. ᑕᒪᓐᓇ ᓯᕗᒧᑦ ᐃᖏᕐᕋᓂᒥᓂᖅ ᐱᓪᓗᒍ ᐊᖁᑎᐅᑉ ᒪᑐᐊ, ᒪᑐᐃᖓᑦᑕᐅᑎᒋᔪᕕᓂᖅ ᐊᒻᒪ ᑎᒍᒥᐊᖅᑕᐅᓗᓂ ᑳᓐᔅᑕᐳᓪ ᑭᐅᓕᖕᒧᑦ, ᒪᑐᐃᕆᐊᖅᑐᒥᓂᐅᒻᒪᑦ, ᐊᐳᖅᑐᓂᐅᒃ A.B. ᐊᒻᒪ ᐅᕐᕈᑎᑕᐅᓗᓂ. ᑕᑯᑦᓴᐅᔪᖅᑕᖃᖏᑦᑐᖅ ᑳᓐᔅᑕᐳᓪ ᑭᐅᓕᖕ ᐊᐳᕐᓯᒐᓱᑦᑐᒥᓂᐅᒻᒪᖔᖅ A.B.-ᒥᑦ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ. ᑭᓯᐊᓂᓕ, ᐊᑐᐃᓐᓇᐅᔪᑦ ᑐᑭᓯᒋᐊᕈᑎᐅᔪᑦ ᓇᓗᓇᐃᕐᓯᓯᒪᔪᑦ ᐊᑦᑐᖅᑕᐅᓚᕿᓐᓂᕐᒪᑦ ᐸᓖᓯᒃᑯᑦ ᓄᓇᒃᑰᔫᖓᑦ ᓯᕗᒧᑦ ᐃᖏᕐᕋᓯᑲᓪᓚᑦᑐᒥᓂᐅᓂᖓᓄᑦ ᐱᐅᓗᐊᕐᓂᖏᒻᒪᑕ ᐊᑐᕆᐊᑦ ᓄᖅᑲᕋᓱᒃᑲᓗᐊᖅᑎᓪᓗᒋᑦ ᓴᓂᐊᓄᑦ A.B.

[108] ᖃᐅᔨᓴᖅᑏᑦ ᐃᓱᒪᓕᓚᐅᕋᓗᐊᕐᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᓯᒋᐊᖃᖅᑐᒥᓂᐅᓂᖏᓐᓂᑦ A.B.-ᒥᑦ ᕿᓚᒥᐅᔫᒥᔪᖅ, ᐊᒻᒪ A.B. ᐅᕐᕈᑎᑕᐅᓚᐅᖏᓐᓂᖓ ᐱᔮᕆᔭᐅᓗᓂ, ᖃᐅᔨᓴᖅᑏᑦ ᖃᐅᔨᔪᑦ, ᐱᓪᓗᒋᑦ ᖃᓄᐃᓕᖓᒍᑎᐅᓚᐅᖅᑐᑦ, ᓈᒻᒪᓚᐅᖏᑦᑐᖅ ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᖅᑐᒥᓂᐅᓂᖓ ᖃᓂᒋᓗᐊᖅᑐᓂᐅᒃ A.B. ᑕᒪᓐᓇ ᖃᓄᐃᓕᐅᕈᑎᒥᓂᐅᔪᖅ ᑐᑭᖃᖅᑐᖅ ᒥᑭᑦᑐᕈᓘᒐᓗᐊᒥᑦ ᑕᐃᒫᖑᖕᖏᑦᑐᖅ ᐊᑐᖅᑐᖃᖅᐸᑦ ᐊᑐᖅᑕᐅᓇᓱᐊᖅᑐᒥᑦ ᐅᕝᕙᓘᓐᓃᑦ ᓯᓚᑖᓂᑦ ᐱᔾᔪᑎᑕᖃᖅᐸᑦ, ᓲᕐᓗ ᐊᑐᕆᐊᑦ ᐱᐅᓗᐊᕋᑎᒃ ᐃᖏᕐᕋᕕᒋᓪᓗᒋᑦ, ᐊᐳᖅᑐᖃᕐᓂᐅᓴᑐᐃᓐᓇᕋᔭᖅᑐᖅ, ᐃᒻᒪᖄ ᐋᓐᓂᖅᑕᒻᒪᕆᐅᓗᓂ ᐅᕝᕙᓘᓐᓃᑦ ᑐᖁᑕᐅᓗᓂ A.B.

[109] ᕿᒥᕐᕈᐊᖅᑕᐅᑎᓪᓗᒍ ᐊᐅᓚᔫᖅ ᐊᔾᔨᓕᐅᖅᑕᐅᓯᒪᔪᖅ, ᓯᕗᓂᐊᒍᓪᓘᓐᓃᑦ ᓄᓇᒃᑰᔫᖅ ᐃᓯᕐᓴᒨᓚᐅᖅᑎᓐᓇᒍ, ᑳᓐᔅᑕᐳᓪ ᑭᐅᓕᖕ ᐊᖁᑦᑐᒥᓂᖅ ᓄᓇᒃᑰᔫᒥᑦ ᖃᓂᑦᓴᑐᒻᒪᕆᐅᓗᓂ A.B.-ᒥᑦ. ᓯᕗᕌ ᓴᐅᒥᐊᓂ ᐊᑦᓴᓗᐊᖓ ᓄᓇᒃᑰᔫᑉ ᐅᖓᓯᓐᓂᖃᖅᑑᔮᖅᑐᖅ ᒪᕐᕉᓐᓂᒃ (2) ᐃᓯᒐᖕᖑᐊᓂᒃ A.B.-ᒥᑦ ᓄᓇᒃᑰᔫᖅ ᖁᐊᓴᕿᑦᑑᔮᖅᑎᓪᓗᒍ ᐊᑐᕆᐊᑉ ᓯᓚᑖᓄᑦ. ᑕᑯᑦᓴᐅᔮᖏᑦᑐᖅ ᑳᓐᔅᑕᐳᓪ ᑭᐅᓕᖕ ᐊᖁᑦᑐᒥᓂᐅᓂᖓᓄᑦ ᓱᒃᑲᑦᑐᒻᒪᕆᐅᓗᓂ ᐅᕝᕙᓘᓐᓃᑦ ᓈᒻᒪᖏᑦᑐᒥᑦ ᐃᖏᕐᕋᓂᒻᒪᖔᖅ; ᑭᓯᐊᓂᓕ, ᑕᑯᑦᓴᐅᔪᖅ ᐊᐳᖅᑕᐅᓪᓗᓂ ᐊᒻᒪ ᖃᓪᓕᑦᑕᐅᑐᐃᓐᓇᕆᐊᖃᖅᑐᓂ ᓄᓇᒃᑰᔫᒧᑦ, ᓱᒃᑲᐃᐸᓗᒐᓗᐊᕈᓂ, ᐅᓗᕆᐊᓇᖅᑐᒦᑎᑦᓯᒍᓐᓇᖅᑐᑦ ᑭᓇᑐᐃᓐᓇᕐᒥᑦ.

[110] ᖃᓄᑎᒋ ᐅᓗᕆᐊᓇᖅᑐᒦᑦᑐᖃᓚᖓᓐᓂᕐᒪᖔᖅ ᖁᕝᕙᓯᑦᑐᒻᒪᕆᐅᓚᐅᖅᑐᖅ, ᒪᓕᑦᑐᒋᑦ ᐅᖃᐅᓯᐅᓯᒪᔪᑦ. ᑕᒪᓐᓇ ᐅᖃᐅᓯᕆᓪᓗᒍ, ᖃᓄᐃᓕᖓᓂᐅᓚᐅᖅᑐᖅ ᓇᓗᓇᐃᖅᑕᐅᓗᐊᕈᓐᓇᖏᑦᑐᖅ ᑐᐊᕕᐊᖑᔭᕆᐊᖃᕐᓂᖓᓄᑦ. ᐱᔾᔪᑎᐅᓗᑎᒃ ᖃᓄᐃᒍᑎᐅᕙᓚᐅᖅᑐᑦ ᐊᓯᖏᓐᓂᑦ ᐅᖄᓚᔾᔪᑎᐅᕙᓚᐅᖅᑐᓂᑦ, ᐊᔪᕐᓇᓚᐅᖏᑦᑐᖅ ᐃᓱᒪᔭᕆᐊᑦᓴᖅ A.B. ᓱᖏᐅᓯᔭᕆᐊᖓ, ᑭᓯᐊᓂ ᐸᓖᓯᒃᑯᑦ ᐱᓪᓗᐅᑕᐅᔪᓂᑦ ᑐᑭᓯᓯᒪᓚᐅᖏᑦᑐᑦ ᑕᒪᓐᓇ ᐱᓪᓗᒍ ᐊᒻᒪ ᑕᑯᓚᐅᖏᑦᑐᑦ A.B.-ᒥᑦ ᓱᖏᐅᓯᔭᖅᑎᓪᓗᒍ. ᓇᓗᓇᐃᔭᐃᓗᓂ ᑎᒍᓯᔾᔪᑎᒥᓂᕐᒥᓂᒃ, ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ ᑲᖐᓱᓐᓂᕋᒥ A.B. ᐃᓚᒋᔭᐅᔪᕕᓂᐅᓂᖓᓂᑦ ᐸᕝᕕᓴᐃᓂᕐᒥᑦ ᐅᖄᓚᔪᕕᓂᕐᓄᑦ, ᖁᑭᐅᓯᔭᕐᓂᕋᐃᔪᒥᐅᖏᑦᑐᖅ.

ᐱᔾᔪᑎᖃᖅᑐᒥᓃᑦ ᐃᓱᒪᓪᓗᑎᒃ A.B. ᐊᓯᒥᓂᒃ ᐋᓐᓂᕐᓯᒐᓱᓐᓂᐊᕐᓂᖓᓂᑦ, ᐱᔾᔪᑎᒋᓪᓗᒋᑦ ᓱᕈᓯᕐᓄᑦ ᐅᓂᒃᑳᒥᓂᐅᔪᑦ ᐊᒻᒪ ᖃᓄᖅ ᐃᓕᕋᓇᕋᓱᑦᑐᒥᓂᐅᓂᖓᓄᑦ ᑎᒃᑯᐊᕋᖅᑐᓂ, ᑭᓯᐊᓂ ᑭᓇᑐᐃᓐᓇᕐᒥᑦ ᐊᕙᑎᐊᓃᑦᑐᖃᓚᐅᖏᑦᑐᖅ ᑕᐃᑦᓱᒪᓂ. ᐱᓲᑎᑲᓪᓚᑦᑐᖅ ᐅᖓᓯᓐᓂᖃᖅᑑᔮᖅᑐᒥᓂᖅ ᐃᒻᒪᖄ 25-ᓂᑦ 30-ᓄᑦ ᐃᓯᒐᖕᖑᐊᓂᑦ (ᕖᑦᓂᑦ).

[112] ᓇᓗᓇᐃᖅᑕᐅᓯᒪᒋᐊᖃᕐᓂᕐᒥᔪᖅ A.B. ᐋᖓᔮᖅᑐᒻᒪᕆᐅᓐᓂᕐᒪᑦ ᒪᑭᑕᒍᓐᓇᑦᑎᐊᕈᓐᓃᖅᑐᒥᓂᖅ. ᐊᑐᐊᒐᕐᒥᑦ ᐱᓕᕆᑦᓯᐊᕆᐊᖃᕐᓂᕐᒥᑦ ᑲᑎᒪᐅᑎᖃᖅᑎᓪᓗᒋᑦ, ᑳᓐᔅᑕᐳᓪ ᑭᐅᓕᖕ ᒪᓕᒐᓕᕆᔨᖓ ᐅᖃᓚᐅᖅᑐᖅ, ᓯᕗᓪᓕᕐᒥ ᐊᐅᓚᔫᒥ ᐊᔾᔨᓕᐅᖅᑕᐅᓯᒪᔪᒥ ᐃᓪᓗᓕᒻᒧᑦ ᓴᓂᐊᓂ, A.B. ᑕᑯᑦᓴᐅᔪᖅ ᐅᓪᓚᑎᓪᓗᒍ ᑐᐊᕕᖅᑐᓂ, ᑕᒪᐅᓇ ᐃᓱᒪᒋᔭᐅᓕᕐᓂᒥᓂᖓ ᕿᒫᒐᓱᓐᓂᐊᕐᓂᖓᓂᑦ, ᐊᒻᒪ ᕿᒫᒍᓐᓇᕐᓂᖓᓂᑦ ᐸᓖᓯᒃᑯᓐᓂᑦ. ᑭᓯᐊᓂᑦᑕᐅᖅ, ᑕᓪᓕᒪᐅᓚᐅᖅᑐᑦ (5) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᖓᓱᓂ (3) ᐸᓖᓯᓄᑦ ᓄᓇᒃᑰᔫᕐᓂ ᐊᕙᑎᐊᓂ, ᕿᒪᑦᓯᓵᕋᔭᕐᓂᖓ ᖁᓚᕐᓇᑐᒻᒪᕆᐅᓕᖅᑐᓂ. A.B. ᑎᒍᔭᐅᔪᓐᓇᓚᐅᕐᒪᑦ ᐱᓗᐊᖏᑦᑐᓂᑦ ᓱᕋᐃᓯᒪᓂᖓᓄᑦ ᒪᓕᒐᓂᑦ ᐸᕝᕕᓴᐃᓗᓂ ᐊᒻᒪ ᐃᓄᒋᐊᕝᕕᒻᒥ ᐋᖓᔮᖅᑐᓂ, ᐱᔭᕆᐊᑐᓕᖅᑎᑦᓯᓯᒪᓗᓂ ᐱᔾᔪᑎᖃᑦᓯᐊᖅᑐᒥᓂᐅᓂᖏᓐᓂᑦ ᐊᑐᕆᐊᑦᓴᖅ ᐅᓗᕆᐊᓇᑐᐃᓐᓇᕆᐊᓕᓐᓂᑦ ᑎᒍᔭᐅᓇᓱᐊᖅᑐᓂ A.B. ᕿᒪᑦᓯᓵᕋᔭᕆᐊᖓ ᐃᓱᒪᒋᔭᐅᒋᐊᖃᕐᓂᒥᒻᒪᑦ ᐱᔾᔪᑎᐅᓗᓂ ᐊᖁᓐᓂᐅᔪᖅ ᓄᓇᒃᑰᔫᒥᑦ ᖃᓂᑦᓴᓗᐊᖅᑎᓪᓗᒍ ᑭᓇᒥᑦ.

[113] ᐊᑐᕆᐊᕐᓗᓚᐅᕐᓂᖓ ᐱᔾᔪᑎᐅᓗᐊᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᖓᓄᑦ ᐊᐳᖅᑕᐅᓂᕆᓚᐅᖅᑕᖓ A.B. ᑕᕝᕙᓂ ᐱᓕᕆᐊᒥ. ᑭᓯᐊᓂᓕ, ᓈᒻᒪᒋᔭᐅᔪᖅ ᐊᒻᒪ ᓇᓗᓇᐃᖅᑕᐅᓯᒪᑦᑎᐊᖅᑐᓂ ᒪᓕᒐᕐᓂ ᐊᖁᑎᐅᔪᑦ ᐃᖕᒥᓂᒃ ᐊᐅᓚᑦᑎᒋᐊᖃᕐᓂᖏᓐᓂᑦ ᓄᓇᒃᑰᔫᖏᓐᓂᑦ ᒪᓕᓪᓗᑎᒃ ᐊᑐᕆᐊᑦ ᖃᓄᐃᓐᓂᖏᓐᓂᑦ, ᐊᒻᒪ ᐋᖅᑭᒋᐊᕆᕙᓪᓗᑎᒃ ᐱᓕᕆᔾᔪᓯᒥᓂᒃ ᑕᒪᒃᑯᐊ ᒪᓕᑦᑐᒋᑦ. ᐅᖃᖅᑐᒍ ᓇᓗᓇᐃᕐᓯᒪᑎᓪᓗᒍ, ᖃᐅᔨᓴᖅᑏᑦ ᖃᐅᔨᔪᑦ ᐊᑦᑕᓇᓚᐅᕆᐊᖓ ᐊᒻᒪ ᓈᒻᒪᒐᓂ ᑳᓐᔅᑕᐳᓪ ᑭᐅᓕᖕ ᖃᓂᑦᓴᓗᐊᓕᖅᑐᒥᓂᐅᓂᖓᓂᑦ ᐸᓖᓯᒃᑯᑦ ᓄᓇᒃᑰᔫᖓᓐᓄᑦ A.B.-ᒥᑦ ᖁᐊᓴᐅᑎᓪᓗᒍ ᐊᑐᕆᐊᖅ ᐱᐅᓗᐊᓚᐅᖏᑦᑐᖅ. ᑳᓐᔅᑕᐳᓪ ᑭᐅᓕᖕ ᐅᓗᕆᐊᓇᑐᐃᓐᓇᕆᐊᓕᓐᓂᑦ ᖃᐅᔨᓴᑦᓯᐊᕆᐊᖃᖅᑐᒥᓂᐅᒐᓗᐊᖅ ᐃᓱᒪᒋᓪᓗᒍ ᖃᓄᐃᑦᑑᓂᖓ ᐊᑐᕆᐊᑉ ᐊᒻᒪ ᐊᓯᖏᑦ ᐊᑑᑎᖃᐅᖅᑐᑦ ᐱᔾᔪᑎᐅᓯᒪᔪᑦ.

[114] ᐊᑐᐊᒐᕐᒥᑦ ᐱᓕᕆᑦᓯᐊᕆᐊᖃᕐᓂᕐᒥᑦ ᐱᔾᔪᑎᖃᖅᑐᓂ ᐋᖅᑭᑦᑕᒥᓄᑦ, ᐊᖏᔪᖅᑳᖅ ᖃᐅᔨᓴᖅᑎᓂᑦ ᔫᓐᔅ ᑎᓕᓯᓚᐅᖅᑐᖅ ᐱᓕᕆᔾᔪᑎᒍᑦ ᑭᐅᔭᐅᖁᓪᓗᒍ ᑳᓐᔅᑕᐳᓪ ᑭᐅᓕᖕ ᐊᑐᕐᓗᑎᒃ ᐃᒪᐃᑦᑐᒥᑦ "1004," ᓈᒻᒪᖏᑦᑐᒥᑦ ᐱᓕᕆᐊᒥᓂᕐᒥᒃ ᓇᓗᓇᐃᔭᐃᕕᒻᒥᑦ ᑎᑎᖅᑲᖅ, ᐊᒻᒪ ᑳᓐᔅᑕᐳᓪ ᑭᐅᓕᖕ ᐱᓕᒻᒪᓴᖅᑕᐅᖁᓪᓗᓂᐅᒃ ᐃᓚᑐᐊᕆᔭᐅᕙᓪᓗᓂ ᖃᓄᑎᒋ ᐊᑦᓱᕉᑎᖃᕐᓗᓂ ᐱᓕᕆᔾᔪᑎᓂᑦ ᖃᐅᔨᒪᔨᑕᒧᑦ. ᐱᓕᒻᒪᑦᓴᐅᑎᒍᑦ ᑐᕌᒐᖃᕆᐊᖃᓚᐅᖅᑐᑦ ᐊᐅᓚᑕᐅᔾᔪᓯᖏᓐᓂᑦ ᐸᓖᓯᒃᑯᑦ ᐊᐅᓚᐅᑎᓖᑦ ᓄᓇᒃᑰᔫᖁᑎᖏᑦ ᐊᒻᒪ ᓈᒻᒪᑦᑐᓂᑦ ᐅᓗᕆᐊᓇᕈᓐᓇᖅᑐᓂᑦ ᖃᐅᔨᓴᐅᑎᐅᔪᑦ ᐃᓱᒪᒋᔭᖃᖅᐸᓪᓗᑎᒃ ᐊᕙᑎᐅᑉ ᖃᓄᐃᓕᖓᓂᖏᓐᓂᑦ ᐊᒻᒪᑦᑕᐅᖅ ᐊᓯᖏᓐᓂᑦ ᐃᓱᒪᑦᓴᕐᓯᐅᕈᑎᑦᓴᓂᑦ ᐱᓕᕆᔾᔪᑎᐅᔪᑦ ᐱᓪᓗᒋᑦ ᐸᓯᐅᕋᖅᑕᐅᔪᓂᑦ ᐅᐸᑦᓯᕙᓪᓕᐊᑎᓪᓗᒋᑦ ᐱᓱᑦᑐᓂᑦ.

[115] ᖃᐅᔨᓴᖅᑏᑦ ᓈᒻᒪᓴᖅᑐᑦ ᓈᒻᒪᑦᑐᓂᑦ ᐋᖅᑭᒋᐊᕈᑎᑦᓴᓂᑦ ᐱᓕᕆᐊᖃᓚᐅᕐᒪᑕ ᐱᔾᔪᑎᒋᓪᓗᒍ ᑳᓐᔅᑕᐳᓪ ᑭᐅᓕᖕ ᐊᖁᓐᓂᕆᓚᐅᖅᑕᖓ ᐊᒻᒪ ᐊᓯᐊᒍᑦ ᖃᓄᐃᓕᐅᕈᑎᐅᒋᐊᖃᕈᓐᓃᕐᒪᑦ.

[116] ᖃᐅᔨᓴᖅᑏᑦ ᐱᓕᕆᐊᖃᕐᓯᒪᔪᑦ ᐊᓯᖏᓐᓂᑦ ᐱᓕᕆᐊᖑᕋᑖᖑᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖏᑦ ᐊᑦᑐᐃᓯᒪᑎᓪᓗᒋᑦ ᑭᒃᑯᓐᓂᒃ ᑎᒍᔭᐅᓇᓱᐊᖅᑐᓂᑦ. ᑕᒪᓐᓇ ᐱᔾᔪᑎᐅᔪᖅ ᐅᖃᐅᓯᐅᒋᐊᓕᒃ ᑐᕌᒐᕆᔭᐅᓂᕐᓴᐅᓗᓂ ᐊᑐᐊᒐᑎᒍᑦ ᐊᒻᒪ ᐱᓕᒻᒪᑦᓴᐅᑎᒍᑦ ᓇᓗᓇᐃᕐᓯᒪᖁᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᑎᑕᐅᓯᒪᓂᖏᓐᓂᑦ ᐊᑐᐊᒐᕐᓂᑦ ᐊᑐᕆᐊᖃᖅᐸᑦᑕᖏᓐᓂᑦ.

[117] ᖃᐅᔨᓴᖅᑏᑦ ᐊᑐᖁᔨᓯᒪᒻᒥᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓴᓇᓗᑎᒃ ᐊᒻᒪ ᐱᒋᐊᖅᑎᑦᓯᓗᑎᒃ ᐊᑐᐊᒐᕐᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᒋᓪᓗᒋᑦ ᐊᑐᖅᑕᐅᕙᓐᓂᖏᑦ ᖃᓄᖅ ᐸᓖᓯᒃᑯᑦ ᓄᓇᒃᑯᔫᖏᑕ ᐊᖑᔮᖃᖅᑎᓪᓗᒋᑦ ᐸᓯᔭᐅᓯᒪᔪᓂᑦ ᐱᓱᑦᑐᓂᑦ. ᖃᐅᔨᓴᖅᑏᑦ ᐊᑐᖁᔨᓯᒪᒻᒥᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᖁᓪᓗᒋᑦ ᓴᓇᓂᕐᒥᑦ ᐊᒻᒪ ᐱᕙᓪᓕᐊᑎᑦᓯᓂᕐᒥᑦ ᐱᓪᓗᐊᑕᓂᑦ ᐊᑐᐊᒐᑦᓴᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᖃᕐᓗᑎᒃ ᐊᖁᑉᐸᓂᕐᒥᑦ ᐊᑐᕆᐊᑦ ᖃᓄᐃᑦᑑᑎᓪᓗᒋᑦ ᐊᑐᖅᑕᐅᒐᔪᑦᑐᓂᑦ ᐅᑭᐅᖅᑕᖅᑐᒥ ᓄᓇᓕᖃᕐᕕᓐᓂ.

ᓈᒻᒪᓐᓂᒥᓂᖓ ᐊᑐᖅᑕᐅᔪᕕᓂᐅᓂᖓ ᐊᑦᓱᕈᕐᓂᐅᔫᑉ A.B. ᑎᒍᔭᐅᕙᓪᓕᐊᑎᓪᓗᒍ

ᖃᐅᔨᔭᐅᔪᖅ #6: ᐱᔾᔪᑎᒋᓪᓗᒋᑦ A.B. ᖁᓄᓚᐅᕐᓂᖓ ᐊᒻᒪ ᐱᒋᐊᕐᓂᐅᓴᓚᐅᕐᓂᖓ, ᐊᑐᕆᐊᖃᓚᐅᖅᑐᑦ ᐊᒻᒪ ᓈᒻᒪᓚᐅᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᖅᑐᒥᓂᐅᓂᖓ ᐊᑦᓱᕈᖅᑐᑎᒃ ᑎᒍᔭᐅᑎᓪᓗᒍ. ᐊᑦᓱᕈᓐᓂᐅᓚᐅᖅᑐᖅ ᐊᑐᖅᑕᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᓈᒻᒪᓚᐅᖅᑐᖅ A.B. ᐱᐅᓯᖓ ᐱᓪᓗᒍ, ᐊᒻᒪ ᓈᒻᒪᓚᐅᖅᑐᓂ ᐃᓱᒪᒋᓪᓗᒋᑦ ᖃᓄᐃᒍᓕᖓᒍᑎᐅᓚᐅᖅᑐᑦ.

ᑎᒍᓯᓂᖅ – ᑭᑮᖓᐅᑏᓐᓂᒃ ᐊᑎᓯᑕᐅᓂᖓ A.B.

[118] ᐊᐅᓚᔫᒃᑯᑦ ᐊᔾᔨᓕᐅᕐᓯᒪᔪᖅ ᖃᓄᐃᒍᑎᐅᔪᕕᓂᕐᒥᒃ ᑕᑯᑦᓴᐅᑎᑦᓯᔪᖅ, A.B. ᐊᐳᖅᑕᐅᓚᐅᖅᑎᓪᓗᒍ ᐸᓖᓯᒃᑯᑦ ᓄᓇᒃᑰᔫᖓᖓᑕ ᒪᑐᐊᓄᑦ, ᓄᓇᒃᑰᔫᖅ ᓄᖅᑲᖅᑎᑕᐅᓯᔪᕕᓂᖅ ᐊᒻᒪ ᑳᓐᔅᑕᐳᓪ ᑭᐅᓕᖕ ᓂᐅᓗᓂ. A.B.-ᒥᑦ ᑎᒍᓯᓕᓚᐅᖅᑐᖅ ᐸᕝᕕᓴᐃᓂᖓᓄᑦ. ᑳᓐᔅᑕᐳᓪ ᑭᐅᓕᖕ ᐅᐸᑦᑕᐅᑦᓴᐅᑎᒋᓚᐅᖅᑐᖅ ᑳᓐᔅᑕᐳᓪ ᓱᓚᑦᒧᑦ, ᐊᒻᒪ ᑭᖑᓂᑦᓯᐊᖓᓂ ᖃᐃᑦᑕᖅᐳᖅ ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓯᑑᕐᔾ, ᐊᒻᒪ ᓵᔨᓐ ᒋᐅᓪ. ᐃᓘᓐᓇᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᑲᔪᓚᐅᖅᑐᑦ A.B. ᐊᑦᓱᖏᖅᑕᐅᑎᓪᓗᒍ, ᑖᓐᓇᓕ ᖁᓄᔪᒻᒪᕆᐅᓚᐅᖅᑐᖅ. ᐃᓗᐊᓂ 43 ᓴᑲᓐᔅᓯ ᑳᓐᔅᑕᐳᓪ ᑭᐅᓕᖕ ᑎᒍᓯᓕᖅᑎᓪᓗᒍ, A.B. ᐊᑎᓯᑎᑕᐅᓚᐅᖅᑐᖅ ᑭᑮᖓᐅᑏᓐᓂᒃ ᐊᒻᒪ ᓇᖏᖅᓯᑎᑕᐅᓗᓂ. ᐅᐊ ᒪᓇᒥᑦ ᐊᒻᒪ 20 ᓴᑲᓐᔅᓯᓂᑦ ᐊᓂᒍᐃᓚᐅᖅᑎᓪᓗᒍ ᑭᖑᓂᐊᒍᑦ, A.B. ᐅᖓᑖᓅᖅᑕᐅᓚᐅᖅᑐᖅ ᐊᖁᑎᐅᑉ ᐃᑦᓯᕙᐅᑕᖓ ᐸᓖᓯᒃᑯᑦ ᓄᓇᒃᑰᔫᖓᓐᓂ.

[119] A.B. ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ ᖃᐅᔨᒪᒍᓐᓃᕐᓂᕋᒥ ᐊᐳᖅᑕᐅᓚᐅᖅᑐᓂ ᐸᓖᓯᒃᑯᑦ ᓄᓇᒃᑰᔫᖓᓐᓄᑦ ᐊᒻᒪ "ᐊᑕᐅᓯᐅᖏᑦᑐᒧᑦ ᐸᓖᓯᓄᑦ ᕿᒥᑕᐅᓚᐅᕋᒥ." ᓇᓗᓇᓚᐅᖅᑐᖅ ᐃᖅᑲᐅᒪᓂᖓ ᖃᓄᐃᒍᑎᐅᓯᒪᔪᒥᑦ ᐊᐅᓚᔾᔭᑦᑕᐅᓂᕐᒪᖔᖅ ᑕᑯᓐᓇᓚᐅᖅᑎᓪᓗᒍ ᐊᐅᓚᔫᒥᑦ ᐊᔾᔨᓕᐅᖅᑕᐅᓯᒪᔪᒥᑦ. ᐊᐱᕐᓱᑕᐅᓗᓂ ᖃᐅᔨᓴᖅᑎᓄᑦ, A.B. ᐃᖅᑲᐅᒪᓂᕋᓚᐅᖅᑐᖅ ᐸᓖᓯᒃᑯᓐᓂᑦ ᖃᐅᒐᓛᑎᓪᓗᒋᑦ ᐊᒻᒪ ᐱᒋᐊᖅᑕᐅᓗᓂ ᓯᖅᑯᖏᓐᓄᑦ. ᐊᐱᕆᔭᐅᒐᒥ ᐋᓐᓂᖅᑕᐅᓂᕐᒪᖔᖅ, A.B. ᐋᒡᒑᓚᐅᖅᑐᖅ, ᐅᖃᖅᑐᓂ ᐋᖓᔮᕐᓂᕋᒥ ᐊᒻᒪ ᐃᑉᐱᓐᓂᐊᓚᐅᖏᓐᓇᒥ.

[120] A.B. ᐅᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᓴᖅᑎᖓᓄᑦ, ᖃᖓᑭᐊᖅ, ᐸᓖᓯᒧᑦ ᐅᖃᐅᔾᔭᐅᓐᓂᕋᒥ ᑎᒍᔭᐅᓂᖓᓂᑦ ᐅᐱᓐᓇᕋᓂ "[ᐊᖑᑎ] ᐊᖑᔮᖃᓚᐅᕐᒪᑦ ᑕᐃᑦᓱᒥᖓ ᒪᒃᑯᑦᑐᒥᑦ ᐊᒻᒪ ᐅᐱᓐᓇᕋᓂ [ᐊᖑᑎ] ᐋᖓᔮᓚᐅᕋᒥ." A.B. ᒪᓕᒐᓕᕆᔨᖓ ᐅᖃᓚᐅᖅᑐᖅ ᓇᓗᓇᖅᑐᒥᑦ ᐱᑕᖃᑐᐃᓐᓇᕆᐊᖃᕐᓂᖓᓂᑦ ᐅᖃᐅᓯᒃᑯᑦ ᐊᓯᐊᓅᕈᑎᖓᒍᑦ A.B. ᑭᐅᔾᔪᑎᖓᓂᑦ; ᐊᐱᖅᑯᑎᐅᓚᐅᖅᑐᖅ A.B.-ᒧᑦ ᑕᐃᒫᒃ ᐅᖃᐅᔾᔭᐅᓚᐅᕋᒥ ᐸᓖᓯᒃᑯᓐᓂᑦ, ᐅᕝᕙᓘᓐᓃᑦ ᑕᒪᓐᓇ ᑐᑭᓯᓯᒪᒐᒥᐅᒃ ᑎᒍᔭᐅᔾᔪᑎᒋᔭᒥᓂᕆᓪᓗᓂᐅᒃ. A.B. ᑭᐅᓚᐅᖅᑐᖅ, "ᖃᐅᔨᒪᖏᑦᑐᖓ." ᐊᐱᕐᓱᑕᐅᒃᑲᓐᓂᕋᒥ, A.B. ᐅᖃᓚᐅᖅᑐᖅ ᐃᖅᑲᐅᒪᖏᓐᓂᕋᖅᑐᓂ ᐸᓖᓯᒧᑦ ᐅᖃᐅᔾᔭᐅᑎᓪᓗᒍ ᐅᖃᖃᑎᖃᕈᓐᓇᕐᒪᑦ ᒪᓕᒐᓕᕆᔨᒥᑦ.  

[121] ᑕᑯᓇᓚᐅᖅᑐᖅ ᐊᐅᓚᔫᒥᑦ ᐊᔾᔨᓕᐅᕆᔪᕕᓂᖅ ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ ᐹᓂᕆᓚᐅᖅᑕᖏᑦ ᐊᒥᓱᐃᑦ ᐸᓖᓰᑦ ᐊᒻᒪ "ᓱᕈᓯᕐᒥᑦ" (A.B.) "ᑐᑭᖃᓚᐅᖏᒻᒪᑦ" ᐅᐱᓐᓇᕋᓂ ᓱᕈᓯᖅ ᓄᑭᖃᖏᓗᐊᒧᑦ ᓂᖕᖓᐅᑎᒍᓐᓇᓚᐅᖏᑦᑐᖅ. ᑕᑯᓐᓇᓚᐅᖅᑐᖅ ᐅᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᐊᖁᓚᐅᖅᑐᖅ ᓄᓇᒃᑰᔫᒥᑦ ᓯᖅᑯᑦᑐᓚᐅᕐᒪᑦ A.B.-ᒧᑦ ᒪᕐᕈᐊᑎᖅᑐᓂ, ᐊᒻᒪ ᐸᓖᓯᒃᑯᑦ A.B.-ᒥᑦ ᓄᓇᒦᑎᑦᓯᓚᐅᖅᑐᑦ ᐊᐅᓚᔾᔭᑦᑕᐃᓕᑎᑕᐅᓗᓂ. ᑕᑯᓐᓇᓚᐅᖅᑐᖅ ᐅᖃᓚᐅᖅᑐᖅ ᓂᐱᓕᐅᕐᓂᕋᒥᐅᒃ ᐃᓚᖓ ᐊᔾᔨᓕᐅᓚᐅᖅᑕᓂ ᑭᒃᑯᑐᐃᓐᓇᕐᓄᑦ ᑐᓴᐅᒪᐅᑎᓕᕆᕝᕕᒻᒧᑦ ᐅᐱᓐᓇᕋᓂ ᐸᓖᓯᒃᑯᑦ "ᐊᐳᕐᓯᒋᐊᖃᓚᐅᖏᒻᒪᑕ ᓱᕈᓯᕐᒥᑦ" ᐊᒻᒪ ᓯᖅᑯᑐᕐᕕᐅᖏᓪᓗᓂ, ᓂᖕᖓᐅᑎᓚᐅᖏᒻᒪᑦ ᐊᒻᒪ ᖁᓄᒐᓂᓗ. ᑕᑯᓐᓇᓚᐅᖅᑐᖅ ᐅᖃᓚᐅᖅᑐᖅ, "ᐃᓱᐊᓂ ᖁᓄᔫᔮᖅᑐᑦᓴᐅᔪᕕᓂᖅ [ᖁᓄᔫᔮᓚᐅᕐᒪᑦ], ᑭᓯᐊᓂ ᑎᓴᒪᐅᓚᐅᖅᑐᑦ (4) ᐸᓖᓰᑦ."

[122] ᓄᑳ/ᐊᖏᔪᐊ ᐱᓲᑎᑲᓪᓚᒻᒥᑦ ᐊᖁᑎᐅᓚᐅᖅᑑᑉ ᑕᑯᓐᓇᓚᐅᕐᒥᔪᖅ ᖃᓄᐃᒍᑎᐅᔪᒥᑦ ᐊᒻᒪ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ ᐅᖃᓚᐅᖅᑐᖅ ᑕᑯᓐᓇᖅᑐᒥᓂᐅᓂᕋᖅᑐᓂ ᐸᓖᓯᒃᑯᓐᓂᑦ "ᐋᓐᓂᖅᑎᕆᑎᓪᓗᒋᑦ ᐋᖓᔮᖅᑐᒥᑦ ᐊᖑᑎᒥᑦ." ᐸᓖᓯᒃᑯᓐᓂᑦ ᑕᒫᓃᒍᓐᓃᖁᔭᐅᓐᓂᖏᑦᑐᑦ ᐊᒻᒪ ᕿᒪᐃᓯᔪᕕᓃᑦ. ᐱᓲᑎᑲᓪᓚᑦᑐᖅ ᐊᐱᕐᓱᖅᑕᐅᒍᒪᓚᐅᖏᑦᑐᖅ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ.

[123] ᐅᓇ ᑎᑎᖅᑲᖅ ᐅᖃᐅᓯᐅᓯᒪᔪᓂᑦ, ᑳᓐᔅᑕᐳᓪ ᑭᐅᓕᖕ ᓇᓗᓇᐃᔭᐃᓚᐅᖅᑐᖅ ᓂᐅᓚᐅᖅᑐᓂ ᓄᓇᒃᑰᔫᒥᑦ, ᐅᖃᐅᑎᓚᐅᖅᑕᖓ A.B. ᑎᒍᔭᐅᓂᕋᖅᑐᓂᐅᒃ ᐸᕝᕕᓴᐃᓚᐅᕐᓂᖓᓄᑦ. ᒪᓕᑦᑐᒋᑦ ᐅᖃᐅᑎᑦᓴᖏᑦ ᑳᓐᔅᑕᐳᓪ ᑭᐅᓕᖕ, A.B. ᐃᒧᓯᓯᒪᓚᐅᖅᑐᖅ ᐊᒡᒐᖏᓐᓂᑦ ᐊᒻᒪ ᓇᖏᕐᓯᓇᓱᐊᖅᑐᓂ, ᐊᓱᐃᓪᓛᒃ (ᑳᓐᔅᑕᐳᓪ ᑭᐅᓕᖕ) ᐊᔭᑦᓯᓚᐅᖅᑐᖅ ᑎᒥᒥᓂᒃ ᓄᓇᒧᑦ ᐊᒻᒪ ᓇᔪᒻᒥᓪᓗᓂᐅᒃ ᓴᐅᒥᐊ ᑕᓕᖓ ᐊᐅᓚᓇᓱᐊᖅᑐᓂᐅᒃ. ᑳᓐᔅᑕᐳᓪ ᓱᓚᑦ ᐃᑲᔪᓚᐅᖅᑐᖅ ᑳᓐᔅᑕᐳᓪ ᑭᐅᓕᖕᒥᑦ A.B.-ᒥᑦ ᐹᒻᒪᑎᑦᓯᑎᓪᓗᒍ ᐊᒻᒪ ᑕᓕᖏᓐᓂᑦ ᐅᖓᑖᓅᖅᑎᑦᓯᓇᓱᐊᖅᑎᓪᓗᒍ. A.B. ᓱᓕ ᑕᓕᖏᓐᓂᑦ ᓄᓱᑦᓯᑐᐃᓐᓇᐸᑦᑐᖅ. ᒫᓐᓇᓕ, ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓯᒥᖦ, ᐊᒻᒪ ᓵᔨᓐ ᒋᐅᓪ ᖃᐃᔪᑦ.

[124] ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ A.B. ᓱᓕ ᖁᓄᑐᐃᓐᓇᓂᕐᒪᑦ ᐊᒻᒪ ᐲᕋᓱᑦᑐᓂ ᐹᒻᒪᖓᓪᓗᓂ ᓱᓕ, ᐊᒻᒪ ᐸᓖᓯᒃᑯᑦ ᑎᒍᓯᔪᓐᓇᓚᐅᖏᑦᑐᑦ ᑕᓕᖏᓐᓂᒃ. ᑳᓐᔅᑕᐳᓪ ᑭᐅᓕᖕ ᐋᖅᑭᒋᐊᕆᓚᐅᖅᑐᖅ ᖃᓄᐃᓕᖓᓂᕐᒥᓂᒃ ᓯᖅᑯᖓᓪᓗᓂ, ᐊᒻᒪ ᐊᑦᑐᖅᑐᓂᐅᒃ A.B. ᑐᓄᐊ ᑕᓕᖅᐱᐊᒍᑦ ᑐᐃᖓᒍᑦ ᓯᖅᑯᒥᓄᑦ A.B.-ᒥᑦ ᑕᑯᓴᖅᑎᑦᓯᓇᓱᐊᖅᑐᓂ ᐊᓯᐊᓄᑦ ᐊᒻᒪ ᑕᓕᖏᓐᓂᑦ ᓇᔪᒻᒥᑦᓯᓂᐊᕈᒪᒧᑦ. A.B. ᐊᓯᐊᓄᑦ ᑕᑯᓐᓇᓕᓚᐅᖅᑐᖅ ᐱᒋᐊᖅᑕᐅᒐᒥ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑎᑎᑦᓯᔪᓐᓇᕐᓯᓚᐅᖅᑐᑦ ᑕᓕᖅᐱᐊᓄᑦ ᑭᑮᖓᐅᑎᒥᑦ, ᐊᒻᒪ ᓴᐅᒥᐊᓂᑦ, ᖁᓄᒍᓐᓃᖅᑐᓂ A.B.

[125] ᖃᓄᐃᓕᐅᕈᑎᒥᓂᕐᒥᒃ ᐅᓂᒃᑳᖏᓐᓂ, ᑳᓐᔅᑕᐳᓪ ᓱᓚᑦ ᑎᑎᕋᓚᐅᖅᑐᖅ ᐅᓪᓚᑦᓯᓚᐅᕋᒥ ᓄᓇᒃᑰᔫᑉ ᐅᖓᑖᓄᑦ ᐊᒻᒪ ᑕᑯᓪᓗᓂᐅᒃ A.B. ᒪᓕᓚᐅᖏᓐᓂᖓᓂᑦ ᑳᓐᔅᑕᐳᓪ ᑭᐅᓕᖕ ᐊᑐᖅᑕᐅᖁᔭᖏᓐᓂᑦ. ᑳᓐᔅᑕᐳᓪ ᓱᓚᑦ ᓯᖅᑯᖅᑐᓕᓚᐅᖅᑐᖅ A.B. ᓂᐅᖓᓄᑦ ᐊᒻᒪ ᓴᐅᒥᐊᓂᑦ ᑕᓕᖓᓂᑦ ᑎᒍᓯᓇᓱᐊᖅᑐᓂ. ᐅᖃᐅᑎᓚᐅᖅᑕᖓ A.B. ᖁᓄᖁᓇᓂᐅᒃ ᐊᒥᓱᐊᖅᑎᖅᑐᒍ, ᑭᓯᐊᓂ A.B. ᐃᒧᓯᑐᐃᓐᓇᖅᐸᓚᐅᖅᑐᖅ ᐊᒡᒐᒻᒥᓂᒃ ᐊᒻᒪ ᑕᓕᖏᓐᓂᒃ ᑎᒥᐊᑕ ᐊᑖᓅᖅᐸᑦᑐᓂᒋᒃ. ᑳᓐᔅᑕᐳᓪ ᓯᒥᖦ ᐅᐸᑦᓯᓚᐅᖅᑐᖅ ᐊᒻᒪ ᐃᑲᔪᓕᕐᓂᖅᑐᓂ ᑎᒍᓯᔪᒥᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑎᓯᑎᑦᓯᒍᓐᓇᓕᓚᐅᖅᑐᑦ ᑭᑮᖓᐅᑏᓐᓂᒃ A.B.-ᒥᑦ.

[126] ᐱᔾᔪᑎᒋᓪᓗᒋᑦ ᐃᓱᒪᒋᓚᐅᖅᑕᖏᑦ ᓯᕗᓪᓕᕐᒥ ᑕᑯᓐᓇᓚᐅᖅᑐᓂᐅᒃ A.B. (ᑎᒍᔭᐅᓚᐅᖅᑎᓐᓇᒍ), ᑳᓐᔅᑕᐳᓪ ᓱᓚᑦ ᐅᖃᓚᐅᖅᑐᖅ ᐃᓱᒪᓂᕋᖅᑐᓂ ᖃᓄᖅ ᐸᓯᔭᐅᓯᒪᔪᖅ ᖁᑭᐅᓯᔭᓚᐅᖅᑐᖅ ᓱᓕ ᓇᓂᔭᑦᓴᐅᓚᐅᖏᒻᒪᑦ; ᑕᐃᒫᑦᑕᐅᖅ, ᒪᕐᕉᒃ (2) ᐃᓅᒃ (ᐊᑖᑕᖓ ᐊᒻᒪ ᐃᕐᓂᖓ) ᐸᕝᕕᓴᐃᓐᓂᕋᐃᔪᒥᑦ ᐅᖄᓚᔾᔪᑎᖃᓚᐅᖅᑑᒃ ᐱᑕᖃᓚᐅᖏᑦᑑᒃ. ᑳᓐᔅᑕᐳᓪ ᓱᓚᑦ ᖃᐅᔨᒪᓚᐅᖏᑦᑐᖅ A.B. ᐃᓚᒋᔭᐅᓂᒥᓂᖓᓂᑦ, ᐃᓚᒋᔭᐅᓐᓂᕈᓂ, ᐊᓯᖏᓐᓂ ᐅᖄᓚᐅᑕᐅᔪᓂ, ᑭᓯᐊᓂ ᐃᓱᒪᒋᓚᐅᖅᑕᖓ ᑖᓐᓇᐅᒋᐊᖓ "ᐱᔭᐅᔪᒪᔪᖅ," ᐊᒻᒪ ᑕᐃᓐᓇ ᖁᑭᐅᓯᔭᖅᑐᒥᓂᖅ ᐊᐅᓚᑕᐅᓕᕈᓂ, "ᐃᓚᓐᖓᓂᐊᖅᑐᑦ ᐊᑦᓱᕉᑎᐅᔪᑦ" ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ, ᖃᐅᔨᒪᓚᐅᖏᒻᒪᑕ ᓇᒦᓚᐅᕐᒪᖔᑕ ᐸᓯᔭᐅᓯᒪᔪᑦ ᑕᐃᑦᓱᒪᓂ. ᑎᒍᓯᑎᓪᓗᒋᑦ, ᑳᓐᔅᑕᐳᓪ ᓱᓚᑦ ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ A.B. ᐊᐅᓚᓚᐅᕐᒪᑦ, ᐊᒡᒐᒻᒥᓂᒃ ᐃᒧᓯᓯᒪᓪᓗᓂ, ᐊᒻᒪ ᑕᓕᕐᒥᓂᒃ ᑎᒥᒥᓄᑦ ᖃᓪᓕᕐᓯᓯᒪᐃᓐᓇᖅᑐᓂ.  

[127] ᑳᓐᔅᑕᐳᓪ ᓯᒥᖦ ᓇᓗᓇᐃᔭᐃᓚᐅᖅᑐᖅ ᖃᓄᐃᓕᐅᕈᑎᒥᓂᕐᓂᒃ ᐅᓂᒃᑳᖏᓐᓂ ᑕᑯᓐᓇᕐᓂᕋᒥᐅᒃ ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ "ᐹᖃᑎᖃᖅᑎᓪᓗᒋᒃ" A.B.-ᒥᑦ ᓄᓇᒥ. ᐊᒡᒋᐸᓪᓕᐊᑎᓪᓗᒍ, ᑳᓐᔅᑕᐳᓪ ᓯᒥᖦ ᑐᓵᓚᐅᖅᑐᖅ ᒪᕐᕉᓐᓂᒃ (2) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᓐᓂᒃ ᖃᐃᒐᓛᔫᓐᓂᒃ A.B.-ᒧᑦ ᖁᓄᒍᓐᓃᖁᔭᐅᓗᓂ. A.B. ᓱᓕ ᖁᓄᓚᐅᖅᑐᖅ ᐊᒻᒪ ᐊᒡᒐᖏᓐᓂᒃ ᐃᓴᑦᑕᐃᓕᒪᓚᐅᖅᑐᖅ ᐸᓖᓯᓄᑦ. ᑳᓐᔅᑕᐳᓪ ᓯᒥᖦ ᓯᖅᑯᓚᐅᖅᑐᖅ ᐊᒻᒪ ᐃᑲᔪᖅᑐᓂ A.B. ᐊᒡᒐᖏᒃ ᑐᓄᐊᓅᖅᑕᐅᑎᓪᓗᒋᒃ. ᓇᐃᒪᓂᕋᓚᐅᖅᑐᖅ "ᑎᐱᓗᑦᑐᒻᒪᕆᐅᔪᒥᑦ ᐊᕿᐊᕈᕐᒥᐅᑕᒥᑦ ᐃᒥᐊᓗᒻᒥᑦ" ᐱᔪᒥᑦ A.B.-ᒥᑦ "ᐊᐅᓚᑎᓪᓗᒍ [ᔪᕕᓂᐅᑎᓪᓗᒍ]" ᓄᓇᒥ. A.B. ᖃᐃᒐᓛᓚᐅᖅᑐᖅ ᐸᓖᓯᒃᑯᓐᓄᑦ ᑭᓯᐊᓂ ᑳᓐᔅᑕᐳᓪ ᓯᒥᖦ ᓱᖅᑯᐃᕐᓯᒍᓐᓇᓚᐅᖏᑦᑐᖅ ᖃᓄᐃᓕᐅᕐᒪᖔᖅ, ᐅᐱᓐᓇᕋᓂ "ᐅᖃᕈᓐᓇᑦᑎᐊᓚᐅᖏᑦᑐᖅ ᐊᒻᒪ ᑐᑭᓯᒐᑦᓴᐅᒐᓂ."

[128] ᖃᓄᐃᓕᐅᕐᓂᒥᓂᕐᒥᑦ ᐅᓂᒃᑳᖏᓐᓂ, ᑳᓐᔅᑕᐳᓪ ᓯᑑᕐᔾ ᑎᑎᕋᓚᐅᖅᑐᖅ ᑕᑯᓐᓇᖅᑐᒥᓂᐅᓂᕋᖅᑐᓂ ᑳᓐᔅᑕᐳᓪ ᑭᐅᓕᖕᒥᑦ ᓄᓇᒦᑦᑎᓪᓗᒍ ᓇᓗᓇᐃᖅᑕᐅᓯᒪᖏᑦᑐᒥᑦ ᐊᖑᑎᒥᑦ ᐊᐃᑉᐸᖃᖅᑐᓂ. ᕿᓚᒥᕈᓗᒃ ᓂᐅᑦᑕᐅᑎᒋᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᒥᓂᒃ ᐊᒻᒪ ᐅᓪᓚᑦᓯᓪᓗᓂ ᖃᓄᐃᓕᐅᕐᕕᐅᔪᒧᑦ, ᐊᒻᒪ ᑕᑯᓂᕋᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ ᐹᖃᑎᖃᖅᑎᓪᓗᒋᒃ ᐊᖑᑎᒥᑦ. ᑳᓐᔅᑕᐳᓪ ᓯᑑᕐᔾ ᐊᑯᓐᓂᖏᓐᓅᓕᓚᐅᖅᑐᖅ ᐊᖑᑎᐅᑉ ᐊᒻᒪ ᑳᓐᔅᑕᐳᓪ ᑭᐅᓕᖕ ᐸᓖᓯᒃᑯᑦ ᓄᓇᒃᑰᔫᖓᑕ ᐃᑲᔪᕋᓱᑦᑐᓂ ᕿᑲᖅᑎᑕᐅᓇᓱᐊᖅᑎᓪᓗᒍ ᐊᖑᑎ. ᑕᑯᓐᓇᓚᐅᖅᑐᖅ ᐊᖑᑎ ᐋᖓᔮᖅᑐᒻᒪᕆᐅᑎᓪᓗᒍ ᐊᒻᒪ ᓂᐊᖁᒻᒥᓂᒃ ᐃᓯᒐᖏᓐᓄᑦ ᒪᕐᕋᐃᓐᓇᐅᑎᓪᓗᒍ.

[129] ᓵᔨᓐ ᒋᐅᓪ ᐅᖃᐅᓯᖃᓚᐅᖅᑐᖅ ᖃᓄᐃᓕᐅᕈᑎᒥᓂᕐᓂᒃ ᐅᓂᒃᑳᓕᐊᖓᓂ ᑕᑯᓐᓇᕐᓂᕋᒥᐅᒃ ᑳᓐᔅᑕᐳᓪ ᑭᐅᓕᖕ ᖄᖓᓃᑦᑎᓪᓗᒍ ᐊᖑᑎᐅᑉ, ᕿᑲᖅᑎᓇᓱᐊᖅᑐᓂᐅᒃ. ᓵᔨᓐ ᒋᐅᓪ ᑭᖑᓪᓕᖅᐹᖑᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓂᑦ ᖃᓄᐃᓕᐅᖅᑐᓄᑦ ᐅᐸᑦᑐᓂ. ᑕᑯᓚᐅᖅᑕᖓ ᐊᖑᑎ ᐊᑦᓱᑲᓪᓚᒃ ᐋᖓᔮᕐᕙᓗᑦᑎᓪᓗᒍ ᐊᒻᒪ ᖁᓄᑎᓪᓗᒍᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓂᑦ ᕿᑲᖅᑎᑕᐅᓇᓱᐊᖅᑎᓪᓗᒍ ᐊᖑᑎ. ᓵᔨᓐ ᒋᐅᓪ ᑎᒍᓯᓪᓗᓂ ᑭᑮᒐᐅᑎᒥᓂᒃ ᐴᖓᓐᓂᑦ ᑭᓯᐊᓂ ᑕᑯᓕᖅᑐᖅ ᐊᓯᐊᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒥᑦ ᐲᕐᓯᓯᒪᓕᕇᖅᑐᒥᑦ ᑭᑮᒐᐅᑎᖏᓐᓂᑦ.

[130] ᖃᐅᔨᓴᖅᑎᓄᑦ ᕿᒥᕐᕈᐊᖅᑕᐅᓚᐅᖅᑐᖅ ᐊᐅᓚᔪᖅ ᐊᔾᔨᓕᐅᖅᑕᐅᓯᒪᔪᖅ ᖃᓄᐃᒍᑎᐅᔪᖅ ᐊᑐᖅᑕᐅᑎᓪᓗᒍ ᐊᒻᒪ ᑕᑯᓐᓇᖅᑕᐅᓚᐅᖅᑐᑦ ᐅᑯᐊ:

• - ᑳᓐᔅᑕᐳᓪ ᑭᐅᓕᖕ ᐱᓱᓵᖅᑐᖅ ᒥᑦᓵᓄᑦ A.B., ᑖᓐᓇᓕ ᐃᑦᓯᕚᖅᑐᖅ ᓄᓇᒥ. ᑳᓐᔅᑕᐳᓪ ᑭᐅᓕᖕ ᐃᓴᑦᑐᓂᐅᒃ ᒥᑦᓵᓄᑦ ᐊᒻᒪ ᖄᐸᓗᖓᓅᖅᑐᓂ. A.B. ᐊᖁᕕᖓᓕᖅᑐᖅ ᐊᒡᒐᒻᒥᓄᑦ ᐊᒻᒪ ᓯᖅᑯᖏᓐᓄᑦ.
• - A.B. ᐹᕐᖑᖅᑐᓂ ᕿᒫᔪᖅ ᑳᓐᔅᑕᐳᓪ ᑭᐅᓕᖕᒥᑦ, ᑖᓐᓇᓕ ᐃᓵᑦᑐᓂ ᑎᒍᓯᔪᖅ A.B. ᑐᐃᖏᓐᓂᑦ. ᐅᖃᐅᓯᒃᑯᑦ ᑎᓕᓯᔾᔪᑎᐅᔪᑦ ᒪᑯᐊ "ᐊᖁᕕᒋᑦ" ᑐᓴᕐᓴᐅᔪᑦ.
• - ᑕᑯᑦᓴᐅᔮᖅᑐᖅ ᑳᓐᔅᑕᐳᓪ ᑭᐅᓕᖕ ᓯᖅᑯᑐᖅᑎᓪᓗᒍ A.B.-ᒥ ᕿᓚᒥᕈᓗᒃ; ᑕᑯᑦᓴᐅᔮᖅᑐᖅ ᑕᐃᒪᐃᓕᐅᖅᑐᓂ, ᑳᓐᔅᑕᐳᓪ ᑭᐅᓕᖕ A.B.-ᒥᑦ ᓴᖑᑎᑦᓯᒐᓱᑦᑑᔮᖅᑎᓪᓗᒍ ᐊᒡᒐᖏᓐᓄᑦ ᐊᔭᑉᐸᖁᓪᓗᓂᐅᒃ (ᓱᓕ ᐊᖁᕕᖓᔪᖅ ᐊᒡᒐᖏᒃ ᐊᒻᒪ ᓯᖅᑯᖏᒃ ᓄᓇᒦᑦᑐᑎᒃ).
• - A.B. ᓵᑦᑐᓂ ᑕᓕᖅᐱᒻᒥᓄᑦ ᐊᒻᒪ ᑳᓐᔅᑕᐳᓪ ᑭᐅᓕᖕ ᓴᖑᓪᓗᓂᓗ, ᖄᐸᓗᐊᓃᑦᑐᓂ A.B. ᐊᒡᒐᖏᒃ A.B. ᓴᓂᕋᖓᓃᑦᑎᓪᓗᒋᒃ.
• - ᑕᒪᓐᓇ ᐊᔾᔨᓕᐅᖅᑕᐅᓯᒪᓂᖓ ᑕᑯᑦᓴᐅᑦᓯᐊᒐᓛᖏᑦᑐᖅ ᑭᓯᐊᓂ ᑕᑯᑦᓴᐅᔮᖅᑐᖅ ᑳᓐᔅᑕᐳᓪ ᑭᐅᓕᖕ ᑎᒍᓯᑎᓪᓗᒍ ᐊᒻᒪ ᑭᕕᑦᓯᓪᓗᓂ A.B. ᑕᓕᖓᓂᑦ ᓴᐅᒥᐊᓂᑦ, ᓴᖑᑎᑕᐅᓗᓂ A.B. ᓇᓚᓕᖅᑐᓂ ᑕᓕᖏᒃ ᑎᒍᒥᐊᖅᑕᐅᓗᑎᒃ ᑳᓐᔅᑕᐳᓪ ᑭᐅᓕᖕᒧᑦ. ᑳᓐᔅᑕᐳᓪ ᓱᓚᑦ ᐅᓪᓚᑦᓯᓪᓗᓂ ᒥᑦᓵᓄᑦ A.B. ᐊᒻᒪ ᑳᓐᔅᑕᐳᓪ ᑭᐅᓕᖕ.
• - ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ ᐊᖁᕕᑦᑐᑎᒃ; ᑕᒪᒃᑮᒃ ᑎᒍᒥᐊᖅᑑᔮᖅᑑᒃ A.B.-ᒥᑦ ᐊᒻᒪ ᐊᐅᓚᑎᑕᐅᑦᑕᐃᓕᒪᔫᔮᖅᑐᖅ. ᐱᔭᕆᐊᑐᓗᐊᖅᑐᖅ ᑕᑯᑦᓯᐊᕆᐊᑦᓴᖅ ᖃᓄᐃᓕᐅᕐᒪᖔᖓᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᒻᒪ A.B.
• - ᑳᓐᔅᑕᐳᓪ ᓯᒥᖦ ᐅᓪᓚᑦᑐᖅ ᒥᑦᓵᓄᑦ A.B., ᑳᓐᔅᑕᐳᓪ ᑭᐅᓕᖕ, ᐊᒻᒪ ᑳᓐᔅᑕᐳᓪ ᓱᓚᑦ.
• - ᐃᓘᓐᓇᑎᒃ ᐱᖓᓱᑦ (3) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᖁᕕᖓᔪᑦ ᐅᕝᕙᓘᓐᓃᑦ ᓯᖅᑯᖓᔪᑦ ᓴᓂᐊᓂ A.B. ᑳᓐᔅᑕᐳᓪ ᓯᑑᕐᔾ ᑐᐊᕕᖅᑐᓂ ᐱᓱᑦᑐᖅ ᐅᐸᑦᑐᓂᒋᑦ ᑲᑎᖕᖓᔪᑦ.
• - ᑳᓐᔅᑕᐳᓪ ᓯᑑᕐᔾ ᐊᔭᑉᐸᑦᑐᖅ ᑐᓄᐊᓄᑦ ᑳᓐᔅᑕᐳᓪ ᑭᐅᓕᖕ, ᐊᖁᕕᖓᔪᒧᑦ ᓴᐅᒥᐊᓂ A.B. ᑳᓐᔅᑕᐳᓪ ᓯᒥᖦ ᐊᖁᕕᖓᔪᖅ, ᓱᓕ ᕿᑎᐊᓃᑦᑐᖅ ᑲᑎᖕᖓᔪᑦ. ᑳᓐᔅᑕᐳᓪ ᓱᓚᑦ ᖃᓂᑦᓴᓛᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᓐᓂᑦ; ᓱᓕ ᐊᖁᕕᖓᔪᖅ ᐅᕝᕙᓘᓐᓃᑦ ᓯᖅᑯᖓᔪᖅ. ᓱᖅᑯᐃᕋᑦᓴᐅᖏᑦᑐᓂᑦ ᓱᓕ ᖃᐃᒐᓛᔪᖃᖅᕙᓗᑦᑐᖅ.
• - ᓵᔨᓐ ᒋᐅᓪ ᓴᖅᑭᖅᑐᖅ ᐊᔾᔨᓕᐅᕈᑎᒧᑦ ᖁᓪᓕᐊᒍᑦ ᓴᐅᒥᐊᒍᑦ ᑎᕿᑦᑯᐊᒍᑦ. ᐊᓯᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓱᓕ ᐹᖃᑎᖃᖅᑐᑦ A.B.-ᒥᑦ.
• - ᑭᓇᑭᐊᖅ (ᓇᓗᓇᐃᖅᑕᐅᓕᓚᐅᖅᑐᖅ ᐊᖑᑎᐅᓂᖓᓄᑦ ᐊᔾᔨᓕᐅᕆᓚᐅᖅᑐᖅ ᖃᓄᐃᒍᑎᐅᔪᒥᑦ) ᖃᐃᒐᓚᑦᑐᖅ, "ᕙᒃ ᒐᐅᔅ [ᐅᖃᐅᓯᖅ]."
• - ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓱᓕ ᑕᐃᒪᐃᓕᖓᑦᓴᐃᓇᖅᑐᑦ, ᐹᖃᑎᖃᖅᑑᔮᖅᑐᑎᒃ A.B.-ᒥᑦ, ᑭᓯᐊᓂ ᓱᓖᓛᒃ ᑕᑯᑦᓴᐅᓯᐊᖏᑦᑐᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᖃᓄᐃᓕᐅᓪᓚᑦᑖᕐᒪᖔᑕ, ᐊᓯᖏᑦ ᓵᔨᓐ ᒋᐅᓪ, ᑖᓐᓇᓕ ᓇᖏᖅᑑᔮᖅᑐᖅ ᐊᒻᒪ ᑕᑯᓐᓇᖅᑐᓂ ᐊᓯᖏᑦ ᑎᓴᒪᑦ (4) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᖁᕕᖓᑎᓪᓗᒋᑦ ᖃᓂᑦᓴᓂᕐᓴᐅᓗᑎᒃ ᓄᓇᒥᒃ.
• - ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓇᖏᕐᓯᔪᐃᓐᓇᐅᔪᑦ; A.B. ᓱᓕ ᓄᓇᒦᑎᓪᓗᒍ, ᑭᑭᒐᐅᑏᓐᓂᒃ ᐊᑐᓕᖅᑐᓂ, ᐊᒻᒪ ᐊᐅᓚᓪᓗᓂ ᓄᓇᒥ.
• - ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ ᑭᕕᑦᓯᔫᒃ A.B.-ᒥᑦ ᓇᖏᕐᓯᑎᑕᐅᓗᓂ, ᐊᓯᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓇᖏᖅᑐᑦ ᐊᕝᕕᐊᖅᑐᑦ ᑕᑯᑦᓴᐅᔪᓐᓃᖅᑐᑎᒃ ᑕᑯᓐᓇᖅᑕᑦ. ᑕᑯᑦᓴᐅᖏᑦᑐᖅ ᖃᓄᖅ A.B. ᓇᖏᖅᓯᑎᑕᐅᓐᓂᕐᒪᖔᖅ.

ᒍᓯᓂᖅ – A.B. ᐸᓖᓯᒃᑯᑦ ᓄᓇᒃᑰᔫᖓᓐᓅᖅᑕᐅᑎᓪᓗᒍ

[131] ᑎᑎᕋᕐᓯᒪᔭᖏᓐᓂ ᐅᖃᐅᑎᑦᓴᖏᓐᓂᑦ, ᑳᓐᔅᑕᐳᓪ ᑭᐅᓕᖕ ᐃᖅᑲᐅᒪᓂᕋᖅᑐᖅ A.B. ᐃᖕᒥᓂᒃ ᐃᑭᒍᒪᓐᓂᖏᒻᒪᑦ ᐸᓖᓯᒃᑯᑦᓄᓇᒃᑰᔫᖓᓐᓄᑦ. ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ ᑎᒍᒥᐊᖅᑑᑦ A.B. ᑕᓕᖏᓐᓂᒃ ᑭᓯᐊᓂ A.B. "ᐃᓯᒐᖏᓐᓂᒃ ᒪᑑᑉ ᐹᖓᓃᑎᑦᓯᓚᐅᖅᑐᖅ ᐃᓗᒻᒧᑦ ᐊᔭᑦᑕᐅᑦᑕᐃᓕᒪᓪᓗᓂ." ᐃᑭᒪᕕᐅᑉ ᒪᑐᐊᓂᑦ ᐅᖓᑖᓂ, ᑳᓐᔅᑕᐳᓪ ᓯᒥᖦ ᓄᓱᑦᓯᒐᓱᓚᐅᖅᑐᖅ A.B.-ᒥᑦ ᓄᓇᒃᑰᔫᒧᑦ ᓴᐃᑲᖓ ᑎᒍᒥᐊᖅᑐᓂᐅᒃ, ᑭᓯᐊᓂ A.B. ᑐᒃᑲᑐᐃᓐᓇᓚᐅᖅᑐᖅ ᐃᓯᒐᒻᒥᓄᑦ ᒪᑐᒥᑦ ᐊᑦᓱᑲᓪᓚᒃ ᒪᑐᑎᑦᑕᐃᓕᒪᓪᓗᓂᐅᒃ. ᑳᓐᔅᑕᐳᓪ ᑭᐅᓕᖕ ᐊᒻᒪ ᓵᔨᓐ ᒋᐅᓪ ᐊᔭᑦᓯᔫᒃ ᒪᑐᒥᑦ ᑭᓯᐊᓂ A.B. ᐊᔭᑦᓯᕙᒻᒥᔪᑦᑕᐅᖅ. ᑳᓐᔅᑕᐳᓪ ᑭᐅᓕᖕ ᒪᑐᐃᓕᓚᐅᖅᑕᖓ ᒪᑐ ᐊᒻᒪ ᑭᕕᑦᑐᓂᒋᒃ A.B. ᐃᓯᒐᖏᒃ ᖁᒻᒧᑦ, ᓵᔨᓐ ᒋᐅᓪ ᒪᑐᓪᓗᓂᐅᒃ ᓈᒻᒪᓈᓕᕐᒪᑦ.

[132] ᐃᖅᑲᐅᒪᔭᐅᔪᑦ ᐊᓯᖏᓐᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ, ᒪᓕᑦᑐᒋᑦ ᑎᑎᕋᖅᑕᐅᓯᒪᔪᑦ ᐅᓂᒃᑳᓕᐊᖏᓐᓂ, ᐊᔾᔨᒌᑦᑐᐃᓐᓇᐃᑦ ᐅᓂᒃᑳᖏᓐᓂᑦ ᑳᓐᔅᑕᐳᓪ ᑭᐅᓕᖕ. ᑳᓐᔅᑕᐳᓪ ᓱᓚᑦ ᖃᐅᔨᒪᖁᔨᓚᐅᖅᑐᖅ A.B. ᕿᒫᕙᓪᓕᐊᓂᖓᓂᑦ ᐊᒻᒪ ᑐᒃᑲᖅᑐᓂ ᐸᓖᓯᓄᑦ ᓄᓇᒃᑰᔫᒨᕈᔾᔭᐅᕙᓪᓕᐊᑎᓪᓗᒍ. ᑳᓐᔅᑕᐳᓪ ᓯᑑᕐᔾ ᑎᑎᕋᕐᓯᒪᓚᐅᕐᒥᔪᖅ ᑲᑎᖕᖓᔪᓂᑦ ᒪᒃᑯᑦᑐᓂᑦ ᐅᐸᑦᑐᖃᓚᐅᕐᒥᒋᐊᖓ ᑎᒍᓯᕙᓪᓕᐊᑎᓪᓗᒋᑦ. ᐃᓕᑕᕆᓚᐅᖅᑕᖓ ᐃᓚᖓᑦ ᒪᒃᑯᑦᑐᐃᑦ ᐊᖑᑎᐅᓗᓂ, ᓯᕗᓪᓕᕐᒥ ᖃᓄᐃᒍᑎᐅᔪᒥ, ᑎᓪᓗᑦᓯᕙᖅᑲᐅᓂᖓᓂᑦ ᑳᓐᔅᑕᐳᓪ ᓱᓚᑦᒥᑦ ᑐᓄᐊᒍᑦ ᐊᒻᒪ ᐅᕆᐊᕐᕕᒋᓪᓗᓂᐅᒃ, ᐊᒻᒪ ᒥᓗᕆᐊᖑᐊᖅᑐᒥᓂᐅᓗᓂ ᕿᔪᒻᒥᒃ ᑳᓐᔅᑕᐳᓪ ᓯᑑᕐᔾᒥᑦ. ᑎᒍᔭᐅᕕᖓᓂ A.B., ᑳᓐᔅᑕᐳᓪ ᓯᑑᕐᔾ ᖃᐃᒐᓪᓛᔪᖅ ᒪᒃᑯᑦᑐᒧᑦ ᐊᒻᒪ ᐊᓯᖏᓐᓂᑦ ᕿᒪᐃᖁᓪᓗᒋᑦ, ᑭᓯᐊᓂ ᓈᓚᖏᑦᑐᑦ ᐊᒻᒪ ᖃᓂᑦᓴᑐᒻᒪᕆᐅᓚᐅᖅᑐᑦ A.B. ᑎᒍᔭᐅᕕᖓᓂᑦ.

[133] ᖃᐅᔨᓴᖅᑎᓄᑦ ᕿᒥᕐᕈᐊᖅᑕᐅᓚᐅᖅᑐᖅ ᐊᐅᓚᔪᖅ ᐊᔾᔨᓕᐅᖅᑕᐅᓯᒪᔪᖅ ᖃᓄᐃᒍᑎᐅᔪᖅ ᐊᑐᖅᑕᐅᑎᓪᓗᒍ ᐊᒻᒪ ᑕᑯᓐᓇᖅᑕᐅᓚᐅᖅᑐᑦ ᐅᑯᐊ:

• - ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓱᓚᑦ, ᐊᒻᒪ ᑳᓐᔅᑕᐳᓪ ᓯᒥᖦ ᑎᒍᒥᐊᖅᑐᑦ A.B.-ᒥᑦ ᐊᒻᒪ ᐱᓱᖃᑕᐅᓗᓂ ᒪᑐᐃᖓᔪᒧᑦ ᐊᖁᑎᐅᑉ ᒪᑐᖃᕐᕕᐊᑕ ᐅᖓᑖᓄᑦ ᓄᓇᒃᑰᔫᑉ ᒪᑐᐊᓄᑦ; A.B. ᒪᑭᑕᒍᓐᓇᑦᓯᐊᖅᑑᔮᖏᑦᑐᖅ ᓇᖏᖅᑐᓂ.
• - ᐃᓘᓐᓇᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑕᑯᓐᓇᖅᑐᑦ ᑕᓕᖅᐱᐊᓄᑦ ᑕᑯᓐᓇᕐᕕᐅᑉ ᐊᒻᒪ ᓵᔨᓐ ᒋᐅᓪ ᑎᒃᑯᐊᑐᖅᑐᓂ ᖃᐃᒐᓪᓚᑦᑐᖅ, "ᕿᒫᒋᑦ!"
• - ᑳᓐᔅᑕᐳᓪ ᓯᒥᖦ ᓯᕗᓪᓕᕐᒥ ᒪᑐᐃᕐᓯᔪᖅ ᓄᓇᒃᑰᔫᑉ ᒪᑐᐊᓂᑦ ᐊᒻᒪ ᑳᓐᔅᑕᐳᓪ ᓱᓚᑦ ᐊᔭᑦᑐᓂᐅᒃ ᒪᑐᐃᖅᑕᖓ ᓴᓂᐊᓅᕐᒪᑦ. ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓱᓚᑦ, ᐊᒻᒪ ᑳᓐᔅᑕᐳᓪ ᑭᐅᓕᖕ A.B.-ᒥᑦ ᐃᓗᐊᓅᑎᑦᓯᓇᓱᐊᖅᑐᑦ ᓄᓇᒃᑰᔫᑉ, ᑭᓯᐊᓂ A.B. ᖁᓄᔫᔮᖅᑕᖏᑦ ᐊᒻᒪ ᕿᒪᐃᓇᓱᐊᖅᑐᓂ ᓄᓇᒃᑰᔫᒥᑦ.
• - ᒪᕐᕉᓐᓂᒃ (2) ᓱᕈᓰᓐᓂᒃ ᓴᖅᑭᖅᑐᖃᖅᑐᖅ, ᖃᓂᒋᔭᕈᓗᖏᓐᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᒻᒪ ᓄᓇᒃᑰᔫᑉ. ᑳᓐᔅᑕᐳᓪ ᓯᑑᕐᔾ ᐊᒻᒪ ᓵᔨᓐ ᒋᐅᓪ ᖃᐃᒐᓪᓛᔫᒃ ᓱᕈᓯᕐᓄᑦ, "ᑕᒫᓃᖏᓚᐅᕆᑦᓯ!"; ᓱᕈᓰᑦ ᓇᖏᑐᐃᓐᓇᖅᑐᑦ ᓅᓚᐅᕋᑎᒃ ᐊᒻᒪ ᑕᑯᓐᓇᑐᐃᓐᓇᖅᑐᑎᒃ ᖃᓄᐃᓕᐅᖅᑐᖃᕐᒪᖔᖅ.
• - ᐊᖅᑯᓵᖅᑐᒥᑦ ᖃᐃᒐᓪᓛᔪᖃᖅᑐᖅ. ᑳᓐᔅᑕᐳᓪ ᓯᑑᕐᔾ ᓇᖏᖅᑐᖅ ᓴᓂᐊᓂ ᓯᕗᕌᑕ ᓄᓇᒃᑰᔫᑉ ᒪᑐᐊᑕ. ᐃᓘᓐᓇᑎᒃ ᐊᓯᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᑎᖕᖓᔪᑦ ᑭᖑᓪᓕᐅᑉ ᒪᑐᐊᑕ ᓄᓇᒃᑰᔫᑉ; ᓱᓕ A.B.-ᒥᑦ ᓄᓇᒃᑰᔫᒧᑦ ᐃᑭᑎᑦᓯᒐᓱᐊᖅᑐᑦ. ᑳᓐᔅᑕᐳᓪ ᓯᑑᕐᔾ ᓇᖏᑦᑐᖅ ᓴᓂᐊᓂ ᓄᓇᒃᑰᔫᑉ ᒪᑐᐊᑕ ᑭᖑᓪᓕᐅᑉ, ᓵᔨᓐ ᒋᐅᓪ ᓇᖏᖅᑐᖅ ᐅᖓᑖᓂ ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓯᒥᖦ, ᑖᒃᑯᐊᓕ ᐹᖓᓃᑦᑑᒃ ᓄᓇᒃᑰᔫᑉ ᒪᑐᐊᑕ ᑭᖑᓪᓕᐅᑉ (ᒪᑐᐃᖓᔪᖅ).
• - ᑳᓐᔅᑕᐳᓪ ᓯᒥᖦ ᐅᓪᓚᑦᓯᔪᖅ ᓄᓇᒃᑰᔫᑉ ᒪᑐᐊᑕ ᐊᐃᑉᐸᖓᓄᑦ. ᐊᖅᑯᓵᖅᑐᖅ ᓱᓕ ᖃᐃᒐᓪᓛᕙᓗᑦᑐᖅ. ᑳᓐᔅᑕᐳᓪ ᑭᐅᓕᖕ ᐹᖃᑎᓕᒃ A.B.-ᒥᑦ, ᑖᓐᓇᓕ ᐊᓂᒐᓱᑦᑑᔮᖅᑐᖅ ᓄᓇᒃᑰᔫᒥᑦ.
• - ᑳᓐᔅᑕᐳᓪ ᓱᓚᑦ ᖃᓪᓕᒋᐊᖅᑐᖅ ᓄᓇᒃᑰᔫᑉ ᒪᑐᐊᓄᑦ ᐊᒻᒪ ᐃᑲᔪᕋᓱᑦᑑᔮᖅᑐᓂ ᑳᓐᔅᑕᐳᓪ ᑭᐅᓕᖕᒥᑦ A.B.-ᒥᑦ ᓂᐅᑎᑦᓯᑦᑕᐃᓕᒪᓪᓗᑎᒃ ᓄᓇᒃᑰᔫᒥᑦ.
• - ᑳᓐᔅᑕᐳᓪ ᓯᒥᖦ ᐃᓗᐊᓅᕆᐊᖅᑐᖅ ᓄᓇᒃᑰᔫᑉ (ᑕᓕᖅᐱᐊᒍᑦ); ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ ᓱᓕ ᓄᓇᒃᑰᔫᑉ ᓴᐅᒥᐊᓃᑦᑑᒃ A.B.-ᒥᑦ ᐃᓗᐊᓅᖅᑎᑦᓯᓇᓱᐊᖅᑐᑎᒃ ᓄᓇᒃᑰᔫᑉ ᑳᓐᔅᑕᐳᓪ ᓯᑑᕐᔾ ᐊᒻᒪ ᓵᔨᓐ ᒋᐅᓪ ᓇᖏᖅᑎᓪᓗᒋᒃ ᐅᖓᑖᓂ ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓱᓚᑦ.
• - ᑳᓐᔅᑕᐳᓪ ᓱᓚᑦ ᒪᑐᓯᒋᐊᖅᑐᖅ ᒪᑐᒥᑦ ᑭᓯᐊᓂ ᒪᑐᒌᕋᓂ ᓄᖅᑲᖅᑐᖅ; ᐊᕝᕕᐊᖅᑑᔮᖅᑑᒃ A.B. ᓂᐅᖏᓐᓄᑦ ᐃᓯᒐᖏᓐᓄᓘᓐᓃᑦ.
• - ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᑉ ᐃᓗᐊᓄᑦ ᑕᑯᓐᓇᖅᑐᖅ ᓵᔨᓐ ᒋᐅᓪ ᒪᑐᐃᖓᑎᑦᓯᑎᓪᓗᒍ ᒪᑐᒥᑦ.
• - ᑳᓐᔅᑕᐳᓪ ᑭᐅᓕᖕ ᕿᒪᐃᔪᖅ ᒪᑐᒥᑦ, ᐃᓚᒋᔭᐅᔪᒥᑦ ᐅᖃᖅᑐᖃᖅᐸᓗᑦᑐᓂ, "ᐊᑎ, ᐊᑎ, ᐊᑎ" ᐊᒻᒪ ᓵᔨᓐ ᒋᐅᓪ ᐊᒻᒪ ᑳᓐᔅᑕᐳᓪ ᑭᐅᓕᖕ ᐊᔭᐅᖅᑎᓪᓗᒋᒃ ᒪᑐᒥᑦ; ᒪᑐᓯᒪᑲᓴᑦᓯᐊᖅᑐᖅ, ᑭᓯᐊᓂ ᓱᓇᒧᒃᑭᐊᖅ ᒪᑐᒍᓐᓇᖏᑦᑐᖅ.
• - ᑳᓐᔅᑕᐳᓪ ᑭᐅᓕᖕ ᒪᑐᐃᕐᓯᔪᖅ ᒪᑐᒥᑦ ᐊᒻᒪ ᒪᑐᒥ ᓇᖏᓕᖅᑐᓂ. ᑳᓐᔅᑕᐳᓪ ᑭᐅᓕᖕ ᐹᖃᑎᖃᖅᑑᔮᖅᑐᖅ A.B.-ᒥᑦ. ᑳᓐᔅᑕᐳᓪ ᓯᒥᖦ ᐃᓱᓯᔪᖅ ᐅᖓᑖᓄᑦ ᓄᓇᒃᑰᔫᑉ.
• - ᑳᓐᔅᑕᐳᓪ ᓱᓚᑦ ᒪᑐᐃᖅᑕᖓ ᑭᖑᓪᓕᖅ ᒪᑐ ᓄᓇᒃᑰᔫᖓᑕ ᐃᓪᓗᐊᒍᑦ.
• - ᓵᔨᓐ ᒋᐅᓪ ᓴᐅᒥᐊᓂᑦ ᒪᑐᒥᑦ ᒪᑐᐃᖓᑎᑦᓯᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓄᓇᒃᑰᔫᒥᑦ, ᒪᑐᓂᐊᖅᑐᓂᐅᒃ ᐊᑐᐃᓐᓇᐅᓕᖅᐸᑦ. ᑳᓐᔅᑕᐳᓪ ᑭᐅᓕᖕ ᐊᑦᑐᐊᔪᖅ ᒪᑐᐃᖓᔪᒥᑦ ᒪᑐᒥᑦ ᐊᒻᒪ ᐹᖃᑎᖃᖅᑐᓂ A.B.-ᒥᑦ. ᐹᖃᑕᐅᔪᖅ A.B. ᐸᓖᓯᒃᑯᑦ ᓄᓇᒃᑰᔫᑉ ᐅᖓᑖᓂᑦ ᓂᐅᑎᑕᐅᑦᑕᐃᓕᒪᓪᓗᓂ ᐊᑯᓂᐅᑎᒋᔪᒥᑦ 30 ᓴᑲᓐᔅ.
• - ᑳᓐᔅᑕᐳᓪ ᓱᓚᑦ ᐃᓗᒻᒨᖓᔫᔮᖅᑐᖅ ᓄᓇᒃᑰᔫᒧᑦ ᑳᓐᔅᑕᐳᓪ ᓯᒥᖦ ᓴᓂᐊᓂ ᓇᖏᖅᑎᓪᓗᒍ.
• - ᑳᓐᔅᑕᐳᓪ ᑭᐅᓕᖕ ᒪᑐᓯᑦᓯᐊᖅᑐᖅ ᐅᖓᑖᓃᑦᑐᒥᑦ ᒪᑐᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓄᓇᒃᑰᔪᖓᑕ.

ᖃᐅᔨᓴᕐᓂᖅ ᖃᓄᑎᒋ ᐊᑦᓱᕈᓚᐅᕐᒪᖔᑕ A.B. ᑎᒍᔭᐅᓇᓱᐊᖅᑎᓪᓗᒍ

[134] ᐱᓕᕆᐊᖃᖅᑎᓪᓗᒋᑦ ᐱᓕᕆᐊᒥᓂᒃ, ᐸᓖᓰᑦ ᐊᑦᓱᕈᕈᓐᓇᖅᑐᑦ. ᑭᓯᐊᓂᓕ, ᑎᑎᕋᕐᓯᒪᕕᒻᒦᑦᑐᑦ 25(1) ᐱᕋᔭᐅᑎᓄᑦ ᐊᑐᐊᒐᕐᒥ ᐱᑐᐃᓐᓇᐅᖏᑎᑦᓯᔾᔪᑎᐅᔪᑦ ᐱᔪᓐᓇᐅᑎᒍᑦ ᐊᑐᕐᓂᒃᑯᑦ ᐊᑦᓱᕈᓐᓂᕐᒥᑦ ᐅᑯᐊ ᒪᓕᑦᑐᒋᑦ:

ᑭᓇᑐᐃᓐᓇᖅ ᐊᑐᕆᐊᓕᒃ ᐅᕝᕙᓘᓐᓃᑦ ᐱᔪᓐᓇᐅᑎᖃᖅᑎᑕᐅᔪᑦ ᒪᓕᒐᑎᒍᑦ ᖃᓄᐃᓕᐅᕈᓐᓇᓂᕐᒥᑦ ᐱᓕᕆᐊᖃᖅᑎᓪᓗᒋᑦ ᐅᕝᕙᓘᓐᓃᑦ ᐊᑐᖅᑎᑦᓯᓇᓱᐊᖅᑎᓪᓗᒋᑦ ᒪᓕᒐᕐᓂᑦ . . . (ᐱ) ᓴᐃᓕᖓᑎᑦᓯᓂᕐᒥᑦ ᑲᒪᔨᑎᑐᑦ ᐅᕝᕙᓘᓐᓃᑦ ᑭᒃᑯᑐᐃᓐᓇᕐᓂᑦ ᑲᒪᔨᑎᑐᑦ . . . ᐃᒪᐃᑦᑐᖅ, ᐱᓕᕆᐊᖃᕐᓂᕈᓂ ᓈᒻᒪᑐᒃᑯᑦ, ᖃᓄᐃᒋᔭᐅᖏᑦᑐᑦ ᖃᓄᐃᓕᐅᕈᑎᖏᓐᓂᑦ ᐊᑐᕆᐊᖃᕈᓂᒋᑦ ᐅᕝᕙᓘᓐᓃᑦ ᐱᔪᓐᓇᐅᑎᖃᕈᑎᒃ ᐊᑦᓱᕈᕈᓐᓇᓂᕐᒥᑦ ᐊᒻᒪ ᐊᑐᕈᓐᓇᓂᕐᒥᑦ ᖃᓄᑎᒋ ᐊᑦᓱᕉᑎᐅᔪᓐᓇᖅᑐᓂᑦ ᐱᔾᔪᑎᐅᔪᖅ ᐃᓱᒪᒋᓪᓗᒍ.

[135] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᕐᓄᑦ ᐊᒻᒪ ᐱᓕᒻᒪᑦᓴᐃᑎᓄᑦ ᐃᑲᔫᑎᖏᑦ ᑎᑎᕋᕐᓯᒪᕕᒻᒦᑦᑐᑦ 25 ᐱᕋᔭᐅᑎᓄᑦ ᐊᑐᐊᒐᕐᒥ ᓇᓗᓇᐃᔭᐃᓯᒪᓪᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᕆᐊᖃᖅᐸᑦᑕᖏᓐᓂᑦ ᐱᔾᔪᑎᒋᓪᓗᒋᑦ ᖃᓄᑎᒋ ᐊᑦᓱᕈᖅᐸᓐᓂᖏᑦ ᐱᓕᕆᐊᖃᖅᑎᓪᓗᒋᑦ ᑭᒃᑯᑐᐃᓐᓇᕐᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᕐᓄᑦ ᐊᒻᒪ ᐱᓕᒻᒪᑦᓴᐃᑎᓄᑦ ᐊᔾᔨᐊᖅᑐᑦ ᐊᑐᖅᑕᐅᒋᐊᓕᓐᓂᑦ ᐊᑐᖅᑕᐅᓂᖏᑦ ᖃᓄᑎᒋ ᐊᑦᓱᕈᖅᑐᑎᒃ ᐱᓕᕆᐊᖃᖅᑎᓪᓗᒋᑦ ᖃᖓᑐᐃᓐᓇᒃᑯᑦ ᓈᒻᒪᒋᐊᖃᖅᐸᑦᑐᑦ ᖃᓄᐃᓕᐅᕈᑎᐅᔪᖅ ᐃᓱᒪᒋᓪᓗᒍ. ᐱᓕᕆᔾᔪᑎᐅᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᒍᑎᐅᔪᓂᑦ ᐊᐅᓚᑦᑎᔾᔪᑏᑦ/ᐊᑐᑦᑕᐃᓕᒪᐅᑎᑦᓴᑦ ᐆᑦᑑᑎ (IM/MI)^{Footnote 16} ᐊᑐᖅᑕᐅᕙᑦᑐᑦ ᐱᓕᒻᒪᑦᓴᐅᑎᐅᓗᑎᒃ ᐊᒻᒪ ᐊᔪᕆᕐᓱᐃᔾᔪᑎᐅᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓂᑦ ᒪᓕᑦᑐᒋᑦ ᖃᓄᐃᓕᖓᒍᑎᐅᔪᑦ ᓇᓗᓇᐃᔭᐃᑎᑦᓴᓂᑦ ᐊᑦᓱᕈᕐᓗᑎᒃ ᐱᓕᕆᒋᐊᖃᕐᒪᖔᕐᒥᒃ, ᐊᒻᒪ ᖃᓄᑦᑐᒥᑦ ᐊᒻᒪ ᖃᓄᑎᒋ ᐊᑦᓱᕈᕈᓐᓇᕐᒪᖔᕐᒥᒃ ᐃᓱᒪᒋᓪᓗᒋᑦ ᖃᓄᐃᒍᑎᐅᔪᑦ ᐊᑐᖅᑕᐅᔪᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᓴᖁᔭᐅᕙᑦᑐᑦ ᖃᓄᑎᒋ ᐅᓗᕆᐊᓇᕈᓐᓇᕐᒪᖔᖅ ᐱᓕᕆᔾᔪᑎᐅᔪᖅ, ᓇᓗᓇᐃᔭᓕᕐᓗᑎᒃ ᖃᓄᖅ ᓈᒻᒪᓂᐊᕐᒪᖔᖅ ᐱᓕᕆᔾᔪᑎᖃᕐᓗᓂ, ᐱᖃᓯᐅᔾᔭᐅᔪᓐᓇᖅᑐᑎᒃ ᐊᑐᕐᓂᐅᔪᖅ ᐊᑦᓱᕈᓐᓂᕐᒥᑦ ᖃᓄᑎᒋ ᐱᓕᕆᐊᖃᖅᑐᓂ. ᐊᐅᓚᑦᑎᔾᔪᑏᑦ/ᐊᑐᑦᑕᐃᓕᒪᐅᑎᑦᓴᑦ ᐆᑦᑑᑎ (IM/MI) ᐱᑕᖃᖅᑐᖅ ᖃᓄᐃᒍᑎᐅᔪᓂᑦ ᑭᖑᓕᕇᖑᑎᓪᓗᒋᑦ ᑭᓇᑐᐃᓐᓇᐅᑉ ᐱᐅᓯᖏᒍᑦ ᐊᒻᒪ ᐸᓖᓯᒃᑯᑦ ᖃᓄᖅ ᑭᐅᔾᔪᑎᒋᓂᐊᖅᑕᖏᓐᓂᑦ ᐃᓱᒪᑦᓴᕐᓯᐅᕈᑎᖃᖅᑎᓪᓗᒋᑦ ᐃᓘᓐᓇᖏᓐᓂᑦ ᖃᓄᐃᓕᖓᒍᑎᐅᔪᓂᑦ.

[136] ᐱᔾᔪᑎᐅᔪᑦ ᓇᓗᓇᐃᔭᖅᑕᐅᔪᑦ ᖁᓪᓕᕐᓂ, ᖃᐅᔨᓴᖅᑏᑦ ᐃᓱᒪᓕᖅᑐᑦ ᓈᒻᒪᓚᐅᕐᓂᖓᓂᑦ ᑳᓐᔅᑕᐳᓪ ᑭᐅᓕᖕ ᑎᒍᓯᑎᓪᓗᒍ A.B.-ᒥᑦ, ᐊᒻᒪ ᕿᓚᒥᐅᔫᒥᔪᖅ ᑎᒍᒋᐊᖃᕐᓂᖅᑐᓂᐅᒃ, ᐱᔾᔪᑎᒋᓪᓗᒋᑦ ᖃᓄᐃᓕᖓᒍᑎᐅᔪᑦ. ᓇᓗᓇᐃᖅᑕᐅᓯᒪᖏᑦᑐᖅ ᓱᓕ ᐊᖑᑎᐅᔪᖅ ᐊᐱᖅᑯᑎᐅᔪᖅ ᑕᕝᕙᓂ, ᐊᒻᒪ ᐊᒥᓱᑲᓪᓚᐃᑦ ᐊᖑᑏᑦ ᐅᖄᓚᔾᔪᑎᐅᕋᑖᑦᑎᐊᖅᑐᑦ, ᐱᖃᓯᐅᔾᔭᐅᓗᓂ ᐅᓗᕆᐊᓇᖅᑐᒻᒪᕆᒻᒥᑦ ᖁᑭᐅᓯᔭᕐᓂᕋᐃᔪᒥᑦ ᐅᖄᓚᓯᒪᔪᖅ, ᓱᓕ ᖃᐅᔨᒪᔭᐅᓚᐅᖏᑦᑐᑦ ᖃᓄᐃᒻᒪᖔᑕ. ᑲᑎᑦᑐᒋᑦ A.B. ᑕᑯᑦᓴᐅᓂᖓ ᐋᖓᔮᕐᓂᖓ ᐊᒻᒪ ᐃᓕᕋᓇᕐᓵᕐᓂᖓ ᐱᐅᓯᒃᑯᑦ, ᑎᒍᔭᐅᑦᑕᐅᑎᒋᒍᓂ ᑭᓯᐊᓂᐅᓚᐅᖅᑐᖅ ᐃᓚᒋᔭᐅᓪᓗᑎᒃ ᐊᒥᓱᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓈᒻᒪᓚᐅᖅᑐᖅ ᐃᓱᒪᒋᓪᓗᒋᑦ ᖃᓄᐃᓕᖓᒍᑎᐅᔪᑦ.

[137] ᒪᕐᕉᓐᓂᒃ (2) ᑕᑯᓐᓇᖅᑐᒥᓃᓐᓂᒃ ᐅᖃᖅᑐᖃᓚᐅᖅᑐᖅ ᐸᓖᓯᒃᑯᑦ ᐊᑦᓱᕈᓗᐊᕆᐊᖃᕐᓂᖏᒃᑲᓗᐊᕐᒪᑕ ᑲᒪᓪᓗᑎᒃ A.B.-ᒥᑦ ᑎᒍᔭᐅᕙᓪᓕᐊᑎᓪᓗᒍ. ᐊᑕᐅᓯᖅ (1) ᑕᑯᓐᓇᓚᐅᖅᑐᖅ (ᐊᖑᑎᐅᔪᖅ ᐊᐅᓚᔪᒥᑦ ᐊᔾᔨᓕᐅᕆᓚᐅᖅᑐᖅ) ᐅᖃᓚᐅᖅᑐᖅ A.B. ᖁᓄᓚᐅᖏᒻᒪᑦ, ᑎᒍᔭᐅᕙᓪᓕᐊᓕᖅᑎᓪᓗᒍ, ᐊᒻᒪ ᓄᑭᖃᓗᐊᓚᐅᖏᒻᒪᑦ ᖁᓄᓗᐊᕆᐊᑦᓴᖅ. A.B. ᐅᖃᓚᐅᖅᑐᖅ ᐸᓖᓯᓄᑦ ᕿᒥᑕᐅᓐᓂᕐᒪᑦ.

[138] A.B. ᓄᓇᒦᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑭᑮᖓᐅᑎᓂᒃ ᐋᑎᓯᑎᑦᓯᒐᓱᑦᑎᓪᓗᒋᑦ. ᐊᐅᓚᔫᒥ ᐊᔾᔨᓕᐅᕐᓯᒪᔪᒥ ᖃᓄᐃᒍᑎᐅᔪᒥᑦ, ᑕᐃᒪᖕᖓᓕᒫᖅ A.B. ᓄᓇᒦᑦᑐᖅ ᐅᕐᕈᑎᑕᐅᓯᒪᓪᓗᓂ, ᑕᑯᑦᓴᐅᓂᖓ A.B. ᐊᕝᕕᐊᖅᑕᐅᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᖁᐱᔪᓄᑦ ᐅᕝᕙᓘᓐᓃᑦ ᓇᖏᖅᑐᓄᑦ ᖃᓂᒋᔮᓂ. ᑐᑭᓯᓇᑦᑎᐊᖅᑐᖅ ᑕᑯᓐᓇᖅᑐᒥᓂᖅ ᑕᑯᓐᓇᖅᑐᓂᐅᒃ ᖃᓄᐃᒍᑎᐅᔪᖅ ᐅᖓᓯᑦᑐᒥᑦ "ᐊᑐᖅᑕᐅᑎᓪᓗᒍ" ᐃᓱᒪᓇᕋᔭᖅᑐᖅ A.B. ᖁᓄᓚᐅᖏᓐᓂᖓᓂᑦ ᐸᓖᓯᒃᑯᓐᓂᑦ, ᐱᔾᔪᑎᒋᓪᓗᒍ ᐃᓚᐃᓐᓇᖓ ᐱᐅᓯᕆᓚᐅᖅᑕᖓᑕ ᑕᑯᓐᓇᖅᑕᐅᔪᓐᓇᓪᓚᕆᒻᒪᑦ ᐊᐅᓚᔫᒥ ᐊᔾᔨᓕᐅᕐᓯᒪᔪᒥ ᐊᑎᑎᑕᐅᓇᓱᐊᖅᑎᓪᓗᒍ ᑭᑮᖓᐅᑏᓐᓂᒃ ᖃᓄᐃᒍᑎᐅᔪᒥ.

[139] ᑭᓯᐊᓂᓕ, ᓇᓗᓇᖕᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑦᓱᕈᓚᐅᕐᒪᑕ ᐊᐅᓚᑦᑎᓇᓱᐊᖅᑐᑎᒃ A.B.-ᒥᑦ ᐊᒻᒪ ᐊᑎᑎᑕᐅᓇᓱᐊᖅᑐᓂ ᑭᑮᖓᐅᑏᓐᓂᒃ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᖃᐅᓯᕆᓯᒪᔭᖏᑦ ᖃᓄᐃᓕᐅᕈᑎᐅᓚᐅᖅᑐᓂᑦ ᐊᔾᔨᖃᓚᐅᖅᑐᑦ ᖃᓄᐃᓕᐅᕈᑎᐅᔪᓂᑦ ᐊᔾᔨᓕᐅᖅᑕᐅᓚᐅᖅᑐᓂᑦ ᐊᐅᓚᔫᒥ ᐊᔾᔨᓕᐅᕐᓯᒪᔪᒥᑦ. ᐅᓂᒃᑳᖃᓚᐅᖅᑐᑦ A.B. ᓇᖏᕐᓯᒐᓱᐊᖅᐸᓚᐅᕐᒪᑦ (ᑕᑯᑦᓴᐅᔪᑦ ᒪᕐᕈᐊᑎᖅᑐᓂ ᐊᔾᔨᓕᐅᕐᓯᒪᔪᒥ), ᐃᒧᓯᓯᒪᓪᓗᓂ ᐊᒡᒐᖏᓐᓂᒃ, ᐊᒻᒪ ᓄᓱᐊᖅᑐᓂ ᑕᓕᖏᓐᓂᒃ ᐊᒻᒪ ᑎᒥᒥᓄᑦ ᖃᓪᓕᐸᑦᑐᒋᑦ. ᐸᓖᓯᒃᑯᑦ ᐅᖃᓚᐅᖅᑐᑦ A.B. ᒪᓕᓚᐅᖏᓯᐊᖅᑐᖅ ᑎᓕᓯᔾᔪᑎᖏᓐᓂᑦ.

[140] ᐊᐅᓚᔫᒥ ᐊᔾᔨᓕᐅᕐᓯᒪᔪᒥ ᑕᑯᑦᓴᐅᑎᑦᓯᔪᖅ A.B. ᑐᑭᕐᓯᓇᓱᐊᖅᑎᓪᓗᒍ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓂᑦ ᐊᔾᔭᖅᑕᐅᑎᓪᓗᒍ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᓐᓄᑦ, ᐊᒻᒪ ᑕᑯᑦᓴᐅᓗᓂ ᐸᓖᓯᒃᑯᑦ ᐱᔭᖅᑯᖅᑐᓵᓚᐅᖅᑐᑦ ᐃᑭᑎᑕᐅᓇᓱᐊᖅᑎᓪᓗᒍ ᓄᓇᒃᑰᔫᒧᑦ ᐊᒻᒪ ᒪᑐᔭᐅᓇᓱᐊᖅᑐᑎᒃ ᒪᑐᖏᑦ. ᐱᔾᔪᑎᒋᓪᓗᒍ A.B. ᑕᑯᑦᓴᐅᓂᖓ ᐱᒋᐊᕐᓯᒐᓱᑉᐸᑎᓪᓗᒍ ᐊᒻᒪ ᖁᓄᑎᓪᓗᒍ ᓄᓇᒃᑰᔫᒧᑦ ᐃᑭᑎᑕᐅᓇᓱᐊᖅᑎᓪᓗᒍ ᓴᖅᑮᔪᑦ ᓱᓕᓂᖏᓐᓂᑦ ᐸᓖᓯᒃᑯᑦ ᐃᖅᑲᐅᒪᔭᖏᑦ ᖁᓄᓚᐅᕐᓂᖓᓂᑦᑕᐅᖅ ᒪᑭᓚᐅᖅᑎᓐᓇᒍ.   

[141] ᖃᓄᐃᒍᑎᐅᔪᓂᑦ ᐊᐅᓚᑦᑎᔾᔪᑏᑦ/ᐊᑐᑦᑕᐃᓕᒪᐅᑎᑦᓴᑦ ᐆᑦᑑᑎ (IM/MI)-ᑯᑦ ᓇᓗᓇᐃᔭᐃᓯᒪᔪᑦ ᐊᔾᔨᒌᖏᑦᑐᓂᑦ ᐱᐅᓯᐅᔪᓂᑦ ᐸᓖᓯᒃᑯᓐᓄᑦ ᓵᖓᔭᐅᑐᐃᓐᓇᕆᐊᖃᖅᐸᑦᑐᓂᑦ:

ᐊᑐᖅᑕᐅᔪᖅ ᖁᓄᓂᖅ

ᐱᓕᕆᔾᔪᑎᐅᔪᖅ ᐊᑐᖅᑐᖅ ᐱᒋᐊᕐᓯᔾᔪᑎᐅᖏᑦᑐᒥᑦ ᑎᒥᒥᒃᑯᑦ ᖃᓄᐃᓕᐅᕈᑎᒥ ᖁᓅᑎᒋᓪᓗᓂᐅᒃ, ᐅᕝᕙᓘᓐᓃᑦ ᖁᓅᑎᒋᓪᓗᒍ ᑲᒪᔨᐅᑉ ᒪᓕᒐᕐᓂᑦ ᐊᑐᖅᑐᓂ ᑎᓕᔭᐅᔾᔪᑎᒋᓯᒪᔭᖓ. ᐆᑦᑑᑎᑦᓴᑦ ᐱᖃᓯᐅᔾᔨᔪᓐᓇᖅᑐᑦ ᕿᒫᒐᓱᓐᓂᖅ ᐊᐅᓚᑕᐅᒍᒪᒐᓂ ᐅᕝᕙᓘᓐᓃᑦ ᕿᒪᐃᔪᒪᓪᓗᓂ ᐊᐅᓚᑕᐅᓂᕐᒥᓂᒃ, ᐅᕝᕙᓘᓐᓃᑦ ᐊᐅᓚᓇᓱᓪᓗᓂ ᓲᕐᓗ ᐱᓱᒋᐊᕐᓂᖅ ᕿᒪᓪᓗᒍ ᑲᒪᔨ. ᕿᒫᓂᖅ ᐆᑦᑑᑎᐅᔪᓐᓇᕐᒥᔪᖅ ᖁᓄᓂᕋᖅᑕᐅᔪᒥᑦ.

ᐱᒋᐊᕐᓂᐅᓴᔪᖅ

ᐱᓕᕆᔾᔪᑎᐅᔪᖅ ᐊᑐᕋᓱᒃᑯᓂ, ᐅᕝᕙᓘᓐᓃᑦ ᐊᑐᕈᓂ ᖃᓄᑎᒋ ᐊᑦᓱᕉᑎᖃᕐᓗᓂ ᑭᓇᑐᐃᓐᓇᕐᒥᑦ; ᖃᓄᑐᐃᓐᓇᖅ ᐅᓗᕆᐊᑦᓵᕆᓇᓱᓪᓗᓂ ᖃᓄᐃᓕᐅᕈᑎᒍᑦ ᐅᕝᕙᓘᓐᓃᑦ ᐆᑦᑑᑎᒍᑦ, ᐊᑐᕋᓱᒃᑯᓂ ᐊᑦᓱᕈᓪᓗᓂ ᐊᓯᒥᓂᒃ, ᐊᖑᑎ/ᐊᕐᓇᖅ ᐊᑐᕐᓂᕈᓂ, ᐅᕝᕙᓘᓐᓃᑦ ᐊᑐᖅᑎᑦᓯᒍᓂ ᐊᓯᒥᓂᒃ ᐃᓱᒪᑎᑦᓯᓗᓂ ᓈᒻᒪᓐᓂᖓᓂᑦ ᖃᓄᐃᓕᐅᕈᓐᓇᕐᓂᕐᒥᓂᒃ ᐱᕙᓪᓕᐅᑎᖁᓪᓗᓂᐅᒃ ᐱᔾᔪᑎᒥᓄᑦ. ᐆᑦᑑᑎᑦᓴᑦ ᐱᖃᓯᐅᔾᔨᔪᓐᓇᖅᑐᑦ ᑐᒃᑲᕐᓂᖅ ᐊᒻᒪ ᑎᓪᓗᑦᓯᕙᓐᓂᖅ, ᑭᓯᐊᓂ ᐱᖃᓯᐅᔾᔭᐅᔪᓐᓇᕐᒥᔪᑦ ᐃᓕᕋᓇᕐᓵᕐᓂᖅ ᑎᒥᒥᓂᒃ ᐊᑐᖅᑐᓂ ᓇᓗᓇᐃᕐᓯᒪᔪᓂᑦ ᐱᒋᐊᕐᓯᓂᐊᕐᓂᕐᒥᓂᒃ.^{Footnote 17}

[142] ᖃᓄᐃᒍᑎᐅᔪᓂᑦ ᐊᐅᓚᑦᑎᔾᔪᑏᑦ/ᐊᑐᑦᑕᐃᓕᒪᐅᑎᑦᓴᑦ ᐆᑦᑑᑎ (IM/MI) ᓇᓗᓇᐃᔭᐃᒻᒥᔪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ:

ᑎᒥᒥᑦ ᐊᐅᓚᑦᑎᓂᖅ

ᐅᑦᑑᑎᐅᔪᖅ ᓇᓗᓇᐃᔭᐃᓯᒪᔪᖅ ᒪᕐᕈᐃᓂᒃ (2) ᐊᔾᔨᒌᖏᑑᓐᓂᒃ ᑎᒥᒥᑦ ᐊᐅᓚᑦᑎᔾᔪᑏᓐᓂᒃ: ᐱᓗᐊᖏᑦᑐᑦ ᐊᒻᒪ ᐊᑦᓱᐊᓘᖅᑐᑦ. ᐱᓪᓗᐊᑕᖃᕋᑎᒃ, ᑎᒥᒥᑦ ᐊᐅᓚᑦᑎᓂᖅ ᑐᑭᖃᕈᓐᓇᖅᑐᖅ ᖃᓄᑐᐃᓐᓇᖅ ᑎᒥᒥᑦ ᐱᓕᕆᔾᔪᑎᐅᔪᖅ ᐊᐅᓚᑦᑎᔾᔪᑎᐅᓇᓱᐊᖅᑐᓂ ᐱᓕᕆᔾᔪᑎᐅᔪᖅ ᐊᑐᕆᐊᑐᒐᑎᒃ ᓱᖏᐅᑎᒥᑦ.

ᐊᑦᓲᓗᐊᖏᑦᑐᓂᑦ ᐊᑐᕈᓐᓇᕐᒥᔪᑦ ᐱᓕᕆᔾᔪᑎᓂᑦ ᐊᓯᐊᓄᑦ ᓴᖑᓂᐊᖁᓪᓗᒋᑦ ᐊᑐᕐᓂᐊᕋᒥᒃ ᐊᐅᓚᑦᑎᔾᔪᑎᒥᑦ ᐱᓕᕆᔾᔪᑎᒥᑦ. ᐊᓯᐊᓄᑦ ᓴᖑᑎᑦᓯᔾᔪᑎᐅᔪᑦ ᐱᖃᓯᐅᔾᔨᔪᑦ ᑭᓯᐊᓂ ᐊᓯᖃᕈᓐᓇᕆᓪᓗᑎᒃ ᐃᑎᒪᖓᓄᑦ ᐱᒋᐊᕐᓯᓂᖅ ᐊᒻᒪ ᓇᕿᒻᒥᑦᓯᓪᓗᓂ ᓄᑭᖃᕐᕕᓐᓂᒃ. ᐊᐅᓚᑦᑎᔾᔪᑎᑦ ᐱᓕᕆᔾᔪᑏᑦ ᐱᖃᓯᐅᔾᔨᔪᑦ ᐊᐃᑉᐸᖃᕐᓂᖅ ᑎᒍᔭᐅᓯᒪᔪᒥᑦ ᐊᒻᒪ/ᐅᕝᕙᓘᓐᓃᑦ ᓇᔪᒥᑦᓯᔾᔪᑎᐅᔪᑦ ᖁᓄᔪᓂᑦ, ᓇᒡᒍᐊᖏᒍᑦ ᑎᒍᒥᐊᕈᑏᑦ ᐊᒻᒪ ᐊᐅᓚᔾᔭᕕᑦᓴᐅᖏᑦᑐᑦ ᑭᑮᖓᐅᑏᓐᓂᒃ ᐊᑎᑎᑦᓯᓂᖅ ᐋᓐᓂᕈᑎᐅᖏᓂᕐᓴᐅᑐᐃᓐᓇᕆᐊᓕᓐᓂᑦ.

ᐊᑦᓱᐊᓘᖅᑐᑦ ᐱᓕᕆᔾᔪᑏᑦ ᓄᖅᑲᑎᑦᓯᔾᔪᑎᐅᓇᓱᐊᖅᐸᑦᑐᑦ ᐱᓕᕆᔾᔪᑎᐅᔫᑉ ᐱᐅᓯᖏᓐᓂᑦ ᐅᕝᕙᓘᓐᓃᑦ ᐊᑐᖅᑕᐅᒍᒪᓪᓗᑎᒃ ᐊᐅᓚᑦᑎᔾᔪᑎᑦ ᐱᓕᕆᔾᔪᑏᑦ ᐊᒻᒪ ᐋᓐᓂᕈᑎᐅᔪᓐᓇᓂᕐᓴᐅᔪᑦ. ᐱᖃᓯᐅᔾᔭᐅᔪᓐᓇᖅᑐᑦ ᐊᒡᒐᒻᒥᓄᑦ ᐱᒋᐊᕐᓯᓂᖅ ᓲᕐᓗ ᑎᓪᓗᑦᓯᓗᑎᒃ ᐊᒻᒪ ᑐᑭᕐᓯᓗᑎᒃ. ᑕᖃᕐᕈᐊᒃᑯᑦ ᖁᖓᓯᖏᒍᑦ ᓇᕿᒻᒥᓂᖅ (ᑕᖃᕐᔪᐊᒃᑯᑦ ᐊᐅᓚᑦᓯᓂᖅ) ᐊᑦᓱᐊᓘᕈᑎᐅᒻᒥᔪᖅ ᐱᓕᕆᔾᔪᑎᓂᑦ.^{Footnote 18}

[143] ᖃᓄᑎᒋ ᐊᑦᓱᕉᑎᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᑎᒍᓯᓇᓱᐊᖅᑎᓪᓗᒋᑦ ᐱᖃᓯᐅᔾᔨᓚᐅᖅᑐᑦ ᑎᒍᔭᐅᓗᓂ A.B., ᐊᓯᐊᓄᑦ ᓵᑦᑎᑕᐅᓗᓂ ᑎᒥᖓ, ᐊᒻᒪ ᑎᒍᒥᐊᖅᑕᐅᓗᓂ ᐊᒻᒪ ᓄᓱᐊᖅᑕᐅᓗᑎᒃ ᑕᓕᖏᒃ ᑭᑮᖓᐅᑏᓐᓂᒃ ᐊᑎᓯᑎᑕᐅᓇᓱᐊᖅᑎᓪᓗᒍ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᑦᓱᐊᓚᐅᕐᒥᔪᑦ ᐊᒻᒪ ᐊᔭᐅᖅᐸᑦᑐᑎᒃ A.B.-ᒥᑦ ᐃᑭᑎᑕᐅᓇᓱᐊᖅᑎᓪᓗᒍ ᐅᖓᑖᓄᑦ ᐸᓖᓯᒃᑯᑦ ᓄᓇᒃᑰᔫᖓᑕ. ᑕᒪᒃᑯᐊ ᒥᑭᔫᑎᐅᓚᐅᖅᑐᑦ ᐊᑐᖅᑕᐅᔾᔪᑎᐅᔪᑦ ᖃᓄᑎᒋ ᐊᑦᓱᕈᕐᓂᕐᒥᑦ ᐊᒻᒪ ᐊᔾᔨᖃᓚᐅᖅᑐᑦ "ᐊᑦᓱᐊᓘᖏᑦᑐᖅ" ᑎᒥᒥᑦ ᖃᓄᑎᒋ ᐊᑦᓱᕉᑎᖃᖅᑐᓂ ᓇᓗᓇᐃᔭᖅᑕᐅᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖓᓐᓂ.

[144] ᑳᓐᔅᑕᐳᓪ ᑭᐅᓕᖕ ᐊᑐᓚᐅᖅᑐᖅ "ᐊᑦᓱᐊᓘᖅᑐᒥᑦ" ᐊᑐᖅᑐᓂ ᖃᓄᑎᒋ ᐊᑦᓱᕈᓐᓂᕐᒥᑦ ᓯᖅᑯᕐᒥᓄᑦ ᐱᒋᐊᕋᒥᐅᒃ A.B. ᖁᓖᖏᒍᑦ. ᐅᓗᕆᐊᓇᕐᓂᕐᓴᐅᒐᓗᐊᖅᑐᓂ ᐋᓐᓂᕈᑎᐅᒐᔭᕐᓂᖓ, ᓲᕐᓗ ᑕᐃᒪᐃᑦᑐᑦ ᖃᓄᐃᓕᐅᕈᑎᐅᔪᑦ ᐊᔾᔨᖃᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖓᓐᓂᑦ, ᐃᒪᐃᑦᑑᒻᒪᑦ "ᐊᑐᖅᑕᐅᓇᓱᑦᑐᖅ ᓄᖅᑲᑎᑦᓯᔾᔪᑎᐅᓇᓱᐊᖅᑐᓂ ᐱᓕᕆᔾᔪᑎᐅᑉ ᐱᐅᓯᖓᓂᑦ ᐅᕝᕙᓘᓐᓃᑦ ᐊᑐᖅᑕᐅᖁᓪᓗᒍ ᐊᐅᓚᑦᑎᑦᓯᔾᔪᑎ ᐱᓕᕆᔾᔪᑎ." ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ ᐊᑐᕐᓂᕋᒥᐅᒃ ᓯᖅᑯᓂ ᐊᓯᐊᓄᑦ ᓴᖑᑎᑦᓯᔾᔪᑎᒋᓇᓱᐊᖅᑐᓂᐅᒃ A.B.-ᒥᑦ, ᑖᓐᓇᓕ ᖁᓄᓚᐅᖅᑐᖅ ᖃᓄᑐᐃᓐᓇᑦᑎᐊᖅ ᐊᒻᒪ ᒪᓕᒐᓂ ᐸᓖᓯᒃᑯᑦ ᑎᓕᓯᔾᔪᑎᖏᓐᓂᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐋᖅᑭᑦᓯᔪᓐᓇᕈᒪᓪᓗᑎᒃ ᑭᑮᖓᐅᑏᓐᓂᒃ, ᐊᑎᓯᑎᑕᐅᔪᓐᓇᓕᓚᐅᖅᑐᖅ.

[145] ᖃᐅᔨᓴᖅᑏᑦ ᖃᐅᔨᔪᑦ, ᐱᔾᔪᑎᒋᓪᓗᒋᑦ A.B. ᖁᓄᓂᕆᓚᐅᖅᑕᖓ ᐊᒻᒪ ᐱᒋᐊᕐᓂᐅᓴᓂᕆᓚᐅᖅᑕᖓ ᐱᐅᓯᖓ, ᐊᑐᖅᑕᐅᒋᐊᖃᓚᐅᖅᑐᖅ ᐊᒻᒪ ᓈᒻᒪᑦᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᖅᑎᓪᓗᒋᑦ ᖃᓄᑎᒋ ᐊᑦᓱᕈᖅᑐᑎᒃ ᑎᒍᔭᐅᕙᓪᓕᐊᑎᓪᓗᒍ. ᖃᓄᑎᒋ ᐊᑦᓱᕉᑎᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᒪᓕᓚᐅᖅᑐᑦ A.B. ᐱᐅᓯᖓᓂᑦ, ᐊᒻᒪ ᓈᒻᒪᓚᐅᖅᑐᓂ. ᖃᓄᐃᓕᖓᒍᑎᐅᓚᐅᖅᑐᑦ ᐊᑐᖅᑕᐅᓚᐅᖅᑐᑦ ᐱᓪᓗᒋᑦ, A.B. ᑎᒍᔭᐅᓚᐅᕋᓗᐊᕐᒪᑦ ᐊᖏᔫᖏᑦᑐᒥᑦ ᓱᕋᐃᓚᐅᕐᓂᖓᓄᑦ ᒪᓕᒐᕐᒥᑦ, ᓈᒻᒪᑦᑑᔮᓚᐅᖏᑦᑐᖅ ᓇᓖᕌᕈᑎᐅᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᓂᑎᑕᐅᑐᐃᓐᓇᕐᓗᓂ ᐊᒻᒪ ᐱᓕᕆᔾᔪᑎᐅᓗᓂ ᓱᕋᐃᔾᔪᑎᐅᔪᖅ ᒪᓕᒐᕐᒥᑦ ᐊᓯᐊᒍᖔᖅ ᐱᓕᕆᔾᔪᑎᒍᑦ.^{Footnote 19} A.B. ᖃᓄᑎᒋ ᐋᖓᔮᕐᓂᕆᓚᐅᖅᑕᖓ ᐊᒻᒪ ᐱᐅᓯᕆᓚᐅᖅᑕᖓ ᐃᓱᒪᓇᓚᐅᖅᑐᖅ ᐅᓗᕆᐊᓇᕈᓐᓇᕐᓂᖓᓄᑦ ᐊᓯᖏᓐᓄᑦ ᐅᕝᕙᓘᓐᓃᑦ ᐃᖕᒥᓄᑦ ᓄᖅᑲᖅᑎᑕᐅᓚᐅᖏᒃᑯᓂ. ᑕᐃᒪᐃᒻᒪᑦ, ᐊᑐᖅᑕᐅᓂᖓ ᖃᓄᑎᒋ ᐊᑦᓱᕈᕐᓂᐅᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᑐᖅᑕᐅᒋᐊᖃᓕᓚᐅᖅᑐᖅ ᐃᓱᒪᒋᓪᓗᒍ ᐊᖏᓂᕐᓴᐅᓂᖓ, ᐊᒻᒪᑦᑕᐅᖅ ᖃᓄᐃᑦᑑᑎᓪᓗᒍ ᖁᓄᓂᐅᓚᐅᖅᑐᖅ ᒪᓕᒐᑎᒍᑦ ᐊᑐᖅᑐᑎᒃ ᑎᒍᓯᓇᓱᐊᕐᓂᐅᓚᐅᖅᑐᖅ.

[146] ᓇᓗᓇᐃᒃᑯᑎᖃᓚᐅᖏᓯᐊᖅᑐᖅ A.B. ᐋᓐᓂᕐᓯᒪᒋᐊᖓᓂᑦ ᐱᔾᔪᑎᒋᓪᓗᒍ ᓯᕗᓪᓕᕐᒥ ᖃᓄᐃᖃᑎᒋᓚᐅᕐᓂᖓ ᐃᓚᒋᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ. A.B. ᐅᖃᐅᓯᖃᓚᐅᖏᒻᒥᔪᖅ ᐋᓐᓂᕐᓯᒪᓂᕐᒥᓂᒃ ᑕᐃᑦᓱᒪᓂ ᐅᕝᕙᓘᓐᓃᑦ ᑭᖑᓂᐊᒍᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᓂᒃᑳᓚᐅᖏᑦᑐᑦ A.B. ᐋᓐᓂᕐᓯᒪᓚᐅᕐᓂᖓᓄᑦ, ᐊᒻᒪ ᐅᐊᑦᓯᒧᑦ ᐅᖃᐅᔾᔭᐅᓚᐅᖅᑐᑦ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓂᑦ A.B. ᐋᓐᓂᕐᓯᒪᓚᐅᖏᒻᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᒻᒨᖅᑕᐅᒻᒪᑦ.

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ A.B.-ᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓅᕆᔪᑦ

ᑎᑎᕋᕐᓯᒪᔪᑦ ᐱᓕᕆᔾᔪᑏᑦ ᒪᓕᒐᕐᔪᐊᑎᒍᑦ ᐱᔪᓐᓇᐅᑎᓕᕆᔪᑦ

ᖃᐅᔨᔭᐅᔪᖅ #7: A.B. ᑐᑭᖃᑦᓯᐊᑐᒃᑯᑦ ᑐᓴᖅᑎᑕᐅᓚᐅᖏᑦᑐᖅ ᖃᐅᔨᒋᐊᕈᓐᓇᕐᓂᖓᓂᑦ ᒪᓕᒐᓕᕆᔨᓂᑦ ᐊᒻᒪ ᐱᕕᖃᖅᑎᑕᐅᓚᐅᕋᓂ ᖃᐅᔨᒋᐊᕐᓂᕐᒥᑦ ᒪᓕᒐᓕᕆᔨᓂᑦ ᐋᖓᔮᕈᓐᓃᑎᓪᓗᒍ ᑎᒍᔭᐅᒪᕕᒻᒥ.

[147] ᑳᓐᔅᑕᐳᓪ ᑭᐅᓕᖕ ᑎᑎᕋᕐᓯᒪᔭᖏᓐᓂ ᐅᖃᐅᑎᑦᓴᖏᓐᓂᑦ, ᐅᖃᕆᐊᓚᐅᖅᑐᖅ, A.B.-ᒥᑦ ᑎᒍᔭᐅᒪᕕᒻᒨᕈᔾᔨᕙᓪᓕᐊᑎᓪᓗᒋᑦ, ᐅᖃᐅᑎᓚᐅᖅᑕᖓ A.B. ᑎᒍᔭᐅᒻᒪᑦ ᐸᕝᕕᓴᐃᓂᖓᓄᑦ ᐊᒻᒪ ᐅᖃᐅᑎᓪᓗᓂᐅᒃ ᒪᓕᒐᕐᔪᐊᑎᒍᑦ ᐱᔪᓐᓇᐅᑎᖏᓐᓂᑦ. A.B. ᑭᐅᓚᐅᖏᑦᑐᖅ ᐊᐱᕆᔭᐅᒐᒥ ᑐᑭᓯᐊᒻᒪᖔᖅ.

[148] ᐊᐱᕆᔭᐅᒐᒥ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓂᑦ ᐅᖃᓕᒫᕐᕕᖃᓚᐅᕐᒪᖔᖅ ᐅᕝᕙᓘᓐᓃᑦ ᑳᓐᔅᑕᐳᓪ ᑭᐅᓕᖕ ᐅᖃᓕᒫᓚᐅᕐᒪᖔᖅ A.B.-ᒧᑦ ᐸᓖᓯᒃᑯᓐᓄᑦ ᐅᔾᔨᕈᓱᐅᔨᔾᔪᑎᐅᔪᖅ ᐅᕝᕙᓘᓐᓃᑦ ᖃᐅᔨᒪᖁᔭᐅᓐᓂᕐᒪᖔᖅ ᒪᓕᒐᓕᕆᔨᓂᑦ ᖃᐅᔨᒋᐊᕈᓐᓇᑦᑎᐊᕋᒥ ᐱᔪᓐᓇᐅᑎᒍᑦ, ᑳᓐᔅᑕᐳᓪ ᓱᓚᑦ ᐅᖃᓚᐅᖅᑐᖅ, "[A.B.] ᓄᓇᒃᑰᔫᒦᑦᑎᓪᓗᒍ ᑎᒍᔭᐅᒪᕕᒻᒨᐸᓪᓕᐊᓪᓗᑕ ᐊᒻᒪ ᐱᔾᔪᑎᐅᓗᓂ ᐱᓕᕆᔾᔪᑎᐅᔫᑉ ᐋᖓᔮᖅᑐᖅᐹᓘᓂᖓ ᐱᔪᓐᓇᐅᑎᖏᑦ ᐅᖃᐅᓯᐅᓚᐅᖏᑦᑐᑦ ᑕᐃᑦᓱᒪᓂ. ᖃᐅᔨᒪᓚᐅᖏᑦᑐᖓ ᑐᑭᓯᒐᔭᕋᓗᐊᕐᒪᖔᒋᑦ ᐱᔪᓐᓇᐅᑎᓂ – ᒪᓕᒐᕐᔪᐊᑎᒍᑦ ᐱᔪᓐᓇᐅᑎᖏᑦ ᐊᒻᒪ ᖃᐅᔨᒋᐊᕈᓐᓇᕐᓂᖓᓄᑦ ᒪᓕᒐᓕᕆᔨᒥᑦ."

[149] ᑳᓐᔅᑕᐳᓪ ᓱᓚᑦ ᐅᖃᓚᐅᖅᑐᖅ ᖃᐅᔨᒪᓚᐅᖏᒻᒪᑦ A.B. ᐅᖃᓕᒫᕐᕕᐅᓐᓂᕋᓗᐊᕐᒪᖔᖅ ᐱᔪᓐᓇᐅᑎᖏᓐᓂᑦ ᑭᖑᓂᐊᒍᑦ. ᐅᖃᕆᐊᓚᐅᖅᑐᖅ "ᐱᔾᔪᓯᒍᑦ ᐱᓕᕆᔾᔪᑎᐅᔪᖅ ᐅᕙᓂ ᐋᖓᔮᕈᓐᓃᕋᐃᒻᒪᑕ ᐊᒻᒪ ᑐᑭᓯᔪᓐᓇᓕᖅᑐᑎᒃ ᐅᖃᓕᒫᕐᕕᒋᒃᑲᓐᓂᖅᐸᑦᑕᕗᑦ ᐱᔪᓐᓇᐅᑎᖏᓐᓂᑦ ᑐᑭᓯᒍᒪᓪᓗᑕ – ᓇᓗᓇᐃᕈᒪᓪᓗᑕ ᑐᑭᓯᒐᓗᐊᕐᒪᖔᑕ."

[150] A.B. ᑎᒍᔭᐅᒪᔪᓂᑦ ᐅᓂᒃᑳᓕᐊᖑᓯᒪᔪᓂᑦ (C-13 ᑕᑕᑎᕆᐊᓕᒃ) ᑎᑎᖅᑲᖅ, ᑎᑎᖅᑲᐃᑦ "ᐋᖓᔮᓗᐊᖅ" ᑎᑎᕋᕐᓯᒪᔪᑦ ᓴᓂᐊᓂ ᐃᑦᑎᕐᕕᐅᔭᕋᓛᑦ ᑎᑎᕋᕐᓯᒪᔪᑦ "ᐱᔪᓐᓇᐅᑎᓂᑦ ᐅᖃᓕᒫᕐᕕᐅᓯᒪᔪᖅ," "ᐅᔾᔨᕈᓲᑎ ᐅᖃᓕᒫᖅᑕᐅᔪᖅ," ᐊᒻᒪ "ᒪᓕᒐᓕᕆᔨᒥᑦ ᖃᐅᔨᒋᐊᕐᓯᒪᔪᑦ."

[151] ᓇᓗᓇᖅᑐᖅ ᑭᓇᒧᑦ ᐱᔭᕇᖅᑕᐅᓂᕐᒪᖔᑕ A.B. ᑎᒍᔭᐅᒪᔪᓂᑦ ᐅᓂᒃᑳᓕᐊᖑᓯᒪᔪᖅ ᑎᑎᖅᑲᒥᑦ. ᓇᓗᓇᕐᒥᔪᖅ ᖃᖓᒃᑯᑦ ᑕᑕᑎᕆᐊᓕᒃ ᑎᑎᕋᕐᕕᑦᓴᖅ ᑎᑎᕋᖅᑕᐅᓂᕐᒪᖔᖅ, ᐱᔾᔪᑎᒋᓪᓗᒍ ᐱᑕᖃᕐᓂᖓ ᑎᑎᕋᕐᓯᒪᔪᓂᑦ, "ᐱᒋᐊᖅᑕᐅᖅᑲᐅᔪᖅ ᐊᓯᐊᓄᑦ ᑎᒍᔭᐅᒪᔪᒧᑦ, ᐋᓐᓂᐊᓯᐅᖅᑎᒧᑦ ᐅᐸᑦᑕᐅᖅᑕᐅᔪᖅ  ᐃᓚᕋᓇᕐᓯᖅᑲᐅᔪᖅ."

[152] ᑭᐅᔾᔪᑎᒋᓪᓗᒋᑦ ᖃᐅᔨᓴᖅᑏᑦ ᐊᐱᖅᑯᑎᖏᓐᓄᑦ ᑭᖑᓂᐊᒍᑦ, ᑳᓐᔅᑕᐳᓪ ᑭᐅᓕᖕ ᒪᓕᒐᓕᕆᔨᖏᑦ ᐅᖃᓚᐅᖅᑐᑦ ᑳᓐᔅᑕᐳᓪ ᑭᐅᓕᖕ ᐱᓕᕆᔾᔪᑎᒋᖏᒪᔾᔪᒃ ᑎᑎᕋᕐᓗᓂ "ᐋᖓᔮᓗᐊᖅᑐᖅ" ᑎᑎᖅᑲᒥ ᓲᕐᓗ ᑎᒍᔭᐅᒪᔪᓂᑦ ᐱᔾᔪᑎᓖᑦ ᐅᓂᒃᑳᓕᐊᓂ, ᐊᒻᒪ ᑳᓐᔅᑕᐳᓪ ᑭᐅᓕᖕ ᐃᖅᑲᐅᒪᔭᖓᒍᑦ, ᑎᑎᑕᐅᖏᑕᖏᑦ A.B. ᑎᒍᔭᐅᒪᔪᓂᑦ ᐱᔾᔪᑎᓖᑦ ᐅᓂᒃᑳᓕᐊᖓᓂ.

[153] ᐊᓯᖏᓐᓂᑦ ᐱᑕᖃᖏᑦᑐᖅ ᑐᑭᓯᒋᐊᕈᑎᑦᓴᓂᑦ ᓱᓇᑐᐃᓐᓇᕐᓂ ᐊᑐᐃᓐᓇᐅᔪᓂᑦ ᖃᐅᔨᓴᖅᑎᓄᑦ ᐃᓱᒪᓕᐅᕆᔾᔪᑎᑦᓴᓂᑦ A.B. ᐅᖃᓕᒫᕐᕕᐅᔪᕕᓂᐅᓂᖓᓄᑦ ᐱᔪᓐᓇᐅᑎᖏᓐᓂᑦ ᑎᒍᔭᐅᒪᕕᒻᒦᓕᕐᒪᑕ, ᐊᒻᒪ ᓇᓗᓇᐃᔭᐃᑎᖃᕋᑎᒃ ᐊᐱᕆᔭᐅᓐᓂᕋᓗᐊᕐᒪᖔᖅ ᖃᐅᔨᒋᐊᕈᓐᓇᓂᕐᒥᓂᒃ ᒪᓕᒐᓕᕆᔨᓂᑦ.

[154] ᑎᑎᕋᕐᓯᒪᕕᒻᒦᑦᑐᑦ 10 ᐅᕙᓂ ᑲᓇᑕᒥ ᑎᑎᕋᕐᓯᒪᔪᑦ ᐱᔪᓐᓇᐅᑎᐅᔪᓂᑦ ᐊᒻᒪ ᐃᓱᒪᕐᓱᕈᓐᓇᓂᕐᒥᑦ ᐅᖃᕐᓯᒪᔪᑦ:

10. ᑭᓇᑐᐃᓐᓇᑦᓯᐊᖅ ᐱᔪᓐᓇᐅᑎᖃᖅᑐᑦ ᑎᒍᔭᐅᑎᓪᓗᒋᑦ ᐅᕝᕙᓘᓐᓃᑦ ᑎᒍᔭᐅᓯᒪᓂᐊᖅᑎᓪᓗᒋᑦ . . .

(b) ᐱᔭᕆᐊᑦᓴᖅ ᐊᒻᒪ ᑎᓕᓯᓗᑎᒃ ᒪᓕᒐᓕᕆᔨᓂᑦ ᑕᕝᕙᓴᐃᓐᓇᐸᓗᒃ ᐊᒻᒪ ᑐᓴᐅᒪᑎᑕᐅᓗᑎᒃ ᐱᔪᓐᓇᐅᑎᖃᕐᓂᖏᓐᓂᑦ.

[155] ᑎᑎᕋᕐᓯᒪᕕᒻᒦᑦᑐᑦ 10 ᐱᑕᖃᖅᑐᑦ ᐱᓕᕆᐊᑦᓴᖏᓐᓂᑦ ᐸᓖᓯᒃᑯᑦ. ᐱᓕᕆᐊᑦᓴᐅᔪᖅ ᒪᕐᕉᓐᓂᒃ (2) ᐃᓗᓕᖃᖅᑐᖅ: ᑐᑭᓯᒋᐊᕈᑎᓕᕆᓂᕐᒥᑦ ᐃᓗᓕᓕᒃ ᐊᒻᒪ ᐱᒋᐊᖅᑎᑦᓯᔾᔪᑎᒥᑦ ᐃᓗᓕᓕᒃ. ᐅᖃᖅᑐᓂ, ᐸᓖᓯᒃᑯᑦ ᑐᓴᖅᑎᑦᓯᒋᐊᖃᖅᐸᑦᑐᑦ ᑎᒍᔭᐅᔪᓂᑦ ᐱᔪᓐᓇᐅᑎᖏᓐᓂᑦ ᐊᒻᒪ ᓈᒻᒪᑦᑐᒥᑦ ᐱᕕᖃᖅᑎᑦᓯᒋᐊᖃᖅᐸᑦᑐᑦ ᑎᒍᔭᐅᒪᔪᓂᑦ ᐊᑐᕈᓐᓇᖁᓪᓗᒋᑦ ᑖᒃᑯᓂᖓ ᐱᔪᓐᓇᐅᑎᒋᔭᒥᓂᒃ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖓᑎᒍᑦ ᐅᖃᕐᓯᒪᒻᒥᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ "[ᐱ]ᑎᑦᓯᒋᐊᓖᑦ ᑎᒍᔭᐅᒪᔪᓂᑦ ᐱᕕᖃᕈᓐᓇᓂᕐᒥᑦ ᐊᑐᕈᓐᓇᓂᕐᒥᑦ ᐱᔪᓐᓇᐅᑎᖏᓐᓂᑦ."^{Footnote 20}

[156] ᐊᔾᔨᒌᖏᓯᐊᖅᑐᓂᑦ ᓇᓗᓇᐃᔭᐃᑎᑕᖃᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐅᖃᓕᒫᕐᕕᖃᕐᓂᕋᓗᐊᕐᒪᖔᖅ A.B.-ᒧᑦ ᐱᔪᓐᓇᐅᑎᖏᓐᓂᑦ ᐱᔾᔪᑎᖃᕐᓗᓂ ᐸᓖᓯᒃᑯᑦ ᓄᓇᒃᑰᔫᖓᓃᑦᑎᓪᓗᒋᑦ. ᑭᓯᐊᓂᓕ, ᐊᑐᐃᓐᓇᐅᔪᑦ ᑐᑭᓯᒋᐊᕈᑎᐅᔪᑦ ᐃᓱᒪᓕᐅᕆᓯᒪᔪᑦ A.B. ᐅᖃᓕᒫᕐᕕᐅᓚᐅᖏᒻᒪᑦ ᐅᕝᕙᓘᓐᓃᑦ "ᐅᖃᓕᒫᕐᕕᐅᑲᓐᓂᓚᐅᖏᒻᒪᑦ" ᐱᔪᓐᓇᐅᑎᖏᓐᓂᑦ ᐋᖓᔮᕈᓐᓃᕐᒪᑦ, ᐅᕝᕙᓘᓐᓃᑦ ᐱᑎᑕᐅᓚᐅᖏᑦᑐᖅ ᖃᐅᔨᒋᐊᕈᓐᓇᕐᓂᖓᓄᑦ ᒪᓕᒐᓕᕆᔨᓂᑦ ᖃᖓᑐᐃᓐᓇᒃᑯᑦ ᐃᑲᕐᕋᓂ 18-ᓂ ᑎᒍᔭᐅᓯᒪᓂᖓᓂ. ᓱᓕᔪᑦ ᐸᓖᓯᒃᑯᑦ ᐸᕐᓇᐅᑎᖃᓚᐅᕐᒪᑕ ᐊᓂᑎᑕᐅᓂᐊᖅᑐᓂ A.B. ᐋᖓᔮᕈᓐᓃᖅᐸᑦ (ᓇᓗᓇᐃᕐᓯᒪᔪᑦ ᑎᒍᔭᐅᔪᓄᑦ ᐅᓂᒃᑳᓕᐊᓂ) ᐊᒻᒪ ᐃᖅᑲᖅᑐᕋᑦᓴᐅᑎᑕᐅᓂᐊᓚᐅᕋᓂ ᓱᕋᐃᓯᒪᓂᕐᒥᑦ ᒪᓕᒐᕐᒥᑦ, ᑭᓯᐊᓂ ᒪᓕᒐᑎᒍᑦ ᑎᑎᕋᕐᓯᒪᔪᖃᖅᑐᖅ ᑎᒍᔭᐅᔪᑦ ᑭᒃᑯᑐᐃᓐᓇᐃᑦ ᐊᑐᐃᓐᓇᐅᕕᐅᒋᐊᖃᕐᒪᑕ ᐱᔪᓐᓇᐅᑎᒃᑯᑦ ᖃᐅᔨᒋᐊᕐᓂᕐᒥᑦ ᒪᓕᒐᓕᕆᔨᓂᑦ.

ᕿᓂᕐᕕᐅᓂᒥᓂᖓ A.B.

ᖃᐅᔨᔭᐅᔪᖅ #8: ᖃᐅᔨᒪᓂᕋᕋᓗᐊᖅᑐᑎᒃ ᐊᑦᑕᓇᔾᔭᐃᕐᓯᒪᒋᐊᖃᖅᐸᓐᓂᖏᓐᓂᑦ ᑎᒍᔭᐅᖅᑲᔪᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᒻᒪᕆᐅᓘᒐᓗᐊᖅᑎᓪᓗᒍ, ᖃᐅᔨᓴᖅᑏᑦ ᐅᖃᕆᐊᒃᑲᓐᓂᖅᑐᑦ ᐊᓐᓄᕌᖃᖏᑦᑐᓂᑦ ᕿᓂᕐᕕᖃᕐᓂᐅᔪᖅ ᐊᑐᖅᑕᐅᒋᐊᖃᖏᒻᒪᑦ ᐱᓕᕆᔾᔪᑎᐅᒐᔪᓪᓗᑎᒃ.

ᖃᐅᔨᔭᐅᔪᖅ #9: ᑕᕝᕙᓂᓕ, ᓈᒻᒪᓚᐅᖅᑐᖅ, ᐊᒻᒪ ᐊᑲᐅᓂᖅᐹᖑᓪᓗᓂ ᐊᑦᑕᓇᖅᑐᒦᖁᓇᒍ A.B., ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ A.B.-ᒥᑦ ᐊᓐᓄᕋᐃᔭᐃᑎᓪᓗᒋᑦ ᖃᐅᓯᐅᓚᐅᖅᑐᓂᑦ.

ᖃᐅᔨᔭᐅᔪᖅ #10: ᐊᑦᑕᓇᖅᑐᒦᖁᓇᒋᑦ ᐃᓘᓐᓇᑎᒃ ᐱᓕᕆᖃᑕᐅᓚᐅᖅᑐᑦ, ᓈᒻᒪᓚᐅᖅᑐᖅ ᖃᑦᓯᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᖃᑕᐅᑎᓪᓗᒋᑦ ᕿᓂᕐᕕᖃᕐᓂᕐᒥᑦ.

ᖃᐅᔨᔭᐅᔪᖅ #11: A.B. ᐱᑎᑕᐅᒋᐊᓕᒥᓂᐅᒐᓗᐊᖅ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᑦ, ᐱᑎᑕᐅᒍᓐᓇᕐᓂᕈᓂ ᐊᑦᑕᓇᔾᔭᐃᕐᓯᒪᓗᑎᒃ, ᐱᓗᐊᖅᑐᒥ ᐱᔾᔪᑎᐅᓚᐅᖅᑐᖅ ᐱᓪᓗᒍ ᐊᓐᓄᕋᐃᔭᖅᑎᑕᐅᓚᕿᓚᐅᕐᓂᖓ A.B. ᐊᑦᑕᓇᖅᑐᒦᖁᓇᒍ ᕿᐅᓗᐊᖁᔭᐅᒐᓂ.

ᖃᐅᔨᔭᐅᔪᖅ #12: ᐃᓘᓐᓇᖏᒍᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑦᓱᕈᕐᓂᕆᓚᐅᖅᑕᖓᑦ A.B. ᕿᓂᕐᕕᐅᑎᓪᓗᒍ ᓈᒻᒪᓚᐅᖅᑐᖅ. ᑕᐃᒪᐃᒃᑲᓗᐊᖅᑎᓪᓗᒍ, ᖃᐅᔨᓴᖅᑏᑦ ᐅᔾᔨᕈᓱᒋᐊᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐊᑐᖁᔭᐅᕙᑦᑐᑎᑦ ᐊᑦᓱᕈᓗᐊᖅᐸᖏᓪᓗᑎᒃ ᖃᖓᑐᐃᓐᓇᒃᑯᑦ.

ᐊᑐᖁᔭᖅ #3: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᖅᑐᑦ ᕿᓂᕐᕕᐅᑎᓪᓗᒍ A.B. (ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓱᓚᑦ, ᐊᒻᒪ ᓵᔨᓐ ᒋᐅᓪ ᖃᐅᔨᓴᖅᑎᒋᔭᐅᓗᓂ ᑖᒃᑯᓄᖓ) ᐱᑎᑕᐅᒋᐊᓖᑦ ᐊᐅᓚᑦᑎᔾᔪᑎᓂᑦ ᒪᓕᒋᐊᓕᓐᓂᑦ ᐱᔾᔪᑎᖃᖅᑐᓂᑦ ᐱᑎᑦᑎᓂᕐᒥᑦ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᑦ ᑎᒍᔭᐅᔪᓄᑦ.

[157] ᐊᐱᕐᓱᖅᑕᐅᑎᓪᓗᒍ ᖃᐅᔨᓴᖅᑎᓄᑦ, A.B. ᐃᓚᐃᓐᓇᖏᓐᓂᑦ ᐃᖅᑲᐅᒪᓂᕋᖅᑐᖅ ᑎᒍᔭᐅᒪᕕᒻᒨᕈᔾᔭᐅᓗᓂ ᐊᒻᒪ ᕿᓂᕐᕕᐅᓗᓂ. ᐅᖃᓚᐅᖅᑐᖅ ᐃᖅᑲᐅᒪᓂᕋᖅᑐᓂ ᐸᓖᓯᒃᑯᓐᓄᑦ ᐊᓐᓄᕋᐃᔭᖅᑎᖅᑕᐅᑎᓪᓗᒍ ᐊᒻᒪ ᐱᑎᑕᐅᓗᓂ ᖃᑯᖅᑕᒥᑦ ᐊᓐᓄᕌᒥᑦ ᓲᕐᓗ ᔭᐃᑲᒻᒥᑦ. A.B. ᐃᖅᑲᐅᒪᓂᕋᖅᑐᖅ ᑐᒃᑲᖅᑐᓂ ᐊᒻᒪ ᑎᓪᓗᐊᑦᓯᕙᑦᑐᓂ ᒪᑐᒥᑦ, ᑭᓯᐊᓂ ᐃᖅᑲᐅᒪᓂᕋᖏᑦᑐᖅ ᓯᕗᓂᐊᒎᕐᓂᕐᒪᖔᖅ ᕿᓂᕐᕕᐅᓚᐅᖅᑎᓐᓇᒍ ᐅᕝᕙᓘᓐᓃᑦ ᑭᖑᓂᐊᒍᑦ ᕿᓂᕐᕕᐅᓚᐅᖅᑎᓪᓗᒍ.

[158] ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᓂᒃᑳᓕᐊᕆᓯᒪᔭᖏᑦ, A.B. ᐃᑲᔪᕋᓱᖏᓯᐊᖅᑐᒥᓂᖅ ᑎᑭᐅᑎᒐᓗᐊᕐᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓐᓄᑦ ᑭᖕᖓᕐᓂ. ᐅᓂᒃᑳᓕᐊᖑᓯᒪᔪᑦ ᓇᓗᓇᐃᔭᐃᓯᒪᔪᑦ, ᐊᓯᖏᓐᓂᓪᓗ, A.B. ᓂᐅᑦᑕᐃᓕᒪᕙᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᐊᒻᒪ ᓂᐅᒥᓂᒃ ᑎᒋᖓᓕᖅᑎᑦᓯᕙᑦᑐᓂ ᐱᓱᒍᓐᓇᕐᓂᐊᖏᓐᓇᒥ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᔾᔭᖅᑕᐅᒋᐊᖃᓚᐅᖅᑐᖅ A.B. ᑎᒍᔭᐅᒪᕕᒻᒧᑦ, ᐊᑦᓱᕈᓐᓇᑐᒻᒪᕆᐅᓚᐅᖅᑐᖅ ᐱᔾᔪᑎᒋᓪᓗᒍ ᒪᔪᕋᐅᑎᖏᑦ ᑎᒍᔭᐅᒪᕕᐅᑉ ᐊᒥᓲᒻᒪᑕ ᐃᓯᕐᕕᖓᓄᑦ.

[159] ᒪᓕᑦᑐᒋᑦ ᑳᓐᔅᑕᐳᓪ ᑭᐅᓕᖕ ᑎᑎᖅᑲᖏᑦ ᐅᖃᐅᑎᑦᓴᖏᓐᓂᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ A.B.-ᒥᑦ ᑎᒍᔭᐅᒪᕕᒻᒥ ᐃᓪᓗᕈᓯᕐᒧᑦ 3 "ᕿᓂᖅᑕᐅᓂᐊᕐᒪᑦ ᐊᐅᓚᑕᐅᑦᑎᐊᕐᓗᓂ." A.B. ᓇᓚᓚᐅᖅᑐᖅ ᐊᒻᒪ ᑳᓐᔅᑕᐳᓪ ᑭᐅᓕᖕ ᐊᐅᓚᑎᑦᓯᑦᑕᐅᓕᒪᓚᐅᖅᑐᖅ ᑕᓕᖏᓐᓂᒃ ᑳᓐᔅᑕᐳᓪ ᓯᒥᖦ ᐲᔭᐃᑎᓪᓗᒍ A.B. "ᐊᓐᓄᕌᖏᓐᓂᑦ ᖃᐅᓯᒻᒪᕆᐅᓚᐅᖅᑐᓂᑦ" ᐊᒻᒪ ᓵᔨᓐ ᒋᐅᓪ ᐲᕐᓯᓚᐅᖅᑐᖅ ᑭᑮᒐᐅᑏᓐᓂᒃ. A.B. ᐊᐅᓚᑎᓚᐅᖅᑕᖏᒃ ᓂᐅᓂ ᐊᒻᒪ ᐊᐅᓚᑎᒐᓱᑦᑐᓂᐅᒃ ᑎᒥᓂ ᑕᒪᓐᓇ ᐊᑐᖅᑕᐅᑎᓪᓗᒍ.

[160] ᑳᓐᔅᑕᐳᓪ ᑭᐅᓕᖕ ᑕᑯᓐᓇᓚᐅᖅᑐᖅ A.B. ᐸᓂᕐᓂᑯᒥᑦ ᐊᐅᖏᓐᓇᐅᑎᓪᓗᒍ ᕿᖓᖓᑕ ᐊᑖᒍᑦ ᑭᓯᐊᓂ "ᑕᑯᑦᓴᒃᑯᑦ ᐋᓐᓂᕐᓯᒪᓚᐅᖏᑦᑐᖅ ᐸᓖᓯᓂᑦ ᐊᒻᒪ ᐅᖃᐅᓯᖃᓚᐅᕋᓂ ᐋᓐᓂᐊᓂᕋᖅᑐᓂ ᓇᐅᒃᑯᑦ [ᐅᓇ] ᕿᓂᕐᕕᐅᓂᖓᓂ."

[161] ᑳᓐᔅᑕᐳᓪ ᓯᒥᖦ ᐅᓂᒃᑳᖏᓐᓂ, ᓇᓗᓇᐃᔭᐃᓯᒪᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᕐᕈᑎᑦᓯᓚᐅᕐᒪᑕ A.B.-ᒥᑦ ᓄᓇᒧᑦ ᐊᓐᓄᕋᐃᔭᖅᑎᖅᑕᐅᒍᒪᓗᓂ ᐊᒻᒪ ᐱᖁᑎᖏᓐᓂᑦ ᐊᕐᓵᖅᑕᐅᓗᓂ ᐊᑦᑕᓇᔾᔭᐃᕐᓯᒪᓗᑎᒃ. ᐊᐱᕐᓱᖅᑕᐅᑎᓪᓗᒍ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ, ᑳᓐᔅᑕᐳᓪ ᓯᒥᖦ ᐅᖃᕆᐊᓚᐅᖅᑐᖅ ᑎᒍᔭᐅᒪᔪᑦ ᑎᑎᕋᐅᑕᐅᓗᓂ ᐱᓕᕆᔾᔪᑎᐅᕙᒃᑲᓗᐊᕐᒪᑕ ᐊᑐᖅᑐᑎᒃ ᐱᔾᔪᓯᒍᑦ ᐱᓕᕆᔾᔪᑎᒥᑦ, ᑭᓯᐊᓂ ᑕᕝᕙᓂ, A.B. ᓂᖕᖓᐅᒪᓗᐊᓚᐅᕐᒪᑦ ᐊᒻᒪ ᐅᓗᕆᐊᓇᓗᐊᓚᖓᓪᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᒪᓕᒐᓱᒃᑲᓗᐊᕈᑎᒃ ᐱᔾᔪᓯᒍᑦ ᐱᓕᕆᔾᔪᑎᒥᑦ. ᑕᒪᓐᓇ ᐱᓪᓗᒍ, A.B. ᑎᒍᔭᐅᒪᕕᒻᒧᑦ ᐃᓪᓗᕈᓯᕐᒧᑦ ᐴᖅᑕᐅᑦᑕᐅᑎᒋᓚᐅᖅᑐᖅ ᐊᒻᒪ ᐊᓐᓄᕋᐃᔭᖅᑕᐅᓗᓂ. ᐸᓖᓯᒃᑯᑦ ᓇᓗᓇᐃᕐᓯᓚᐅᖅᑐᑦ A.B. ᐱᖁᑎᖃᓚᐅᖏᒻᒪᑦ ᐱᓯᒪᒋᐊᖃᖏᑕᒥᓂᒃ, ᐊᒻᒪ ᓱᖏᐅᑎᖃᕋᓂ ᐅᕝᕙᓘᓐᓃᑦ ᓱᓇᑐᐃᓐᓇᕐᒥᑦ ᐊᑐᕈᓐᓇᖅᑕᒥᓂᒃ ᐃᖕᒥᓂᒃ ᐊᓯᒥᓂᓪᓘᓐᓃᑦ ᐋᓐᓂᕈᑎᐅᔪᓐᓇᖅᑐᒥᑦ. ᑳᓐᔅᑕᐳᓪ ᓯᒥᖦ ᓇᓗᓇᐃᕆᐊᓚᐅᖅᑐᖅ ᐱᑕᖃᕐᒪᑦ "ᐊᒥᓱᐊᓘᕙᒻᒪᑕ ᐃᖕᒥᓂᒃ ᐃᓅᓯᕐᒥᓂᒃ ᑭᐱᓯᕙᑦᑐᑦ ᒫᓂ ᐊᒻᒪ ᐊᒥᓱᐊᓘᓪᓗᑎᒃ ᐃᓱᒪᓕᕆᕙᑦᑐᑦ ᐱᔾᔪᑎᓕᓐᓂᑦ," ᐊᒻᒪ ᑭᒃᑯᑐᐃᓐᓇᐃᑦ ᐃᖕᒥᓂᒃ ᕿᒥᑎᑦᓯᓯᒪᒻᒪᑕ ᐊᑐᖅᑐᑎᒃ ᐊᓐᓄᕌᓂ ᐅᕙᑦᓯᐊᕈ. ᐅᖃᓚᐅᖅᑐᖅ, "ᖃᐅᔨᒪᔪᖓ ᐱᓕᕆᔾᔪᑎᐅᕙᖏᒻᒪᑦ ᓇᒥᑐᐃᓐᓇᑦᑎᐊᖅ, ᑭᓯᐊᓂ ᒫᓂᓕ ᐱᓪᓚᕆᐊᓘᕙᑦᑐᖅ ᐊᑐᖅᑕᐅᒐᐃᒐᒥ." ᑳᓐᔅᑕᐳᓪ ᓯᒥᖦ ᐅᖃᕆᐊᓚᐅᖅᑐᖅ ᐱᔾᔪᓯᒍᑦ ᐱᓕᕆᔾᔪᑎᐅᖏᒃᑲᓗᐊᕐᒪᑦ ᑭᖕᖓᕐᓂ ᐸᓖᓯᒃᑯᑦ ᐱᓕᕆᕝᕕᖏᓐᓂ ᐲᔭᐃᔭᕆᐊᑦᓴᖅ ᐊᓐᓄᕌᖏᓐᓂᑦ ᐃᓘᓐᓇᑎᒃ ᐋᖓᔮᖅᑎᓪᓗᒋᑦ ᑎᒍᔭᐅᕙᑦᑐᑦ, ᑭᓯᐊᓂ ᐲᔭᐃᕙᑦᑐᑦ, ᐅᕝᕙᓘᓐᓃᑦ ᑎᒍᔭᐅᔪᓂᑦ ᐲᔭᐃᖁᔨᕙᑦᑐᑦ, ᓱᓇᑐᐃᓐᓇᕐᓂᑦ ᓲᕐᓗ ᐊᑦᑐᓈᕈᔪᓐᓂᒃ.

[162] ᑳᓐᔅᑕᐳᓪ ᓯᒥᖦ ᖃᐅᔨᒪᖁᔨᓚᐅᕐᒥᔪᖅ, ᑕᑯᓐᓇᖅᑐᒍ A.B. ᖃᐅᒪᔪᒥ, A.B. ᖃᓄᐃᑦᑑᔮᓚᐅᖏᑦᑐᖅ ᐊᒻᒪ ᑕᑯᓚᐅᕋᓂ ᐋᓐᓂᕐᓯᒪᔪᓂᑦ.

[163] ᑳᓐᔅᑕᐳᓪ ᓱᓚᑦ ᐅᓂᒃᑳᓕᐊᖏᓐᓂ, ᖃᐅᔨᒪᖁᔨᓚᐅᖅᑐᖅ A.B. "ᒪᓕᑉᐸᓚᐅᖏᒻᒪᑦ" ᐱᓕᕆᔾᔪᑎᐅᑎᓪᓗᒍ ᐸᓖᓯᒃᑯᑦ ᐱᓕᕆᕝᕕᖓᓐᓂ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᕿᓂᕐᕕᖃᓚᐅᖅᑐᑦ ᐊᖑᑎᒥᑦ ᐊᒻᒪ ᐲᔭᐃᓗᑎᒃ ᐱᖁᑎᖏᓐᓂᑦ "ᒪᓕᑦᑐᑎᒃ ᐊᑐᐊᒐᕐᓂᑦ ᐊᑦᑕᓇᔾᔭᐃᕐᓯᒪᓗᑎᒃ ᐱᓯᒪᔭᐅᒍᒪᓪᓗᑎᒃ." ᐅᖃᐅᑎᒃᑲᓐᓂᓚᐅᖅᑕᖏᑦ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᑦ ᐸᓖᓯᒃᑯᑦ ᐲᔭᐃᒋᐊᖃᓚᐅᕐᒪᑕ A.B. ᐊᓐᓄᕌᖏᓐᓂᑦ ᐅᐱᓐᓇᕋᓂ ᖃᐅᓯᐊᓘᓚᐅᕐᒪᑕ ᐊᒻᒪ ᕿᐅᓂᐅᓴᓚᐅᕐᒪᑦ ᑕᐃᒪᐃᓕᖓᑎᑕᐅᑐᐃᓐᓇᕈᓂ. ᑳᓐᔅᑕᐳᓪ ᓱᓚᑦ ᐅᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᑎᑦᓯᒍᓐᓇᕐᒪᑕ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᑦ ᑭᓯᐊᓂ ᐊᓐᓄᕌᖑᖏᑦᑐᓂᑦ.

[164] ᓵᔨᓐ ᒋᐅᓪ ᓇᓗᓇᐃᔭᐃᓚᐅᖅᑐᖅ ᐅᓂᒃᑳᓕᐊᖏᓐᓂ A.B. ᐊᑦᓱᑲᓪᓚᒃ ᐋᖓᔮᓚᐅᕐᒪᑦ ᐊᒻᒪ ᐱᓱᒡᒐᑐᒻᒪᕆᐅᓗᓂ. ᐱᔾᔪᑎᒋᓪᓗᒍ ᕿᓂᕐᓂᐅᓚᐅᖅᑐᖅ, ᓵᔨᓐ ᒋᐅᓪ ᐅᖃᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓯᒥᖦ A.B.-ᒥᑦ ᐃᓕᓯᓚᐅᖅᑑᒃ ᓇᑎᕐᒧᑦ ᐊᒻᒪ ᐊᓐᓄᕋᐃᔭᖅᑎᑕᐅᓗᓂ, ᐊᓐᓄᕌᖏᑦ ᖃᐅᓯᐊᓘᓚᐅᕐᒪᑕ.

[165] ᓵᔨᓐ ᒋᐅᓪ ᐅᖃᓚᐅᖅᑐᖅ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ ᑭᖕᖓᐃᑦ ᑎᒍᔭᐅᓯᒪᕕᖓᑦ ᐸᓖᓯᒃᑯᓐᓂᑦ ᑎᓴᒪᓂᑦ (4) ᐃᓪᓗᕈᓯᖃᕐᒪᑦ. ᐃᓯᐅᔾᔭᐅᑎᓪᓗᒍ A.B., ᑎᓴᒪᐅᓚᐅᖅᑐᑦ (4) ᐊᖑᑏᑦ ᑎᒍᔭᐅᒪᕕᒻᒥ ᐅᓪᓗᕈᓯᕐᒥ 1. ᑎᒍᔭᐅᒪᕕᒻᒥ ᐃᓪᓗᕈᓯᕐᒥ 2 ᐃᓄᖃᓚᐅᖅᑐᖅ "ᐅᓗᕆᐊᓇᖅᑐᒻᒪᕆᒻᒥᑦ ᐋᖓᔮᖅᑐᒥᑦ ᐊᒻᒪ ᐱᖕᖏᔭᐃᓴᖅᑐᒻᒪᕆᐅᔪᒥᑦ ᐊᒻᒪ [ᓵᔨᓐ ᒋᐅᓪ] ᐊᐃᑉᐸᖃᖅᑎᓐᓂᐅᓴᓚᐅᖏᑕᖓ ᑭᓇᑐᐃᓐᓇᕐᒥᑦ." ᐊᕐᓇᖅᑕᖃᓚᐅᖅᑐᖅ ᑎᒍᔭᐅᒪᕕᒻᒥ ᐃᓪᓗᕈᓯᕐᒥ 3 ᐊᒻᒪ ᐊᓯᐊᓂᑦ ᐊᕐᓇᖅᑕᖃᕆᓪᓗᓂ ᐃᓪᓗᕈᓯᕐᒥ 4. ᑕᐃᑲᓂ ᐅᓐᓄᓗᐊᓚᐅᖅᑎᓐᓇᒍ, ᒪᕐᕉᒃ (2) ᐊᕐᓈᒃ ᐱᑦᑎᐊᖃᑦᑕᐅᑎᓚᐅᖏᒻᒪᑎᒃ ᐊᕕᑦᑎᑕᐅᒋᐊᖃᓕᓚᐅᖅᑑᒃ.

[166] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓇᓗᓇᐃᕐᓯᓚᐅᖅᑐᑦ ᐊᓯᖃᓚᐅᖏᒻᒪᑕ ᐊᑐᖅᑕᐅᔪᓐᓇᖅᑐᓂᑦ ᐃᓪᓗᒦᑎᒋᐊᖓ A.B.; ᒪᓕᑦᑐᒋᑦ ᐅᖃᐅᓯᖏᑦ ᓵᔨᓐ ᒋᐅᓪ, ᐊᓂᑎᑦᓯᓕᓚᐅᖅᑐᑦ "ᐋᖓᔮᖏᓂᕐᓴᒥᑦ" ᐊᕐᓇᒥᑦ, ᑎᒍᔭᐅᓯᒪᓕᓚᐅᖅᑐᒥᑦ ᐱᖓᓲᔪᖅᑐᓄᑦ (6) ᐃᑲᕐᕋᓄᑦ ᐊᒻᒪ ᐃᑲᕐᕋᐅᑉ ᐊᕝᕙᖓᓂᑦ. ᐃᓂᓕᐅᖅᑕᐅᔪᓐᓇᓕᓚᐅᖅᑐᖅ A.B. ᑎᒍᔭᐅᒪᕕᒻᒥ ᐃᓪᓗᕈᓯᕐᒧᑦ 3. ᓵᔨᓐ ᒋᐅᓪ ᐅᖃᓚᐅᖅᑐᖅ ᑎᒍᔭᐅᒪᕖᑦ ᐃᓪᓗᕈᓰᑦ ᐃᓄᖃᐃᓐᓇᕈᔪᑉᐸᑦᑐᑦ "ᐃᒥᐊᓗᑦᑕᖃᖅᑎᓪᓗᒍ ᓄᓇᓕᓐᓂ." ᐱᓇᓱᐊᕈᓯᕐᓂ ᓯᕗᓪᓕᕐᓂ, ᐅᓐᓄᖃᓚᐅᕐᓯᒪᒻᒥᔪᑦ ᑎᒍᓯᓯᒪᑎᓪᓗᒋᑦ 13-ᓂᑦ ᑎᒍᔭᐅᒪᕕᓐᓂ ᐃᓪᓗᕈᓯᕐᓂ, ᐊᒻᒪ ᐊᓯᐊᓂ ᐅᓐᓄᕐᒥ ᖁᓕᐅᓚᐅᕐᓯᒪᔪᑦ (10).   

[167] ᖃᐅᔨᓴᖅᑏᑦ ᕿᒥᕐᕈᐊᓚᐅᖅᑐᑦ ᐊᐅᓚᔪᒥᑦ ᐊᔾᔨᓕᐅᖅᑕᐅᓯᒪᔪᒥᑦ ᕿᓂᕐᕕᐅᑎᓪᓗᒍ, ᐊᔾᔨᓕᐅᖅᑕᐅᔪᕕᓂᖅ ᐸᓖᓯᒃᑯᑦ ᑎᒍᔭᐅᒪᕕᖓᓐᓂ ᐃᓗᐊᓂ ᐊᔾᔨᓕᐅᕈᑎᓄᑦ, ᐊᒻᒪ ᑕᑯᑦᓴᐅᓗᓂ ᑳᓐᔅᑕᐳᓪ ᑭᐅᓕᖕ ᐊᒻᒪ ᓵᔨᓐ ᒋᐅᓪ ᐊᔾᔭᕐᓯᔫᒃ A.B.-ᒥᑦ, ᑭᑮᖓᖅᑕᐅᓯᒪᔪᖅ, ᐃᓪᓗᕈᓯᕐᒧᑦ ᑎᒍᔭᐅᒪᕕᒻᒧᑦ ᐊᒻᒪ ᐃᓕᔭᐅᓗᓂ ᐹᒻᒪᖓᑎᓪᓗᒍ ᓇᑎᕐᒧᑦ. ᑳᓐᔅᑕᐳᓪ ᓯᒥᖦ ᑭᖑᓂᑦᓯᐊᖓᓃᑦᑐᓂ ᐊᓯᖏᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᒻᒪ ᐃᓯᒐᒻᒥᓂᒃ ᐊᑐᖅᑐᓂ ᓄᓱᑦᓯᔫᔮᖅᑐᖅ A.B.-ᒥᑦ ᒥᑦᓯᒻᒥᓄᑦ. ᑳᓐᔅᑕᐳᓪ ᓯᒥᖦ ᑎᒍᓯᔫᔮᑦᑕᓕᖅᐳᖅ A.B. ᓂᐅᖓᓂᑦ ᐊᒻᒪ ᑲᐃᕙᑎᑦᑐᓂᐅᒃ A.B. ᐹᒻᒪᖓᓪᓗᐊᓕᖅᑐᓂ.

[168] ᑳᓐᔅᑕᐳᓪ ᑭᐅᓕᖕ ᑎᒍᒥᐊᖅᑐᖅ A.B. ᐊᒡᒐᖏᓐᓂᒃ ᑕᓕᖏᓐᓂᓘᓐᓃᑦ ᑳᓐᔅᑕᐳᓪ ᓯᒥᖦ, ᐃᑲᔪᖅᑕᐅᓕᖅᑐᖅ ᑳᓐᔅᑕᐳᓪ ᓱᓚᑦᒧᑦ, A.B.-ᒥᑦ ᖃᓪᓕᖏᕐᓯᒐᓱᑦᑎᓪᓗᒋᒃ. ᓵᔨᓐ ᒋᐅᓪ ᐃᓗᐊᓃᒻᒥᔪᖅ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ, ᓇᖏᖅᑐᖅ ᓴᓂᕌᓂ. ᑳᓐᔅᑕᐳᓪ ᓯᒥᖦ ᑎᒍᒥᐊᖅᑐᖅ A.B. ᐃᓗᐊᖏᑕ ᑕᓯᔪᐊᔫᖓᓄᑦ ᐲᖁᓇᒋᒃ ᖃᓪᓕᖏᖅᑕᐅᑎᓪᓗᒍ.

[169] ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓯᒥᖦ ᓱᓇᒥᒃᑭᐊᖅ ᐲᕐᓯᓇᓱᑦᑑᔮᑦᑕᓕᖅᐴᒃ, ᐃᒻᒪᖄ ᐊᐃᖃᖏᑦᑐᒥᑦ ᐅᕕᓂᕈᐊᓂᑦ, ᑖᓐᓇ ᐃᒧᓯᒪᔫᔮᖅᑐᖅ ᐅᕝᕙᓘᓐᓃᑦ ᐅᓕᑦᓯᓯᒪᔫᔮᖅᑐᖅ ᑭᑭᒐᐅᑏᓐᓂᒃ. ᑳᓐᔅᑕᐳᓪ ᓯᒥᖦ ᓇᔪᒻᒥᑦᓯᑦᑕᓕᖅᐳᖅ A.B. ᓂᐅᖏᓐᓂᒃ ᐃᑲᔪᖅᑕᐅᓗᓂ ᑳᓐᔅᑕᐳᓪ ᓱᓚᑦᒧᑦ, ᓵᔨᓐ ᒋᐅᓪᑯᒃ ᐊᒻᒪ ᑳᓐᔅᑕᐳᓪ ᑭᐅᓕᖕᑯᒃ ᐲᕐᓯᓇᓱᐊᖅᑑᔮᖅᑎᓪᓗᒋᒃ ᐅᕕᓂᕈᕐᒥᑦ ᐊᒻᒪ/ᐅᕝᕙᓘᓐᓃᑦ ᑭᑭᒐᐅᑏᓐᓂᒃ. A.B. ᑕᑯᑦᓴᐅᑦᑕᓕᖅᐳᖅ ᐊᑐᖅᑎᓐᓇᒍ ᑭᑭᒐᐅᑏᓐᓂᒃ, ᐊᒻᒪ ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᓯᒥᖦ ᑕᑯᑦᓴᐅᑦᑕᓕᖅᐴᒃ ᐲᕐᓯᓇᓱᐊᖅᑎᓪᓗᒋᒃ A.B. ᐅᕕᓂᕈᐊᓂᑦ (ᐊᐃᖃᖏᑦᑐᒥᑦ ᐅᕕᓂᕈᕐᓯᒪᔫᔮᖅᑐᖅ ᐊᒻᒪ ᐊᐃᓕᒻᒥᑦ ᐅᕕᓂᕈᕐᒥᑦ ᐊᑐᖅᑐᓂ ᓯᓚᑖᒍᑦ). ᓄᓱᑦᓯᓪᓗᑎᒃ ᐊᐃᖏᓐᓂᒃ ᐅᕕᓂᕉᑉ ᐊᑦᓱᕈᓪᓗᐊᖅᑐᑎᒃ ᐊᒻᒪ ᑕᒪᒃᑮᒃ ᐊᑐᖅᑕᖏᒃ ᐅᕕᓂᕉᒃ ᐊᑕᐅᑦᑎᒃᑯᑦ ᐲᖅᑐᐃᓐᓇᐅᓗᑎᒃ A.B.-ᒥᑦ.

[170] ᐱᖓᓱᐃᑦ (3) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᓂᓪᓗᑎᒃ ᑎᒍᔭᐅᒪᕕᒻᒥᑦ ᐃᓪᓗᕈᓯᕐᒥᑦ, ᑳᓐᔅᑕᐳᓪ ᑭᐅᓕᖕ ᓱᓕ ᑎᒍᒥᐊᖅᑐᓂ A.B.-ᒥᑦ, ᐊᒻᒪ ᑳᓐᔅᑕᐳᓪ ᑭᐅᓕᖕ ᐊᓂᑦᑕᓕᖅᐳᖅ. A.B. ᕿᒪᑦᑕᐅᔪᖅ ᓇᓚᑎᓪᓗᒍ ᓇᑎᕐᒥ ᑎᒍᔭᐅᒪᕕᒻᒥ ᐃᓪᓗᕈᓯᕐᒥ ᐃᓗᐊᖏᓐᓈᖅᑐᓂ. ᑕᑯᑦᓴᐅᔪᖅ ᐊᐅᓚᔭᑦᑎᓪᓗᒍ, ᑐᒃᑲᖅᑐᖅ, ᐊᑦᓴᑳᔪᖅ, ᐊᒻᒪ ᕿᑎᖅᑎᕐᒥᓄᑦ ᑎᒃᑯᐊᐸᑦᑐᓂ ᑕᒪᒃᑮᓐᓄᑦ ᐊᒡᒐᖏᓐᓄᑦ ᒥᑦᓵᓄᑦ ᖃᐅᔨᓴᐅᑎᐅᑉ ᐊᔾᔨᓕᐅᕈᑎᐅᑉ. ᕿᓂᖅᑐᑦ ᐊᑯᓂᐅᑎᒋᔪᒥᑦ 3 ᒪᓇᑦᓯᓂᑦ ᐊᒻᒪ 20 ᓴᑲᓐᔅ.

[171] ᐱᔾᔪᑎᒋᓪᓗᒍ A.B. ᖃᓄᐃᓕᐅᕈᑎᖏᑦ ᕿᓂᕐᕕᐅᑎᓪᓗᒍ, ᐊᑕᐅᓯᐊᖅᑐᓂ ᐊᐅᓚᔾᔭᑲᓪᓚᑦᑐᖅ ᐊᒻᒪ ᓵᑦᑐᓂ ᑕᓕᖅᐱᒻᒥᓄᑦ, ᕿᒫᒐᓱᑦᑑᔮᖅᑐᓂ ᑳᓐᔅᑕᐳᓪ ᑭᐅᓕᖕᒥᑦ. ᑕᒪᓐᓇ ᐱᓪᓗᒍ ᑳᓐᔅᑕᐳᓪ ᓯᒥᖦ ᐊᑐᓕᖅᑐᒥᓂᐅᓂᖓ ᐃᓯᒐᒻᒥᓂᒃ ᓄᓱᑦᓯᔾᔪᑎᒋᓪᓗᓂᐅᒃ A.B.-ᒥᑦ ᒥᑦᓯᒻᒥᓄᑦ. ᐃᓛᓐᓂᓚᐅᓱᖓᒃᑯᑦ, A.B. ᑕᑯᑦᓴᐅᕙᑦᑐᖅ ᐊᐅᓚᑎᑦᓯᑎᓪᓗᒍ ᓂᐅᖏᓐᓂᒃ. ᑕᑯᑦᓴᐅᕙᑦᑐᖅ ᓴᖑᑎᑦᑐᓂ ᐊᒻᒪ ᓴᐅᒥᒻᒥᓂᒃ ᖃᓪᓕᕌᓕᖅᐸᑦᑐᓂ. ᕿᓂᕐᕕᐅᖏᓐᓇᑎᓪᓗᒍ, A.B. ᐊᐅᓚᓗᐊᖅᑑᔮᖏᑦᑐᖅ, ᐃᒻᒪᖃᖃᐃ ᑎᒍᒥᐊᖅᑕᐃᓂᖓᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ.

[172] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖏᓐᓂ^{Footnote 21} ᐱᔾᔪᑎᖃᖅᑐᓂᑦ ᑎᒥᖏᓐᓂᑦ ᕿᓂᕐᓂᕐᒥᑦ ᑎᑎᕋᕐᓯᒪᔪᑦ:

2.3. ᑎᒥᒥᑦ ᕿᓂᕈᓐᓇᖅᑐᑦ ᐱᓕᕆᐊᖃᖅᐸᓪᓗᑎᒃ ᐊᕝᕕᐊᕋᓱᑉᐸᖏᓪᓗᑎᒃ ᐊᔪᕐᓇᖏᑐᐊᖅᐸᑦ ᑲᖕᖑᒋᔭᖏᓐᓂᑦ ᐊᒻᒪ ᐃᑉᐱᒋᔭᐅᑦᑎᐊᕆᐊᖃᕐᓂᖏᓐᓂᑦ ᐃᓱᒪᒃᑯᑦ ᑕᐃᒃᑯᐊ ᕿᓂᕐᕕᐅᔪᐃᑦ ᐊᒻᒪ ᓱᕋᑦᑕᐅᖏᓪᓗᑎᒃ ᑎᑎᕋᕐᓯᒪᕕᒻᒦᑦᑐᑦ 8, ᑲᓇᑕᒥ ᐅᖃᓕᒫᒐᐃᑦ ᐱᔪᓐᓇᐅᑎᓂᑦ ᐊᒻᒪ ᐃᓱᒪᕐᓱᓂᕐᒥᑦ.

2.4. ᐊᓐᓄᕌᕐᓯᒪᖏᑦᑐᓂᑦ ᕿᓂᕐᓂᐅᔪᖅ ᐃᓱᒪᒋᔭᐅᕙᖕᖏᑦᑐᖅ ᐸᓖᓯᒃᑯᓐᓄᑦ ᐱᓕᕆᔾᔪᑎᓃᓐᓂᖏᓐᓂᑦ.

ᐃᖃᐅᒪᔾᔪᑎᑦ: ᐊᑦᓱᕈᕐᓗᑎᒃ ᐱᔭᕇᕈᓐᓇᕐᓂᕈᑎᒃ ᑭᓯᐊᓂ ᐊᓐᓄᕌᕐᓯᒪᖏᑦᑐᓂᑦ, ᐊᑐᖅᑕᐅᓂᖓ ᑕᐃᑦᓱᒪ ᖃᓄᑎᒋ ᐊᑦᓱᕈᖅᑐᑎᒃ ᒪᓕᒋᐊᓖᑦ ᑎᑎᕋᕐᓯᒪᔪᓂᑦ ᐱᕋᔭᐅᑎᓄᑦ ᐊᑐᐊᒐᑦ ᑲᓇᑕᒥ ᐊᑐᖅᑕᐅᕙᑦᑐᓂᑦ ᐊᒻᒪ ᖃᓄᐃᒍᑎᐅᔪᓂᑦ ᐊᐅᓚᑦᓯᓂᖅ/ᐊᑐᑦᑕᐃᓕᒪᑎᑦᓯᔾᔪᑎᓂᑦ ᐆᑦᑑᑎᒥᑦ ᖃᓄᖅ ᐊᑐᕆᐊᖃᕐᓂᖏᓐᓂᑦ.

2.5. ᐊᓐᓄᕌᕐᓯᒪᖏᑦᑐᓂᑦ ᕿᓂᕈᓐᓇᖅᑐᑦ ᑭᓯᐊᓂ ᓈᒻᒪᑦᑐᓂᑦ ᐃᓱᒪᔪᖃᕐᓂᖅᐸᑦ:

2.5.1. ᑎᒍᔭᐅᖅᑲᔪᖅ ᐃᔨᕐᓯᓯᒪᓱᕆᔭᐅᒍᓂ ᓇᓗᓇᐃᔭᐃᑎᓂᑦ ᐊᑦᑐᐊᔪᓂᑦ ᑎᒍᔭᐅᔾᔪᑎᐅᔪᒧᑦ, ᐅᕝᕙᓘᓐᓃᑦ
2.5.2. ᑎᒍᔭᐅᖅᑲᔪᖅ ᐃᔨᕐᓯᓯᒪᓱᕆᔭᐅᒍᓂ ᓱᓇᑐᐃᓐᓇᕐᒥᑦ ᐊᑐᕈᓐᓇᖅᑕᒥᓂᒃ ᕿᒫᓵᕈᑎᒋᓗᓂᐅᒃ ᐅᕝᕙᓘᓐᓃᑦ ᐊᑦᑕᓇᖅᑐᓕᕆᓂᕐᒥᑦ ᐃᓱᒫᓗᑦᑎᑦᓯᓕᕐᓗᑎᒃ ᐸᓖᓯᓂᑦ, ᑭᒃᑯᑐᐃᓐᓇᕐᓂᑦ, ᐅᕝᕙᓘᓐᓃᑦ ᑎᒍᔭᐅᖅᑲᔪᒥᑦ.

2.6. ᒪᓕᑦᑐᒋᑦ ᑎᑎᕋᕐᓯᒪᕕᒻᒦᑦᑐᑦ 3.1.2, ᐊᓐᓄᕌᕐᓯᒪᖏᑦᑐᓂᑦ ᕿᓂᕐᕕᖃᕆᐊᖃᖅᐸᑦᑐᑦ ᑭᓇᑐᐃᓐᓇᕐᒥᑦ ᐊᖑᑎᐅᖃᑎᒥᓂᒃ ᐅᕝᕙᓘᓐᓃᑦ ᐊᕐᓇᐅᖃᑎᒥᓂᒃ, ᑭᒃᑯᑐᐃᓐᓇᕐᓄᑦ ᑕᑯᓐᓇᖅᑕᐅᖏᓪᓗᑎᒃ.

ᐊᑐᖕᖏᔾᔪᑎᑦᓴᖅ: ᐊᓯᐊᒍᑦ ᐱᑕᖃᕈᓂ ᑐᐊᕕᐊᖑᓗᓂ ᖃᓄᐃᒍᑎᖃᕈᓂ ᕿᓂᕐᕕᐅᒋᐊᖃᑦᑕᐅᑎᒋᒍᑎᒃ ᓇᓗᓇᐃᔭᐃᑎᓂᑦ ᐊᓯᐅᔨᒍᒪᒐᑎᒃ ᐅᕝᕙᓘᓐᓃᑦ ᓇᓗᓇᐃᕐᓯᒪᒍᒪᒐᒥᒃ ᐃᓗᓯᖏᑎᒍᑦ ᐊᒻᒪ ᐊᑦᑕᓇᔾᔭᐃᕐᓯᒪᒋᐊᖃᕐᓂᖏᑎᒍᑦ ᐃᓚᒋᔭᐅᔪᑦ, ᑭᒃᑯᑐᐃᓐᓇᐃᑦ, ᐅᕝᕙᓘᓐᓃᑦ ᑎᒍᔭᐅᖅᑲᔪᑦ.

[173] ᐊᓐᓄᕌᕐᓯᒪᖏᑦᑐᓂᑦ ᕿᓂᕐᓂᐅᔪᖅ ᑐᑭᓕᐅᕈᑎᐅᓯᒪᔪᑦ ᐃᒫᒃ "ᐲᔭᐃᓂᖅ ᐅᕝᕙᓘᓐᓃᑦ ᐋᖅᑭᒋᐊᕆᓂᖅ ᐃᓚᖏᓐᓂᑦ ᐅᕝᕙᓘᓐᓃᑦ ᐃᓘᓐᓇᖏᓐᓂᑦ ᐊᓐᓄᕌᖏᓐᓂᑦ ᑭᓇᑐᐃᓐᓇᐅᑉ ᑕᑯᓐᓇᖅᑕᐅᓗᓂ ᖃᐅᔨᓴᖅᑕᐅᔪᓐᓇᕈᒪᓪᓗᑎᒃ ᑭᓇᑐᐃᓐᓇᖅ ᐊᑯᓛᕐᒥᐅᑕᖃᖏᒃᑲᓗᐊᕐᒪᖔᖅ, ᐱᓗᐊᖅᑐᒥ ᐅᓱᖓᓂ/ᐃᔾᔪᖏᓐᓂ, ᐅᑉᐸᑎᖏᓐᓂ, ᐊᒻᒪ ᐃᕕᐊᖏᖏᓐᓂ (ᐊᕐᓇᐅᒍᓂ), ᐅᕝᕙᓘᓐᓃᑦ ᐃᓗᐊᖏᓐᓂ ᖃᕐᓕᕋᓛᖏᓐᓂᓘᓐᓃᑦ."^{Footnote 22} ᒪᓕᑦᑐᒋᑦ ᓇᓗᓇᐃᔭᖅᑕᐅᓯᒪᔪᑦ ᐅᖃᐅᓰᑦ, ᐊᓐᓄᕋᐃᔭᖅᑎᖅᑕᐅᓯᒪᓪᓗᑎᒃ ᕿᓂᕐᕕᖃᕐᓂᐅᔪᖅ ᐃᓱᒪᒋᔭᐅᖏᑦᑐᖅ ᐸᓖᓯᒃᑯᓐᓄᑦ ᐱᓕᕆᔾᔪᑎᐅᕙᒋᐊᖓ ᐱᐅᓯᒃᑯᑦ ᐊᒻᒪ ᐊᑐᖅᑕᐅᒋᐊᖃᖅᐸᑦᑐᑎᒃ ᐊᑐᖅᑕᐅᓐᓂᕈᑎᒃ ᑭᓯᐊᓂ ᖃᓄᐃᓕᖓᒍᑎᐅᔪᑦ ᑎᑎᕋᕐᓯᒪᔪᑦ ᐊᑐᐊᒐᕐᒥ,^{Footnote 23} ᐊᒻᒪ ᐊᑦᓱᕈᓗᐊᕆᐊᖃᕋᑎᒃ ᐱᓕᕆᐊᖃᖅᑎᓪᓗᒋᑦ ᑕᐃᒫᒃ.

[174] ᑕᕝᕙᓂᓕ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐲᔭᐃᓚᐅᖅᑐᑦ A.B. ᐊᓐᓄᕌᖏᓐᓂᑦ ᐃᓗᐊᕐᓯᒪᑐᐃᓐᓇᓕᖅᑐᓂ ᐸᓖᓯᓄᑦ ᕿᒪᑦᑕᐅᒐᒥ ᑎᒍᔭᐅᒪᕕᒻᒥᑦ ᐃᓪᓗᕈᓯᕐᒥᑦ. ᒪᓕᑦᑐᒋᑦ ᐱᓕᕆᔾᔪᑎᒍᑦ ᒪᓕᒐᐃᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᑐᐊᒐᖓᑦ, ᑕᒪᓐᓇ ᐊᓐᓄᕌᖃᖏᑦᑐᓂᑦ ᕿᓂᕆᐊᖃᕈᑎᐅᔪᖅ.

[175] ᕿᓂᓚᐅᖅᑐᑦ ᐊᖑᑏᑦ ᐸᓖᓰᑦ ᐊᒻᒪ ᑎᒍᔭᐅᒪᕕᒻᒦᓚᐅᖅᑐᑦ ᐃᓪᓗᕈᓯᕐᒥ ᐊᓯᖃᕋᑎᒃ ᕿᓂᕐᕕᒃ ᐊᒻᒪ ᕿᓂᖅᑐᑦ.

[176] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐅᖃᓚᐅᖅᑐᑦ ᐲᔭᐃᓚᐅᕐᒪᑕ A.B. ᐊᓐᓄᕌᖏᓐᓂᑦ ᐅᐱᓐᓇᕋᓂ ᖃᐅᓯᐊᓘᓚᐅᕐᒪᑕ. ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ A.B. ᕿᐅᓂᐅᓴᓂᐊᕐᓂᕐᒪᑦ ᐊᑐᑐᐃᓐᓇᕈᓂ ᖃᐅᓯᕐᓂᒃ ᐊᓐᓄᕌᓂᒃ. ᐊᐅᓚᔪᖅ ᐊᔾᔨᓕᐅᖅᑕᐅᓯᒪᔪᒥ ᐸᓖᓯᒃᑯᑦ ᓄᓇᒃᑰᔫᖓᑦ ᐃᓚᒋᔭᐅᓗᓂ ᖃᓄᐃᒍᑎᐅᓚᐅᖅᑐᖅ ᐊᒻᒪ A.B. ᑎᒍᔭᐅᑎᓪᓗᒍ ᑕᑯᑦᓴᐅᑎᑦᓯᔪᑦ A.B. ᐅᕐᕈᑎᑕᐅᓯᒪᔪᒥᓂᖅ ᐃᓯᕐᓴᒥ ᐃᒪᐃᓐᓇᕐᒥ. ᓯᓚᐅᑉ ᖃᓄᐃᓐᓂᖓᓂᑦ ᖃᐅᔨᓴᐅᑏᑦ ᑕᑯᑦᓴᐅᑎᑦᓯᔪᑦ ᓯᓚᐅᑉ ᓂᕈᒥᓐᓂᖓ ᑭᖕᖓᕐᓂ ᑕᐃᑦᓱᒪᓂ ᐃᒃᑮᓇᕐᓂᕆᓚᐅᖅᑕᖓ -1 ᐊᓐᓄᕆᒧᑦ ᓂᓪᓚᓱᓐᓂᖃᖅᑐᓂ -5;^{Footnote 24} ᐃᓚᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓇᓴᕐᓯᒪᓚᐅᖅᑐᑦ ᓂᕈᒥᑦᑐᓂᑦ.

[177] ᐲᔭᖅᑕᐅᓂᖏᑦ ᖃᐅᓰᑦ ᐊᓐᓄᕌᑦ ᑎᑎᕋᖅᑕᐅᓯᒪᓚᐅᖅᑐᑦ ᐱᔾᔪᑎᐅᓐᓂᖏᓐᓂᑦ ᐊᓐᓄᕌᖃᖏᑦᑐᓂᑦ ᕿᓂᕐᕕᖃᕈᓐᓇᕆᐊᑦᓴᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᑐᐊᒐᖏᓐᓂ; ᑭᓯᐊᓂᓕ, ᑖᓐᓇ ᐱᓕᕆᔾᔪᑎᐅᓚᐅᖅᑐᖅ ᐱᓪᓗᒍ, ᖃᐅᓰᑦ ᐊᓐᓄᕌᑦ ᐃᓱᒪᒋᔭᐅᔪᓐᓇᕐᒪᑕ ᓱᓇᐅᓂᖓᓄᑦ ᐊᑦᑕᓇᖅᑐᓕᕆᓂᒃᑯᑦ ᐃᓱᒫᓘᑎᐅᔪᓐᓇᕐᓂᖓᓄᑦ ᑎᒍᔭᐅᖅᑲᔪᒧᑦ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓈᒻᒪᑦᑐᒥᓂᐅᓂᖓᓄᑦ, ᐊᒻᒪ ᐊᑲᐅᓂᖅᐹᒃᑯᑦ ᐊᑦᑕᓇᖅᑐᒦᖁᓇᒍ A.B., ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐲᔭᐃᒋᐊᖃᓕᓚᐅᖅᑐᑦ A.B. ᐊᓐᓄᕌᖏᓐᓂᑦ ᖃᐅᓯᐊᓘᓚᐅᖅᑐᓂᑦ.

[178] ᑎᒥᒥᑦ ᕿᓂᖅᑎᓪᓗᒋᑦ ᐊᑐᕆᐊᖃᖅᐸᑦᑐᑦ "ᐱᓕᕆᔾᔪᓯᖃᖅᐸᓪᓗᑎᒃ ᓴᖅᑮᑦᑕᐃᓕᒪᕙᓪᓗᑎᒃ ᑭᓇᑐᐃᓐᓇᐅᑉ ᑲᖕᖑᒋᔭᖏᓐᓂᑦ ᐊᒻᒪ ᐃᑉᐱᒋᔭᐅᑦᓯᐊᕆᐊᖃᕐᓂᖏᓐᓂᑦ ᐃᓱᒪᖃᕐᓂᖏᓐᓂᑦ ᑕᐃᒃᑯᐊ ᕿᓂᕐᕕᐅᕙᑦᑐᑦ ᐊᒻᒪ ᓱᕋᐃᑦᑕᐃᓕᒪᕙᓪᓗᑎᒃ ᑎᑎᕋᕐᓯᒪᕕᒻᒦᑦᑐᓂᑦ 8 ᐱᔪᓐᓇᐅᑎᓕᕆᔪᒥᑦ" (ᓈᒻᒪᖏᑦᑐᒃᑯᑦ ᕿᓂᕐᕕᐅᔪᑦ ᐊᒻᒪ ᑎᒍᔭᐅᔪᑦ). ᑕᕝᕙᓂᓕ ᐱᓕᕆᐊᒥ, ᐱᖓᓱᐃᑦ (3) ᐊᒻᒪ ᐃᓛᓐᓂᒃᑯᑦ ᑎᓴᒪᐅᓕᖅᐸᑦᑐᑎᒃ (4) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᖃᑕᐅᓚᐅᖅᑐᑦ ᕿᓂᕐᕕᐅᑎᓪᓗᒍ A.B. ᑕᒪᓐᓇ ᐃᓱᒪᒋᓪᓗᒍ, ᑕᐃᒪᓐᓇᐅᑎᓪᓗᒋᑦ ᐸᓖᓰᑦ ᐊᒥᓲᓗᐊᖅᑑᔮᕐᒪᑕ ᐱᓪᓗᒋᑦ ᐊᑦᑐᐊᓂᖏᑦ ᓴᐳᒻᒥᔭᐅᒋᐊᓕᓐᓂᑦ ᑎᒍᔭᐅᔫᑉ ᑲᖕᖑᒋᔭᖏᓐᓂᑦ ᐊᒻᒪ ᐃᑉᐱᒋᔭᐅᑦᓯᐊᕆᐊᖃᕐᓂᖏᓐᓂᑦ ᐃᓱᒪᖃᕐᓂᖏᓐᓂᑦ.

[179] ᑭᓯᐊᓂᓕ, A.B. ᖁᓄᐃᓐᓇᕈᔪᓚᐅᖅᑐᖅ ᖃᓄᑐᐃᓐᓇᖅ ᐸᓖᓯᓂᑦ ᑎᒍᔭᐅᓇᓱᐊᓕᓚᐅᕋᒥᓂᒃ, ᐊᒻᒪ ᐋᖓᔮᖅᑐᒻᒪᕆᐅᓗᓂ. ᖁᓄᐃᓐᓇᓚᐅᖅᑐᖅ ᑎᒍᔭᐅᕕᒻᒨᐸᓪᓕᐊᑎᓪᓗᒋᑦ ᐊᒻᒪ ᖁᓄᐃᓐᓇᖅᑐᓂ ᐱᓚᐅᖅᑐᖅ ᕿᓂᕐᕕᐅᑎᓪᓗᒍ.

[180] ᐱᒻᒪᕆᐅᓚᐅᖅᑐᖅ, ᑎᒍᔭᐅᒪᕕᒻᒥ ᐅᐊᑦᓯᐅᓚᐅᖅᑐᖅ ᐅᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓂᑦ A.B. "ᓂᖕᖓᐅᒪᔪᒻᒪᕆᐅᓚᐅᖅᑐᖅ" ᐃᓯᖅᑕᐅᒐᒥ ᑎᒍᔭᐅᒪᕕᒻᒧᑦ. ᓇᓗᓇᐃᕐᓯᒋᐊᖁᔭᐅᒐᒥ ᑕᒪᑦᓱᒥᖓ, ᐅᐊᑦᓯᐅᓚᐅᖅᑐᖅ ᐅᖃᓚᐅᖅᑐᖅ, "ᑖᓪᓇᑑᖕᖏᑦᑐᖅ [A.B.], ᑭᓯᐊᓂᑦᑕᐅᖅ ᐊᓯᖏᑦ ᑎᒍᔭᐅᕙᑦᑐᑦ – ᐃᓯᖅᑕᐅᑐᐊᕋᐃᒻᒪᑕ ᑎᒍᔭᐅᖅᑲᕕᑦᑎᓐᓄᑦ, ᐅᕝᕙᓘᓐᓃᑦ ᐃᓗᐊᓃᓕᕋᐃᒻᒪᑕ ᑎᒍᔭᐅᖅᑲᕕᐅᑉ, ᖁᓄᐃᓐᓇᐸᑦᑐᑦ. ᑕᐃᒫᒃ ᓂᖕᖓᐅᒪᓗᐊᕐᓂᑯᖓᓄᑦ ᖁᓄᓂᕐᓴᐅᓕᓚᐅᖅᑐᖅ." ᐅᐊᑦᓯᐅᓚᐅᖅᑐᖅ ᐅᖃᕆᐊᓚᐅᖅᑐᖅ ᖃᐅᔨᒪᓂᕋᖅᑐᓂᐅᒃ A.B. ᓯᕗᓪᓕᕐᓂ ᑎᒍᓯᕕᒻᒨᖅᑕᐅᒐᐃᒻᒪᑦ ᐊᒻᒪ ᖃᐅᔨᒪᓂᕋᖅᑐᓂᐅᒃ ᐱᐅᓯᖓᓂᑦ ᐋᖓᔮᓕᕋᐃᒐᒥ.

[181] ᐊᑦᑕᓇᖅᑐᒦᖁᓇᒋᑦ ᐃᓘᓐᓇᑎᒃ ᐱᓕᕆᖃᑕᐅᓚᐅᖅᑐᑦ, ᓈᒻᒪᓚᐅᖅᑐᖅ ᖃᑦᓯᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᖃᑕᐅᑎᓪᓗᒋᑦ ᕿᓂᕐᕕᖃᕐᓂᕐᒥᑦ. ᖃᐅᔨᒪᖁᔭᐅᓚᐅᕐᒥᔪᖅ ᑳᓐᔅᑕᐳᓪ ᓯᒥᖦ ᑎᒍᒥᐊᕋᓱᓚᐅᖅᑐᖅ A.B. ᐃᓗᐊᖏᑕ ᑕᓯᔪᐊᔫᖓᓂᑦ ᐸᓖᓯᓄᑦ ᖃᕐᓕᖏᖅᑕᐅᓇᓱᐊᖅᑎᓪᓗᒍ, ᐃᓗᐊᖏᒃ ᐱᖃᓯᐅᑎᓂᐊᖏᒻᒪᑎᒃ. ᖃᖓᑐᐃᓐᓇᒃᑯᑦ A.B. ᐊᑯᓛᖏᑦ ᓴᖅᑭᓚᐅᔪᖕᖏᑦᑐᑦ.

[182] ᑭᓯᐊᓂᓕ, A.B. ᕿᒪᑦᑕᐅᓯᒪᓚᐅᖅᑐᖅ ᓇᑎᕐᒧᑦ ᖃᓪᓕᑦᓯᒪᒐᓂ ᐃᓗᐊᕐᓯᒪᒐᓗᐊᖅᑐᓂ ᐊᒻᒪ ᑭᓇᒧᑦ, ᐱᖃᓯᐅᔾᔭᐅᓗᑎᒃ ᐸᓖᓯᒃᑯᑦ ᐅᕝᕙᓘᓐᓃᑦ ᑎᒍᔭᐅᒪᕕᒻᒥ ᐅᐊᑦᓯᖓᑦ, ᐱᑎᑕᐅᓚᐅᖏᑦᑐᖅ ᕿᐲᓐᓂᒃ ᐅᕝᕙᓘᓐᓃᑦ ᐋᓐᓂᐊᕕᒻᒦᑦᑐᓄᑦ ᐊᑐᖅᑕᐅᕙᑦᑐᒥᑦ ᐊᑕᔫᔭᒥᑦ. ᖃᐅᔨᒪᔭᐅᖏᑦᑐᖅ A.B. ᐊᐱᕆᓐᓂᕐᒪᖔᖅ ᑐᑦᓯᕋᖅᑐᓂ ᐅᓕᑦᓴᒥᑦ ᐅᓪᓛᕈᓚᐅᖅᑎᓐᓇᒍ, ᐊᐱᕆᓕᕐᓂᕐᒪᑦ ᐊᒻᒪ ᐱᑎᑕᐅᓐᓂᖅᑐᓂ ᕿᐲᓐᓂᒃ. ᖃᖓᑐᐃᓐᓇᒃᑯᑦ, ᐱᔾᔪᑎᒋᓪᓗᒍ ᖃᓄᐃᓕᖓᒍᑎᐅᔪᕕᓂᖅ, A.B. ᐱᑎᑕᐅᒋᐊᓕᒥᓂᐅᒐᓗᐊᖅ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᒃ, ᑕᐃᒪᐃᒍᓐᓇᕐᓂᕈᑎᒃ ᐊᑦᑕᓇᔾᔭᐃᕐᓯᒪᓗᑎᒃ, ᐱᓗᐊᖅᑐᒥ ᐱᔾᔪᑎᒋᓪᓗᒍ ᐊᓐᓄᕋᐃᔭᖅᑕᐅᓂᒥᓂᖓ ᐊᑦᑕᓇᖅᑐᒦᖁᔭᐅᒐᓂ ᕿᐅᖁᓇᒍ.

[183] A.B. ᐊᓐᓄᕌᕐᓯᒪᓐᓂᖏᑦᑐᖅ ᐃᓗᐊᕐᓯᒪᑐᐃᓐᓇᖅᑐᓂ ᐅᓪᓛᒧᓄᑦ 7:25-ᒧᓄᑦ. ᐃᑲᕐᕋᑲᓴᒻᒪᕆᓐᓂᑦ ᑎᓴᒪᐅᔪᖅᑐᓂᑦ (8) ᑎᒍᔭᐅᓚᐅᖅᑎᓪᓗᒍ, ᐊᒻᒪ ᐊᓯᐊᓄᑦ ᑎᒍᔭᐅᖅᑲᖃᑎᖓᓄᑦ ᐋᓐᓂᑎᖅᑕᒻᒪᕆᐅᓚᐅᖅᑎᓪᓗᒍ. ᖃᐅᔨᒪᔭᐅᒋᐊᓕᒃ, ᓯᕗᓂᐊᒍᑦ A.B. ᐊᓂᑎᑕᐅᓚᐅᖅᑎᓐᓇᒍ, ᑳᓐᔅᑕᐳᓪ ᑭᐅᓕᖕ ᐅᐸᑦᓯᒪᓚᐅᖅᑐᖅ A.B. ᐊᓈᓇᖓᓂᑦ ᐊᐃᑦᓯᕐᓯᒪᓪᓗᓂ ᓴᓗᒪᔪᓂᑦ ᐊᓐᓄᕌᖏᓐᓂᑦ A.B. ᐊᑎᓂᐊᖅᑕᖏᓐᓂᑦ ᐊᓂᑎᑕᐅᒍᓂ.

[184] ᐃᓚᖓᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᐃᓚᒋᔭᐅᓚᐅᖅᑐᖅ ᕿᓂᕐᕕᐅᑎᓪᓗᒍ A.B. (ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓱᓚᑦ, ᐅᕝᕙᓘᓐᓃᑦ ᓵᔨᓐ ᒋᐅᓪ ᖃᐅᔨᓴᖅᑎᒋᔭᐅᓗᓂ ᐸᓖᓯᓄᑦ) ᓇᓗᓇᐃᕈᓐᓇᖅᑐᖃᕐᓂᖅᐸᑕ A.B. ᐱᑎᑕᐅᒐᓗᐊᕐᒪᖔᖅ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᒃ ᕿᓚᒥᐅᔫᒥᔪᖅ ᐊᑐᖅᑕᐅᔪᓐᓇᕐᓂᕈᓂ ᐊᑦᑕᓇᔾᔭᐃᕐᓯᒪᓗᑎᒃ. ᖃᐅᔨᓴᖅᑏᑦ ᐊᑐᖁᔨᔪᑦ ᑖᒃᑯᐊ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᑎᑕᐅᖁᓪᓗᒋᑦ ᐊᐅᓚᑦᓯᔾᔪᑎᓂᑦ ᐃᓕᓐᓂᐊᖅᑎᑕᐅᖁᔭᐅᓗᑎᒃ ᑕᒪᓐᓇ ᐱᓪᓗᒍ. ᑕᒪᓐᓇ ᐊᔾᔨᖃᖅᑐᖅ ᖃᐅᔨᓴᖅᑎᓄᑦ ᐊᑐᖅᑕᐅᖁᔭᐅᓯᒪᔪᓂᑦ ᐅᓂᒃᑳᓕᐊᖑᕋᑖᓚᐅᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᓯᔾᔩᖁᔭᐅᓗᑎᒃ ᑲᓇᑕᒥ ᐊᑐᐊᒐᕐᒥᓂᒃ ᑎᒍᔭᐅᖅᑲᔪᑦ ᐊᓪᓕᓂᕐᓂᒃ ᐅᕝᕙᓘᓐᓃᑦ ᕿᐲᓐᓂᒃ ᐱᑎᑕᐅᑦᓴᐃᓐᓇᖁᔭᐅᕙᑦᑐᑎᒃ ᐃᓘᓐᓇᖏᓐᓂ ᐱᓕᕆᐊᓂ ᐱᑕᖃᕐᓂᐅᓴᑎᓐᓇᒍ ᐅᓗᕆᐊᓇᑐᐃᓐᓇᕆᐊᓕᓐᓂᑦ ᐸᓖᓯᓄᑦ ᐅᕝᕙᓘᓐᓃᑦ ᑎᒍᔭᐅᖅᑲᔪᓄᑦ ᐊᑦᑕᓇᔾᔭᐃᒃᑯᑎᖏᓐᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᓴᖅᑎᖏᑦ ᐊᖏᖃᑎᖃᓚᐅᖅᑐᑦ ᖃᓄᐃᓕᐅᕈᑎᖃᕐᓂᐊᓂᕐᒥᓂᒃ ᐊᑐᖁᔭᐅᔪᖅ ᐱᔾᔪᑎᒋᓪᓗᒍ. ᑕᒪᓐᓇ ᐱᓪᓗᒍ, ᐊᓯᖏᓐᓂᑦ ᐊᑐᖁᔭᐅᔪᓂᑦ ᓴᖅᑮᒋᐊᑐᖕᖏᑦᑐᑦ ᑕᒪᓐᓇ ᐱᓪᓗᒍ ᐅᓂᒃᑳᓕᐊᓂ.

[185] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ SME ᕿᒥᕐᕈᓚᐅᖅᑎᓪᓗᒋᑦ ᖃᐅᔨᓴᕐᓂᕐᒥᑦ, SME ᐅᖃᓚᐅᖅᑐᑦ ᕿᓂᕐᓂᐅᓚᐅᖅᑐᖅ ᐊᑐᖅᑕᐅᓚᐅᕐᒪᑦ ᐅᐱᓐᓇᕋᓂ A.B. ᐅᖃᐅᓯᖃᕐᓂᕐᒪᑦ ᐃᓅᓯᕐᒥᓂᒃ ᑭᐱᓯᒍᒪᓂᕐᒥᑦ ᐃᖕᒥᓂᒃ ᐃᓱᒪᓂᕐᒥᓂᒃ. ᓇᓗᓇᖅᑐᖅ ᖃᓄᖅ ᑕᒪᓐᓇ ᐃᓱᒪᒋᔭᐅᓕᕐᓂᕐᒪᖔᖅ, ᑐᑭᓯᒋᐊᕈᑎᓂᑦ ᐊᑐᐃᓐᓇᖅᑕᖃᓚᐅᖏᒻᒪᑦ ᖃᐅᔨᓴᖅᑎᓄᑦ ᓇᓗᓇᐃᔭᐃᓯᒪᔪᓂᑦ A.B. ᐅᖃᐅᓯᖃᕐᓂᕐᒪᖔᖅ ᐃᓅᓯᕐᒥᓂᒃ ᑭᐱᓯᒍᒪᓂᕐᒥᑦ ᐃᖕᒥᓂᒃ ᓯᕗᓂᐊᒍᑦ ᑎᒍᔭᐅᒪᕕᒻᒧᑦ ᐃᓯᖅᑕᐅᓚᐅᖏᓂᕐᒥᓂ.

[186] ᑳᓐᔅᑕᐳᓪ ᓯᒥᖦ ᐅᖃᓚᐅᖅᑑᒐᓗᐊᖅ ᐊᒥᓱᑲᓪᓚᐅᕙᒻᒪᑕ ᐃᓅᓯᕐᒥᓂᒃ ᑭᐱᓯᕙᑦᑐᑦ ᐃᖕᒥᓂᒃ ᓄᓇᓕᖃᕐᕕᒻᒥ ᐊᒻᒪ, ᑭᓯᐊᓂᐅᒐᓗᐊᖅ "ᐊᑐᖅᑕᐅᓗᐊᖅᐸᖏᑦᑐᖅ ᐃᓘᓐᓇᑦᓯᐊᖏᓐᓂ ᐃᓂᓂ," ᐸᓖᓯᒃᑯᑦ ᐲᕐᓯᒐᔪᑦᑐᑦ ᓱᓇᑐᐃᓐᓇᕐᓂᒃ ᓲᕐᓗ ᕿᓚᕈᑎᐅᔪᓂᑦ ᓲᕐᓗ ᖃᕐᓖᓐᓄᑦ ᐊᑐᖅᑐᐃᑐᐃᓐᓇᕆᐊᓕᓐᓂᑦ ᐃᖕᒥᓂᒃ ᐋᓐᓂᕈᑎᐅᓗᑎᒃ. ᓇᓗᓇᐃᕐᓯᓕᓚᐅᖅᑐᖅ ᐱᓕᕆᔾᔪᑎᐅᒐᔪᖕᖏᒻᒪᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ ᐊᓐᓄᕋᐃᔭᐃᔭᕆᐊᑦᓴᖅ ᐃᓘᓐᓇᖏᓐᓂᑦ ᐋᖓᔮᖅᑐᓂᑦ ᑎᒍᔭᐅᔪᓂᑦ. ᖃᐅᔨᒪᓂᕋᕋᓗᐊᖅᑐᑎᒃ ᐊᑦᑕᓇᖅᑐᒦᒋᐊᖃᖏᓐᓂᖏᑦ ᑎᒍᔭᐅᒪᔪᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᒻᒪᕆᐊᓘᒻᒪᑦ, ᖃᐅᔨᓴᖅᑏᑦ ᑕᑯᓕᖅᑭᑦᑖᓯᒪᔪᑦ ᐅᓂᒃᑳᓕᐊᖑᓯᒪᔪᓂ ᐊᓐᓄᕋᐃᔭᖅᑎᖅᑕᐅᓗᑎᒃ ᕿᓂᖅᑕᐅᕙᑦᑐᑦ ᐊᑐᖅᑕᐅᒋᐊᖃᖏᓯᐊᕐᒪᑕ ᐱᓕᕆᔾᔪᑎᐅᒐᔪᓪᓗᑎᒃ.^{Footnote 25} ᖃᐅᔨᓴᖅᑏᑦ ᓇᓗᓇᐃᕐᓯᒋᐊᒃᑲᓂᖅᑐᑦ ᑖᑦᓱᒥᖓ ᓇᓂᓯᓂᐅᔪᒥᑦ. ᐅᕙᓂᓕ ᐱᓕᕆᐊᒥ, ᐊᑦᑕᓇᖅᑐᒦᒍᑎᐅᔪᖅ ᐱᔾᔪᑎᒋᓪᓗᒋᑦ ᖃᐅᓰᑦ ᐊᓐᓄᕌᑦ ᓇᓗᓇᐃᔭᐃᑎᐅᓚᐅᖅᑐᑦ ᐊᓐᓄᕋᐃᔭᖅᑎᖅᑕᐅᓗᓂ ᕿᓂᕐᕕᐅᓂᒥᓂᖓᓂᑦ.

[187] ᐱᔾᔪᑎᒋᓪᓗᒍ ᖃᓄᑎᒋ ᐊᑦᓱᕈᓚᐅᕐᒪᖔᑕ ᕿᓂᕐᕕᐅᑎᓪᓗᒍ, ᓇᓗᓇᓚᐅᖏᑦᑐᖅ A.B. ᖁᓄᓚᐅᕐᓂᖓᓂᑦ ᐊᒻᒪ ᕿᒫᒐᓱᑦᑐᓂ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓇᔪᒻᒥᓚᐅᖅᑐᑦ ᑖᑦᓱᒥᖓ ᐲᖅᑕᐅᓇᓱᐊᖅᑎᓪᓗᒋᒃ ᐅᕕᓂᕈᖓ ᐊᒻᒪ ᖃᓪᓕᖏᒃ. ᐃᓛᒃ, ᐊᑦᓱᕈᓗᐊᓚᐅᖏᑦᑐᑦ ᐊᒻᒪ ᐊᑐᖅᑕᐅᒋᐊᖃᓚᐅᖅᑐᓂ ᐱᔭᕇᖁᓪᓗᒍ ᕿᓂᖅᑕᐅᓂᖓ ᑎᒥᖓᓂᑦ.

[188] ᐃᓚᖏᑦ ᖃᐅᔨᓴᐅᑎᐅᔪᑦ ᑎᒥᖓᓂᑦ ᐃᓱᒫᓘᑎᐅᓂᕐᓴᐅᓚᐅᖅᑐᑦ ᖃᐅᔨᓴᖅᑎᓄᑦ; ᐱᓗᐊᖅᑐᒥ, ᑳᓐᔅᑕᐳᓪ ᓯᒥᖦ ᐃᓯᒐᒻᒥᓄᑦ ᓄᓱᑦᓯᓚᐅᖅᑐᖅ A.B.-ᒥᑦ ᖃᓪᓕᑎᒋᐊᖅᑐᓂᐅᒃ, ᐊᒻᒪ ᑎᒍᓯᔫᔮᓕᖅᑐᓂ A.B. ᓂᐅᖓᓂᑦ ᐊᒻᒪ ᓴᖑᑎᑦᑐᓂᐅᒃ A.B. ᐹᒻᒪᖓᔫᔮᓕᖅᑐᓂ ᓵᖓ ᓄᓇᒨᖓᓗᓂ. ᑕᐃᒪᐃᓕᒋᐊᕐᓂᐅᔪᖅ A.B.-ᒥᑦ ᑎᒥᖓᑕ ᕿᑎᐊᒍᑦ ᓄᓇᒨᖅᑑᔮᖅᑐᖅ ᐅᕐᕈᒻᒪᑦ. ᐊᒻᒪᑦᑕᐅᖅ, ᑳᓐᔅᑕᐳᓪ ᓯᒥᖦ ᐊᒻᒪ ᐃᒻᒪᖄ ᑳᓐᔅᑕᐳᓪ ᑭᐅᓕᖕ ᐲᕐᓯᔫᔮᖅᑐᑦ A.B. ᐅᕕᓂᕈᖓᓂᑦ ᐊᐃᖏᒍᑦ ᐲᖅᑕᐅᓗᓂ ᐊᑦᓱᕈᓪᓗᐊᖅᑑᔮᖅᑐᑎᒃ. ᐅᓇ ᖃᓄᐃᓕᐅᕐᓂᐅᔪᖅ ᐋᓐᓂᕈᑎᒋᔪᓐᓇᓚᐅᖅᑕᖓ A.B.       

[189] ᑕᒪᓐᓇ ᐅᖃᐅᓯᐅᓗᓂ, ᖃᐅᔨᓴᖅᑕᐅᑎᓪᓗᒍ ᖃᓄᑎᒋ ᐊᑦᓱᕉᑎᐅᓚᐅᖅᑐᖅ, ᖃᐅᔨᓴᖅᑏᑦ ᖃᐅᔨᓴᓗᐊᕈᒪᖏᑦᑐᑦ ᖃᓄᐃᒍᑎᐅᔪᒥᑦ ᓇᓗᓇᐃᔭᓪᓚᑦᑖᕐᓯᒪᑎᓪᓗᒍ ᐊᒻᒪ ᐊᑐᓗᐊᕈᒪᒍᓐᓇᕋᑎᒃ ᐊᑐᖁᔭᐅᔪᓂᑦ ᐃᖅᑲᖅᑐᐃᕕᓕᕆᔨᓂᑦ, ᑕᐃᒃᑯᐊ ᐋᖅᑭᑦᓯᒐᔪᒻᒪᑕ ᖃᐅᔨᓴᖏᓯᐊᖅᑐᑎᒃ ᐊᑐᖅᑕᐅᓯᒪᓂᖏᓐᓂᑦ ᐊᑦᓱᕉᑎᐅᔪᑦ ᖃᓄᑎᒋ "ᓇᓗᓇᐃᔭᓪᓚᑦᑖᕐᓗᒍ:"

ᖃᐅᔨᓴᖅᑐᒋᑦ ᓇᓗᓇᐃᔭᐃᑎᐅᔪᑦ ᑕᒪᓐᓇ ᐱᓪᓗᒍ, ᐃᓱᒪᒋᐊᖃᖅᑐᖓ ᖃᓄᑎᒋ ᐊᑦᓱᕉᑎᒋᓚᐅᖅᑕᖓ ᑕᑯᓐᓇᖅᑕᐅᒋᐊᓕᒃ ᖃᓄᖅ ᐃᓱᒪᒋᔭᐅᓂᖓᓄᑦ ᐸᓖᓯᒃᑯᓐᓂᑦ ᐊᒻᒪᑦᑕᐅᖅ ᖃᓄᖅ ᐃᓱᒪᒋᔭᐅᓂᖓᓄᑦ ᐱᓕᕆᔾᔪᑎᒍᑦ ᑐᕌᒐᕆᔭᐅᔪᑦ ᖃᓄᐃᒍᑎᒋᔭᖏᑦ. ᐃᓱᒪᒋᔭᕆᐊᖃᕐᒥᔭᕋ ᐸᓖᓯᐅᔪᖅ ᐊᑐᕆᐊᖃᓕᕐᓂᖓᓂᑦ ᑕᐃᑦᓱᒪᓂᐅᔪᖅ ᖃᓄᐃᓕᐅᖅᑎᓪᓗᒋᑦ ᖃᓄᑎᒋ ᐊᑦᓱᕈᓕᕐᒪᖔᕐᒥ ᐅᐃᒪᒋᔭᖃᖅᑎᓪᓗᒍ, ᐊᒻᒪ ᐸᓖᓯᐅᔪᖅ ᐱᔾᔪᓯᒍᑦ ᐱᓕᕆᔪᒥᓂᐅᖁᓪᓗᒍ ᐱᓕᕆᐊᖃᖅᑎᓪᓗᒋᑦ ᐊᔾᔨᒋᖏᑕᖏᓐᓂᑦ ᐱᓕᕆᔾᔪᓯᐅᔪᑦ ᐃᖅᑲᖅᑐᐃᕕᐅᑉ ᐃᓗᐊᓂ ᐱᓕᕆᐊᖑᕙᑦᑐᑦ ᓴᐃᓕᖓᔪᒥ ᐃᓱᒪᓕᕋᔭᖅᑐᑦᓴᐅᒐᒥ ᖃᓄᖅ ᐊᑲᐅᓂᖅᐹᒃᑯᑦ ᐱᓕᕆᔪᓐᓇᓂᕐᒪᖔᕐᒥ ᑕᐃᑦᓱᒪᓂᐅᑎᓪᓗᒍ.^{Footnote 26}

[190] ᐃᓘᓐᓇᖏᒍᑦ, ᖃᐅᔨᓴᖅᑏᑦ ᖃᐅᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᕐᓂᕆᓚᐅᖅᑕᖓᑦ ᖃᓄᑎᒋ ᐊᑦᓱᕈᖅᑐᑎᒃ A.B. ᑎᒍᔭᐅᕙᓪᓕᐊᑎᓪᓗᒍ ᓈᒻᒪᓚᐅᖅᑐᖅ. ᑕᐃᒪᐃᒃᑲᓗᐊᖅᑎᓪᓗᒍ, ᖃᐅᔨᓴᖅᑏᑦ ᐅᔾᔨᕈᓱᒋᐊᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐊᑐᖁᔭᐅᕙᑦᑐᑎᑦ ᐊᑦᓱᕈᓗᐊᖅᐸᖏᓪᓗᑎᒃ ᖃᖓᑐᐃᓐᓇᒃᑯᑦ.

ᐋᓐᓂᐊᔪᓕᕆᔭᐅᔪᖅ A.B. ᑭᐅᓂᐊᓂ ᓯᕗᓪᓕᐅᑉ ᖃᓄᐃᒍᑎᐅᓚᐅᖅᑑᑉ

ᖃᐅᔨᔭᐅᔪᖅ #13: ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᕿᓂᓚᐅᖏᒻᒪᑕ ᐋᓐᓂᐊᔪᓕᕆᔭᐅᖁᓪᓗᒍ A.B. ᑎᒍᔭᐅᓚᐅᖅᑎᓪᓗᒍ, ᐅᐱᓐᓇᕋᓂ ᓱᓇᑕᖃᖏᑦᑐᖅ ᐋᓐᓂᐊᔪᓕᕆᔨᓄᑦ ᐅᐸᑦᑕᐅᒋᐊᖃᕐᒪᖔᖅ ᑕᐃᑦᓱᒪᓂᐅᓚᐅᖅᑐᖅ.

[191] ᑐᑭᓯᒋᐊᕈᑎᑕᖃᖏᑦᑐᖅ ᖃᐅᔨᓴᖅᑎᓄᑦ ᐃᓱᒪᓕᐅᕆᔾᔪᑎᑦᓴᓂᑦ A.B. ᐋᓐᓂᖅᑕᐅᓯᒪᓂᖓᓄᑦ ᐱᔾᔪᑎᖃᖅᑐᓂᑦ ᐸᓖᓯᒃᑯᑦ ᓄᓇᒃᑰᔫᖓᑦ ᖃᓄᐃᒍᑎᐅᑎᓪᓗᒍ ᐅᕝᕙᓘᓐᓃᑦ ᕿᓂᖅᑕᐅᑎᓪᓗᒍ. ᐅᐊᑦᓯᐅᓚᐅᖅᑐᖅ ᐅᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓄᑦ, A.B. ᕿᓂᕐᕕᐅᓚᐅᖅᑎᓪᓗᒍ ᐊᒻᒪ ᕿᒪᑦᑕᐅᓗᓂ ᑎᒍᔭᐅᒪᕕᐅᑉ ᐃᓗᐊᓄᑦ, A.B. ᓂᐱᖃᓚᐅᖅᑐᖅ "ᖁᕕᐊᓱᕝᕙᓗᑦᑐᓂ ᐋᖓᔮᕋᒥ ᓂᐱᖃᖅᐸᓚᐅᖅᑐᖅ" ᑐᓵᔭᐅᒐᔪᑦᑐᓂᑦ ᑎᒍᔭᐅᒪᕕᓐᓂ, ᐊᒻᒪ ᑎᒍᔭᐅᒪᕕᐅᑉ ᐃᓗᐊᓃᑦᑐᓂ ᓇᓕᐊᓐᓄᕋᓚᐅᖅᑐᖅ ᐃᓗᐊᓂ ᓱᒃᑲᑦᑐᕖᖔᓘᓪᓗᓂ. ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᕿᓂᓚᐅᖏᒻᒪᑕ ᐋᓐᓂᐊᔪᓕᕆᔭᐅᖁᓪᓗᒍ A.B. ᑎᒍᔭᐅᓚᐅᖅᑎᓪᓗᒍ, ᐅᐱᓐᓇᕋᓂ ᓱᓇᑕᖃᖏᑦᑐᖅ ᐋᓐᓂᐊᔪᓕᕆᔨᓄᑦ ᐅᐸᑦᑕᐅᒋᐊᖃᕐᒪᖔᖅ ᑕᐃᑦᓱᒪᓂᐅᓚᐅᖅᑐᖅ.

A.B. ᐋᓐᓂᑎᖅᑕᐅᓂᖓ ᑎᒍᔭᐅᒪᑎᓪᓗᒍ ᐊᒻᒪ ᖃᓄᐃᓕᖓᒍᑎᐅᔪᑦ ᑎᒍᔭᐅᒪᔪᓄᑦ ᑎᒍᔭᐅᒪᕕᓐᓂ

ᐊᓯᐊᓂᑦ ᐊᖑᑎᒥᑦ ᑎᒍᔭᐅᔪᖃᖅᑐᖅ ᐊᒻᒪ ᐃᓗᐊᓅᖅᑕᐅᓗᓂ ᑎᒍᔭᐅᒪᕕᐅᑉ 3

[192] A.B. ᑎᒍᔭᐅᒪᕕᒻᒨᖅᑕᐅᓚᐅᖅᑎᓪᓗᒍ, ᓵᔨᓐ ᒋᐅᓪ ᐊᒻᒪ ᑳᓐᔅᑕᐳᓪ ᑭᐅᓕᖕ – ᑕᒪᒃᑮᒃ ᐅᖄᓚᕕᒥᓃᒃ ᐊᖏᕐᕋᖏᓐᓂᒃ ᐃᖅᑲᓇᐃᔭᖅᑎᓐᓇᒋᒃ ᐃᑲᔪᕆᐊᖁᔭᐅᓗᑎᒃ ᖁᑭᐅᓯᔭᖅᑐᓕᕆᑎᓪᓗᒋᑦ – ᐃᓱᒪᓕᐅᕆᓕᓚᐅᖅᑑᒃ ᐃᖅᑲᓇᐃᔭᐃᓐᓇᕐᓂᐊᓕᕋᒥᒃ ᐃᑲᔪᕐᓂᐊᕋᒥᒃ ᐊᒥᓱᓂᑦ ᐅᖄᓚᐅᑎᐅᕙᑦᑐᓂᑦ ᖃᐃᖁᔨᓯᒪᔪᓄᑦ ᐅᐸᑦᑕᐅᓚᐅᖏᑦᑐᓄᑦ.

[193] ᐃᓚᖓᑦ ᐅᖄᓚᔾᔪᑎᐅᓯᒪᓚᐅᖅᑐᖅ ᐃᓚᒋᔭᐅᓚᐅᖅᑐᖅ ᐊᖏᕐᕋᒥ ᐱᑦᑎᐊᖃᑦᑕᐅᑎᖕᖏᑦᑐᓂᑦ ᐊᕐᕌᒍᖃᖅᑐᖅ 35-ᓂᑦ ᐃᓚᒋᔭᐅᓗᓂ, ᐅᕙᓂ ᐅᓂᒃᑳᓂ ᑕᐃᔭᐅᓂᐊᖅᑐᖅ J.J., ᑎᒍᔭᐅᓚᐅᖅᑐᖅ ᐱᒋᐊᕐᓯᓯᒪᒐᒥ ᐊᒻᒪ ᓱᕋᐃᓯᒪᓪᓗᓂ ᐊᑐᕆᐊᓕᖏᓐᓂᑦ. ᐊᒥᓱᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓄᑦ ᐅᐸᑦᑕᐅᓚᐅᖅᑐᖅ ᐅᓐᓄᐊᒃᑯᑦ 12:05-ᑎᓪᓗᒍ. ᐸᓖᓯᒃᑯᑦ ᑎᑎᕋᕐᓯᒪᔭᖏᑦ ᓇᓗᓇᐃᕐᓯᓯᒪᔪᑦ J.J. "ᐋᖓᔮᓪᓗᐊᖅᑐᕈᓘᓚᐅᖅᑐᖅ ᐃᒥᐊᓗᒻᒧᑦ ᐊᒻᒪ ᓂᖕᖓᐅᒪᔪᒻᒪᕆᐅᓗᓂ ᐸᓖᓯᓄᑦ" ᑎᒍᔭᐅᑎᓪᓗᒍ. ᐊᕐᓇᖅᑕᖃᓚᐅᖅᑐᖅ ᖃᓄᐃᓕᐅᕐᕕᐅᔪᒥ ᑮᓇᖓᒍᑦ ᕿᑦᓱᐊᓂᐅᔪᒥᑦ ᐊᒻᒪ ᖃᓂᖓ ᐊᐅᖏᓐᓇᐅᓗᓂ. ᑳᓐᔅᑕᐳᓪ ᓯᒥᖦ ᓇᓗᓇᐃᔭᐃᓚᐅᖅᑐᖅ J.J. ᑎᒍᔭᐅᓚᐅᕋᒥ ᓯᓂᕝᕕᒻᒦᑎᓪᓗᒍ ᐊᒻᒪ ᐊᓂᑎᑕᐅᒐᒥ ᓇᔪᒐᕐᒥᑦ, ᐊᕐᓇᒧᑦ ᐅᐸᒐᓱᑦᑐᒥᓂᐅᔪᖅ, ᐊᒻᒪ ᑳᓐᔅᑕᐳᓪ ᑭᐅᓕᖕ ᐅᐸᑦᑎᑦᑕᐅᓕᒪᒋᐊᖃᖅᑕᒥᓂᖓ ᓇᔪᒻᒥᓪᓗᓂᐅᒃ. J.J. ᐊᑦᓱᐊᓗᒃ ᓂᖕᖓᐅᒪᓚᐅᖅᑐᖅ ᐊᒻᒪ ᖃᐃᒐᓪᓛᓪᓗᓂ. ᑳᓐᔅᑕᐳᓪ ᓯᒥᖦ ᐃᖅᑲᐅᒪᓂᕋᓚᐅᖅᑐᖅ ᐃᓱᒪᔪᕕᓂᐅᓂᕐᒥᓂᒃ, "ᐅᓇᓕ ᐊᖑᑎ ᐊᑲᐅᖏᓕᐅᕆᓂᐊᖅᑐᖅ ᐅᑎᕈᑦᑕ [ᑎᒍᔭᐅᒪᕕᒻᒧᑦ]."

[194] J.J. ᑎᒍᔭᐅᒪᕕᖏᓐᓅᖅᑕᐅᓚᐅᖅᑐᖅ ᑭᖕᖓᐃᑦ ᑎᒍᔭᐅᒪᕕᐅᑉ ᐃᓪᓗᕈᓯᖏᓐᓄᑦ ᓯᓂᑦᑕᓂᐊᕐᒪᑦ. ᑳᓐᔅᑕᐳᓪ ᑭᐅᓕᖕ ᑎᑎᕋᓚᐅᖅᑐᖅ ᐅᖃᐅᑎᑦᓴᖏᓐᓂ ᐸᐸᓕᒻᒧᑦ ᑎᒻᒥᑳᕐᕕᒋᓚᐅᕋᒥᐅᒃ J.J. ᓱᕋᐃᒐᓱᓚᐅᖅᑎᓪᓗᒍ ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᐅᓯᔭᐅᑎᓪᓗᒍ ᑎᒍᔭᐅᒪᕕᒻᒧᑦ ᐊᒻᒪ ᑐᒃᑲᓚᐅᕐᒪᑦ ᓇᓛᓄᑦ [ᑳᓐᔅᑕᐳᓪ ᑭᐅᓕᖕ] ᐊᐅᓚᔾᔭᑦᑕᐃᓕᒪᑎᑕᐅᑎᓪᓗᒍ." ᑳᓐᔅᑕᐳᓪ ᓯᒥᖦ ᓇᓗᓇᐃᔭᐃᓚᐅᖅᑐᖅ, ᑎᒍᔭᐅᒪᕕᒻᒨᓚᐅᖅᑎᓪᓗᒋᑦ, J.J. ᓱᓕ ᖁᓄᓚᐅᕐᒪᑦ, ᕿᒫᒐᓱᑉᐸᑦᑐᓂ, ᐊᒻᒪ ᖃᐳᐊᕿᓪᓗᓂ ᖃᓂᕐᒥᒍᑦ. ᑳᓐᔅᑕᐳᓪ ᓯᒥᖦ ᐊᒻᒪ ᑳᓐᔅᑕᐳᓪ ᑭᐅᓕᖕ ᑎᒍᒥᐊᓕᓚᐅᖅᑕᖓᑦ ᒪᔪᕋᐅᑎᒃᑯᑦ ᑎᒍᔭᐅᒪᕕᐅᑉ ᐃᓗᐊᓄᑦ.

[195] ᐸᓖᓯᐅᔪᑦ ᓵᖕᖓᔭᐅᒃᑲᓐᓂᓕᓚᐅᕐᒥᔪᑦ ᐃᓂᑦᓴᓕᕆᓪᓗᑎᒃ ᑭᖕᖓᐃᑦ ᑎᒍᔭᐅᒪᕕᐅᑉ ᐃᓪᓗᕈᓯᖏᓐᓂ ᑕᐃᑲᓂ ᐅᓐᓄᒥ. ᑳᓐᔅᑕᐳᓪ ᓯᒥᖦ ᐅᖃᒃᑲᓐᓂᓚᐅᖅᑐᖅ ᐋᑐᕚ ᐸᓖᓯᒃᑯᑦ (OPS) ᖃᐅᔨᓴᖅᑎᖏᓐᓄᑦ ᑎᒍᔭᐅᒪᕕᒻᒥ 1 ᑎᓴᒪᐅᓚᐅᕐᒪᑕ (4) ᐊᖑᑏᑦ ᑎᒍᔭᐅᒪᔪᑦ, ᓇᓗᓇᐃᓚᐅᖅᑕᖏᑦ "ᐊᒥᓲᓗᐊᕐᒪᑕ" ᑎᒍᔭᐅᒪᕕᒻᒥ ᐃᓪᓗᕈᓯᐅᑉ ᐃᓗᐊᓃᒍᑎᒃ. ᑎᒍᔭᐅᒪᕕᐅᑉ ᐃᓪᓗᕈᓯᖓᓂ 2 ᒪᕐᕉᓚᐅᖅᑑᒃ (2) ᐊᖑᑏᒃ, ᐊᐃᑉᐸᖓ "ᐱᑦᓯᐊᖏᒃᑲᒻᒪᕆᒃ ᐱᕋᔭ" ᐱᐅᑦᓴᖏᑦᑐᒻᒪᕆᐅᓗᓂ J.J.-ᒥᒃ ᐊᒻᒪ ᓂᖕᖓᐅᑎᖃᑎᖃᕈᒪᑐᐃᓐᓇᐸᑦᑐᓂ. ᑎᒍᔭᐅᒪᕕᐅᑉ ᐃᓪᓗᕈᓯᖓᓂ 3 ᒪᕐᕉᓚᐅᖅᑑᒃ (2) ᐊᕐᓈᒃ, ᑕᐃᑯᖓᖅᑕᐅᔪᓐᓇᓚᐅᖏᒻᒥᔪᖅ J.J. ᐃᓪᓗᕈᓯᕐᒧᑦ. ᑳᓐᔅᑕᐳᓪ ᓯᒥᖦ ᐅᖃᕆᐊᓚᐅᖅᑐᖅ:

ᐊᓱᐃᓪᓛᒃ ᐃᓱᒪᓕᓚᐅᖅᑐᒍᑦ, ᐊᑐᖅᑐᑕ ᐲᔭᐃᓂᕐᒥᑦ, ᐊᑲᐅᓂᖅᐹᖑᓕᓚᐅᖅᑐᖅ – ᑎᒍᓯᓯᒪᕕᑦᓴᐃᑦ ᐃᓪᓗᕈᓰᑦ ᓄᖑᓚᐅᖅᑐᑦ. ᐃᒪᐃᓕᒐᓱᑦᑐᖓ, ᐱᐅᓗᐊᑲᓴᑦᑑᒐᓗᐊᖅ ᑕᐃᓐᓇ [J.J.] ᐃᓄᑑᓗᓂ ᐃᓪᓗᕈᓯᖃᓚᐅᖅᐸᑦ, ᑭᓯᐊᓂ ᑕᐃᒪᐃᒍᓐᓇᓚᐅᖏᑦᑐᖅ, ᑎᒍᔭᐅᒪᕕᒻᒥ ᐃᓪᓗᕈᓯᕐᒨᓕᓚᐅᖅᑕᕗᑦ 3 ᐊᐃᑉᐸᕆᓕᖅᑐᓂᐅᒃ [A.B.], ᐃᓪᓗᕈᓯᒻᒦᑦᑕᐅᑎᒋᓚᐅᖅᑐᒥᑦ.

J.J. ᐃᓪᓗᕈᓯᕐᒨᖅᑕᐅᓕᓚᐅᖅᑐᖅ 3 ᓇᔪᖅᑕᖓᓄᑦ A.B.

[197] ᑕᐃᒫᒃ ᐅᖃᐅᓯᐅᓯᒪᒻᒪᑦ, J.J. ᐸᐸᒧᑦ ᑎᒻᒥᑳᕐᕕᐅᓯᒪᔪᕕᓂᖅ ᑎᒍᔭᐅᓚᐅᖅᑎᓪᓗᒍ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖏᓐᓂ^{Footnote 27} ᐃᒪᐃᓕᖓᔪᑦ:

ᑭᓇᑐᐃᓐᓇᖅ ᑎᒻᒥᑳᕐᕕᐅᓯᒪᒍᓂ ᐅᖃᐅᔾᔭᐅᖃᑦᑕᕆᐊᓕᒃ ᐱᓐᓇᔭᖁᔭᐅᓗᓂ ᐊᒻᒪ ᐊᓂᖅᑎᕆᓗᓂ ᐊᓂᖅᑎᕆᕙᒃᑲᒥ ᖃᓄᖅ ᐊᑐᑐᐃᓐᓇᕐᓗᓂ. ᐊᑦᑐᖅᑕᐅᓯᒪᓂᖓ ᑎᒻᒥᑳᔫᒧᑦ ᐅᓕᑦᓯᒪᒋᐊᖃᖏᑦᑐᖅ, ᐊᒻᒪ ᐊᔪᕐᓇᖏᑉᐸᑦ ᑯᕝᕕᓴᕐᕕᒋᒋᐊᓕᒃ ᓂᓪᓕᓇᓗᐊᖏᑦᑐᒧᑦ ᐃᒥᕐᒧᑦ. ᖃᓄᐃᒍᑎᐅᔪᑦ ᓱᓕ ᐱᑕᖃᑐᐃᓐᓇᖅᐸᑕ ᐅᕝᕙᓘᓐᓃᑦ ᐃᓱᒪᒋᔭᐅᒍᓂ ᑎᒻᒥᑳᕐᕕᐅᓯᒪᔪᖅ ᐃᐱᓂᐊᓕᕈᓂ ᐅᕝᕙᓘᓐᓃᑦ ᐱᔭᖅᑯᖅᑐᓵᖅᑑᔮᓕᖅᐸᑦ, ᐋᓐᓂᐊᔪᓕᕆᔭᐅᒋᐊᖃᓪᓚᕆᑦᑐᖅ.

[198] ᑳᓐᔅᑕᐳᓪ ᑭᐅᓕᖕ ᑎᑎᕋᕐᓯᒪᔭᖏᓐᓂ ᐅᖃᐅᑎᑦᓴᖏᓐᓂ, ᐅᖃᓚᐅᖅᑐᖅ ᐃᖅᑲᐅᒪᒋᔭᒥᓂᒃ, J.J. ᐃ;ᓗᐊᓅᖅᑕᐅᓚᐅᖅᑎᓪᓗᒍ ᐃᓪᓗᕈᓯᐅᑉ 3, "ᐅᐊᑦᓯᐅᔪᖅ ᖃᐅᔨᒪᑎᑕᐅᓚᐅᖅᑐᖅ ᐅᓇ [J.J.] ᐸᐸᒧᑦ ᑎᒻᒥᑳᕐᕕᐅᓯᒪᓂᖓᓂᑦ ᐊᒻᒪ ᐃᒥᖅᑎᑕᐅᒐᔭᖕᖑᐊᖅᑑᒐᓗᐊᖅ ᐃᒥᐅᑎᓄᑦ." ᐊᐱᕐᓱᖅᑕᐅᑎᓪᓗᒍ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓄᑦ, ᐅᐊᑦᓯᐅᔪᖅ ᐅᖃᓚᐅᖅᑐᖅ ᐃᖅᑲᐅᒪᖏᓐᓇᒥ ᖃᓄᐃᓕᔭᐅᓐᓂᕐᒪᖔᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᐱᓪᓗᒍ J.J. ᐅᐸᓗᖓᐃᔭᐅᑎᐅᑎᓪᓗᒍ ᐱᓕᕆᔾᔪᑎᒍᑦ; ᐱᓗᐊᖅᑐᒥ, ᐃᖅᑲᐅᒪᖏᑦᑐᖅ ᑭᓇᑐᐃᓐᓇᕐᓄᑦ ᐅᖃᐅᔾᔭᐅᑎᓪᓗᒍ J.J. ᐸᐸᒧᑦ ᑎᒻᒥᑳᕐᕕᐅᓐᓂᕆᐊᖓ, ᐅᕝᕙᓘᓐᓃᑦ J.J. ᐃᒥᖅᑎᑕᐅᒋᐊᖃᕐᓂᐊᕐᓂᖓᓄᑦ. 

[199] ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ ᐃᓱᒪᓕᓚᐅᕋᒥ J.J. ᐸᐸᒧᑦ ᑎᒻᒥᑳᕐᕕᐅᓐᓂᕆᐊᖓ ᑕᑯᒐᒥᐅᒃ J.J. ᑎᒍᔭᐅᒪᕕᒻᒥ ᐃᓪᓗᕈᓯᕐᒥ ᐃᔨᖏᓐᓂᒃ ᐊᓪᓚᐃᑎᓪᓗᒍ ᐊᒻᒪ ᐅᖃᐅᓯᖃᖅᑐᓂ ᐃᔨᖏᓐᓂᒃ. ᑕᑯᓂᕋᓚᐅᖅᑕᖓ J.J. ᑯᕝᕕᕕᖏᓐᓂᒃ ᐅᐊᓴᕐᕕᐅᑉ ᑯᕕᑎᑦᓯᒐᓱᑦᑎᓪᓗᒍ, ᐊᒻᒪ ᑯᕕᑎᑦᓯᒍᓐᓇᖏᓐᓇᒥ, ᐃᒥᕐᒥᒃ ᖁᕝᕕᒻᒥᒃ ᐱᓪᓗᓂ ᑮᓇᕐᒥᓂᒃ ᖃᐅᓯᓕᖅᑎᕆᓕᓚᐅᖅᑐᖅ. ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ "ᐃᒥᖓ ᐅᐊᓴᕐᕕᐅᑉ [ᐃᓪᓗᕈᓯᕐᒥ 3] ᑯᕕᒍᓐᓇᓚᐅᖏᒻᒪᑦ ᐊᒻᒪ ᑯᕕᒍᓐᓇᓚᐅᕋᓂ ᑕᐃᑦᓱᒪ ᐅᓐᓅᑉ ᓯᕗᓂᐊᓂ. ᑯᕕᒍᓐᓇᖏᑦᑕᐅᑎᒋᓚᐅᖅᑐᖅ ᐃᖅᑲᓇᐃᔭᓕᕋᒪᓂᒃ ᑕᐃᑲᓂ." ᐅᐊᑦᓯᐅᔪᖅ, ᐊᑦᑐᐊᖏᑦᑐᒥᑦ ᐅᓪᓗᒃᑯᑦ ᐊᓯᐊᓂ ᐃᖅᑲᓇᐃᔮᖃᖅᐸᒻᒥᔪᖅ ᖃᐅᑕᒫᕐᓯᐅᑎᒥᑦ, ᐱᓕᕆᓯᒪᓕᓚᐅᖅᑐᖅ ᑎᒍᔭᐅᒪᕕᒻᒥ ᑕᖅᑭᓄᑦ ᐱᖓᓲᔪᖅᑐᐸᓗᓐᓂᑦ. ᐅᐊᑦᓯᐅᔪᖅ ᐅᖃᐅᕆᐊᓚᐅᕐᒥᔪᖅ, ᐅᕙᑦᓯᐊᕈ, ᑕᑯᖃᑦᑕᕐᓯᒪᒐᒥ ᑎᒍᔭᐅᖅᑲᔪᓂᑦ ᐃᔨᖏᓐᓂᑦ ᐃᕐᕈᑐᖅᑕᐅᓯᒪᔪᓂᑦ ᐊᑐᖅᑕᐅᓗᑎᒃ ᑯᕝᕕᕖᑦ. ᐅᖃᓚᐅᕐᒥᔪᖅ ᐱᑎᒍᓐᓇᑲᓴᒻᒥᒐᒥᐅᒃ J.J. ᐃᒥᕐᒥᒃ ᐊᒻᒪᔪᖓᒎᕐᓗᒍ ᒪᑐᐊᑕ J.J. ᓴᐃᒪᓂᕐᓴᐅᔫᒥᓐᓂᖅᐸᑦ.

[200] ᑭᐅᔾᔪᑎᒋᓪᓗᒍ ᖃᐅᔨᓴᖅᑎᓄᑦ ᑎᑎᖅᑲᖏᓐᓄᑦ ᐊᐱᖅᑯᑎᒃᑲᓂᕐᓂᒃ, ᑳᓐᔅᑕᐳᓪ ᑭᐅᓕᖕ ᒪᓕᒐᓕᕆᔨᖏᑦ ᐅᖃᐅᓯᖃᒃᑲᓂᕐᓂᕐᒪᑕ ᐅᐊᑦᓯᐅᔪᖅ ᐅᖃᐅᔾᔭᐅᓯᒪᓂᖓᓄᑦ ᐱᑎᑦᓯᖁᔭᐅᓗᓂ J.J.-ᒥᑦ ᐃᖑᓯᕐᓂᒃ ᐃᒻᒪᑦᓯᒪᓗᒋᑦ ᐃᑲᔫᑎᐅᖁᓪᓗᒋᑦ ᐃᔨᖏᓐᓂᑦ ᓴᓗᒻᒪᕐᓴᐃᑎᐅᓗᑎᒃ. ᒪᓕᒐᓕᕆᔩᑦ ᐅᖃᕆᐊᕐᓂᕐᒥᔪᑦ "[ᖃ]ᖓᒃᑯᑦ ᐱᓕᕆᐊᖃᖅᑐᓂ ᖁᓄᑐᐃᓐᓇᖅᑐᒥᑦ ᐃᑲᔪᖕᖏᑦᑐᒥᑦ ᐸᓯᔭᐅᓯᒪᔪᒥᑦ ᐸᐸᒧᑦ ᑎᒻᒥᑳᕐᕕᐅᓯᒪᔪᒥᑦ, ᑲᒪᔨᐅᔪᑦ ᖃᓄᐃᓕᐅᓗᐊᕈᓐᓇᖏᑦᑐᑦ. ᐊᓱᐃᓪᓛᒃ ᑕᐃᒪᐃᓐᓂᖏᓐᓄᑦ ᓴᓗᒻᒪᕐᓴᐃᓇᓱᐊᕐᓂᖅ ᐊᑯᓂᒐᓚᐅᕙᑦᑐᖅ."

[201] ᐃᓗᐊᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖅᑲᓇᐃᔭᕐᕕᖏᓐᓂ ᑎᑎᖅᑲᐃᑦ ᐃᕐᖐᓇᖅᑕᐅᑎᒃᑯᑦ ᑭᖑᓂᐊᓂ ᖃᓄᐃᒍᑎᐅᓚᐅᖅᑑᑉ ᓇᓗᓇᐃᔭᐃᓯᒪᔪᑦ ᓵᔨᓐ ᒋᐅᓪ ᐅᖃᐅᔾᔪᐃᓂᕐᒪᑦ ᐊᖏᔪᖅᑲᐅᑎᓂᑦ ᑲᒪᔨᓂᑦ ᖃᐅᔨᕋᑖᓚᐅᕋᒥ ᐃᒥᖅ ᑎᒍᔭᐅᒪᕕᒻᒥ ᐃᓪᓗᕈᓯᕐᒥ 3 ᐊᒻᒪ ᐃᓪᓗᕈᓯᕐᒥ 4 ᑯᕕᒍᓐᓇᖏᒻᒪᑎᒃ. ᓵᔨᓐ ᒋᐅᓪ ᐅᖃᐅᓯᖃᓚᐅᖅᑐᖅ ᑕᒪᑦᓱᒥᖓ ᑳᓐᔅᑕᐳᓪ ᕘᕐᒍᓴᓐᒧᑦ, ᑕᐃᓐᓇᓕ ᐅᖃᕐᓂᕋᖅᑕᒥᓂᖅ ᐅᐊᓴᕐᕖᑦ ᐱᔪᓐᓇᖏᑦᑕᐅᑎᒋᓐᓂᕐᒪᑕ ᑭᖕᖓᕐᓅᕋᒥ ᐊᕐᕌᒎᒃ ᒪᕐᕉᒃ ᐊᒻᒪ ᐊᕐᕌᒎᑉ ᐊᕝᕙᖓ ᐊᓂᒍᓕᖅᑑᒃ. ᓵᔨᓐ ᒋᐅᓪ ᐅᖃᕆᐊᓚᐅᖅᑐᖅ "ᐱᖁᑎᓂᑦ ᐊᐅᓚᑦᑎᔩᑦ" ᖃᐅᔨᒪᒻᒪᑕ ᑕᒪᑦᓱᒥᖓ, ᑳᓐᔅᑕᐳᓪ ᕘᕐᒍᓴᓐ ᐊᔾᔨᓕᐅᕆᔭᕆᐊᖃᖅᐸᓚᐅᕐᒪᑦ ᑕᒪᒃᑯᓂᖓ ᒪᐃ 2018 ᑎᒍᔭᐅᒪᕕᒻᒥ ᐃᓪᓗᕈᓯᖏᓐᓂ ᖁᕝᕖᑦ ᐊᒻᒪ ᐅᐊᓴᕐᕖᑦ ᑭᖑᕝᕕᖅᑕᐅᓛᕈᒪᓪᓗᑎᒃ; 2020-ᖑᓕᖅᐸᑦ ᑭᖑᕝᕕᖅᑕᐅᒋᐊᖃᔪᔪᑦ ᑭᓯᐊᓂ ᑭᖑᕙᒋᐊᖅᑕᒥᓃᑦ ᐱᔾᔪᑎᐅᓗᓂ ᑰᕕᑦ-19 ᐊᒥᓱᓄᑦ ᖃᓂᒪᓐᓇᐅᓚᐅᖅᑐᖅ. ᓵᔨᓐ ᒋᐅᓪ ᐊᐱᕆᓚᐅᖅᑐᖅ, "ᑭᓯᐊᓂᓕ ᐊᐱᖅᑯᑎᒐ ᖃᓄᐃᒻᒪᑦ ᐊᕐᕌᒎᓐᓄᑦ ᒪᕐᕉᓐᓄᑦ (2) ᑭᖑᕝᕕᖅᑕᐅᓇᓱᐊᑦᑕᓂᖅᐸᑦ ᖁᕝᕖᑦ ᐊᒻᒪ ᐅᐊᓴᕐᕖᑦ?"

ᖃᐅᔨᓴᖅᑏᑦ ᕿᒥᕐᕈᐊᓚᐅᖅᑐᑦ ᐊᐅᓚᔫᒥᑦ ᐊᔾᔨᐅᓕᐅᖅᑕᐅᓯᒪᔪᒥᑦ ᐃᓪᓗᕈᓯᕐᒥᑦ 3 ᐊᒻᒪ ᑕᑯᓐᓇᓚᐅᖅᑐᑦ ᑎᒍᔭᐅᒪᕕᒻᒥ ᐃᓪᓗᕈᓯᕐᒨᖅᑕᐅᓚᐅᖅᑐᓂ, J.J. ᑯᕕᑎᒐᓱᑉᐸᓚᐅᖅᑕᖏᑦ ᑯᕝᕕᕕᖏᑦ ᐅᐊᓴᕐᕕᐅᑉ ᐊᒥᓱᐊᖅᑎᖅᑐᓂ. ᑯᕝᕕᕕᓐᓂᒃ ᑯᕕᑎᑦᓯᒍᓐᓇᖏᓐᓇᒥ, ᖁᕝᕕᐅᑉ ᐃᓗᐊᓂᑦ ᐃᒥᕐᒧᑦ ᑮᓇᕐᒥᓂᒃ ᖃᐅᓯᓕᖅᑎᕆᓕᖅᑮᖅᑖᓚᐅᖅᑐᖅ. J.J. ᑕᐃᒪᐃᓕᐅᓚᐅᖅᑐᖅ ᐊᒥᓱᐊᖅᑎᖅᑐᓂ ᓯᕿᖕᖑᔭᒃᑯᑦ 20 ᒪᓇᑦᓯᓂᑦ. ᐊᑕᐅᓯᐊᖅᑐᓂ, J.J. ᐲᕐᓯᓚᐅᖅᑐᖅ ᖃᓪᓕᖏᓐᓂᒃ ᐊᒻᒪ ᖃᓪᓕᕋᓛᖏᓐᓂᒃ, ᐊᒻᒪ ᑮᓇᓂ ᐊᓪᓚᑎᖅᑐᓂᐅᒃ ᑖᒃᑯᓄᖓ.

[203] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᒥᑦ ᑲᒪᔨᒧᑦ ᖃᐅᔨᓴᖁᔨᓪᓗᓂ ᐃᓪᓗᕈᓯᕐᓄᑦ ᑎᒍᔭᐅᒪᕕᓐᓂ ᐊᐅᓚᑦᓯᔾᔪᑎᓂᑦ, ᖃᐅᔨᓴᖅᑎᐅᔪᖅ ᐅᐸᓚᐅᖅᑐᖅ ᑭᖕᖓᐃᑦ ᑎᒍᔭᐅᒪᕕᖏᓐᓄᑦ ᐊᒻᒪ ᖃᐅᔨᓚᐅᖅᑐᖅ ᐃᔩᓐᓄᑦ ᐅᐊᓴᐅᑎᖃᕐᕕᒻᒥᑦ ᑕᑯᔪᕕᓂᐅᒐᒥ ᐊᑐᖅᑕᐅᒋᐊᓕᒻᒥᑦ ᓴᓗᒻᒪᕐᓴᐃᑎᐅᓗᓂ ᑕᐃᑲᓂ ᑎᒍᔭᐅᒪᕕᒻᒥ, ᑭᓯᐊᓂ ᐃᓂᖃᖅᑎᑕᐅᓚᐅᖅᑐᖅ ᐅᐊᑦᓯᐅᑉ ᐃᓪᓗᕈᓯᖓᑕ ᐊᓇᕐᕕᖃᕐᕕᖓᓂ ᐱᕕᑭᑦᑐᑯᓗᒻᒥ. ᐊᒻᒪᑦᑕᐅᖅ, ᓴᓗᒻᒪᕐᓴᐃᔾᔪᑎ ᐃᒪᖃᓚᐅᖏᑦᑐᖅ.

ᐱᓕᕆᔾᔪᑏᑦ ᐊᑐᖅᑕᐅᓚᐅᖅᑐᑦ ᓇᓗᓇᐃᕐᓯᔾᔪᑎᐅᓗᑎᒃ ᐊᑦᑕᓇᔾᔭᐃᕐᓯᒪᓂᖓᓂᑦ A.B. ᐊᒻᒪ ᐊᓯᖏᑦ ᑎᒍᔭᐅᒪᔪᐃᑦ

ᖃᐅᔨᔭᐅᔪᖅ #14: ᐃᓂᖃᑦᑎᐊᖏᓐᓂᖅ ᑎᒍᔭᐅᒪᔪᓄᑦ ᓴᖅᑮᓯᒪᓚᐅᖅᑐᖅ ᐊᑦᑕᓇᖅᑐᒥᑦ ᐊᕙᑎᖃᓕᕐᓂᖏᓐᓂᑦ ᑎᒍᔭᐅᒪᔪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ, ᐊᒻᒪ ᑎᒍᔭᐅᒪᕕᒻᒥ ᐃᖅᑲᓇᐃᔭᖅᑏᑦ.

ᖃᐅᔨᔭᐅᔪᖅs #15: ᐱᓪᓗᒍ J.J. ᓴᓗᒻᒪᓴᖅᑕᐅᓚᐅᖏᓐᓂᖓ ᓯᕗᓂᐊᒍᑦ ᐃᓪᓗᕈᓯᕐᒨᖅᑕᐅᓚᐅᖏᓐᓂᖓᓂ ᑎᒍᔭᐅᒪᕕᒻᒥ ᐱᓗᖅᑯᑎᖃᓗᐊᓚᐅᕐᒥᔪᖅ ᐃᒪᖃᖏᓐᓂᖓᓂᑦ ᐃᓪᓗᕈᓯᐅᑉ ᐱᓪᓗᒍ ᓱᕋᑦᓯᒪᔪᖅ ᐅᐊᓴᕐᕕᒃ, ᐊᑐᖅᑕᐅᓕᖅᑐᓂ ᓈᒻᒪᖏᑦᑐᒻᒪᕆᐅᔪᖅ ᖃᓄᐃᓕᖓᒍᑎᐅᓕᓚᐅᖅᑐᖅ ᑎᒍᔭᐅᒪᔪᖅ ᐊᑐᓕᖅᑭᖅᑖᓚᐅᕐᓂᖓ ᐃᒥᕐᒥᒃ ᖁᕝᕕᒻᒥᒃ ᐊᑲᐅᓯᔾᔪᑎᒋᓇᓱᐊᖅᑐᓂᐅᒃ ᐊᑲᐅᔪᓐᓃᕈᑎᒥᓂᒃ. ᑕᒪᐅᓇ ᓴᖅᑮᔪᖅ ᐱᒻᒪᕆᐅᔪᓂᑦ ᐃᓗᓯᒃᑯᑦ ᐊᒻᒪ ᐊᑦᑕᓇᔾᔭᐃᕐᓯᒪᓂᒃᑯᑦ ᐃᓱᒫᓘᑎᐅᔪᓂᑦ, ᐊᒻᒪ ᐃᑲᔫᑎᖃᖅᑐᓂ ᐊᖏᓪᓕᑎᒋᐊᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ A.B.-ᒧᑦ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᖅᑕᐅᓗᓂ ᓇᔪᖅᑕᖓᓄᑦ J.J.

ᖃᐅᔨᔭᐅᔪᖅ #16: ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ, J.J. ᐱᑎᑕᐅᒋᐊᓕᒥᓂᖅ ᐃᒥᕐᒥᒃ ᓴᓗᒻᒪᕐᓴᐃᑎᑦᓴᒥᑦ, ᐱᓗᐊᖅᑐᒥ ᓇᓗᓇᖅᑎᓐᓇᒍ ᐊᑲᐅᔪᓐᓃᕐᓯᒪᓂᖓ.

ᖃᐅᔨᔭᐅᔪᖅ #17: ᓈᒻᒪᓚᐅᖏᑦᑐᖅ ᐃᔩᓐᓂᒃ ᓴᓗᒻᒪᕐᓴᐃᑎᖃᕐᕕᐅᔪᖅ ᐃᒪᖃᓚᐅᖏᓐᓂᖓᓄᑦ ᐊᒻᒪ ᐃᓂᖃᖅᑎᑕᐅᓂᖓ ᐊᑲᐅᖏᑦᑐᕖᖔᓗᒻᒥ.

ᖃᐅᔨᔭᐅᔪᖅ #18: ᓈᒻᒪᓚᐅᖏᑦᑐᖅ ᐅᐊᓴᕐᕕᖓ ᐃᓪᓗᕈᓯᐅᑉ 3 ᐃᑉᐱᒋᔭᐅᓚᐅᖏᓐᓂᖓ ᐱᔪᓐᓇᑎᓐᓇᒍ, ᐊᑯᓂᐅᑎᒋᔪᖅ ᒪᕐᕉᒻᒪᕇᓐᓂᒃ (2) ᐊᕐᕌᒎᓐᓂᒃ.

ᖃᐅᔨᔭᐅᔪᖅ #19: ᐅᐱᓐᓇᕋᓂᐅᒐᓗᐊᖅ ᓇᓗᓇᓚᐅᖏᒻᒪᑦ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᖅᑕᐅᒻᒪᑎᒃ J.J. ᐊᒻᒪ A.B. ᓴᖅᑭᖅᑐᖃᓚᐅᕋᒥ ᖁᕕᐊᓇᖏᑦᑐᒥᑦ. ᐃᓪᓗᕈᓯᕐᒨᖅᑕᐅᓂᖏᒃ J.J. ᐊᒻᒪ A.B. ᐊᑕᐅᑦᑎᒃᑯᑦ ᓴᖅᑮᓚᐅᖅᑐᑦ ᐊᑦᓱᐊᓘᖅᑐᒥᑦ ᐋᓐᓂᕐᓯᔪᖃᓕᖅᑐᓂ.         

ᖃᐅᔨᔭᐅᔪᖅ #20: J.J. ᐊᒻᒪ A.B. ᑕᕝᕗᖓᑦᓴᐃᓐᓈᖅᑕᐅᔪᒪᓕᕐᓂᖏᒃ ᐃᓪᓗᕈᓯᕐᒧᑦ ᑐᕌᒐᓪᓗᐊᒃᑯᑦ ᖃᓄᐃᒍᑎᐅᔪᖅ ᐊᒥᒐᕐᓯᕙᓐᓂᖏᓐᓄᑦ ᓈᒻᒪᑦᑐᓂᑦ ᓇᓖᕌᕈᑎᑦᓴᓂᑦ ᐊᑐᕈᓐᓇᖅᑕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᔾᔪᑎᒋᓪᓗᒍ ᐊᒥᒐᕐᓯᓂᐅᕙᑦᑐᖅ ᐃᓂᑦᓴᐅᔪᓂᑦ ᑎᒍᔭᐅᒪᔪᓄᑦ.

ᐊᑐᖁᔭᖅ #4: ᑭᖕᖓᐃᑦ ᑎᒍᔭᐅᒪᕕᖓ ᐊᖏᓪᓕᒋᐊᖅᑕᐅᔭᕆᐊᓕᒃ ᐃᓚᔭᐅᖁᓪᓗᒋᑦ ᐃᓪᓗᕈᓯᐅᔪᑦ ᑎᒍᔭᐅᒪᔪᓄᑦ ᐊᑐᖅᑕᐅᕙᑦᑐᑦ ᖁᓪᓗᓄᑦ (10) ᐃᓪᓗᕈᓯᖃᕈᓐᓇᓕᕐᓗᓂ..

ᐊᑐᖁᔭᖅ #5: ᑳᓐᔅᑕᐳᓪ ᑭᐅᓕᖕ ᐊᒻᒪ ᓵᔨᓐ ᒋᐅᓪ ᐱᑎᑕᐅᔪᐃᓐᓇᐅᒋᐊᓖᑦ ᐊᐅᓚᑦᓯᔾᔪᑎᒍᑦ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓴᓗᒻᒪᕐᓴᐃᔭᕆᐊᖃᕐᓂᐅᔪᖅ ᑎᒍᔭᐅᒪᔪᓂᑦ.

ᐊᑐᖁᔭᖅ #6:ᐅᐊᓴᕐᕕᖏᑦ ᐊᒻᒪ ᖁᕝᕕᖏᑦ ᑭᖕᖓᐃᑦ ᑎᒍᔭᐅᒪᕕᖏᓐᓂ ᐃᓪᓗᕈᓯᖏᓐᓂ ᓴᓇᔭᐅᒋᐊᓖᑦ ᐊᒻᒪ ᒪᑭᒪᑎᑕᐅᕙᓪᓗᑎᒃ ᒪᓕᑦᑕᐅᓗᑎᒃ ᐃᓗᓕᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖏᑕ.

ᐊᑐᖁᔭᖅ #7: ᐃᔩᓐᓂᒃ ᓴᓗᒻᒪᕐᓴᐃᑎᖃᕐᕕᐅᔪᖅ ᑭᖕᖓᐃᑦ ᑎᒍᔭᐅᒪᕕᖏᓐᓂ ᓅᑕᐅᒋᐊᓕᒃ ᐅᐸᒐᕐᓂᓂᕐᓴᒧᑦ ᐊᒻᒪ ᐃᒻᒪᑦᑕᐅᕙᓪᓗᓂ ᖃᐅᑕᒫᑦ ᐃᒻᒪᒋᐊᖃᓕᕋᐃᑉᐸᑦ.

[204] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑲᓇᑕᒥ ᐊᑐᐊᒐᖓᓐᓂ^{Footnote 28} ᑎᑎᕋᕐᓯᒪᔪᑦ, "ᑭᓇᑐᐃᓐᓇᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᓯᒪᔭᖏᑦ ᐱᓕᕆᔾᔪᑎᐅᕙᓐᓂᐊᖅᑐᑦ ᐃᑉᐱᒋᔭᐅᑦᓯᐊᐸᓪᓗᑎᒃ ᑭᓇᐅᓂᖏᓐᓂᑦ ᐊᒻᒪ ᐊᑐᐃᓐᓇᖃᕐᕕᐅᓗᑎᒃ ᐃᓘᓐᓇᖏᓐᓂᑦ ᐱᔪᓐᓇᐅᑎᓂᑦ ᐊᑐᕆᐊᓕᖏᓐᓂᑦ ᒪᓕᒐᑎᒍᑦ," ᐊᒻᒪ "ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᑉᐱᒍᓱᑦᑎᐅᔪᑦ ᖃᓄᐃᒋᐊᖃᖏᓐᓂᖏᓐᓂᑦ ᐊᒻᒪ ᓴᐳᒻᒥᔭᐅᒋᐊᖃᕐᓂᖏᓐᓂᑦ ᑭᒃᑯᑐᐃᓐᓇᐃᑦ ᑎᒍᓯᒪᔭᓂ." ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ "V" ᐱᓕᕆᕝᕕᒻᒥ (ᓄᓇᕗᑦ) ᑎᑎᕋᕐᓯᒪᔪᖃᕐᒥᔪᑦ, "ᐃᓘᓐᓇᑎᒃ ᑭᒃᑯᑐᐃᓐᓇᐃᑦ ᑎᒍᔭᐅᖅᑲᔪᑦ ᐱᓕᕆᔾᔪᑎᐅᕙᓐᓂᐊᖅᑐᑦ ᐊᔾᔨᒌᑎᑕᐅᓗᑎᒃ ᐊᒻᒪ ᐃᑉᐱᒋᔭᐅᑦᓯᐊᐸᓪᓗᑎᒃ ᑭᓇᐅᓂᖏᓐᓂᑦ,"^{Footnote 29} ᐊᒻᒪ "ᐃᓘᓐᓇᑎᒃ ᐃᓚᒋᔭᐅᔪᑦ ᓇᓗᓇᐃᕐᓯᒪᕙᓐᓂᐊᖅᑐᑦ ᐊᑲᐅᑦᓯᐊᕋᓗᐊᕐᒪᖔᑕ ᐊᒻᒪ ᐊᑦᑕᓇᔾᔭᐃᕐᓯᒪᒐᓗᐊᕐᒪᖔᑕ ᑭᒃᑯᑐᐃᓐᓇᐃᑦ ᑎᒍᔭᐅᖅᑲᔪᑦ ᑕᐃᒪᖕᖓᓕᒫᖅ."^{Footnote 30}

[205] ᓇᓗᓇᖏᑦᑐᖅ ᖃᓄᑐᐃᓐᓇᖅ ᓴᓗᒻᒪᓴᖅᑕᐅᒐᓱᓚᐅᖏᓐᓂᖓᓄᑦ J.J. ᑎᒍᔭᐅᓚᐅᖅᑎᓪᓗᒍ. ᐃᔩᓐᓂᒃ ᐅᐊᓴᐅᑎᖃᕐᕕᒃ ᐃᓂᖃᓚᐅᖅᑐᖅ ᓈᒻᒪᖏᑦᑐᒥ ᐊᒻᒪ ᐊᑲᐅᖏᑦᑐᒥᑦ, ᐊᒻᒪ ᑕᐃᒪᐃᖏᒃᑲᓗᐊᕈᓂ, ᐃᒪᖃᓚᐅᖏᑦᑐᖅ. ᐅᐊᑦᓯᐅᔪᖅ ᐅᕝᕙᓘᓐᓃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᑎᑦᓯᓚᐅᖏᑦᑐᑦ J.J.-ᒥᑦ ᐃᒥᕐᒥᒃ ᖃᓄᑐᐃᓐᓇᖅ, ᓲᕐᓗ ᐃᕐᖑᓯᒻᒧᑦ. ᐊᔾᔨᒌᖏᑦᑐᓂᑦ ᐅᖃᐅᓯᖃᕐᓯᒪᒻᒪᑕ ᐊᐱᕐᓱᖅᑕᐅᓚᐅᖅᑐᓂᑦ ᐅᐊᑦᓯᐅᔪᖅ ᐅᖃᐅᔾᔭᐅᓐᓂᕋᓗᐊᕐᒪᖔᖅ J.J.-ᒥᑦ ᐃᒥᕐᒥᒃ ᐱᑎᑦᓯᖁᔭᐅᓗᓂ. ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ ᐅᖃᐅᑎᓐᓂᕋᒥᐅᒃ ᐅᐊᑦᓯᐅᔪᖅ J.J. ᐸᐸᒧᑦ ᑎᒻᒥᑳᕐᕕᐅᓂᕐᒪᑦ ᐊᒻᒪ ᐱᑎᑕᐅᒐᔭᖕᖑᐊᕐᓂᖓᓄᑦ ᐃᒥᕐᒥᒃ ᐃᕐᖑᓯᕐᒦᑦᑐᓂᑦ. ᑭᓯᐊᓂᓕ, ᐅᐊᑦᓯᐅᔪᖅ ᐅᖃᓚᐅᖅᑐᖅ ᐃᖅᑲᐅᒪᖏᓐᓂᕋᖅᑐᓂ ᑭᓇᑐᐃᓐᓇᕐᒧᑦ ᑕᒪᑦᓱᒥᖓ ᐅᖃᐅᔾᔭᐅᓗᓂ ᐊᒻᒪ ᐃᖕᒥᓂᒃ ᐃᓱᒪᓚᐅᕋᒥ J.J. ᐸᐸᓕᒻᒧᑦ ᑎᒻᒥᑳᕐᕕᐅᔪᕕᓂᐅᓂᖓᓄᑦ, ᒪᓕᑦᑐᓂ ᑕᑯᓐᓇᖅᑕᒥᓂᒃ ᐊᖑᑎᒥᑦ ᐃᓪᓗᕈᓯᕐᒦᑎᑕᒥᑦ. ᐅᐊᑦᓯᐅᔪᖅ ᐃᒥᕐᒥᒃ ᐱᑎᑦᓯᓚᐅᖏᑦᑐᖅ ᐅᕝᕙᓘᓐᓃᑦ ᖃᓄᑐᐃᓐᓇᖅ ᐃᑲᔪᕋᓂ, ᐅᖃᕆᐊᖅᑐᓂ ᐱᑎᑦᓯᒐᔭᕐᓂᕋᓗᐊᕋᒥ J.J. ᓴᐃᒪᓂᕐᓴᐅᔫᒥᓐᓂᖅᐸᑦ.

[206] ᒪᓕᑦᑐᒋᑦ ᐊᑐᐊᒐᐃᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᑉᐱᒍᓱᑦᑎᐅᔪᑦ ᖃᓄᐃᒋᐊᖃᖏᓐᓂᖏᓐᓂᑦ ᑭᒃᑯᑐᐃᓐᓇᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᑎᒍᔭᐅᖅᑲᔪᑦ. ᑳᓐᔅᑕᐳᓪ ᑭᐅᓕᖕᓘᓐᓃᑦ, ᑎᒍᓯᔨᐅᓂᖓ ᐱᓪᓗᒍ ᐃᓪᓗᕈᓯᕐᒨᑎᑦᓯᓚᐅᖅᑐᓂ J.J.-ᒥᑦ ᐊᒻᒪ ᐅᖃᐅᑎᓪᓗᓂᐅᒃ ᐅᐊᑦᓯᐅᔪᖅ, ᐅᕝᕙᓘᓐᓃᑦ ᓵᔨᓐ ᒋᐅᓪ, ᐅᐊᑦᓯᐅᔫᑉ ᖃᐅᔨᓴᖅᑎᒋᓚᐅᖅᑕᖓ, ᓇᓗᓇᐃᕐᓯᒪᒋᐊᓕᒥᓂᐅᒐᓗᐊᖅ J.J. ᓴᓗᒻᒪᓴᖅᑕᐅᒐᓗᐊᕐᒪᖔᖅ. ᐱᓪᓗᒍ J.J. ᓴᓗᒻᒪᓴᖅᑕᐅᓚᐅᖏᓐᓂᖓ ᓯᕗᓂᐊᒍᑦ ᐃᓪᓗᕈᓯᕐᒨᖅᑕᐅᓚᐅᖏᓐᓂᖓᓂ ᑎᒍᔭᐅᒪᕕᒻᒥ ᐱᓗᖅᑯᑎᖃᓗᐊᓚᐅᕐᒥᔪᖅ ᐃᒪᖃᖏᓐᓂᖓᓂᑦ ᐃᓪᓗᕈᓯᐅᑉ ᐱᓪᓗᒍ ᓱᕋᑦᓯᒪᔪᖅ ᐅᐊᓴᕐᕕᒃ, ᐊᑐᖅᑕᐅᓕᖅᑐᓂ ᓈᒻᒪᖏᑦᑐᒻᒪᕆᐅᔪᖅ ᖃᓄᐃᓕᖓᒍᑎᐅᓕᓚᐅᖅᑐᖅ ᑎᒍᔭᐅᒪᔪᖅ ᐊᑐᓕᖅᑭᖅᑖᓚᐅᕐᓂᖓ ᐃᒥᕐᒥᒃ ᖁᕝᕕᒻᒥᒃ ᐊᑲᐅᓯᔾᔪᑎᒋᓇᓱᐊᖅᑐᓂᐅᒃ ᐊᑲᐅᔪᓐᓃᕈᑎᒥᓂᒃ. ᑕᒪᐅᓇ ᓴᖅᑮᔪᖅ ᐱᒻᒪᕆᐅᔪᓂᑦ ᐃᓗᓯᒃᑯᑦ ᐊᒻᒪ ᐊᑦᑕᓇᔾᔭᐃᕐᓯᒪᓂᒃᑯᑦ ᐃᓱᒫᓘᑎᐅᔪᓂᑦ, ᐊᒻᒪ ᐃᑲᔫᑎᖃᖅᑐᓂ ᐊᖏᓪᓕᑎᒋᐊᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ A.B.-ᒧᑦ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᖅᑕᐅᓗᓂ ᓇᔪᖅᑕᖓᓄᑦ J.J.

[207] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ, ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ, J.J. ᐱᑎᑕᐅᒋᐊᓕᒥᓂᐅᒐᓗᐊᖅ ᐃᒥᕐᒥᒃ ᓴᓗᒻᒪᕐᓴᐃᑎᑦᓴᒥᑦ, ᐱᓗᐊᖅᑐᒥ ᓇᓗᓇᓚᐅᖏᓐᓂᖓ ᐊᑲᐅᑦᓴᖏᑦᑐᒻᒪᕆᐅᓕᕐᓂᖓ. ᐊᔾᔨᒌᖏᑦᑐᓂᑦ ᑐᑭᓯᒋᐊᕈᑎᑕᖃᖅᑐᖅ ᑳᓐᔅᑕᐳᓪ ᑭᐅᓕᖕ ᐅᕝᕙᓘᓐᓃᑦ ᐊᓯᐊᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒥᑦ ᐅᖃᐅᔾᔨᓂᕐᒪᖔᖅ ᐅᐊᑦᓯᐅᔪᒥᑦ ᐱᓪᓗᒍ J.J. ᐸᐸᒧᑦ ᑎᒻᒥᑳᕐᕕᐅᓯᒪᓂᖓ ᐅᕝᕙᓘᓐᓃᑦ ᑎᓕᔭᐅᓐᓂᕐᒪᖔᖅ ᐱᑎᑦᓯᖁᔭᐅᓗᓂ J.J.-ᒥᑦ ᓴᓗᒻᒪᕐᓴᐃᑎᑦᓴᒥᑦ. ᒪᓕᑦᑐᒋᑦ ᐊᑐᐊᒐᐃᑦ, ᑭᓯᐊᓂ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᑉᐱᒍᓱᑦᑎᐅᔪᑦ ᖃᓄᐃᒋᐊᖃᖏᓐᓂᖏᓐᓂᑦ ᑭᒃᑯᑐᐃᓐᓇᐃᑦ ᑎᒍᓯᒪᔭᓂ. ᖃᐅᔨᓴᖅᑏᑦ ᐊᑐᖁᔨᕗᑦ ᑳᓐᔅᑕᐳᓪ ᑭᐅᓕᖕ ᐊᒻᒪ ᓵᔨᓐ ᒋᐅᓪ ᐱᑎᑕᐅᖁᔭᐅᓗᑎᒃ ᐊᐅᓚᑦᓯᔾᔪᑎᓂᑦ ᐊᑐᐊᒐᓕᕆᔪᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓴᓗᒻᒪᕐᓴᐃᒋᐊᖃᕐᓂᐅᔪᖅ ᑎᒍᔭᐅᖅᑲᔪᓂᑦ.

[208] ᖃᐅᔨᓴᖅᑏᑦ ᓇᓂᓯᒻᒥᔪᑦ ᓈᒻᒪᓚᐅᖏᒻᒪᑦ ᐃᔩᓐᓂᒃ ᓴᓗᒻᒪᕐᓴᐃᑎᖃᕐᕕᐅᔪᖅ ᐃᒪᖃᓚᐅᖏᓐᓂᖓᓄᑦ ᐊᒻᒪ ᐃᓂᖃᖅᑎᑕᐅᓗᓂ ᐊᑲᐅᓗᐊᖏᑦᑐᒥ. ᓈᒻᒪᓚᐅᖏᒻᒥᔪᖅ ᐅᐊᓴᕐᕕᖓ ᐃᓪᓗᕈᓯᕐᒥ 3 ᑕᐃᒪᐃᓕᖓᑎᑕᐅᑐᐃᓐᓇᕐᓂᒥᓂᖓ ᓱᕋᑦᓯᒪᓗᓂ, ᐊᕐᕌᒎᓐᓄᑦ ᒪᕐᕉᒻᒪᕆᐊᓘᓐᓄᑦ (2).

[209] ᖃᐅᔨᓴᖅᑏᑦ ᐊᑐᖁᔨᔪᑦ ᐅᐊᓴᕐᕕᖏᑦ ᐊᒻᒪ ᖁᕝᕕᖏᑦ ᑭᖕᖓᐃᑦ ᐸᓖᓯᒃᑯᑦ ᑎᒍᔭᐅᒪᕕᖓᑕ ᐃᓪᓗᕈᓯᖏᓐᓃᑦᑐᑦ ᓴᓇᔭᐅᖁᓪᓗᒋᑦ ᐊᒻᒪ ᒪᑭᒪᑎᑕᐅᕙᓪᓗᑎᒃ ᒪᓕᑦᑕᐅᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ, ᐊᒻᒪ ᐃᔩᓐᓂᒃ ᐅᐊᓴᐅᑎᖃᕐᕕᐅᔪᖅ ᓅᑕᐅᓗᓂ ᐊᑐᐃᓐᓇᐅᓂᕐᓴᒧᑦ ᐊᒻᒪ ᖃᐅᔨᓴᖅᑕᐅᖏᓐᓇᕐᓗᓂ ᐃᒪᖃᐃᓐᓇᕋᓗᐊᕐᒪᖔᖅ.

ᐱᒋᐊᖅᑕᐅᓂᖓ A.B.

[210] 20 ᒪᓇᑦᓯᓪᓗᐊᑦ ᐊᓂᒍᓚᐅᖅᑎᓪᓗᒋᑦ ᐃᓪᓗᕈᓯᕐᒨᖅᑕᐅᓚᐅᖅᑎᓪᓗᒍ 3-ᒧᑦ, ᑭᖑᓂᐊᒍᑦ A.B. ᐊᐳᑲᓪᓚᓚᐅᖅᑎᓪᓗᒍ J.J.-ᒧᑦ ᐊᑕᐅᓯᐊᕋᓂ ᐊᒻᒪ ᑎᓪᓗᑦᑐᓂᐅᒃ, J.J. ᐊᑦᓱᐊᓘᖅᑐᓂ ᐱᒋᐊᕐᓯᓕᓚᐅᖅᑐᖅ A.B.-ᒥᑦ ᑎᓪᓗᐊᓪᓗᓂᐅᒃ, ᑐᒃᑲᖅᑐᓂᐅᒃ, ᐊᒻᒪ ᐃᓯᒻᒥᖃᑦᑕᖅᑐᓂᐅᒃ ᒪᕐᕈᐊᑎᖅᑐᒍ (2). ᐊᒥᓱᐊᖅᑎᖅᑐᓂ ᐊᑦᓱᑲᓪᓛᖅᑐᓂ ᑎᓪᓗᐸᑦᑐᓂᐅᒃ ᑮᓇᖓᒍᑦ, A.B. ᐅᕐᕈᓯᒪᑎᓪᓗᒍ ᓄᓇᒥ.

[211] ᒪᓕᑦᑐᓂᐅᒃ ᐱᓕᒻᒪᓴᕐᓯᒪᔭᓂ, ᐅᐊᑦᓯᐅᔪᖅ ᒪᑐᐃᕐᓯᓚᐅᖏᑦᑐᖅ ᐃᓪᓗᕈᓯᐅᑉ ᒪᑐᐊᓂᑦ ᐅᐸᓪᓗᓂᐅᒃ; ᐅᖄᓚᕕᒋᓚᐅᖅᑕᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ, ᑕᐃᒃᑯᐊᓕ ᐊᓃᓚᐅᖅᑐᑦ ᑎᒍᔭᐅᒪᕕᒻᒥᒃ ᐅᐸᑦᓯᒪᓪᓗᑎᒃ ᐅᖄᓚᓯᒪᔪᓄᑦ, ᐅᑎᖁᓪᓗᒋᑦ ᐃᑲᔪᕐᓂᐊᕐᒪᑕ. ᐱᒋᐊᖅᑐᖅᑕᐅᓚᐅᖅᑎᓪᓗᒍ, A.B. ᐅᕐᕈᓯᒪᓚᐅᖅᑐᖅ ᓇᓚᓪᓗᓂ ᓴᓂᕋᖓᓪᓗᓂ, ᑮᓇᖓ ᐊᐅᖏᓐᓇᐅᓗᓂ, ᐊᐅᓈᖅᑐᒻᒪᕆᐅᓯᒪᓪᓗᓂ ᓇᑎᕐᒧᑦ, ᑲᑎᓯᒪᔪᒥᑦ ᐃᒥᕐᒧᑦ ᖁᕝᕕᐅᑉ ᐃᓗᐊᓂ ᓯᖅᐸᕿᓯᒪᔪᒧᑦ J.J. ᐅᐊᓴᖅᑎᓪᓗᒍ ᑮᓇᕐᒥᓂᒃ. ᑐᖔᓂ 2 ᒪᓇᑦᓯ ᐱᒋᐊᖅᑕᐅᓚᐅᖅᑎᓪᓗᒍ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᑭᓚᐅᖅᑐᖅ ᑎᒍᔭᐅᒪᕕᒻᒧᑦ ᐊᒻᒪ ᓅᑕᐅᓗᓂ J.J. ᑎᒍᔭᐅᓚᐅᖅᑐᖅ ᐊᒻᒪ ᐃᖅᑲᖅᑐᕋᑦᓴᕈᖅᑎᑕᐅᓗᓂ ᐱᒋᐊᕐᓯᓯᒪᓂᖓᓄᑦ ᐊᑦᓱᑲᓪᓚᒃ, ᐊᒻᒪ ᐃᖅᑲᖅᑐᖅᑕᐅᒐᒥ ᖃᐅᔨᔭᐅᓚᐅᖅᑐᖅ ᐸᓯᔾᔭᑦᓴᐅᓂᖓᓂᑦ. ᑎᒍᔭᐅᓚᐅᖅᑐᖅ ᑕᖅᑭᓂᑦ 9-ᓂᑦ ᑎᒍᔭᐅᒪᓂᐊᓕᖅᑐᓂ. ᐊᓂᑎᑕᐅᓚᐅᖅᑐᖅ ᐱᔾᔪᑎᒋᓪᓗᒍ "ᑎᒍᔭᐅᒪᓚᐅᕐᓂᖓ," ᐃᖅᑲᖅᑐᖅᑕᐅᓇᓱᐊᕐᓂᖓᓂ ᑎᒍᔭᐅᒪᓐᓂᕋᒥ.   

[212] ᐅᖃᐅᓯᐅᖃᑦᑕᕐᓯᒪᔫᒐᓗᐊᖅ ᐊᑕᐅᓯᐊᕋᑎᒃ ᐅᓂᒃᑳᓕᐊᒥᓂᕐᒥ ᐱᒻᒪᕆᐊᓗᓐᓂᑦ ᐱᔾᔪᑎᖃᕐᒪᑕ ᐃᓂᖃᑦᓯᐊᐸᖏᓐᓂᖏᓐᓂᑦ ᑎᒍᔭᐅᒪᕕᓐᓂᑦ ᑭᖕᖓᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓐᓂ ᑕᐃᑲᓂ ᐅᓐᓅᑎᓪᓗᒍ ᐊᐱᖅᑯᑎᐅᔪᒥᑦ. ᖃᐅᔨᓴᖅᑏᑦ ᖃᐅᔨᔪᑦ ᐃᓂᖃᑦᓯᐊᐸᖏᓐᓂᖏᓐᓂᑦ ᑎᒍᔭᐅᒪᔪᑦ ᓴᖅᑮᓚᐅᕐᒪᑕ ᐊᑦᑕᓇᖅᑐᒥᑦ ᑎᒍᔭᐅᒪᔪᓄᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓄᑦ, ᐊᒻᒪ ᑎᒍᔭᐅᒪᕕᒻᒥ ᐃᖅᑲᓇᐃᔭᖅᑎᓄᑦ.

[213] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᐊᐅᓚᑦᓯᓚᐅᖅᑐᖅ ᐃᖕᒥᓂᕐᓱᖅᑐᒥᑦ ᑲᒪᔨᒧᑦ ᖃᐅᔨᓴᕐᓂᕐᒥᑦ ᖃᓄᐃᒍᑎᐅᔪᖅ ᐊᑐᖅᑕᐅᓚᐅᖅᑎᓪᓗᒍ ᐅᓂᒃᑳᓕᐅᓚᐅᖅᑐᖅ ᑐᑭᓯᒋᐊᓚᐅᖅᑐᖅ ᐃᖅᑲᓇᐃᔭᖅᑎᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᖁᑎᓂᑦ ᐊᐅᓚᑦᓯᔨᖏᓐᓂᑦ, ᐅᖃᕆᐊᓚᐅᖅᑐᓂᑦ ᐊᒥᓲᓂᖏᑦ ᑎᒍᔭᐅᒪᔪᑦ ᑭᖕᖓᐃᑦ ᐸᓖᓯᒃᑯᖏᑕ ᑎᒍᔭᐅᒪᕕᖏᓐᓂ ᐊᒥᓱᕈᕆᐊᕐᓯᒪᕙᓕᕐᒪᑕ ᐊᕐᕌᒎᓐᓂ ᒪᕐᕉᓐᓂ (2). ᐃᖅᑲᓇᐃᔭᖅᑎᐅᑉ ᑕᑯᓐᓇᖅᑕᖓᑎᒍᑦ, "[ᐅ]ᓇ ᐃᓚᒋᐊᕐᓯᒪᓂᐅᔪᖅ ᐊᔾᔨᖃᖅᑐᖅ ᑎᒍᔭᐅᒪᕕᒻᒥ ᐱᑕᖃᕆᐊᖃᓕᕐᓂᖓᓄᑦ ᖁᓕᓂᑦ (10) ᐃᓪᓗᕈᓯᕐᓂᑦ ᒫᓐᓇ ᑎᓴᒪᐃᓐᓇᐅᒻᒪᑕ (4) ᐱᑦᓯᐊᖅᑐᒥᑦ ᐊᐅᓚᑕᐅᒍᒪᕙᓐᓂᐊᕈᑎᒃ ᑎᒍᔭᐅᒪᕙᑦᑐᑦ."

[214] ᐅᖄᓚᔾᔪᑎᖃᖅᐸᓚᐅᖅᑐᑦ ᐊᒥᓲᑎᓪᓗᒋᑦ ᐅᓐᓄᖓᓂ ᔪᓂ 1, 2020, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᒥᓱᓂᑦ ᐱᔭᕆᐊᑐᔪᓂᑦ ᐃᓱᒪᓕᐅᕆᐊᖃᖅᐸᓚᐅᖅᑐᑦ ᐃᓂᑦᓴᓕᐅᖅᑐᑎᒃ ᑎᒍᔭᐅᕙᓪᓕᐊᔪᓄᑦ. ᓲᕐᓗ, ᐊᑕᐅᓯᕐᒥᑦ (1) ᑎᒍᔭᐅᒪᔪᒥᑦ ᐊᓯᐊᓅᖅᑕᐅᔪᖃᓚᐅᖅᑐᖅ ᐃᓪᓗᕈᓯᕐᒧᑦ ᑎᒍᔭᐅᒪᕕᐅᑉ ᐊᐱᕐᓱᕐᕕᖓᓂᑦ, ᐊᒻᒪ ᐊᓯᐊᓂᑦ ᐸᓖᓯᒃᑯᑦ ᓄᓇᒃᑰᔫᖓᑕ ᐅᖓᑖᓅᖅᑕᐅᔪᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᓂᑲᐃᓐᓇᕐᒪᑕ ᑎᒍᔭᐅᒪᕕᒻᒥᑦ ᐅᐸᑦᑎᓪᓗᒋᑦ ᐅᖄᓚᔾᔪᑎᓕᓐᓂᑦ.^{Footnote 31} ᓇᓗᓇᐃᔭᐃᑏᑦ ᐱᓕᕆᔾᔪᑎᒥᓂᐅᔪᑦ ᓇᓗᓇᐃᕐᓯᓯᒪᒻᒥᔪᑦ ᐊᑕᐅᓯᐅᒐᓗᐊᒥᑦ ᑎᒍᔭᐅᖅᑲᔪᒥᑦ ᐊᓂᑎᑦᓯᓯᒪᒻᒪᑕ ᓱᓕ ᐋᖓᔮᖅᑎᓪᓗᒋᑦ. ᑕᒪᓐᓇ ᐊᑐᖅᑕᐅᔪᕕᓂᖅ ᐃᓂᑦᓴᓕᐅᒃᑲᓐᓂᖅᑐᑎᒃ ᐅᓗᕆᐊᓇᕐᓂᕐᓴᓄᑦ ᑎᒍᔭᐅᓯᒪᔪᓄᑦ. ᐊᒻᒪᑦᑕᐅᖅ, ᒪᕐᕉᒃ (2) ᑎᒍᔭᐅᖅᑲᔫᒃ ᑎᑎᖅᑲᖃᐅᑕᐅᓚᐅᖅᑑᒃ ᑎᒍᔭᐅᕕᖏᓐᓂ ᑎᑎᖅᑲᓂ ᐱᔾᔪᑎᓕᓐᓂᑦ ᐃᓱᒪᓕᕆᓂᕐᒧᑦ ᒪᓕᒐᖅ ᐱᓪᓗᒍ ᐃᓱᒫᓘᑎᐅᔪᓂᑦ; ᑭᓯᐊᓂᓕ, ᐊᔾᔨᒋᖏᑕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᓐᓂᑦ, ᓇᓪᓕᐊᑐᐃᓐᓇᖅ ᑎᒍᔭᐅᖅᑲᔪᐃᑦ ᐃᓄᑑᑎᑕᐅᓚᐅᖏᑦᑐᑦ ᐱᔾᔪᑎᖃᖅᑐᑎᒃ ᐃᓂᑦᓴᖃᖏᓂᕐᒥᑦ. ᓇᓪᓕᐊᑐᐃᓐᓇᑦᓯᐊᖅ ᑖᒃᑯᐊ ᖃᓄᐃᓕᖓᒍᑎᐅᓚᐅᖅᑐᑦ ᐊᑐᖅᑕᐅᔪᓐᓇᖅᑐᒥᓃᑦ ᐊᑦᑕᓇᑦᑕᐃᓕᒪᓂᒃᑯᑦ ᐃᓱᒫᓘᑎᐅᔪᓂᑦ ᑎᒍᔭᐅᖅᑲᔪᓄᑦ ᐅᕝᕙᓘᓐᓃᑦ ᐊᓯᖏᓐᓄᑦ.

[215] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ^{Footnote 32} ᑎᑎᕋᕐᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ "[ᐊ]ᕕᑦᑎᑦᓯᓯᒪᕙᒋᐊᓖᑦ ᑎᒍᔭᐅᒪᔪᑦ ᑕᐃᒪᐃᒋᐊᖃᕈᑎᒃ, ᓲᕐᓗ, ᑎᒍᔭᐅᒪᔪᖅ ᐃᓅᓯᕐᒥᓂᒃ ᑭᐱᓯᒍᒪᒍᓂ ᐃᖕᒥᓂᒃ, ᐅᓗᕆᐊᓇᕈᓂ ᐊᓯᖏᑕ ᐃᓗᓯᖏᓐᓄᑦ ᐊᒻᒪ ᐊᑦᑕᓇᑦᑕᐃᓕᒪᐅᑎᖏᓐᓄᑦ, ᓄᓕᐊᕐᓂᒃᑯᑦ ᖃᓄᐃᓕᐅᕋᓱᒃᑯᓂ."

[216] ᐱᓕᕆᔾᔪᑎᐅᔪᖅ ᐱᔾᔪᑎᐅᓗᓂ A.B., ᐅᒡᒍᐊᓇᖅᑑᒐᓗᐊᖅ, ᐆᑦᑑᑎᐅᔪᖅ ᐃᓪᓗᕈᓯᕐᓂᑦ ᐊᒥᒐᕐᓯᓂᒃᑯᑦ ᐱᔾᔪᑎᐅᔪᓂᑦ ᓴᖅᑮᓯᒪᔪᑦ ᐊᑲᐅᖏᓕᐅᕈᑎᑕᖃᓕᕐᓂᖅᑐᓂ, ᐊᑦᓱᑲᓪᓛᓗᒃ ᐋᓐᓂᖅᑕᐅᔪᖃᖅᑐᓂ, ᐊᑐᖅᑕᐅᔪᒥᑦ. ᐱᒋᐊᕐᓯᔪᕕᓂᖅ, J.J., ᐱᓕᕆᔾᔪᑎᐅᓂᐊᓕᖅᑐᓂ ᐊᑐᖅᑐᒥᓂᐅᓂᖓᓄᑦ ᐱᕋᔭᓐᓂᒃᑯᑦ ᓱᕋᐃᓗᓂ ᒪᓕᒐᕐᒥᑦ, ᓇᓗᓇᓚᐅᕈᓐᓃᖅᑐᖅ ᑕᕝᕗᖓᑦᓴᐃᓐᓈᖅᑕᐅᓂᖏᒃ J.J. ᐊᒻᒪ A.B. ᐃᓪᓗᕈᓯᕐᒧᑦ ᑎᒍᔭᐅᒪᕕᒻᒧᑦ ᖁᕕᐊᓇᖏᑦᑐᒥᑦ ᓴᖅᑮᓂᐊᕐᓂᖏᓐᓂᑦ.

[217] A.B. ᐊᑦᓱᑲᓪᓚᒃ ᐋᖓᔮᓚᐅᖅᑐᓂ ᓇᖏᕈᓐᓇᑦᑎᐊᕈᓐᓃᒻᒪᕆᑦᑐᓂ ᐊᒻᒪ ᖃᓄᐃᓕᐅᕐᓂᐊᓕᕐᓂᖓᓄᑦ ᓇᓗᓇᖅᑐᓂ. ᖁᕕᐊᓇᖏᑦᑐᓕᕆᖃᑕᐅᓯᒪᓪᓗᓂ ᐊᑖᑕᒃᑯᖏᓐᓂ ᐊᒻᒪ ᐸᓖᓯᓂᑦ ᖁᓄᐃᓐᓇᓯᐊᖅᑐᓂ. J.J. ᑎᒍᔭᐅᓯᒪᓚᐅᖅᑐᖅ ᐃᓚᒥᓂᒃ ᐱᒋᐊᕐᓯᓂᕋᖅᑕᐅᓯᒪᓗᓂ ᐊᒻᒪ ᓂᖕᖓᐅᒪᔪᒻᒪᕆᐅᓚᐅᖅᑐᖅ ᐊᒻᒪ ᖁᓄᓪᓗᓂ ᐸᓖᓯᒃᑯᓐᓂᑦ ᐸᐸᒧᑦ ᑎᒻᒥᑳᕐᕕᐅᒻᒪᕆᓕᖅᑐᓂ. J.J. ᐋᖓᔮᓚᐅᕐᒥᔪᖅ ᐊᒻᒪ ᐊᑲᐅᖏᓕᓯᒪᔫᔮᖅᑐᓂ ᐸᐸᒧᑦ ᑎᒻᒥᑳᕐᕕᐅᓯᒪᒐᒥ. ᑕᕝᕙᓂᑦᓴᐃᓛᓕᕐᒪᑎᒃ ᐃᓪᓗᕈᓯᕐᒥ, A.B. ᕿᑲᕐᓯᓚᐅᖏᑦᑐᖅ ᐅᕐᕈᔮᓪᓗᓂ ᐃᓪᓗᕈᓯᐅᑉ ᐃᓗᐊᓂ, ᐃᓛᓐᓂᒃᑯᑦ ᐊᐳᑲᓪᓚᐸᑦᑐᓂ J.J.-ᒧᑦ. A.B. ᐱᓱᕋᔭᓚᐅᖅᑐᓂ "ᑎᓪᓗᐃᒋᐊᓕᓚᐅᖅᑐᖅ" J.J.-ᒥᑦ, ᐊᓱᐃᓪᓛᒃ J.J. ᐊᑭᓂᐊᓯᔪᕕᓂᖅ ᐱᒋᐊᕐᓯᖃᑦᑕᓕᖅᑐᓂ.

[218] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᓚᐅᖅᑐᑎᒃ ᐊᑐᕈᓐᓇᖅᑕᖏᓐᓂᑦ ᐊᑐᐃᓐᓇᐅᔪᓂᑦ ᐊᒻᒪ ᓇᓗᓇᐃᕐᓯᓕᖅᑐᒥᓃᑦ J.J. ᐃᓪᓗᕈᓯᕐᒨᖅᑕᐅᓂᖓ 3-ᒧᑦ ᓇᔪᖅᑕᖓᓄᑦ A.B. "ᐱᐅᖏᒃᑲᓗᐊᖅᑐᓂ ᖃᓄᐃᖏᓂᖅᐹᖑᓂᐊᕐᒪᑦ" ᓇᓖᕌᕈᑎᓂᑦ. ᐊᑐᐃᓐᓇᐅᔪᓂᑦ ᐊᒥᕋᕐᓯᔪᒻᒪᕆᐅᓗᑎᒃ, ᐱᔭᕆᐊᑐᔪᖅ ᐸᓯᐅᕆᔭᕆᐊᑦᓴᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᐱᔾᔪᑎᒋᓪᓗᒍ ᐊᑐᓕᓚᐅᖅᑕᖓᑦ. ᐱᔭᕆᐊᑐᒐᓗᐊᖅᑎᓪᓗᒍ, ᐃᓪᓗᕈᓯᕐᒨᖅᑕᐅᓂᒥᓂᖓ ᑕᕝᕗᖓᑦᓴᐃᓐᓇᖅ J.J. ᓇᔪᖅᑕᖓᓄᑦ A.B. ᓴᖅᑮᓚᐅᖅᑐᑦ ᐊᑐᖅᑕᐅᓕᓚᐅᖅᑐᒥᑦ ᐊᑦᓱᑲᓪᓚᐅᔪᖅ ᐱᒋᐊᕐᓯᔪᖃᓕᖅᑐᓂ.  

[219] ᐊᒻᒪᑦᑕᐅᖅ, J.J. ᐋᓐᓂᕐᓯᔪᒻᒪᕆᐅᓗᓂ ᐱᒋᐊᕐᓯᓚᐅᖅᑎᓪᓗᒍ A.B.-ᒥᑦ, ᐃᓪᓗᕈᓯᕐᒧᑦ 1-ᒨᖅᑕᐅᓚᐅᖅᑐᖅ ᐃᓄᖃᖅᑐᒧᑦ ᑎᓴᒪᓂᒃ (4) ᐊᓯᖏᓐᓂᑦ ᐊᖑᑎᓂᑦ. ᑳᓐᔅᑕᐳᓪ ᑭᐅᓕᖕ ᐅᖃᐅᓯᖃᕆᐊᓚᐅᖅᑐᖅ ᑎᑎᕋᕐᓯᒪᔭᕐᒥᓂ ᑎᑎᖅᑲᓂ J.J. ᐊᖏᓚᐅᕐᒪᑦ ᐃᓪᓗᕈᓯᕐᒨᖁᔭᐅᒐᒥ, ᐊᒻᒪ ᐊᖑᑎᐅᔪᑦ ᐃᓪᓗᕈᓯᕐᒦᓯᓐᓇᓚᐅᖅᑐᑦ ᐅᖃᓚᐅᕐᒪᑕ ᖃᓄᐃᑦᓴᖏᒻᒪᑕ J.J. ᐃᓪᓗᕈᓯᕐᒦᖃᑕᐅᒐᓗᐊᖅᐸᑦ. ᖃᓄᐃᑦᓴᓚᐅᖏᒃᑲᓗᐊᖅᑎᓪᓗᒋᑦ, ᑕᐃᒪᐃᓕᖓᑎᓪᓗᒋᑦ ᐊᑲᐅᓛᖑᓚᐅᖏᑦᑐᖅ, ᐱᓗᐊᖅᑐᒥ ᐱᔾᔪᑎᒋᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓇᓗᓇᐃᕆᐊᖓᓂᕐᒪᑕ J.J. ᐃᓪᓗᕈᓯᕐᒨᖅᑕᐅᒍᓂ ᐃᓄᖃᓗᐊᕇᓚᐅᕐᒪᑦ ᐊᒥᓲᓗᐊᖅᑐᓂᑦ.

[220] ᐱᔾᔪᑎᒋᓪᓗᓂᐅᒃ ᐱᒻᒪᕆᐅᔪᑦ ᐃᓪᓗᕈᓯᑭᑦᓴᓐᓂᐅᕙᑦᑐᖅ ᑕᑯᓐᓇᖅᑕᐅᔪᑦ ᑕᕝᕙᓂ ᐱᓕᕆᐊᒥ, ᖃᐅᔨᓴᖅᑏᑦ ᐊᑐᖁᔨᓕᖅᑐᑦ ᑭᖕᖓᐃᑦ ᑎᒍᔭᐅᒪᕕᖓᑦ ᐱᓕᕆᕝᕕᒃ ᐊᖏᓪᓕᒋᐊᖅᑕᐅᖁᓪᓗᒍ ᐃᓪᓗᕈᓯᖏᑦ ᐃᓚᒐᔭᕐᓗᑎᒃ ᖁᓕᐅᓕᕐᓗᑎᒃ (10), ᒪᓕᑦᑐᒋᑦ ᐅᖃᐅᓯᐅᓯᒪᔪᑦ ᐃᖕᒥᓂᕐᓱᖅᑐᒥᑦ ᑲᒪᔨᒧᑦ ᖃᐅᔨᓴᕐᓂᐅᔪᒥ ᓯᕗᓪᓕᐹᕐᓯᐅᑎᓂ ᐊᒻᒪ ᐃᓱᒪᒋᔭᐅᔪᓂᑦ ᐃᓱᐊᓂ ᐅᓂᒃᑳᓕᐊᓂ.  

ᖃᓄᐃᓕᖓᓂᖓ ᐃᓪᓗᕈᓯᖃᕐᕕᐅᑉ ᑎᒍᔭᐅᒪᔪᓄᑦ ᐊᒻᒪ ᑎᒍᔭᐅᒪᕕᒃ ᐱᓕᕆᕝᕕᒃ

ᖃᐅᔨᔭᐅᔪᖅ #21: ᑕᑯᑦᓴᓪᓚᕆᐅᔪᓂᑦ ᐱᐅᖏᑦᑐᑕᖃᐅᓚᐅᖅᑐᖅ ᐃᓗᐊᒍᑦ ᑭᖕᖓᐃᑦ ᑎᒍᔭᐅᒪᕕᐅᑉ, ᓴᖅᑮᓯᒪᓕᖅᑐᑎᒃ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ. ᓈᒻᒪᓚᐅᖏᑦᑐᖅ ᑎᒍᔭᐅᒪᕕᐅᔪᖅ ᑕᐃᒪᐃᑦᑑᑎᓪᓗᒍ ᐃᓗᐊ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓄᒋᐊᕝᕕᐅᓗᑎᒃ ᐃᑉᐱᒍᓱᑦᑎᐅᓚᐅᖅᑐᑦ ᐱᔾᔪᑎᒋᓪᓗᒍ ᑎᒍᔭᐅᒪᕕᐅᑉ ᐊᒻᒪ ᐃᓪᓗᕈᓯᖃᕐᕕᐅᑉ ᑎᒍᔭᐅᒪᕕᓐᓂᑦ ᐃᓗᐊ ᖃᓄᐃᑦᑑᓂᖓᓄᑦ ᓴᖅᑮᓯᒪᖏᓪᓗᑎᒃ ᓈᒻᒪᖏᑦᑐᓂᑦ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐊᒻᒪ ᑎᒍᔭᐅᒪᔪᓄᑦ.

ᐊᑐᖁᔭᖅ #8: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᒋᐊᖅᑎᑦᓯᔭᕆᐊᓖᑦ ᐃᓘᓐᓇᖏᓐᓂᑦ ᐊᑐᖁᔭᐅᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᔨᐅᑉ ᐃᓱᒪᒋᔭᖏᓐᓂ ᐃᓱᒋᔭᖏᓐᓂ ᐅᓂᒃᑳᓕᐊᖓᑕ ᐊᑦᑐᐊᓂᕆᔭᖏᑦ ᐃᓗᐊᑕ ᖃᓄᐃᑦᑑᓂᖓᓄᑦ ᑭᖕᖓᐃᑦ ᑎᒍᔭᐅᒪᕕᖓᑕ.

ᐊᑐᖁᔭᖅ #9: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᕆᐊᓖᑦ ᑭᖑᕝᕕᖅᑕᐅᓗᓂ ᑭᖕᖓᐃᑦ ᑎᒍᔭᐅᒪᕕᖓᑕ ᐃᓪᓗᑦᑕᖓ. .

[221] ᐃᖅᑲᓇᐃᔭᖅᑎᐅᔪᖅ ᐱᖁᑎᓂᑦ ᐊᐅᓚᑦᑎᔨᓂᑦ ᑐᑭᓯᒋᐊᕐᕕᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᔨ ᕿᒥᕐᕈᐊᕐᓂᖓᓂ ᐅᖃᓚᐅᖅᑐᖅ "ᐃᓪᓗᕈᓯᖃᕐᕕᒻᒥ ᑎᒍᔭᐅᒪᕕᒻᒥ ᐃᓪᓗᕈᓯᖃᖅᑎᓪᓗᒍ ᑎᓴᒪᓂᑦ (4) ᐃᓘᓐᓇᐸᓗᐊᒍᑦ ᒪᓕᖕᖏᑦᑐᑦ ᒫᓐᓇᒃᑯᑦ ᐊᑐᖅᑕᐅᕙᑦᑐᒥᑦ ᐱᖁᑎᓂᑦ ᐊᐅᓚᑦᓯᔾᔪᑎᓂᑦ ᐅᖃᓕᒫᒐᕐᒥ ᑎᑎᕋᕐᓯᒪᔪᓂᑦ ᐋᖅᑭᒋᐊᕈᑎᓂᑦ ᐱᔾᔪᓯᒍᑦ." ᐊᓯᖏᓐᓂ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᔨᐅᓚᐅᖅᑐᖅ ᑕᑯᓐᓇᓚᐅᖅᑐᖅ:

• - ᐅᐊᓴᕐᕖᑦ/ᑯᕝᕕᕖᑦ ᐱᔪᓐᓇᓚᐅᖏᑦᑐᑦ ᐃᓪᓗᕈᓯᕐᓂ 3 ᐊᒻᒪ 4.
• - ᐃᑦᓯᕙᐅᑕᖏᑦ ᐃᓪᓗᕈᓰᓐᓂ 1 ᐊᒻᒪ 2 ᓄᕝᕗᑦᓯᐊᕆᑦᑐᓂᑦ ᓴᕕᕋᔭᓂᑦ ᐃᓱᖃᓚᐅᖅᑐᑦ, ᓴᖅᑮᓯᒪᓪᓗᑎᒃ ᐊᑦᑕᓇᖅᑐᒻᒪᕆᒻᒥᑦ.
• - ᒪᑐᐊᑕ ᑎᒍᓪᓕᕕᖓ ᐃᓚᖓᓄᑦ ᓱᓪᓗᓕᖃᕐᕕᐅᑉ ᐃᓪᓗᕈᓯᐅᑉ ᓱᕋᑦᓯᒪᓚᐅᖅᑐᖅ, ᒪᑐᐃᖓᐃᓐᓇᓕᖅᑐᓂ ᐊᒻᒪ ᐊᕝᕕᐊᕈᑎᐅᓗᓂ ᐱᓕᕆᕝᕕᖃᕐᕕᖓᓄᑦ.
• - ᖁᕝᕕᖏᑦ ᐊᑐᓂ ᐃᓪᓗᕈᓯᕐᓂ ᑎᓴᒪᓂ (4) ᒪᓕᓚᐅᖏᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᓐᓂᑦ.

[222] ᐱᔾᔪᑎᒋᓪᓗᒋᑦ ᐹᖏᑦ ᑎᒍᔭᐅᒪᕕᒻᒧᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᖃᐅᔨᒪᖁᔨᓚᐅᖅᑐᖅ ᐅᖓᑖᓃᑦᑐᖅ ᒪᑐ ᐊᑐᖅᑕᐅᕙᓚᐅᖏᒻᒪᑦ. ᓄᓇᑦᑕᖓ ᐊᐅᓚᔾᔭᑦᓯᒪᓚᐅᖅᑐᖅ ᐊᒻᒪ ᒪᑐᐊ ᒪᑐᐃᕈᓐᓇᓚᐅᕐᓯᒪᖏᑦᑐᖅ "ᐊᑯᓂᑲᓪᓚᐅᓕᖅᑐᖅ." ᑕᒪᓐᓇ ᓴᖅᑮᓯᒪᓪᓚᕆᑦᑐᖅ ᐃᑭᑦᑐᖃᓕᕐᓂᖅᐸᑦ ᐅᓗᕆᐊᓇᖅᑐᒥᑦ.

[223] ᑕᐃᒪᐃᓐᓂᖓᓄᑦ, ᐹᖓ ᒪᑐᐊ ᐊᑐᖅᑕᐅᖏᓐᓇᐸᑦᑐᖅ ᐃᓯᕈᑎᐅᓗᓂ ᐊᒻᒪ ᐊᓂᕕᐅᓗᓂ ᐃᓪᓗᒥᑦ, ᐱᖃᓯᐅᔾᔭᐅᓗᑎᒃ ᐃᓘᓐᓇᖏᓐᓂᑦ ᑎᒍᔭᐅᒪᔪᓂᑦ ᐃᓚᖃᖅᑐᑎᒃ. ᑕᒪᐅᓇ ᓴᖅᑮᓯᒪᔪᑦ ᓇᖕᒥᓂᖅ ᐊᑲᐅᖏᓕᐅᕈᑎᐅᔪᓂᑦ ᐅᐱᓐᓇᕋᓂ ᐹᖓᑕ ᒪᑐᐊ ᐱᑕᖃᕐᒥᒻᒪᑦ ᒪᔪᕋᐅᑎᑯᑖᓂᑦ, ᓯᕕᖓᓪᓗᓂ ᓴᕕᕋᔭᐅᓗᓂ ᐊᒻᒪ ᓯᓚᒧᑦ ᐊᑦᑐᐊᔭᐅᖏᓐᓇᖅᑐᑎᒃ, ᐊᑦᓱᐊᓘᕈᓐᓇᑐᒻᒪᕆᐅᓗᑎᒃ ᓄᓇᕘᒥ. ᐃᓚᒋᔭᐅᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐱᖃᑕᐅᓚᐅᖅᑐᑦ ᐱᓕᕆᔾᔪᑎᐅᔪᒥ ᐅᖃᐅᓯᖃᓚᐅᕐᒥᔪᑦ ᖃᓄᖅ ᐱᔭᕆᐊᑐᔫᓂᖓᓄᑦ ᑎᒍᔭᐅᒪᔪᓂᑦ ᑭᖕᖓᐃᑦ ᑎᒍᔭᐅᒪᕕᖓᓅᕆᓇᓱᐊᖅᑐᓂ, ᐱᔾᔪᑎᒋᓪᓗᒋᑦ ᒪᔪᕋᐅᑎᑯᑖᖏᑦ ᓯᕕᖓᔪᑦ. ᑕᒪᓐᓇ ᓱᓕᔪᒻᒪᕆᐅᒻᒥᔪᖅ ᐱᔾᔪᑎᒋᓪᓗᒋᑦ ᑎᒍᔭᐅᒪᔪᑦ ᐋᖓᔮᖅᑎᓪᓗᒋᑦ ᐊᒻᒪ/ᐅᕝᕙᓘᓐᓃᑦ ᖁᓄᑎᓪᓗᒋᑦ. ᐃᓚᖓᑦᑕᐅᖅ ᐊᑲᐅᖏᓕᐅᕈᑎᐅᒻᒥᔪᖅ ᓇᓗᓇᐃᖅᑕᐅᓚᐅᖅᑐᖅ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐹᖓ ᒪᑐᐊ ᑎᒍᔭᐅᒪᕕᐅᑉ ᒪᕐᕉᓐᓂᒃ (2) ᑮᑦᓯᒪᔫᓐᓂᒃ ᒪᑐᖃᓚᐅᖅᑐᖅ, ᐊᑐᓂ ᑮᖏᔾᔮᖅᑕᐅᒋᐊᖃᖅᐸᑑᓐᓂᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐃᓯᕈᒪᒍᑎᒃ ᐃᓪᓗᒧᑦ, ᐊᑦᓱᕉᓴᓐᓇᓕᕋᔭᖅᑐᓂ ᐊᐅᓚᑦᑎᒐᓱᐊᕐᓗᓂ ᐊᒻᒪ/ᐅᕝᕙᓘᓐᓃᑦ ᑎᒍᒥᐊᕋᓱᓪᓗᓂ ᑎᒍᔭᐅᔪᒥᑦ.

[224] ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᔨᐅᑉ ᕿᒥᕐᕈᐊᓚᐅᖅᑕᖏᓐᓂ (IOR) ᐃᓱᒪᒋᔭᐅᔪᓂᑦ ᐅᓂᒃᑳᓕᐊᒥᓃᑦ ᖃᐅᔨᓚᐅᕐᒥᔪᑦ ᐃᓗᐊᓂᑦ ᖃᓄᐃᒻᒪᖔᖅ ᕿᒥᕐᕈᐊᖅᑕᐅᓚᐅᕐᓂᑯ ᑭᖕᖓᐃᑦ ᑎᒍᔭᐅᒪᕕᖓᑦ 2012 ᐱᔭᕇᖅᑕᐅᓗᓂ, ᐊᒻᒪ, ᐃᓂᖓᓂᑦ ᕿᒥᕐᕈᐊᓚᐅᖅᑎᓪᓗᒋᑦ ᔪᓂ 2020, "ᐊᒥᓱᑲᓪᓚᐃᑦ ᓱᕋᑦᓯᒪᔪᑦ ᓇᓗᓇᐃᔭᖅᑕᐅᓚᐅᕐᓂᑯᐃᑦ 2012 ᓱᓕ ᓱᕐᕋᑦᓯᒪᖏᑦᑐᑦ." ᐅᓂᒃᑳᓕᐊᓂ ᐅᖃᕐᓯᒪᓚᐅᕐᒥᔪᑦ, ᐊᓯᖏᓐᓂᓪᓗ, ᐃᓪᓗᕈᓯᕐᓄᑦ ᑎᒍᔭᐅᒪᕕᓐᓄᑦ ᒪᑐᐃᑦ 2007-ᒥᓂᒃ ᑭᖑᕝᕕᖅᑕᐅᖁᔭᐅᓯᒪᓕᖅᑐᑦ. ᐸᕐᓇᐅᑎᓕᐅᓚᐅᖅᑐᑦ (2020-ᒥ ᐃᓪᓗᕈᓯᕐᓂᑦ ᑎᒍᔭᐅᒪᕕᓐᓂᑦ ᐱᐅᓯᑎᑦᓯᒋᐊᕐᓂᖅ ᐱᓕᕆᐊᑦᓴᖅ) ᐱᒋᐊᖅᑎᑕᐅᓚᐅᕐᓯᒪᔪᖅ, ᑭᓯᐊᓂ ᐅᓂᒃᑳᓕᐊᖓ ᖃᐅᔨᒪᖁᔨᓚᐅᖅᑐᖅ ᑖᓐᓇ ᐸᕐᓇᐅᑎ ᐊᓯᔾᔩᒐᔭᖏᒻᒪᑦ ᒫᓐᓇ ᐊᑐᖅᑕᐅᔪᓂᑦ ᐃᓂᑭᑦᓴᓂᕐᒥᑦ.

[225] ᓇᓗᓇᐃᖅᑕᐅᓕᓚᐅᕐᒥᔪᑦ ᐃᓗᐊᓂ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᑭᖕᖓᐃᑦ ᑎᒍᔭᐅᒪᕕᖓᑦ ᐃᓚᒋᔭᐅᒻᒪᑦ 9-ᓄᑦ ᐊᒥᐊᒃᑰᔫᓄᑦ "ᐳᓪᓚᐅᔭᐃᑦ" ᓴᓇᓯᒪᓂᖏᑦ, ᐅᕝᕙᓘᓐᓃᑦ ᑲᓕᒐᖅ, ᑎᒍᔭᐅᒪᕕᐅᓗᓂ ᐃᓪᓗᑑᓕᖅᑐᑎᒃ ᑕᐃᒪᐃᑦᑐᓂᑦ ᓄᓇᕘᒥ 25-ᖑᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᔭᐅᒪᕕᖏᓐᓂᑦ ᓄᓇᕘᒥ. ᐳᓪᓚᐅᔭᐃᑦ ᐃᓪᓗᐃᑦ ᓴᓇᔭᐅᓚᐅᕐᓯᒪᔪᑦ 1980-ᖏᓐᓃᑎᓪᓗᒋᑦ; ᑭᖕᖓᐃᑦ ᑎᒍᔭᐅᒪᕕᖓᑦ ᓴᓇᔭᐅᓚᐅᕐᓂᑯ 1989.

[226] ᖃᐅᔨᓴᖅᑏᑦ ᖃᐅᔨᔪᑦ ᐊᒥᓱᑲᓪᓚᐅᓚᐅᕐᓂᖏᓐᓂᑦ ᐊᑲᐅᖏᓕᐅᕈᑎᖃᖅᑐᑦ ᐃᓗᐊ ᐱᓪᓗᒍ ᑭᖕᖓᐃᑦ ᑎᒍᔭᐅᒪᕕᖓᓐᓂ, ᓴᖅᑮᓯᒪᓕᖅᑐᑎᒃ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᓂᕐᒧᑦ ᐅᓗᕆᐊᓇᖅᑐᓂᑦ. ᓈᒻᒪᓚᐅᖏᑦᑐᖅ ᑎᒍᔭᐅᒪᕕᐅᑉ ᐃᓗᐊ ᑕᐃᒪᐃᑦᑑᑎᓪᓗᒍ, ᐱᓗᐊᖅᑐᒥ ᐃᓚᖏᑦ ᐊᑲᐅᖏᓕᐅᕈᑎᐅᔪᑦ ᓇᓗᓇᐃᖅᑕᐅᕙᒌᕐᓯᒪᑎᓪᓗᒋᑦ ᐊᕐᕌᒍᓂ ᐊᓂᒍᕐᓯᒪᔪᑐᖃᕐᓂ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓄᒋᐊᕝᕕᐅᓗᑎᒃ ᐃᑉᐱᒍᓱᑦᑎᐅᓚᐅᖅᑐᑦ ᐱᔾᔪᑎᒋᓪᓗᒍ ᑎᒍᔭᐅᒪᕕᐅᑉ ᐊᒻᒪ ᐃᓪᓗᕈᓯᖃᕐᕕᐅᑉ ᑎᒍᔭᐅᒪᕕᓐᓂᑦ ᐃᓗᐊ ᖃᓄᐃᑦᑑᓂᖓᓄᑦ ᓴᖅᑮᓯᒪᖏᓪᓗᑎᒃ ᓈᒻᒪᖏᑦᑐᓂᑦ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐊᒻᒪ ᑎᒍᔭᐅᒪᔪᓄᑦ.

[227] ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐃᓱᖃᓚᐅᖅᑐᑦ "[ᑕ]ᒪᒃᑯᐊ ᒪᑭᒪᑎᑦᓯᔾᔪᑎᐅᔪᑦ ᐱᓕᕆᔾᔪᑏᑦ ᐅᑭᐅᖅᑕᖅᑐᒥ, ᐱᓗᐊᖅᑐᒥ ᓄᓇᕘᒥ, ᐱᑐᖃᐅᑎᐅᓕᖅᑐᑦ ᐊᒻᒪ ᐃᑉᐱᒋᔭᐅᒋᐊᖃᒻᒪᕆᓕᖅᑐᑎᒃ. ᑲᐃᑉ ᑐᐊᕐᓴᑦ [ᑭᖕᖓᐃᑦ] ᑎᒍᔭᐅᒪᕕᖓ ᐊᑦᑕᓇᑦᑕᐃᓕᒪᐅᑎᒍᑦ ᐊᑲᐅᖏᓕᐅᕈᑎᖃᖅᑐᖅ ᐊᒥᓱᓂ ᐊᕙᑎᓂ. . . . ᐃᓪᓗᑦᑕᖓ ᐊᑐᖅᑕᐅᔪᓐᓇᕆᐊᓕᒃ ᒪᓕᑦᑕᐅᓗᑎᒃ ᑭᖕᖒᒪᔭᒐᐅᕙᑦᑐᑦ ᑕᕝᕙᓂ ᐱᔭᑦᓴᓕᒻᒪᕆᐅᔪᓂ ᑎᒍᔭᐅᒪᕕᒻᒥ ᐊᒻᒪ ᐃᓂᑖᒃᑲᓐᓂᕆᐊᖃᖅᑐᑎᒃ." ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐊᑐᖁᓕᓚᐅᖅᑕᖏᑦ ᐅᑯᓂᖓ ᐱᖃᓯᐅᔾᔨᔪᑦ:

• - ᑲᔪᓯᔭᐅᑐᐃᓐᓇᕐᓗᓂ 2020-ᒥ ᐃᓪᓗᕈᓯᕐᓂᑦ ᑎᒍᔭᐅᒪᕕᓐᓂᑦ ᐱᐅᓯᑎᑦᓯᒋᐊᕐᓂᖅ ᐱᓕᕆᐊᑦᓴᓕᐊᒥᓂᖅ ᐱᓕᕆᐊᖑᓂᐊᖁᓪᓗᒋᑦ ᒪᓕᖕᖏᑦᑐᑦ ᐊᒻᒪ ᐊᑦᑕᓇᑦᑕᐃᓕᒪᐅᑎᒍᑦ ᐃᓱᒫᓘᑎᐅᔪᑦ;
• - ᐃᓂᒋᔭᒥᑦ ᐃᖅᑲᓇᐃᔭᐅᑎᓕᕆᓂᒃᑯᑦ ᐃᓗᓯᓕᕆᓂᕐᒥᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᖃᐅᔨᓴᖅᑕᐅᓗᑎᒃ ᐃᖅᑲᓇᐃᔭᐅᑎᓂᑦ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᑲᒪᔨᒧᑦ;
• - ᓴᓇᔭᐅᓗᑎᒃ ᐅᕝᕙᓘᓐᓃᑦ ᑭᖑᕝᕕᑎᖅᑕᐅᓗᑎᒃ ᓯᓚᑖᓃᑦᑐᖅ ᒪᑐ ᑎᒍᔭᐅᒪᕕᒻᒨᖓᔪᖅ ᐃᓪᓗᕈᓯᕐᓄᑦ ᐊᑐᖅᑕᐅᓗᐊᔾᔭᐃᕐᓯᒪᖁᓪᓗᒍ ᑕᐃᓐᓇ ᐹᖓ ᑎᒍᔭᐅᒪᔪᓂᑦ ᐊᐅᓚᑦᓯᔾᔪᑎᐅᓗᓂ;
• - ᓴᓇᔭᐅᓗᓂ ᓱᕋᑦᓯᒪᔪᖅ ᐃᓗᐊᓂ ᒪᑐ ᐃᓪᓗᕈᓯᕐᓂ ᓱᓪᓗᓕᖃᕐᕕᐅᔪᖅ; ᐊᒻᒪ
• - ᐋᖅᑭᑦᓯᕕᐅᓗᓂ ᐅᖄᓚᐅᒻᒥᑦ ᐃᓪᓗᕈᓯᖃᕐᕕᖓ ᑎᒍᔭᐅᒪᕕᐅᑉ ᐅᐊᑦᓯᐅᔪᑦ ᕿᒪᐃᖃᑦᑕᖁᓇᒋᑦ ᐃᓪᓗᕈᓯᖃᕐᕕᒻᒥᑦ ᐅᖄᓚᒋᐊᖃᓕᕋᐃᒍᑎᒃ ᐊᒻᒪ ᑭᓪᓕᖃᖅᑎᑕᐅᕙᓕᕐᓗᑎᒃ ᐊᑐᖅᑕᐅᕙᓐᓂᖏᑦ ᐅᖄᓚᐅᑎᕋᓛᖁᑎᒋᔭᐅᔪᑦ.

[228] ᑲᒪᒋᔭᐅᓂᐊᖁᓪᓗᒋᑦ ᐊᑲᐅᖏᓕᐅᕈᑎᐅᓯᒪᔪᑦ ᑕᑯᓐᓇᖅᑕᐅᓯᒪᔪᑦ ᑕᕝᕙᓂ ᐱᓕᕆᔾᔪᑎᒥ, ᑕᒪᒃᑯᐊ ᐊᑐᖁᔭᐅᓯᒪᔪᑦ ᐱᒋᐊᖅᑎᑕᐅᔭᕆᐊᓖᑦ, ᐃᓚᒋᔭᐅᓗᑎᒃ ᐱᓪᓗᐊᑕᐅᔪᑦ ᐊᑐᖁᔭᐅᓯᒪᓗᐊᖅᑐᑦ ᓴᖅᑭᖅᑕᐅᓯᒪᔪᑦ ᖃᐅᔨᓴᖅᑎᓄᑦ. ᑕᐃᒪᐃᓐᓂᖏᓐᓄᑦ, ᖃᐅᔨᓴᖅᑏᑦ ᐊᑐᖁᔨᔪᑦ ᐅᑯᐊ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓘᓐᓇᖏᓐᓂᑦ ᐱᒋᐊᖅᑎᑦᓯᖁᔭᐅᓗᑎᒃ ᐊᑐᖁᔭᐅᓯᒪᔪᓂᑦ ᐅᕙᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ ᐃᓱᒪᒋᔭᖏᓐᓂᑦ ᐅᓂᒃᑳᖏᓐᓂ ᑎᑎᕋᕐᓯᒪᔪᓂᑦ ᐊᑦᑐᐊᔪᓂᑦ ᐃᓗᐊᑕ ᖃᓄᐃᑦᑑᓂᖓᓄᑦ ᑭᖕᖓᐃᑦ ᑎᒍᔭᐅᒪᕕᖓᑕ.^{Footnote 33}

[229] ᐱᔾᔪᑎᒋᓪᓗᒋᑦ ᐊᓯᔾᔨᐅᑎᐅᒋᐊᖃᓕᖅᑐᑦ ᐱᒋᐊᖅᑎᑦᓯᔾᔪᑎᐅᔪᑦᓴᐃᑦ ᐊᑐᖁᔭᐅᔪᒥᑦ ᐊᒻᒪ ᐅᖃᐅᓯᐅᓯᒪᔪᖅ ᐊᑐᖁᔭᐅᔪᖅ ᐱᔾᔪᑎᖃᖅᑐᖅ ᐃᓪᓗᕈᓰᑦ ᖃᑦᓯᐅᓂᖏᓐᓂᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᕆᐊᖃᓕᖅᑐᑦ ᐃᓘᓐᓇᑦᓯᐊᖓᓂᑦ ᑭᖑᕝᕖᓯᐊᒻᒪᕆᓪᓗᑎᒃ ᑭᖕᖓᐃᑦ ᑎᒍᔭᐅᒪᕕᖓᓐᓂᑦ ᐃᓪᓗᒥᑦ.

ᖃᓄᐃᓕᖓᓂᖓ ᐃᓗᐊᑕ A.B. ᐃᓪᓗᕈᓯᖓᑕ ᑎᒍᔭᐅᒪᕕᒻᒥ

ᖃᐅᔨᔭᐅᔪᖅ #22: ᓈᒻᒪᓚᐅᖏᑦᑐᖅ ᕿᒪᑦᑕᐅᑐᐃᓐᓇᕐᓯᒪᓂᖓ ᐃᓪᓗᕕᓯᐅᑉ ᑎᒍᔭᐅᒪᕕᐅᑉ ᓇᑎᖓ ᐊᔾᔨᒌᖏᑦᑐᓂᑦ ᑎᒥᒦᖔᕐᓯᒪᔪᓂᑦ ᐱᑕᖃᖅᑎᓪᓗᒍ ᐃᑲᕐᕋᓄᑦ ᖁᓕᐅᓗᐊᓄᑦ (10).   

ᐊᑐᖁᔭᖅ #10: ᐃᓘᓐᓇᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᐅᓚᐅᖅᑐᑦ (ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᑑᕐᔾ, ᐊᒻᒪ ᓵᔨᓐ ᒋᐅᓪ) ᐱᑎᑕᐅᒋᐊᓕᐅᔪᑦ ᐊᐅᓚᑦᑎᔾᔪᑎᓂᑦ ᐊᑐᐊᒐᓕᕆᓂᕐᒥᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓴᓗᒻᒪᕐᓴᐃᕙᓐᓂᐅᔪᖅ ᐃᓪᓗᕈᓯᕐᓂᒃ ᑎᒍᔭᐅᒪᕕᓐᓂᒃ ᕿᓚᒥᐅᔫᒥᔪᖅ.

[230] ᐊᐅᓚᔫᖅ ᐊᔾᔨᓕᐅᖅᑕᐅᓯᒪᔪᖅ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᑦ ᑕᑯᑦᓴᐅᑎᑦᓯᔪᖅ ᓇᑎᖓ ᐃᓪᓗᕈᓯᐅᑉ 3 ᐊᐅᖏᓐᓇᐅᖏᓐᓇᓚᐅᕐᒪᑦ ᐊᒻᒪ ᐃᒪᐃᓐᓇᐅᓗᓂ (ᐊᒻᒪ ᑭᖑᓂᐊᒍᑦ, ᐃᑎᕈᖅᑕᖃᖅᑐᓂ ᐊᒻᒪ ᒥᕆᐊᒥᓂᕐᒥᒃ) ᖁᓛᓃᒌᕐᓯᒪᓕᖅᑎᓪᓗᒍ ᐅᓐᓄᐊᒃᑯᑦ (ᐋᓐᓂᑎᖅᑕᐅᑎᓪᓗᒍ A.B.) ᐅᓪᓛᒧᓄᑦ 10:15-ᒧᓄᑦ, A.B. ᓅᑕᐅᓇᓱᐊᕐᓂᖓᓄᑦ ᐃᓪᓗᕈᓯᕐᒥᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓴᓗᒻᒪᕐᓴᐃᓕᖅᑐᑎᒃ ᓇᑎᕐᒥᒃ.

[231] ᖃᐅᔨᒪᔭᐅᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᐃᑲᓂ ᐅᓐᓄᕐᒥ ᑕᐃᒪᖕᖓᓕᒫᖅ ᐱᔭᑦᓴᖃᖅᑎᑕᐅᖏᓐᓇᓚᐅᕐᒪᑕ, ᑭᓯᐊᓂᐅᒐᓗᐊᖅᑎᓪᓗᒍ, ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᓂᕐᒧᑦ ᐃᓱᒫᓘᑎᐅᔪᑦ ᕿᒪᑦᑕᐅᑐᐃᓐᓇᕐᓯᒪᓂᖓ ᓇᑎᖓ ᑕᐃᒪᐃᑦᑑᑎᓪᓗᒍ ᑎᒍᔭᐅᒪᔪᖃᖅᑎᓪᓗᒍ ᑎᒍᔭᐅᒪᕕᒻᒦᑦᑐᒥᑦ. ᓈᒻᒪᓚᐅᖏᑦᑐᖅ ᕿᒪᑦᑕᐅᑐᐃᓐᓇᕐᓯᒪᓂᖓ ᐃᓪᓗᕕᓯᐅᑉ ᑎᒍᔭᐅᒪᕕᐅᑉ ᓇᑎᖓ ᐊᔾᔨᒌᖏᑦᑐᓂᑦ ᑎᒥᒦᖔᕐᓯᒪᔪᓂᑦ ᐱᑕᖃᖅᑎᓪᓗᒍ ᐃᑲᕐᕋᓄᑦ ᖁᓕᐅᓗᐊᓄᑦ (10).

[232] ᖃᐅᔨᓴᖅᑏᑦ ᐊᑐᖁᔨᔪᑦ ᐃᓘᓐᓇᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᐸᑦᓯᒪᓚᐅᖅᑐᑦ ᑎᒍᔭᐅᒪᕕᓐᓂ ᑕᐃᑲᓂ ᐅᓐᓄᕐᒥ (ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᑑᕐᔾ, ᐊᒻᒪ ᓵᔨᓐ ᒋᐅᓪ) ᐱᑎᑕᐅᖁᓪᓗᒋᑦ ᐊᐅᓚᑦᓯᔾᔪᑎᓂᑦ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓴᓗᒻᒪᒋᐊᖃᕐᓂᖏᓐᓂᑦ ᐃᓪᓗᕈᓯᐅᔪᑦ ᑎᒍᔭᐅᒪᕖᑦ ᐃᓗᖏᑦ ᕿᓚᒥᐅᔫᒥᔪᖅ ᓴᓗᒻᒪᓴᖅᑕᐅᕙᓪᓗᑎᒃ.

ᐃᖅᑲᓇᐃᔭᖅᑏᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ

ᖃᐅᔨᔭᐅᔪᖅ #23: ᓈᒻᒪᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖅᑲᓇᐃᔭᖅᑎᑭᓐᓂᖓᑦ ᑭᖕᖓᐃᑦ ᑎᒍᔭᐅᒪᕕᖓᑕ ᐊᕝᕙᐅᓗᐊᖏᓐᓂᑦ ᐸᓖᓯᐅᒋᐊᓕᓐᓂᑦ ᑕᐃᑲᓂ.

ᐊᑐᖁᔭᖅ #11: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓇᓗᓇᐃᕐᓯᒪᒋᐊᓕᐅᔪᑦ ᓈᒻᒪᑦᑐᓂᑦ ᐃᖅᑲᓇᐃᔭᖅᑎᖃᑦᓯᐊᓕᕋᓗᐊᕐᒪᖔᕐᒥᒃ ᐃᓘᓐᓇᖏᓐᓂ ᑎᒍᔭᐅᒪᕕᖏᓐᓂ ᐱᓕᕆᕝᕕᓐᓂ, ᐱᖃᓯᐅᔾᔭᐅᓗᓂ ᑭᖕᖓᐃᑦ ᑎᒍᔭᐅᒪᕕᖓᑦ.

[233] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ ᐊᑦᑐᐃᓚᐅᖅᑐᖅ ᐱᔾᔪᑎᖃᖅᑐᓂ ᐃᖅᑲᓇᐃᔭᖅᑎᓂᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ. ᖃᓄᐃᒍᑎᐅᔪᖅ ᐊᑐᖅᑕᐅᑎᓪᓗᒍ, ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖅᑲᓇᐃᔭᖅᑎᖏᑕ ᖃᓄᐃᓕᖓᓂᖏᑦ ᐊᒻᒪ ᑮᓇᐅᔭᓕᕆᓂᒃᑯᑦ ᐋᖅᑭᑦᓯᒪᓂᖏᑦ, ᑭᖕᖓᐃᑦ ᑎᒍᔭᐅᒪᕕᖓᑦ ᓯᕗᓕᖅᑎᖃᕆᐊᖃᓚᐅᖅᑐᖅ ᐊᑕᐅᓯᕐᒧᑦ (1) ᑯᐊᐳᕈᒧᑦ ᑎᒍᔭᐅᒪᕕᒻᒥ ᐱᓕᕆᕝᕕᒻᒥ ᐊᐅᓚᑦᑎᔨᐅᓗᓂ ᑎᓴᒪᐅᓗᑎᒃ (4) ᑳᓐᔅᑕᐴᓪᐃᑦ. ᑭᓯᐊᓂᓕ, ᑎᒍᔭᐅᒪᕕᒻᒥ ᐃᖅᑲᓇᐃᔭᖅᑎᖏᑦ ᐃᓱᒪᒋᔭᐅᓚᐅᖅᑐᑦ "ᐊᖏᔪᖅᑳᖃᓗᐊᕐᓂᖏᓐᓂᑦ," ᓵᔨᓐᖃᖅᑐᑎᒃ ᐊᐅᓚᑦᓯᔨᒥᑦ ᐊᒻᒪ ᒪᕐᕉᓪᓗᑎᒃ ᑳᓐᔅᑕᐴᓪᔫᒃ ᖃᐅᑕᒫᑦ ᑕᐃᑲᓃᑉᐸᑦᑐᑎᒃ. ᐊᓯᖏᑦ ᐃᖅᑲᓇᐃᔮᑦᓴᐃᑦ ᐃᓄᖃᓚᐅᖅᑐᑦ ᑭᖑᕝᕖᔨᓂᒃ ᓇᓪᓕᑭᑕᖅᑎᐅᔪᓂᑦ.

[234] ᒪᓕᑦᑐᒍ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᖃᐅᔨᓴᓚᐅᖅᑕᖏᑦ, ᐊᑕᐅᓯᐅᔪᖅ (1) ᑯᐊᐳᕉᓪ/ᑎᓴᒪᑦ (4) ᑳᓐᔅᑕᐴᓪᐃᑦ ᐃᖅᑲᓇᐃᔭᖅᑏᑦ ᑕᐃᒪᐃᓪᓗᐊᖅᑑᔮᖅᑐᑦ 4.5 "ᐊᓐᓄᕌᕕᓖᑦ ᓯᕗᓪᓕᖅᐹᖑᓪᓗᑎᒃ ᐅᐸᑦᑏᑦ" (UFR). ᑭᓯᐊᓂᑦᑕᐅᖅ, ᐱᕋᔭᐅᑎᓂᑦ ᓈᓴᐅᑎᒃᑯᑦ ᖃᐅᔨᓴᐅᑎᓂᑦ 2019-ᓂᓴᓂᑦ ᓇᓗᓇᐃᕐᓯᓯᒪᔪᑦ ᑭᖕᖓᐃᑦ ᑎᒍᔭᐅᒪᕕᖓᑦ ᐱᓕᕆᕝᕕᒻᒧᑦ "ᑭᖕᖒᒪᒐᐅᔪᑦ ᐊᒻᒪ ᐃᖅᑲᓇᐃᔮᒃᑯᑦ ᐃᑲᕐᕋᐃᑦ ᐃᖅᑲᓇᐃᔭᕐᕕᐅᒋᐊᓖᑦ ᖁᕝᕙᒋᐊᕐᓯᒪᓕᖅᑐᑦ ᐃᖅᑲᓇᐃᔭᖅᑎᖃᕆᐊᖃᖅᐸᓕᖅᑐᑎᒃ 10.6 ᐊᓐᓄᕌᕕᓕᓐᓂᑦ (UFR) ᐅᕝᕙᓘᓐᓃᑦ ᐸᓖᓯᑐᐃᓐᓇᕐᓂᒃ." ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓇᖕᒥᓂᖏᑦ ᓈᓴᐅᑎᒍᑦ ᐱᓕᕆᐊᖏᑦ, ᑭᖕᖓᐃᑦ ᑎᒍᔭᐅᒪᕕᖓᑦ ᐱᓕᕆᕝᕕᒃ ᐃᖅᑲᓇᐃᔭᖅᑎᖃᖏᓗᐊᓚᐅᖅᑐᖅ ᐊᕝᕙᐅᓗᐊᖏᓐᓂᑦ ᐃᖅᑲᓇᐃᔭᖅᑎᐅᒋᐊᓕᐅᒐᓗᐊᑦ ᖃᐅᑕᒫᑦ. ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᖃᐅᔨᒪᖁᔨᓚᐅᕐᒥᔪᑦ ᑎᒍᔭᐅᒪᕕᒻᒥ ᐱᔨᑦᓯᕋᖅᑎᒥᑦ ᐃᑲᔪᖅᑎᖃᓚᐅᖏᒻᒪᑕ ᐃᖅᑲᓇᐃᔭᖅᑐᒥᑦ ᑭᖕᖓᕐᓂ, ᐸᐃᑉᐹᓕᕆᐊᑦᓴᐃᑦ ᑲᒪᒋᔭᓕᓚᐅᖅᑕᖏᑦ ᓵᔨᓐᖓᑕ.

[235] ᐱᔾᔪᑎᒋᓪᓗᒍ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᓇᓗᓇᐃᔭᐃᒍᓐᓇᓚᐅᕐᓂᖏᓐᓂᑦ ᑕᒪᒃᑯᓂᖓ ᐊᑲᐅᖏᓕᐅᕈᑎᓕᒫᓂᑦ ᐱᔾᔪᑎᒋᓪᓗᒍ ᖃᓄᐃᓕᖓᓂᖓ ᐊᒻᒪ ᐃᖅᑲᓇᐃᔭᖅᑎᐅᕙᑦᑐᑦ ᑎᒍᔭᐅᒪᕕᒻᒥ ᑕᑯᑦᓴᐅᑎᑦᓯᔪᑦ ᐃᓚᖏᑦ ᐃᓗᐊᓅᖓᔪᑦ ᕿᒥᕐᕈᐊᕈᑎᐅᔪᑦ ᐱᓕᕆᔾᔪᑎᐅᔪᑦ ᐊᐅᓚᑕᐅᔪᓐᓇᕐᒪᑕ ᒪᓕᑦᑕᐅᓗᑎᒃ ᐊᑑᑎᒋᓇᓱᐊᖅᑕᖏᑦ ᐊᒻᒪ ᓴᖅᑮᔾᔪᑎᐅᓗᑎᒃ ᐊᓯᔾᔨᕆᐊᖃᕐᓂᖏᓐᓂᑦ. ᑭᓯᐊᓂᓕ, ᐅᒡᒍᐊᓇᖅᑐᒻᒪᕆᐅᔪᖅ ᐃᒪᐃᑦᑐᒥᑦ ᖃᓄᐃᒍᑎᐅᔪᒥᑦ ᐊᑐᕆᐊᖃᕐᓂᕐᒪᑕ ᐊᐅᓚᔾᔭᒋᐊᕈᑎᐅᓗᓂ ᕿᒥᕐᕈᐊᓂᕐᒥᑦ. ᖃᐅᔨᓴᖅᑏᑦ ᑕᑯᓐᓇᑐᐃᓐᓇᕈᓐᓇᖅᑐᑦ ᓱᓇᑐᐃᓐᓇᐃᑦ ᑎᑭᒋᐊᑐᓐᓂᖏᒃᑲᓗᐊᕐᒪᑕ ᐊᑐᖅᑕᐅᓕᖅᑐᒧᑦ ᓯᕗᓂᐊᒍᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᓄᐃᓕᐅᓚᐅᖏᓂᕐᒥᓂ ᖃᓄᐃᓕᐅᕈᑎᒋᔪᓐᓇᖅᑕᒥᓂᒃ ᐋᖅᑭᒍᑎᐅᔪᓐᓇᖅᑐᓂᑦ.

[236] ᖃᐅᔨᓴᖅᑏᑦ ᐊᑐᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓇᓗᓇᐃᕐᓯᒪᖁᓪᓗᒋᑦ ᐃᖅᑲᓇᐃᔭᖅᑎᖏᑦ ᓈᒻᒪᑦᑎᐊᓕᕋᓗᐊᕐᒪᖔᑕ ᐃᓘᓐᓇᑦᓯᐊᖏᓐᓂᑦ ᑎᒍᔭᐅᒪᕕᖏᓐᓂᑦ, ᐱᖃᓯᐅᔾᔭᐅᓗᑎᒃ ᑭᖕᖓᐃᑦ ᑎᒍᔭᐅᒪᕕᖓᑦ.

ᖃᓄᐃᓕᐅᕈᑎᒥᓂᖏᑦ ᐃᓪᓗᕈᓯᖃᕐᕕᒻᒥᑦ ᐅᐊᑦᓯᐅᔫᑉ

ᖃᐅᔨᔭᐅᔪᖅ #24: ᓵᔨᓐ ᒋᐅᓪ ᓈᒻᒪᖏᑦᑐᒥᑦ ᖃᐅᔨᓴᕐᓂᖃᓚᐅᖅᑐᖅ ᐅᐊᑦᓯᐅᔪᒥᑦ. ᐅᐊᑦᓯᐅᔪᖅ ᑲᑦᓱᖓᐃᕐᓯᓯᒪᒐᓗᐊᖅᑐᓂ ᐊᒻᒪ ᐱᓕᕆᔪᒪᑦᑎᐊᖅᑐᓂ ᐊᔪᕐᓇᖏᓐᓂᖓᒍᑦ ᐊᑦᓱᕉᓴᓐᓇᖅᑐᒥ, ᓇᓗᓇᓚᐅᖏᑦᑐᖅ ᐊᒥᓲᓚᐅᕐᒪᑕ ᓱᕋᑦᑎᖅᑕᐅᓯᒪᔪᑦ ᐱᓕᕆᔾᔪᑎᒃᑯᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖏᓐᓂ ᑎᑎᕋᕐᓯᒪᔪᓂᑦ ᐱᓕᕆᔾᔪᑎᓂᑦ ᐊᒻᒪ ᐊᓯᖏᓐᓂᑦ ᐱᓕᕆᐊᖑᒋᐊᓕᓐᓂᑦ ᐅᐊᑦᓯᐅᔪᓄᑦ.

ᖃᐅᔨᔭᐅᔪᖅ #25: ᐱᓕᒻᒪᓴᕐᓯᒪᔭᖏᑦ ᐅᐊᑦᓯᐅᔫᑉ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᓈᒻᒪᓚᐅᖏᑦᑐᑦ. ᐱᑕᖃᖅᑑᔮᓚᐅᖅᑑᒐᓗᐊᖅ ᑐᑭᓯᐅᒪᓂᕐᒥᑦ ᐊᑑᑎᐅᔪᓂᑦ ᐊᒻᒪ ᐃᑉᐱᒋᔭᒐᐅᔪᓂᑦ ᐱᓕᕆᐊᖃᕐᓂᒃᑯᑦ ᐅᐊᑦᓯᐅᔪᖅ ᐱᓪᓗᒍ, ᑭᓯᐊᓂ ᓈᒻᒪᓚᐅᖏᑦᑐᑦ ᐅᖃᐅᓯᐅᓯᒪᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᑎᒍᑦ ᐊᑐᖅᑕᐅᔭᕆᐊᖃᖅᐸᑦᑐᑦ.

ᐊᑐᖁᔭᖅ #12: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓘᓐᓇᖏᓐᓂᑦ ᐱᒋᐊᖅᑎᑦᓯᔭᕆᐊᓕᐅᔪᑦ ᐊᑐᖁᔭᐅᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐃᓱᒪᒋᔭᖏᓐᓂᑦ ᐅᓂᒃᑳᓕᐊᖏᓐᓃᑦᑐᓂᑦ ᐊᑦᑐᐊᔪᓂᑦ ᐅᐊᑦᓯᐅᔪᓄᑦ ᐱᓕᕆᔾᔪᑎᓂᑦ ᐊᒻᒪ ᐱᓕᒻᒪᑦᓴᐃᑎᓂᑦ.

ᐊᑐᖁᔭᖅ #13: ᓵᔨᓐ ᒋᐅᓪ ᐱᑎᑕᐅᒋᐊᓕᒃ ᐊᐅᓚᑦᑎᔾᔪᑎᓕᕆᔪᓂᑦ ᐊᑐᐊᒐᕐᓂᑦ ᐱᔾᔪᑎᒋᓪᓗᒋᑦ ᓈᒻᒪᑦᑐᓂᑦ ᖃᐅᔨᓴᐅᑎᐅᔪᑦ ᐃᖅᑲᓇᐃᔭᖅᑎᓂᑦ ᐊᒻᒪ ᐱᓕᒻᒪᑦᓴᐃᑎᓂᑦ ᐊᑐᕆᐊᓕᖏᓐᓂᑦ ᑎᒍᔭᐅᒪᕕᒻᒥ ᐅᐊᑦᓯᐅᔪᓄᑦ ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ.

[237] ᐱᔾᔪᑎᒋᓪᓗᒍ ᐃᓚᒋᔭᐅᖏᓐᓂᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᒋᔭᐅᒐᓂ ᐊᑖᒍᑦ ᐃᓚᖓᑕ I ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓅᖓᔫᑉ ᒪᓕᒐᐅᑉ, ᐅᐊᑦᓯᐅᔪᖅ ᐃᓗᐊᓃᓚᐅᖏᑦᑐᖅ ᖃᐅᔨᓴᖅᑏᑦ ᐱᔪᓐᓇᐅᑎᖃᕐᕕᖏᑕ. ᑭᓯᐊᓂᓕ, ᖃᐅᔨᓴᖅᑎᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒥᑦ, ᓵᔨᓐ ᒋᐅᓪ. ᖃᐅᔨᓴᖅᑕᐅᖃᑦᑕᕆᐊᖃᕐᒪᑦ ᐅᐊᑦᓯᐅᔫᑉ ᐱᓕᕆᔾᔪᑎᖓ ᐃᑉᐱᒋᔭᕆᐊᖃᕐᒪᒍᑦ ᓵᔨᓐ ᒋᐅᓪ, ᖃᐅᔨᓴᖅᑏᑦ ᕿᒥᕐᕈᐊᓛᖅᑐᑦ ᐅᐊᑦᓯᐅᔫᑉ ᐱᓕᕆᔾᔪᓯᕆᓚᐅᖅᑕᖏᑦ ᖃᐅᔨᓴᖅᑕᐅᓗᑎᒃ ᑕᒪᓐᓇ ᖃᐅᔨᓴᕆᐊᖃᕐᓂᐅᔪᖅ ᐊᑐᖅᑕᐅᓚᐅᖏᑦᑐᖅ ᓈᒻᒪᓚᐅᕋᓗᐊᕐᒪᖔᖅ ᐊᒻᒪ ᓈᒻᒪᓪᓗᓂ.

[238] ᐅᐊᑦᓯᐅᔪᖅ ᐱᓕᕆᐊᖃᕆᐊᓕᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᓐᓂᒃ ᒪᓕᓪᓗᓂ ᑕᐃᒪᖕᖓᓕᒫᖅ ᖃᐅᔨᓴᐃᓐᓇᓯᐊᕐᓗᓂᒋᑦ ᑎᒍᔭᐅᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂ. ᑭᖕᖓᐃᑦ ᑎᒍᔭᐅᒪᕕᖓᓐᓂ, ᑕᒪᓐᓇ ᐱᓕᕆᐊᖑᕙᑦᑐᖅ ᑕᑯᓂᐊᖅᑕᐅᕙᑦᑐᑎᒃ ᖃᐅᔨᓴᖅᑕᐅᓗᑎᒃ ᐊᒻᒪᔪᒃᑯᑦ ᐃᓪᓗᕈᓯᐅᑉ ᒪᑐᐊᓃᑦᑐᒃᑯᑦ ᐊᒻᒪ ᖃᐅᔨᓴᖅᑕᐅᖏᓐᓇᖅᑐᑎᒃ ᐊᔾᔨᓕᐅᕈᑎᓄᑦ ᑏᕖᒃᑯᑦ. ᐱᔾᔪᑎᖃᖅᑐᑦ ᖃᓄᐃᓕᕐᓂᖏᓐᓂᑦ ᐊᑐᓂ ᑎᒍᔭᐅᒪᔪᑦ ᑎᑎᕋᖅᑕᐅᒋᐊᖃᖅᐸᑦᑐᑦ ᐅᐊᑦᓯᐅᔫᑉ ᐱᓕᕆᐊᖏᓐᓂᑦ ᑎᑎᕋᕐᕕᖓᓄᑦ.

[239] ᐅᐊᑦᓯᐅᔪᖅ ᐅᖃᐅᔾᔨᓚᐅᖅᑐᖅ ᖃᐅᔨᓴᖅᑎᓂᑦ ᑕᑯᓐᓇᓚᐅᕋᒥᐅᒃ A.B. ᑐᓪᓕᕌᖅᑎᓪᓗᒍ J.J.-ᒥᑦ ᐊᑕᐅᓯᐊᕋᓂ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᓂᓕᓚᐅᖅᑐᑦ ᑎᒍᔭᐅᒪᕕᒻᒥᒃ ᐅᐸᓐᓂᐊᕋᒥᒃ ᐊᓯᐊᓄᑦ ᐅᖃᓚᔾᔪᑎᐅᔪᒥᑦ ᐅᐊᑦᓯᐅᔪᖅ ᖃᐅᔨᒐᒥ A.B. ᐊᒻᒪ J.J.-ᑯᒃ "ᐹᓕᕐᒪᑎᒃ ᓇᑎᕐᒥ." ᑕᑯᓐᓇᓕᓚᐅᖅᑕᖏᒃ ᐊᔾᔨᓕᐅᕈᑎᒃᑯᑦ ᒪᕐᕉᒃ (2) ᐊᖑᑏᑦ "ᓂᖕᖓᐅᑎᓪᓚᕆᑦᑎᓪᓗᒋᒃ." ᐅᐊᑦᓯᐅᔪᖅ ᐅᓪᓚᑦᓯᓚᐅᖅᑐᖅ ᐃᓪᓗᕈᓯᕐᒧᑦ 3 ᐊᒻᒪ ᑎᓪᓗᑦᑐᓕᓚᐅᖅᑐᖅ ᐊᑦᓱᑲᓪᓚᒃ ᐊᖑᑎᐅᔪᑦ ᓄᖅᑲᖅᑎᓇᓱᐊᖅᑐᓂᒋᑦ. J.J ᓴᒃᑯᐃᓚᐅᖏᑦᑐᖅ A.B.-ᒥᑦ ᐊᑯᓂᒐᓚᒃ. ᐅᐊᑦᓯᐅᔪᖅ ᖃᐅᔨᒐᒥ "ᐸᓖᓯᒃᑯᑦ ᐃᓚᒋᔭᐅᒋᐊᖃᕐᒪᑕ", ᐅᖄᓚᕕᒋᓕᓚᐅᖅᑕᖏᑦ.

[240] ᐃᖅᑲᐅᒪᓚᐅᖏᑦᑐᖅ ᐅᖄᓚᕕᖃᕐᓂᕐᒪᖔᖅ ᑭᐅᔨᒧᑦ ᐅᕝᕙᓘᓐᓃᑦ ᐊᑐᓚᐅᕐᒪᖔᒍ ᓈᓚᐅᑎᕋᓛᓂ ᖃᐅᔨᒋᐊᖅᑐᓂᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ. ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ ᐊᑐᖅᐸᒃᑲᓗᐊᕋᒥᐅᒃ ᐅᖄᓚᐅᑎᕋᓛᖁᑎᓂ ᐅᖄᓚᕕᒋᓪᓗᓂᐅᒃ ᑭᐅᔨ ᑐᐊᕕᕐᓇᖅᑐᑕᖃᖅᑎᓪᓗᒍ, ᐅᐱᓐᓇᕋᓂ ᑐᐊᕕᕐᓇᖅᑐᓕᕆᔩᑦ ᐅᖄᓚᐅᑎᖓᓐᓂᑦ ᓈᓴᐅᑎᒥᑦ ᓇᕿᑦᓯᑐᐃᓐᓇᐸᒃᑲᒥ ᐊᒻᒪ ᐱᔭᕆᐊᑭᓐᓂᓴᐅᓗᓂ ᑎᒍᔭᐅᒪᕕᐅᑉ ᐅᖄᓚᐅᑎᖓᓂᑦ ᐅᖄᓚᐅᑎᒋᓪᓗᒍ. ᐅᖃᕆᐊᓚᐅᕐᒥᔪᖅ, ᐃᓛᓐᓂᓚᐅᓱᖓᒃᑯᑦ, ᐅᐊᑦᓯᐅᔪᑦ ᓯᕗᓪᓕᐅᓯᒪᔪᑦ ᐃᖅᑲᓇᐃᔭᖅᑐᑎᒃ ᐳᐃᒍᐃᕙᒻᒪᑕ ᑭᖑᕝᕖᒋᐊᑦᓴᖅ ᕚᑕᓖᖏᓐᓂᑦ ᓈᓚᐅᑎᕋᓛᑉ, ᐊᑐᖅᑕᐅᔪᓐᓇᐸᖕᖏᓚᕿᔪᖅ.

[241] ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ, ᐃᓕᓐᓂᐊᖅᑎᑕᐅᓗᓂ ᐅᐊᑦᓯᐅᓂᕐᒥᑦ, ᐅᖃᐅᔾᔭᐅᔪᕕᓂᖅ ᓄᖅᑲᑎᑦᓯᒋᐊᖃᖏᓐᓇᒥ ᓂᖕᖓᐅᑎᔪᖃᓕᖅᐸᑦ ᑎᒍᔭᐅᒪᕕᓐᓂ. ᑭᓯᐊᓂᓕ, ᐅᖄᓚᖃᑦᑕᕆᐊᓕᒃ ᐸᓖᓯᓄᑦ ᖃᐃᖁᓗᒋᑦ. ᐅᐊᑦᓯᐅᔪᖅ ᐃᖅᑲᐅᒪᓚᐅᕐᒥᔪᖅ, ᑕᐃᒪᖕᖓᓕᒫᐸᓗᒃ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᔭᐅᒪᕕᒻᒦᖏᓐᓇᐸᑦᑐᑦ ᖃᐅᑕᒫᑦ, ᐅᐸᑦᑕᐅᑎᒋᖃᑦᑕᕈᒪᓪᓗᑎᒃ ᑐᐊᕕᕐᓇᖅᑐᑕᖃᓕᕐᓂᖅᐸᑦ. ᐅᓐᓄᖓᓂ ᔪᓂ 1, 2020, ᐊᔾᔨᐅᓗᐊᓚᐅᖏᑦᑐᖅ ᐅᐱᓐᓇᕋᓂ ᐱᔭᑦᓴᖃᓪᓗᐊᓚᐅᕐᒪᑕ ᐊᒻᒪ ᖃᓄᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ "ᕿᑲᕐᓯᓚᐅᖏᓯᐊᕐᒪᑕ."

[242] ᐊᐱᕐᓱᑕᐅᓗᓂ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ, ᐅᐊᑦᓯᐅᔪᖅ ᐅᖃᓚᐅᖅᑐᖅ, ᑎᒍᔭᐅᒪᔪᑦ ᓂᖕᖓᐅᑎᓕᖅᑎᓪᓗᒋᑦ, ᐅᐃᒪᔮᖅᑐᒻᒪᕆᐅᓕᓚᐅᕋᒥ ᓈᓚᐅᑎᕋᓛᒃᑯᑦ ᐅᖄᓚᒍᓐᓇᓚᐅᖏᒻᒪᕆᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ, ᐅᖄᓚᑐᐃᓐᓇᓕᓚᐅᖅᑐᖅ ᑐᐊᕕᕐᓇᖅᑐᓕᕆᔾᔪᑎᒧᑦ ᐅᖄᓚᐅᒻᒧᑦ.

[243] ᓵᔨᓐ ᒋᐅᓪ ᐸᓖᓯᒧᑦ ᐅᓂᒃᑳᓕᐊᖏᓐᓂ ᓇᓗᓇᐃᕐᓯᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᖄᓚᕕᐅᓐᓂᕐᒪᑕ ᑭᐅᔨᒧᑦ ᓂᖕᖓᐅᑎᔪᖃᓕᕐᓂᖓᓄᑦ ᑎᒍᔭᐅᒪᕕᓐᓂ ᐃᓪᓗᕈᓯᕐᓂ. ᓵᔨᓐ ᒋᐅᓪ ᐅᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᖃᐅᔨᓴᖅᑎᖓᓄᑦ ᐅᐊᑦᓯᐅᔪᖅ "ᐅᐃᒻᒪᓚᐅᕋᒥ" ᐊᒻᒪ ᖃᓄᖅ ᓈᓚᐅᑎᕋᓛᖅ ᐊᑐᖅᑕᐅᓲᖑᒻᒪᖔᖅ; ᑕᐃᒪᐃᓐᓂᖓᓄᑦ, ᐅᐊᑦᓯᐅᔪᖅ ᐅᖄᓚᓕᓚᐅᖅᑐᖅ ᑭᐅᔨᒧᑦ ᐊᒻᒪ ᐅᑕᖅᑭᑎᑕᐅᓕᖅᑐᓂ.

[244] ᐊᐱᕐᓱᑕᐅᓗᓂ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ, ᓵᔨᓐ ᒋᐅᓪ ᐅᖃᕆᐊᓚᐅᖅᑐᖅ ᐅᐊᑦᓯᐅᔪᖅ ᐃᓯᕆᐊᖃᖏᓯᐊᕐᒪᑦ ᑎᒍᔭᐅᒪᔪᐃᑦ ᐃᓪᓗᕈᓯᖏᓐᓄᑦ ᐃᓄᑑᓗᓂ. ᐅᖃᐅᓯᑦᑕᖏᑦ ᑎᑎᕋᕐᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᓐᓂ ᐃᒪᐃᓕᖓᔪᑦ, "ᐅᐊᑦᓯᐅᔪᖅ ᒪᑐᐃᕐᓯᒍᓐᓇᖅᑐᖅ ᐅᕝᕙᓘᓐᓃᑦ ᐃᓯᕐᓗᓂ ᑎᒍᔭᐅᒪᕕᒻᒧᑦ ᐃᓪᓗᕈᓯᕐᒧᑦ ᑭᓯᐊᓂ ᑐᐊᕕᕐᓇᖅᑐᑕᖃᖅᑎᓪᓗᒍ ᐅᕝᕙᓘᓐᓃᑦ ᐊᐃᑉᐸᖃᕈᓂ ᐸᓖᓯᒥᒃ."^{Footnote 34}

[245] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐃᓱᒪᒋᔭᖏᓐᓂᑦ ᐅᓂᒃᑳᓕᐊᖓᓂ ᓇᓗᓇᐃᕐᓯᓯᒪᓚᐅᖅᑐᑦ ᐊᒥᓱᓂᑦ ᐊᑲᐅᖏᓕᐅᕈᑎᑕᖃᐅᓚᐅᕐᒪᑕ ᐱᔾᔪᑎᒋᓪᓗᒋᑦ ᑎᑎᕋᕐᕕᐅᔪᖅ ᐱᓕᕆᐊᒥᓂᕐᓂᒃ ᑎᒍᔭᐅᒪᕕᒻᒥ ᑕᐃᑲᓂ ᐅᓐᓅᔪᒥ. ᐱᔾᔪᑎᒋᓪᓗᒍ ᑎᒍᔭᐅᖅᑲᔪᓂᑦ ᐅᓂᒃᑳᓕᐅᕐᕕᒃ ᐅᖃᓕᒫᒐᖅ (ᐱᓕᕆᐊᒥᓂᕐᓂᒃ ᓇᓗᓇᐃᔭᐃᕕᒃ), ᐅᐊᑦᓯᐅᔪᖅ ᑕᒻᒪᖅᑐᓂ ᑎᑎᕐᓯᓯᒪᓐᓂᓚᐅᖅᑐᖅ ᒪᕐᕉᓐᓂᒃ (2) ᒪᑉᐱᒑᓐᓂᒃ ᑎᑎᕋᕐᕕᐅᓯᒪᓪᓗᑎᒃ ᑖᒃᑯᓂᖓᑦᓴᐃᓐᓇᖅ ᓯᕿᖕᖑᔮᓐᓂᒃ (00:30-ᒥᑦ 1:30-ᒧᑦ, ᐊᒻᒪ 00:15-ᒥᑦ 2:00-ᒧᑦ). ᑕᑯᑦᓴᐅᔮᖅᑐᑦ ᑎᑎᕋᖅᑐᖃᓚᐅᕐᓂᖏᒻᒪᑦ ᐱᔾᔪᑎᐅᓗᓂ ᑎᒍᔭᐅᔾᔪᑎᐅᔪᖅ ᐊᒻᒪ ᐊᐅᓚᓂᒥᓂᖏᑦ ᑎᒍᔭᐅᖅᑲᔪᑦ. ᓲᕐᓗ, ᑎᑎᕋᕐᕕᒻᒥ ᐱᓕᕆᐊᒥᓂᕐᓂᒃ, A.B. ᓇᓗᓇᐃᖅᑕᐅᓯᒪᓚᐅᖏᑦᑐᖅ ᑎᒍᔭᐅᔪᕕᓂᐅᓂᖓᓄᑦ. ᑎᑎᕋᕐᓯᒪᔪᑦ ᐱᔾᔪᑎᒋᓪᓗᒍ J.J. ᓇᓗᓇᐃᔭᕐᓯᒪᓚᐅᖏᑦᑐᑦ, ᐃᓱᒪᒋᓪᓗᒍ ᖃᓄᐃᓕᐅᕈᑎᒻᒪᕆᐅᓚᐅᖅᑐᖅ ᐃᓚᒋᔭᐅᓗᓂ ᑖᓐᓇ. ᐃᓗᓕᖏᓐᓂᑦ, ᓇᓗᓇᐃᔭᐃᓯᒪᑦᑎᐊᓚᐅᖏᑦᑐᑦ ᐅᓂᒃᑳᓕᐅᕐᕕᒻᒥ ᐱᓕᕆᐊᒥᓂᕐᓂᒃ, ᐅᖃᐅᓯᐅᑦᓯᐊᕐᓯᒪᒐᑎᒃ A.B. ᐱᒋᐊᖅᑕᐅᔾᔪᑎᒥᓂᖏᓐᓂᑦ, ᐋᓐᓂᕐᓯᒪᔭᖏᓐᓂᑦ ᐊᒻᒪ ᖃᓄᐃᒍᑎᖏᓐᓂᑦ, ᐅᕝᕙᓘᓐᓃᑦ ᖃᓄᐃᑦᑑᓂᖓᓄᑦ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ.

[246] ᐊᒻᒪᑦᑕᐅᖅ, ᐅᐊᑦᓯᐅᔪᖅ ᑎᑎᕋᓚᐅᖏᑦᑐᖅ ᑎᒥᓂᒃ ᐅᕝᕙᓘᓐᓃᑦ ᐊᔾᔨᓕᐅᕈᑎᒥᑦ ᖃᐅᔨᒋᐊᖅᐸᓂᕐᒥᓂᒃ ᖃᖓᓚᐅᓱᖓᒃᑯᑦ, ᑕᐃᒪᐃᒋᐊᖃᖅᑎᑕᐅᒐᒥᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑎᒍᑦ (ᑎᒥᖏᓐᓂᑦ ᑎᒍᔭᐅᖅᑲᔪᑦ ᖃᐅᔨᒋᐊᖃᑦᑕᕆᐊᓖᑦ, ᐅᖓᑖᓂᐅᖏᑦᑐᖅ 15 ᒪᓇᑦᓯ; ᑎᒥᒥᑦ ᖃᐅᔨᒋᐊᖃᓯᐅᑎᒋᐊᖃᖅᐸᑦᑐᑦ ᐊᔾᔨᓕᐅᕈᑎᒃᑯᓪᓗ, ᑭᓯᐊᓂ ᑭᖑᕝᕕᑎᖅᑕᐅᕙᖏᓪᓗᑎᒃ ᐊᔾᔨᓕᐅᕈᑎᓄᑦ).<^{Footnote 35} ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑎᒍᑦ ᓇᓗᓇᐃᕐᓯᒪᒻᒥᔪᑦ ᐋᖓᔮᖅᑐᑦ ᑎᒍᔭᐅᖅᑲᔪᑦ ᐃᖅᑯᒪᒋᐊᖃᕐᒪᑕ, ᐅᕝᕙᓘᓐᓃᑦ ᑐᐹᖅᑕᐅᕙᓪᓗᑎᒃ, ᐊᒻᒪ ᑭᐅᔪᓐᓇᕐᓗᑎᒃ ᖃᐅᔨᒋᐊᖅᑕᐅᕙᓪᓗᑎᒃ ᑎᓴᒪᑦ (4) ᐃᑲᕐᕋᐃᑦ ᐊᓂᒍᕋᐃᑉᐸᑕ.^{Footnote 36} ᒪᓕᑦᑕᐅᒐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᓐᓂ ᑎᑎᕋᕐᓯᒪᔪᑦ, ᐱᓕᕆᐊᒥᓂᕐᓂᒃ ᑎᑎᕋᕐᓯᒪᔪᖃᓚᐅᖏᑦᑐᖅ ᐱᔾᔪᑎᖃᖅᑐᓂᑦ ᐅᐊᑦᓯᐅᔫᑉ ᖃᐅᔨᓴᖅᑐᒥᓂᐅᓂᖓᓄᑦ ᑎᒍᔭᐅᖅᑲᔪᑦ ᑭᐅᔪᓐᓇᕐᒪᖔᑕ. ᖃᐅᔨᓴᖅᑎ ᐃᖅᑲᓇᐃᔭᖅᑎᓂᑦ ᑎᑎᕋᕐᓯᒪᓚᐅᖏᑦᑐᖅ ᐱᓕᕆᐊᒥᓂᕐᓂᒃ ᐅᓂᒃᑳᓕᐅᕐᕕᒻᒧᑦ, ᓵᔨᓐ ᒋᐅᓪ, ᔪᓂ 1-2, 2020, ᑕᒪᓐᓇ ᐱᓕᕆᐊᖑᒋᐊᖃᖅᐸᒃᑲᓗᐊᕐᒪᑦ ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᓐᓂᑦ.^{Footnote 37}  

[247] ᐊᒥᓱᑲᓪᓚᓐᓂᒃ ᐊᑲᐅᖏᓕᐅᕈᑎᐅᔪᓂᑦ ᓇᓗᓇᐃᔭᐃᓯᒪᓚᐅᕐᒥᔪᑦ ᕿᒥᕐᕈᐊᖅᑕᐅᒻᒪᑕ ᑎᒍᔭᐅᒪᔪᓂᑦ ᐅᓂᒃᑳᓕᐅᕈᑎᐅᔪᑦ (C-13 ᑎᑎᕋᕐᕕᑦᓴᑦ) ᑕᐃᑲᖕᖓᑦ ᐅᓐᓅᔪᒥᑦ ᐊᐱᖅᑯᑎᐅᔪᒥᑦ. ᓲᕐᓗ:

• - C-13-ᖑᔪᑦ ᐊᑎᓕᐅᖅᑕᐅᓯᒪᓚᐅᖏᑦᑐᑦ ᖃᐅᔨᓴᖅᑎᒧᑦ ᐃᖅᑲᓇᐃᔭᖅᑎᓂᑦ.
• - ᐊᑕᐅᓯᖅ ᑎᒍᔭᐅᖅᑲᔪᖅ ᐋᓐᓂᐊᔪᕐᓯᐅᑎᓂᑦ ᐄᓯᒋᐊᖃᖅᐸᑦᑐᖅ ᓇᓗᓇᐃᕐᓯᒪᓚᐅᖅᑐᖅ ᓇᓗᓇᐃᔭᐃᑎᖓᓐᓂ C-13-ᒥ ᑎᑎᕋᕐᕕᒻᒥ, ᑭᓯᐊᓂ ᐊᓯᖏᓐᓂᑦ ᑎᑎᕋᕐᓯᒪᔪᖃᓚᐅᖏᑦᑐᑦ ᐱᑎᑕᐅᕙᓐᓂᖓᓄᑦ C-13-ᒥ ᐅᕝᕙᓘᓐᓃᑦ ᐱᓕᕆᐊᒥᓂᕐᓂᒃ ᓇᓗᓇᐃᔭᐃᑎᒥ.
• - ᒪᓕᒐᕐᔪᐊᒃᑯᑦ ᐱᓕᕆᐊᖑᒋᐊᖃᖅᐸᑦᑐᑦ ᐊᔾᔨᒌᒃᑯᑦ ᐱᒋᐊᖅᑎᑕᐅᕙᓚᐅᖏᑦᑐᑦ.
• - ᐊᒥᓱᐃᑦ ᐃᑦᑎᕐᕕᐅᔭᐃᑦ ᐃᓚᒋᔭᐅᔪᑦ C-13-ᓄᑦ ᑎᑎᕋᕐᕕᒋᓯᓴᒪᓚᐅᖏᑦᑐᑦ.
• - ᐅᑯᐊ "ᒪᓕᒋᐊᓖᑦ ᐊᓂᑎᑕᐅᔪᓄᑦ" ᐊᒻᒪ "ᓇᓗᓇᐃᔭᐃᑏᑦ/ᖃᓄᐃᓕᐅᕈᑏᑦ" ᑎᑎᕋᕐᓯᒪᕕᖏᑦ ᓇᓗᓇᐃᕐᓯᒪᓗᐊᓚᐅᖏᑦᑐᑦ ᐊᒻᒪ ᐱᑕᖃᕋᓂ ᑐᑭᓯᒋᐊᕈᑎᑦᓴᓂᑦ.
• - ᓇᓗᓇᐃᔭᐃᑎᖃᓗᐊᖏᑦᑐᑦ ᐱᔾᔪᑎᒋᓪᓗᒋᑦ ᐋᓐᓂᐊᔪᓕᕆᔾᔪᑏᑦ ᐊᒻᒪ ᐄᔭᒐᖅᑕᐅᒋᐊᓖᑦ ᑎᑎᕋᕐᕕᓐᓂ C-13-ᓂ.
• - ᐋᓐᓂᐊᓯᐅᖅᑎᒥᑦ ᐅᖃᐅᓯᖃᖅᑐᖃᓚᐅᖅᑐᖅ ᐅᐸᑦᑐᒥᓂᐅᓂᖓᓄᑦ ᐃᓪᓗᕈᓯᕐᓂᑦ ᑎᒍᔭᐅᒪᕕᒻᒥ ᖃᐅᔨᓴᕆᐊᖅᑐᓂ ᒪᕐᕉᓐᓂᒃ (2) ᑎᒍᔭᐅᒪᔫᓂᒃ ᐊᒻᒪ ᐊᑎᓕᐅᖅᑕᐅᓯᒪᓪᓗᑎᒃ C-13-ᖏᑦ ᑎᒍᔭᐅᒪᔪᖅ ᖃᓄᐃᖏᓐᓂᖓᓄᑦ ᑎᒍᔭᐅᒪᒍᓂ; ᑭᓯᐊᓂᓕ, ᓇᓗᓇᐃᔭᕐᓯᒪᓗᐊᖏᑦᑐᑦ C-13-ᓂ ᐱᓪᓗᒋᑦ ᖃᓄᐃᓕᖓᒍᑎᐅᔪᑦ ᐱᔾᔪᑎᒋᓪᓗᒋᑦ ᐋᓐᓂᐊᔪᓕᕆᔨᓄᑦ ᐅᐸᑦᑕᐅᓯᒪᓂᒥᓂᖏᑦ ᖃᖓᒃᑯᑦ ᐊᒻᒪ ᐱᔾᔪᑎᐅᔪᖅ ᐋᓐᓂᐊᔪᓕᕆᔭᐅᔾᔪᑎᐅᓗᑎᒃ. ᐱᓕᕆᐊᒥᓂᕐᓂᒃ ᑎᑎᕋᕐᕕᐅᔪᖅ ᐱᑕᖃᓚᐅᖏᒻᒥᔪᖅ ᓇᓗᓇᐃᔭᐃᑎᖏᓐᓂᑦ ᑕᒪᒃᑯᐊ ᐅᖃᐅᓯᐅᔪᑦ.
• - ᒪᕐᕉᒃ (2) ᑎᒍᔭᐅᒪᔫᒃ ᑎᑎᖅᑕᐅᓯᒪᓚᐅᖅᑑᒃ ᑎᑎᖅᑲᓄᑦ "S" (ᐃᒻᒥᓃᕈᒪᔪᖅ) ᐅᕝᕙᓘᓐᓃᑦ "MHA" (ᐃᓱᒪᓕᕆᓂᒃᑯᑦ ᒪᓕᒐᓕᕆᔪᖅ) ᖁᓛᓂ ᑎᑎᕋᕐᓯᒪᓪᓗᑎᒃ C-13-ᖏᑕ, ᑭᓯᐊᓂ ᓇᓗᓇᐃᔭᐃᑎᖏᑦ/ᖃᓄᐃᓕᐅᕈᑎᖏᑦ ᑐᑭᓯᓇᓚᐅᖏᑦᑐᑦ ᐊᒻᒪ ᓇᓗᓇᐃᕐᓯᒪᔪᖃᕋᓂ ᐅᐊᑦᓯᐅᔪᖅ ᖃᐅᑕᒪᑦ ᖃᐅᔨᓴᐃᓐᓇᕆᐊᖃᕐᓂᖓᓄᑦ ᑎᒍᔭᐅᒪᔪᓂᑦ.

[248] ᐱᔾᔪᑎᒋᓪᓗᒍ ᐱᓕᒻᒪᓴᖅᑎᑕᐅᓂᖅ, ᐅᐊᑦᓯᐅᔪᖅ ᐅᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓄᑦ ᓵᔨᓐ ᒋᐅᓪ ᐱᑎᓚᐅᕐᒪᒍ "ᐱᓐᓇᔭᐸᓗᑦᑐᑎᒃ, ᐱᓕᕆᔾᔪᑎᒐᓚᒃᑯᑦ" ᐃᓕᓐᓂᐊᓂᕐᒥᑦ ᐱᒋᐊᕋᒥ ᐃᖅᑲᓇᐃᔮᒥᓂᒃ. ᐅᐊᑦᓯᐅᔪᖅ ᓇᓗᓇᐃᔭᐃᓚᐅᖅᑐᖅ:

ᐃᓗᐊᓂᑦ ᑎᒍᔭᐅᒪᕕᐅᑉ ᕿᒥᕐᕈᐊᖅᑎᑕᐅᓚᐅᖅᑐᖓ. ᑕᑯᑎᑕᐅᓚᐅᖅᑐᖓ ᓱᓇᑐᐃᓐᓇᐃᑦ ᓇᒦᒻᒪᖔᑕ [ᐅᖃᐅᓯᖅ]. ᐅᖃᐅᔾᔭᐅᓚᐅᖅᑐᖓ ᓱᓇᐅᒻᒪᖔᑕ ᒪᓕᒐᐃᑦ. ᐅᖃᐅᔾᔭᐅᓯᒪᓚᐅᖅᑐᖓ ᖃᓄᐃᓕᐅᕈᓐᓇᕐᒪᖔᑕ ᐊᒻᒪ ᖃᓄᐃᓕᐅᕆᐊᖃᖏᒻᒪᖔᑕ. ᐅᖃᐅᔾᔭᐅᓯᒪᓚᐅᖅᑐᖓ – ᑕᑯᑎᑕᐅᓯᒪᓚᐅᖅᑐᖓ ᖃᓄᖅ ᑎᑎᕋᖃᑦᑕᕆᐊᑦᓴᖅ ᐱᓕᕆᐊᒥᓂᕐᓂᒃ ᑎᑎᕋᕐᕕᒻᒥ ᐊᒻᒪ ᖃᓄᖅ ᑎᑎᕋᕆᐊᑦᓴᖅ ᐅᕙᖓ ᐅᓪᓗᕐᓯᐅᑎᖏᓐᓂᑦ, ᖃᓄᖅ ᐃᓪᓗᕈᓰᑦ ᑎᒍᔭᐅᒪᕖᑦ ᓴᓗᒻᒪᓴᖅᑕᐅᒋᐊᖃᕐᒪᖔᑕ. ᑕᑯᑎᑕᐅᓚᐅᖅᑐᖓ ᖃᓄᖅ ᐊᓐᓄᕌᓂᑦ ᐅᐊᓴᐃᒋᐊᑦᓴᖅ, ᐃᖅᑲᓇᐃᔭᖅᑏᑦ ᐅᐊᓴᕐᕕᖓ ᓇᒦᒻᒪᖔᖅ. ᑕᑯᑎᑕᐅᓚᐅᖅᑐᖓ ᑎᑎᕋᕐᓯᒪᔪᓂᑦ ᐃᓗᐊᓂ ᐱᓯᒪᔪᓂᑦ [ᐅᖃᐅᓯᖅ] ᒪᓕᒐᕐᓂᑦ. ᑕᑯᑎᑕᐅᓚᐅᕐᒥᔪᖓ – ᐱᑎᑕᐅᓚᐅᖅᑐᖓ ᐅᖃᓕᒫᒐᕐᒥᒃ ᐅᖃᓕᒫᕆᐊᓕᑦᑎᓐᓂᑦ.

. . .

ᐊᒻᒪ ᑕᒪᒃᑯᐊ ᖃᐅᔨᒪᑦᑎᐊᓕᕋᒃᑭᑦ ᓯᕗᒧᐊᓚᐅᖅᑐᖓ, ᐃᒫᒃ, ᓈᓚᐅᑎᕋᓛᓕᕆᓂᕐᒧᑦ ᐊᒻᒪ ᑕᒪᒃᑯᓂᖓ, ᑕᑯᑎᑕᐅᕙᑦᑐᖓ ᑖᑯᓄᖓᑦᓴᐃᓐᓇᐅᖏᑦᑐᖅ [ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP)] ᐸᓖᓯᓄᑦ.

[249] ᐱᔾᔪᑎᒋᓪᓗᒋᑦ ᒪᓕᒐᐃᑦ ᐃᓕᓐᓂᐊᖅᑎᑕᐅᔾᔪᑎᒋᓚᐅᖅᑕᖏᑦ, ᐅᐊᑦᓯᐅᔪᖅ ᐅᖃᓚᐅᖅᑐᖅ ᐱᑎᑦᓯᒋᐊᖃᖏᒻᒪᑕ ᑎᒍᔭᐅᖅᑲᔪᓂᑦ ᐱᖁᑎᖏᓐᓂᑦ ᓇᖕᒥᓂᖏᓐᓂᑦ, ᐊᒻᒪ ᐅᐊᑦᓯᐅᔪᑦ ᒪᑐᐃᕐᓯᒋᐊᖃᖏᓯᐊᕐᒪᑕ ᑎᒍᔭᐅᒪᕖᑦ ᒪᑐᖏᓐᓂᑦ ᖃᖓᑐᐃᓐᓇᒃᑯᑦ, ᑭᓯᐊᓂ ᐃᑭᑦᑐᖃᓕᕐᓂᖅᐸᑦ ᒪᑐᐃᕐᓯᒍᓐᓇᖅᑐᑦ.

[250] ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ ᐅᖃᐅᔾᔭᐅᓯᒪᖏᓐᓇᒥ ᓇᓗᓇᐃᕐᓯᒪᑦᓯᐊᖅᑐᓂᑦ ᐱᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖏᑦ ᐊᒻᒪ ᐱᓕᕆᔾᔪᑎᖏᑦ, ᑭᓯᐊᓂ ᐃᓕᓐᓂᐊᐸᓪᓕᐊᖅᐸᓚᐅᖅᑕᖏᑦ ᐃᖅᑲᓇᐃᔭᓕᓚᐅᕋᒥᓂᒃ. ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ ᑎᒍᔭᐅᒪᕕᒻᒥ "ᐃᖅᑲᓇᐃᔭᖅᑎᑭᑦᓴᑐᒻᒪᕆᐅᒻᒪᑕ" ᐃᖅᑲᓇᐃᔭᖅᑎᑖᖑᒐᒥ, ᐱᓇᓱᐊᕈᓯᒋᓚᐅᕐᒪᒍ ᖁᕕᐊᓱᕝᕕᐅᑉ.

[251] ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ ᐅᖃᐅᔾᔭᐅᓯᒪᓐᓂᕋᒥ ᐊᐱᖅᑯᑎᖃᕈᓂ ᐊᐱᕆᖁᔭᐅᔭᕆᐊᑦᓴᖅ. ᐃᖅᑲᓇᐃᔭᖅᑎᓪᓗᒍ, ᐊᐱᕆᕙᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᐱᓕᕆᔪᓂᑦ ᓱᓇᑐᐃᓐᓇᕐᒥᑦ ᖃᐅᔨᒐᐃᒐᒥ ᑐᑭᓯᖏᑕᒥᓂᒃ. ᐅᐊᑦᓯᐅᔪᖅ ᐅᖃᓚᐅᖅᑐᖅ ᑎᒍᔭᐅᒪᕕᒻᒥ ᖃᓄᐃᑉᐸᓚᐅᖏᓯᐊᕐᒪᑦ ᐊᑲᐅᒋᓪᓗᓂᐅᓗ ᐊᐱᕆᔭᕆᐊᑦᓴᖅ ᖃᓄᑐᐃᓐᓇᖅ ᐊᐱᖅᑯᑎᖃᓕᕋᐃᒐᒥ ᐊᒻᒪ ᑎᓕᔭᐅᒐᐃᒐᒥ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ.

[252] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᖃᐅᔨᓴᖅᑎᖓᑦ ᕿᒥᕐᕈᐊᓚᐅᖅᑐᖅ ᑭᖕᖓᐃᑦ ᑎᒍᔭᐅᒪᕕᖏᓐᓄᑦ ᖃᕋᑕᐅᔭᒃᑯᑦ ᐅᓂᒃᑳᓕᐊᖑᓯᒪᔪᑦ, "V ᐱᓕᕆᕝᕕᒃ – ᑲᐃᑉ ᑐᐊᕐᓴᑦ, ᓄᓇᕗᑦ ᐅᐊᑦᓯᓄᑦ ᐊᖑᑎᓄᑦ ᐊᒻᒪ ᐊᕐᓇᓄᑦ ᐱᓕᒻᒪᑦᓴᐅᑎᓂᑦ ᐃᓕᓐᓂᐊᕈᑎ," ᐊᒻᒪ ᓇᓗᓇᐃᕐᓯᓕᓚᐅᖅᑐᖅ ᑕᑯᑦᓴᐅᔮᕐᓂᖓᓄᑦ ᑎᑎᕋᕐᓯᒪᓂᖏᒍᑦ ᐊᖑᒻᒪᑎᓯᒪᒋᐊᕐᓯᒪᔫᔮᖅᑐᒥᑦ ᑲᓇᑕᒥ ᐃᓕᓐᓂᐊᕈᑎᐅᕙᑦᑐᒥᑦ, "ᑲᓇᑕᒥ ᐃᓕᓐᓂᐊᕈᑎ ᐱᓕᒻᒪᑦᓴᐅᑎᓂᑦ ᐱᔾᔪᓯᒍᑦ (CTS) – ᐅᐊᑦᓯᓄᑦ ᐱᓕᒻᒪᑦᓴᐃᑎᓂᑦ ᐃᓕᓐᓂᐊᕈᑎ (2004)," ᑖᓐᓇᓕ ᐱᑐᖃᐅᓕᖅᑐᖅ. ᓇᓗᓇᖅᑐᖅ ᐅᐊᑦᓯᐅᔪᖅ ᑕᕝᕙᓂ ᐱᓕᕆᐊᒥ ᕿᒥᕐᕈᐊᕐᓂᕋᓗᐊᕐᒪᖔᖅ ᖃᕋᑕᐅᔭᒃᑯᑦ ᐱᓕᒻᒪᑦᓴᐅᑎᓂᑦ ᐃᓕᓐᓂᐊᕈᑎᐅᔪᖅ, ᐅᖃᓚᐅᖅᑑᒐᓗᐊᖅ ᐱᑎᑕᐅᓯᒪᓂᕐᒥᓂᒃ ᐅᖃᓕᒫᒐᕐᓂᒃ.

[253] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᐅᔨᓴᖅᑎᖓᑦ ᓇᓗᓇᐃᕐᓯᓚᐅᕐᒥᔪᖅ ᑎᓴᒪᐅᔪᑦ (4) ᐅᐊᑦᓯᐅᔪᑦ ᑎᓴᒪᐅᔪᖅᑐᓂᑦ (8) ᐱᓪᓗᒋᑦ ᓴᖕᖏᓂᐅᔪᖅ ᑎᒍᔭᐅᒪᕕᒻᒥ ᐃᖅᑲᓇᐃᔭᖅᑎᐅᓂᖏᓐᓄᑦ ᐱᓕᕆᔾᔪᑎᖃᓚᐅᖅᑐᑦ ᑐᖅᑯᖅᑕᐅᓯᒪᔪᓂᑦ. ᐱᑕᖃᓚᐅᖏᑦᑐᖅ ᐱᓕᕆᔾᔪᑎᓂ ᑐᖅᑯᖅᑕᐅᓯᒪᔪᓂ ᐱᔾᔪᑎᓕᓐᓂᑦ ᐱᓕᒻᒪᑦᓴᐅᑎᓂᑦ ᐅᕝᕙᓘᓐᓃᑦ ᐊᑐᐊᒐᓕᕆᔪᓂᑦ ᕿᒥᕐᕈᐊᖅᑕᐅᔾᔪᑎᒥᓂᕐᓂᒃ, ᐊᒻᒪ ᐱᑕᖃᕋᑎᒃ ᒪᑦᑐᓰᑦᓯᐊᓂᕐᒥᑦ ᐊᒻᒪ ᐊᓂᖅᑎᕆᔪᓂᑦ ᐃᑲᔪᕋᓲᑎᓂᑦ (ᐆᒻᒪᑎᒥᑦ ᐳᕙᓐᓂᒃ ᐊᐅᓚᔾᔭᐃᒐᓱᐊᕈᑎ) ᐱᓕᒻᒪᓴᕐᓯᒪᓂᖏᓐᓂᑦ ᐅᕝᕙᓘᓐᓃᑦ ᐱᑎᑕᐅᓯᒪᓂᖏᓐᓂᑦ ᓄᑖᕈᕐᓯᒪᔪᓂᑦ ᓇᓗᓇᐃᔭᐃᑎᓂᑦ ᐱᔭᕇᕈᑎᐅᔪᓂᑦ. 2011-ᒥ ᕿᒥᕐᕈᐊᕈᑎᒥᓂᕐᓂ ᓇᓗᓇᐃᔭᐃᓯᒪᓚᐅᕐᒥᔪᑦ ᐱᑕᖃᖅᐸᖏᓐᓂᖏᓐᓂᑦ ᒪᑦᑐᓰᑦᓯᐊᓂᕐᒥᑦ ᐊᒻᒪ ᐊᓂᖅᑎᕆᔪᓂᑦ ᐃᑲᔪᕋᓲᑎᓂᑦ ᐱᓕᒻᒪᑦᓴᐃᑎᓂᑦ ᐅᐊᑦᓯᐅᔪᑦ.

[254] ᐱᔾᔪᑎᒋᓪᓗᒋᑦ ᐅᐊᑦᓯᐅᔪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐃᓱᒪᒋᔭᖏᓐᓂᑦ ᐅᓂᒃᑳᖏᓐᓂ ᐊᑐᖁᔨᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐆᕕᖓ ᐊᐅᓚᔾᔭᐃᖁᔭᐅᓗᑎᒃ:

• - ᐱᒋᐊᖅᑎᑦᓯᓗᑎᒃ ᐱᓕᕆᕝᕕᓐᓂ ᐱᓕᒻᒪᑦᓴᐃᓂᕐᒧᑦ ᐱᔾᔪᓯᐅᔪᒥᑦ ᐅᐊᑦᓯᐅᔪᓄᑦ ᐊᔾᔨᒌᒃᑯᑦ ᐱᓕᕆᖃᑦᑕᕐᓂᐊᖁᓪᓗᒋᑦ.
• - ᐱᒋᐊᖅᑎᑦᓯᓗᑎᒃ ᐃᓕᓴᐃᔨᖃᖅᐸᓪᓗᑎᒃ ᐱᓕᕆᐊᑦᓴᒥᑦ ᐊᖏᔪᖅᑳᒧᑦ ᐅᐊᑦᓯᐅᔪᒧᑦ ᐃᓕᓴᑎᑕᐅᕙᓪᓗᑎᒃ ᐱᒋᐊᓕᕋᑖᕐᓂᕐᓴᐅᔪᑦ ᐅᐊᑦᓯᐅᓂᕐᒥᑦ ᓇᓗᓇᐃᕐᓯᒪᖁᓪᓗᒋᑦ ᐊᔾᔨᒌᒃᑯᑦ ᐱᓕᕆᖃᑦᑕᖁᓪᓗᒋᑦ ᐅᐊᑦᓯᐅᔪᓄᑦ ᐱᔭᑦᓴᓂᑦ ᐊᒻᒪ ᐃᑲᔪᕐᓱᐃᔾᔪᑎᑦᓴᓂᑦ.
• - ᐱᒋᐊᖅᑎᑦᓯᓗᑎᒃ ᖃᐅᔨᓴᐅᑎᓂᑦ ᐱᓕᕆᔾᔪᑎᒥᑦ ᑕᖅᑭᑦ ᐱᖓᓲᔪᖅᑐᑦ (6) ᕿᒥᕐᕈᐊᖅᑕᐅᕙᓪᓗᑎᒃ ᓄᓇᓕᓐᓂ ᐱᓕᕆᔩᑦ/ᐱᓕᕆᕝᕕᓐᓂ/ᑲᓇᑕᒥ ᐱᓕᕆᔾᔪᑎᐅᖁᔭᐅᓯᒪᔪᓂᑦ ᐊᒻᒪ ᐊᑐᐊᒐᐅᔪᓂᑦ ᐅᐊᑦᓯᓄᑦ ᐊᒻᒪ ᐸᓖᓯᓄᑦ ᐃᓚᒋᔭᐅᕙᑦᑐᓄᑦ.
• - ᐅᐊᑦᓯᐅᔪᑦ ᐱᓕᒻᒪᓴᖅᑎᑕᐅᒋᐊᓖᑦ ᐅᖄᓚᐅᑎᕋᓛᓕᕆᓗᑎᒃ ᐊᒻᒪ ᐱᓕᕆᔾᔪᑎᐅᔪᒥᑦ ᐅᖄᓚᕕᖃᖅᐸᓂᕐᒥᑦ ᐸᓖᓯᓂᑦ ᐱᔭᑦᓴᓕᓐᓂᑦ ᐊᒻᒪ/ᐅᕝᕙᓘᓐᓃᑦ ᐊᐅᓚᑦᓯᔾᔪᑎᓂᑦ ᑐᓴᐅᒪᑎᑦᓯᔨᓄᑦ ᐃᓪᓗᕈᓯᖃᕐᕕᓐᓂ ᑎᒍᔭᐅᒪᕕᒻᒥ ᑐᐊᕕᕐᓇᖅᑐᑕᖃᓕᕋᐃᑉᐸᑦ.
• - ᒪᓕᑦᑐᒋᑦ 2011-ᒥ ᕿᒥᕐᕈᐊᖅᑕᐅᔪᕕᓃᑦ, ". . . ᑎᒍᔭᐅᒪᕕᒻᒥ ᐊᖏᔪᖅᑳᖑᔪᖅ, ᑐᑭᓯᒋᐊᓚᐅᕐᓗᓂ ᓄᓇᓕᓐᓂᑦ ᐊᐅᓚᑦᑎᔨᓂᑦ, ᓇᓗᓇᐃᕐᓯᒪᓂᐊᖅᑐᖅ ᐊᖑᑏᑦ ᐊᒻᒪ ᐊᕐᓇᐃᑦ ᐅᐊᑦᓯᐅᔪᑦ ᐱᑎᑕᐅᒐᓗᐊᕐᒪᖔᑕ ᐊᑐᖅᑕᐅᒋᐊᓕᓐᓂᑦ ᒪᑦᑐᓰᑦᓯᐊᓂᕐᒥᑦ ᐊᒻᒪ ᐊᓂᖅᑎᕆᔪᓂᑦ ᐃᑲᔪᕋᓲᑎᓂᑦ ᐱᓕᒻᒪᑦᓴᐃᑎᓂᑦ." ᐅᐊᑦᓯᐅᔪᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ ᐱᖃᖕᖏᑦᑐᑦ ᐊᑐᕈᓐᓇᖅᑐᓂᑦ ᓇᓗᓇᐃᔭᐃᑎᐅᔪᓂᑦ ᑕᒪᓐᓇ ᐱᓪᓗᒍ. ᑕᒪᓐᓇ ᐊᑐᖁᔭᐅᓕᖅᑐᖅ ᐅᐊᑦᓯᐅᔪᑦ ᐱᓕᒻᒪᓴᖅᑎᑕᐅᖁᔭᐅᓗᑎᒃ ᑕᒪᒃᑯᓂᖓ.

[255] ᐅᐊᑦᓯᐅᔪᖅ ᐱᕕᓚᐅᕋᓗᐊᕋᒥ ᐊᒻᒪ ᐱᓕᕆᔪᒪᑦᑎᐊᖅᑐᓂ ᐊᔪᕐᓇᖏᓐᓂᖏᒍᑦ ᐊᑦᓱᕉᓴᐃᓐᓇᕋᓗᐊᖅᑐᓂ, ᓇᓗᓇᖏᑦᑐᖅ ᐊᒥᓲᓚᐅᕐᓂᖏᓐᓂᑦ ᓱᕋᑦᑕᐅᓚᐅᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᓐᓃᑦᑐᓂᑦ ᐱᓪᓗᒋᑦ ᐱᓕᕆᐊᒥᓂᕐᓂᒃ ᑎᑎᕋᖅᐸᒋᐊᖃᕐᓂᐅᔪᖅ ᐊᒻᒪ ᐊᓯᖏᓐᓂᑦ ᐱᓕᕆᐊᖑᒋᐊᓕᓐᓂᑦ ᐅᐊᑦᓯᐅᔪᒧᑦ, ᑖᓐᓇᓕ ᖃᐅᔨᓴᖅᑎᖃᓚᐅᖅᑐᖅ ᓵᔨᓐ ᒋᐅᓪᒥᑦ. ᖃᐅᔨᓴᖅᑏᑦ ᓇᓂᓯᒻᒥᔪᑦ, ᐃᓱᒪᒋᓪᓗᒋᑦ ᐃᓘᓐᓇᑦᓯᐊᑎᒃ ᖃᓄᐃᓕᖓᒍᑎᐅᓚᐅᖅᑐᑦ, ᓵᔨᓐ ᒋᐅᓪ ᓈᒻᒪᒋᑦᑐᒃᑯᑦ ᖃᐅᔨᓴᖅᑎᐅᔪᕕᓂᖅ ᐅᐊᑦᓯᐅᔪᒥᑦ.

[256] ᐊᑭᕋᖅᑐᑕᐅᖏᓯᐊᖅᑐᖅ ᑕᕝᕙᓂ ᐅᓐᓅᔪᒥ ᐱᔭᑦᓴᓕᒻᒪᕆᐅᓚᐅᕐᒪᑕ ᑕᐃᒪᐃᓗᐊᖅᐸᒐᑎᒃ ᑭᖕᖓᐃᑦ ᑎᒍᔭᐅᒪᕕᖓᓐᓂ ᐊᒥᓱᑲᓪᓚᐅᓗᑎᒃ ᓯᕗᓪᓕᐅᑎᒋᐊᓖᓐᓇᐃᑦ, ᑭᓯᐊᓂ ᐃᓚᖏᑦ ᐊᑲᐅᖏᓕᐅᕈᑎᑭᐅᔪᑦ ᐱᒻᒪᕆᐅᔪᓂᑦ ᐱᐅᖏᑦᑐᓂᑦ ᖃᓄᐃᒍᑎᖃᑐᐃᓐᓇᕆᐊᓕᒥᓃᑦ, ᓲᕐᓗ ᑕᑯᑦᓴᐅᔪᖅ ᑎᒥᓂᑦ ᖃᐅᔨᓴᖅᐸᓂᖕᖏᑦᑐᑦ ᐊᒻᒪ ᖃᐅᔨᓴᖅᐸᓂᖕᖏᑦᑐᑦ ᑭᐅᔪᓐᓇᕋᓗᐊᕐᒪᖔᑕ ᑎᒍᔭᐅᒪᔪᑦ. ᐊᑲᐅᖏᓕᐅᕈᑎᐅᔪᑦ ᓈᒻᒪᖏᑦᑐᑦ ᑎᒍᔭᐅᒪᔪᓂᑦ ᐅᓂᒃᑳᓂ, ᐱᓗᐊᖅᑐᒥ ᐱᔾᔪᑎᖃᕐᓂᖏᓐᓂᑦ ᐄᔭᒐᖅᑕᐅᒋᐊᓕᒥᓂᕐᓂᒃ, ᐋᓐᓂᐊᓂᒃᑯᑦ ᖃᓄᐃᓕᖓᒍᑎᐅᔪᓂᑦ, ᐊᒻᒪ ᐋᓐᓂᐊᔪᓕᕆᔭᐅᒋᐊᓕᓐᓂᑦ, ᐱᐅᖏᑦᑐᓂᑦ ᓴᖅᑮᔾᔪᑎᐅᔪᓐᓇᓂᕐᒪᑕ ᑎᒍᔭᐅᒪᔪᑦ ᐱᓪᓗᒋᑦ. ᓇᓗᓇᐃᖅᑕᐅᓯᒪᓚᐅᕐᒥᔪᖅ ᓵᔨᓐ ᒋᐅᓪ ᐊᑎᓕᐅᕐᓯᒪᓐᓂᖏᒻᒪᑦ ᑎᒍᔭᐅᓯᒪᔪᓂᑦ ᐅᓂᒃᑳᓕᐊᖑᓯᒪᔪᓂᑦ.  

[257] ᐊᑲᐅᒋᔭᐅᓂᕐᓴᐅᑲᓴᑦᑑᒐᓗᐊᖅ ᐊᑕᐅᓯᐅᒐᓗᐊᒥᑦ (1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᑕᖃᕐᓂᖅᐸᑦ ᑎᒍᔭᐅᒪᕕᒻᒥ ᑕᐃᑦᓱᒪᓂ ᖃᓄᐃᒍᑎᐅᔪᖅ ᐊᑐᖅᑕᐅᑎᓪᓗᒍ ᐃᓚᒋᔭᐅᓗᑎᒃ A.B. ᐊᒻᒪ J.J. ᑕᕝᕙᓴᐃᓐᓇᐸᓗᒃ ᑐᐊᕕᕐᓇᖅᑐᓕᕆᔪᓐᓇᑲᓴᒻᒪᑦ; ᐅᐊᑦᓯᐅᔪᖅ ᐅᖃᕆᐊᓚᐅᖅᑐᖅ ᑕᐃᒪᐃᒐᔪᒃᑲᓗᐊᕐᒪᑕ. ᑭᓯᐊᓂᓕ, ᐃᓚᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᓯᐊᓅᕐᓯᒪᓚᐅᖅᑐᑦ ᐅᖄᓚᓯᒪᔪᓄᑦ ᐱᔾᔪᑎᖃᖅᑐᑎᒃ ᐊᖑᑎᒥᑦ ᑐᕌᖅᑎᑦᓯᓯᒪᔪᒥᑦ ᖁᑭᐅᒻᒥᑦ; ᐃᓚᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᐸᑦᓯᒪᓚᐅᖅᑐᑦ ᐅᖄᓚᓯᒪᔪᒧᑦ ᐋᖓᔮᖅᑐᖃᕐᓂᕋᐃᓯᒪᔪᓂᑦ ᓱᕈᓯᖅᑕᖃᖅᑎᓪᓗᒍ ᐃᓪᓘᑉ ᐃᓗᐊᓂ; ᐊᒻᒪ ᐊᐃᑉᐸᖓ ᐸᓖᓯ ᐅᐸᑦᓯᒪᓚᐅᖅᑐᓂ ᐅᖄᓚᓯᒪᔪᓄᑦ ᐱᔾᔪᑎᖃᖅᑐᓂᑦ ᐊᖑᑎᒥᑦ ᓇᓚᑐᐃᓐᓇᖅᑐᒥᑦ ᓯᓚᒥ ᖃᓂᒋᔮᓂ ᓴᕕᕋᔭᓄᑦ ᐊᑦᓯᐅᑉ. ᐃᓘᓐᓇᑎᒃ ᐅᖄᓚᔾᔪᑎᐅᓯᒪᓚᐅᖅᑐᑦ ᐅᐸᑦᑕᐅᑦᑕᐅᑎᒋᒋᐊᖃᖅᐸᓚᐅᖅᑐᑦ.

[258] ᖃᐅᔨᒪᖁᔭᐅᒻᒥᔪᑦ, ᐅᐊᑦᓯᐅᑉ ᐊᑐᐃᓐᓇᖅᐸᓚᐅᖏᓐᓂᖓ ᐅᖄᓚᐅᑎᕋᓛᒥᑦ ᐅᒡᒍᐊᕐᓇᕋᓗᐊᖅᑐᓂ, ᑕᑯᑦᓴᐅᓚᐅᖅᑐᖅ ᐱᒻᒪᕆᐅᔪᒃᑯᑦ ᑭᖑᕙᖅᑎᑕᐅᓯᒪᓚᐅᕐᓂᖏᓐᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᐸᒍᓐᓇᕐᓂᖏᓐᓂᑦ. ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᒥ ᑕᑯᑦᓴᐅᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᐸᑦᑎᓪᓗᒋᑦ ᒪᑐᐊᓄᑦ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ 3 ᑐᖔᓂ 2 ᒪᓇᑦᓯ ᐱᒋᐊᖅᑕᐅᓚᐅᖅᑎᓪᓗᒍ.

[259] ᖃᐅᔨᓴᖅᑏᑦ ᓇᓂᓯᒻᒥᔪᑦ ᐱᓕᒻᒪᓴᖅᑕᐅᓯᒪᔪᑦ ᐅᐊᑦᓯᐅᔪᒧᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓐᓂᑦ ᓈᒻᒪᓚᐅᖏᒻᒪᑕ. ᐱᑕᖃᖅᑑᔮᓚᐅᖅᑑᒐᓗᐊᖅ ᑐᑭᓯᐅᒪᓂᕐᒥᑦ ᐊᑑᑎᐅᔪᓂᑦ ᐊᒻᒪ ᐃᑉᐱᒋᔭᒐᐅᔪᓂᑦ ᐱᓕᕆᐊᖃᕐᓂᒃᑯᑦ ᐅᐊᑦᓯᐅᔪᖅ ᐱᓪᓗᒍ, ᑭᓯᐊᓂ ᓈᒻᒪᓚᐅᖏᑦᑐᑦ ᐅᖃᐅᓯᐅᓯᒪᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᑎᒍᑦ ᐊᑐᖅᑕᐅᔭᕆᐊᖃᖅᐸᑦᑐᑦ.

[260] ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐊᑐᖁᓚᐅᖅᑕᖏᑦ ᑲᒪᒋᔭᐅᖁᓪᓗᒋᑦ ᐊᑲᐅᖏᓕᐅᕈᑎᐅᔪᑦ ᑕᑯᔭᐅᓚᐅᖅᑐᑦ ᑕᕝᕙᓂ ᐱᓕᕆᐊᒥ ᐱᔾᔪᑎᐅᑎᒃ ᐅᐊᑦᓯᓄᑦ ᐱᓕᕆᔾᔪᑎᐅᔪᓂᑦ ᐊᒻᒪ ᐱᓕᒻᒪᑦᓴᐅᑎᓂᑦ. ᑕᒪᒃᑯᐊ ᐊᑐᖁᔭᐅᓯᒪᔪᑦ ᐱᖃᓯᐅᔾᔨᓯᒪᔪᑦ ᐅᑯᓂᖓ:

• - ᑎᒍᔭᐅᒪᕕᒻᒦᐸᑦᑐᑦ ᒪᓕᒋᐊᓖᑦ ᐊᑐᐊᒐᕐᒥᑦ ᐅᐊᑦᓯᐅᔪᑦ ᖃᐅᔨᓴᖃᑦᑕᕆᐊᖃᕐᓂᖏᓐᓂᑦ ᖃᐅᑕᒫᑦ ᐊᒻᒪ ᐱᑦᑎᐊᐸᓪᓗᑎᒃ.
• - ᐊᖏᔪᖅᑳᖑᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᐊᒻᒪ ᐅᐊᑦᓯᐅᔪᖅ ᖃᐅᔨᓴᖅᐸᓪᓗᑎᒃ ᑎᒍᔭᐅᒪᔪᓂᑦ ᐱᒋᐊᖅᑳᕈᑎᒋᕙᓪᓗᒋᑦ ᐃᖅᑲᓇᐃᔭᕆᐊᕋᐃᒍᓂ ᐊᒻᒪ ᓄᖅᑲᓕᕈᓂ ᑭᖑᓪᓕᖅᐹᖑᕙᓪᓗᑎᒃ ᐊᒻᒪ ᑎᑎᕋᖅᐸᓪᓗᓂᒋᑦ ᑕᒪᒃᑯᐊ ᖃᐅᔨᓴᖅᑕᖏᑦ.
• - ᑎᒍᔭᐅᒪᕕᒻᒥ ᐊᖏᔪᖅᑳᖑᔪᖅ ᐋᖅᑭᑦᓱᐃᓯᒪᒋᐊᓕᒃ ᓇᓗᓇᐃᔭᕐᓯᒪᑦᑎᐊᖅᑐᓂ ᓂᕆᐅᒐᕆᔭᐅᔪᓂᑦ ᐊᒻᒪ ᐃᑉᐱᒋᔭᒐᐅᔪᓂᑦ ᐃᖅᑲᓇᐃᔮᖏᒍᑦ ᐱᔾᔪᑎᒋᓪᓗᒋᑦ ᐃᓪᓗᕈᓯᖃᕐᕕᓐᓂᑦ ᑎᒍᔭᐅᒪᕕᓐᓂᑦ ᐊᐅᓚᑦᓯᔾᔪᑎᓂᑦ.
• - ᐅᐊᑦᓯᐅᑉ ᐱᔭᑦᓴᖏᑦ ᐊᒻᒪ ᑐᐊᕕᕐᓇᖅᑐᑕᖃᓕᖅᐸᑦ ᖃᐅᔨᒋᐊᕆᐊᓕᖏᑕ ᐅᖄᓚᐅᑎᖏᑦ ᑕᑯᑦᓴᐅᓗᑎᒃ ᓂᕕᖓᑎᑕᐅᖃᑦᑕᕆᐊᓖᑦ ᐅᕝᕙᓘᓐᓃᑦ ᐅᖃᓕᒫᒐᖃᕐᕕᒨᖅᑕᐅᕙᓪᓗᑎᒃ ᐅᐊᑦᓯᐅᔫᑉ ᐃᖅᑲᓇᐃᔭᕐᕕᖏᓐᓂ ᖃᐅᔨᒋᐊᑦᑕᐅᑎᒋᕙᓐᓂᐊᕋᒥᒋᑦ.
• - ᕿᓄᐃᓵᕈᓯᓕᐅᒃᑲᓐᓂᕋᓱᓪᓗᑎᒃ ᐃᖅᑲᓇᐃᔭᖅᑎᑖᕈᒪᓂᖏᓐᓂᑦ ᐅᐊᑦᓯᑦᓴᓂᑦ ᓇᓗᓇᐃᕐᓯᒪᓗᑎᒃ.

[261] ᑕᒪᒃᑯᐊ ᐊᑐᖁᔭᐅᔪᑦ ᐅᖃᐅᓯᖃᖅᑐᑦ ᐱᔾᔪᑎᐅᓯᒪᔪᓂᑦ ᓇᓗᓇᐃᔭᖅᑕᐅᓯᒪᔪᓂᑦ ᐅᕙᓂ ᐅᓂᒃᑳᓂ, ᖃᐅᔨᓴᖅᑏᑦ ᐊᑐᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓘᓐᓇᖏᓐᓂᑦ ᐱᒋᐊᖅᑎᑦᓯᖁᔭᐅᓗᑎᒃ ᐊᑐᖁᔭᐅᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ.

ᐋᓐᓂᐊᔪᓕᕆᓂᒃᑯᑦ ᑲᒪᒋᔭᐅᔪᖅ A.B. ᑭᖑᓂᐊᓂ ᖃᓄᐃᒍᑎᖃᓚᐅᖅᑎᓪᓗᒋᑦ ᐃᓪᓗᕈᓯᕐᒥ ᑎᒍᔭᐅᒪᕕᒻᒥ

ᖃᐅᔨᔭᐅᔪᖅ #26: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᓇᓱᐊᓯᑦᑕᐅᑎᒋᓚᐅᖅᑐᑦ ᐋᓐᓂᐊᔪᓕᕆᔨᓄᑦ ᐃᑲᔪᖅᑕᐅᒋᐊᖁᓪᓗᒍ A.B. ᐱᒋᐊᖅᑕᐅᓚᐅᖅᑎᓪᓗᒍ.

ᖃᐅᔨᔭᐅᔪᖅ #27: ᐱᔾᔪᑎᒋᓪᓗᒍ A.B. ᓱᓕ ᐱᐅᓯᖃᓚᐅᕐᓂᖓ ᓇᓗᓇᖅᑐᓂ ᖃᓄᐃᓕᐅᕐᓂᐊᓕᕐᒪᖔᕐᒥ, ᓈᒻᒪᓚᐅᖅᑐᖅ ᓵᔨᓐ ᒋᐅᓪ ᐋᓐᓂᐊᓯᐅᖅᑎᒥᑦ ᖃᐃᖁᔨᖔᓚᐅᕐᓂᖓ ᑎᒍᔭᐅᒪᕕᒻᒧᑦ A.B. ᐋᓐᓂᐊᕕᓕᐊᕈᔾᔭᐅᖏᓪᓗᓂ.  

ᖃᐅᔨᔭᐅᔪᖅ #28: ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᑎᒋᔭᖃᓚᐅᕐᓂᖏᓐᓂᑦ ᐋᓐᓂᐊᓯᐅᖅᑎᐅᑉ A ᐃᓪᓗᕈᓯᒻᒦᑎᑕᐅᖏᓐᓇᕆᐊᖃᕐᓂᖓᓄᑦ A.B. ᖃᐅᔨᓴᖅᑕᐅᓚᐅᖏᓐᓂᖓᓂ.

ᖃᐅᔨᔭᐅᔪᖅ #29: ᓈᒻᒪᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᐸᑦᓯᒪᓚᐅᖅᑐᑦ ᐋᓐᓂᐊᓯᐅᖅᑎ A ᐅᐸᑦᓯᒪᑎᓪᓗᒍ (ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᒥᖦ ᐊᒻᒪ ᓵᔨᓐ ᒋᐅᓪ) ᓇᓗᓇᐃᕐᓯᓗᑎᒃ ᐅᖃᐅᔾᔪᐃᓐᓂᖏᒻᒪᑕ ᐋᓐᓂᐊᔪᓕᕆᓂᒃᑯᑦ ᖃᓄᖅ ᑲᒪᒋᔭᐅᒋᐊᖃᕐᒪᖔᖅ A.B. ᐊᑐᖅᑕᐅᖁᔭᒥᓂᒃ ᐋᓐᓂᐊᓯᐅᖅᑎᐅᑉ A ᐊᒻᒪ ᐊᖏᕈᑎᐅᓐᓂᖅᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐊᒻᒪ ᑎᑎᕋᖅᑕᐅᓐᓂᕋᓂ ᐅᓇ ᐸᕐᓇᐅᑎᐅᔪᖅ ᑎᒍᔭᐅᒪᔪᓂᑦ ᐅᓂᒃᑳᓕᐊᖑᒋᐊᓕᓐᓂ. ᑕᒪᓐᓇ ᑲᔪᓯᔭᐅᖏᑦᑐᒥᓂᐅᓂᖓ ᑲᒪᒋᔭᐅᒋᐊᖃᖅᑐᒥᑦ ᐅᓗᕆᐊᓇᖅᑐᒦᒍᑎᒋᔪᓐᓇᖅᑕᒥᓂᖓ A.B.

ᖃᐅᔨᔭᐅᔪᖅ #30: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖅᑲᓇᐃᔭᕆᐊᖅᑐᑦ ᖃᐅᒻᒪᑦ ᖃᐅᔨᒪᑎᑕᐅᓕᕋᒥᒃ ᑎᒥᖓᒍᑦ ᖃᐅᔨᓴᖅᑕᐅᒋᐊᖃᕐᓂᖓᓄᑦ A.B., ᐱᓕᕆᒋᐊᓯᓚᐅᖅᑐᑦ ᖃᐅᔨᓴᖅᑕᐅᑎᑦᑐᒍ ᑭᖑᓂᑦᓯᐊᖓᒍᑦ.

ᖃᐅᔨᔭᐅᔪᖅ #31: ᐅᐊᑦᓯᐅᔪᖅ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ A.B.-ᒥᑦ ᐃᑲᔪᕋᓱᒋᐊᓕᒥᓂᐅᒐᓗᐊᑦ ᐱᓪᓗᒍ ᐋᓐᓂᖅᑕᐅᓯᒪᓂᖓ, ᐊᑦᑕᓇᔾᔭᐃᕐᓯᒪᓗᑎᒃ ᐃᑲᔪᕈᓐᓇᕐᓂᕈᑎᒃ.

ᐊᑐᖁᔭᖅ #14: ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᒥᖦ ᐊᒻᒪ ᓵᔨᓐ ᒋᐅᓪ ᐱᑎᑕᐅᖁᓪᓗᒋᑦ ᐊᐅᓚᑦᓯᔾᔪᑎᓂᑦ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓇᓗᓇᐃᕐᓯᒪᑦᓯᐊᕐᓗᒋᑦ ᑎᑎᕋᕆᐊᖃᕐᓂᕐᒥᑦ ᐊᒻᒪ ᑐᓴᐅᒪᑎᑦᓯᕙᓐᓂᕐᒥᑦ ᑐᑭᓯᒋᐊᕈᑎᓂᑦ ᐱᔾᔪᑎᖃᖅᑐᓂᑦ ᑎᒍᔭᐅᒪᔫᑉ ᐋᓐᓂᐊᔪᓕᕆᔨᓄᑦ ᑲᒪᒋᔭᐅᒋᐊᖃᕐᓂᖏᓐᓂᑦ.

ᐊᑐᖁᔭᖅ #15: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓴᖅᑮᔭᕆᐊᓖᑦ ᑐᓴᕋᑦᓴᓂᑦ ᓇᓗᓇᐃᔭᐃᓯᒪᔪᓂᑦ ᓂᐊᖁᒃᑯᑦ ᐋᓐᓂᕐᓯᒪᑐᐃᓐᓇᕆᐊᓖᑦ ᑎᒍᔭᐅᒪᔪᑦ ᐱᓕᕆᔾᔪᑎᐅᒋᐊᖃᖅᐸᒻᒪᑕ ᑲᒪᒋᔭᐅᑦᓯᐊᐸᓪᓗᑎᒃ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᒻᒪᕈᓐᓇᕐᒪᑕ ᐅᔾᔨᕈᓲᑎᖃᓗᐊᕐᓂᒃᑯᑦ ᖃᐅᔨᒋᐊᑦᑕᐅᑎᒋᕙᓪᓗᑎᒃ ᑕᕝᕙᓴᐃᓐᓇᖅ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᕙᓪᓗᑎᒃ ᑕᐃᒪᐃᑦᑐᓂᑦ ᐊᑐᖅᑐᖃᖅᑎᓪᓗᒍ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᐅᔨᒪᒋᐊᖃᒻᒪᕆᑦᑐᑎᒃ ᐋᖓᔮᖅᑐᖃᖅᑎᓪᓗᒍ ᓴᖅᑭᔮᖅᑎᑦᓯᖏᑐᐃᓐᓇᕆᐊᖃᕐᒪᑕ ᓂᐊᖁᒃᑯᑦ ᐋᓐᓂᖅᑕᐅᓯᒪᔪᓂᑦ.

[262] ᓵᔨᓐ ᒋᐅᓪ ᐸᓖᓯᓕᕆᓂᒃᑯᑦ ᐅᓂᒃᑳᓕᐊᕆᓯᒪᔭᖏᑦ ᓇᓗᓇᐃᕐᓯᓯᒪᔪᑦ, J.J. ᓅᑕᐅᓚᐅᖅᑎᓪᓗᒍ ᐃᓪᓗᕈᓯᕐᒥᑦ 3, A.B. ᕿᑲᕐᓯᒍᓐᓇᓚᐅᖏᑦᑐᖅ ᐃᓗᐊᓂ ᑭᓯᐊᓂ ᓇᓗᓇᓚᐅᖏᑦᑐᖅ ᑮᓇᖓ ᐋᓐᓂᑎᖅᑕᐅᓯᒪᔪᒻᒪᕆᐅᓂᖓᓄᑦ, ᐊᒻᒪ ᐃᓪᓗᕈᓯᐅᑉ ᓇᑎᐊ ᐊᐅᖏᓐᓇᕐᔪᐊᖑᓪᓗᓂ. ᑭᓯᐊᓂᓕ, ᓵᔨᓐ ᒋᐅᓪ ᑕᑯᓐᓇᕐᓂᓚᐅᕐᒥᔪᖅ A.B. "ᓱᓕ ᓂᖕᖓᐅᒪᔪᒻᒪᕆᐅᑎᓪᓗᒍ" ᐊᒻᒪ ᓵᔨᓐ ᒋᐅᓪ "ᐃᓱᒪᓚᐅᖅᑐᖅ ᐊᑦᑕᓇᓗᐊᕐᓂᖓᓄᑦ ᐊᐃᒍᑎᓪᓗᒍ [A.B.] ᐋᓐᓂᐊᕕᒻᒧᑦ." ᑭᓯᐊᓂᓕ, ᓵᔨᓐ ᒋᐅᓪ ᐅᖃᐅᔾᔨᓚᐅᖅᑐᖅ ᐊᓯᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓂᑦ ᐅᖄᓚᖁᔨᓪᓗᓂ ᐋᓐᓂᐊᕕᒻᒧᑦ ᐋᓐᓂᐊᓯᐅᖅᑎᒥᑦ ᑎᒍᔭᐅᒪᕕᒻᒨᖁᔭᐅᓗᓂ ᐊᒻᒪ ᑲᒪᒋᒋᐊᖅᑐᕐᓗᓂᐅᒃ A.B.

[263] ᑳᓐᔅᑕᐳᓪ ᓯᒥᖦ ᐅᓂᒃᑳᖏᓐᓂ, ᑎᑎᕋᕐᓯᒪᔪᖃᕐᒥᔪᖅ A.B. ᓱᓕ ᐃᓕᕋᓈᕐᓵᖏᓐᓇᓚᐅᕐᒪᑦ ᑕᑯᑦᓴᐅᒐᓗᐊᕐᒪᑦ ᐋᓐᓂᕐᓯᒪᓂᖓ. ᑳᓐᔅᑕᐳᓪ ᓯᒥᖦ ᖃᐅᔨᒋᐊᓕᓚᐅᖅᑐᖅ ᑭᐅᔨᒧᑦ ᐊᒻᒪ ᖃᐅᔨᒋᐊᖁᓪᓗᓂᒋᑦ ᐋᓐᓂᐊᕕᒻᒧᑦ ᐋᓐᓂᐊᓯᐅᖅᑎᒥᑦ ᐅᐸᖁᔨᓪᓗᓂ ᑎᒍᔭᐅᒪᕕᒻᒧᑦ ᖃᐅᔨᓴᕆᐊᕐᓗᓂᐅᒃ A.B. ᐅᖄᓚᕕᐅᒍᓂ ᐅᐸᑦᑎ ᐋᓐᓂᐊᓯᐅᖅᑎ ᖃᐅᔨᒪᖁᔨᓚᐅᖅᑐᖅ ᐅᐸᓐᓂᐊᓂᕐᒥᓂᒃ ᐱᔭᕇᕈᓂᐅᒃ ᐅᖄᓚᓯᒪᔪᖅ ᐅᐸᕋᑖᑦᓯᐊᖅᑕᓂ ᖃᐃᖁᔭᐅᒐᒥ.

[264] ᑕᑯᓐᓇᓚᐅᖅᑐᓂᐅᒃ ᐊᐅᓚᔫᖅ ᐊᔾᔨᓕᐅᖅᑕᐅᓯᒪᔪᖅ, ᖃᐅᔨᓴᖅᑏᑦ ᖃᐅᔨᔪᑦ ᐱᒋᐊᖅᑕᐅᓚᐅᖅᑎᓪᓗᒍ, A.B. ᕿᑲᕐᓯᓚᐅᕐᓂᖏᒻᒪᑦ ᐃᓗᐊᓂ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ, ᐅᕐᕈᔮᖅᑐᓂ ᐊᒻᒪ ᐅᕐᕈᐸᑦᑐᓂ ᐊᒻᒪ ᓇᖏᕐᓯᑲᓐᓂᐸᑦᑐᓂ. ᓇᑎᖓ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᐊᐅᖏᓐᓇᐅᓚᐅᖅᑐᖅ ᐊᒻᒪ ᐃᒪᐃᓐᓇᐅᓗᓂ.

[265] ᖃᐅᔨᓴᖅᑏᑦ ᐊᐱᕐᓱᓚᐅᖅᑐᑦ ᐅᖄᓚᕕᐅᒋᐊᓕᒻᒥᑦ ᐋᓐᓂᐊᓯᐅᖅᑎᒥᑦ ᑭᖕᖒᒪᔭᐅᒍᓂ, ᑕᐃᓐᓇ ᐅᖃᐅᓯᐅᕙᓐᓂᐊᖅᑐᖅ ᐅᓂᒃᑳᓂ ᐋᓐᓂᐊᓯᐅᖅᑎ A. ᐅᖃᕆᐊᓚᐅᖅᑐᖅ ᓇᓗᓇᐃᕐᓯᒪᓪᓗᓂ ᐋᓐᓂᐊᓯᐅᖅᑎᐅᓕᕋᒥ ᐊᕐᕌᒍᓂᑦ 23-ᓂᑦ ᐊᒻᒪ ᐋᓐᓂᐊᓯᐅᖅᑎᐅᔾᔪᑎᖃᖅᑐᖅ ᐊᑦᓱᐊᓘᖅᑐᓂᑦ ᐋᓐᓂᐊᔪᓄᑦ ᐋᓐᓂᐊᕕᓐᓂ. ᐃᖅᑲᓇᐃᔭᖅᑎᐅᓯᒪᓕᖅᑐᖅ ᓄᓇᕘᒥ ᐊᕐᕌᒍᓄᑦ ᑕᓪᓕᒪᓄᑦ (5). ᑭᖕᖓᕐᓃᓯᒪᓕᖅᑐᖅ ᐊᕐᕌᒍᒐᓚᓐᓂᒃ.

[266] ᐋᓐᓂᐊᓯᐅᖅᑎ A ᐅᖃᕆᐊᓚᐅᖅᑐᖅ ᓄᓇᓕᓐᓂ ᐋᓐᓂᐊᓯᐅᑎᐅᔪᑦ ᓲᕐᓗ ᑖᓐᓇᑎᑐᑦ ᐋᓐᓂᐊᓯᐅᖅᑎᑑᕙᒻᒪᑕ ᓄᓇᓕᓐᓂ. ᐋᓐᓂᐊᔪᒥᑦ ᐊᓯᐊᒍᑦ ᑲᒪᒋᔭᐅᒋᐊᖃᖅᑐᖃᓕᖅᐸᑦ, ᐋᓐᓂᐊᓯᐅᖅᑎ ᑐᑭᓯᒋᐊᕋᔭᖅᑐᖅ ᓗᑦᑖᒧᑦ ᐃᖃᓗᓐᓃᑦᑐᒥᑦ, ᐊᒻᒪ ᑕᐃᒫᖑᓐᓂᖅᐸᑦ ᑭᓯᐊᓂ, ᐋᓐᓂᐊᔪᖅ ᖃᖓᑕᓲᒃᑯᑦ ᐃᖃᓗᓐᓅᖅᑕᐅᒐᔭᖅᑐᖅ ᐅᕝᕙᓘᓐᓃᑦ ᐊᓯᐊᓄᑦ ᐋᓐᓂᐊᓯᐅᖅᑎᓄᑦ (ᐋᓐᓂᐊᔪᓕᕆᔨᓄᑦ ᐊᐅᓪᓚᖅᑎᑕᐅᓗᓂ – ᖃᖓᑕᓲᒃᑯᑦ ᑐᐊᕕᕐᓇᖅᑐᓕᕆᔨᓄᑦ) ᐅᕝᕙᓘᓐᓃᑦ ᖃᖓᑕᓲᖅᑕᖃᓕᖅᐸᑦ ᖃᐅᑕᒫᖅᑐᖅᓯᐅᑎᒥᑦ, ᒪᓕᑦᑕᐅᓗᓂ ᖃᓄᐃᓐᓂᖓ ᐋᓐᓂᐊᔫᑉ. ᐋᓐᓂᐊᕕᒻᒥ ᖃᐅᔨᓴᕈᓐᓇᖏᑦᑐᑦ ᓲᕐᓗ ᑎᒥᐅᑉ ᐃᓗᐊᓂᑦ ᖃᐅᔨᓴᐅᑎᓄᑦ, ᐊᒻᒪ ᑭᓯᐊᓂ ᐊᔾᔨᓕᐅᕆᔪᓐᓇᖅᑐᑎᒃ ᐃᓚᐃᓐᓇᖏᓐᓂᑦ ᑎᒥᐅᑉ ᐃᓗᐊᓃᑦᑐᓂᑦ. ᐅᖃᖅᑐᓂ, ᑭᓪᓕᖃᖅᑐᒻᒪᕆᐅᒻᒪᑕ ᐋᓐᓂᐊᔪᓕᕆᓂᕐᒧᑦ ᐃᑲᔫᑎᑦᓴᑦ ᑭᖕᖓᕐᓂ.

[267] ᐋᓐᓂᐊᓯᐅᖅᑎ A ᐅᖃᓚᐅᖅᑐᖅ ᐋᓐᓂᐊᓯᐅᖅᑏᑦ ᐅᐸᒐᓱᖕᖏᓯᐊᕐᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᔭᐅᒪᕕᖏᓐᓄᑦ ᖃᐅᔨᓴᕆᐊᕐᓗᑎᒃ ᐋᓐᓂᐊᔪᓂᑦ, ᐊᓯᐊᒍᑦ ᐸᓖᓯᓄᑦ ᑭᓇᒥᒃ ᐋᓐᓂᐊᕕᒻᒨᕈᔾᔨᕙᒃᑲᓗᐊᕋᒥᒃ. ᐅᖃᕆᐊᓚᐅᖅᑐᖅ, "[ᑭᓯᐊᓂ] ᐃᓱᒪᕐᓱᕐᒥᔪᒍᑦ ᐅᐸᒍᒻᒪᓐᓂᕈᑦᑕ ᐅᐸᒍᒪᖏᑯᑦᑕᓘᓐᓃᑦ – ᐊᒻᒪ ᑕᐃᑯᓐᖓᕈᑦᑕ ᐊᒻᒪ ᖃᐅᔨᒍᑦᑕ ᑲᒪᒋᔭᐅᒃᑲᓐᓂᕆᐊᖃᕐᓂᖏᓐᓂᑦ, ᐊᓱᐃᓪᓛᒃ ᑕᑲᓄᖕᖓᐅᑎᓕᖅᐸᑦᑕᕗᑦ [ᐋᓐᓂᐊᕕᒻᒧᑦ]."

[268] ᐱᔾᔪᑎᖃᖅᑐᓂ ᐅᓐᓅᔪᒥᑦ ᐊᐱᖅᑯᑎᐅᔪᒥᑦ, ᐋᓐᓂᐊᓯᐅᖅᑎ A ᐅᖃᓚᐅᖅᑐᖅ ᐅᖄᓚᕕᐅᓐᓂᕋᒥ ᑭᐅᔨᓂᑦ ᑐᑦᓯᕋᖅᑐᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᐅᐸᖁᔭᐅᓗᓂ ᑎᒍᔭᐅᒪᕕᒻᒧᑦ ᖃᐅᔨᓴᕆᐊᖁᔭᐅᓗᓂ ᐋᓐᓂᐊᔪᒥᑦ. ᐅᖄᓚᕕᐅᕋᑖᑦᓯᐊᑎᓪᓗᒍ ᐊᓈᓇᒋᔭᐅᔪᒥᑦ ᕿᑐᕐᖓᒥᓂᒃ ᓈᒃᑯᑦ ᐋᓐᓂᐊᓂᕋᐃᔪᒥᑦ; ᐋᓐᓂᐊᓯᐅᖅᑎ A ᐅᐸᑉᐸᓪᓕᐊᓕᓚᐅᖅᑐᖅ ᐋᓐᓂᐊᕕᒻᒨᐸᓪᓕᐊᓗᓂ ᑕᑯᓂᐊᖅᑐᓂᐅᒃ ᓱᕈᓯᖅ, ᐅᖃᐅᔾᔪᐃᓕᓚᐅᖅᑐᖅ ᑭᐅᔨᒥᑦ ᑕᑯᓂᐊᕈᒪᑐᐃᓐᓇᑦᓯᐊᕐᓂᐊᕋᒥᐅᒃ ᐋᓐᓂᐊᔪᖅ ᑎᒍᔭᐅᒪᕕᓐᓃᑦᑐᖅ ᐱᔭᕇᓚᐅᕐᓗᓂᐅᒃ ᐊᓯᐊ ᐋᓐᓂᐊᔪᖅ. ᑭᐅᔨᐅᔪᖅ ᑭᐅᓂᕋᖅᑕᐅᓚᐅᖅᑐᖅ, "ᐊᓱ, ᖃᓄᕐᓕᑭᐊᖅ ᐊᑐᐊᒐᓯ," ᐋᓐᓂᐊᓯᐅᖅᑎ A ᑭᐅᓕᖅᑐᒥᓂᖅ, "ᐊᓱ, ᐅᐱᓐᓇᕋᓂ [A.B.] ᐊᑦᑕᓇᖅᑐᒦᖏᒻᒪᑦ, ᑕᐃᒪᐃᓕᖓᒍᓐᓇᕈᓂ – ᐱᔭᕇᑐᐊᕈᒪ, ᑕᑉᐸᐅᖓᕐᓂᐊᑐᑦᓴᐅᕗᖓ." ᐅᖃᓚᐅᕐᒥᔪᖅ ᖃᐅᔨᒋᐊᕐᓂᐊᕐᓂᕋᖅᑐᓂ ᐸᓖᓯᓂᑦ ᖃᐅᔨᒋᐊᕐᓗᓂ ᖃᓄᒃᑲᓐᓂᖅ ᑐᑭᓯᒋᐊᕈᓐᓇᕐᒪᖔᖅ ᖃᐅᔨᒪᒋᐊᓕᒻᒥᓂᒃ ᐅᐸᓚᐅᖏᓂᕐᒥᓂ.

[269] ᐋᓐᓂᐊᓯᐅᖅᑎ A ᐱᔭᕇᓚᐅᖅᑐᖅ ᓱᕈᓯᕐᒥᒃ ᐋᓐᓂᐊᔪᒥᑦ ᐅᓐᓄᐊᒃᑯᑦ 1:15-ᑎᓪᓗᒍ. ᐅᖄᓚᓚᐅᖅᑑᒐᓗᐊᖅ ᐅᖃᖃᑎᒋᓂᐊᕋᒥᐅᒃ ᐸᓖᓯ ᑭᓯᐊᓂ, ᐱᔭᑦᓴᓕᒻᒪᕆᐅᓚᐅᕐᒪᑕ ᑕᐃᑲᓂ ᐅᓐᓅᑎᓪᓗᒍ, ᐅᖄᓚᕕᐅᒃᑲᓐᓂᓚᐅᖏᑦᑐᖅ ᓯᕿᖕᖑᔭᖅ 1:40 ᐅᖄᓚᕕᐅᓕᑕᐃᓐᓇᖅᑐᓂ. ᐃᓯᓕᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓐᓄᑦ 1:45 ᐅᓐᓄᐊᒃᑯᑦ. ᐃᑲᕐᕋᖅ ᐊᑕᐅᓯᖅ (1) ᐊᒻᒪ ᐃᑲᕐᕋᑲᓴᒃ ᐊᓂᒍᕐᓯᒪᓕᓚᐅᖅᑐᖅ A.B. ᐱᒋᐊᖅᑕᐅᓚᐅᖅᑎᓪᓗᒍ.  

[270] ᑕᑯᓐᓇᑐᐃᓐᓇᖅᑐᓂ A.B.-ᒥᑦ, ᓇᓗᓇᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐋᓐᓂᐊᔪᓕᕆᔭᐅᒋᐊᖃᓚᐅᕐᓂᖓᓄᑦ ᐊᒻᒪ ᑲᒪᒋᔭᐅᓗᓂ. ᐅᐊᑦᓯᐅᔫᑉ ᐅᖃᐅᑎᓯᒪᓚᐅᕐᒥᔭᖏᑦ ᖃᓄᐃᓕᐅᖅᑐᖃᓚᐅᕐᒪᖔᖅ. ᐃᓗᓯᓕᕆᓂᒃᑯᑦ ᐊᑐᖅᑕᑑᔪᓐᓇᓚᐅᖅᑐᖅ ᖃᐅᔨᓴᖅᑕᐅᓗᓂ ᑭᓯᐊᓂ ᐃᓚᖓᓐᓄᑦ ᓄᓇᓕᓐᓂ ᐋᓐᓂᐊᓯᐅᑎᓄᑦ. ᑕᒪᓐᓇ ᐊᑐᖅᑕᐅᒐᔪᑦᑑᒐᓗᐊᖅ ᐋᓐᓂᐊᕕᒻᒥ, ᑭᓪᓕᖃᖅᑐᓂᑦ ᖃᐅᔨᓴᐅᑎᖃᖅᑐᒥ ᐊᒻᒪ ᒪᒥᓴᐅᑎᖃᖅᑐᒥᑦ ᐊᒥᓲᖏᑦᑐᓂᑦ.

[271] ᐱᔾᔪᑎᒋᓪᓗᒍ A.B. ᓱᓕ ᖃᓄᐃᓕᐅᕐᓂᐊᓕᕐᒪᖔᖅ ᖃᐅᔨᒪᓇᒍ ᐱᐅᓯᖃᕐᒪᑦ, ᓵᔨᓐ ᒋᐅᓪ ᐋᓐᓂᐊᓯᐅᖅᑎᒥᑦ ᐸᓖᓯᒃᑯᓐᓅᖔᖁᓕᓚᐅᖅᑕᖓ A.B. ᐋᓐᓂᐊᕕᓕᐊᕈᑎᖕᖏᖔᖅᑐᓂᐅᒃ. ᖃᐅᔨᓴᖅᑏᑦ ᑕᒪᑦᓱᒥᖓ ᓈᒻᒪᓐᓂᕋᐃᔪᑦ ᐊᑐᖅᑕᐅᓕᓚᐅᖅᑐᒥᑦ ᐱᔾᔪᑎᒋᓪᓗᒍ ᖃᓄᐃᓕᖓᒍᑎᐅᔪᖅ. ᓇᓗᓇᐃᔭᐃᑎᐅᔪᑦ ᑕᑯᑦᓴᐅᑎᑦᓯᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᖄᓚᑦᑕᐅᑎᒋᓚᐅᖅᑐᑦ ᐋᓐᓂᐊᔪᓕᕆᔨᓂᑦ ᐃᑲᔪᕆᐊᖅᑕᐅᒍᒪᓪᓗᑎᒃ A.B. ᐱᒋᐊᖅᑕᐅᓚᐅᖅᑎᓪᓗᒍ. A.B. ᖃᐅᔨᓴᖅᑕᐅᓂᐊᓚᐅᖅᑐᖅ ᐋᓐᓂᐊᓯᐅᖅᑎᒧᑦ ᑎᒍᔭᐅᒪᕕᒻᒦᒃᑲᓗᐊᖅᐸᑦ ᐅᕝᕙᓘᓐᓃᑦ ᐋᓐᓂᐊᓯᐅᖅᑎᑯᓐᓅᕈᔾᔭᐅᓗᓂ. ᐃᓱᒪᒋᓪᓗᒋᑦ ᐱᔭᖅᑯᖅᑐᓵᖅᑲᐅᓂᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᐅᓚᑦᑎᓇᓱᐊᖅᑐᑎᒃ A.B.-ᒥᑦ ᑎᒍᔭᐅᒐᓱᐊᖅᑎᓪᓗᒍ ᐊᒻᒪ ᐱᓕᕆᔾᔪᑎᐅᑎᓪᓗᒍ ᐸᓖᓯᒃᑯᓐᓂ, ᐊᒻᒪ ᐱᔾᔪᑎᒋᓪᓗᒍ ᓱᓕ ᓂᖕᖓᑦᓯᒪᓂᖓ ᐊᒻᒪ ᐋᖓᔮᓪᓗᐊᕐᓂᖓ ᐱᒋᐊᖅᑕᐅᓚᐅᖅᑎᓪᓗᒍ, ᓈᒻᒪᓚᐅᖅᑐᖅ ᑎᒍᔭᐅᒪᕕᒻᒦᖏᓐᓇᑎᓪᓗᒍ ᐊᒻᒪ ᐋᓐᓂᐊᓯᐅᖅᑎᒧᑦ ᐅᐸᑦᑕᐅᖔᕐᓗᓂ.

[272] ᐃᑲᕐᕋᑲᓵᓐᓂᒃ ᒪᕐᕉᓐᓂᒃ (ᐃᑲᕐᕌᒃ ᒪᕐᕉᒃ (2) ᐊᒻᒪ 45 ᒪᓇᑦᓯ) ᐊᓂᒍᕐᓯᒪᓕᖅᑎᓪᓗᒍ ᖃᓄᐃᒍᑎᖃᕐᓂᐅᔪᖅ ᐊᒻᒪ ᐋᓐᓂᐊᓯᐅᖅᑎ ᑎᒍᔭᐅᒪᕕᒻᒨᓕᑕᐃᓐᓇᑎᓐᓄᒍ ᓈᒻᒪᓚᐅᖏᑦᑐᖅ, ᐱᔾᔪᑎᒋᓪᓗᒍ A.B. ᐊᑦᓱᑲᓪᓚᒃ ᐋᓐᓂᑎᖅᑕᐅᓯᒪᑎᓪᓗᒍ. ᑕᒪᓐᓇ ᐅᖃᐅᓯᕆᓪᓗᒍ, ᐋᓐᓂᐊᓯᐅᖅᑎ A ᐋᓐᓂᐊᓯᐅᖅᑎᑑᓚᐅᕋᒥ ᑕᐃᑲᓂ ᐅᓐᓅᑎᓪᓗᒍ ᐅᖄᓚᕕᐅᒍᓐᓇᖅᑐᓂ, ᐊᒻᒪ ᐅᖄᓚᕕᐅᓯᒪᓚᐅᕐᒥᒐᒥ ᐱᔾᔪᑎᖃᖅᑐᒥᑦ ᖃᓂᒪᔪᒥᑦ ᓱᕈᓯᕐᒥᑦ ᓯᕗᓂᐊᓂ ᐅᖄᓚᕕᐅᓚᐅᕋᓂ ᐱᔾᔪᑎᐅᓗᓂ A.B. ᐅᖓᑖᓃᑦᑐᖅ ᖃᐅᔨᓴᖅᑏᑦ ᐱᓕᕆᔾᔪᑎᖏᑕ ᖃᐅᔨᓵᖃᕐᓂᒃᑯᑦ ᖃᓄᖅ ᐃᓗᓯᓕᕆᓂᕐᒥᑦ ᐱᓕᕆᔨᒻᒪᕆᐅᔪᑦ ᐃᓱᒪᓕᐅᕆᔾᔪᑎᓂᑦ ᐋᖅᑭᑦᓱᐃᕙᒻᒪᖔᑕ ᐱᔨᑦᓯᕋᐅᑎᓂᑦ ᐱᔾᔪᑎᖃᖅᑐᑎᒃ.

[273] ᐅᐸᓚᐅᖅᑎᓐᓇᒍ, ᑭᓯᐊᓂ, ᑕᑯᑦᓴᐅᔪᖅ ᐅᐊᑦᓯᐅᔪᖅ ᐅᕝᕙᓘᓐᓃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᓄᑐᐃᓐᓇᖅ ᐃᑲᔪᕋᓱᓐᓂᖏᑦᑐᑦ A.B.-ᒥᑦ. ᐃᑲᔪᕋᓱᒋᐊᓕᒥᓂᐅᒐᓗᐊᑦ, ᐅᓗᕆᐊᓇᖏᑐᒃᑯᑦ ᐱᓇᓱᒍᓐᓇᕐᓂᕈᑎᒃ.

ᐋᓐᓂᐊᓯᐅᖅᑎ ᐅᐸᑦᑐᖅ ᑎᒍᔭᐅᒪᕕᒻᒧᑦ ᖃᐅᔨᓴᕆᐊᖅᑐᖅᑐᓂᐅᒃ A A.B.

[274] ᐋᓐᓂᐊᓯᐅᖅᑎ A ᐅᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓂᑦ, ᐅᐸᒃᑲᒥ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ, ᑕᑯᓚᐅᖅᑕᖓ A.B. ᐃᑦᓯᕙᐅᑕᒦᑦᑎᓪᓗᒍ ᑎᒍᔭᐅᒪᕕᒻᒥ, ᓇᓚᔪᖅ ᐃᒧᖅᑲᓪᓗᓂ ᑕᓕᖅᐱᒥᓂᒃ ᖃᓪᓕᕌᖅᑐᓂ. ᑎᒍᔭᐅᒪᕕᐅᑉ ᐃᓗᐊ ᐊᐅᖏᓐᓇᐅᓚᐅᖅᑐᖅ ᐊᒻᒪ ᐃᑎᕈᐃᓐᓇᐅᓗᓂ ᓇᑎᖓ.

[275] ᓯᕗᓂᐊᒍᑦ ᑎᒍᔭᐅᒪᕕᒻᒨᓚᐅᕋᓂ, ᐋᓐᓂᐊᓯᐅᖅᑎ A ᖃᐅᔨᓴᖅᑐᒥᓂᖅ A.B. ᑲᐱᔭᐅᔾᔪᑎᖏᓐᓄᑦ ᓇᓗᓇᐃᔭᐃᑎᖏᓐᓂᑦ ᐊᒻᒪ ᖃᐅᔨᓚᐅᖅᑐᖅ ᑲᐴᖅᑕᐅᒋᐊᖃᓕᕐᓂᖓᓄᑦ ᐋᓐᓂᐊᓕᔾᔭᐃᒃᑯᑎᒧᑦ ᑮᓇᐅᓐᓂᕈᓂ. ᑭᓇᐅᓂᕐᒥᓂᒃ ᓇᓗᓇᐃᓚᐅᖅᑐᓂ A.B.-ᒧᑦ ᐊᒻᒪ ᐅᖃᐅᑎᓪᓗᓂᐅᒃ ᖃᐅᔨᓴᕐᓂᐊᕐᒪᒋᑦ ᐋᓐᓂᖅᑕᐅᓂᖏᑦ, ᐅᖃᐅᑎᓚᐅᖅᑐᖓ ᑲᐴᕐᓂᐊᓂᕐᒥᓂᐅᒃ ᐋᓐᓂᐊᓕᔾᔭᐃᒃᑯᑎᒧᑦ ᑮᓇᐅᓐᓂᕈᓂ. ᐊᓱᐃᓪᓛᒃ ᑲᐱᓕᓚᐅᖅᑕᖓ ᐋᓐᓂᐊᓕᔾᔭᐃᒃᑯᑎᒧᑦ. ᐋᓐᓂᐊᓯᐅᖅᑎ A ᐅᖃᐅᔾᔨᓕᖅᑐᒥᓂᖅ A.B.-ᒥᑦ ᐅᐊᓴᖅᐸᓪᓕᐊᓂᐊᓕᕋᒥᒋᑦ ᑮᓇᖓᓂ ᑭᓕᕐᓯᒪᓂᖏᑦ ᑕᑯᔪᒪᒐᒥ ᓇᑭᑦ ᐊᐅᓐᓈᕐᒪᖔᑕ. ᑕᑯᓚᐅᖅᑐᖅ ᑮᓇᖓ ᓇᐅᒃᑯᑐᐃᓐᓇᖅ ᐳᕕᑦᑐᑲᓪᓚᐅᑎᓪᓗᒍ.

[276] ᐋᓐᓂᐊᓯᐅᖅᑎ A ᓴᓗᒻᒪᕐᓴᐃᒐᓱᓚᐅᖅᑐᖅ ᓴᐅᒥᐊᓂᑦ A.B. ᑮᓇᖓᑕ, ᐊᒻᒪ ᐊᐱᕆᒐᐃᒐᒥᐅᒃ ᑕᓕᖅᐱᐊᓂᑦ ᓴᓗᒻᒪᕐᓴᕈᒪᓂᕋᖅᑐᓂᐅᒃ (ᓇᓚᕕᒋᓚᐅᖅᑕᖓᓂᒃ) A.B. ᕿᒫᒋᐊᖅᐸᓚᐅᖅᑐᖅ. ᑮᓇᓕᒫᖓ ᑕᑯᔪᓐᓇᕐᓯᒐᒥᐅᒃ, ᑕᑯᓚᐅᖅᑕᖓ ᖃᓂᐊᒍᑦ ᐳᓪᓕᕐᓯᒪᓪᓗᐊᑎᓪᓗᒍ. ᐊᐱᕆᒐᒥᐅᒃ ᖃᓂᐊᑕ ᐃᓗᐊ ᖃᐅᔨᓴᕈᒪᓪᓗᓂᐅᒃ ᐊᑦᓵᖁᓪᓗᒍ; ᑭᐅᓗᓂ, A.B. ᕿᑎᖅᑎᒻᒥᓄᑦ ᑎᒃᑯᐊᓚᐅᖅᑕᖓ ᑕᒪᒃᑮᓐᓄᑦ ᐊᒡᒐᒻᒥᓄᑦ ᐊᒻᒪ ᐅᖃᖅᑐᓂ, "ᐊᑦᓴᔾᔮᖏᓪᓚᕆᑦᑐᖓ," ᓂᐱᖃᖅᑐᓂ ᐋᓐᓂᐊᓯᐅᖅᑎ A ᓇᓗᓇᐃᓚᐅᖅᑕᖓᒍᑦ "ᐱᐅᖏᑐᓪᓚᕆᕝᕙᓘᓗᓂ ᖃᑎᑐᓪᓗᓂ ᓂᐱᖓ." A.B. ᒥᓯᓕᖅᑐᒥᓂᖅ ᓇᖏᕐᓯᓪᓗᓂ ᐊᒡᒐᖏᒃ ᐊᒻᒪ ᑕᓕᖏᑦ ᓂᖕᖓᐅᑎᓂᐊᖅᑐᑎᑐᑦ ᐃᓵᖓᓪᓗᓂᒋᑦ. ᒫᓐᓇᓕ, ᑳᓐᔅᑕᐳᓪ ᓯᒥᖦ, ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᓯᓚᑖᓃᑦᑐᓂ, ᐅᖃᖅᑐᖅ, "ᓱᓇᒃᑯᑖᑎᑦ ᓄᐊᒋᐊᖃᓯᕙᓪᓚᐃᔭᑎᑦ." ᐋᓐᓂᐊᓯᐅᖅᑎ A ᓄᐊᑦᓯᓚᐅᖅᑐᓂ ᐊᓂᓕᓚᐅᖅᑐᖅ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᒃ. A.B. ᒥᓯᓚᐅᖅᑐᖅ ᒥᑦᓵᓄᑦ ᐊᕐᓇᐅᑉ ᐊᒻᒪ "ᐱᓪᓕᖅᑐᓂ" ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᒪᑐᐊᓂᑦ.

[277] ᐋᓐᓂᐊᓯᐅᖅᑎ A ᐅᖃᓚᐅᖅᑐᖅ, 15 ᒪᓇᑦᓯᐅᔪᓂᑦ, A.B. ᐅᖃᓕᒪᑐᐃᓐᓇᓚᐅᖅᑐᖅ ᓱᖅᑯᐃᕋᑦᓴᐅᒐᓂ "ᐱᐅᖏᑐᓪᓚᕆᕝᕙᓘᓗᓂ ᖃᑎᑐᓪᓗᓂ ᓂᐱᖓ," ᐅᓪᓚᑦᓴᕋᑦᑐᓂ ᐅᑎᖅᑎᕋᐅᔭᖅᑐᓂ ᐃᓪᓗᕈᓯᐅᑉ ᐃᓗᐊᓂ, ᑎᓪᓗᐊᓗᓂ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᒪᑐᐊᓂᑦ. ᐅᖃᓚᐅᖅᑐᖅ ᐊᔾᔨᖃᓚᐅᖏᒋᐊᖓ ᐊᑐᓚᐅᕐᓯᒪᔭᖏᓐᓂᑦ. ᓯᕗᓂᐊᒍᑦ ᖃᓄᐃᓕᐅᖃᑎᖃᕐᓯᒪᒐᓗᐊᕋᒥ A.B.-ᒥᑦ, ᓂᐱᖃᓗᐊᕌᓗᑉᐸᖏᑦᑐᖅ ᐅᖃᓕᒪᓲᖑᓪᓗᓂ ᐅᖃᓗᒐᓚᑦᑐᓂ. ᑭᓯᐊᓂᓕ, ᑕᐃᑲᓂ ᐅᓐᓅᑎᓪᓗᒍ, "ᐊᑦᓱᐊᓗᒃ ᑲᑉᐱᐊᒋᓚᐅᖅᑕᖓ." ᐅᖃᓚᐅᖅᑐᖅ ᐋᓐᓂᖅᑕᐅᒐᔭᖅᑐᒥᓂᐅᓂᕐᒥᓄᑦ ᐃᓪᓗᕈᓯᕐᒦᑐᐃᓐᓇᓚᐅᕈᓂ ᑎᒍᔭᐅᒪᕕᒻᒥ ᐊᑯᓂᐅᓂᕐᓴᖅ ᐃᓯᕐᓯᒪᓚᐅᕋᒥᓂᒃ. ᐋᓐᓂᐊᓯᐅᖅᑎ A ᖃᐅᔨᒪᖁᔨᓚᐅᕐᒥᔪᖅ, ᐱᔾᔪᑎᒋᓪᓗᒍ ᐱᐅᓯᕆᓚᐅᖅᑕᖓ ᑕᑯᓐᓇᖅᑕᖓ A.B., ᓇᓗᓇᓚᐅᖅᑐᖅ ᓇᓪᓕᖏᑦ ᐋᓐᓂᕐᓯᒪᓂᖏᓐᓂᑦ ᑎᑎᕋᖅᑕᐅᓚᐅᕐᒪᖔᑕ ᐋᓐᓂᐊᓯᐅᕐᕕᒻᒥ ᖃᐅᑉᐸᖓᑕ ᐅᓐᓄᖓᓂ ᐱᒋᐊᖅᑕᐅᑎᓪᓗᒍ ᐃᖕᒥᓂᒃ ᐋᓐᓂᕐᓯᒪᓐᓂᕐᒪᖔᒋᓪᓘᓐᓃᑦ ᐃᓪᓗᕈᓯᕐᒦᑎᓪᓗᒍ ᑎᒍᔭᐅᒪᕕᒻᒥ.

[278] ᐊᓂᓚᐅᖅᑎᓪᓗᒍ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᑦ, ᐋᓐᓂᐊᓯᐅᖅᑎ A ᐅᖃᓚᐅᖅᑐᖅ ᑳᓐᔅᑕᐳᓪ ᓯᑑᕐᔾᒧᑦ "ᖃᐅᔨᓴᑦᓯᐊᒐᓛᖅᑲᐅᖏᒻᒪᒍ" A.B.-ᒥᑦ, ᓈᓚᒍᓐᓇᖅᑲᐅᖏᒻᒪᒍ ᓴᕝᕕᖓ, ᑕᑯᓂᐊᕈᓐᓇᕐᓇᒋᑦ ᓯᐅᑎᖏᒃ, ᖃᐅᔨᓴᕈᓐᓇᕐᓇᒋᒃ ᐃᔨᖏᒃ, ᐅᕝᕙᓘᓐᓃᑦ ᐊᑦᑐᐊᓗᒋᑦ ᖃᐅᔨᓴᕈᓐᓇᕐᓴᒋᑦ ᐋᓐᓂᖅᑕᐅᓯᒪᓂᖏᑦ. ᐅᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒧᑦ, A.B. ᐋᖓᔮᕈᓐᓃᑐᐊᕐᒪᑦ ᐊᒻᒪ ᖃᐅᔨᒪᑦᑎᐊᓕᖅᑐᓂ, ᖃᐃᓛᖁᔭᐅᓯᒪᓚᐅᖅᑐᖅ ᐋᓐᓂᐊᓯᐅᕐᕕᒻᒧᑦ ᖃᐅᔨᓴᖅᑕᐅᒍᒪᓚᐅᕋᒥ ᓈᒪᔪᒥᑦ "ᓇᓗᓇᐃᕈᒪᓪᓗᑎᒃ ᐱᑕᖃᒃᑲᓂᖕᖏᒃᑲᓗᐊᕐᒪᖔ ᐊᓯᐊᓂᑦ ᐊᑦᓱᐊᓘᖅᑐᒥᑦ" ᐊᒻᒪ ᐅᖃᖃᑕᐅᓗᓂ ᐅᖃᐅᔾᔨᔪᓐᓇᕋᔭᕐᒪᑦ ᐋᓐᓂᖅᑕᐅᓯᒪᓂᖏᑦ ᐱᔾᔪᑎᒋᓪᓗᒋᑦ ᐊᑲᐅᖏᓕᐅᕈᑎᖃᕐᒪᖔᖅ ᓇᐅᒃᑯᑐᐃᓐᓇᖅ. ᐋᓐᓂᐊᓯᐅᖅᑎ A ᐅᖃᒃᑲᓐᓂᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᐊᖏᖃᑎᖃᓚᐅᕐᒪᑦ ᐸᕐᓇᐅᑕᐅᔪᒥᑦ ᖃᓄᐃᓕᐅᕐᓂᐊᕐᓂᖏᓐᓂᑦ.

[279] ᐋᓐᓂᐊᓯᐅᖅᑎ A ᐅᖃᕆᐊᒃᑲᓐᓂᓚᐅᖅᑐᖅ, ᖃᓄᐃᓕᖓᒐᓗᐊᕈᓂ, A.B. ᐊᑦᑕᓇᓗᐊᓚᐅᖅᑐᖅ ᓇᒧᖕᖓᐅᔾᔭᐅᓚᓱᒃᑲᓗᐊᕈᓂ ᐋᖓᔮᖅᑎᓪᓗᒍ. ᓯᓂᑦᑎᑕᐅᓯᒪᓗᓂ ᑭᓯᐊᓂᐅᓚᐅᖅᑐᖅ "ᐄᔭᕋᖅᑎᑕᐅᓯᒪᓗᓂ" ᖃᖓᑕᓲᒃᑰᕐᓂᐊᕈᓂ.

[280] ᖃᐅᔨᓴᖅᑏᑦ ᖃᐅᔨᓴᖅᑎᖓ ᐊᐱᕆᓕᓚᐅᖅᑐᖅ ᐋᓐᓂᐊᓯᐅᖅᑎ A-ᒥᑦ, "ᑕᐃᒫᖑᓚᐅᖅᑐᖅ ᑭᓯᐊᓂ ᐅᖃᖃᑎᒋᓪᓗᒍ [ᑳᓐᔅᑕᐳᓪ ᓯᑑᕐᔾ] ᐃᓯᒪᒋᓚᐅᕋᕕᐅᒃ [A.B.] ᖃᓄᐃᓚᐅᖏᒋᐊᖓᓄᑦ ᑎᒍᔭᐅᒪᑎᓪᓗᒍ? ᐊᓂᑎᑕᐅᒋᐊᑐᓚᐅᖏᑦᑐᖅ ᑐᐊᕕᕐᓇᑐᒃᑯᑦ, ᐊᓯᐊᒍᑦ ᐅᖃᖅᑐᓂ?" ᐋᓐᓂᐊᓯᐅᖅᑎ A ᑭᐅᓚᐅᖅᑐᖅ, "ᐄᖕ. ᐋᒡᒐ." ᐅᖃᒃᑲᓐᓂᓚᐅᖅᑐᖅ ᐅᓗᕆᐊᓇᖅᑐᒦᒐᔭᕐᓂᕐᒥᓄᑦ A.B. ᐊᐃᑉᐸᕆᓗᒍ ᐋᓐᓂᐊᓯᐅᕐᕕᒻᒧᑦ ᑕᐃᒪᐃᓕᖓᑎᓗᒍ, ᐊᒻᒪ ᓇᔪᒻᒥᔭᐅᓗᓂ ᑭᓯᐊᓂᐅᒐᔭᕐᓂᖅᑐᓂ, ᑕᕝᕘᓇ ᐋᓐᓂᑐᐃᓐᓇᕆᐊᖃᕐᒪᑦ ᐊᑦᓱᑲᓐᓂᐅᓂᕐᓴᖅ, ᐃᓱᒪᒋᓪᓗᒍ ᓂᖕᖓᐅᒪᔪᒻᒪᕆᐅᓚᐅᕐᓂᖓ ᑕᐃᑦᓱᒪᓂ.

[281] ᑎᑎᕋᕐᓯᒪᔪᑦ ᐋᓐᓂᐊᓯᐅᖅᑎ A ᐱᓕᕆᐊᒥᓂᕐᓂᒃ ᑎᑎᖅᑲᓂ ᐱᔾᔪᑎᖃᖅᑐᓂᑦ ᖃᐅᔨᓴᕐᓂᒥᓂᖓᓂᑦ A. B.-ᒥᑦ ᖃᓄᐃᓕᖓᓂᒥᓂᖓᓂᑦ ᐊᑑᑎᖃᕐᓂᖏᓐᓂᑦ:

• - [A. B.] ᐋᖓᔮᓚᐅᖅᑐᖅ ᐊᒻᒪ ᒪᓕᒐᕐᓂᑦ ᓱᕋᐃᔾᔪᑎᐅᔪᓄᑦ ᐋᖓᔮᕐᓇᖅᑐᖅᓯᒪᓪᓗᓂ
• - ᐳᕙᖏᒃ ᖃᓄᐃᕝᕙᓗᖕᖐᑦᑑᒃ ᐊᓂᖅᑎᕆᑦᑎᐊᖅᑐᖅ
• - ᑎᓪᓘᔭᖅᑐᖅ ᐊᒻᒪ ᐳᓪᓕᐸᓪᓕᐊᔪᖅ ᑕᓕᖅᐱᐊ ᐃᔨᖏᑕ, ᓴᐅᒥᐊ ᓯᐅᑎᖏᑕ, ᑕᓕᖅᐱᐊ ᐅᓗᐊᖏᑕ
• - ᐊᐅᓈᕈᓐᓃᖅᑐᖅ ᑭᓯᐊᓂ ᐊᐅᖏᓐᓇ ᐸᓂᕐᓂᑯᒥᑦ
• - ᑎᓪᓘᔭᓚᐅᖅᑑᒃ ᖃᓂᐊᑕ ᓯᓚᑎᖏᒃ
• - ᓂᐊᖁᐊᒍᑦ ᑭᓕᕐᓯᒪᓚᐅᖏᑦᑐᖅ
• - ᓈᔭᐅᓚᐅᖏᑦᑐᑦ ᖃᐅᔨᓴᖅᑕᐅᒍᒪᔫᒐᓗᐊᑦ ᐱᔾᔪᑎᐅᓗᓂ [A. B.] ᓂᓐᖓᐅᒪᓪᓗᓂ ᐱᐅᓯᖃᕐᓂᖓᓄᑦ

[282] ᖃᐅᔨᓴᖅᑏᑦ ᕿᒥᕐᕈᐊᓚᐅᖅᑐᑦ ᐊᐅᓚᔫᒥᑦ ᐊᔾᔨᓕᐅᖅᑕᐅᓯᒪᔪᒥᑦ ᐋᓐᓂᐊᓯᐅᖅᑎ A ᐅᐸᑦᓯᒪᑎᓪᓗᒍ A.B.-ᒥᑦ, ᐊᒻᒪ ᐊᔾᔨᒋᓪᓗᓂᒋᑦ ᐋᓐᓂᐊᓯᐅᖅᑎ A ᐅᖃᐅᓯᖏᓐᓂᑦ. ᐸᓖᓯᒃᑯᓐᓄᑦ ᐅᓂᒃᑳᓕᐊᖑᓯᒪᔪᓂ ᑎᑎᕋᕐᓯᒪᔭᖏᓐᓂᑦ ᑳᓐᔅᑕᐳᓪ ᓯᑑᕐᔾ ᐊᒻᒪ ᑳᓐᔅᑕᐳᓪ ᓯᒥᖦ ᐊᔾᔨᖃᕐᒥᔪᑦ ᐅᖃᐅᓯᕆᓯᒪᔭᖏᓐᓂᑦ ᐋᓐᓂᐊᓯᐅᖅᑎ A. ᐊᐱᕐᓱᑕᐅᓗᓂ ᐋᑐᕚ ᐸᓖᓯᒃᑯᖏᑕ (OPS) ᖃᐅᔨᓴᖅᑎᖏᓐᓄᑦ, ᑳᓐᔅᑕᐳᓪ ᓱᓚᑦ ᐅᖃᐅᓯᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᐱᕆᓚᐅᕐᒪᑕ ᐋᓐᓂᐊᓯᐅᖅᑎ A-ᒥᑦ A.B. ᑎᒍᔭᐅᓯᒪᒍᓐᓇᕐᒪᖔᖅ; ᐅᖃᓚᐅᖅᑐᖅ "ᖃᓄᐃᖏᑦᑐᖅ ᑭᓯᐊᓂ [ᐃᒻᒪᖄ] ᖃᐅᔨᓴᖅᑕᐅᒋᐊᖃᕋᔭᖅᑐᖅ ᖃᐅᑉᐸᑦ ᐋᖓᔮᕈᓐᓃᖅᐸᑦ."

[283] ᐋᓐᓂᐊᓯᐅᖅᑎ A ᖃᐅᔨᓴᕆᐊᖕᖓᓚᐅᖅᑕᖓ A.B. ᐊᒻᒪ ᑭᓪᓕᖃᖅᑐᒥᑦ ᑲᒪᒋᒐᓛᑦᑐᓂᐅᒃ. ᓈᒻᒪᔪᒥᑦ ᖃᐅᔨᓴᕈᓐᓇᓚᐅᖏᑦᑕᖓ ᐅᐱᓐᓇᕋᓂ A.B. ᓂᖕᖓᐅᒪᓕᓚᐅᖅᑐᖅ ᐊᒻᒪ ᐋᓐᓂᐊᓯᐅᖅᑎ A ᐊᓂᒋᐊᖃᓕᖅᑐᓂ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᑦ ᐊᑦᑕᓇᖅᑐᒦᖁᓇᒍ. ᐅᖃᐅᔾᔪᐃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ A.B. ᐋᓐᓂᐊᓯᐅᕐᕕᒻᒨᕆᐊᖃᕐᓂᖓᓄᑦ ᐋᖓᔮᕈᓐᓃᑐᐊᖅᐸᑦ, "ᓇᓗᓇᐃᕐᓯᑦᓯᐊᕈᒪᒐᒥ ᖃᓄᐃᒃᑲᓂᖅᑐᒥᑦ ᐱᑕᖃᖏᒃᑲᓗᐊᕐᒪᖔᖅ ᐱᒻᒪᕆᐅᔪᒥᑦ." ᐱᒻᒪᕆᐅᓗᓂ, ᐋᓐᓂᐊᓯᐅᖅᑎ A ᐃᓱᒪᓚᐅᖏᑦᑐᖅ A.B. ᑐᐊᕕᕐᓇᖅᑐᓕᕆᔭᐅᒋᐊᖃᕐᒪᖔᖅ ᐋᓐᓂᐊᔪᓕᕆᔨᓄᑦ ᑕᐃᑦᓱᒪᓂᐅᑎᓪᓗᒍ. ᐅᖃᐅᔾᔪᐃᓕᕐᓂᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ A.B. ᑎᒍᔭᐅᓯᒪᒐᓗᐊᕈᓂ ᖃᓄᐃᖕᖏᓐᓂᖓᓄᑦ ᖃᐅᔨᓴᖅᑕᐅᑲᓐᓂᓚᐅᖏᓐᓂᖓᓂ. ᖃᐅᔨᓴᖅᑏᑦ ᖃᐅᔨᔪᑦ ᓈᒻᒪᓚᐅᕆᐊᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑕᑎᒋᔭᖃᓚᐅᕐᓂᖏᓐᓄᑦ ᐃᓱᒪᒋᔭᖏᓐᓂᑦ ᐋᓐᓂᐊᓯᐅᖅᑎ A A.B. ᑎᒍᔭᐅᓯᒪᐃᓐᓇᕈᓐᓇᕐᓂᖓᓄᑦ ᐃᓪᓗᕈᓯᕐᓂ ᖃᐅᔨᓴᖅᑕᐅᓚᐅᖏᓐᓂᖓᓂ ᐅᕙᑦᓯᐊᕈᒃᑲᓐᓂᖅ.

A.B. ᐅᓐᓄᐊᓕᒫᖅ ᐃᓪᓗᕈᓯᕐᒦᑦᑐᖅ 3 ᑎᒍᔭᐅᒪᕕᒻᒥ

[284] ᐊᐅᓚᔫᒃᑯᑦ ᐊᔾᔨᐅᓕᕐᓯᒪᔪᒥᑦ ᐃᓪᓗᕈᓯᕐᒥᑦ 3 ᑕᑯᑦᓴᐅᔪᖅ A.B. ᓂᖕᖓᐅᒪᑎᓪᓗᒍ ᐃᒻᒪᖄ 15 ᒪᓇᑦᓯᓄᑦ ᐋᓐᓂᐊᓯᐅᖅᑎ A ᐊᓂᓚᐅᖅᑎᓪᓗᒍ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᑦ. ᑭᖑᓂᐊᒍᑦ, A.B. ᓇᑎᕐᒧᑦ ᓇᓪᓚᖅᑐᓂ ᐊᒻᒪ ᓯᓂᓕᖅᑑᔮᖅᑐᖅ ᐃᑲᕐᕋᐸᓗᒻᒥᑦ, ᐃᖅᑯᒪᓚᐅᖏᓂᕐᒥᓂ ᐊᒻᒪ ᐃᑦᓯᕙᐅᑕᕐᒨᖅᑐᓂ, ᑕᕝᕙᓂ ᓇᓪᓚᑲᓐᓂᖅᑐᓂ ᐊᒻᒪ ᓯᓂᓕᖅᑭᑦᑑᔮᖅᑐᓂ. ᓯᓂᑦᑐᓂ ᕿᑲᕐᓯᓚᐅᖏᑦᑐᖅ ᐃᒻᒪᖄ ᒪᕐᕉᓐᓄᑦ (2) ᐃᑲᕐᕌᓐᓂᒃ ᐊᒻᒪ 45 ᒪᓇᑦᓯᓂᑦ. ᓯᕿᖕᖑᔭᖅ 6:06-ᒪᑦ, ᒪᑭᓚᐅᖅᑐᖅ ᐊᒻᒪ ᑎᓪᓗᑐᖅᑐᓂ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᒪᑐᐊᓄᑦ. ᐅᐊᑦᓯᐅᑉ ᐱᑎᓕᖅᑐᓂᐅᒃ ᐊᑕᐅᓯᐊᕋᓂᐅᒃ ᐃᒥᕐᒥᒃ. A.B. ᓯᓂᓕᖅᑭᓚᐅᖅᑐᖅ ᓯᕿᖕᖑᔭᖅ 7:32-ᒧᓄᑦ, ᐊᐱᕆᕙᓗᑦᑑᔮᖅᑐᓂ ᐊᒻᒪ ᐱᑎᑕᐅᓗᓂ ᕿᐲᓐᓂᒃ.

[285] ᓯᕿᖕᖑᔭᖅ 7:42-ᐸᓗᒻᒥ, ᐃᑦᓯᕙᐅᑕᕐᒥ ᓇᓚᓪᓗᓂ ᓴᓐᓂᖓᓪᓗᓂ, A.B. ᐱᒋᐊᖃᑦᑕᓕᓚᐅᖅᑐᖅ ᓇᑎᕐᒧᑦ. ᒥᕆᐊᒃᑲᓐᓂᓚᐅᖅᑐᖅ ᓯᕿᖕᖑᔭᖅ 8:35-ᐸᓗᒻᒥ; ᒫᓐᓇᓕ ᓯᖅᑯᖅᑐᓚᐅᖅᑐᖅ ᐃᑦᓯᕙᐅᑕᕐᒧᑦ ᐊᔭᑉᐹᖅᑐᓂ. ᓯᕿᖕᖑᔭᖅ 10:08-ᐸᓗᒻᒥ ᐅᓪᓗᒃᑯᑦ, ᒪᑭᓚᐅᖅᑐᖅ ᐊᒻᒪ ᖁᕝᕕᒻᒧᑦ ᒥᕆᐊᕆᐊᖅᑐᖅᑐᓂ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ A.B.-ᒨᕐᓯᓕᓚᐅᖅᑐᖅ ᐊᓐᓄᕌᓂᑦ. A.B. ᓱᓕ ᒥᕆᐊᖅᐸᑦᑐᖅ ᖁᕝᕕᒻᒧᑦ ᐊᑎᓚᐅᕋᓂᒋᑦ ᓄᑖᖅ ᐅᕕᓂᕈᖅ, ᐃᓗᐊᒃ, ᐊᒻᒪ ᖃᓪᓖᒃ. ᓯᕿᖕᖑᔭᖅ 10:15-ᐸᓗᒻᒥ ᐅᓪᓗᒃᑯᑦ, A.B. ᐊᓂᑎᑕᐅᓚᐅᖅᑐᖅ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᑦ ᐊᒻᒪ ᐅᑎᖅᑐᓂ 10:17 ᐅᓪᓗᒃᑯᑦ. ᐊᓂᑎᑕᐅᒃᑲᓐᓂᓕᓚᐅᖅᑐᖅ 10:19 ᐅᓪᓗᒃᑯᑦ; ᑳᓐᔅᑕᐳᓪ ᒫᑦ ᕘᕐᒍᓴᓐ ᐊᒻᒪ ᑳᓐᔅᑕᐳᓪ ᑭᐅᓕᖕ, ᐊᑐᖅᑐᐃᓐᓇᐅᓗᑎᒃ ᑮᓇᕐᒧᑦ ᒪᑐᐊᓂᒃ, ᐃᓯᖅᑑᒃ ᐃᓪᓗᕈᓯᕐᒧᑦ ᑎᒍᔭᐅᒪᕕᒻᒧᑦ ᐊᒻᒪ ᓴᓗᒻᒪᕐᓴᐃᓗᑎᒃ ᓇᑎᕐᒥᒃ ᐊᒻᒪ ᐃᑦᓯᕙᐅᑕᕐᓂᒃ. ᓄᑖᒥᑦ ᐊᓪᓕᓂᓕᖅᑕᐅᔪᖅ ᐃᓪᓗᕈᓯᖅ ᑎᒍᔭᐅᒪᕕᒻᒥ. A.B. ᐅᑎᖅᑐᖅ ᐃᓪᓗᕈᓯᕐᒧᑦ ᓯᕿᖕᖑᔭᖅ 10:37-ᐸᓗᒻᒥ ᐅᓪᓛᒃᑯᑦ. ᓯᓂᓕᖅᑐᓂ ᐊᒻᒪ ᒥᕆᐊᓚᐅᖅᐸᑦᑐᓂ ᖁᕝᕕᒻᒧᑦ. ᐱᑎᑕᐅᓕᖅᑐᒥᓂᖅ ᑕᐅᑦᑐᖏᒍᑦ ᓯᕋᓯᒪᔪᖅ ᓂᐊᖂᔭᐅᔮᖅᑐᖅ ᐊᒻᒪ ᐃᒥᕐᒥᒃ.

[286] ᑳᓐᔅᑕᐳᓪ ᑭᐅᓕᖕ ᓇᓗᓇᐃᔭᐃᓯᒪᔪᖅ ᑎᑎᖅᑲᖏᓐᓂ ᐅᖃᐅᑎᑦᓴᖏᓐᓂ ᐅᓪᓗᒃᑯᑦ ᐃᖅᑲᓇᐃᔭᓕᓚᐅᕋᒥ ᓯᕿᖕᖑᔭᖅ 9-ᒨᖅᑎᓪᓗᒍ ᐅᓪᓛᒃᑯᑦ ᔪᓂ 2, 2020 (ᐃᓯᖅᑐᒥᓂᐅᓚᐅᖅᑐᓂ ᐃᖅᑲᓇᐃᔭᕆᐊᖃᕋᓂ ᓱᓕ ᐃᑲᕐᕋᖏᑎᒍᑦ ᐃᑲᔪᕆᐊᖅᑐᓂ). ᓯᕿᖕᖑᔭᖅ 10:40-ᐸᓗᒻᒥ, ᑳᓐᔅᑕᐳᓪ ᑭᐅᓕᖕ ᐊᒻᒪ ᑳᓐᔅᑕᐳᓪ ᕘᕐᒍᓴᓐ ᐊᓂᑎᑦᓯᕙᓪᓕᐊᓕᓚᐅᖅᑑᒃ A.B.-ᒥᑦ, ᑳᓐᔅᑕᐳᓪ ᑭᐅᓕᖕ ᐃᓪᓗᖓᓅᓚᐅᖅᑐᖅ A.B. ᐊᓈᓇᖓᑕ ᐊᐃᑦᓯᕐᓯᒪᓗᓂ ᓈᒻᒪᔪᓂᑦ ᐊᓐᓄᕌᑦᓴᖏᓐᓂᑦ A.B. ᐊᓂᑎᑕᐅᒍᓂ ᐊᑎᔭᑦᓴᖃᕐᓂᐊᕈᒥ ᖃᐅᓯᐅᖏᑦᑐᓂᑦ.

A.B. ᐅᖃᐅᓯᖃᖅᑐᖅ ᐃᓅᓯᕐᒥᓂᒃ ᑭᐱᓯᔪᒪᒋᐊᑦᓴᖅ

[287] ᑳᓐᔅᑕᐳᓪ ᑭᐅᓕᖕ ᑐᓂᓯᒻᒪᒍ ᐊᓐᓄᕌᓂᑦ A.B., A.B. ᐊᐱᕆᓚᐅᖅᑐᖅ ᓇᑭᑦ ᑎᒍᔭᐅᓐᓂᕐᒪᖔᖅ ᐅᓐᓅᓚᐅᖅᑐᖅ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᐅᖃᓚᐅᖅᑐᖅ A.B.-ᒧᑦ ᑎᒍᔭᐅᓚᐅᕋᒥ "ᓇᕐᓴᒥᑦ." ᑳᓐᔅᑕᐳᓪ ᑭᐅᓕᖕ ᐊᐱᕆᓕᓚᐅᖅᑐᖅ A.B.-ᒥᑦ ᐋᓐᓂᐊᓯᐅᕐᕕᒻᒨᕈᒪᒻᒪᖔᖅ. A.B. ᐅᖃᖅᑐᒥᓂᐅᓂᕋᖅᑕᖅ ᐊᖏᕐᕋᕈᒪᑐᐃᓐᓇᕋᒥ ᓯᓂᒋᐊᖅᑐᕐᓗᓂ, ᐊᒻᒪ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᒍᒪᓂᕐᒥᓂᒃ. ᑳᓐᔅᑕᐳᓪ ᑭᐅᓕᖕ ᐊᐱᕆᒐᒥᐅᒃ ᖃᓄᐃᒻᒪᑦ, ᐊᒻᒪ A.B. ᐅᖃᖅᑐᖅ, "ᐃᓅᓯᖅ ᐃᕿᐊᓇᕐᒪᑦ."

[288] ᑳᓐᔅᑕᐳᓪ ᑭᐅᓕᖕ ᐊᐱᕆᓕᓚᐅᖅᑕᖓ A.B. ᐅᖃᖃᑎᖃᕈᒪᒻᒪᖔᖅ ᐃᓱᒪᓕᕆᓂᕐᒥᑦ ᐱᓕᕆᔨᒥᑦ, ᐊᒻᒪ A.B. ᐊᖏᓚᐅᖅᑐᖅ. ᑳᓐᔅᑕᐳᓪ ᑭᐅᓕᖕ ᖃᐅᔨᒃᑲᐃᓕᓚᐅᖅᑐᖅ ᐃᓱᒪᓕᕆᔨᒥᑦ ᐋᓐᓂᐊᓯᐅᖅᑎᒥᑦ, ᐅᖃᐅᓯᐅᓂᐊᖅᑐᖅ ᐅᕙᓂ ᐅᓂᒃᑳᓂ ᐋᓐᓂᐊᓯᐅᖅᑎ B, ᑐᓴᖅᑎᒍᒪᓪᓗᓂᐅᒃ ᐊᓯᐊᓂᑦ ᑎᒍᔭᐅᒪᔪᒥᑦ ᐱᑕᖃᓛᕐᒪᑦ ᐅᖃᖃᑎᒋᒋᐊᓕᖓᓂᑦ ᑕᐃᑲᓂ ᐅᓪᓛᒃᑯᑦ, ᐅᐸᒋᐊᖃᓚᐅᕐᒥᒐᒥ ᐅᖃᖃᑎᒋᒋᐊᓕᒻᒥᓂᒃ ᐊᕐᓇᒥᑦ ᑎᒍᔭᐅᒪᔪᒥᑦ.

[289] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᓕᕆᕝᕕᒻᒥ ᐊᑐᐊᒐᖓᑦ^{Footnote 38} ᐅᖃᕐᓯᒪᔪᖅ:

ᑎᒍᔭᐅᓴᕝᒪᔪᒥᑦ ᓇᓗᓇᐃᔭᐃᔪᖃᕐᓂᖅᐸᑦ ᖃᓄᑐᐃᓐᓇᖅ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᒍᒪᔪᒥᑦ . . . ᖃᐅᔨᓴᖅᑎᐅᔪᖅ ᐃᖅᑲᓇᐃᔭᖅᑐᖅ ᐅᖃᐅᔾᔭᐅᑦᓴᐅᑎᒋᒋᐊᓕᒃ ᑕᕝᕙᓴᐃᓐᓇᖅ ᐱᔾᔭᐃᒃᑯᑎᓂᑦ ᐱᓕᕆᔾᔪᑎᖃᖁᓪᓗᒋᑦ ᐅᑯᐊ ᐱᖃᓯᐅᔾᔭᐅᓗᑎᒃ:

• ᐲᔭᖅᑕᐅᓗᑎᒃ ᐊᓐᓄᐹᓕᒫᖏᑦ ᐊᒻᒪ ᑎᒍᔭᐅᒪᔪᖅ ᐱᑎᑕᐅᓗᓂ ᐅᓗᕆᐊᓇᒻᒪᕆᑦᑐᓄᑦ ᕿᐱᒋᔭᐅᕙᑦᑐᒥᑦ ᐊᒻᒪ/ᐅᕝᕙᓘᓐᓃᑦ ᐅᓗᕆᐊᓇᒻᒪᕆᑦᑐᓄᑦ ᐅᓕᒋᔭᐅᕙᑦᑐᒥᑦ;
• ᐅᐊᑦᓯᖃᑕᐅᓂᐊᖅᑐᒥᑦ ᑐᑦᓯᕋᕐᓗᑎᒃ ᖃᐅᔨᓴᖅᑎᐅᓂᐊᖅᑐᒥᑦ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᒍᒪᔪᓂᑦ ᐊᔪᕐᓇᖏᑉᐸᑦ; ᐊᒻᒪ/ᐅᕝᕙᓘᓐᓃᑦ
  ᐋᓐᓂᐊᕕᓕᐊᕈᔾᔭᐅᓗᓂ ᑕᐃᒪᐃᒋᐊᖃᕈᓂ.

ᑎᑎᕋᑦᑕᐅᑎᒋᒋᐊᓖᑦ ᑎᒍᔭᐅᒪᔪᓂᑦ ᐅᓂᒃᑳᓕᐅᕈᑎᓂ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᒍᒪᔪᓂᑦ ᑎᒍᔭᐅᒪᔪᖅ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᒍᒪᒍᓂ.

[290] ᐱᑕᖃᖏᑦᑐᖅ ᑐᑭᓯᒋᐊᕈᑎᐅᔪᓂ ᐊᑐᐃᓐᓇᐅᔪᓂ ᖃᐅᔨᓴᖅᑎᓄᑦ ᓇᓗᓇᐃᔭᐃᓯᒪᔪᓂᑦ ᑕᒪᒃᑯᐊ ᐱᓕᕆᐊᖑᓐᓂᕋᓗᐊᕐᒪᖔᑕ ᐱᓕᕆᐊᑦᓴᐃᑦ. ᑭᓯᐊᓂᓕ, ᑳᓐᔅᑕᐳᓪ ᑭᐅᓕᖕ ᐲᖅᑕᐅᓚᐅᖅᑐᖅ ᐱᓕᕆᕝᕕᒻᒥᓂᒃ ᔪᓚᐃᒥ ᑭᖑᓂᑦᓯᐊᖓᓂ ᐅᖃᖃᑎᖃᓚᐅᖅᑎᓪᓗᒍ A.B.-ᒥᑦ ᐊᒻᒪ ᐅᖄᓚᓚᐅᖅᑎᓪᓗᒍ ᐃᓱᒪᓕᕆᓂᕐᒥᑦ ᐋᓐᓂᐊᓯᐅᖅᑎᒧᑦ.

[291] ᓇᓗᓇᖅᑐᖅ ᑐᑭᓯᒋᐊᕈᑎᐅᔪᑦ ᐊᑐᐃᓐᓇᐅᔪᑦ ᖃᐅᔨᓴᖅᑎᓄᑦ ᐋᓐᓂᐊᔪᓕᕆᓂᕐᒧᑦ ᐸᕐᓇᐅᑎᐅᔪᖅ ᐅᐸᓗᖓᐃᔭᕐᓯᒪᔭᖓ ᐋᓐᓂᐊᓯᐅᖅᑎ A ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᔭᐅᒪᕕᒻᒦᓚᐅᖅᑐᑦ ᐅᐸᑦᓯᒪᑎᓪᓗᒍ ᐋᓐᓂᐊᓯᐅᖅᑎ ᑐᓂᔭᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓐᓄᑦ ᐃᖅᑲᓇᐃᔭᕆᐊᓚᐅᖅᑐᓄᑦ ᐅᓪᓛᒃᑯᑦ. ᐱᑕᖃᖏᑦᑐᖅ A.B. ᑎᒍᔭᐅᒪᑎᓪᓗᒍ ᐅᓂᒃᑳᓕᐊᖑᓯᒪᔪᓂ ᓇᓗᓇᐃᔭᐃᓯᒪᔪᓂᑦ ᐋᓐᓂᐊᓯᐅᕐᕕᒻᒧᑦ ᐅᐸᑦᑎᑕᐅᒋᐊᖃᕐᓂᖓᓄᑦ ᐋᖓᔮᕈᓐᓃᖅᐸᑦ. ᐅᖃᕐᓯᒪᔪᖃᖏᒻᒥᔪᖅ ᐸᓖᓯᓄᑦ ᐅᓂᒃᑳᓕᐊᖑᓯᒪᔪᓂ ᑕᒪᑦᓱᒥᖓ ᑐᑭᓯᒋᐊᕈᑎᐅᔪᒥ ᐅᖃᐅᓯᐅᓯᒪᒋᐊᖓ ᐅᑯᓇᖕᖓᑦ ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓯᒥᖦ, ᐊᒻᒪ ᑳᓐᔅᑕᐳᓪ ᓱᓚᑦ. ᑳᓐᔅᑕᐳᓪ ᑭᐅᓕᖕ ᑎᑎᕋᕐᓯᒪᔭᖏᑦ ᐅᖃᐅᓯᖃᕐᓯᒪᔪᑦ ᐊᐃᑉᐸᖃᖅᑐᓂ ᑳᓐᔅᑕᐳᓪ ᕘᕐᒍᓴᓐᒥᑦ ᐊᓂᑎᑦᓯᓇᓱᓕᓚᐅᕐᒪᑎᒃ A.B.-ᒥᑦ; ᐅᖃᐅᓯᖅᑕᖃᖏᑦᑐᖅ ᐋᓐᓂᐊᓯᐅᕐᕕᒻᒨᕆᐊᖃᕐᓂᖓᓄᑦ. ᑳᓐᔅᑕᐳᓪ ᑭᐅᓕᖕ ᐊᐱᕆᓚᐅᖅᑑᒐᓗᐊᖅ A.B.-ᒥᑦ ᐋᓐᓂᐊᓯᐅᕐᕕᒻᒨᕈᒪᒻᒪᖔᖅ, ᑭᓯᐊᓂ ᑕᕝᕘᓇ ᐅᖃᐅᓯᖃᖅᑑᔮᖅᑐᖅ ᐃᓱᒪᕐᓱᖅᑐᒥᓂᐅᒋᐊᖓ A.B. ᑕᐃᑯᖕᖓᕈᒪᒍᓂ ᐊᒻᒪ ᐋᓐᓂᐊᓯᐅᖅᑎ A ᐊᑐᖁᔭᖓ ᐃᓱᒪᒋᔭᐅᒐᓂ. ᑭᐅᔾᔪᑎᒋᓪᓗᒍ ᖃᐅᔨᓴᖅᑏᑦ ᑎᑎᖅᑲᖏᓐᓄᑦ ᐊᐱᖅᑯᑎᒃᑲᓂᕐᓄᑦ, ᑳᓐᔅᑕᐳᓪ ᑭᐅᓕᖕ ᒪᓕᒐᓕᕆᔨᖏᑦ ᐅᖃᐅᓯᖃᒃᑲᓐᓂᓚᐅᖅᑐᑦ ᑳᓐᔅᑕᐳᓪ ᑭᐅᓕᖕ "ᑐᑭᓯᓯᒪᔪᖅ ᑲᒪᔨᐅᔪᑦ ᐃᖅᑲᓇᐃᔭᖅᑐᑦ ᐅᐸᓗᖓᐃᔭᐃᓯᒪᓐᓂᕐᒪᑕ ᓇᓗᓇᐃᕐᓯᒪᔪᒧᑦ ᐋᓐᓂᐊᓯᐅᖅᑎᒧᑦ ᐅᐸᑦᑕᐅᖁᔭᐅᓯᒪᓂᖓᓂᑦ ᑎᒍᔭᐅᒪᕕᒻᒨᖁᔭᐅᓗᓂ ᐊᒻᒪ ᖃᐅᔨᒪᕆᐊᕐᓗᓂ" A.B.-ᒥᑦ. ᑕᒪᓐᓇ ᐅᖃᐅᓯᖃᖅᑑᔮᖅᑐᖅ ᐋᓐᓂᐊᓯᐅᖅᑎ A ᐅᐸᑦᓯᒪᓂᕆᓚᐅᖅᑕᖓᓂᑦ ᑎᒍᔭᐅᒪᕕᒻᒧᑦ ᐅᓐᓅᓚᐅᖅᑐᖅ ᓯᕗᓂᐊᒍᑦ.

[292] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ^{Footnote 39} ᐅᖃᕐᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ "ᑎᑎᕋᖅᐸᒋᐊᖃᕐᒪᑕ ᐋᓐᓂᐊᔪᓕᕆᓂᕐᒥᑦ ᐊᑐᖁᔭᐅᓯᒪᔪᓂᑦ ᐋᓐᓂᐊᔪᓕᕆᔨᓄᑦ ᑎᒍᔭᐅᖅᑲᔪᖅ ᓱᓕ ᑎᒍᔭᐅᖅᑲᑎᓪᓗᒍ ᐅᕙᓂ ᑎᑎᕋᕐᕕᑦᓴᒥ C-13-1, ᐊᒻᒪ ᐅᖃᐅᔾᔭᐅᓯᒪᓗᓂ ᐅᐊᑦᓯᐅᔪᖅ."

[293] ᖃᐅᔨᓴᖅᑏᑦ ᖃᐅᔨᔪᑦ ᓈᒻᒪᓚᐅᖏᒻᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓚᒋᐅᓚᐅᖅᑐᑦ ᐋᓐᓂᐊᓯᐅᖅᑎ A ᐅᐸᑦᓯᒪᑎᓪᓗᒍ ᐋᓐᓂᐊᓯᐅᖅᑎ A (ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᒥᖦ ᐊᒻᒪ ᓵᔨᓐ ᒋᐅᓪ) ᓇᓗᓇᐃᑦᓯᐊᕐᓗᑎᒃ ᐅᖃᐅᓯᖃᕐᓂᖏᑦᑐᒥᓂᐅᓂᖏᓐᓄᑦ ᐃᓗᓯᓕᕆᓂᒃᑯᑦ ᐸᕐᓇᐅᑕᐅᓯᒪᔪᒥᑦ ᐱᔾᔪᑎᐅᓗᓂ A.B. ᐊᑐᖁᔭᐅᔪᕕᓂᕐᒥᑦ ᐋᓐᓂᐊᓯᐅᖅᑎ A-ᒧᑦ ᐊᒻᒪ ᐊᖏᕈᑎᐅᓯᒪᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐊᒻᒪ ᑎᑎᖅᑲᐅᖏᓐᓂᒥᓂᖓ ᐸᕐᓇᐅᑎᐅᑉ ᑎᒍᔭᐅᒪᔪᓂᑦ ᐅᓂᒃᑳᑦᓴᓂ. ᑕᒪᓐᓇ ᑲᔪᓯᔭᐅᓯᒪᖏᓐᓂᖓ ᑲᒪᒋᔭᐅᓂᒃᑯᑦ ᐅᓗᕆᐊᓇᖅᑐᒦᑎᑕᐅᔪᓐᓇᖅᑐᒥᓂᖅ ᐃᓗᓯᖓ A.B. ᖃᐅᔨᓴᖅᑏᑦ ᐊᑐᖁᔨᔪᑦ ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᒥᖦ ᐊᒻᒪ ᓵᔨᓐ ᒋᐅᓪ ᐱᑎᑕᐅᖁᓪᓗᒋᑦ ᐊᐅᓚᑦᓯᔾᔪᑎᒍᑦ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓇᓗᓇᐃᔭᐃᓯᐊᕐᐸᓪᓗᑎᒃ ᑎᑎᕋᖃᑦᑕᕆᐊᖃᕐᓂᕐᒥᑦ ᐊᒻᒪ ᑐᓴᐅᒪᑎᑦᓯᓂᕐᒥᑦ ᑐᑭᓯᒋᐊᕈᑎᐅᔪᓂᑦ ᐱᔾᔪᑎᖃᖅᑐᓂᑦ ᑎᒍᔭᐅᒪᔪᑦ ᐋᓐᓂᐊᔪᓕᕆᓂᒃᑯᑦ ᑲᒪᒋᔭᐅᒋᐊᖃᕐᓂᖏᓐᓂᑦ.

ᐃᓱᒪᓕᕆᓂᕐᒥᑦ ᐋᓐᓂᐊᓯᐅᖅᑎ ᖃᐅᔨᓴᖅᑐᖅ A.B.-ᒥᑦ

[294] ᐊᐱᕐᓱᑕᐅᓗᓂ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓄᑦ, ᐋᓐᓂᐊᓯᐅᖅᑎ B ᓇᓗᓇᐃᔭᐃᓚᐅᖅᑐᖅ ᓇᓗᓇᐃᖅᑕᐅᓯᒪᓂᖃᖅᑐᓂ ᐃᓱᒪᓕᕆᓂᕐᒥᑦ ᐋᓐᓂᐊᓯᐅᖅᑎᐅᓯᒪᓕᕋᒥ ᐊᕐᕌᒍᓄᑦ 11. ᓄᓇᕘᒥ ᐃᖅᑲᓇᐃᔭᖅᑎᐅᓯᒪᓕᖅᑐᖅ ᐊᕐᕌᒍᓂᑦ ᑎᓴᒪᓂᑦ (4), ᐊᒻᒪ ᑭᖕᖓᕐᓅᐸᑦᑐᖅ ᐱᓕᕆᕝᕕᓪᓗᐊᑕᕆᒻᒪᒍ.

[295] ᐋᓐᓂᐊᓯᐅᖅᑎ B ᐅᖃᐅᓯᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP)^{Footnote 40} ᐸᓖᓯᒃᑯᓐᓄᑦ ᐅᖄᓚᕕᐅᓐᓂᕋᒥ ᓯᕿᖕᖑᔭᖅ 10-ᒨᖅᑎᓪᓗᒍ ᐅᓪᓗᒃᑯᑦ ᔪᓂ 2-ᒥ, 2020. ᐅᖃᐅᔾᔭᐅᓂᕋᓚᐅᖅᑐᖅ ᐋᓐᓂᐊᓯᐅᖅᑕᐅᔪᖅ (A.B.) ᓱᓕ ᐋᖓᔮᕐᒪᑦ, ᐃᑉᐸᑦᓴᖓᓂ ᐅᓐᓄᒃᑯᑦ ᑎᒥᒃᑯᑦ ᐊᑦᑐᖅᑕᐅᔪᕕᓂᐅᔪᖅ ᐊᒻᒪ ᐊᐳᖅᑕᐅᓂᖅᑐᓂ ᓄᓇᒃᑰᔫᒧᑦ, ᐊᒻᒪ ᐅᖃᐅᓯᖃᖅᑐᒥᓂᐅᒻᒪᑦ ᐃᓅᓯᕐᒥᓂᒃ ᑭᐱᓯᔪᒪᒋᐊᑦᓴᖅ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᐅᖃᓚᐅᕐᒥᔪᖅ ᐋᓐᓂᐊᓯᐅᖅᑎ A ᑕᑯᓂᐊᕐᓯᒪᓚᐅᕐᒪᑦ A.B.-ᒥᑦ ᐅᓐᓅᓚᐅᖅᑐᖅ. ᐋᓐᓂᐊᓯᐅᖅᑎ B ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᐃᓱᒪᓕᓚᐅᖅᑑᒃ ᐋᓐᓂᐊᓯᐅᖅᑎ ᐅᐸᒋᐊᖃᕐᓂᕐᒥᓂᒃ ᐊᒻᒪ ᑕᑯᓂᐊᕐᓗᓂᐅᒃ A.B. ᐅᓐᓄᓴᐅᓕᖅᐸᑦ; ᐋᓐᓂᐊᓯᐅᖅᑎ B ᐅᖃᓚᐅᖅᑐᖅ ᐱᔭᑦᓴᓕᐸᕈᓘᓚᐅᕐᒪᑕ ᑕᐃᑲᓂ ᐅᓪᓘᑎᓪᓗᒍ ᐃᓱᒪᓕᕆᔪᓂᑦ ᐅᖄᓚᔾᔪᑎᖃᖅᐸᑦᑐᑦ ᐱᓪᓗᒋᑦ ᓄᓇᓕᐅᔪᒥᑦ.

[296] ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᑦ ᐃᓪᓗᕈᓯᕐᒥᑦ 3 ᑎᒍᔭᐅᒪᕕᒻᒥ ᓇᓗᓇᐃᔭᐃᓯᒪᔪᑦ ᐋᓐᓂᐊᓯᐅᖅᑎ B ᐅᐸᑦᓯᒪᓚᐅᕐᒪᑦ ᑎᒍᔭᐅᒪᕕᒻᒧᑦ ᓯᕿᖕᖑᔭᖅ 3:48 ᐅᓐᓄᓴᒃᑯᑦ. ᐃᑲᕐᕋᐃᑦ ᑕᓕᒪᐸᓗᐃᑦ (5) ᐊᓂᒍᕐᓯᒪᓕᓚᐅᖅᑐᑦ ᐅᖄᓚᕕᐅᓚᐅᖅᑐᓂ ᑳᓐᔅᑕᐳᓪ ᑭᐅᓕᖕᒧᑦ. ᐊᑯᓂᐅᓗᐊᓚᕿᔪᕕᓂᐅᔪᑦ ᐅᖃᐅᓯᐅᔪᑦ ᒪᓕᑦᑐᒋᑦ ᐋᓐᓂᐊᓯᐅᖅᑎ B ᐱᔭᑦᓴᓕᒻᒪᕆᐅᓐᓂᕐᒪᑦ ᑕᐃᑲᓂ ᐅᓪᓘᑎᓪᓗᒍ ᐅᖄᓚᔾᔪᑎᐅᔪᑦ ᐱᓪᓗᒋᑦ. ᐅᖃᓚᐅᖅᑐᖅ, ᐃᒥᐊᓗᑦᑕᖃᓕᕋᐃᒻᒪᑦ ᓄᓇᓕᓐᓂ, ᐅᖄᓚᔾᔪᑎᐅᔪᑦ ᐊᒥᓱᕈᓕᐅᒥᕙᑦᑐᑦ ᐅᓗᕆᐊᓇᖅᑐᓕᕆᓂᒃᑯᑦ ᖃᐅᔨᓴᖅᑕᐅᒋᐊᖃᖅᐸᑦᑐᑦ.

[297] ᐊᐱᕆᔭᐅᒐᒥ ᐃᓱᒪᓕᕆᓂᒃᑯᑦ ᐋᓐᓂᐊᓯᐅᖅᑎᓄᑦ ᐱᓕᕆᔾᔪᑎᓂᑦ ᑭᖕᖓᕐᓂ, ᐋᓐᓂᐊᓯᐅᖅᑎ B ᐅᖃᕆᐊᓚᐅᖅᑐᖅ ᐊᑕᐅᓯᐅᒻᒪᑦ (1) ᐃᓱᒪᓕᕆᓂᕐᒥᑦ ᐋᓐᐊᓯᐅᑎᐅᕙᑦᑐᖅ ᓄᓇᓕᓐᓂ. ᐅᖃᒃᑲᓐᓂᓚᐅᖅᑐᖅ:

ᐃᓛᓐᓂᒃᑯᑦ ᐊᑲᕐᕆᔮᖅᑎᑦᓯᓇᓱᐊᖅᐸᒻᒥᔪᑦ ᐱᑕᖃᖅᑎᑦᓯᓪᓗᑎᒃ ᐊᓯᐊᓂᒃ ᐃᓱᒪᓕᕆᓂᕐᒥᑦ ᐋᓐᓂᐊᓯᐅᖅᑎᒥᑦ^{Footnote 41} ᐅᕝᕙᓘᓐᓃᑦ ᐃᓱᒪᓕᕆᓂᕐᒥᑦ ᑐᑭᓯᒋᐊᖅᑎᑦᓯᔨᒥᑦ ᓄᓇᓕᓐᓂ ᐃᑲᔪᕐᓱᐃᔨᑦᓴᒥᑦ [ᑖᒃᑯᐊᓂᖓ] ᐱᓕᕆᐊᑦᓴᓂᑦ. ᑭᓯᐊᓂᐅᒐᔪᑦᑐᖅ, ᑕᕝᕙᑑᕙᑦᑐᑦ ᐃᓱᒪᓕᕆᓂᕐᒥᑦ ᐱᔨᑦᓯᕋᖅᑎᐅᕙᑦᑐᑦ ᐊᓯᖏᓐᓂᑦ ᐃᓐᓇᑐᖃᐃᑦ ᐅᕝᕙᓘᓐᓃᑦ ᐃᓱᒪᓕᕆᓂᕐᒥᑦ ᐱᔨᑦᓯᕋᖅᑎᐅᔪᓂᑦ ᓄᓇᓕᓐᓃᖏᑦᑐᓂᑦ.

[298] ᐋᓐᓂᐊᓯᐅᖅᑎ B ᐅᖃᓚᐅᖅᑐᖅ, ᑕᑯᒐᒥᐅᒃ A.B., ᖃᓄᐃᓕᓚᐅᒐᓛᖏᑦᑐᖅ ᑕᐃᒪᐃᓲᖑᒐᒥ; ᓂᓪᓕᐊᓗᐊᖅᐸᖏᑦᓯᐊᖅᑑᒐᓗᐊᖅ ᑭᓯᐊᓂ ᑕᐃᑦᓱᒪᓂ ᓂᖕᖓᑦᓯᒪᓂᕐᓴᐅᓚᐅᖅᑐᖅ. ᑕᑯᔪᓐᓇᓚᐅᖅᑐᖅ ᑎᓪᓘᔭᓪᓗᐊᑲᓪᓚᑐᒻᒪᕆᐅᑎᓪᓗᒍ ᑮᓇᓕᒫᖓᒍᑦ. "ᖃᓄᐃᓪᓚᕆᓚᐅᖅᑐᖅ" ᐊᒻᒪ ᐋᓐᓂᐊᓯᐅᖅᑎ "ᖃᐅᔨᓴᑲᐅᖅᑐᓚᐅᖅᑐᖅ" ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᒋᐊᖃᕐᓂᕋᖅᑐᒍ ᐃᓱᒪᓕᕆᔨᓄᑦ ᖃᐅᔨᓴᖅᑕᐅᓚᐅᖏᓐᓂᖓᓂ. ᐅᖃᓚᐅᖅᑐᖅ ᓱᓇᑐᐃᓐᓇᕐᒥᒃ ᐃᑉᐱᒍᓱᒍᓐᓇᑦᓯᐊᓚᐅᖏᓐᓂᖓᓄᑦ ᐊᒻᒪ ᓱᓕ ᐋᖓᔮᖅᕙᓗᑦᑑᔮᖅᑎᓪᓗᒍ. ᕿᑲᕐᓯᒍᓐᓇᓚᐅᖏᑦᑐᖅ ᐊᒻᒪ ᐅᖃᐃᓐᓇᖅᑐᓂ ᐊᓂᑎᑕᐅᔪᒪᓂᕋᖅᑐᓂ ᑎᒍᔭᐅᒪᕕᐅᑉ ᐃᓪᓗᕈᓯᖓᓂᑦ. ᖃᖓᑐᐃᓐᓇᒃᑯᑦ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᒍᒪᒋᐊᑦᓴᖅ ᐅᖃᓚᐅᖏᑦᑐᖅ. ᐅᖃᓗᐊᕋᓂ, ᐋᓐᓂᐊᓯᐅᖅᑎ B ᐃᓱᒪᓚᐅᖅᑐᖅ ᖃᐅᔨᓴᕈᓐᓇᔾᔮᖏᓂᕐᒥᓂᐅᒃ ᓂᖕᖓᐅᒪᔾᔪᑎᖓ ᐱᔾᔪᑎᖃᕐᒪᖔᖅ A.B. ᑎᒥᖓᒍᑦ ᐋᓐᓂᕐᓯᒪᔭᖏᓐᓂᑦ ᐅᕝᕙᓘᓐᓃᑦ ᐃᓱᒪᓕᕆᓂᒃᑯᑦ ᐃᓱᒫᓘᑎᐅᒻᒪᖔᖅ, ᓯᕗᓂᐊᒍᑦ ᐋᓐᓂᐊᔪᓕᕆᓂᒃᑯᑦ ᖃᐅᔨᓴᖅᑕᐅᓚᐅᖅᑎᓐᓇᒍ.

[299] ᐋᓐᓂᐊᓯᐅᖅᑎ B ᓇᓗᓇᐃᕐᓯᓚᐅᖅᑐᖅ ᖃᐅᔨᓴᕐᓂᕋᒥᐅᒃ "ᑎᒍᔭᐅᒪᒍᓐᓇᖅᑐᖅ" ᐃᑦᑎᕐᕕᐅᔭᖅ ᓇᓗᓇᐃᕆᐊᓕᒃ A.B. ᑎᒍᔭᐅᒪᓂᖓᓄᑦ ᐅᓂᒃᑳᓕᐅᕈᑎᒥ, ᐃᓱᒪᓚᐅᕋᒥ ᑎᒍᔭᐅᒪᐃᓐᓇᕈᓐᓇᕐᓂᖓᓄᑦ. ᐃᓱᒪᒋᓚᐅᕋᓗᐊᖅᑐᓂᐅᒃ ᑕᕝᕙᓴᐃᓐᓇᖅ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᒋᐊᖃᕐᓂᖓᓄᑦ, ᓴᖅᑮᓚᐅᖏᑦᑐᖅ ᑐᐊᕕᕐᓇᖅᑐᒥᑦ ᐋᓐᓂᐊᓯᐅᕐᕕᒻᒨᕈᔾᔭᐅᒋᐊᖃᕐᓗᓂ ᑕᕝᕙᓴᐃᓐᓇᖅ.       

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ A.B.-ᒥᑦ ᐋᓐᓂᐊᓯᐅᕐᕕᒻᒨᕈᔾᔨᔪᑦ

[300] ᐸᓖᓯᒧᑦ ᐅᓂᒃᑳᓕᐊᖏᓐᓂ, ᑳᓐᔅᑕᐳᓪ ᓯᑑᕐᔾ ᐅᖃᕆᐊᓚᐅᖅᑐᖅ ᐅᖄᓚᓐᓂᕋᒥ ᐋᓐᓂᐊᓯᐅᕐᕕᒻᒧᑦ ᓯᕿᖕᖑᔭᖅ 4:30-ᑎᓪᓗᐊᑎᓪᓗᒍ ᐅᓐᓄᓴᒃᑯᑦ ᐊᒻᒪ ᐅᖃᖃᑎᖃᓚᐅᕋᒥ ᐋᓐᓂᐊᓯᐅᖅᑎᒥᑦ (ᐅᓂᒃᑳᓂ ᐅᖃᐅᓯᐅᓂᐊᖅᑐᖅ ᐋᓐᓂᐊᓯᐅᖅᑎ C), ᐅᖃᐅᔾᔭᐅᓂᕋᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ A.B.-ᒥᑦ ᐋᓐᓂᐊᓯᐅᕐᕕᒻᒨᕈᔾᔭᐅᒋᐊᖃᕐᓂᖓᓄᑦ "ᐊᑐᖅᑕᐅᔭᕇᖅᐸᑦ 5-ᒨᖅᑎᓪᓗᒍ ᑐᐊᕕᕐᓇᑲᐃᓐᓇᐸᑦᑐᖅ" ᐋᓐᓂᐊᓯᐅᕐᕕᒃ ᐃᓄᖃᓗᐊᕈᓐᓃᖅᐸᑦ. ᑳᓐᔅᑕᐳᓪ ᓯᑑᕐᔾ ᐊᒻᒪ ᑳᓐᔅᑕᐳᓪ ᓯᒥᖦ A.B.-ᒥᑦ ᐋᓐᓂᐊᓯᐅᕐᕕᒻᒨᕈᔾᔨᓕᓚᐅᖅᑑᒃ ᓯᕿᖕᖑᔭᖅ ᐃᒻᒪᖄ 5:48-ᑎᓪᓗᒍ ᐅᓐᓄᐸᓪᓕᐊᒥ. ᑕᐃᑦᓱᒪᓂᓕ, ᑎᒍᔭᐅᒪᕕᒻᒦᓚᐅᖅᑐᖅ ᐃᓪᓗᕈᓯᖏᓐᓂ ᐃᑲᕐᕋᓪᓗᐊᓄᑦ 17-ᓂᑦ ᐊᒻᒪ ᐃᑲᕐᕋᐅᑉ ᐊᕝᕙᖓᓂᑦ. ᐸᓖᓯᒧᑦ ᐅᓂᒃᑳᓕᐊᖏᓐᓂ, ᑳᓐᔅᑕᐳᓪ ᓯᒥᖦ ᑎᑎᕋᓚᐅᖅᑐᖅ, ᑕᐃᑦᓱᒪᓂ, A.B. ᐋᖓᔮᕈᓐᓃᓚᐅᖅᑐᖅ ᐊᒻᒪ ᓴᐃᒪᓪᓗᓂ.

[301] ᐋᓐᓂᐊᓯᐅᖅᑎ C ᐊᐱᕐᓱᖅᑕᐅᓚᐅᖅᑐᖅ ᖃᐅᔨᓴᖅᑎᓄᑦ. ᓇᓗᓇᐃᖅᑕᐅᓯᒪᓪᓗᓂ ᐋᓐᓂᐊᓯᐅᖅᑎᐅᓕᖅᑐᖅ ᐊᕐᕌᒍᓄᑦ 15 ᐊᒻᒪ ᓇᒥᑐᐃᓐᓇᖅ ᐃᖅᑲᓇᐃᔭᕐᓯᒪᓕᖅᑐᓂ ᐅᑭᐅᖅᑕᖅᑐᒥ. ᑭᖕᖓᕐᓃᓯᒪᓕᖅᑐᖅ ᒪᐃ 18-ᒥᓂᒃ, 2020.

[302] ᐃᖅᑲᐅᒪᔭᖏᓐᓂ ᖃᓄᐃᓕᐅᕈᑎᒥᓂᕐᓂᒃ, ᐃᓱᒪᓕᕆᓂᕐᒥᑦ ᐋᓐᓂᐊᓯᐊᖅᑎ (ᐋᓐᓂᐊᓯᐅᖅᑎ B) ᐅᖃᖃᑎᒋᓚᐅᖅᑕᖓ ᐋᓐᓂᐊᓯᐅᕐᕕᒻᒥ ᓯᕿᖕᖑᔭᖅ 4:30-ᐸᓗᒻᒥ ᐅᕝᕙᓘᓐᓃᑦ 5-ᒨᖅᑎᓪᓗᒍ, ᐅᖃᖅᑐᓂ ᐋᓐᓂᐊᓯᐅᖅᑕᐅᒋᐊᓕᒻᒥᑦ ᐱᑕᖃᓚᐅᕐᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᑕ ᐃᓪᓗᕈᓯᖏᓐᓂ ᖃᐅᔨᓴᖅᑕᐅᒋᐊᓕᒻᒥᑦ ᐅᐱᓐᓇᕋᓂ ᒥᕆᐊᖑᓚᐅᕐᒪᑦ ᐊᒻᒪ ᒥᕆᐊᖅᐸᑦᑐᓂ. ᐋᓐᓂᐊᓯᐅᖅᑎ C ᐃᓱᒪᓚᐅᖅᑐᖅ ᒥᕆᐊᖑᓂᖓ ᐊᒻᒪ ᒥᕆᐊᖅᐸᓐᓂᖓ ᓇᓗᓇᓗᐊᕋᔭᕐᒪᑕ ᖃᐅᔨᓴᖅᑕᐅᒍᓂ ᑎᒍᔭᐅᒪᕕᒻᒥ ᐊᒻᒪ ᑕᐃᓐᓇ ᑭᓇ ᑕᑯᔭᐅᔭᕆᐊᖃᕐᒪᑦ ᐋᓐᓂᐊᓯᐅᕐᕕᒻᒥ ᐱᔾᔪᑎᒋᓪᓗᒋᑦ ᐊᔾᔨᒌᖏᑦᑐᓂᑦ ᖃᓄᐃᒍᑎᖃᓚᐅᕐᓂᖓᓄᑦ ᐋᓐᓂᐊᔪᓄᑦ ᐊᑐᖅᑕᐅᕙᑦᑐᓂᑦ, ᐊᒻᒪ ᐊᔾᔨᒌᖏᑦᑐᑦ ᑲᒪᒋᔭᐅᔾᔪᑎᑦᓴᐅᔪᑦ ᐊᑐᖅᑕᐅᒋᐊᓖᑦ).

[303] ᐋᓐᓂᐊᓯᐊᖅᑎ B ᐅᖃᐅᔾᔪᐃᓂᕋᖅᑕᒥᓂᐅᔪᖅ ᐋᓐᓂᐊᓯᐅᖅᑎ C-ᒧᑦ ᐋᓐᓂᐊᓯᐅᖅᑕᐅᒋᐊᓕᒃ (A.B.) ᐋᓐᓂᐊᓯᐅᕐᕕᒻᒨᕈᔾᔭᐅᒋᐊᖃᖏᒻᒪᑦ ᐅᓪᓗᒃᑯᑦ ᐱᓕᕆᓐᓇᐅᑎᓪᓗᒍ ᐃᑲᕐᕋᓂ. ᐋᓐᓂᐊᓯᐅᖅᑎ C ᐅᖄᓚᕕᐅᒋᐊᖃᖅᐸᓚᐅᖅᑐᖅ ᑕᐃᑲᓂ ᐅᓐᓄᖓᓂ, ᐱᒋᐊᕐᓗᓂ ᓯᕿᖕᖑᔭᖅ 5-ᒨᖅᐸᑦ ᐅᓐᓄᓴᒃᑯᑦ; ᐋᓐᓂᐊᓯᐅᕐᕕᐅᑉ ᐃᑲᕐᕋᖏᑦ ᒪᑐᐃᖓᓂᕆᕙᑦᑕᖏᑦ ᖃᐅᑕᒫᑦ ᐃᓱᓕᑉᐸᑦᑐᑦ 5-ᒨᕋᐃᒻᒪᑦ, ᑭᓯᐊᓂ ᖃᓄᐃᑦᓴᓚᐅᖏᑦᑐᖅ ᑕᑯᒐᓗᐊᕈᓂᐅᒃ ᐋᓐᓂᐊᔪᓕᕆᔭᐅᒋᐊᓕᒃ ᐊᓂᒍᕐᓯᒪᓕᐸᓗᐊᖅᐸᑦ. ᐅᓪᓗᕐᓯᐅᓚᐅᕆᓪᓗᓂ ᐱᓕᕆᔾᔪᑎᒍᑦ ᐊᒻᒪ, ᐅᓪᓛᒃᑯᑦ ᐃᖅᑲᓇᐃᔭᖅᑏᑦ ᑲᑎᒪᓂᖃᖅᑎᓪᓗᒋᑦ ᐱᓕᕆᔾᔪᑎᓂᑦ, ᑐᓴᒐᓚᓐᓂᕋᓚᐅᖅᑐᖅ ᐋᓐᓂᐊᓯᐅᖅᑎ B ᖃᐅᔨᓴᐅᑎᒥᓂᖏᓐᓂᑦ A.B.-ᒥᑦ ᐅᓐᓄᖓᓂ ᐃᑉᐸᑦᓴᖓᑕ.

[304] ᐱᔾᔪᑎᖃᖅᑐᓂ ᖃᐅᔨᓴᕋᒥᐅᒃ A.B., ᐋᓐᓂᐊᓯᐅᖅᑎ C ᐅᖃᓚᐅᖅᑐᖅ, "ᐊᑕᐅᓯᐊᖅᑐᒍ ᑕᑯᓴᕋᒃᑯ ᖃᐅᔨᒪᑦᑕᐅᑎᒋᓚᐅᖅᑐᖓ ᒥᕆᐊᖑᓂᖓ ᐊᒻᒪ ᒥᕆᐊᓚᕿᕙᓐᓂᐊ ᐱᔾᔪᑎᖃᖅᐸᓪᓚᐃᓂᖓᓂᑦ ᓂᐊᖁᐊᒍᑦ ᐋᓐᓂᕐᓯᒪᓂᖓᓂᑦ." ᐅᖃᓚᐅᖅᑐᖅ ᖃᐅᔨᓴᓕᓚᐅᕋᒥ ᐱᒋᐊᖅᑐᓂ ᓂᐊᖁᐊᓂᑦ ᐃᓯᒐᖏᑕ ᐃᓄᒐᖑᐊᖏᓐᓄᑦ. ᐊᓯᖏᓐᓂᑦ ᐃᓚᖃᖅᑐᑎᒃ, ᑎᑎᕋᕐᓯᒪᔭᖏᑦ ᐱᓕᕆᐊᒥᓂᕐᓂᒃ ᓇᓗᓇᐃᔭᐃᓯᒪᓚᐅᖅᑐᑦ ᐅᑯᓂᖓ:

• - ᖃᓄᐃᓕᔭᐅᓯᒪᖏᑦᑐᖅ ᐊᑦᑐᐊᔭᐅᑎᓪᓗᒍ ᐅᕝᕙᓘᓐᓃᑦ ᑕᑯᑦᓴᐅᔪᖅᑕᖃᖏᑦᑐᖅ ᓂᐊᖁᐊᑕ ᓴᐅᓂᐊᒍᑦ
• - ᑕᓕᖅᐱᐊ ᐃᔨᖓ ᐳᓪᓕᖅᑐᖅ ᖁᓛᒍᑦ ᖃᓪᓗᖓᑕ, ᑭᓕᕐᓯᒪᔪᖅ ᖃᐅᖓ
• - ᐳᓪᓕᖅᑐᖅ ᖃᓂᖓ
• - ᓴᐅᒥᐊ ᐃᔨᖓ ᐳᕕᑦᑐᖅ ᐊᒻᒪ ᑎᓪᓘᔭᖅᑐᖅ ᑭᓯᐊᓂ ᐃᔭᕈᕙᖏᒃ ᐅᐃᒍᓐᓇᓚᐅᖅᑑᒃ
• - 2 ᒥᓕᒦᑕᓕᒻᒥᑦ ᐆᑦᑑᑎᒃᑯᑦ ᑎᓯᔪᖅ ᐊᒻᒪ ᐊᒻᒪᓗᑭᑖᖅ ᑎᓯᑦᑎᑦᑐᖅ, ᐃᒪᖃᕋᓂ ᐃᓗᐊ
• - ᓴᐅᒥᐊ [ᐅᖃᓯᖅ] ᐃᔨᖓᑕ ᐅᐃᒍᓐᓇᖏᑦᑐᖅ ᐃᑲᔪᕋᓗᐊᕐᒪᑦ ᑎᑎᕋᖅᑐᒥᓂᖅ
• - ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᖃᖅᑐᖅ [ᐋᓐᓂᐊᔪᖅ] ᐅᕐᕈᔮᖅᐸᓐᓂᖓᓂᑦ ᐋᓐᓂᖅᑕᐅᓚᐅᖅᑎᓪᓗᒍ
• - ᐃᔨᖏᑕ ᐊᕙᓗᖏᒃ ᕿᕐᓂᕐᓯᓯᒪᓪᓗᑎᒃ
• . . .
• - 1840: [ᐋᓐᓂᐊᔪᖅ] ᓇᑎᕐᒦᑦᑐᖅ ᓵᖓᓂ ᖁᕝᕕᐅᑉ ᒥᕆᕿᑦᑐᓂ ++ᐊᑦᓱᑲᓪᓚᒃ ...
• . . .
• - 1900: ᐅᖃᖃᑎᖃᓚᐅᖅᑐᖅ [ᓗᑦᑖᒥᑦ] ᐅᖄᓚᐅᑎᒃᑯᑦ ᐊᑐᖁᔨᓚᐅᖅᑐᒥᑦ ᖃᖓᑕᓲᒃᑯᑦ ᐊᐃᔭᐅᖁᓪᓗᓂᐅᒃ [ᐋᓐᓂᐊᔪᖅ].

[305] ᐋᓐᓂᐊᓯᐅᖅᑎ C ᖃᐅᔨᒋᐊᕈᒪᓕᓚᐅᖅᑐᖅ ᐃᓱᒪᒋᔭᖏᓐᓂᑦ ᐅᖄᓚᕕᐅᔪᓐᓇᖅᑑᑉ ᓗᑦᑖᑉ ᐃᖃᓗᓐᓂ. ᐋᓐᓂᐊᓯᐅᖅᑎ C ᐊᔾᔨᓕᐅᕆᓕᓚᐅᖅᑐᖅ A.B.-ᒥᑦ ᐊᒻᒪ ᐃᕐᖐᓇᖅᑕᐅᑎᒃᑯᑦ ᐊᐅᓪᓚᑎᑦᑐᓂᐅᒃ ᓗᑦᑖᒧᑦ, ᐊᑕᐅᑎᒃᑯᑦ ᖃᐅᔨᓴᐅᑎᖏᓐᓂᑦ ᑎᑎᕋᓚᐅᖅᑕᒥᓂᒃ. ᓗᑦᑖᖅ ᐅᖄᓚᓚᐅᖅᑐᖅ ᐋᓐᓂᐊᓯᐅᖅᑎ C-ᒧᑦ ᐊᒻᒪ ᐅᖃᓚᐅᖅᑐᖅ A.B. ᐃᖃᓗᓐᓅᕈᔾᔭᐅᒋᐊᖃᓪᓚᕆᒻᒪᑦ, ᑕᐃᑲᓂ ᖃᐅᔨᓴᖅᑕᐅᒐᒪᑦ ᐃᓗᐊ ᓂᐊᖁᖓᑕ. ᑕᐃᑯᖕᖓᐅᔾᔭᐅᓂᐊᖅᑐᖅ ᖃᖓᑕᓲᒃᑯᑦ ᐊᐃᔭᐅᓗᓂ ᐋᓐᓂᐊᔪᓂᑦ ᐊᐃᑦᓯᖅᑎᒃᑯᑎᒍᑦ.^{Footnote 42}

[306] ᐋᓐᓂᐊᓯᐅᖅᑎ C ᐅᖃᒃᑲᓐᓂᓚᐅᖅᑐᖅ ᐊᒥᓲᒻᒪᑕ ᖃᓄᐃᒍᑎᐅᔪᓐᓇᖅᑐᑦ ᐊᑐᖅᑕᐅᔪᓐᓇᖅᑐᑦ ᓲᕐᓗ ᒥᕆᐊᖑᓂᐅᔪᖅ ᐊᒻᒪ ᒥᕆᐊᖃᑦᑕᕐᓂᐅᔪᖅ, ᐊᒻᒪ ᑭᓪᓕᖃᖅᑐᓂᑦ ᖃᓄᐃᑦᑐᖃᕐᒪᖔᖅ ᖃᐅᔨᓴᐅᑎᖃᖅᑐᑎᒃ ᐋᓐᓂᐊᓯᐅᕐᕕᒻᒥ ᑭᖕᖓᕐᓂ: ᑎᒥᐅᑉ ᐃᓗᐊᓂᑦ ᖃᐅᔨᓴᐅᑎᖃᕋᑎᒃ, ᐊᔾᔨᓕᐅᕆᓯᓐᓈᖅᑐᒥᑦ ᖃᐅᔨᓴᐅᑎᖃᕋᑎᒃ, ᐊᐅᖏᕐᓯᔾᔪᑎᖃᕋᑎᓪᓗ ᐊᑐᐃᓐᓇᐅᔪᓂᑦ. ᐅᖃᕆᐊᓚᐅᖅᑐᖅ, "ᐃᓗᒃᑯᑦ ᐃᑉᐱᓐᓂᐊᓕᕐᓇᐸᒻᒪᑦ ᐃᓛᓐᓂᒃᑯᑦ ᖃᓄᐃᑦᑐᖃᕐᓂᖓᓄᑦ. ᐃᓛᓐᓂᒃᑯᑦ ᐃᑉᐱᒋᔭᕋ ᖃᓄᐃᑦᑐᖃᕐᓂᖓᓄᑦ ᑕᒻᒪᐸᒻᒪᑦ, ᑭᓯᐊᓂ ᓱᓕᓚᐅᖅᐸᑦᑐᖅ. . . . ᑭᓯᐊᓂ ᑕᑯᓂᐊᕋᒃᑯ ᐃᒪᐃᓚᐅᖅᑐᖓ, ᒥᕆᐊᖑᓚᐅᖅᑐᖅ ᐱᔾᔪᑎᒋᓪᓗᒍ ᓂᐊᖁᐊᒍᑦ ᐋᓐᓂᕐᓯᒪᓂᖓ." ᐋᓐᓂᐊᓯᐅᖅᑎ C ᐅᖃᕆᐊᓚᐅᖅᑐᖅ ᓱᓕ ᐊᑐᕆᐊᖃᕐᒪᒍᑦ ᖃᐅᔨᓴᕐᓗᒍ ᐃᓘᓐᓇᖓᒍᑦ ᑎᒥᖓᒍᑦ ᐊᒻᒪ ᐊᐱᕐᓱᕐᓗᓂᐅᒃ. ᐅᕙᓂ ᐱᓕᕆᐊᒥ, ᖃᐅᔨᓚᐅᕐᒥᔪᖅ ᒥᕆᐊᖑᓂᐅᔪᖅ ᐊᒻᒪ ᒥᕆᐊᖃᑦᑕᕐᓂᐅᔪᖅ ᐱᔾᔪᑎᖃᑐᐃᓐᓇᕆᐊᖃᕐᓂᖏᓐᓂᑦ ᐃᒥᐊᓗᑦᓯᒪᓂᖓᓄᑦ ᐊᒻᒪ ᐋᖓᔮᕐᓇᖅᑐᓂᑦ ᐅᓐᓅᓚᐅᖅᑐᖅ; ᐅᖃᓪᓚᑦᑖᕈᓐᓇᓚᐅᖏᑦᑐᖅ ᓇᓪᓕᐊᒍᑦ ᐊᓯᐊᒍᓪᓘᓐᓃᑦ ᑕᐃᒪᐃᒻᒪᖔᖅ ᐱᔾᔪᑎᒋᓪᓗᒍ ᐋᓐᓂᕐᓯᒪᓂᖓ ᓂᐊᖁᐊᒍᑦ ᐅᕝᕙᓘᓐᓃᑦ ᐋᖓᔮᕐᓂᖓᓄᑦ, ᐅᕝᕙᓘᓐᓃᑦ ᑕᒪᒃᑮᓐᓂᒃ.

[307] A.B. ᐃᖃᓗᓐᓅᖅᑎᑕᐅᓕᓚᐅᖅᑐᖅ ᐋᓐᓂᐊᔪᓕᕆᔨᒃᑯᑦ ᖃᖓᑕᓲᒃᑯᑦ, ᖃᐅᔨᓴᖅᑕᐅᓕᓚᐅᖅᑐᓂ ᕿᑭᖅᑕᓂ ᐋᓐᓂᐊᕕᒻᒥ. ᑎᒥᐊᑕ ᐃᓗᐊᓂᑦ ᖃᐅᔨᓴᖅᑕᐅᒐᒥ ᓴᖅᑮᓚᐅᖅᑐᑦ ᓱᕋᑦᓯᒪᓂᖓᓂᑦ ᕿᖓᖓ, ᑭᓯᐊᓂ ᓂᐊᖁᐊᒍᑦ ᐋᓐᓂᖅᑕᐅᓯᒪᕙᓗᓚᐅᖏᑦᑐᖅ.^{Footnote 43} ᐃᒪᐃᓚᐅᖅᑐᑦ "ᑲᖐᒋᔭᐅᔪᖅ . . . ᒥᑭᔪᒥᑦ ᐳᕙᖓᒍᑦ ᖃᓄᐃᒋᐊᖓ ᐊᑯᓐᓂᖏᒍᑦ ᖁᖓᓯᖓᑕ ᐊᒻᒪ ᓈᖏᑕ" (ᓄᑭᖃᕈᓐᓃᕐᓯᒪᔪᖅ ᐳᕙᖓ) ᑕᓕᖅᐱᐊᒍᑦ, ᐊᒻᒪᑦᑕᐅᖅ ᑎᓪᓘᔭᖅᑐᓂ, ᐳᕕᑦᑐᓂ, ᐊᒻᒪ ᐊᖏᓗᐊᖏᑦᑐᓂᑦ ᑭᓕᕐᓯᒫᕐᔪᑦᑐᓂ. A.B. ᐅᓐᓄᐊᒃᑯᑦ ᐅᓂᑦᑎᑕᐅᓯᒪᔪᒥᓂᖅ ᖃᐅᔨᓴᖅᑕᐅᒍᒪᓪᓗᓂ, ᑭᓯᐊᓂ ᓗᑦᑖᖑᔪᖅ ᐅᖃᐅᓯᖃᓚᐅᖅᑐᖅ ᐅᑉᐱᕈᓱᓐᓂᕐᒥᓂᒃ A.B. ᖃᓄᐃᔾᔮᓛᖅᐸᓪᓚᐃᓂᖓᓄᑦ ᐊᓂᑎᑕᐅᒐᓗᐊᕈᓂ ᖃᐅᑉᐸᑦ ᐅᓪᓛᒃᑯᑦ.

[308] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᓕᕆᐊᖃᖅᐸᒋᐊᓕᐅᔪᑦ ᐃᖅᑲᓇᐃᔮᒥᒍᑦ ᐸᖅᑭᐊᖃᕐᓂᒃᑯᑦ ᑎᒍᓯᒪᔭᕐᒥᓂᒃ, ᐊᒻᒪ ᐊᑐᐊᒐᖏᒍᑦ ᑎᓕᐅᕆᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᐱᔾᔪᑎᖃᖅᑐᓂᑦ ᖃᐅᔨᓴᐅᑎᓂᑦ ᑭᐅᔪᓐᓇᕐᓂᖏᓐᓄᑦ, ᖃᖓᒃᑯᑦ ᐋᓐᓂᐊᔪᓕᕆᔨᓄᑦ ᐃᑲᔪᖅᑕᐅᒋᐊᖃᕐᒪᖔᑕ ᑎᒍᔭᐅᒪᔪᑦ, ᐊᒻᒪ ᐊᑐᖅᑕᐅᒋᐊᓖᑦ ᖃᐅᔨᓴᐃᓐᓇᖅᑕᐅᒋᐊᖃᕐᓂᖏᓐᓄᑦ ᑎᒍᔭᐅᒪᔪᑦ ᐅᐊᑦᓯᐅᔪᓄᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ ᓇᓗᓇᐃᔭᐃᓯᒪᑦᑎᐊᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᑉᐱᒍᓱᑦᑎᐅᓂᖏᓐᓂᑦ ᖃᓄᐃᖏᑦᓯᐊᕆᐊᖃᕐᓂᖏᓐᓂᑦ ᐊᒻᒪ ᓴᐳᒻᒥᔭᐅᒋᐊᖃᕐᓂᖏᓐᓂᑦ ᑎᒍᔭᐅᒪᔪᑦ.

[309] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᒍᑦ ᑎᓕᔭᐅᓯᒪᔪᑦ ᐋᓐᓂᐊᔪᓕᕆᔭᐅᒋᐊᖃᕐᓂᖏᓐᓂᑦ ᑎᒍᔭᐅᒪᔪᖅ:

• - ᖃᐅᔨᒪᒍᓐᓃᕐᓯᒪᔫᔮᕈᓂ ᐅᕝᕙᓘᓐᓃᑦ ᖃᐅᔨᒪᑦᑎᐊᖅᑑᔮᖏᒃᑯᓂ;
• - ᑕᑯᑦᓴᐅᑎᑦᓯᒍᓂ ᓂᐊᖁᕐᒥᒍᑦ ᐋᓐᓂᕐᓯᒪᓂᕐᒥᓂᒃ ᐅᕝᕙᓘᓐᓃᑦ ᐅᖃᐅᓯᐅᓯᒪᒍᓂ ᓂᐊᖁᐊᒍᑦ ᐋᓐᓂᕐᓯᒪᓂᖓᓂᑦ;
• - ᑲᖐᒋᔭᐅᒍᓂ ᐃᒥᐊᓗᒻᒧᑦ ᐊᒻᒪ/ᐅᕝᕙᓘᓐᓃᑦ ᐋᖓᔮᕐᓇᖅᑐᒧᑦ ᐱᓗᐊᕐᓯᒪᓗᓂ ᐋᓐᓂᐊᒋᐊᖓᓄᑦ;
• - ᑲᖐᒋᔭᐅᒍᓂ ᐃᔨᕐᓯᓯᒪᓂᖓᓂᑦ ᐋᖓᔮᕐᓇᖅᑐᓂᑦ ᑎᒥᒥᓂ;
• - ᐊᑦᓱᑲᓪᓚᒃ ᒥᕆᐊᖅᐸᒃᑯᓂ; ᐅᕝᕙᓘᓐᓃᑦ
• - ᑕᑯᑦᓴᐅᑎᑦᓯᒍᓂ ᐊᓯᖏᓐᓂᑦ ᐋᓐᓂᕐᓯᒪᔪᓂᑦ ᐅᕝᕙᓘᓐᓃᑦ ᐋᓐᓂᐊᓂᕐᒥᓂᒃ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᒋᐊᖃᓕᕐᓗᓂ.^{Footnote 44}

[310] ᐊᒻᒪᑦᑕᐅᖅ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ "V" ᐱᓕᕆᕝᕕᒻᒥ ᐅᖃᕐᓯᒪᔪᑦ, "ᑕᐃᒪᐃᓕᖓᑐᐃᓐᓇᕆᐊᖃᖏᓯᐊᖅᑐᑦ ᐋᓐᓂᐊᔪᓕᕆᓂᒃᑯᑦ ᐃᓗᓯᖏᒍᑦ ᐊᒻᒪ ᖃᓄᐃᒋᐊᖃᖏᓐᓂᖏᓐᓂᑦ ᑭᓇᑐᐃᓐᓇᐅᑉ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᑎᒍᔭᐅᒪᔫᑉ. ᓇᓗᒋᔭᐅᑐᐊᕈᓂ, ᐅᖄᓚᒋᐊᓕᒃ/ᕿᓂᕆᐊᓕᒃ ᐋᓐᓂᐊᔪᓕᕆᓂᒃᑯᑦ ᐃᑲᔪᖅᑎᑦᓴᓂᑦ. ᑎᑎᕋᖅᑕᐅᓐᓇᕆᕙᓪᓗᒋᑦ ᐃᓘᓐᓇᑎᒃ ᖃᓄᐃᓕᐅᕈᑎᐅᔪᐃᓐᓇᐃᑦ ᑎᑎᕋᕐᕕᒻᒥ C-13 ᐊᒻᒪ ᑎᑎᖅᑲᓕᐅᕐᕕᒻᒥ."^{Footnote 45} ᑎᑎᕋᕐᓯᒪᒻᒥᔪᑦ, "ᐃᓱᒪᑐᐃᓐᓇᕆᐊᖃᖏᑦᑐᖅ ᑎᒍᔭᐅᒪᔪᖅ 'ᓯᓂᑐᐃᓐᓇᕆᐊᖓ.' ᖃᐅᔨᓴᖅᑕᐅᕙᓪᓗᑎᒃ ᑭᐅᔪᓐᓇᑦᑎᐊᕋᓗᐊᕐᒪᖔᑕ ᒪᓕᑦᑕᐅᓗᑎᒃ [ᐊᑐᐊᒐᕐᒦᑦᑐᑦ]."^{Footnote 46}

[311] ᐊᖏᔪᑲᓪᓚᓐᓂᒃ ᖁᓪᓕᐅᔾᔨᓯᒪᑐᐃᓐᓇᕆᐊᖃᑦᓯᐊᕐᒥᔪᑦ ᖃᓄᐃᒍᑎᐅᔪᒃᑯᑦ ᐊᑦᓱᑲᓪᓚᒃ ᐋᖓᔮᖅᑐᓄᑦ ᐊᒻᒪ ᓂᐊᖁᐊᒍᑦ ᐋᓐᓂᕐᓯᒪᔪᓄᑦ. ᑭᓇᑐᐃᓐᓇᖅ ᖃᓄᐃᒍᑎᖃᑐᐃᓐᓇᕆᐊᓕᒃ ᑕᒪᒃᑮᓐᓂᒃ ᖃᓄᐃᓕᖓᒍᑎᒥᓃᓐᓂᒃ ᐊᑕᐅᑦᑎᒃᑰᖅᑐᓂᑦ. ᐱᑕᖃᑐᐃᓐᓇᕆᐊᓕᒃ ᐅᓗᕆᐊᓇᖅᑐᒻᒪᕆᒻᒥᑦ ᐅᕝᕙᓘᓐᓃᑦ ᐃᓅᔪᓐᓃᕈᑎᐅᔪᓐᓇᖅᑐᒥᑦ ᐱᕙᓪᓕᐊᒍᓐᓇᕐᓂᖏᓐᓂᑦ ᑕᐃᒪᐃᑦᑐᓂᑦ ᖃᓄᐃᑦᑐᖃᖅᑎᓪᓗᒍ.

[312] ᖃᐅᔨᓴᖅᑏᑦ ᐅᖃᐅᓯᖃᕐᓯᒪᒻᒥᔪᑦ ᑕᒪᑦᓱᒥᖓ ᐊᓯᖏᓐᓂ ᐅᓂᒃᑳᓕᐊᕆᓯᒪᔭᖏᓐᓂ, ᐊᒻᒪ ᒫᓐᓇᕈᓘᓚᐅᖅᑐᑦ ᐃᖅᑲᖅᑐᐃᕕᒻᒥ ᓈᓚᑦᑎᓄᑦ ᐋᖅᑭᑦᑕᐅᔾᔪᑎᐅᓚᐅᖅᑐᖅ ᖃᓄᐃᓕᔭᐅᔾᔪᑎᑦᓴᖅ ᑐᖁᖓᔪᓕᕆᔨᒧᑦ ᑐᑦᓯᕌᖑᓚᐅᖅᑐᖅ ᑯᒡᓗᒃᑑᕐᒥ, ᓄᓇᕗᑦ, ᐃᓱᒪᑦᓴᕐᓯᐅᕈᑎᖃᓚᐅᕐᒥᔪᑦ ᐱᔾᔪᑎᐅᔪᒥᑦ. ᑕᐃᑲᓂᓕ, ᐊᖑᑎᒥᑦ ᒥᓯᑦᑐᖃᓚᐅᕐᓯᒪᔪᖅ ᒪᓕᒐᕋᓛᓕᕆᔨᐅᑉ ᓄᓇᒃᑰᔫᖓᑕ ᐃᒐᓛᖓᒍᑦ ᑎᒍᔭᐅᓚᐅᖅᑎᓪᓗᒍ ᐋᖓᔮᖅᑐᓂ ᐊᖁᑦᑐᒥᓂᐅᓂᖓᓄᑦ. ᑎᒍᔭᐅᒪᕕᒻᒥ ᐃᓪᓗᕈᓯᕐᒦᑎᑕᐅᓕᖅᑐᒥᓂᖅ ᐃᑲᕐᕋᓄᑦ ᑕᓪᓕᒪᓄᑦ (5) ᐋᓐᓂᐊᕕᒻᒨᕈᔾᔭᐅᓚᐅᕋᓂ ᓄᓇᓕᓐᓂ ᐊᒻᒪ ᐋᓐᓂᐊᕕᒻᒨᕈᔾᔭᐅᓕᕐᓂᖅᑐᓂ ᔨᐊᓗᓇᐃᒧᑦ, ᑕᐃᑲᓂ ᐃᓅᔪᓐᓃᖅᑐᒥᓂᖅ.

[313] ᐊᓯᖏᓪᓗ, ᐃᖅᑲᖅᑐᐃᕕᒻᒥ ᓈᓚᑦᑏᑦ ᐊᑐᓕᖁᔨᔾᔪᑎᓕᐅᓚᐅᕐᒥᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ:

. . . ᕿᒥᕐᕈᐊᖅᑕᐅᓗᑎᒃ ᐊᒻᒪ ᑎᑎᕋᕆᐊᖅᑕᐅᓗᑎᒃ ᐱᓕᒻᒪᑦᓴᐅᑎᐅᔪᑦ ᓇᓗᓇᐃᕐᓯᒪᖁᓪᓗᒋᑦ ᑲᒪᔨᐅᔪᑦ ᐊᒻᒪ ᐃᓄᑐᐃᓐᓇᐃᑦ ᐅᐊᑦᓯᐅᔪᑦ ᖃᐅᔨᒋᐊᖃᑦᑕᖁᔭᐅᓗᑎᒃ ᐋᓐᓂᐊᔪᓕᕆᔨᓂᑦ ᐱᓕᕆᐊᖃᖅᑎᓪᓗᒋᑦ ᑭᒃᑯᑐᐃᓐᓇᕐᓂᑦ ᑭᐅᔪᓐᓇᖏᑦᑐᓂᑦ, ᐋᖓᔮᕋᓗᐊᕈᑎᒃ ᐃᒥᐊᓗᒻᒧᑦ. ᐊᒻᒪᑦᑕᐅᖅ, ᑎᑎᕋᕆᐊᕆᐊᓕᐅᔪᑦ ᐊᑐᐊᒐᕐᒥᓂᒃ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᖃᑦᑕᖁᓗᒋᑦ ᑭᓇᑐᐃᓐᓇᖅ ᓇᓗᓇᖏᑉᐸᑦ ᓂᐊᖁᐊᒍᑦ ᐋᓐᓂᕐᓯᒪᓂᖏᓐᓂᑦ.

ᐃᖅᑲᖅᑐᐃᕕᒻᒥ ᓈᓚᑦᑏᑦ ᐊᑐᓕᖁᔨᔾᔪᑎᓕᐅᓚᐅᕐᒥᔪᑦ ᑐᕌᖓᔪᓂᑦ ᒐᕙᒪᒃᑯᖏᓐᓄᑦ ᓄᓇᕘᑉ ᐱᔾᔪᑎᖃᖅᑐᓂᑦ ᐃᓗᓯᓕᕆᓂᕐᒥᑦ ᐱᔨᑦᓯᕋᐅᑎᓂᑦ ᐊᒻᒪ ᑐᐊᕕᕐᓇᖅᑐᓕᕆᔾᔪᑎᓂᑦ.^{Footnote 47}

[314] ᑕᕝᕙᓂᓕ ᐱᓕᕆᐊᒥ, A.B. ᐃᓚᒋᔭᐅᓂᕋᖅᑕᐅᔪᕕᓂᖅ ᐸᕝᕕᓴᐃᔪᖃᖅᑎᓪᓗᒍ ᐊᑖᑕᒃᑯᖓᓐᓂ, ᐊᐳᖅᑕᐅᓂᖅᑐᓂᓗ ᐸᓖᓯᓄᑦ ᓄᓇᒃᑰᔫᑉ ᒪᑐᐊᓄᑦ, ᐊᑦᓱᕈᖅᑕᐅᓗᓂ ᑎᒍᔭᐅᓐᓂᖅᑐᓂ, ᐊᒻᒪ ᓂᖕᖓᐅᔾᔭᒻᒪᕆᐅᓕᕐᓂᖅᑐᓂ ᐊᓯᐊᓄᑦ ᑎᒍᔭᐅᒪᔪᒧᑦᑕᐅᖅ, ᑮᓇᖓᒍᑦ ᐊᒥᓱᐊᖅᑎᖅᑐᓂ ᐱᒋᐊᖅᑕᐅᕙᓐᓂᖅᑐᓂᓗ. ᐊᓂᖕᖓᐅᒪᕙᓚᐅᕐᒥᔪᖅ ᐃᓪᓗᕈᓯᕐᒦᑦᑐᓂ ᑎᒍᔭᐅᒪᕕᒻᒥ, ᐊᑭᓐᓇᕐᓅᐸᑦᑐᓂ ᐊᒻᒪ ᒪᑐᒧᑦ ᐊᑦᓱᑲᓪᓚᒃ.

[315] A.B. ᖃᓄᐃᒍᑎᒋᓚᐅᖅᑕᖏᑦ ᓲᕐᓗ ᐅᕐᕈᔮᕐᓂᖓ, ᓂᖕᖓᐅᒪᓂᖓ, ᐊᒻᒪ ᒥᕆᐊᖅᐸᓐᓂᖓ ᐱᔾᔪᑎᖃᑐᐃᓐᓇᕆᐊᖃᕐᓂᖏᓐᓂᑦ ᐋᖓᔮᖅᑐᒻᒪᕆᐅᓂᖓᓄᑦ (ᐊᒻᒪ ᐊᓱᐃᓪᓛᒃ ᑕᑯᑦᓴᐅᔮᖅᑐᖅ ᑕᐃᒪᐃᓯᒪᒋᐊᖓ, ᓂᐊᖁᐊᒍᑦ ᐋᓐᓂᕐᓯᒪᓚᐅᖏᓐᓂᖓ ᐱᓪᓗᒍ ᖃᐅᔨᓴᖅᑕᐅᒐᒥ ᐃᖃᓗᓐᓂ ᐋᓐᓂᐊᔪᓕᕆᔨᓄᑦ), ᖃᐅᔨᒪᔭᐅᓗᐊᑲᓴᖏᑦᑐᖅ ᖁᓚᕆᔭᐅᖏᓪᓗᓂ ᑎᒍᔭᐅᒪᕕᒻᒦᑎᓪᓗᒍ. ᖃᐅᔨᓴᖅᑏᑦ ᐊᑐᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓴᖅᑮᖁᓪᓗᒋᑦ ᑐᓴᕋᑦᓴᓂᑦ ᓇᓗᓇᐃᔭᐃᓯᒪᔪᓂᑦ ᓂᐊᖁᒃᑯᑦ ᐋᓐᓂᐸᑦᑐᑦ ᑎᒍᔭᐅᒪᑎᓪᓗᒋᑦ ᐅᐸᑦᑕᐅᒋᐊᖃᖅᐸᒻᒪᑕ ᐊᑦᑕᕆᔭᒻᒪᕆᐅᓗᑎᒃ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᒻᒪᖅᑕᕈᐊᕐᒪᑕ ᐅᔾᔨᕈᓱᒋᐊᖃᕐᓂᒃᑯᑦ ᑕᕝᕙᓴᐃᓐᓇᖅ ᐱᓇᓱᒋᐊᖃᕐᓂᖏᓐᓂᑦ ᐋᓐᓂᐊᓯᐅᖅᑎᓕᕆᔨᓄᑦ ᖃᐅᔨᓴᖅᑕᐅᑎᑦᓯᓗᑎᒃ ᑕᐃᒪᐃᑦᑐᖃᖅᑎᓪᓗᒍ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᐅᔨᒪᑦᑎᐊᕆᐊᖃᖅᐸᒻᒪᑕ ᐋᖓᔮᖅᑐᖃᖅᑎᓪᓗᒍ ᓴᖅᑭᔮᖏᑎᑦᓯᔪᓐᓇᕐᒪᑕ ᓂᐊᖁᒃᑯᑦ ᐋᓐᓂᕐᓯᒪᔪᒥᑦ.

[316] ᐱᓪᓗᐊᑕᖏᑦ ᐅᖃᕐᓗᒋᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᕝᕙᓂ ᖃᐅᔨᒋᐊᑦᑕᐅᑎᒋᓚᐅᖅᑐᑦ ᐋᓐᓂᐊᓯᐅᖅᑎᒧᑦ ᖃᐅᔨᓴᖅᑐᑦᓴᒥᑦ A.B.-ᒥᑦ ᐱᒋᐊᖅᑕᐅᓚᐅᖅᑎᓪᓗᒍ. ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᑎᒋᔭᖃᕐᓂᖏᓐᓂᑦ ᐋᓐᓂᐊᓯᐅᖅᑎ A ᐊᑐᖁᓚᐅᖅᑕᖓᓂᑦ A.B. ᐃᓪᓗᕈᓯᕐᒦᖁᔭᐅᑐᐃᓐᓇᑎᓪᓗᒍ ᑎᒍᔭᐅᒪᕕᒻᒥ "ᐋᖓᔮᕈᓐᓃᕐᓯᐊᖑᓗᓂ ᐊᒻᒪ ᐃᓱᒪᒍᓐᓇᑦᑎᐊᓕᖅᐸᑦ," ᓈᒪᔪᒥᑦ ᖃᐅᔨᓴᖅᑕᐅᓂᐊᕐᓗᓂ. ᐅᓪᓗᕐᓯᐅᑎᐅᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᒪᑦᓱᒥᖓ ᐊᑐᕐᓂᖏᑦᑐᑦ, ᐱᔾᔪᑎᐅᔪᑦᓴᐅᓗᑎᒃ ᐱᑕᖃᕐᓂᖏᓐᓂᖓᓄᑦ "ᐅᖃᐅᓯᖃᕆᐊᑦᓴᖅ ᐊᓯᒥᓂᒃ" ᐊᑐᖁᔭᐅᓯᒪᔪᓂᑦ ᐅᓐᓄᕐᓯᐅᑎᓂᑦ ᐸᓖᓯᓄᑦ. ᑎᒥᖓᓂᑦ ᖃᐅᔨᓴᖅᑕᐅᓂᐊᖁᓪᓗᒍ ᖃᐅᑉᐸᑦ ᐅᐸᓗᖓᐃᔭᖅᑕᐅᓐᓂᖏᒻᒪᑦ ᓈᒻᒪᓚᐅᖏᑦᑐᖅ. ᑭᓯᐊᓂᓕ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᖄᓚᕕᖃᓕᖅᑐᒥᓃᑦ ᐋᓐᓂᐊᓯᐅᖅᑎ B-ᒥᑦ ᐃᓱᒪᓕᕆᓂᕐᒥᑦ ᖃᐅᔨᓴᕆᐊᖁᓪᓗᒍ. ᐋᓐᓂᐊᓯᐅᖅᑎ B ᐅᖃᒃᑲᓐᓂᓕᓚᐅᖅᑐᖅ ᑎᒥᖓ ᖃᐅᔨᓴᖅᑕᐅᒋᐊᖃᕐᓂᖓᓄᑦ, ᑭᖑᓂᑦᓯᐊᖓᓂ ᖃᐅᔨᓴᖅᑕᐅᓕᖅᑐᒥᓂᖅ ᐋᓐᓂᐊᓯᐅᖅᑎ C-ᒧᑦ ᐋᓐᓂᐊᓯᐅᕐᕕᒻᒥ. ᑭᖑᕙᖅᐸᓚᐅᕋᓗᐊᖅᑐᑎᒃ ᑲᒪᒋᔭᐅᑎᑕᐅᖁᓪᓗᒍ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑐᑦᓯᕋᓚᐅᖅᑎᓪᓗᒋᑦ, ᐃᓚᖏᑦ ᑕᐃᒪᐃᓚᕿᑎᑕᐅᕙᓚᐅᖅᑐᑦ ᐱᔾᔪᑎᖃᖅᑐᑎᒃ ᖃᓄᑎᒋ ᐊᑐᐃᓐᓇᐅᓂᖏᓐᓂᑦ ᐋᓐᓂᐊᓯᐅᖅᑎᓕᕆᔩᑦ ᐊᒻᒪ ᐱᔾᔪᑎᐅᒐᑎᒃ ᖃᓄᐃᓕᐅᕈᑎᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ.  

ᐊᓯᖏᑦ ᐱᔾᔪᑎᐅᓚᐅᖅᑐᑦ ᐊᑦᑐᐊᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᕐᓂᖏᑦ ᐋᓐᓂᐊᓯᐅᖅᑎᓕᕆᓂᒃᑯᑦ ᐊᒻᒪ ᑐᐊᕕᕐᓇᖅᑐᓕᕆᓂᒃᑯᑦ ᑭᐅᔾᔪᑎᐅᔪᑦ ᑭᖕᖓᕐᓂ

[317] ᐋᓐᓂᐊᓯᐅᖅᑎ C ᐅᖃᓚᐅᕐᒥᔪᖅ ᖃᐅᔨᓴᖅᑏᑦ ᖃᐅᔨᓴᖅᑎᖏᓐᓄᑦ ᐱᑦᑎᐊᖅᑐᑯᓗᒃᑯᑦ ᐅᕝᕙᓘᓐᓃᑦ ᐊᑦᑕᓇᔾᔭᐃᑦᓯᒪᔪᒃᑯᑦ ᓇᓪᓕᐊᓐᓄᕋᐃᕕᑦᓴᐅᖏᒻᒪᑦ ᐋᓐᓂᐊᔪᓂᑦ ᐋᓐᓂᐊᓯᐅᖅᑎᑦᑕᐅᒋᐊᓕᓐᓂᑦ ᑭᖕᖓᕐᓂ. ᐅᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓂᕆᐊᒐᕆᔭᐅᕙᒻᒪᑕ ᐋᓐᓂᐊᔪᓂᑦ ᐋᓐᓂᐊᓯᐅᕐᕕᒻᒨᕈᔾᔨᔪᓐᓇᕐᓂᖏᓐᓂᑦ, ᓈᒻᒪᑦᑐᓂᑦ ᐱᓕᕆᔾᔪᑎᖃᖏᒃᑲᓗᐊᕈᑎᒃ ᐅᕝᕙᓘᓐᓃᑦ ᐱᓕᒻᒪᓴᕐᓯᒪᖏᒃᑲᓗᐊᕈᑎᒃ. ᑕᒪᓐᓇᓕ ᐊᑐᖅᑕᐅᕙᖏᑦᑐᖅ ᐊᓯᖏᓐᓂ ᓄᓇᓕᐅᔪᓂ ᐃᖅᑲᓇᐃᔭᕐᕕᒋᓯᒪᔭᖏᓐᓂ, ᐋᓐᓂᐊᔪᓕᕆᔨᓂᑦ ᐱᔨᑦᓯᕋᐅᑎᑕᖃᖅᐸᑦᑐᓂᑦ ᑕᒪᓐᓇ ᐱᓪᓗᒍ.

[318] ᑭᖕᖓᕐᓂ, ᐋᓐᓂᐊᓯᐅᖅᑎ C ᐅᖃᐅᔾᔭᐅᓯᒪᓂᕋᓚᐅᖅᑐᖅ ᐃᖅᑲᓇᐃᔭᕆᐊᖓᓕᕋᒥ ᐅᐸᒋᐊᖃᖅᐸᖏᒻᒪᑦ ᐋᓐᓂᐊᓯᐅᕐᕕᓕᐊᕆᐊᖃᕐᓂᕋᐃᔪᓄᑦ ᐅᖄᓚᔪᓄᑦ; ᓇᓪᓕᐅᒃᑯᒫᓕᖅᑕᐅᓯᒪᖏᒻᒪᑕ ᐊᖁᓐᓂᕋᓗᐊᕈᑎᒃ ᓄᓇᒃᑰᔫᒥᑦ ᐋᓐᓂᐊᔪᖃᖅᑐᓂ ᐅᓯᔭᒥᑦ, ᐱᓕᒻᒪᓴᖅᑕᐅᓯᒪᒐᑎᓪᓗ ᐋᓐᓂᐊᔪᓂᑦ ᑲᒪᒍᓐᓇᓂᕐᒥᑦ ᐋᓐᓂᐊᓯᐅᕐᕕᒻᒨᓚᐅᖏᑦᑐᓂᑦ. ᐋᓐᓂᐊᓯᐅᖅᑎ C ᐅᖃᕆᐊᓚᐅᖅᑐᖅ ᑭᒃᑯᑐᐃᓐᓇᐃᑦ ᐅᖄᓚᕙᒻᒪᑕ ᐋᓐᓂᐊᓯᐅᕐᕕᒻᒧᑦ ᐅᖃᐅᓯᖃᕈᒪᓪᓗᑎᒃ ᐃᓚᒋᔭᒥᓂᒃ ᐋᓐᓂᐊᔪᒥᑦ, ᐊᒻᒪ ᐋᓐᓂᐊᓯᐅᕐᕕᒻᒥ ᐱᓕᕆᔨᐅᔪᑦ ᐅᖄᓚᖁᔨᕙᑦᑐᑎᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓄᑦ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓂᕆᐅᒋᔭᐅᑦᑕᓕᖅᐳᑦ ᑕᐃᑦᓱᒥᖓ ᐋᓐᓂᐊᓯᐅᕐᕕᒻᒨᕈᔾᔨᓂᐊᕐᓂᖏᓐᓂᑦ. ᐅᖃᓚᐅᖅᑐᖅ "ᐱᐅᖏᑐᒻᒪᕆᐊᓘᔪᖅ" ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓂᕆᐊᒋᔭᐅᕙᓐᓂᖏᓐᓂᑦ ᑕᐃᒫᒃ ᐱᔨᑦᓯᕋᖃᑦᑕᖁᔭᐅᓗᑎᒃ. ᑕᑯᓯᒪᓂᕋᓚᐅᖅᑐᖅ ᐋᓐᓂᐊᔪᒥᒃ ᐋᓐᓂᐊᓯᐅᕐᕕᒻᒨᕈᔾᔭᐅᔪᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ "ᑎᒥᖓᓂᑦ ᑎᒋᖕᖔᕈᑎᖃᖏᑦᑐᒥᑦ, ᑎᒍᒥᐊᖅᑕᐅᒐᓂ ᐋᓐᓂᐊᔪᓂᑦ ᑎᒍᒥᐊᕈᑎᒧᑦ, ᓱᓇᖃᕋᑎᒃ, ᑎᒍᒥᐊᖅᑕᐅᓗᑎᒃ ᑕᓕᖏᒍᑦ ᐊᒻᒪ ᓂᐅᖏᒍᑦ, ᑕᑯᑦᓴᐅᓗᓂ ᖀᕐᓱᖅᑐᖅ." ᐋᓐᓂᐊᓯᐅᖅᑎ C ᐅᖃᓚᐅᖅᑐᖅ, "ᖃᓄᐃᒻᒪᑦ – [ᓈᒻᒪᖏᑦᑐᖅ] ᓇᒥᑐᐃᓐᓇᖅ ᑲᓇᑕᒥ. ᖃᓄᐃᒻᒪᓕ ᖃᓄᐃᖏᓚᖅ ᐅᑭᐅᖅᑕᖅᑐᒥ, ᐊᒻᒪ ᖃᓄᐃᖃᑦᑕᕐᓯᒪᖏᓚᖅ ᒫᓐᓇᒧᑦ?" ᐅᖃᓚᐅᕐᒥᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓛᓐᓂᒃᑯᑦ ᐃᑲᔪᖅᐸᒻᒪᑕ ᑭᒃᑯᑐᐃᓐᓇᕐᓂᑦ ᐊᖏᕐᕋᐅᔾᔨᓗᑎᒃ ᐋᓐᓂᐊᓯᐅᕐᕕᒻᒦᖓᖅᑐᓂᒃ ᐱᔾᔪᑎᒋᓪᓗᒍ ᑖᑦᓯᑕᖃᖏᒻᒪᑦ ᐃᓄᑦᑕᐅᑎᓂᑦ ᓄᓇᓕᓐᓂ.

[319] ᐃᓱᒪᒋᔭᖓᒍᓪᓕ ᐋᓐᓂᐊᓯᐅᖅᑎ C, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑭᖕᖓᕐᓂ ᐊᒥᒐᕐᓯᔪᑦ ᐱᓕᕆᔾᔪᑎᑦᓴᓂᑦ. ᐅᖃᓚᐅᖅᑐᖅ ᓄᓇᓕᓐᓃᖃᑦᑕᕐᓯᒪᒐᒥ ᐅᖄᓚᕕᐅᓗᐊᖅᐸᒐᑎᒃ ᐱᔨᑦᓯᕋᖅᑎᐅᔪᑦ ᐊᒻᒪ ᐊᒥᓲᓂᕐᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᖃᖅᐸᑦᑐᑎᒃ ᑕᐃᒃᑯᐊ. ᐋᓐᓂᐊᓯᐅᖅᑎ C ᐅᖃᓚᐅᖅᑐᖅ ᐅᕙᑦᓯᐊᕈᕐᓂᑕᓂᑦ ᑭᖑᕚᕇᒃᑯᑦ ᖁᐊᕐᓵᕈᑎᖃᕐᓯᒪᒻᒪᑕ ᓄᓇᓕᓐᓂ ᐊᒻᒪ ᐱᔾᔪᑎᖃᖅᑐᑎᒃ ᐱᑦᑎᐊᖏᔾᔪᑎᐅᕙᑦᑐᓂᑦ ᐊᒥᓱᓂᑦ. ᑕᑯᓐᓇᖅᑕᖓᒍᓪᓕ, "ᒐᕙᒪᒃᑯᑦ ᓄᓇᕘᒧᑦ ᑕᑯᒋᐊᕆᐊᖃᓪᓚᕆᓕᖅᑐᑦ ᐱᓕᕆᔾᔪᑎᐅᕙᑦᑐᓂᑦ ᐊᑐᖅᐸᑦᑕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᖅᑕᐅᒋᐊᓕᓐᓄᑦ ᐸᓖᓯᓕᕆᔾᔪᑎᐅᓗᑎᒃ. ᖁᕕᐊᓇᖏᑦᑐᓂᑦ ᐊᑐᖅᑕᐅᔪᖃᕐᓂᐅᓴᑐᐃᓐᓇᐸᒻᒪᑦ ᐊᒥᒐᕐᓯᔪᖃᓗᐊᖅᐸᑎᓪᓗᒍ ᐱᓕᕆᔾᔪᑎᑦᓴᓂᑦ ᐱᓕᕆᔾᔪᑎᐅᔪᓐᓇᖅᑐᓂᑦ."

[320] ᐋᓐᓂᐊᓯᐅᖅᑎ C ᐅᖃᐅᓯᖃᓚᐅᖅᑐᖅ ᐃᓱᒪᒋᔭᒥᓂᒃ ᑕᒻᒪᖅᑐᖃᕋᐃᒻᒪᑦ, ᑕᑯᓐᓇᖅᑕᐅᓗᐊᖅᐸᒻᒪᑕ ᑭᒃᑯᑐᐃᓐᓇᐃᑦ, ᐊᓯᐊᒍᖔᖅ ᐋᖅᑭᑦᓯᒪᓂᖏᒍᑦ ᐅᕝᕙᓘᓐᓃᑦ ᐱᓕᕆᔾᔪᑎᒍᑦ ᐱᔾᔪᑎᑕᖃᖅᑎᓪᓗᒍ. ᐅᖃᓚᐅᖅᑐᖅ:

ᖃᓄᐃᒍᑎᖃᓪᓚᕆᓚᐅᖅᑐᖓ ᐊᑲᐅᖏᑦᑐᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᖅᐸᑦᑕᖏᓐᓂᑦ ᑕᐃᑲᓂ ᓄᓇᓕᐅᔪᒥ. . . . ᑕᕝᕙᓂᑐᐊᖑᖕᖏᑦᑐᖅ ᖃᓄᐃᒍᑎᐅᓚᐅᖅᑐᒥ, ᑕᐃᒪᖕᖓᓕᒫᖅ ᑕᐅᕙᓃᑎᓪᓗᖓ. ᒪᒥᐊᒍᑎᖃᓚᐅᕐᓯᒪᖏᓯᐊᖅᑐᖓ ᑭᒃᑯᑐᐃᓐᓇᕐᓂᑦ ᑲᑎᖕᖓᔪᓂᑦ ᖃᖓᓕᒫᑦᓯᐊᖅ ᐃᖅᑲᓇᐃᔮᕆᔭᓐᓂ, ᖃᖓᑐᐃᓐᓇᖅ, ᑕᐃᒪᐃᓚᐅᕋᒪ [ᑭᖕᖓᕐᓂ], ᑕᐃᒪᐃᓚᐅᕋᒪ ᑕᐃᒃᑯᓄᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓂᑦ . . . ᐃᓘᓐᓇᑦᑎᐊᖏᓐᓂᑦ.

[321] ᑕᒪᓐᓇ ᑕᑯᑦᓴᐅᑎᑦᓯᔾᔪᑎᐅᒃᑲᓂᖅᑐᖅ ᐱᔾᔪᑎᐅᔪᒥᑦ ᐱᒻᒪᕆᐅᓂᖏᓐᓂᑦ ᐊᒥᒐᐅᑎᐅᕙᑦᑐᑦ ᐱᓪᓗᒋᑦ ᐱᓕᕆᔾᔪᑎᐅᔪᓐᓇᖅᑑᒐᓗᐊᓂᑦ ᑭᖕᖓᕐᓂ, ᐊᒻᒪ ᖃᓄᖅ ᐊᑦᑐᐃᓯᒪᓪᓚᕆᑉᐸᒻᒪᖔᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᐅᓚᑦᓯᔾᔪᑎᖏᓐᓂᑦ. ᐅᖃᕆᐊᓚᐅᖅᑐᖅ ᑎᑎᕋᕐᓯᒪᕕᖏᓐᓂ ᐅᕙᓂ ᐅᓂᒃᑳᓕᐊᖑᓯᒪᔪᒥ ᐅᖃᐅᓯᖃᕐᓂᖏᓐᓂᑦ ᐱᓕᕆᔾᔪᑎᒍᑦ ᐊᔾᔨᒌᖏᑦᑐᓂᑦ ᐱᓕᕆᔾᔪᑎᐅᑐᐃᓐᓇᕆᐊᓕᓐᓂᑦ, ᐊᑦᓱᑲᓪᓛᓗᒃ ᐱᓕᕆᔾᔪᑎᑦᓴᓂᑦ ᐊᒥᒐᕐᓯᕙᑦᑐᓂᑦ ᑕᑯᔭᐅᔪᓐᓇᓯᐊᖅᑐᓂᑦ ᓇᐅᒃᑯᑐᐃᓐᓇᑦᑎᐊᖅ ᑕᕝᕙᓂ ᐱᓕᕆᐊᖑᔪᒥ, ᐊᒻᒪ ᐊᑐᖅᑕᐅᔪᕕᓂᐅᓗᓂ ᐃᓘᓐᓇᑦᑎᐊᖏᓐᓂ ᐅᓗᕆᐊᓇᖅᑐᓃᒍᑎᒋᕙᓚᐅᖅᑕᖏᓐᓂ A.B. ᐱᓕᕆᔾᔪᑎᐅᑎᓪᓗᒋᑦ. ᑕᒪᓐᓇ ᐱᓪᓗᒍ, ᑐᐊᕕᕐᓇᑐᒻᒪᕆᐅᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᖃᖃᑎᖃᕆᐊᖃᕐᓂᖏᓐᓂᑦ ᒐᕙᒪᒃᑯᓐᓂᑦ ᓄᓇᕘᒧᑦ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᑮᓇᐅᔭᓂᑦ ᐱᓕᕆᔾᔪᑎᖃᖁᓪᓗᒋᑦ ᓈᒻᒪᑦᑐᓂᑦ ᐊᑐᐃᓐᓇᐅᑎᑕᐅᕙᓪᓗᑎᒃ ᓈᒻᒪᑦᑐᒃᑯᑦ ᐱᔨᑦᓯᕋᐅᑕᐅᓂᐊᖁᓪᓗᒋᑦ ᑭᖕᖓᐃᑦ ᐃᓄᖏᓐᓂᑦ, ᐊᑐᖁᔭᐅᓯᒪᔪᖅ ᑕᒪᓐᓇ ᐅᓂᒃᑳᓕᐊᖑᓯᒪᔪᓂ.

ᖃᓄᐃᓕᐅᕈᑎᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᑭᐅᔾᔪᑎᐅᓗᓂ ᐱᔾᔪᑎᐅᔪᒥᑦ

ᖃᐅᔨᔭᐅᔪᖅ #32: ᑐᑭᓯᒋᐊᕈᑎᑕᖃᖏᑦᑐᖅ ᐃᓱᒪᓕᐅᕆᔾᔪᑎᑦᓴᒥᑦ A.B. ᐃᓕᕋᓇᕐᓵᖑᓐᓂᕐᒪᖔᖅ ᐅᕝᕙᓘᓐᓃᑦ ᐊᔪᐃᓐᓈᖑᓐᓂᕐᒪᖔᖅ ᐊᖏᖁᔭᐅᓗᓂ ᐱᖁᔭᐅᔪᒥᑦ. ᐊᐅᓚᑦᑎᔨ ᖃᐅᔨᒋᐊᕐᓯᒪᔪᒥᓂᖅ ᑖᑦᓱᒥᖓ ᑭᒡᒐᖅᑐᐃᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᒪᓕᑦᑑᔮᓚᐅᖅᑐᖅ ᑮᓇᐅᔭᓕᕆᓂᕐᒥᑦ ᑲᑎᒪᔩᑦ ᑎᑎᕋᖅᑎᖏᑕ ᐊᑐᐊᒐᖏᓐᓂᑦ ᐊᐅᓚᑦᑎᔾᔪᑎᐅᕙᑦᑐᓂᑦ ᖃᓄᖅ ᐊᐅᓚᑕᐅᒋᐊᖃᕐᓂᖏᓐᓂᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐊᔾᔨᒌᖏᑦᑐᓂᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᑦ, ᐊᒻᒪ ᐊᑕᐅᓯᐊᕋᑎᒃ ᐃᓱᒪᓕᐅᕆᕙᓚᐅᖅᑐᑦ A.B. ᑐᑭᓯᒋᐊᖁᔭᐅᓗᓂ ᒪᓕᒐᓕᕆᔨᒥᑦ ᐅᖃᐅᓯᖃᒃᑲᓐᓂᓚᐅᖏᓂᕐᒥᓂ ᐱᖁᔭᐅᔪᓂᑦ.

ᖃᐅᔨᔭᐅᔪᖅ #33: ᐅᐱᓐᓇᕋᓂ ᐃᓱᒫᓘᑎᑕᖃᕐᒪᑦ ᑭᓇᑐᐃᓐᓇᖅ A.B.-ᑎᑐᑦ ᐊᑐᖅᑐᑦ ᐅᓗᕆᐊᓇᖅᑐᒦᒍᓐᓇᕐᒪᑕ ᐊᒻᒪ ᐱᓕᕆᔾᔪᑎᐅᑐᐃᓐᓇᕆᐊᖃᖅᑐᑎᒃ ᐊᔾᔨᒋᑎᑕᐅᖏᓪᓗᑎᒃ, ᐊᒻᒪ/ᐅᕝᕙᓘᓐᓃᑦ ᖃᓄᐃᒍᑎᖃᕐᓗᑎᒃ ᑕᐃᒫᑦᓯᐊᖅ ᐃᓱᒪᓕᐅᕆᔪᓐᓇᕐᓂᖏᓐᓂᑦ ᐊᑐᖅᑕᐅᔪᓐᓇᖅᑐᒥᑦ ᓴᖅᑭᑕᐅᓯᒪᔪᑦ ᐱᔾᔪᑎᒋᓪᓗᒋᑦ, ᐅᓗᕆᐊᓇᖅᑐᒦᔾᔭᐃᑯᑎᑦᓴᓂᑦ ᐋᖅᑭᑦᓱᐃᒋᐊᓕᐅᔪᑦ ᐊᑐᐊᒐᑎᒍᑦ, ᐱᓕᕆᔾᔪᑎᒍᑦ ᐊᒻᒪ ᐱᓕᒻᒪᑦᑕᐅᑎᒍᑦ.

ᖃᐅᔨᔭᐅᔪᖅ #34: ᐃᓱᒫᓗᓇᖅᑐᖅ ᖃᐅᔨᓴᖅᑎᓄᑦ ᐱᑕᖃᖏᒻᒪᑦ ᑲᓇᑕᒥ, ᓄᓇᓕᖃᕐᕕᓐᓂ ᐅᕝᕙᓘᓐᓃᑦ ᐱᓕᕆᕝᕕᖏᓐᓂ ᐊᑐᐊᒐᐅᔪᓂᑦ ᐊᑐᖅᑕᐅᕙᑦᑐᓂᑦ ᐱᔾᔪᑎᖃᓪᓗᐊᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᓕᕆᔾᔪᑎᒋᕙᑦᑕᖏᓐᓂ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐱᓪᓗᒍ. ᐃᓱᒫᓗᓇᕐᒥᔪᖅ ᐅᑯᐊ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services), ᐋᔩᖅᑏᑦ ᐃᖅᑲᖅᑐᐃᕕᒻᒥ ᐊᒻᒪ ᐅᖃᐅᔾᔪᐃᒋᐊᖅᑏᑦ ᐊᑐᐊᒐᖃᖏᒻᒪᑕ ᐊᐅᓚᑦᑎᔾᔪᑎᓂᑦ ᐊᐅᓚᑦᓯᔾᔪᑎᖏᓐᓂᑦ, ᐱᓪᓗᐊᑕᐅᔪᓂᑦ ᐱᑕᖃᕋᓂᓗ ᐱᓕᒻᒪᑦᓴᐃᑎᑦᓴᓂᑦ ᐱᓕᕆᐊᑦᓴᒥᑦ ᐃᖅᑲᓇᐃᔭᖅᑎᖏᓐᓅᖓᔪᒥᑦ ᖃᓄᖅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᓂᑦ ᐊᐅᓚᑦᑎᒋᐊᖃᕐᒪᖔᑕ.

ᐊᑐᖁᔭᖅ #16: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᓕᐅᕆᐊᓖᑦ ᑲᓇᑕᒥ, ᐱᓕᕆᕝᕕᖃᕐᕕᓐᓂ ᐊᒻᒪ ᐸᓖᓯᖃᕐᕕᓐᓂ, ᒪᓕᓪᓗᑎᒃ ᐱᑕᖃᕆᐊᖃᕐᓂᖏᓐᓂᑦ, ᐊᐅᓚᑦᓯᔾᔪᑎᑦᓴᓂᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᓂᑦ ᐃᖅᑲᖅᑐᐃᕕᒻᒥᑦ ᐊᒻᒪ ᒪᓕᒐᓕᕆᓂᒃᑰᖏᑦᑐᖅ ᐊᑭᓕᕐᓱᐃᑎᓂᑦ.

ᐊᑐᖁᔭᖅ #17: ᐊᑐᐊᒐᐃᑦ ᖃᓄᖅ ᐊᐅᓚᑕᐅᒋᐊᖃᕐᒪᖔᑕ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐃᖅᑲᖅᑐᐃᕕᒻᒥ ᐱᑕᖃᕆᐊᓕᐅᒐᓗᐊᑦ ᑎᑎᕋᕐᓯᒪᔪᓂᑦ ᓴᐳᒻᒥᑦᓯᔾᔪᑎᑦᓴᓂᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ ᑭᒃᑯᑐᐃᓐᓇᕐᓂᒃ, ᐱᖃᓯᐅᔾᔭᐅᓗᓂ ᐊᑐᕆᐊᖃᖅᑎᑕᐅᔪᖅ ᑭᒃᑯᑐᐃᓐᓇᐃᑦ ᑕᑯᒋᐊᕐᓯᒪᖁᔭᐅᕙᓪᓗᑎᒃ ᒪᓕᒐᓕᕆᔨᓂᑦ ᐊᑎᓕᐅᓚᐅᖏᓐᓂᖏᓐᓂ ᐱᑎᑕᐅᔾᔪᑎᒥᑦ ᐊᖏᕈᑎᒥᑦ, ᐅᕝᕙᓘᓐᓃᑦ ᐅᖃᐅᓯᖃᕐᓗᑎᒃ ᐊᑐᕈᓐᓃᑎᑦᓯᓗᑎᒃ ᑖᑦᓱᒥᖓ ᐱᔪᓐᓇᐅᑎᒥᓂᒃ. ᐊᑐᐊᒐᐃᑦ ᐱᑕᖃᕆᐊᖃᕐᒥᔪᑦ ᑎᑎᕋᕐᓯᒪᔪᓂᑦ ᐱᓕᕆᔾᔪᑎᑦᓴᖏᓐᓂᑦ ᐊᐅᓚᑦᓯᔨᐅᔪᑦ ᐊᒻᒪ ᖃᐅᔨᓴᖅᑎᐅᔪᑦ ᓇᓗᓇᐃᕐᓯᒪᕙᓐᓂᒃᑯᑦ ᑭᒃᑯᑐᐃᓐᓇᐃᑦ ᑐᑭᓯᒪᑦᑎᐊᕆᐊᖃᕐᓂᖏᓐᓂᑦ ᐅᐸᓗᖓᐃᔭᐅᑎᒥᑦ ᐊᒻᒪ ᑕᐃᒎᓯᐅᔪᑦ ᑎᑎᕋᕐᓯᒪᔪᑦ ᐱᑎᑕᐅᔾᔪᑎᐅᖁᔭᐅᔪᓂ.

ᐊᑐᖁᔭᖅ #18: ᐱᓕᒻᒪᑦᓴᐃᑎᑦᓴᓂᑦ ᐋᖅᑭᑦᓱᐃᒋᐊᓖᑦ ᐊᒻᒪ ᐱᒋᐊᖅᑎᑕᐅᓗᑎᒃ ᐃᖅᑲᓇᐃᔭᖅᑎᓄᑦ ᐱᓕᕆᐊᖃᖅᐸᑦᑐᓄᑦ ᐊᑭᓕᖅᑕᐅᔾᔪᑎᑦᓴᓂᑦ ᐊᐅᓚᑦᓯᓪᓗᑎᒃ.

[322] ᔪᓂ 4, 2020, A.B. ᐊᓂᑎᑕᐅᓚᐅᖅᑐᖅ ᕿᑭᖅᑕᓂ ᐋᓐᓂᐊᕕᒻᒥᑦ ᐃᖃᓗᓐᓂ. ᐅᓪᓗᒐᓚᓐᓄᑦ, ᑐᔪᕐᒥᓚᐅᖅᑐᖅ ᑕᒻᒫᑕᕝᕕᒃ ᑐᔪᕐᒥᕕᒻᒥ, ᐋᓐᓂᐊᕕᐅᑉ ᖃᓂᒋᔮᓃᑦᑐᖅ ᐋᓐᓂᐊᕕᐅᒐᓂ ᐱᓕᕆᕝᕕᒃ. ᐃᓱᒪᓚᐅᖅᑐᖅ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᔪᒪᒋᐊᑦᓴᖅ ᐊᒻᒪ ᐋᓐᓂᐊᕕᒻᒧᑦ ᐅᓂᑦᑎᑕᐅᒃᑲᓐᓂᓚᐅᖅᑐᖅ ᔪᓂ 7, 2020. ᔪᓂ 9, 2020, ᐃᖕᒥᓂᒃ ᐊᓂᑎᓚᐅᖅᑐᖅ ᐊᒻᒪ ᐅᑎᖅᑐᓂ ᑐᔪᕐᒥᕕᒻᒧᑦ. ᔪᓂ 11, 2020, A.B. ᐅᓂᑦᑎᑕᐅᓚᐅᖅᑐᖅ ᐊᑲᐅᓯᓴᕐᕕᒃ ᐃᓱᒪᓕᕆᔪᓄᑦ ᒪᒥᓴᕐᕕᒻᒧᑦ ᐱᓕᕆᕝᕕᒻᒧᑦ.

[323] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᑎᖅᑲᖏᓐᓂ ᓇᓗᓇᐃᔭᐃᓯᒪᔪᑦ ᐸᓖᓰᑦ ᐅᖃᖃᑎᒌᓐᓂᕐᒪᑕ ᖃᓄᐃᒍᑎᐅᓯᒪᔪᑦ ᐃᓚᒋᔭᐅᓗᓂ A.B. ᓴᖅᑮᑐᐃᓐᓇᕆᐊᖃᕐᒪᑕ ᒪᓕᒐᑎᒍᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᒋᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ. ᐃᓱᒪᓕᐅᕆᓕᓚᐅᖅᑐᑦ ᖃᐅᔨᒋᐊᖁᔭᐅᓗᓂ A.B. ᐱᔾᔪᑎᐅᔪᖅ ᐋᖅᑭᑦᑕᐅᔪᓐᓇᖏᒃᑲᓗᐊᕐᒪᖔᖅ ᐱᓕᕆᔾᔪᑎᓂᑦ ᐊᑐᖏᓪᓗᑎᒃ ᐃᖅᑲᖅᑐᐃᕕᒃᑯᑦ; A.B. ᖃᐅᔨᒋᐊᖅᑕᐅᒐᔭᖅᑐᖅ ᓈᒻᒪᑦᓴᕋᔭᕐᒪᖔᖅ ᑮᓇᐅᔭᑎᒍᑦ ᐋᖅᑭᑦᓱᐃᔾᔪᑎᐅᓗᓂ.

[324] ᑕᕝᕘᓇᓕ, ᓄᓇᓕᖃᕐᕕᓐᓂ ᐊᐅᓚᑦᓯᔨᐅᔪᖅ ᐅᑯᓇᓂ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services), ᐅᕙᓂ "K" ᐱᓕᕆᕝᕕᒻᒥ (ᐃᐅᓪᐴᕐᑕ)^{Footnote 48} ᐅᖄᓚᓕᓚᐅᖅᑐᖅ A.B.-ᒧᑦ ᔪᓂ 18, 2020. A.B. ᐅᖄᓚᓕᓚᐅᖅᑐᖅ ᐊᐅᓚᑦᓯᔨᒥᑦ ᐅᖃᐅᓯᖃᒃᑲᓐᓂᕈᒪᓪᓗᓂ ᐱᔾᔪᑎᐅᔪᓂᑦ ᔪᓂ 24, 2020. ᐅᖃᖃᑎᒌᓐᓂᒃᑯᑦ, ᐊᐅᓚᑦᓯᔨᐅᔪᖅ ᐱᑎᑦᓯᒍᒪᓚᐅᖅᑐᖅ A.B.-ᒥᑦ $7,000-ᓂᑦ ᑮᓇᐅᔭᓂᑦ ᐋᖅᑭᑦᑕᐅᔾᔪᑎᒋᓂᐊᕐᓗᒍ ᐱᔾᔪᑎᐅᔪᒥᑦ.

[325] ᑕᒪᓐᓇ ᖃᐅᔨᒋᐊᕐᓂᐅᔪᖅ A.B.-ᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᓴᖅᑮᓚᐅᖅᑐᑦ ᐃᓱᒫᓘᑎᐅᔪᓂᑦ A.B. ᒫᓐᓇᐅᔪᖅ ᒪᓕᒐᓕᕆᔨᖏᓐᓂᑦ. ᐱᓗᐊᖅᑐᒥ, ᐃᓱᒫᓘᑎᖃᓚᐅᖅᑐᖅ ᐱᔾᔪᑎᖃᖅᑐᓂ ᖃᓄᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᐸᑦᓯᔪᒥᓂᐅᓂᖏᓐᓂᑦ A.B.-ᒥᑦ (ᓲᕐᓗ ᒪᓕᒐᓕᕆᔨᓂᑦ ᐱᑕᖃᖅᑎᓐᓇᒍ), ᐊᒻᒪᑦᑕᐅᖅ ᐱᔾᔪᑎᒋᓪᓗᒍ ᖃᓄᐃᒍᓐᓇᕐᓂᖓᓄᑦ ᑕᐃᑦᓱᒪᓂᐅᑎᓪᓗᒍ. ᖃᐅᔨᓴᖅᑏᑦ ᑕᑯᒋᐊᓚᐅᖅᑐᑦ ᐱᔾᔪᑎᐅᔪᒥᑦ ᓇᓗᓇᐃᕐᓯᒪᒍᒪᓪᓗᑎᒃ ᒫᓐᓇᐅᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ ᐊᒻᒪ ᐱᓕᕆᔾᔪᑎᖏᑦ ᐅᓗᕆᐊᓇᖅᑐᖃᖏᒃᑲᓗᐊᕐᒪᖔᑕ ᐅᓗᕆᐊᓇᖅᑐᒦᒍᓐᓇᖅᑐᓄᑦ ᑭᒃᑯᑐᐃᓐᓇᕐᓄᑦ ᐱᓇᓱᐊᕐᓯᒪᒋᐊᓕᓐᓂᑦ ᐊᑭᓕᖅᑕᐅᔾᔪᑎᑦᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ.

[326] A.B. ᒪᓕᒐᓕᕆᔨᖓ ᐅᖃᓚᐅᖅᑐᖅ ᐋᖅᑭᒍᑎᐅᖁᔭᐅᔪᒥᑦ ᐅᖃᐅᓯᖃᓚᐅᕐᒪᑕ ᓱᓕ A.B. ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᐃᑦᓱᒪᓂᐅᑎᓪᓗᒍ ᖃᐅᔨᓴᖅᑏᑦ ᖃᐅᔨᓴᖅᑎᓪᓗᒋᑦ.

[327] ᐊᐅᓚᑦᓯᔨ ᐅᖃᐅᔾᔨᓚᐅᖅᑐᖅ ᖃᐅᔨᓴᖅᑎᓂᑦ ᐅᖄᓚᕕᒋᓚᐅᕋᒥᐅᒃ A.B. ᔪᓂ 18, 2020, ᐅᕙᓃᑎᓪᓗᒍ "ᐱᓕᕆᕝᕕᒻᒥ." ᐊᐱᕆᓕᓚᐅᖅᑐᖅ ᑕᐃᑦᓱᒥᖓ ᑭᐅᔪᒥᑦ ᐅᖄᓚᐅᒻᒥᑦ A.B. ᑐᓵᔨᖃᕆᐊᖃᕐᓂᐊᕐᒪᖔᖅ. ᑕᐃᓐᓇ ᐱᓕᕆᕝᕕᒻᒦᑦᑐᖅ ᐅᖃᓚᐅᖅᑐᖅ A.B. ᖃᓪᓗᓇᐅᔭᕈᓐᓇᕐᒪᑦ ᑭᓯᐊᓂ ᑐᓵᔨᖃᕈᒪᒐᔭᕐᒪᖔᖅ ᐅᖃᐅᑎᒐᔭᕋᒥᐅᒃ. ᐊᐅᓚᑦᓯᔨᐅᔪᖅ ᐅᖃᐅᓯᖃᓚᐅᖅᑐᖅ A.B. ᐊᐱᕆᓚᐅᖏᒻᒪᑦ ᑐᓵᔨᖃᕈᒪᓂᕋᖅᑐᓂ ᐅᖃᖃᑎᒌᑦᑎᓪᓗᒋᒃ, ᐊᒻᒪ ᑐᑭᓯᐊᕙᓗᓐᓂᕐᒪᑦ ᐅᖃᖃᑎᒌᒍᑎᐅᔪᒥᑦ. ᐅᖃᐅᔾᔪᐃᔾᔪᑎᖓ ᒪᓕᑦᑐᒍ ᒪᓕᒐᓕᕆᔨᐅᑉ ᐃᖅᑲᖅᑐᐃᕕᓕᕆᔨᒃᑯᓐᓂᑦ ᐱᓯᒪᔪᒥᑦ, ᐊᐅᓚᑦᓯᔨ ᐅᖃᕈᒪᓚᐅᖏᑦᑐᖅ ᖃᐅᔨᓴᖅᑎᓄᑦ ᐃᓗᓕᖏᓐᓂᑦ ᓯᕗᓪᓕᕐᒥ ᐅᖃᐅᓯᕆᓚᐅᖅᑕᖏᓐᓂᑦ ᐊᐃᑉᐸᕆᓪᓗᒍ A.B.

[328] ᐊᐱᕐᓱᑕᐅᓗᓂ ᖃᐅᔨᓴᖅᑎᓄᑦ, A.B. ᐅᖃᓚᐅᖅᑐᖅ ᐃᖅᑲᐅᒪᖏᓐᓂᕋᖅᑐᓂᐅᒃ ᓯᕗᓪᓕᕐᒥ ᐅᖃᖃᑎᖃᕐᓂᕋᓗᐊᕋᒥ ᐊᐅᓚᑦᓯᔨᒥᑦ.

[329] ᐋᓐᓂᐊᔪᓕᕆᔨᓂᑦ ᐱᓕᕆᔾᔪᑎᒥᓂᐅᔪᑦ ᑕᑯᑦᓴᐅᑎᑦᓯᔪᑦ, ᐊᑕᐅᓯᐊᕋᑎᒃ ᐅᓪᓗᓂ ᐊᑐᖅᑕᐅᔪᓂ ᓯᕗᓪᓕᕐᒥ ᐅᖄᓚᔪᖃᓚᐅᖅᑎᓪᓗᒍ, A.B. ᐅᖃᐅᓯᖃᓚᐅᖅᑐᖅ ᑕᒪᑦᓱᒥᖓ ᐃᖅᑲᓇᐃᔭᖅᑎᓄᑦ. ᐊᑕᐅᓯᐊᕋᓗᐊᖅᑐᓂ ᐊᐱᕆᓚᐅᖅᑐᖅ ᐋᓐᓂᐊᓯᐅᖅᑎᒥᑦ, "ᓱᓇᐅᒻᒪᑦ ᐊᑭᓕᖅᑕᐅᓂᖅ?" ᐊᒻᒪ ᐅᖃᐅᓕᓪᓗᓂᐅᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᑎᑦᓯᓛᕐᓂᖏᓐᓂᑦ ᑮᓇᐅᔭᓂᑦ ᖃᓄᐃᓕᔪᕕᓂᐅᓂᖓ ᐱᔾᔪᑎᐅᓗᓂ. ᐋᓐᓂᐊᓯᐅᖅᑎ ᐅᖃᓚᐅᖅᑐᖅ ᐊᑭᓕᖅᑕᐅᓂᖅ ᑐᑭᖃᕋᔪᒻᒪᑦ ᑮᓇᐅᔭᓂᑦ, ᐊᒻᒪ ᐊᐱᕆᓕᓚᐅᖅᑕᖓ A.B. ᑕᐃᒃᑯᐊ ᓈᒻᒪᒃᑲᔭᕋᓗᐊᕐᒪᖔᑕ; A.B. ᐊᖏᖅᑐᒥᓂᐅᓂᕋᖅᑕᖅ, ᓈᒻᒪᒃᑲᔭᕐᒪᑕ.

[330] ᐅᓪᓗᕐᓂ ᐊᓂᒍᖅᐸᓪᓕᐊᔪᓂ, A.B. ᐊᐱᕆᕙᑦᑐᒥᓂᖅ ᐃᖅᑲᓇᐃᔭᖅᑎᓂᑦ ᖃᐅᔨᒋᐊᖁᓪᓗᓂᐅᒃ ᐊᐅᓚᑦᓯᔨ, ᐅᖄᓚᔪᕕᓂᐅᔪᖅ ᓯᕗᓂᐊᒍᑦ ᑖᑦᓱᒧᖓ ᐊᒻᒪ ᐅᖃᖅᑐᒥᓂᐅᓗᓂ ᐅᖄᓚᕕᒋᓛᕋᒥᐅᒃ ᐱᓇᓱᐊᕈᓯᖅ ᐊᓂᒍᖅᐸᑦ. ᐱᓕᕆᔾᔪᑎᐅᔪᑦ ᓇᓗᓇᐃᔭᐃᓯᒪᔫᔮᖅᑐᑦ ᐋᓐᓂᐊᓯᐅᖅᑎᒧᑦ ᐅᖄᓚᕕᐅᓐᓂᕆᐊᖓ ᐊᐅᓚᑦᓯᔨᐅᔪᖅ, ᑕᐃᓐᓇᓕ ᐅᖃᖅᑐᒥᓂᖅ ᐊᕐᓇᒧᑦ A.B. ᐊᓯᐊᓄᑦ ᐋᓐᓂᐊᓯᐅᖅᑎᒧᑦ ᐅᖄᓚᕕᐅᓕᖅᑐᒥᓂᖅ A.B. ᒪᓕᒐᓕᕆᔨᖓ (ᒪᓕᒐᓕᕆᔨᒋᓚᐅᖅᑕᖓ ᑕᐃᑦᓱᒪᓂᐅᑎᓪᓗᒍ), ᒫᓐᓇᐅᖏᑦᑐᖅ ᒪᓕᒐᓕᕆᔨᖓ) ᑭᓯᐊᓂ ᑭᐅᔭᐅᓚᐅᖏᑦᑐᖅ. ᑕᐃᓐᓇ ᐋᓐᓂᐊᓯᐅᖅᑎ ᐅᖄᓚᓕᖅᑐᒥᓂᖅ ᐊᐅᓚᑦᓯᔨᒧᑦ, ᑕᐃᓐᓇᓕ ᐅᖃᖅᑐᒥᓂᐅᓂᕋᖅᑕᖅ ᐊᕐᓇᒧᑦ A.B. ᐅᖃᖃᑎᖃᕆᐊᖃᕐᓂᖓᓄᑦ ᒪᓕᒐᓕᕆᔨᒥᓂᒃ ᓯᕗᒧᒋᐊᒃᑲᓐᓂᓚᐅᖏᓂᕐᒥᓂ.

[331] ᐊᑕᐅᑦᑎᒃᑯᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᐅᔨᓴᕆᐊᓕᓚᐅᖅᑐᑦ ᐸᓯᐅᕆᔾᔪᑎᐅᓯᒪᔪᓂᑦ A.B. ᐅᖃᐅᓯᕆᓯᒪᔭᖏᓐᓂᑦ ᐱᔾᔪᑎᖃᖅᑐᓂ ᐃᓚᖏᓐᓂᑦ ᖃᓄᐃᒍᑎᐅᓯᒪᔪᓂᑦ. ᑕᒪᒃᑯᐊ ᐸᓯᐅᕆᔾᔪᑎᐅᔪᑦ ᖃᓄᐃᑦᑐᖃᕐᓂᕋᐃᓯᒪᔪᑦ ᐊᑦᑐᐊᖏᑦᑐᑦ ᒫᓐᓇᐅᔪᖅ ᖃᓄᐃᒍᑎᐅᓯᒪᔪᒥᑦ. ᖃᐅᔨᓴᖅᑎᒥᑦ, ᑳᓐᔅᑕᐳᓪ ᓈᓐᓯ ᕉ, ᐊᐱᕐᓱᓚᐅᖅᑑᒃ A.B.-ᒥᑦ ᔪᓂ 11, 2020. ᓇᓗᓇᐃᕐᓯᓚᐅᖅᑐᖅ ᑐᓪᓕᐊᓂᑦ ᐊᐱᕐᓱᕆᐊᖃᕋᒥᐅᒃ ᐱᓇᓱᐊᕐᕕᒋᓗᒍ ᓇᓗᓇᐃᔭᕐᓯᒪᓂᕐᓴᐅᔪᓂᑦ A.B.

[332] A.B. ᐅᖄᓚᓕᓚᐅᖅᑐᖅ ᑳᓐᔅᑕᐳᓪ ᕉᒧᑦ ᔪᓂ 24, 2020, ᐊᒻᒪ ᐊᐱᕆᓪᓗᓂᐅᒃ ᑲᑎᒍᓐᓇᕐᒪᖔᑎᒃ ᐊᑲᐅᓯᓴᕐᕕᒃ ᐃᓱᒪᓕᕆᓂᕐᒥᑦ ᒪᒥᓴᕐᕕᒻᒥ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯ ᐅᐸᓚᐅᖅᑐᖅ ᐊᒻᒪ ᐃᓚᒋᓪᓗᓂᐅᒃ A.B. ᐅᖃᐅᓯᖃᓚᐅᖅᑑᒃ ᐊᔾᔨᒌᖏᑦᑐᓂᑦ ᐅᖃᐅᓯᖃᖅᑐᑎᒃ. A.B. ᐅᖃᓚᐅᖅᑐᖅ ᑐᓴᕈᒪᒐᒥ ᐊᑭᓕᕐᓱᐃᓕᕆᔪᓂᑦ ᐊᒻᒪ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᒪᓂᕋᓚᐅᖅᑐᖅ. ᐊᐱᕆᓚᐅᖅᑕᖓ ᑳᓐᔅᑕᐳᓪ ᕉ ᒪᓕᒐᓕᕆᔪᓐᓇᕐᒪᖔᒍ. ᐅᖃᖃᑎᖃᕈᒪᓚᐅᖅᑐᖅ ᐊᐅᓚᑦᓯᔨᖓᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ; ᑎᑎᖅᑲᕋᓛᓂᑦ ᐱᓯᒪᑦᓯᓚᐅᖅᑐᖅ ᐊᔾᔨᒌᖏᑦᑐᓂᑦ ᐅᖄᓚᐅᑎᓕᓐᓂᑦ, ᐱᖃᓯᐅᔾᔭᐅᓗᓂ ᐅᖄᓚᐅᑎᖓ ᒪᓕᒐᓕᕆᔨᐅᑉ.

[333] A.B. ᐊᑐᓕᓚᐅᖅᑐᖅ ᑳᓐᔅᑕᐳᓪ ᕉ ᐅᖄᓚᐅᑎᕋᓛᖓᓂᑦ ᐊᔭᒻᒥᓄᑦ ᐅᖄᓚᓪᓗᓂ, ᐅᖄᓚᓪᓗᓂ ᑐᓴᖅᓴᐅᑎᑦᑐᓂᐅᒃ ᐅᖄᓚᖃᑎᓂ. ᐅᖄᓚᒌᕋᒥᒃ, ᐅᖄᓚᐅᑎᓂ ᓴᖅᑭᓕᓚᐅᖅᑕᖓ ᐊᒻᒪ ᑕᑯᓐᓇᕐᕕᒋᓕᖅᑐᓂᐅᒃ ᑕᕐᕆᔭᕐᒥᒃ, ᐊᐱᕆᓪᓗᓂᐅᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᑕᑯᓐᓇᖃᑎᒋᔪᒪᒻᒪᖔᒍ.

[334] ᐅᖃᐅᓯᖃᒃᑲᓐᓂᓚᐅᖅᑐᑦ ᐊᑭᓕᖅᑕᐅᔾᔪᑎᑦᓴᓂᑦ. A.B. ᐅᖃᓚᐅᖅᑐᖅ ᑳᓐᔅᑕᐳᓪ ᕉᒧᑦ ᓂᐅᕕᕈᒪᒐᔭᕋᒥ ᐊᐅᐸᖅᑐᒥᑦ, ᑎᓴᒪᓂᑦ (4) ᒪᑐᓕᒻᒥᑦ ᓄᓇᒃᑰᔫᒥᑦ ᑖᔾᕋᔭᒻᒥᑦ ᐱᑎᑕᐅᒍᓂ ᐊᑭᓕᖅᑕᐅᔾᔪᑎᓂᑦ. ᐅᖄᓚᒍᒪᓕᓚᐅᖅᑐᖅ ᐊᐅᓚᑦᓯᔨᒧᑦ, ᐊᐱᕆᓕᓚᐅᖅᑕᖓ ᑳᓐᔅᑕᐳᓪ ᕉ ᐅᖄᓚᐅᑎᖓᓂᑦ ᐊᑐᑲᐃᓐᓇᕈᓐᓇᕐᒪᖔᖅ. ᐊᖏᓚᐅᖅᑐᖅ. A.B. ᐃᓚᖓᓐᓂᑦ ᓈᓴᐅᑎᓂᑦ ᓇᕿᑦᑕᐃᓚᐅᖅᑐᖅ ᑎᑎᕋᕐᓯᒪᔪᒥᑦ, ᐊᒻᒪ ᐊᐅᓚᑦᑎᔨ ᑭᐅᓗᓂ. A.B. ᐅᖄᓚᐅᑎᒥᑦ ᓂᐱᖅᑯᖅᑐᓂᖓᓃᑎᑦᓯᓚᐅᖅᑐᖅ ᑐᓴᕐᓴᐅᓗᓂ ᐅᖄᓚᖃᑎᖓ.

[335] ᒪᓕᑦᑐᒋᑦ ᐅᖃᐅᓯᖏᑦ ᑳᓐᔅᑕᐳᓪ ᕉ, ᐊᐅᓚᑦᑎᔨ ᐊᐱᕆᓚᐅᖅᑐᖅ A.B.-ᒥᑦ ᖃᓄᐃᓕᕐᒪᖔᖅ ᑎᒥᒃᑯᑦ ᐊᒻᒪ ᐃᓱᒪᒃᑯᑦ, ᖁᕕᐊᓱᒃᑲᓗᐊᕐᒪᖔᖅ ᐱᓕᕆᕝᕕᒻᒥ, ᐊᒻᒪ ᐱᐅᓯᕚᓪᓕᕐᓯᒪᒻᒪᖔᖅ. ᐊᐱᕆᓚᐅᖅᑐᖅ ᐅᖃᖃᑎᖃᕐᓂᕐᒪᖔᖅ ᒪᓕᒐᓕᕆᔨᒥᑦ, ᐊᒻᒪ A.B. ᐅᖃᓚᐅᖅᑐᖅ ᐅᖃᖃᑎᖃᓚᐅᖏᓐᓇᒥ ᑭᓯᐊᓂ ᑲᔪᓯᒍᒪᒐᒥ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕐᓂᕐᒥᑦ. ᐊᐅᓚᑦᑎᔨ ᐊᐱᕆᓚᐅᖅᑐᖅ A.B. ᐃᓱᒪᓯᒪᒻᒪᖔᖅ ᓈᓴᐅᑎᒥᑦ ᐊᒻᒪ ᐅᖃᓚᐅᖅᑐᖅ ᐃᓱᒪᓯᒪᖏᓐᓇᒥ. ᐊᐅᓚᑦᑎᔨ ᐅᖃᓚᐅᖅᑐᖅ ᐊᑭᓕᖅᑕᐅᔾᔪᑎ ᐱᓇᓱᐊᖅᑕᐅᔪᖅ ᓈᒻᒪᒃᑲᔭᕐᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᓄᐃᒍᑎᒋᓚᐅᖅᑕᖓᓄᑦ ᐊᒻᒪᑦᑕᐅᖅ ᖃᓄᐃᒍᑎᐅᓚᐅᖅᑐᒧᑦ ᐃᓪᓗᕈᓯᕐᓂ ᑎᒍᔭᐅᒪᕕᒻᒥ; A.B. ᐅᖃᓚᐅᖅᑐᖅ ᑐᑭᓯᓂᕋᖅᑐᓂ.

[336] ᐊᐅᓚᑦᑎᔨ ᐅᖃᕆᐊᓚᐅᖅᑐᖅ, ᒪᓕᑦᑐᒋᑦ A.B. ᐋᓐᓂᕐᓯᒪᓂᖏᑦ ᐊᒻᒪ ᐊᑲᐅᖏᓕᐅᕈᑎᐅᔪᖅ, ᑐᓂᓯᒍᓐᓇᕐᓂᕋᓚᐅᖅᑕᖓ ᑮᓇᐅᔭᓂᑦ $5,000-ᓂᑦ. ᒪᓕᑦᑐᒋᑦ ᑳᓐᔅᑕᐳᓪ ᕉ ᐅᖃᐅᓯᖏᑦ, A.B. ᐃᔨᖏᒃ "ᖃᐅᒻᒪᓚᐅᖅᑑᒃ" ᐊᒻᒪ ᐅᖃᓚᐅᖅᑐᖅ ᑖᒃᑯᓂᖓ ᐱᔪᓐᓇᓂᕐᒥᓂᒃ. ᐊᐅᓚᑦᑎᔨ ᐊᔭᐅᕐᓱᐃᓕᓚᐅᖅᑐᖅ A.B.-ᒥᑦ ᐅᖃᖃᑎᖃᖁᓪᓗᓂᐅᒃ ᒪᓕᒐᓕᕆᔨᒥᑦ, ᑭᓯᐊᓂ ᐱᑎᒍᓐᓇᖅᑕᖓ ᑎᑎᖅᑲᓂᑦ ᑐᑭᓯᓯᒪᓗᑎᒃ ᐊᓯᐊᒍᑦ ᐊᑭᓕᖅᑕᐅᔾᔪᑎᑦᓴᓂᑦ ᐱᓇᓱᐊᕐᓂᐊᖏᓐᓂᖓᓄᑦ ᑎᑎᖅᑲᐃᑦ ᐊᑎᓕᐅᖅᑕᐅᔭᕇᑐᐊᖅᐸᑕ. A.B. ᐅᖃᓚᐅᖅᑐᖅ ᑐᑭᓯᓂᕋᖅᑐᓂ, ᐊᒻᒪ ᐊᐱᕆᓚᐅᖅᑐᖅ ᐱᑎᑕᐅᔪᓐᓇᕐᒪᖔᕐᒥ ᐃᒻᒪᖄ $10,000-ᓂᑦ. ᐊᐅᓚᑦᑎᔨ ᐊᖏᓚᐅᖅᑐᖅ $7,000-ᓄᑦ ᐊᒻᒪ ᐅᖃᖅᑐᓂ A.B. ᒪᓕᒐᓕᐅᖅᑎᒥᓂᒃ ᐅᖄᓚᖁᔨᒋᐊᓕᒃ ᑖᑦᓱᒥᖓ ᐊᕐᓇᕐᒥᒃ. ᐊᐅᓚᑦᑎᔨ ᐱᑎᑦᓯᓕᓚᐅᖅᑐᖅ ᐅᖄᓚᐅᑎᐅᑉ ᓈᓴᐅᑎᖓᓂᑦ ᒪᓕᒐᓕᕆᓂᕐᒥᑦ ᐱᔨᑦᓯᕋᖅᑏᑦ ᑲᑎᒪᔨᖏᓐᓄᑦ ᓄᓇᕘᒥ (ᒪᓕᒐᓕᕆᓂᕐᒥᑦ ᐃᑲᔪᖅᑏᑦ), ᑳᓐᔅᑕᐳᓪ ᕉ ᑎᑎᕋᓕᓚᐅᖅᑕᖓ ᐸᐃᑉᐹᒧᑦ.

[337] ᐅᖃᓚᐅᑎᓚᐅᖅᑎᓪᓗᒋᒃ A.B. ᐊᒻᒪ ᐊᐅᓚᑦᑎᔨ, ᑳᓐᔅᑕᐳᓪ ᕉ ᐊᔭᐅᕐᓱᐃᔪᒻᒪᕆᐅᓚᐅᖅᑐᖅ A.B.-ᒥᑦ ᖃᐅᔨᒋᐊᖁᓪᓗᓂᐅᒃ ᐃᓱᒪᒋᔭᖏᓐᓂᑦ ᒪᓕᒐᓕᐅᖅᑎᐅᑉ. ᑐᑦᓯᕋᓚᐅᖅᑐᖅ ᒪᓕᒐᓕᕆᔨ ᑭᒡᒐᖅᑐᐃᔨᖓ ᑕᐃᑦᓱᒪᓂ ᐅᖄᓚᒐᒥ. ᑳᓐᔅᑕᐳᓪ ᕉ ᓇᓗᓇᐃᔭᐃᓚᐅᖅᑐᖅ A.B. ᐱᐅᓯᖓ ᖃᐅᒻᒪᑲᓐᓂᖅᑑᔮᓚᐅᖅᑐᖅ ᐊᒻᒪ ᐅᖃᖅᑐᓂ ᖃᐅᑉᐸᐅᓛᕐᓂᖓᓄᑦ ᖁᕕᐊᒋᓂᕋᖅᑐᓂᐅᒃ.  

ᐊᑭᓕᖅᑕᐅᔾᔪᑎᑦᓴᓂᑦ ᐱᓇᓱᐊᕐᓂᕐᒥᑦ ᐅᐸᓗᖓᐃᔭᐅᑎ

[338] ᑮᓇᐅᔭᓕᕆᓂᕐᒥᑦ ᑲᑎᒪᔩᑦ ᑎᑎᕋᖅᑎᖏᑕ ᐊᑐᐊᒐᖓᑦ ᑕᐃᔭᐅᔪᖅ ᐊᑐᐊᒐᐃᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕐᓂᕐᒥᑦ ᐊᐅᓚᑦᑎᔾᔪᑎᐅᔪᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᓂᑦ ᐃᖅᑲᖅᑐᐃᕕᓕᕆᔨᓂᑦ ᐃᓚᒋᔭᐅᑎᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ. ᐅᖃᓚᐅᖅᑐᖅ ᐊᐅᓚᑦᓯᔨᐅᔪᑦ ᑎᓕᔭᐅᓯᒪᔪᑦ ᐱᔪᓐᓇᐅᑎᖃᖅᑎᑕᐅᓗᑎᒃ ᐊᑭᓕᕐᓱᐃᔪᓐᓇᓂᕐᒥᑦ ᐱᓇᓱᐊᒐᐅᔪᓂᑦ ᐃᒪᐃᒋᐊᓖᑦ, ᐊᓯᖏᓐᓂᓪᓗ, "ᖃᓄᖅᑑᕙᒋᐊᓖᑦ ᓈᒻᒪᑦᑐᓂᑦ ᐱᓇᓱᐊᖅᐸᓪᓗᑎᒃ ᑮᓇᐅᔭᓂᑦ ᓈᒻᒪᑦᑐᓂᑦ ᐋᖅᑭᑦᓱᐃᓇᓱᐊᖅᑎᓪᓗᒋᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᓂᑦ" ᐊᒻᒪ "ᐃᓱᒪᑦᓴᕐᓯᐅᕈᑎᖃᖅᐸᓪᓗᑎᒃ ᐸᐃᑉᐹᓕᕆᔾᔪᑎᒍᑦ ᖃᓄᑎᒋ ᐱᓇᓱᐊᒐᐅᕙᑦᑐᓂᑦ ᐊᒻᒪ ᐊᑭᖏᑎᒍᑦ ᐱᕙᓪᓕᐅᑎᓂᖅᐹᖑᓇᓱᓪᓗᒋᑦ ᐋᖅᑭᑦᓱᐃᓗᓂ ᐅᕝᕙᓘᓐᓃᑦ ᐊᑭᓖᓂᐊᖅᑐᓂ ᐱᓇᓱᐊᒐᐅᔪᓂᑦ."^{Footnote 49} ᐊᑐᐊᒐᕐᒥ ᑎᑎᕋᕐᓯᒪᒻᒥᔪᑦ ᐊᐅᓚᑦᓯᔨ "ᐃᑉᐱᒍᓱᑦᑎᐅᔪᖅ ᐱᓕᕆᐊᑦᓴᓂᑦ ᐊᐅᓚᑦᓯᔨᐅᓗᓂ ᐅᓗᕆᐊᓇᑐᐃᓐᓇᕆᐊᓕᓐᓂᑦ ᐊᑦᑐᐊᔪᓂᑦ ᐱᓕᕆᐊᖃᖅᑐᓂ ᐱᓇᓱᐊᕈᑎᐅᔪᒥᑦ."^{Footnote 50} ᐊᐅᓚᑦᓯᔨᐅᔪᑦ ᖃᐅᔨᒋᐊᖏᓐᓇᕆᐊᓕᐅᔪᑦ ᐅᖃᐅᔾᔪᐃᔾᔪᑎᖏᓐᓂᑦ ᐱᓕᕆᕝᕕᓐᓂᑦ ᒪᓕᒐᓕᕆᓂᕐᒥᑦ ᐱᔨᑦᓯᕋᖅᑎᓂᑦ, ᑭᓯᐊᓂ ᐱᓇᓱᐊᕈᑎᐅᔪᖅ ᐃᖅᑲᖅᑐᐃᕕᒃᑰᕈᔾᔭᐅᒋᐊᖃᕐᓂᕈᓂ ᐅᕝᕙᓘᓐᓃᑦ ᐊᑭᓕᐅᑎᑦᓴᑦ ᐊᒥᓲᓂᕐᓴᐅᑉᐸᑕ $25,000-ᓂᑦ, ᐊᐅᓚᑦᓯᔨ ᕿᓂᕆᐊᓕᒃ ᒪᓕᒐᓕᕆᓂᕐᒥᑦ ᐱᔨᑦᓯᕋᖅᑎᓂᑦ.^{Footnote 51}

[339] ᒪᓕᒐᓕᕆᔨᓂᑦ ᐃᓱᒪᒋᔭᐅᔪᓂᑦ ᐱᓇᓱᐊᖅᑐᖃᕈᓂ, ᐅᖃᐅᓯᖃᕆᐊᓖᑦ:

• - ᐃᖅᑲᖅᑐᐃᑎᑦᓯᔨᐅᔪᑦ ᒪᓕᒐᑎᒍᑦ ᐊᑭᓖᒋᐊᖃᕐᓂᕈᑎᒃ;
• - ᐱᓕᕆᐊᑦᓴᑦ, ᐱᑕᖃᖅᐸᑦ, ᐱᓕᕆᐊᖑᒋᐊᓖᑦ ᐋᖅᑭᑦᑕᐅᖁᓪᓗᒍ ᐱᓇᓱᐊᕈᑎᐅᔪᖅ; ᐊᒻᒪ
• - ᑕᐃᒎᓯᖏᑦ ᐊᒻᒪ ᐊᑐᖅᑕᐅᒋᐊᓖᑦ ᐅᖃᐅᔾᔪᐃᔾᔪᑎᖃᕐᓗᑎᒃ ᖃᓄᖅ ᐋᖅᑭᑦᑕᐅᓂᐊᕐᒪᖔᖅ ᐱᓇᓱᐊᕈᑎᐅᔪᖅ, ᖃᖓᒃᑯᑦ ᐋᖅᑭᑦᑕᐅᔪᓐᓇᕐᒪᖔᖅ.^{Footnote 52}

[340] ᐊᑐᐊᒐᕐᒥ ᐅᖃᕐᓯᒪᔪᑦ, ᒪᓕᒐᓕᕆᔨᓄᑦ ᐃᓱᒪᒋᔭᐅᔪᑦ ᓇᓗᓇᐃᔭᐃᒍᑎᒃ ᒪᓕᒐᑎᒍᑦ ᐊᑭᓖᒋᐊᓕᓐᓂᑦ ᐃᖅᑲᖅᑐᐃᕕᓕᕆᔨᓂᑦ, ᐊᐅᓚᑦᓯᔨᐅᔪᖅ ᐅᑯᓂᖓ ᐱᓕᕆᐊᖃᕆᐊᓕᒃ ᐋᖅᑭᑦᑕᐅᖁᓪᓗᒍ ᐱᓇᓱᐊᕈᑎᐅᔪᖅ, ᒪᓕᑦᑐᒋᑦ ᐅᑯᐊ ᒪᓕᒋᐊᓖᑦ ᐊᑭᓕᕐᓱᐃᑎᓂᑦ ᐱᔾᔪᑎᖃᖅᑐᑦ:

• - ᓇᓗᓇᐃᖅᑕᐅᓗᑎᒃ ᐊᒥᓲᓂᖓ (ᖏᑦ) ᐊᑭᓕᐅᑎᑦᓴᑦ [ᑕᑯᖁᔪᑦ ᑎᑎᕋᕐᓯᒪᕕᒻᒦᑦᑐᑦ 6.6 ᐅᑯᓇᓂ ᐊᑐᐊᒐᕐᓂ ᑐᑭᓯᒋᐊᒃᑲᓐᓂᕈᒪᔪᓄᑦ]; ᐊᒻᒪ
• - ᖃᐅᔨᓴᖅᑕᐅᓗᑎᒃ ᐱᓕᕆᐊᖑᒐᔭᕐᓂᖏᓐᓂᑦ ᖃᓄᑎᒋ ᐊᒻᒪ ᐊᑭᖏᑎᒍᑦ ᐱᕙᓪᓕᐅᑎᔾᔪᑎᐅᔪᓂᑦ ᐊᑭᓕᐅᑎᐅᓂᐊᖅᑐᖅ ᐱᓪᓗᒍ.^{Footnote 53}

[341] ᐊᐅᓚᑦᓯᔨ ᐱᔭᕆᐊᖃᕋᔭᕐᒥᔪᖅ ᐊᑎᓕᐅᖅᑕᐅᓯᒪᔪᒥᑦ ᓴᒃᑯᓯᔾᔪᑎᒥᑦ ᐱᓇᓱᐊᖅᑐᒥᑦ.

[342] ᐃᓚᖓ A ᐅᑯᓄᖓ ᑮᓇᐅᔭᓕᕆᓂᕐᒥᑦ ᑲᑎᒪᔩᑦ ᑎᑎᕋᖅᑎᖏᑕ ᒪᓕᒋᐊᓖᑦ ᐊᑭᓕᕐᓱᐃᑎᓂᑦ ᐱᔾᔪᑎᖃᖅᑐᑦ ᐅᖃᕐᓯᒪᒻᒥᔪᑦ ᐊᖏᔪᖅᑳᖓᑦ ᑮᓇᐅᔭᓕᕆᔨᒻᒪᕆᐅᔪᖅ ᐱᓕᕆᕝᕕᒻᒥ ᐋᖅᑭᑦᓱᐃᒋᐊᖃᕐᒪᑦ ᐱᔾᔪᓯᐅᔪᓂᑦ ᐱᓇᓱᐊᕈᑎᐅᔪᑦ ᐱᓪᓗᒋᑦ ᐃᖅᑲᖅᑐᐃᕕᓕᕆᔨᓂᑦ ᐅᖃᐅᓯᖃᖅᑐᓂᑦ, ᐊᓯᖏᓐᓂᓪᓗ, ᐅᐸᓗᖓᐃᔭᐅᑎᒥᑦ ᐱᓕᕆᕝᕕᐅᑉ ᐃᓗᐊᓂ ᐅᓂᒃᑳᓕᐅᕈᑎᓂᑦ ᖃᓄᐃᒍᑎᐅᓯᒪᔪᓄᑦ ᐱᓇᓱᐊᕈᑎᒥᑦ ᐊᑭᓕᕐᓱᐃᒋᐊᖃᕐᓂᕈᑎᒃ ᐊᒻᒪ ᐅᐸᓗᖓᐃᔭᐅᑎᖓ ᖃᐅᔨᓴᐅᑎᓄᑦ.^{Footnote 54}

[343] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑭᒡᒐᖅᑐᐃᔩᑦ ᓱᓇᑐᐃᓐᓇᕐᓂᑦ ᑮᓇᐅᔭᓕᕆᔪᓂᑦ ᐊᑎᓕᐅᕈᓐᓇᓂᒃᑯᑦ ᐱᔪᓐᓇᐅᑎᓖᑦ ᐋᖅᑭᑦᓯᒪᔾᔪᑎ ᓇᓗᓇᐃᕐᓯᓯᒪᔪᑦ ᐱᓕᕆᕝᕕᒻᒥ ᐱᓇᓱᐊᖅᑕᐅᓯᒪᔪᓂᑦ ᐊᑭᓕᕐᓱᐃᔾᔪᑎᓂᑦ ᐊᐅᓚᑦᓯᔨᐅᔪᑦ "ᑮᓇᐅᔭᐃᔭᐅᑎᑦᓴᓂᑦ ᐱᒋᐊᕈᑎᓂᑦ ᐱᔪᓐᓇᐅᑎᓕᒃ" ᐱᓇᓱᐊᖅᑕᐅᓯᒪᔪᓂᑦ ᐃᖅᑲᖅᑐᐃᕕᓕᕆᔨᓂᑦ ᑎᑭᓯᒪᔪᓂᑦ ᖃᑦᓯᐅᓂᖏᒍᑦ $50,000-ᓄᑦ. ᐱᓕᕆᕝᕕᒻᒥ ᐱᓇᓱᐊᖅᑕᐅᔪᓂᑦ ᖃᐅᔨᓴᖅᑎᐅᔪᖅ ᐱᔪᓐᓇᐅᑎᖃᕈᓐᓇᖅᑐᖅ ᐊᑭᓕᕐᓱᐃᔾᔪᑎᓂᑦ ᑎᑭᒍᓐᓇᖅᑐᓄᑦ $25,000-ᓄᑦ.^{Footnote 55}

[344] ᑭᐅᔾᔪᑎᖏᓐᓂ ᖃᐅᔨᓴᖅᑏᑦ ᐊᐱᖅᑯᑎᖏᓐᓄᑦ, ᐊᐅᓚᑦᓯᔨᐅᔪᖅ ᐱᓕᕆᐊᖑᔪᒥ ᓇᓗᓇᐃᕐᓯᓚᐅᖅᑐᖅ ᐊᑭᓕᖅᓱᐃᑎᓂᑦ ᐱᑎᑦᓯᒍᓐᓇᕋᒥ ᑎᑭᒍᓐᓇᖅᑐᓄᑦ $50,000-ᓄᑦ. ᑕᐃᒪᐃᑦᑐᑦ ᐊᑭᓕᖅᓱᐃᑎᐅᔪᑦ ᐊᓯᖏᓐᓄᑦ ᐊᖏᖅᑕᐅᒋᐊᑐᖏᑦᑐᑦ, ᑭᓯᐊᓂ ᐊᑭᓕᖅᓱᐃᑎᑦᓴᖅ ᐊᒥᓲᓃᕐᓴᐅᒍᑎᒃ $25,000, ᐃᑲᔪᕐᓱᐃᔾᔪᑎᑦᓴᒥᑦ ᒪᓕᒐᓕᕆᔨᓄᑦ ᐃᓱᒪᒋᔭᐅᔪᓂᑦ ᐱᒋᐊᖃᕋᔭᖅᑐᑦ ᐃᖅᑲᖅᑐᐃᕕᓕᕆᓂᕐᒥᑦ ᐱᓕᕆᕝᕕᒻᒥᑦ. ᖃᓄᐃᓕᖓᒍᑎᐅᔪᑦ ᑐᑭᓯᒋᐊᕆᐊᖃᕋᑎᒃ ᐱᓕᕆᕝᕕᓐᓂᑦ ᒪᓕᒐᓕᕆᓂᕐᒥᑦ ᐱᔨᑦᓯᕋᖅᑎᓂᑦ ᐊᑐᐊᒐᑎᒍᑦ, (ᓲᕐᓗ ᐱᓕᕆᐊᖑᔪᓂ ᐊᑭᓕᖅᓱᐃᑎᓕᓐᓂᑦ ᑐᖔᓂ $25,000), ᐱᓕᕆᐊᖑᕙᑦᑐᑦ ᒪᓕᑦᑕᐅᓗᑎᒃ ᐱᓕᕆᐊᑦᓴᐃᑦ ᓴᖅᑭᐸᓪᓕᐊᔪᑦ.

[345] ᐱᔾᔪᑎᐅᓗᑎᒃ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services) ᐅᐸᓗᖓᐃᔭᐅᑎᖓᑦ ᐱᓕᕆᐊᖃᕐᓂᒃᑯᑦ ᐱᓇᓱᐊᕈᑎᐅᑐᐃᓐᓇᕆᐊᓕᓐᓂᑦ, ᐊᐅᓚᑦᓯᔨ ᐅᖃᕆᐊᓚᐅᖅᑐᖅ ᐱᔾᔪᑎᐅᔪᑦ ᑐᓂᔭᐅᒐᔪᒻᒪᑕ ᐱᓕᕆᕝᕕᖓᓐᓄᑦ ᑭᓇᑐᐃᓐᓇᕐᒧᑦ ᐱᓕᕆᕝᕕᒦᖃᑕᐅᔪᒧᑦ ᓇᓗᓇᐃᕐᓯᕙᑦᑐᑎᒃ ᖃᓄᐃᓕᖓᒍᑎᐅᔪᒥᑦ ᐱᓇᓱᐊᕈᑎᐅᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᕕᐅᓇᓱᐊᖅᑎᓪᓗᒋᑦ. ᓇᓗᓇᐃᔭᐃᑎᐅᔪᑦ ᕿᒥᕐᕈᐊᖅᑕᐅᓕᖅᐸᑦᑐᑦ ᖃᐅᔨᓴᖅᑕᐅᒍᒪᓪᓗᑎᒃ ᐅᓗᕆᐊᓇᑐᐃᓐᓇᕆᐊᓖᑦ ᐅᑯᓄᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᓇᓗᓇᐃᖅᑕᐅᒍᒪᓪᓗᓂ ᖃᓄᖅ ᐱᓕᕆᐊᖑᒋᐊᕐᓂᐊᕐᒪᖔᖅ. ᐱᓇᓱᐊᖅᑕᐅᔪᓂᑦ ᖃᐅᔨᓴᖅᑎᐅᔪᖅ ᐃᓗᐊᓂ ᐱᓕᕆᕝᕕᐅᑉ ᖃᐅᔨᓴᖅᐸᑦᑐᖅ ᖃᐅᔨᓴᕆᐊᓕᓐᓂᑦ. ᒪᓕᑦᑐᒋᑦ ᖃᐅᔨᓴᖅᑎᐅᑉ ᖃᐅᔨᓴᖅᑕᖏᓐᓂᑦ ᐃᓱᒪᒋᔭᖏᑦ, ᐊᑭᓕᖅᓱᐃᔾᔪᑎᓂᑦ ᐅᖃᒪᔭᐅᑎᖃᕈᓐᓇᖅᑐᑦ.

[346] ᐊᐅᓚᑦᓯᔨ ᐅᖃᓚᐅᖅᑐᖅ ᖃᐅᔨᓴᖅᑎᓄᑦ ᒫᓐᓇᐅᔪᖅ ᐱᑕᖃᖏᒻᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᑲᓇᑕᒥ, ᓄᓇᓕᖃᕐᕕᓐᓂ, ᐅᕝᕙᓘᓐᓃᑦ ᐱᓕᕆᕝᕕᓐᓂ ᐊᑐᐊᒐᕐᒥᑦ ᐊᑦᑐᐊᓪᓚᕆᑦᑐᒥᑦ ᐱᓕᕆᔾᔪᑎᓄᑦ ᐱᓇᓱᐊᕈᑎᓂᑦ; ᐊᑐᐊᒐᐅᔪᖅ ᐊᑐᖅᑕᐅᓚᐅᖅᑑᒐᓗᐊᖅ ᐊᑐᕈᓐᓃᖅᑎᑕᐅᓚᐅᕐᒪᑦ. ᐃᐊᑐᐊᒐᖅᑕᖃᖏᑦᑐᖅ ᐊᐅᓚᑦᓯᔾᔪᑎᐅᔪᓂᑦ ᐱᓕᕆᐊᖏᓐᓂᑦ ᐅᑯᐊ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services) ᐅᕙᓂ "K" ᐱᓕᕆᕝᕕᒻᒥ. ᐊᐅᓚᑦᓯᔨ ᐅᖃᓚᐅᖅᑐᖅ ᐱᓕᒻᒪᑦᓴᐅᑎᑦᓴᖏᓐᓂᑦ ᓴᓇᕙᓪᓕᐊᒻᒪᑕ ᐊᐅᓚᑦᓯᔨᒧᑦ ᐊᒻᒪ ᖃᐅᔨᓴᖅᑎᓄᑦ ᐃᓗᐊᓂ ᐱᓕᕆᕝᕕᐅᑉ ᐱᔾᔪᑎᒋᓪᓗᒋᑦ ᖃᓄᖅ ᐱᓕᕆᐊᖑᒋᐊᖃᕐᒪᖔᑕ ᐱᓇᓱᐊᕈᑎᐅᔪᑦ.

[347] ᐊᐅᓚᑦᓯᔨ ᓇᓗᓇᐃᕐᓯᓚᐅᖅᑐᖅ ᐱᔭᑦᓴᓕᐅᖅᑎᐅᒐᒥ ᐃᓱᒪᑦᓴᕐᓯᐅᕈᑎᒃᑯᑦ ᐱᔾᔪᑎᒋᓪᓗᒍ ᐋᖅᑭᒍᑎᐅᔪᒪᔪᖅ ᐊᑐᐃᓐᓇᐅᑎᑕᐅᔪᖅ A.B.-ᒧᑦ. ᐊᐅᓚᑦᓯᔨ ᑭᒃᑯᑐᐃᓐᓇᕐᓄᑦ ᐱᔨᑦᓯᕋᖅᑎᐅᒻᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐃᓚᒋᔭᐅᒐᓂ, ᑎᒃᑯᐊᖅᑕᐅᓯᒪᒐᓂᓗ ᐅᕝᕙᓘᓐᓃᑦ ᐃᖅᑲᓇᐃᔭᖅᑎᐅᒐᓂ ᒪᓕᑦᑐᒋᑦ ᐃᓚᖓᓂ I ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᒪᓕᒐᖏᑎᒍᑦ; ᑕᐃᒪᐃᒻᒪᑕ, ᐱᓕᕆᔾᔪᓯᖓ ᐃᓗᐊᓃᖏᑦᑐᖅ ᖃᐅᔨᓴᖅᑏᑦ ᐱᔪᓐᓇᐅᑎᖃᕐᕕᖓᑕ. ᑭᓯᐊᓂᓕ, ᐊᐅᓚᑦᓯᔨᐅᑉ ᖃᐅᔨᓴᖅᑎᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐃᓚᒋᔭᐅᓚᐅᖅᑐᖅ ᐱᓕᕆᔨᐅᓂᖃᖅᑐᓂ ᖃᐅᔨᓴᖅᑎᐅᓂᕐᒥᑦ ᐃᖅᑲᓇᐃᔭᖅᑎᓂᑦ.

[348] ᑕᕝᕙᓂᓕ ᐱᓕᕆᐊᒥ, A.B. ᐅᓂᑦᑎᑕᐅᓯᒪᓚᐅᖅᑐᖅ ᐃᓱᒪᓕᕆᕝᕕᒻᒥ ᐋᓐᓂᐊᓯᐅᕐᕕᒻᒥ ᐊᐅᓚᑦᓯᔨᒧᑦ ᖃᐅᔨᒋᐊᖅᑕᐅᒋᐊᖓᑎᓪᓗᒍ ᑭᒡᒐᖅᑐᐃᔨᖓᓐᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ.^{Footnote 56} ᐊᑦᓱᑲᓪᓚᐅᔪᖅ ᐋᓐᓂᑎᖅᑕᐅᕋᑖᕐᓂᑰᓪᓗᓂ ᐊᒻᒪ ᐊᐳᖅᑕᐅᓂᖅᑐᓂ ᒪᑐᐊᓄᑦ ᐸᓖᓯᒃᑯᑦ ᓄᓇᒃᑰᔫᖓᑕ ᑕᑯᑦᓴᐅᓗᓂ ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᒃᑯᑦ ᑎᒍᔭᐅᑎᓪᓗᒍ ᑭᒃᑯᑐᐃᓐᓇᑦᓯᐊᓄᑦ ᑕᑯᓐᓇᖅᑕᐅᓂᖅᑐᓂ. ᐅᖃᐅᓯᖃᖅᑐᒥᓂᑦ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᔪᒪᒋᐊᑦᓴᖅ ᐊᒻᒪ ᐊᑐᖅᑎᑕᐅᓗᓂ ᐊᔾᔨᒌᖏᑦᑐᓂᑦ ᐃᖕᒥᓄᑦ ᐊᑦᓱᕉᑎᒋᔭᖏᓐᓂᑦ. ᐊᒻᒪᑦᑕᐅᖅ, A.B. ᐅᖃᓕᒪᓲᖑᒐᓗᐊᕐᒪᑦ ᐊᒻᒪ ᑐᑭᓯᐊᓗᓂ ᖃᓪᓗᓈᑎᑐᑦ ᐅᖃᐅᓯᕐᒥᑦ, ᐅᖃᐅᓯᒃᑯᑦ ᓯᕗᓪᓕᖅᐹᕆᖏᑕᖓ.

[349] ᑕᑯᓐᓇᖅᑐᒍ, ᐃᓱᒫᓘᑎᑕᖃᖅᑐᖅ ᑭᓇᑐᐃᓐᓇᖅ ᑕᐃᒫᒃ ᐊᑐᖅᑐᖅ ᐅᓗᕆᐊᓇᖅᑐᒦᒍᓐᓇᕐᒪᑦ ᐊᒻᒪ ᐃᒻᒪᖄ ᐱᓕᕆᔾᔪᑎᐅᓯᒪᓗᓂ ᐊᔾᔨᐅᖏᑎᑕᐅᓗᓂ, ᐊᒻᒪ/ᐅᕝᕙᓘᓐᓃᑦ ᑐᑭᓯᒪᑦᑎᐊᖏᓪᓗᓂ ᑐᓴᐅᒪᑦᑎᐊᕐᓗᓂ ᐃᓱᒪᓕᐅᕆᔪᓐᓇᕐᓂᖓᓄᑦ ᐱᔾᔪᑎᖃᖅᑐᓂᑦ ᐊᑭᓕᕐᓱᐃᔾᔪᑎᐅᔪᒪᔪᓂᑦ.

[350] ᑭᓯᐊᓂᓕ, ᐱᔾᔪᑎᒋᓪᓗᒋᑦ ᐊᑐᖅᑕᐅᓯᒪᔪᑦ ᐅᕙᓂ ᐱᓕᕆᐊᒥ, ᓇᓗᓇᐃᖏᑦᑐᖅ ᐊᐅᓚᑦᓯᔨᐅᔪᖅ ᐅᖃᐅᔾᔨᓂᕐᒪᑦ A.B.-ᒥᑦ. ᐱᖓᓱᑦ (3) ᐃᖕᒥᓂᕐᓱᖅᑐᑦ ᑕᑯᓐᓇᖅᑐᒥᓃᑦ (ᒪᕐᕉᒃ (2) ᐋᓐᓂᐊᓯᐅᖅᑏᒃ ᐊᒻᒪ ᑳᓐᔅᑕᐳᓪ ᕉ, ᐃᓚᒋᔭᐅᓚᐅᖅᑐᖅ ᑐᓪᓕᐊᓂ ᐅᖃᖃᑎᒌᑦᑎᓪᓗᒋᒃ A.B. ᐊᒻᒪ ᐊᐅᓚᑦᓯᔨ) ᓇᓗᓇᐃᕐᓯᓚᐅᖅᑐᑦ ᑕᒪᓐᓇ ᐊᑐᖅᑕᐅᓯᒪᒋᐊᖓ. ᐊᐅᓚᑦᓯᔨ ᐅᖃᕐᓂᓚᐅᖅᑐᖅ ᐃᓚᖓᓐᓄᑦ ᐋᓐᓂᐊᓯᐅᖅᑎᒧᑦ ᑲᔪᓯᒍᓐᓇᖏᓐᓇᒥ ᐊᖏᕈᑎᒥᑦ A.B. ᐅᖃᖃᑎᖃᓚᐅᖅᑎᓐᓇᒍ ᒪᓕᒐᓕᕆᔨᒥᑦ, ᐊᒻᒪ ᑭᖑᓪᓕᕐᒥ ᐅᖃᖃᑎᒋᓕᕐᒥᒐᒥᐅᒃ, ᐊᐅᓚᑦᓯᔨ ᐱᑎᑦᓯᓚᐅᖅᑐᖅ ᐅᖄᓚᐅᑎᖓᓐᓂᑦ ᒪᓕᒐᓕᕆᓂᕐᒥᑦ ᐱᔨᑦᓯᕋᕐᓂᕐᒥᑦ ᑲᑎᒪᔨᖏᓐᓄᑦ ᓄᓇᕗᑦ A.B.-ᒥᑦ. ᓲᕐᓗ, ᒪᓕᒐᓕᕆᔨᒥᑦ ᑕᐃᑲᖕᖔᕐᓯᒪᔪᒥᑦ ᐱᓕᕆᕝᕕᒻᒥᑦ ᐅᖃᐅᔾᔪᐃᕙᒌᖅᑎᓪᓗᒍ A.B.-ᒥᑦ. ᑳᓐᔅᑕᐳᓪ ᐴ ᐊᔭᐅᖅᑐᐃᔪᒻᒪᕆᐅᓚᐅᖅᑐᖅ A.B.-ᒥᑦ ᐅᖃᖃᑎᖃᖁᓪᓗᓂᐅᒃ ᒪᓕᒐᓕᕆᔨᒥᑦ, ᐊᒻᒪ A.B. ᐊᐱᕆᓚᐅᖅᑐᖅ ᒪᓕᒐᓕᕆᔨᖓ ᐅᖄᓚᕕᐅᖁᓪᓗᓂᐅᒃ. ᑭᖑᓂᐊᒍᑦ, A.B. ᐱᓕᓚᐅᖅᑐᖅ ᒪᓕᒐᓕᕆᔨᓂᑦ ᐊᒻᒪ ᒪᓕᒐᓕᕆᔨᖓ ᓱᓕ ᐅᐸᓗᖓᐃᔭᐃᓚᐅᖅᑐᖅ ᐋᔩᕈᑎᖃᖅᑐᓂ ᐋᖅᑭᑦᓱᐃᔾᔪᑎᐅᑐᐃᓐᓇᕆᐊᓕᒻᒥᑦ ᑭᒡᒐᑐᖅᑐᓂᐅᒃ ᖃᐅᔨᓴᖅᑏᑦ ᐊᐱᕐᓱᓕᖅᑎᓪᓗᒋᑦ A.B.-ᒥᑦ.

[351] ᑐᑭᓯᒋᐊᕈᑎᑕᖃᖏᑦᑐᖅ ᐃᓱᒪᓕᐅᕆᔾᔪᑎᑦᓴᒥᑦ A.B. ᐃᓕᕋᓇᕐᓵᖑᓐᓂᕐᒪᖔᖅ ᐅᕝᕙᓘᓐᓃᑦ ᐊᔪᐃᓐᓈᖑᓐᓂᕐᒪᖔᖅ ᐊᖏᖁᔭᐅᓗᓂ ᐱᖁᔭᐅᔪᒥᑦ. ᑭᓪᓕᖃᐅᑎᖃᓚᐅᕋᓗᐊᕋᒥ ᑐᑭᓯᐊᓂᒃᑯᑦ ᐅᐸᓗᖓᐃᔭᐅᑎᐅᔪᒥᑦ ᐅᕝᕙᓘᓐᓃᑦ ᐅᖃᐅᓯᑦᑕᖏᓐᓂᑦ (ᓲᕐᓗ, ᐊᐱᕆᓚᐅᕐᓂᖓ ᐋᓐᓂᐊᓯᐅᖅᑎᒥᑦ ᓱᓇᐅᒻᒪᖔᖅ "ᐊᑭᓕᖅᑕᐅᔾᔪᑎ" ᑐᑭᖃᕐᒪᖔᖅ), ᐱᖃᑕᐅᒍᒪᑦᓯᐊᓚᐅᖅᑐᖅ ᐅᖃᐅᓯᐅᑎᓪᓗᒍ, ᐊᐱᕆᕙᑦᑐᓂᒋᑦ ᐋᓐᓂᐊᓯᐅᖅᑏᑦ ᐊᒻᒪ ᑳᓐᔅᑕᐳᓪ ᕉᒥᑦ ᐊᑕᐅᓯᐊᕋᓂ ᐅᖄᓚᕕᐅᖁᓪᓗᓂᐅᒃ ᐊᐅᓚᑦᓯᔨ ᐅᖃᐅᓯᖃᒃᑲᓐᓂᕈᒪᓪᓗᓂ ᐱᔾᔪᑎᐅᔪᒥᑦ.

[352] ᓇᓗᓇᐃᔭᐃᑎᐅᔪᑦ ᓇᓗᓇᐃᔭᐃᓯᒪᔪᑦ ᐊᐅᓚᑦᓯᔨᐅᔪᖅ ᖃᐅᔨᒋᐊᕐᓂᖏᒻᒪᑦ ᐊᑲᐅᓈᕈᑎᖃᕋᓱᓐᓂᕐᒥᑦ A.B. ᐱᓇᓱᐊᕈᒪᓪᓚᕆᓐᓂᖓ ᑮᓇᐅᔭᓂᑦ ᐅᖃᐅᓯᐅᔪᓂᑦ, ᑭᓯᐊᓂ ᖃᐅᔨᒋᐊᖁᓪᓚᕆᓚᐅᖅᑕᖓ ᒪᓕᒐᓕᕆᔨᒥᑦ. ᐊᔪᐃᓐᓈᖑᓇᓱᓐᓂᕈᓂ A.B. ᐃᓱᒪᒋᓪᓗᒋᑦ ᖃᓄᐃᓕᖓᒍᑎᐅᔪᑦ ᐱᓕᕆᐊᒃᑯᑦ, ᖃᐅᔨᓴᖅᑏᑦ ᐃᓱᒫᓘᑎᖃᑲᓴᑦᑐᑦ. ᐅᐱᓐᓇᕋᓂ ᑕᒪᒃᑯᐊ ᐊᑐᖅᑕᐅᒋᐊᖃᖏᒻᒪᑕ ᐊᑐᖅᑕᑐᐊᕆᓪᓗᒍ ᐅᑉᐱᕈᓱᓐᓂᖏᑦ ᑭᒃᑯᑐᐃᓐᓇᐃᑦ ᐃᓚᒋᔭᐅᔪᑦ, ᖃᐅᔨᓴᖅᑏᑦ ᖃᐅᔨᓴᕆᐊᓕᓚᐅᖅᑐᑦ ᐊᑐᖅᑕᐅᕙᑦᑐᓂᑦ ᐊᑐᐊᒐᕐᓂᑦ ᐊᒻᒪ ᐱᓕᕆᔾᔪᑎᓂᑦ ᓇᓗᓇᕐᓯᒍᒪᓪᓗᑎᒃ ᓈᒻᒪᑦᑐᓂᑦ ᓴᐳᒻᒥᑦᓯᔾᔪᑎᓂᑦ ᐊᑐᕋᑦᓴᖅᑕᖃᕋᓗᐊᕐᒪᖔᖅ.

[353] ᐊᐅᓚᑦᓯᔨᐅᔪᖅ ᒪᓕᑦᑑᔮᓚᐅᖅᑐᖅ ᑮᓇᐅᔭᓕᕆᓂᕐᒥᑦ ᑲᑎᒪᔩᑦ ᑎᑎᕋᖅᑎᓄᑦ ᐊᑐᐊᒐᕐᓂᑦ ᐊᐅᓚᑦᓯᔾᔪᑎᐅᕙᑦᑐᓂᑦ ᐱᓕᕆᔾᔪᑎᐅᔪᓂᑦ ᐱᓇᓱᐊᕈᑎᓂᑦ ᐊᔾᔨᒌᖏᑦᑐᓂᑦ ᒐᕙᒪᒃᑯᓐᓄᑦ ᐱᓕᕆᕝᕕᓐᓂᑦ. ᑭᓯᐊᓂᓕ, ᐃᓱᒫᓘᑎᓇᖅᑐᖅ ᖃᐅᔨᓴᖅᑎᓄᑦ ᑲᓇᑕᒥ ᐊᑐᐊᒐᖅᑕᖃᖏᒻᒪᑦ ᐱᓪᓗᐊᑕᐅᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᐅᓚᑦᓯᔾᔪᑎᖏᓐᓂᑦ ᐱᓇᓱᐊᖅᑕᐅᓯᒪᔪᓕᕆᔪᓂᑦ, ᐊᑐᐊᒐᖅᑕᖃᕋᓂᓗ ᓄᓇᓕᖃᕐᕕᓐᓄᑦ ᐅᕝᕙᓘᓐᓃᑦ ᐱᓕᕆᕝᕕᓐᓄᑦ ᐊᑐᖅᑕᐅᔪᓐᓇᖅᑐᓂᑦ.^{Footnote 57} ᓯᕗᓪᓕᕐᒥ ᑲᓇᑕᒥ ᐊᑐᐊᒐᐅᔪᕕᓂᐅᒐᓗᐊᖅ ᖁᔭᓈᖅᑕᐅᓯᒪᔪᖅ ᐊᒻᒪ ᑭᖑᕝᕕᖅᑕᐅᓚᐅᕐᓯᒪᒐᓂ. ᑕᐃᒫᑦᑕᐅᖅ, ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services), ᐊᑐᐊᒐᖃᓚᐅᖏᒻᒥᔪᑦ ᐊᐅᓚᑦᓯᔾᔪᑎᐅᔪᓂᑦ ᐊᐅᓚᑦᓯᔾᔪᑎᖏᓐᓂᑦ, ᐱᓪᓗᐊᑕᐅᔪᒥᑦ ᐱᓕᒻᒪᑦᓴᐅᑎᓄᑦ ᐱᓕᕆᐊᑦᓴᖅᑕᖃᕋᓂ ᐊᑐᖅᑕᐅᔪᓐᓇᖅᑐᒥᑦ ᐃᖅᑲᓇᐃᔭᖅᑎᖏᓐᓄᑦ ᖃᓄᖅ ᐊᐅᓚᑦᓯᒋᐊᖃᕐᓂᖏᓐᓂᑦ ᐱᓇᓱᐊᕈᑎᐅᔪᓂᑦ. ᓴᖅᑭᑎᓪᓗᒋᑦ ᐱᔾᔪᑎᐅᑐᐃᓐᓇᕆᐊᓖᑦ ᓴᖅᑭᕈᓐᓇᖅᑐᑦ ᐋᔩᖃᑎᖃᖅᑐᓂ ᑭᒃᑯᑐᐃᓐᓇᕐᓂᑦ ᐱᓇᓱᐊᕐᓯᒪᑐᐃᓐᓇᕆᐊᓕᓐᓂᑦ ᐱᔾᔪᑎᖃᖅᑐᑎᒃ ᐱᓕᕆᖃᑕᐅᔪᕕᓂᐅᓂᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ, ᐱᓪᓗᐊᑕᐅᔪᓂᑦ ᐊᑐᐊᒐᓕᐅᕆᐊᓕᐅᔪᑦ.

[354] ᖃᐅᔨᓴᖅᑏᑦ ᐊᑐᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᓕᐅᖁᓪᓗᒋᑦ ᑲᓇᑕᒥ, ᐱᓕᕆᕝᕕᓐᓂ ᐊᒻᒪ ᐸᓖᓯᓄᑦ, ᒪᓕᓪᓗᑎᒃ ᐊᑐᖅᑕᐅᒋᐊᓕᓐᓂᑦ, ᐊᐅᓚᑦᓯᔾᔪᑎᑦᓴᓂᑦ ᐱᓇᓱᐊᕈᑎᐅᔪᓂᑦ ᐃᖅᑲᖅᑐᐃᕕᓕᕆᔨᓂᑦ ᐊᒻᒪ ᒪᓕᒐᓕᕆᓂᒃᑰᖏᑦᑐᖅ ᐱᓯᒪᔪᓂᑦ ᐊᑭᓕᖅᓱᐃᔾᔪᑎᓂᑦ.

[355] ᖃᐅᔨᓴᖅᑏᑦ ᐊᑐᖁᔨᒻᒥᔪᑦ ᑕᒪᒃᑯᐊ ᐊᑐᐊᒐᐃᑦ ᐃᓗᓕᖃᖁᔭᐅᓗᑎᒃ ᑎᑎᕋᕐᓯᒪᔪᓂᑦ ᓴᐳᒻᒥᑦᓯᔾᔪᑎᑦᓴᓂᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ ᑭᒃᑯᑐᐃᓐᓇᕐᓂᑦ, ᐱᖃᓯᐅᔾᔭᐅᓯᒪᓗᓂ ᐊᑐᖅᑕᐅᒋᐊᓕᒃ ᑭᒃᑯᑐᐃᓐᓇᐃᑦ ᖃᐅᔨᒋᐊᖁᔭᐅᖃᑦᑕᖁᓪᓗᒋᑦ ᒪᓕᒐᓕᕆᔨᓂᑦ ᐊᑎᓕᐅᓚᐅᖏᓂᕐᒥᓂ ᐋᖅᑭᒍᑎᐅᔪᓄᑦ ᐊᖏᕈᑎᒥᑦ, ᐅᕝᕙᓘᓐᓃᑦ ᐅᖃᐅᓯᒃᑯᑦ ᐱᔪᓐᓇᐅᑎᒥᓂᒃ ᐊᑐᕈᓐᓃᑎᑦᓯᔪᓐᓇᖅᑐᑦ. ᐊᑐᐊᒐᐃᑦ ᐱᑕᖃᕆᐊᖃᕐᒥᔪᑦ ᑎᑎᕋᕐᓯᒪᔪᓂᑦ ᐱᓕᕆᔾᔪᑎᑦᓴᖏᓐᓂᑦ ᐊᐅᓚᑦᓯᔨᐅᔪᑦ ᐊᒻᒪ ᖃᐅᔨᓴᖅᑎᐅᔪᑦ ᓇᓗᓇᐃᕐᓯᒪᕙᓐᓂᒃᑯᑦ ᑭᒃᑯᑐᐃᓐᓇᐃᑦ ᑐᑭᓯᒪᑦᑎᐊᕆᐊᖃᕐᓂᖏᓐᓂᑦ ᐅᐸᓗᖓᐃᔭᐅᑎᒥᑦ ᐊᒻᒪ ᑕᐃᒎᓯᐅᔪᑦ ᑎᑎᕋᕐᓯᒪᔪᑦ ᐱᑎᑕᐅᔾᔪᑎᐅᖁᔭᐅᔪᓂ. ᐱᓕᒻᒪᑦᓴᐅᑎᑦᓴᓕᐅᕆᐊᓖᑦ ᐊᒻᒪ ᐱᒋᐊᖅᑎᑕᐅᓗᑎᒃ ᐊᑐᖅᑕᐅᔪᑦᓴᐅᓗᑎᒃ ᐃᖅᑲᓇᐃᔭᖅᑎᓄᑦ ᐱᓕᕆᔨᐅᔪᓄᑦ ᐊᐅᓚᑦᓯᔾᔪᑎᖏᓐᓂᑦ ᐱᓇᓱᐊᕈᑎᐅᔪᑦ.

ᐊᑦᓱᑲᓪᓛᓗᒃ ᐱᓕᕆᔾᔪᑎᖃᑦᓯᐊᖏᓐᓂᐅᔪᖅ ᐊᒻᒪ ᐊᑐᖅᑕᐅᑐᐃᓐᓇᕆᐊᓕᐅᔪᑦ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᔪᖅ

ᖃᐅᔨᔭᐅᔪᖅ #35: ᓇᓗᓇᐃᔭᐃᑎᑕᖃᖏᑦᑐᖅ ᓇᓗᓇᐃᔭᐃᓯᒪᔪᓂᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᑦ ᐊᑐᖅᑕᐅᓚᐅᕐᒪᖔᑕ ᐱᔾᔪᑎᒋᓪᓗᒍ ᐅᕕᓂᖃᑎᒌᖏᓐᓂᐅᔪᖅ ᐅᕝᕙᓘᓐᓃᑦ ᓇᓪᓕᐊᑕ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᕐᒪᖔᑕ ᐃᓚᐃᓐᓈᕐᓂᐅᔪᓂᑦ ᐱᓕᕆᔾᔪᑎᐅᑎᓪᓗᒍ A.B.

ᖃᐅᔨᔭᐅᔪᖅ #36: ᖃᓄᐃᓪᓗᐊᕐᓂᖓ ᐱᔨᑦᓯᕋᐅᑎᐅᕙᑦᑑᑉ ᑭᖕᖓᐃᑦ ᑎᒍᔭᐅᒪᕕᒻᒥ ᓈᒻᒪᖏᑦᑐᒻᒪᕆᐅᓚᐅᖅᑐᖅ. ᖃᓄᐃᓪᓗᐊᕐᓂᖓ ᐱᓕᕆᔾᔪᑎᖃᑦᓯᐊᖏᓐᓂᐅᑉ ᑕᑯᓐᓇᐅᖅᑕᐅᓯᒪᔫᑉ ᐊᑐᖅᑕᐅᔪᑦ ᐃᓱᒫᓘᑎᐅᓕᖅᑐᑎᒃ ᐊᑐᖅᑕᐅᑐᐃᓐᓇᕆᐊᓕᓐᓂᑦ ᐱᓕᕆᔾᔪᑎᒍᑦ ᐃᓚᐃᓐᓈᓂᕐᒥᑦ.

ᐊᑐᖁᔭᖅ #19: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᓴᕆᐊᓖᑦ ᖃᓄᑎᒋ ᐊᔾᔨᒌᓐᓂᖃᕐᒪᖔᑕ ᐊᔾᔨᒌᖏᓐᓂᖃᕐᒪᖔᑕᓗ ᐱᓕᕆᔾᔪᑎᐅᕙᑦᑐᑦ ᐊᒻᒪ ᑮᓇᐅᔭᐅᕙᑦᑐᑦ ᑎᒍᔭᐅᒪᕕᖏᓐᓄᑦ ᓄᓇᕘᒥ ᓴᓂᖏᓐᓂ ᐊᔾᔨᖏᑕ ᑎᒍᔭᐅᒪᕕᐅᕙᑦᑐᑦ ᐊᓯᖏᓐᓂ ᓄᓇᓕᖃᕐᕕᐅᔪᓂ ᐊᒻᒪ ᑐᓴᐅᒪᑎᑕᐅᒐᔭᕐᓗᑎᒃ ᑕᒪᒃᑯᓂᖓ ᖃᐅᔨᓴᐅᑎᒥᓂᕐᓂᒃ ᖃᐅᔨᓴᖅᑏᑦ.

ᐊᑐᖁᔭᖅ #20: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒫᓐᓇᑲᐅᑎᒋ ᐅᖃᖃᑎᖃᕆᐊᖃᓕᖅᑐᑦ ᒐᕙᒪᒃᑯᓐᓂᑦ ᓄᓇᕘᒥ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᓇᓗᓇᐃᕐᓯᒪᓇᓱᐊᕐᓗᑎᒃ ᓈᒻᒪᑦᑐᓂᑦ ᐱᓕᕆᔾᔪᑎᖃᖅᐸᒃᑲᓗᐊᕐᒪᖔᑕ ᐊᒻᒪ ᑮᓇᐅᔭᓂᑦ ᓄᓇᕘᒥ ᑎᒍᔭᐅᒪᕕᐅᔪᑦ ᓈᒻᒪᑦᑐᓂᑦ ᐱᔨᑦᓯᕋᖅᐸᓂᐊᕐᒪᑕ ᑭᖕᖓᐃᑦ ᑎᒍᔭᐅᒪᕕᖏᓐᓂ ᐊᒻᒪ ᐊᓯᖏᓐᓂ ᓄᓇᕘᒥ ᑎᒍᔭᐅᒪᕕᖃᕐᕕᓐᓂ ᓵᖕᖓᕙᒻᒥᔪᓂᑦ ᐊᔾᔨᐸᓗᖏᓐᓂᑦ ᖃᓄᐃᓕᖓᒍᑎᐅᔪᓂᑦ.

[356] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᖃᑎᖃᖅᐸᑦᑐᑦ ᐃᓄᖕᓂᒃ ᐃᓗᓕᖃᐅᒻᒪᕆᑦᑐᒥᑦ ᐅᕙᑦᓯᐊᕈᕐᓂᑕᓂᑦ ᖁᕕᐊᓇᖏᓯᒪᔪᓂᑦ ᐱᓕᕆᖃᑎᒌᓐᓂᕐᒥᑦ ᓄᓇᕘᒥ ᐊᒻᒪ ᐊᓯᖏᓐᓂ ᓄᓇᓕᖃᕐᕕᐅᔪᓂ ᐃᓄᐃᑦ ᐊᖏᕐᕋᖏᓐᓂ. ᐱᖃᓯᐅᔾᔭᐅᔪᑦ, ᐊᓯᖏᓐᓂᓪᓗ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᔾᔪᑎᒋᕙᑦᑕᖏᑦ ᐊᑐᖅᑐᑎᒃ ᒐᕙᒪᓄᑦ ᐊᑐᐊᒐᐅᔪᓂᑦ ᐱᖃᓯᐅᔾᔨᓯᒪᔪᓂᑦ ᐱᕕᖃᖅᑎᑕᐅᒐᑎᒃ ᓅᑎᕆᕙᓐᓂᐅᓚᐅᖅᑐᖅ ᐃᓄᖕᓂᒃ ᖁᑦᓯᑦᑐᒧᑦ ᐅᑭᐅᖅᑕᖅᑐᒧᑦ, ᐱᔭᐅᕙᓚᐅᕐᓂᖏᓐᓂᑦ ᐃᓄᐃᑦ ᓱᕈᓰᑦ ᐃᓕᓐᓂᐊᕆᐊᖅᑎᑕᐅᕙᑦᑐᑎᒃ ᓇᔪᒐᕐᓄᑦ, ᐊᒻᒪ ᑐᖁᕋᖅᑕᐅᕙᓚᐅᕐᓂᖏᓐᓂᑦ ᕿᒧᑦᓯᐅᑎᐅᕙᓚᐅᖅᑐᑦ ᕿᒻᒦᑦ. ᒫᓐᓇᓂᓴᐅᓂᕐᓴᐅᔪᖅ, ᐸᓯᐅᖅᑕᐅᓯᒪᒻᒥᔪᑦ ᐱᓕᕆᔾᔪᑎᒍᑦ ᐊᑲᐅᖏᓕᐅᕈᑎᐅᔪᓂᑦ ᐊᒻᒪ ᑭᒃᑯᓐᓂᒃ ᐱᑦᑎᐊᐸᖏᓂᕐᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐸᓖᓯᓕᕆᔾᔪᑎᖏᓐᓂ ᓄᓇᕘᒥ ᓄᓇᓕᐅᔪᓂ, ᐃᓚᖏᑦ ᐅᓂᒃᑳᓕᐅᕈᑎᐅᕙᑦᑐᑎᒃ ᖃᐅᔨᓴᖅᑎᓂᑦ.

[357] ᖃᐅᔨᓴᖅᑏᑦ, ᐱᑎᓪᓗᒋᑦ ᐱᓕᕆᐊᕆᔭᕆᐊᓕᖏᑦ ᐃᖕᒥᓂᕐᓱᓂᒃᑯᑦ ᕿᒥᕐᕈᐊᓂᕐᒥᑦ ᐊᒻᒪ ᖃᐅᔨᓴᕐᓂᕐᒥᑦ ᑭᒃᑯᑐᐃᓐᓇᕐᓂᑦ ᐊᑲᐅᖏᓕᐅᕈᑎᐅᓯᒪᔪᓂᑦ ᓴᖅᑭᖅᑕᐅᕙᑦᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ, ᐊᒻᒪᑦᑕᐅᖅ ᐱᓕᕆᔾᔪᑎᓂᑦ ᕿᒥᕐᕈᐊᕐᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᕙᑦᑕᖏᓐᓂᑦ, ᐱᓕᕆᐊᖃᕈᒪᑦᑎᐊᖅᑐᑦ ᖃᐅᔨᒋᐊᖅᐸᓂᕐᒥᑦ ᐊᒻᒪ ᐱᓕᕆᖃᑎᖃᖅᐸᓂᕐᒥᑦ ᓄᓇᓕᕐᒥᐅᑕᐅᔪᓂᑦ ᓄᓇᕘᒥ. ᐊᓯᖏᓐᓂᓪᓗ, ᖃᐅᔨᓴᖅᑏᑦ ᐱᓕᕆᖃᑎᖃᓚᐅᖅᑐᑦ ᒐᕙᒪᒃᑯᓐᓂᑦ ᓄᓇᕘᒥ ᐊᑐᐃᓐᓇᐅᖁᓪᓗᒍ ᐃᓄᑦᑎᑐᑦ ᐅᖃᐅᓯᖅ ᖃᐅᔨᓴᖅᑏᑦ ᑭᒃᑯᑐᐃᓐᓇᐃᑦ ᐊᑲᐅᖏᓕᐅᕈᑎᖏᓐᓂᑦ ᑎᑎᕋᕐᕕᑦᓴᒥ ᐊᒻᒪ ᐃᓕᓐᓂᐊᕈᑎᑦᓴᓂᑦ ᐱᔾᔪᑎᖃᐅᖅᑐᓂᑦ ᖃᐅᔨᓴᖅᑎᒃᑯᑦ ᐊᑑᑎᖏᓐᓂᑦ ᐊᒻᒪ ᐅᐸᓗᖓᐃᔭᐅᑎᖓᓐᓂᑦ.

[358] ᓄᖕᖑᐸᓗᐊᓂ ᐃᐳᕈ 2022, ᑲᒥᓯᓇᖓᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᒻᒪ ᐊᖏᔪᖅᑳᖓᑦ ᐃᓄᐃᑦ ᑕᐱᕇᑦ ᑲᓇᑕᒥ (ITK), ᑖᒃᑯᐊᓕ ᑮᓇᐅᔭᓕᐅᖅᑎᐅᒐᑎᒃ ᑲᑐᔾᔨᖃᑎᒌᑦ ᑭᒡᒐᖅᑐᐃᔨᐅᓗᑎᒃ ᐊᒥᓲᓃᕐᓴᓂᑦ 65,000 ᐃᓄᖕᓂᒃ ᐃᓄᐃᑦ ᓄᓇᖓᓐᓂ ᐊᒻᒪ ᓇᒥᑐᐃᓐᓇᖅ ᑲᓇᑕᒥ, ᐊᖏᖃᑎᒌᓚᐅᖅᑐᐃᑦ ᐸᕐᓇᐅᑎᒥᑦ ᐱᐅᓯᑎᒋᐊᕈᑎᑦᓴᐅᔪᓂᑦ^{Footnote 58} ᐱᓕᕆᖃᑎᒌᒍᑎᒋᕙᑦᑕᖏᓐᓂᑦ ᐸᓖᓯᒃᑯᑦ ᐊᒻᒪ ᐃᓄᖕᓄᑦ ᓄᓇᓕᐅᔪᓂᑦ.

[359] ᑲᑐᔾᔨᓪᓗᑎᒃ ᐅᖃᐅᑎᑦᓴᖏᓐᓂ, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐊᖏᔪᖅᑳᖓᑦ ᑎᑎᕋᓚᐅᖅᑐᖅ:

ᐃᓄᐃᑦ ᑕᐃᒪᖓᓂᑐᖄᓗᒃ ᐃᓚᐃᓐᓈᒐᐅᓯᒪᒻᒪᑕ, ᐃᑉᐱᒋᔭᐅᒐᑎᒃ ᐊᒻᒪ ᓂᖕᖓᐅᒪᓂᖃᖅᑐᑎᒃ ᐃᓗᐊᓂ ᐱᕋᔭᐅᑎᒃᑯᑦ ᐃᖅᑲᖅᑐᐃᕕᓕᕆᔾᔪᑎᓂ. ᓄᓇᓕᖁᑎᑦᑕ ᐱᓕᕆᖃᑎᒌᒍᑎᒋᕙᑦᑕᖏᑦ ᐸᓖᓯᒃᑯᓐᓂᑦ ᐊᑲᐅᔪᓐᓃᕐᓯᒪᓕᕐᒪᑦ. ᑖᓐᓇ ᓄᑖᖅ ᐱᓕᕆᐊᑦᓴᓂᑦ ᐸᕐᓇᐅᑎ ᐊᑐᖅᑕᐅᓕᖅᑎᓪᓗᒍ, ᐱᕈᐃᔪᒪᑦᑎᐊᖅᑐᒍᑦ ᓄᑖᒥᑦ ᐱᓕᕆᔾᔪᐅᓯᐅᔪᒥᑦ ᑐᖕᖓᕕᖃᖅᑐᓂᑦ ᐃᑉᐱᒋᐅᑎᑦᓯᐊᓂᕐᒥᑦ ᐊᒻᒪ ᑕᑎᒌᖃᑦᑕᐅᑎᓂᕐᒥᑦ.

[360] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᓴᖅᑎᖓᑦ ᐅᖃᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᖃᑎᖃᕐᓂᐊᕐᒪᑕ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᑐᔾᔨᖃᑎᒌᓂᑦ "ᐱᒋᐊᖅᑎᑦᓯᓂᒃᑯᑦ ᐆᕕᖓ ᐱᓕᕆᐊᑦᓴᓂᑦ ᐸᕐᓇᐅᑎᒥᑦ ᐋᖅᑭᒋᐊᖁᓪᓗᒍ, ᐱᕈᐃᔭᐅᒃᑲᓐᓂᕐᓗᓂ ᐊᒻᒪ ᐱᐅᓯᑎᑕᐅᒋᐊᕐᓗᓂ ᐱᓕᕆᔾᔪᓯᕆᕙᑦᑕᕗᑦ ᓄᓇᓕᐅᔪᓂᑦ ᐃᓄᐃᑦ ᓄᓇᖓᓂ." ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᑕᒫᑦ ᑐᑭᓯᒋᐊᖃᑦᑕᕈᒪᓂᐊᖅᑐᑦ ᐃᓄᐃᑦ ᓯᕗᓕᖅᑎᖏᓐᓄᑦ ᖃᐅᔨᓴᐃᓐᓇᕐᓗᑎᒃ ᓯᕗᒧᐊᒍᑎᐅᕙᓪᓕᐊᔪᓂᑦ ᒪᓕᑦᑐᒍ ᐅᖃᐅᓯᐅᓯᒪᔪᖅ ᐊᖏᕈᑎ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᖏᕐᓯᒪᒻᒥᔪᑦ ᑐᕌᒐᖃᕐᓂᐊᕐᓂᕋᖅᑐᑎᒃ ᐃᓚᒋᐊᕆᓂᕐᒥᑦ ᐃᓄᖕᓂᒃ ᑭᒡᒐᖅᑐᐃᔨᑦᓴᓂᑦ ᐊᒻᒪ ᐱᐅᓯᑎᑦᓯᒋᐊᕐᓂᕐᒥᑦ ᐃᓄᑦᑎᑐᐃᓐᓈᖅᑐᓄᑦ ᐱᑕᖃᖅᑎᑦᓯᓂᕐᒥᑦ. ᐊᑐᕈᒪᒻᒥᔫᒐᓗᐊᑦ ᐸᓖᓯᒃᑯᓐᓂᑦ ᐊᒻᒪ ᐊᐃᑏᑲᐃᒃᑯᓐᓂᑦ (ITK) ᑲᑐᔾᔨᖃᑎᒌᓐᓂᒃᑯᑦ ᐅᖃᐅᓯᖃᕈᒪᓂᖏᓐᓂᑦ ᑲᓇᑕᐅᑉ ᒐᕙᒪᒃᑯᖏᑕ ᓄᓇᖃᖅᑳᕐᓯᒪᔪᓕᕆᔪᓂᑦ ᐃᖅᑲᖅᑐᐃᕕᓕᕆᓂᕐᒥᑦ ᐸᕐᓇᒍᑎᑦᓴᓕᕆᓂᕐᒥᑦ.^{Footnote 59}

[361] ᖃᐅᔨᓴᖅᑏᑦ ᐃᓱᒪᑦᓴᕐᓯᐅᓚᐅᖅᑐᑦ ᐅᕕᓂᖃᑎᒌᖏᓂᕐᒥᑦ ᐃᓚᐃᓐᓈᓂᕐᒥᑦ ᐊᒻᒪ/ᐅᕝᕙᓘᓐᓃᑦ ᐊᔾᔨᒌᖏᑎᑦᓯᓂᒃᑯᑦ ᐱᓕᕆᐊᖃᕐᓂᕐᒥᑦ ᐊᑐᖅᑐᖃᓚᐅᕐᒪᖔᖅ ᖃᓄᐃᓕᐅᕈᑎᐅᓯᒪᔪᓂ ᖃᐅᔨᓴᖅᑕᐅᔪᓂ ᑕᕝᕙᓂ ᐱᓕᕆᐊᒥ. ᖃᐅᔨᓴᖅᑏᑦ ᓇᓗᓇᐃᕐᓯᓯᒪᓕᕇᖅᒻᑐᑦ A.B. ᑎᒍᔭᐅᓂᕆᓚᐅᖅᑕᖓ ᐊᒻᒪ ᐊᑐᖅᑕᐅᓂᕆᓚᐅᖅᑕᖓ ᖃᓄᑎᒋ ᐊᑦᓱᕈᕐᓂᐅᔪᖅ ᑎᒍᔭᐅᓇᓱᐊᖅᑎᓪᓗᒍ ᓈᒻᒪᓚᐅᕐᒪᑕ. ᖃᐅᔨᓴᖅᑏᑦ ᐱᐅᖏᑦᑐᓂᑦ ᖃᐅᔨᓯᒪᔪᑦ ᐱᔾᔪᑎᖃᖅᑐᑎᒃ ᐃᓗᓕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᔾᔪᓯᖏᑕ, ᐱᖃᓯᐅᔾᔭᐅᓗᓂ ᖃᓄᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑦ ᐊᖁᑕᐅᓚᐅᕐᒪᖔᖅ ᐊᒻᒪ ᐊᔾᔨᒌᖏᑦᑐᑦ ᐱᔾᔪᑎᐅᔪᑦ ᐊᑦᑐᐊᓂᖃᖅᑐᑦ A.B. ᑎᒍᔭᐅᓯᒪᓂᖓᓂᑦ ᐊᒻᒪ ᑎᒍᔭᐅᓯᒪᕕᐅᑉ ᐃᓪᓗᕈᓯᐅᑉ ᖃᓄᐃᑦᑑᓂᖏᑦ ᐃᓗᐊᑕ. ᑕᐃᒪᐃᒃᑲᓗᐊᖅᑎᓪᓗᒋᑦ, ᓇᓗᓇᐃᔭᐃᑎᖃᖏᓯᐊᖅᑐᑦ ᓇᓗᓇᐃᔭᐃᔪᓂᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᑦ ᐊᑐᖅᑕᐅᓚᐅᕐᓂᖏᓐᓂᑦ ᐅᕕᓂᖃᑎᒌᖏᓐᓂᐅᔪᖅ ᐊᑐᖅᑕᐅᓗᓂ ᐅᕝᕙᓘᓐᓃᑦ ᓇᓪᓕᐊᑕ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᕐᒪᖔᑕ ᐃᓚᐃᓐᓈᓂᒃᑯᑦ ᐊᐅᓚᑦᓯᓂᕐᒪᖔᑕ ᐱᓪᓗᒍ A.B.

[362] ᑕᑯᓐᓇᖅᑐᒍ ᖃᓄᐃᓕᖓᒍᑎᐅᔪᖅ ᐃᓘᓐᓇᖓᒍᑦ, ᑭᓯᐊᓂᓕ, ᖃᐅᔨᓴᖅᑏᑦ ᑕᐃᒫᖑᓪᓗᓂ ᑭᓯᐊᓂ ᐃᓱᒪᒋᔭᖃᓕᖅᑐᑦ ᖃᓄᐃᑦᑑᓂᖓ ᐱᔨᑦᓯᕋᕐᓂᐅᕙᑦᑑᑉ ᑭᖕᖓᐃᑦ ᑎᒍᔭᐅᒪᕕᖓᓐᓂ ᓈᒻᒪᖏᑦᑐᒻᒪᕆᐅᔪᖅ. ᑕᒪᓐᓇ ᐃᓱᒫᓘᑎᐅᔪᖅ ᐱᓯᒪᔪᖅ ᖃᑦᓯᐅᓂᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᓕᔭᐅᓯᒪᔪᑦ ᓄᓇᓕᓐᓄᑦ, ᐊᒥᓲᓂᖏᓐᓄᑦ ᐃᓪᓗᕈᓯᐅᔪᑦ ᑎᒍᔭᐅᒪᕕᑦᓴᑦ ᐊᒻᒪ ᐃᓗᐊᑕ ᖃᓄᐃᓕᖓᓂᖓᓄᑦ ᑎᒍᔭᐅᒪᕕᐅᑉ, ᐊᒻᒪ ᐱᓕᒻᒪᓴᖅᑕᐅᖏᔾᔪᑎᐅᓯᒪᔪᑦ.

[363] ᑕᑯᑦᓴᐅᓪᓚᕆᑦᑐᑦ ᐊᒥᕋᕐᓯᓂᐅᔪᖅ ᐱᓕᕆᔾᔪᑎᑦᓴᓂᑦ ᐱᔾᔪᑎᐅᓚᐅᖅᑐᖅ ᓇᐅᒃᑯᑐᐃᓐᓇᑦᓯᐊᖅ ᐊᑐᖅᑕᐅᓚᐅᖅᑐᓂ A.B. ᐃᓚᒋᔭᐅᓗᓂ ᔪᓂ 1-2, 2020. ᐱᒋᐊᕐᕕᖏᓐᓂ, ᐊᑦᑐᐃᔾᔪᑎᐅᔪᑦ ᐃᖅᑲᓇᐃᔭᑭᑦᓴᓂᕐᒥᑦ ᐱᔾᔪᑎᐅᓚᕿᓪᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐃᖅᑲᓇᐃᔭᖅᐸᓕᖅᑐᑎᒃ ᐅᕙᑕᐃᖅᑐᑎᒃ ᐃᑲᕐᕋᖏᑕ ᓯᓚᑎᖏᒍᑦ ᐃᖅᑲᓇᐃᔭᐃᓐᓇᖅᑐᑎᒃ ᓈᒻᒪᖏᑦᑎᐊᖅᑐᑎᒃ ᐱᓕᕆᐊᖃᕋᓱᓐᓂᒃᑯᑦ ᐊᒥᓱᓂᑦ ᖃᓄᐃᒍᑎᐅᕙᑦᑐᓂᑦ ᐊᒻᒪ ᖁᕕᐊᓇᖏᑐᒻᒪᕆᓐᓂᑦ ᖃᓄᐃᓕᖓᒍᑎᐅᔪᓂᑦ ᓇᓗᓇᓚᐅᖏᑦᑐᖅ ᖃᓄᑎᒋ ᑐᐊᕕᐊᖃᖅᑐᑎᒃ ᐅᐸᓚᐅᕐᓂᖏᓐᓂᑦ A.B.-ᒥᑦ ᓄᓇᒃᑰᔫᕐᒥᓄᑦ. ᐊᒥᒐᕐᓯᕙᓐᓂᖅ ᐃᓪᓗᕈᓯᕐᓂᑦ ᑎᒍᔭᐅᒪᕕᑦᓴᓂᑦ, ᓱᓇᒃᑯᑖᓂᑦ ᐊᒻᒪ ᓈᒻᒪᑦᑐᓂᑦ ᐱᓕᒻᒪᑦᓴᐅᑎᖃᕋᑎᒃ ᑎᒍᔭᐅᒪᕕᒻᒥ ᐅᐊᑦᓯᐅᕙᑦᑐᖅ ᐃᑲᔫᑎᖃᖅᑐᐃᓐᓇᐅᓚᐅᖅᑐᑦ A.B. ᓇᔪᖅᑎᑕᐅᓂᖓᓄᑦ ᐅᓗᕆᐊᓇᖅᑐᒻᒪᕆᒻᒥ ᐊᑦᓱᑲᓪᓚᒃ ᐋᓐᓂᑎᖅᑕᐅᓚᕿᓕᖅᑐᓂ ᑎᒍᔭᐅᒪᕕᒻᒦᑎᓪᓗᒍ ᐃᓪᓗᕈᓯᕐᒥ. ᐃᑲᔫᑎᖃᓚᐅᕐᒥᔪᑦ ᑎᑎᕋᖅᑕᐅᖏᓚᕿᓂᖏᓐᓂᑦ ᐊᒻᒪ ᐅᖃᐅᓯᐅᒐᑎᒃ ᑐᑭᓯᒋᐊᕈᑎᐅᔪᑦ ᐱᓪᓗᒍ ᐸᕐᓇᐅᑎᐅᓯᒪᔪᖅ ᐱᔭᕆᐊᖃᕐᓂᕐᒥᑦ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᓗᓂ A.B. ᐊᒻᒪᑦᑕᐅᖅ, ᐱᓕᕆᔾᔪᑎᒍᑦ ᓄᖅᑲᖓᐅᑎᐅᔪᑦ ᐊᑐᖅᑕᐅᓚᕿᓐᓂᕐᒪᑕ ᐊᑕᐅᑦᑎᒃᑯᑦ ᐊᒻᒪ ᖃᓄᐃᑦᑑᓂᖓᒍᑦ ᐋᓐᓂᐊᔪᓕᕆᔾᔪᑎᐅᔪᑦ ᐊᑐᐃᓐᓇᐅᓚᐅᖅᑐᑦ ᑕᐃᑦᓱᒪᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᕿᓂᕈᑎᖃᖅᑎᓪᓗᒋᑦ A.B.ᒥᑦ. ᐊᑐᐃᓐᓇᐅᔪᑦ ᑐᑭᓯᒋᐊᕈᑎᐅᔪᑦ ᓇᓗᓇᐃᔭᐃᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑕᕝᕙᓂ ᐱᓕᕆᐊᒥ ᐊᑦᓱᑲᓪᓚᐅᔪᖅ ᖃᓄᖅᑑᕋᓱᑉᐸᓐᓂᕋᓗᐊᕐᒪᑕ ᐊᐅᓚᑦᓯᓇᓱᐊᖅᑐᑎᒃ ᐊᒥᓱᑲᓪᓚᓐᓂᒃ ᐱᔭᑦᓴᒥᓂᒃ ᐱᑎᓪᓗᒋᑦ ᓄᖅᑲᖓᐅᑎᒋᕙᑦᑕᖏᑦ ᓵᖓᕙᑦᑕᓂ. ᖃᓄᖅᑑᕋᓱᓚᐅᕋᓗᐊᕋᒥᒃ, ᐃᓘᓐᓇᖏᒍᑦ ᐱᓗᐊᔾᔭᐃᑎᑦᓯᒍᓐᓇᓚᐅᖏᑦᑐᑦ ᐊᑦᑐᐃᔾᔪᑎᒥᑦ ᐱᑕᖃᖏᓐᓂᖏᓐᓂᑦ ᐱᓕᕆᔾᔪᑎᐅᔪᑦ A.B.-ᒥᑦ ᐊᒻᒪ ᐊᓯᖏᓐᓂᑦ ᑎᒍᔭᐅᒪᕙᑦᑐᓂᑦ ᑎᒍᔭᐅᒪᕕᒻᒥ.

[364] ᑲᓇᑕᒥᐅᑕᐃᑦ ᐱᑎᑕᐅᒋᐊᖃᖅᐸᒻᒪᑕ ᓈᒻᒪᑦᑐᒥᑦ ᐱᔨᑦᓯᕋᖅᑕᐅᓂᒃᑯᑦ, ᓇᒥᒥᐅᑕᐅᒐᓗᐊᕈᑎᒃ. ᑐᖁᐊᕐᓵᓇᖅᑐᖅ ᖃᓄᑎᒋ ᐱᑕᖃᕐᓂᖓ ᐱᓕᕆᔾᔪᑎᖃᑦᑎᐊᖏᓐᓂᐅᔫᑉ ᑕᑯᑦᓴᐅᔫᑉ ᑕᕝᕙᓂ ᐱᓕᕆᐊᒥ ᓴᖅᑭᕐᓯᒪᔪᑦ ᐃᓱᒫᓘᑎᑦᓴᓂᑦ ᓴᖅᑮᓯᒪᔪᑦ ᐱᑕᖃᑐᐃᓐᓇᕆᐊᖃᕐᓂᖓᓄᑦ ᐱᓕᕆᔾᔪᑎᒍᑦ ᐃᓚᐃᓐᓈᓂᕐᒥᑦ.

[365] ᒪᓕᑦᑐᒋᑦ ᑲᓇᐃᑎᐊᓐ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᑦ ᒪᓕᒐᖅ (CHRA), ᐃᓚᐃᓐᓈᕆᐊᖃᖏᑦᑐᖅ ᑭᒃᑯᑐᐃᓐᓇᕐᓂᒃ ᐱᔾᔪᑎᖃᕐᓗᑎᒃ ᐅᕕᓂᖃᑎᒋᖏᑕᒥᓂᒃ, ᐅᕝᕙᓘᓐᓃᑦ ᑲᓇᑕᒥᐅᑕᐅᓂᕐᒥᑦ ᐅᕝᕙᓘᓐᓃᑦ ᐊᓯᖏᓐᓂᑦ ᓄᓇᓕᖃᕐᓂᕐᒥᑦ.^{Footnote 60} ᑕᒪᒃᑯᐊ ᐱᓕᕆᔾᔪᑎᐅᔪᑦ ᑎᑎᕋᕐᓯᒪᔪᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᑦ ᒪᓕᒐᕐᒥ (CHRA) ᖃᐅᔨᔭᐅᓯᒪᔪᑦ ᐊᑐᖅᑕᐅᔭᕆᐊᖃᕐᓂᖏᓐᓂᑦ ᒪᓕᒐᓕᕆᓂᕐᒥᑦ ᓯᕗᓕᖅᑎᓄᑦ.^{Footnote 61}

[366] ᐃᖅᑲᖅᑐᐃᕕᔾᔪᐊᖅᑎᖓᑦ ᑲᓇᑕ ᐅᕙᓂ ᒧᐊᕐ ᐊᑭᕋᖅᑐᖅᑐᖅ ᐳᕆᑎᔅ ᑲᓚᒻᐱᐊᒥᑦ (ᐃᓕᓐᓂᐊᖅᑐᓕᕆᓂᖅ), ᐋᖅᑮᓚᐅᖅᑐᑦ ᖃᐅᔨᓴᐅᑎᑦᓴᒥᑦ ᖃᐅᔨᓴᖅᑕᐅᖁᓪᓗᒋᑦ ᐸᓯᐅᕆᔾᔪᑎᐅᓯᒪᔪᑦ ᐃᓚᐃᓐᓈᕐᓂᐅᔪᒥᑦ ᒪᓕᑦᑕᐅᓗᑎᒃ ᑭᓇᒧᑦ ᐊᑦᑐᖅᑕᐅᓯᒪᔪᒧᑦ ᓴᖅᑮᖄᕆᐊᖃᕐᓂᖏᓐᓂᑦ ᐱᐅᖏᑐᒃᑯᑦ ᐊᑦᑐᖅᑕᐅᓯᒪᓂᕐᒥᓂᒃ ᒪᓕᑦᑐᒋᑦ ᐊᑐᖅᑕᐅᖁᔭᐅᓯᒪᖏᑦᑐᑦ ᐃᓚᐃᓐᓈᕐᓂᐅᔪᐃᑦ.

[367] ᐸᓯᐅᕆᔾᔪᑎᐅᓯᒪᔪᑦ ᐱᓪᓗᒍ ᐃᓚᐃᓐᓈᕐᓂᐅᔪᖅ ᓇᓗᓇᐃᖅᑕᐅᓂᐊᕈᓂ, ᓇᓗᓇᐃᔭᐃᑎᐅᔪᑦ ᑕᑯᑦᓴᐅᑎᑦᓯᒋᐊᓖᑦ, ᓱᓕᑐᐃᓐᓇᕆᐊᖃᕐᓂᖏᓐᓂᑦ ᐊᑐᖅᑕᐅᓗᓂ, ᐅᑯᓂᖓ:

• i) ᑕᐃᓐᓇ ᑭᓇ ᐊᑐᖅᑕᐅᓯᒪᔪᖅ ᐱᓯᒪᑦᓯᒍᓂ ᐊᑕᐅᓯᕐᒥᑦ (1) ᐊᒥᓲᓂᕐᓴᓂᓪᓘᓐᓃᑦ ᐱᐅᓯᐅᔪᓂᑦ ᓴᐳᔾᔭᐃᓯᒪᓂᖃᖅᑐᓂᑦ ᐱᔾᔪᑎᐅᔪᓂᑦ ᐱᓪᓗᒍ ᐃᓚᐃᓐᓈᕐᓂᐅᔪᖅ;
• ii) ᐊᑐᓚᐅᖅᑐᑦ ᐱᐅᖏᑐᒃᑯᑦ ᐊᑦᑐᐃᔾᔪᑎᐅᔪᒥᑦ; ᐊᒻᒪ
• iii) ᓴᐳᒻᒥᔭᐅᓯᒪᔪᖅ ᐱᐅᓯᐅᔪᖅ ᐱᔾᔪᑎᐅᓚᐅᖅᑐᖅ ᐱᐅᖏᑐᒃᑯᑦ ᐊᑦᑐᐃᔾᔪᑎᐅᔪᒧᑦ.

[368] ᐱᖓᓲᔪᖅ (3) ᐱᔾᔪᑎᐅᓯᒪᔪᑦ ᐋᖅᑭᑦᑕᐅᓯᒪᒍᑎᒃ ᓱᓕᑐᐃᓐᓇᕆᐊᖃᕐᓂᖏᓐᓂᑦ, ᑕᑯᔭᐅᒋᐊᖓᐅᑎᒃᑯᑦ (prima facie) ᐱᓕᕆᔾᔪᑎᐅᓗᓂ ᐃᓚᐃᓐᓈᕐᓯᒪᓂᕐᒥᑦ ᐋᖅᑮᒐᔭᖅᑐᑦ. ᑕᒪᐅᓇ ᑐᑭᖃᖅᑐᖅ, ᐃᓚᐃᓈᖏᔾᔪᑎᐅᔪᕕᓂᕐᒥᑦ ᐅᖃᐅᓯᖃᕆᐊᖅᑐᖃᕈᓐᓇᖅᐸᑦ ᐊᑐᕆᐊᖃᓚᐅᕐᓂᖏᓐᓂᑦ ᓱᒻᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᓐᓂᑦ, ᖃᐅᔨᔭᐅᔪᓐᓇᖅᑐᑦ ᐃᓚᐃᓐᓈᒃᑯᑦ ᐱᓕᕆᔾᔪᑎᖃᕐᓯᒪᓂᖓᓂᑦ.

[369] ᑭᓇᑐᐃᓐᓇᖅ ᓯᕗᒧᐊᑦᑕᐅᒍᓂ ᑕᑯᔭᐅᒋᐊᖓᐅᑎᒃᑯᑦ (prima facie) ᐱᓕᕆᔾᔪᑎᐅᓗᓂ, ᓇᓗᓇᐃᔭᐃᑎᓂᑦ ᓴᖅᑮᒋᐊᖃᓕᕋᔭᖅᑐᑦ ᐱᔨᑦᓯᕋᖅᑎᐅᔪᖅ ᓇᓗᓇᐃᕐᓂᐊᕐᓗᓂᐅᒃ ᐊᔾᔨᒌᖏᑦᑐᒃᑯᑦ ᐱᓕᕆᔾᔪᑎᖃᕐᓂᐅᔪᖅ ᐊᑐᖅᑕᐅᒋᐊᖃᓚᐅᕐᓂᖓᓄᑦ ᓱᒻᒪᑦ. ᓈᒻᒪᑦᑐᒥᑦ ᐅᖃᐅᓯᐅᒃᑲᓐᓂᕈᓐᓇᖏᑉᐸᑦ ᐅᕝᕙᓘᓐᓃᑦ ᓇᓗᓇᐃᔭᐃᑎᓂᑦ ᓴᖅᑭᕆᐊᓕᓐᓂᑦ ᓴᖅᑮᔪᖃᖏᑉᐸᑦ, ᓇᓗᓇᐃᔭᐃᑎᓕᐅᕋᓱᐊᖅᑐᖅ ᓴᖅᑮᔪᓐᓇᖅᑐᑦ ᐃᓚᐃᓐᓈᓂᒃᑯᑦ ᐱᓕᕆᔾᔪᑎᐅᓯᒪᔪᓂᑦ ᐊᒻᒪ ᖃᐅᔨᔭᐅᓗᑎᒃ ᑖᒃᑯᐊ ᒪᓕᑦᑕᐅᓗᑎᒃ.

[370] ᐱᔾᔪᑎᒋᓪᓗᒋᑦ ᖃᐅᔨᓴᐅᑎᐅᔪᖅ ᖁᓪᓕᕐᒦᑦᑐᖅ, ᐊᑕᐅᓯᒃᑰᕐᓯᒪᔪᓂᑦ ᓇᓗᓇᐃᔭᐃᑎᓂᑦ ᑕᑎᒋᔭᖃᕈᓐᓇᖅᑐᑦ ᓴᖅᑮᔾᔪᑎᐅᓂᐊᕐᓗᑎᒃ ᖁᓚᕐᓇᐅᑎᓂᑦ ᐱᐅᓯᐅᓂᕋᖅᑕᐅᓯᒪᔪᖅ ᐱᓪᓗᒍ.^{Footnote 62} ᓇᓗᓇᐃᕐᓯᒋᐊᑐᖏᑦᑐᑦ ᐊᐅᓚᑦᓯᔾᔪᑎᐅᓚᐅᖅᑐᖅ ᐊᔾᔨᖃᑐᐃᓐᓇᓚᐅᕐᓂᖓᓂᑦ ᐃᓚᐃᓐᓈᕐᓂᐅᑉ,^{Footnote 63} ᐊᒻᒪ ᓇᓗᓇᐃᔭᐃᑎᖓ ᐊᑐᖅᑕᐅᓇᓱᐊᕐᓂᖓᓄᑦ ᐃᓚᐃᓐᓈᕐᓂᐅᔫᑉ ᐱᑕᖃᕆᐊᑐᖕᖏᑦᑐᑦ.^{Footnote 64} ᐃᖅᑲᖅᑐᐃᕕᓕᕆᔨᐅᔪᑦ ᐅᖃᕐᓯᒪᔪᑦ ᑐᕌᒐᐅᔭᕆᐊᖃᕐᒪᑕ ᖃᓄᖅ ᐱᕙᓪᓕᐅᑎᔾᔪᑎᐅᔪᑦ ᒪᒥᓴᐅᑎᐅᑉ, ᑕᑯᓐᓇᖏᓪᓗᒍ ᐊᑐᖅᑕᐅᒍᒪᔾᔪᑎᖓ ᐅᕝᕙᓘᓐᓃᑦ ᐊᑑᑎᒋᓇᓱᐊᖅᑕᖓ.^{Footnote 65}

[371] ᓇᓗᓇᐃᔭᐃᑎᐅᔪᑦ ᐃᑲᔪᕐᓱᐃᔾᔪᑎᐅᔪᓐᓇᖅᑐᑦ ᖃᐅᔨᔭᐅᓯᒪᔪᓂᑦ ᐊᔾᔨᒌᖏᑐᒃᑯᑦ ᐱᓕᕆᔾᔪᑎᖃᖅᑐᒥᑦ ᐊᑐᖅᑕᐅᓕᖅᑐᓂ ᐃᓚᐃᓐᓈᕐᓂᐅᔪᖅ ᓴᖅᑭᕈᓐᓇᕐᒪᑕ ᐅᖃᐅᓯᖃᖏᑦᑐᒥᓂᐅᔪᖃᕐᓂᖓᓄᑦ ᓈᒻᒪᑦᑐᒥᑦ, ᑐᑭᖃᑦᑎᐊᖅᑐᒥᑦ ᐅᕝᕙᓘᓐᓃᑦ ᐊᔾᔨᒌᑦᑐᒥᑦ ᓇᓗᓇᐃᔭᐃᑎᑦᓴᓂᑦ ᖃᓄᖅ ᐱᓕᕆᔪᖃᓕᕐᓂᖓᓄᑦ.^{Footnote 66} ᐱᒻᒪᕆᐅᔪᖅ ᐃᓱᒪᑦᓴᕐᓯᐅᕈᑎᐅᒋᐊᓕᒃ ᖃᐅᔨᓴᖅᑐᖃᖅᑎᓪᓗᒍ ᓴᐳᒻᒥᔭᐅᔪᒥᑦ ᐱᐅᓯᐅᔪᒥᑦ ᐊᑐᖅᑕᐅᔪᖃᕐᓂᕐᒪᖔᖅ ᐱᐅᖏᑐᒃᑯᑦ ᐊᑦᑐᐃᔾᔪᑎᐅᔪᒥᑦ ᑕᑯᓐᓇᖅᑕᐅᔪᒥᑦ ᐃᓗᖏᓐᓂ ᐸᓖᓯᓕᕆᓂᐅᑉ ᓇᓗᓇᐃᔭᐃᑎᖃᕋᓗᐊᕐᒪᖔᖅ ᓇᓗᓇᐃᕐᓯᒪᔪᒥᑦ ᕿᒪᐃᓯᒪᔪᓂᑦ ᐱᔾᔪᓯᒍᑦ ᐸᓖᓯᓕᕆᔾᔪᑎᓂᑦ.^{Footnote 67}

[372] ᐊᑐᖅᑕᐅᓗᑎᒃ ᒪᓕᒐᓕᕆᓂᒃᑯᑦ ᖃᐅᔨᓴᐅᑎᐅᔪᑦ ᐊᑐᖅᑕᐅᓯᒪᔪᓄᑦ ᑕᕝᕙᓂ ᐱᓕᕆᐊᒥ, ᖃᐅᔨᓴᖅᑏᑦ ᖃᐅᔨᒪᖁᔨᔪᑦ 93%-ᐳᓴᓪᓗᐊᖑᔪᑦ ᑭᖕᖓᕐᒥᐅᑕᐃᑦ ᐃᓅᒻᒪᑕ, ᐱᖃᓯᐅᔾᔭᐅᓗᓂ A.B. A.B. ᐊᑐᖅᑕᐅᔪᕕᓂᖅ ᐊᒥᓱᑲᓪᓚᓐᓂᒃ ᐱᐅᖕᖏᑐᒃᑯᑦ ᐊᑦᑐᐃᔾᔪᑎᐅᔪᓂᑦ ᑕᐃᑲᓂ ᐅᓐᓄᖓᓂ ᖃᓄᐃᓕᐅᕐᕕᒥᓂᐅᑎᓪᓗᒍ ᐅᖃᐅᓯᐅᔪᓂᑦ. ᐊᓯᖏᑦ ᓄᓇᓕᕐᒥᐅᑕᐅᔪᑦ ᑕᐃᒪᐃᑦᑐᑦᓴᐅᕙᒻᒥᔪᑦ ᐱᓕᕆᔾᔪᑎᐅᕙᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ, ᐱᔾᔪᑎᒋᓪᓗᒋᑦ ᓈᒻᒪᖏᑦᑐᒻᒪᕆᐅᔪᑦ ᐃᖅᑲᓇᐃᔭᖅᑎᖃᕐᓂᒃᑯᑦ ᐊᒻᒪ ᑕᑯᑦᓴᐅᔪᑦ ᐱᓕᕆᔾᔪᑎᐅᔪᑦ ᓴᖅᑭᖅᑕᐅᓯᒪᔪᑦ ᓇᓗᓇᐃᔭᐃᑎᓂᑦ. ᐅᐃᒍᖓ ᐱᓪᓗᒋᑦ ᓴᐳᒻᒥᔭᐅᔾᔪᑎᐅᔪᑦ ᐱᐅᓯᐅᔪᑦ ᐊᒻᒪ ᑕᒪᒃᑯᐊ ᐱᐅᖏᑐᒃᑯᑦ ᐊᑦᑐᐃᔾᔪᑎᐅᔪᑦ, ᐅᐱᓐᓇᕋᓂ, ᐱᔭᕆᐊᑐᔪᑦ ᓇᓗᓇᐃᕋᓱᑦᑐᒋᑦ ᓱᓕᒐᓗᐊᕐᒪᖔᑕ. ᒥᑭᑳᖏᒍᑦ, ᓈᒻᒪᖏᑦᑐᓂᑦ ᐱᔨᑦᓯᕋᕈᑎᖃᕐᓂᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᕈᓐᓇᖅᑕᖏᓐᓂᑦ ᑭᖕᖓᕐᓂ ᐱᒻᒪᕆᐅᔪᓂᑦ ᐃᓱᒫᓘᑎᐅᔪᓂᑦ ᓴᖅᑮᓯᒪᔪᑦ ᐱᓪᓗᒍ ᐱᓕᕆᔾᔪᑎᒍᑦ ᐊᔾᔨᒌᖏᑎᑦᓯᓂᖅ.

[373] ᐱᔾᔪᑎᒋᓪᓗᒍ ᐱᔭᕆᐊᑐᓂᖓ ᑕᑯᓐᓇᖕᖑᐊᕆᐊᑦᓴᖅ ᑕᒪᓐᓇ ᐱᓕᕆᔾᔪᑎᑦᓴᑭᓐᓂᐅᔪᖅ ᓈᒻᒪᒋᔭᐅᒐᔭᕐᓂᖓᓄᑦ ᐊᓯᖏᓐᓄᑦ ᓄᓇᓕᐅᔪᓄᑦ, ᐱᓕᕆᔾᔪᑎᒍᑦ ᐊᔾᔨᒌᖏᑎᑦᓯᓂᕐᒥᑦ ᐊᑐᖅᑐᖃᑐᐃᓐᓇᕆᐊᓕᒃ. ᓇᓗᓇᐃᖁᓪᓗᒍ ᐊᑲᐅᖏᓕᐅᕈᑎᐅᔪᖅ ᖃᓄᐃᓪᓗᐊᕐᒪᖔᖅ ᐊᒻᒪ ᖃᐅᔨᓴᖅᑕᐅᖁᓪᓗᒋᑦ ᐃᓂᖅᑎᕆᔾᔪᑎᐅᒋᐊᑐᖕᖏᑦᑐᓂᑦ ᐅᖃᐅᑎᑦᓴᖃᖅᑐᖃᕐᒪᖔᖅ ᖃᓄᐃᓕᖓᒍᑎᐅᔪᖅ ᐱᓪᓗᒍ, ᐊᓯᖏᓐᓂᒃ ᑐᑭᓯᒋᐊᒃᑲᓐᓂᕆᐊᖃᕐᓂᐊᖅᑐᑦ.

[374] ᖃᐅᔨᓴᖅᑏᑦ ᐊᑐᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᖅ ᐊᔾᔨᒌᖏᔾᔪᑎᖃᐅᕐᒪᖔᑕ ᐊᔾᔨᒌᖃᐅᑎᖃᕐᒪᖔᑕᓗ ᖃᐅᔨᓴᖁᔨᔪᖅ ᐱᓕᕆᔾᔪᑎᓂᑦ ᐊᒻᒪ ᑮᓇᐅᔭᑎᒍᑦ ᖃᓄᐃᓕᖓᒍᑎᐅᔪᓂᑦ ᑎᒍᔭᐅᒪᕕᖏᓐᓂᑦ ᓄᓇᕘᒥ ᐊᓯᖏᓐᓂᑦ ᐊᔾᔨᐸᓗᖏᓐᓂᑦ ᑎᒍᔭᐅᒪᕕᓕᓐᓂᑦ ᓄᓇᓕᖃᕐᕕᐅᔪᓂ ᐊᒻᒪ ᑐᓴᐅᒪᑎᑦᑎᒐᔭᕐᓗᑎᒃ ᖃᐅᔨᓴᐅᑎᒥᓂᖏᓐᓂᑦ ᖃᐅᔨᓴᖅᑎᓂᑦ.

[375] ᒫᓐᓇᐅᔪᕐᓕ, ᖃᓄᐃᓕᐅᕆᐊᑦᑕᐅᑎᒋᒋᐊᖃᓕᖅᑐᑦ ᑲᒪᒋᔭᐅᖁᓪᓗᒋᑦ ᐊᑲᐅᖏᓕᐅᕈᑎᒻᒪᕆᐅᔪᑦ ᖃᓄᐃᓕᖓᓂᒃᑯᑦ ᑭᖕᖓᕐᓂ ᐊᒻᒪ ᐊᓯᖏᓐᓂ ᓄᓇᕘᒥ ᓄᓇᓕᐅᔪᓂ ᓵᖕᖓᒻᒥᔪᓂᑦ ᐊᔾᔨᐸᓗᖏᓐᓂᑦ ᐱᔾᔪᑎᐅᔪᓂᑦ. ᖃᐅᔨᓴᖅᑏᑦ ᑐᑭᓯᐊᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑕᐅᓯᑐᐃᓐᓇᐅᖏᑦᑐᓂᑦ ᖃᓄᐃᓕᐅᓗᐊᕈᓐᓇᐸᖕᖏᑦᑐᑦ ᐱᔾᔪᑎᒋᓪᓗᒋᑦ ᐱᓕᕆᔾᔪᑎᑦᓴᑦ. ᑕᐃᒪᐃᒻᒪᑦ, ᐊᑐᖁᔭᐅᓕᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒫᓐᓇᑲᐅᑎᒋ ᐅᖃᖃᑎᖃᖁᔭᐅᓗᑎᒃ ᒐᕙᒪᒃᑯᓐᓂᑦ ᓄᓇᕘᒧᑦ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᓇᓗᓇᐃᕐᓯᒪᖁᓪᓗᒋᑦ ᓈᒻᒪᑦᑐᓂᑦ ᐱᓕᕆᔾᔪᑎᑦᓴᓂᑦ ᐊᒻᒪ ᑮᓇᐅᔭᑦᓴᓂᑦ ᐱᑎᑦᓯᖁᔭᐅᓗᑎᒃ ᓄᓇᕘᒥ ᑎᒍᔭᐅᒪᕕᓐᓂᑦ ᓈᒻᒪᔾᔫᒥᔪᓂᑦ ᐱᔨᑦᓯᕋᐅᑎᖃᖅᐸᓂᐊᕐᒪᑕ ᑭᖕᖓᐃᑦ ᑎᒍᔭᐅᒪᕕᖓᑦ ᐊᒻᒪ ᐊᓯᖏᑦ ᓄᓇᕘᒥ ᑎᒍᔭᐅᒪᕕᓖᑦ ᐱᓕᕆᕝᕕᐅᔪᑦ ᐸᓖᓯᒃᑯᓐᓄᑦ ᑕᐃᒫᐸᓗᑦᑕᐅᖅ ᓵᖕᖓᕙᑦᑐᓂᑦ ᖃᓄᐃᒍᑎᐅᔪᓂᑦ ᐃᓪᓗᖁᑎᖏᓐᓂ.

ᐃᓱᐊ

[376] ᐃᓱᒪᑦᓴᕐᓯᐅᕈᑎᐅᓚᐅᖅᑐᓂ ᐊᑲᐅᖏᓕᐅᕈᑎᐅᓯᒪᔪᖅ, ᖃᐅᔨᓴᖅᑏᑦ ᑐᓂᓯᓕᖅᐳᑦ ᐅᓂᒃᑳᓕᐊᕆᑲᐃᓐᓇᕐᓯᒪᔭᕐᒥᓂᒃ ᑭᖑᓂᐊᒍᑦ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᒍᒪᔪᒥᑦ ᖃᐅᔨᓴᕐᓂᐅᔪᒥᑦ ᒪᓕᑦᑕᐅᓗᑎᒃ ᑎᑎᕋᕐᓯᒪᕕᒻᒦᑦᑐᑦ 45.76(1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᒪᓕᒐᖅ.

ᒥᓯᓚᐃᓐ ᓚᕼᐊᐃ
ᐃᒃᓯᕙᐅᑕᖅ